“Subɔsubɔ Kɔkɔe Si Miawɔ Kple Miaƒe Tamebubu Ƒe Ŋutete”

“Miatsɔ miaƒe ŋutilãwo awɔ vɔsasa gbagbe, si ŋuti kɔ, si dze Mawu ŋu, esi anye subɔsubɔ kɔkɔe si miawɔ kple miaƒe tamebubu ƒe ŋutete.”—ROMATƆWO 12:1, NW.

 1, 2. Aleke Biblia ƒe gɔmeɖosewo ŋudɔwɔwɔ sɔsrɔ̃ le abe gbe yeye sɔsrɔ̃ ene?

ÈTE gbe yeye aɖe sɔsrɔ̃ kpɔa? Ne ètee kpɔ la, ɖikeke mele eme o be àlɔ̃ ɖe edzi be mele bɔbɔe o. Ebia nu geɖe wu nya yeyewo sɔsrɔ̃ ko. Gbe aɖe dodo nyuie bia be woanya eƒe gbeŋutise hã nyuie. Ele be nàkpɔ alesi nyawo do ƒome kple wo nɔewo kple alesi wofɔa wo kpena tsɔ gblɔa nyae eme kɔna.

² Nenema tututue Mawu ƒe Nya la ŋuti sidzedze si asu mía si hã le. Ebia nu geɖe wu Ŋɔŋlɔ tiatia aɖewo ko sɔsrɔ̃. Le kpɔɖeŋunyagbɔgblɔ nu la, ele be míasrɔ̃ Biblia ƒe gbeŋutise. Ehiã be míase alesi Ŋɔŋlɔawo de nu wo nɔewo me kple alesi wonye gɔmeɖose siwo ŋudɔ woate ŋu awɔ le gbesiagbegbenɔnɔ me la gɔme. Esia awɔe be ‘míabi nyuie eye míanɔ dzadzraɖoɖi hena dɔ nyui sia dɔ nyui wɔwɔ.’—Timoteo II, 3:17.

 3. Tɔtrɔ kae va le ƒe 33 M.Ŋ. me le Mawu subɔsubɔ ŋu?

³ Le Mose ƒe Sea ƒe ɖoɖoa me la, woate ŋu aɖe nuteƒewɔwɔ afia to se siwo wode eme kɔ me léle ɖe asi sesĩe me. Gake le ƒe 33 M.Ŋ. me la, Yehowa ɖe Sea ɖa to ‘ekaklã ɖe fuwɔameti’ si ŋu wowu Via ɖo la ŋuti me. (Kolosetɔwo 2:13, 14) Le ema megbe la, womegatsɔ vɔsanuwo kple se geɖe ɖo Mawu ƒe dukɔa dzi o. Ke boŋ wogblɔ na wo be: “Miatsɔ miaƒe ŋutilãwo awɔ vɔsasa gbagbe, si ŋuti kɔ, si dze Mawu ŋu, esi anye subɔsubɔ kɔkɔe si miawɔ kple miaƒe tamebubu ƒe ŋutete.” (Romatɔwo 12:1, NW) Ẽ, wobia tso Kristotɔwo si be woatsɔ woƒe dzi blibo, luʋɔ blibo, tamesusu blibo, kple ŋusẽ blibo aku kutri le Mawu subɔsubɔ me. (Marko 12:30; tsɔe sɔ kple Psalmo 110:3.) Gake nukae wòfia be ‘míatsɔ tamebubu ƒe ŋutete awɔ subɔsubɔ kɔkɔe’?

 4, 5. Nukae míaƒe tamebubu ƒe ŋutete tsɔtsɔ subɔ Yehowae bia?

⁴ Helagbe me nya lo·gi·kosʹ si gɔmee nye “nugɔmesese” alo “nunyanya” mee woɖe nyagbɔgblɔ “tamebubu ƒe ŋutete” tsoe. Wobia tso Mawu subɔlawo si be woawɔ woƒe dzitsinya si wotsɔ Biblia hee la ŋudɔ. Le esi teƒe be Kristotɔwo nanɔ te ɖe se gbogbo siwo wode dzi awɔ woƒe nyametsotsowo la, wobia tso wo si be woada Biblia me gɔmeɖosewo kpɔ nyuie. Ehiã be woase Biblia ƒe “gbeŋutise” alo alesi eƒe gɔmeɖose vovovoawo do ƒome kple wo nɔewoe gɔme nyuie. Esia awɔe be woatsɔ woƒe tamebubu ƒe ŋutete awɔ nyametsotso siwo da sɔ.

⁵ Ðe esia fia be se mele Kristotɔwo si oa? Kura o. Kristotɔwo ƒe Hela Ŋɔŋlɔawo de se ɖe ahasiwɔwɔ, agbegbegblẽnɔnɔ, amewuwu, alakpadada, gbɔgbɔyɔyɔ, ʋu zazã madzemadzee, kple nuvɔ̃ ƒomevi bubuwo nu eme kɔ. (Dɔwɔwɔwo 15:28, 29; Korintotɔwo I, 6:9, 10; Nyaɖeɖefia 21:8) Gake ede to sã wu alesi wobia tso Israel-viwo si, ele be míazã míaƒe tamebubu ƒe ŋutete atsɔ asrɔ̃ Biblia me gɔmeɖosewo ahawɔ wo dzi. Abe alesi gbe yeye sɔsrɔ̃ le ene la, exɔa ɣeyiɣi eye wòhiã na agbagbadzedze. Aleke míate ŋu atu míaƒe tamebubu ƒe ŋutete ɖoe?

Wò Tamebubu ƒe Ŋutete Tutuɖo

 6. Nukae Biblia sɔsrɔ̃ bia?

⁶ Gbã la, ele be míanye Biblia-srɔ̃la dovevienuwo. Mawu ƒe Nya si tso gbɔgbɔ me la, “[enyo] hã na nufiafia, na mokaka, na ɖɔɖɔɖo, na amehehe, si le dzɔdzɔenyenye me.” (Timoteo II, 3:16) Mele be míakpɔ mɔ ɣesiaɣi be woaŋlɔ kuxi aɖe gbɔ kpɔnu ɖe Biblia-kpukpui ɖeka ko me o. Ke boŋ ahiã be míade ŋugble le mawunyakpukpui geɖe siwo ƒo nu tso nɔnɔme alo kuxi tɔxɛ aɖe ŋu la ŋuti. Ahiã be míadi nusi tututu nye Mawu ƒe susu le nyaa ŋu la vevie. (Lododowo 2:3-5) Nugɔmesese hã hiã mí elabena ‘nugɔmesela sie mɔ sɔsɔe suna.’ (Lododowo 1:5) Nugɔmesela ate ŋu akpɔ nya aɖe ƒe akpa vovovoawo eye emegbe wòakpɔ alesi wodo ƒome kple wo nɔewo. Abe alesi nya ɖekaɖeka siwo woafɔ akpe ƒe biabiawo le ene la, nugɔmesela fɔa nuwo kpena bene wòate ŋu akpɔ alesi tututu nua le.

 7. Aleke dzilawo ate ŋu abu Biblia ƒe gɔmeɖose le tohehe ŋuti la ŋui?

⁷ Le kpɔɖeŋu me, bu dzilanyenye ƒe nya ŋu kpɔ. Lododowo 13:24 gblɔ be vifofo si lɔ̃ via la “tsona ɖe tohehe ŋu bla.” Ne míebu nya sia ɖeɖeko ŋu la, woate ŋu azã mawunyakpukpui sia ɖe mɔ gbegblẽ nu atsɔ ada asi ɖe ŋutasesẽ ƒe tohehe atraɖii dzi. Gake Kolosetɔwo 3:21 na nuxlɔ̃ame si da sɔ nyuie be: “Mi fofowo la, migado dziku na mia viwo, bene dzika nagatso wo ƒo o.” Dzila siwo zãa woƒe tamebubu ƒe ŋutete eye wowɔa gɔmeɖose siawo ŋudɔ wòsɔna la mazã tohehe si woate ŋu ayɔ be enye “ŋlɔmiwɔwɔ” la o. Woawɔ nu ɖe wo viwo ŋu le lɔlɔ̃, nugɔmesese, kple bubu me. (Efesotɔwo 6:4) Eyata le vinyinyi alo nya bubu aɖe si ku ɖe Biblia me gɔmeɖose ŋu me la, míate ŋu atu míaƒe tamebubu ƒe ŋutete ɖo to nya vovovoawo dadakpɔ me. Míato esia me akpɔ Biblia ƒe “gbeŋutisea,” nusi Mawu ɖo kple alesi wòɖo be yeawɔe, adze sii.

 8. Aleke míawɔ be nukpɔsusu sesẽ kpaɖiwo maganɔ mía si le modzakaɖeɖewo gome o?

⁸ Mɔ evelia si nu míate ŋu atu míaƒe tamebubu ƒe ŋutete ɖoe nye be míatsri se ƒe nukpɔsusu sesẽwo me léle ɖe asi. Nukpɔsusu sesẽ tsɔtsɔ kpɔ nui menana míaƒe tamebubu ƒe ŋutete tsina o. Bu modzakaɖeɖe ŋu kpɔ. Biblia gblɔ be: “Xexeme blibo la katã le vɔ̃ɖitɔ la me.” (Yohanes I, 5:19) Ðe esia fia be agbalẽ, sinima, alo television dzi nukpɔkpɔ ɖesiaɖe si xexeame wɔna la ƒaƒã eye wòtso Satana gbɔa? Susu manɔ nukpɔsusu sia me o. Nyateƒee, ame aɖewo aɖoe be yewoagbe nu le television, sinima, alo xexemegbalẽwo gbɔ keŋkeŋ. Woawo ŋutɔe dii nenema eye mele be woaɖe ɖeklemi wo o. Nenema ke mele be woawo hã nate kpɔ be yewoazi ame bubuwo dzi be tenɔnɔ kpaɖii ma ke nanɔ wo si o. Habɔbɔa ta nyati siwo ƒo nu tso Biblia me gɔmeɖosewo ŋu siwo akpe ɖe mía ŋu be míawɔ tiatia le ɖiɖiɖeme alo modzakaɖeɖe ŋu le nunya me. Nunya manɔ eme kura ne míegbɔ afɔɖoƒe siawo ŋu heɖe mɔ tamesusu gbegblẽ, nuvlowɔwɔ vɔ̃ɖi, alo gbɔgbɔyɔyɔ si bɔ ɖe xexe sia ƒe modzakaɖeɖe akpa gãtɔ me xɔ míaƒe susu me o. Ẽ, modzakaɖeɖe tiatia le nunya me bia be míazã míaƒe tamebubu ƒe ŋutete le Biblia ƒe gɔmeɖosewo dzi wɔwɔ me bene dzitsinya nyui nanɔ mía si le Mawu kple amegbetɔwo ŋkume.—Korintotowɔ I, 10:31-33.

 9. Nukae “gɔmesese blibo” fia?

⁹ Edze ƒã be egbe modzakaɖeɖe akpa gãtɔ menyo na Kristotɔwo o.a Eyata ele be míana hehe míaƒe dzi be ‘wòalé fu vɔ̃’ ale be míagava nɔ abe ƒe alafa gbãtɔ me tɔ aɖewo siwo ƒe “dzitsinya ku atri” ene o. (Psalmo 97:10; Efesotɔwo 4:17-19) Be míade ŋugble le nya siawo ŋu la, míehiã ‘sidzedze vavãtɔ kple gɔmesese blibo.’ (Filipitɔwo 1:9) Helagbe me nya si gɔme woɖe be “gɔmesese” fia “agbenyuinɔnɔ ƒe gɔmesese nyuitɔ.” Nya la fia amegbetɔ ƒe lãmenusesewo abe nukpɔkpɔ ene. Le modzakaɖeɖe alo nya bubu aɖe si ŋu mía ŋutɔwo míatso nya me le gome la, ele be míaƒe agbenyuinɔnɔ ƒe lãmenusese nawɔ dɔ nyuie ale be menye nyui kple vɔ̃ ŋu nya siwo dze gaglã ko míate ŋu akpɔ o, ke míakpɔ esiwo medze gaglã o hã. Le ɣeyiɣi ma ke me la, mele be míanɔ Biblia ƒe gɔmeɖosewo zãm wòagbɔ eme susumanɔmetɔe ahanɔ ezim ɖe mía nɔviwo dzi be woawo hã nawɔ nenema o.—Filipitɔwo 4:5.

10. Aleke míawɔ ase Yehowa ƒe amenyenye gɔme abe alesi wòdze le Psalmo 15 ene?

¹⁰ Mɔ etɔ̃lia si dzi míato atu míaƒe tamebubu ƒe ŋutete ɖoe nye be Yehowa ƒe susu nasu mía si eye míana wòaƒo ke ɖe to sesĩe ɖe míaƒe dzi me. Yehowa ɖe eƒe amenyenye kple dzidzenuwo fia le eƒe Nya la me. Le kpɔɖeŋu me, míexlẽ nu tso amesi tɔgbe Yehowa kpena va eƒe agbadɔ me ŋu le Psalmo 15. Ame ma wɔa nu dzɔdzɔe eye wòtoa nyateƒe le eƒe dzi me, ewɔa eƒe ŋugbedodowo dzi, eye metea ame bubuwo ɖe anyi ɖe eƒe viɖe ta o. Ne èle psalmo sia xlẽm la, bia ɖokuiwò be, ‘Aleae melea? Ðe Yehowa akpem va eƒe agbadɔ mea?’ Ne míewɔa nu wòsɔna kple Yehowa ƒe mɔwo kple tamesusu la, edoa ŋusẽ míaƒe nugɔmesese ƒe ŋutetewo.—Lododowo 3:5, 6; Hebritɔwo 5:14.

11. Aleke Farisitɔwo ‘gbɔ ʋɔnudɔdrɔ̃ kple Mawu ƒe lɔlɔ̃ ŋutii’?

¹¹ Akpa siae Farisitɔwo do kpo nu le nublanuitɔe. Farisitɔwo nya Sea ƒe dɔwɔwɔ gake womese eƒe “gbeŋutise” gɔme o. Woate ŋu alé Sea me nya vevi akpeakpewo ɖe tame agblɔ gake womenya Seadela o. Yesu gblɔ na wo be: “Mienaa ahamee kple ƒãglo kpakple ama bubu ƒomeviwo katã ƒe ewolia, eye mietoa ʋɔnudɔdrɔ̃ kple Mawu ƒe lɔlɔ̃ ŋuti.” (Luka 11:42) Farisitɔwo do kpo woƒe tamebubu ƒe ŋutete ŋudɔwɔwɔ le woƒe susu kple dzimesesẽ ta. Woƒe tamesusu totro va dze ƒã esime wohe nya ɖe Yesu ƒe nusrɔ̃lawo ŋu esi woŋe lu heɖu le Sabat dzi ta; gake le gbemagbe ƒe ɣetrɔ me la, woƒe dzitsinya meʋã kli hã esi wode aɖaŋu be yewoawu Yesu o!—Mateo 12:1, 2, 14.

12. Aleke míawɔ ava nya Yehowa ƒe Amenyenye ɖe edzi wu?

¹² Míedi be míato vovo tso Farisitɔwo gbɔ. Ele be Mawu ƒe Nya la ŋuti sidzedze nakpe ɖe mía ŋu be míawɔ nu wòasɔ kple Yehowa ƒe Amenyenye. Aleke míate ŋu awɔ esiae? Esi ame aɖewo xlẽ Biblia alo Biblia-srɔ̃gbalẽ ƒe akpa aɖe vɔ la, nyabiabia siawo ŋu bubu kpe ɖe wo ŋu, ‘Nukae nya sia fiam le Yehowa kple eƒe nɔnɔmewo ŋu? Aleke mate ŋu aɖe Yehowa ƒe nɔnɔmewo afia le nuwɔwɔ kple ame bubuwo mee?’ Ŋugbledede le biabia siawo ŋu na míaƒe tamebubu ƒe ŋutete tsina ɖe edzi eye wòna míezua “mawusrɔ̃lawo.”—Efesotɔwo 5:1.

Mawu Kple Kristo ƒe Kluviwo, Menye Amewo Tɔ O

13. Aleke Farisitɔwo wɔ nu abe agbenɔnɔ ƒe dzidzenuɖolawoe wonye ene?

¹³ Ele be hamemegãwo naɖe mɔ amesiwo le woƒe kpɔkplɔ te nazã woƒe tamebubu ƒe ŋutete. Hamea me tɔwo menye amegbetɔwo ƒe kluviwo o. Paulo ŋlɔe be: “Ðe megale amewo ŋu dzem la, anye ne nyemeganye Kristo ƒe dɔla o.” (Galatiatɔwo 1:10; Kolosetɔwo 3:23, 24) Gake Farisitɔwo ya di be amewo nakpɔe be amegbetɔ ŋu dzedze le vevie wu Mawu ŋu dzedze. (Mateo 23:2-7; Yohanes 12:42, 43) Farisitɔwo tsɔe ɖo wo ɖokui dzi be yewoafia mɔ si nu amewo anɔ agbe ɖo, eye wodea woa ŋutɔwo ƒe sewo, emegbe wodrɔ̃a ʋɔnu amewo be wole agbe nɔm ɖe wo nu nyuie hã. Amesiwo kplɔ Farisitɔwo ɖo la va gbɔdzɔ le woƒe dzitsinya si wotsɔ Biblia hee la ŋudɔwɔwɔ me, esia na wova zu amewo ƒe kluviwo.

14, 15. (a) Aleke hamemegãwo aɖe wo ɖokui afia be yewonye alẽha la ƒe hadɔwɔlawo? (b) Aleke wòle be hamemegãwo nakpɔ nya siwo ku ɖe dzitsinya ŋu gbɔe?

¹⁴ Kristotɔ hamemegã siwo li egbea nyae be menye yewo koŋ ye alẽha la abu akɔnta na o. Ele be Kristotɔ ɖesiaɖe natsɔ eya ŋutɔ ƒe agba. (Romatɔwo 14:4; Korintotɔwo II, 1:24; Galatiatɔwo 6:5) Aleae wòle be wòanɔ. Le nyateƒe me ne amewo ƒe dɔlawoe alẽha la me tɔwo nye, eye woɖoa to le esi ŋku le wo ŋu ta la, ke aleke woawɔ nu ne ame mawo mele wo gbɔ o? Susu nyui aɖe tae Paulo kpɔ dzidzɔ ɖe Filipitɔwo ŋu ɖo: “Abe alesi mieɖoa to ɖaasi ene la, mitsɔ vɔvɔ̃ kple dzodzo nyanyanya wɔ mia ŋutɔwo miaƒe xɔxɔdɔ la; menye abe esime menɔ mia gbɔ ene la ɖeɖeko o, ke boŋ azɔ, esi nyemele mia gbɔ o la, miwɔe geɖe wu!” Kristo ƒe kluviwoe wonye nyateƒe, ke menye Paulo tɔ o.—Filipitɔwo 2:12.

¹⁵ Eyata hamemegãwo mewɔa nyametsotso na amesiwo le woƒe kpɔkplɔ te le nya siwo ku ɖe dzitsinya ŋu me o. Woɖea Biblia me gɔmeɖose si ku ɖe nyaa ŋu me eye wogblẽnɛ ɖe amea si be wòazã eya ŋutɔ ƒe tamebubu ƒe ŋutete le nyametsotso wɔwɔ me. Agba gã aɖee nye esia, gake amea ŋutɔe atsɔ agba sia.

16. Kuxiwo gbɔ kpɔkpɔ ŋuti ɖoɖo kae nɔ anyi le Israel?

¹⁶ Bu ɣeyiɣi si me Yehowa zã ʋɔnudrɔ̃lawo be woakplɔ Israel-viwoe ŋu kpɔ. Biblia gblɔ na mí be: “Ɣemaɣi la fia aɖeke menɔ Israel o, eye amesiame wɔ nusi dze eŋu.” (Ʋɔnudrɔ̃lawo 21:25) Yehowa na mɔnu si dzi eƒe dukɔa axɔ mɔfiame atoe. Ame tsitsi siwo ana kpekpeɖeŋu nyui le nya kple kuxi sesẽwo ŋu la nɔ du sia du me. Hekpe ɖe eŋu la, Lewi-viwo ƒe nunɔlawo kpɔ ŋusẽ nyui ɖe wo dzi le Mawu ƒe sewo fiafia amewo me. Ne nya gãwo do mo ɖa la, nunɔlagã la zãa Urim kple Tumim tsɔ biaa gbe Mawui. Insight on the Scriptures gblɔ be: “Dzitsinya ƒe mɔfianu nyui aɖe le amesi wɔ mɔnuɖoɖo siawo ŋudɔ, eye sidzedze Mawu su esi eye wòzɔ ɖe edzi la si. ‘Nusi dze eŋu wɔwɔ’ le go sia me la, manye nu gbegblẽ o. Yehowa ɖe mɔ na ameawo be woaɖee afia le woƒe nuwɔna kple afɔɖeɖewo me nenye be wolɔ̃ alo womelɔ̃ o.”—Babla 2, axa 162-3.b

17. Aleke hamemegãwo aɖee afia be Mawu ƒe dzidzenu nue yewoɖoa aɖaŋu ɖo, ke menye yewo tɔ nu o?

¹⁷ Hamemegãwo naa kpekpeɖeŋu heɖoa aɖaŋu nyuiwo le kuxiwo gbɔ kpɔkpɔ me abe Israel ƒe ʋɔnudrɔ̃lawo kple nunɔlawo ene. ‘Wokaa mo, gbea nya, xlɔ̃a nu le dzigbɔɖeanyi kple nufiafia katã me’ gɔ̃ hã ɣeaɖewoɣi. (Timoteo II, 4:2) Menye woa ŋutɔwo ƒe dzidzenu nue wowɔa esia ɖo o, ke ɖe Mawu tɔ nu boŋ. Aleke gbegbe esia wɔa dɔ enye si ne hamemegãwo ɖo kpɔɖeŋu nyui hedze agbagba ɖo amewo ƒe dzi gbɔ!

18. Nukata wòwɔa dɔ nyuie vevietɔ ne hamemegãwo ɖo amewo ƒe dzi gbɔ?

¹⁸ Dzi lae nye míaƒe Kristotɔwo ƒe dɔwɔwɔ ƒe “mɔ̃.” Esia ta Biblia gblɔ be: “Eya me agbe tsona.” (Lododowo 4:23) Hamemegã siwo ƒe nu wɔa dɔ ɖe amewo ƒe dzi dzi akpɔe be aʋã hamea me tɔwo woawɔ woƒe ŋutete katã le Mawu subɔsubɔ me. Woade dzo wo ɖokui me, ke mahiã be ame bubuwo nanɔ wo tutum ɣesiaɣi o. Yehowa medi be woazii ɖe ame aɖeke dzi hafi wòaɖo to ye o. Toɖoɖo si tsoa dzi si yɔ fũ kple lɔlɔ̃ mee wòdina. Hamemegãwo ate ŋu ade dzi ƒe ameʋãʋa ƒe subɔsubɔdɔ wɔwɔ ƒe dzi ƒo to kpekpe ɖe alẽhaa me tɔwo ŋu be woƒe tamebubu ƒe ŋutete natsi ɖe edzi me.

“Kristo ƒe Tamesusu” Tutuɖo

19, 20. Nukata wòle vevie be míatu Kristo ƒe tamesusu ɖo?

¹⁹ Abe alesi míekpɔe ene la, Mawu ƒe seawo nyanya ɖeɖe mesɔ gbɔ o. Hakpala la ƒo koko be: “Na gɔmesesem, ne malé ŋku ɖe wò se la ŋu, eye malé eme ɖe asi tso dzi blibo me.” (Psalmo 119:34) Yehowa ɖe “Kristo ƒe tamesusu” fia le eƒe Nya la me. (Korintotɔwo I, 2:16) Yesu si tsɔ eƒe tamebubu ƒe ŋutete subɔ Yehowa la gblẽ kpɔɖeŋu deblibo ɖi na mí. Ese Mawu ƒe sewo kple gɔmeɖosewo gɔme eye wòwɔ wo dzi vodadamanɔŋui. Ne míesrɔ̃ eƒe kpɔɖeŋu la, “míate ŋu adze si nusi nye kekeme kple didime kple goglome kple kɔkɔme, eye bene miadze si Kristo ƒe lɔlɔ̃, si ƒo sidzedze la ta sã la.” (Efesotɔwo 3:17-19) Ẽ, nusi míesrɔ̃na tso Yesu ŋu le Biblia me la de ŋgɔ sã wu nuwo nyanya ɖe susu me ko; eɖe alesi tututu Yehowa ŋutɔ le fia.—Yohanes 14:9, 10.

²⁰ Esia awɔe be ne míele Mawu ƒe Nya srɔ̃m la, míate ŋu akpɔ Yehowa ƒe susu le nyawo ŋu eye míawɔ nyametsotso si da sɔ. Esia bia agbagbadzedze. Ele be míanye Mawu ƒe Nya srɔ̃la bibiwo, alé ŋku ɖe Yehowa ƒe amenyenye kple dzidzenuwo ŋu nyuie. Le kpɔɖeŋunyagbɔgblɔ nu la, míele gbeŋutise yeye srɔ̃m. Gake amesiwo asrɔ̃e la, anɔ wɔwɔm ɖe Paulo ƒe nuxlɔ̃amenya be “[woatsɔ woƒe] ŋutilãwo awɔ vɔsasa gbagbe, si ŋuti kɔ, si dze Mawu ŋu, esi anye subɔsubɔ kɔkɔe si [woawɔ] kple [woƒe] tamebubu ƒe ŋutete” la dzi.—Romatɔwo 12:1.

[Etenuŋɔŋlɔwo]

Nukae Nèsrɔ̃?

◻ Tɔtrɔ kae va le ƒe 33 M.Ŋ. me le Mawu subɔsubɔ ŋu?

◻ Aleke míate ŋu atu míaƒe tamebubu ƒe ŋutete ɖoe?

◻ Aleke hamemegãwo ate ŋu akpe ɖe alẽhaa me tɔwo ŋu be woanye Mawu kple Kristo ƒe kluviwoe?

◻ Nukata wòle be míatu “Kristo ƒe tamesusu” ɖo?

[Nɔnɔmetata siwo le axa 23]

Hamemegãwo kpena ɖe ame bubuwo ŋu be woawɔ woƒe tamebubu ƒe ŋutete ŋudɔ