Ðe Nàte Ŋu Akpɔ Dzidzeme Le Xexe Sia Si Me Xaxawo Bɔ Ðo La Mea?

ÐE WÒ dzi dze emea? Le ame geɖe gome la, nya sia ƒe ŋuɖoɖo si dze ƒãae nye ao. Wole nuto siwo me aʋawɔwɔwo, dunyahehe me zitɔtɔ, gbe vovovo dolawo dome ʋunyaʋunyawɔwɔwo, alo nu vlo wɔlawo ƒe ŋɔdzidoname na wode vovo ge do kpoe la me. Ne nu siawo dometɔ aɖeke mele dzɔdzɔm ɖe dziwò o hã la, nu vlo wɔwɔ, fuɖename, kple dɔwɔhatiwo kple aƒelikawo dome dzrehehewo ate ŋu ana wò dzi madze eme o. Aƒe geɖe me va zu aʋagbedzi, le esi teƒe be woanye dedienɔƒe si tomefafa anɔ.

Ame geɖewo le dzidzeme vavãtɔ dim. Wodinɛ le subɔsubɔhawo, gbedoɖaƒewo, alo le yoga wɔnawo me. Ame bubuwo hã bui be yewoakpɔ dzidzeme le nuwɔnawo abe mɔkeketsaɖiɖiwo, tsaɖiɖi le gbedadaƒo kple tonutowo me, alo tsaɖiɖi aɖakpɔ dzɔdzɔmetsidzidzi xɔdzowo ene me. Gake ne ame siawo kpɔ dzidzeme aɖe sinu hã la, eteƒe medidina kura o wova kpɔnɛ be ɣeyiɣi kpui aɖe ƒe dzidzeme si mede to o koe wònye.

Eya ta afi kae nàte ŋu akpɔ dzidzeme vavãtɔ le? Mía Wɔla, Yehowa Mawue nye ame si gbɔ dzidzeme tsona. Nu ka tae? Eyae nye “Mawu si naa ŋutifafa.” (Romatɔwo 15:33) Le eƒe Fiaɖuƒe si ava kpuie ƒe dziɖuɖu te la, “ŋutifafa axɔ aƒe” ɖe anyigba dzi. (Psalmo 72:7; Mateo 6:9, 10) Esia de ŋgɔ sãsãsã wu ŋutifafa ƒe nubabla siwo amegbetɔwo wɔna. Fuléle nu tsitsi hena ɣeyiɣi vi aɖe koe nubabla mawo hena vanɛ. Gake Mawu ƒe ŋutifafa ya aɖe nu siwo katã hea aʋawɔwɔ kple dzrehehewo vanɛ la ɖa keŋkeŋ. Ɛ̃, ame aɖeke magasrɔ̃ aʋawɔwɔ azɔ o. (Psalmo 46:9, 10) Amewo katã ƒe dzi adze eme ŋutɔŋutɔ mlɔeba!

Togbɔ be mɔkpɔkpɔ sia faa akɔ na ame ŋutɔ hã la, ɖewohĩ àdi vevie be dzidzeme aɖe sinu ya teti nasu ye si fifia. Ðe mɔ aɖe li si dzi nàte ŋu ato be wò dzi nadze eme le xexe sia si me xaxawo bɔ ɖo la mea? Dzidzɔtɔe la, Biblia fia mɔ ma mí. Na míadzro afɔɖoƒe aɖewo siwo le Paulo ƒe lɛta si wòŋlɔ ɖo ɖe Filipitɔwo la ƒe ta 4 lia me la me akpɔ. Taflatsɛ tsɔ wò Biblia nàxlẽ kpukpui 4 va se ɖe 13.

“Mawu Ƒe Ŋutifafa”

Míexlẽ le kpukpui 7 lia me be: “Mawu ƒe ŋutifafa, si ƒoa susu ɖe sia ɖe ta la, adzɔ miaƒe dziwo kple miaƒe tamesusuwo ŋu to Kristo Yesu dzi.” Ŋutifafa sia mesua ame si to ŋugblemeyiyi alo to agbagbadzedze be míaƒe agbenɔnɔ nanyo ɖe edzi ko dzi o. Ke boŋ etsoa Mawu gbɔ. Ŋutifafa sia de ŋgɔ ale gbegbe be “[eƒoa] susu ɖe sia ɖe ta.” Eƒo míaƒe dzimaɖitsitsiwo, nunyawo, kple nuŋububuwo katã ta. Ate ŋu adzɔ be míanɔ ta kpɔm na míaƒe kuxiwo o ya, gake Mawu ƒe ŋutifafa ate ŋu ana mɔkpɔkpɔ like nasu mía si be míaƒe xaxawo katã nu ava yi godoo gbe ɖeka.

Anya wɔa? Le amegbetɔwo gome la, manya wɔ o; gake “le Mawu ya gbɔ la, woate ŋu awɔ nu sia nu.” (Marko 10:27) Xɔse kple ŋuɖoɖo ɖe Mawu ŋu kpena ɖe mía ŋu míenɔa te ɖe míaƒe dzimaɖitsitsiwo nu. Wò ya bu ɖevi dzaa aɖe si bu le fiase gã aɖe me ŋu kpɔ. Enyae nyuie be ne yenya ke ɖe ye Dada ŋu ko la, yeƒe dzi adze eme. Abe ale si ko wòanɔ na ɖevi sia ne eva ke ɖe Dadaa ŋu ene la, míate ŋu aka ɖe edzi be Mawu ava xɔ na mí mlɔeba. Afa dzi na mí, si awɔe be míaƒe dzimaɖitsitsiwo katã nu ayi.

Mawu ƒe ŋutifafa fa akɔ na Yehowa subɔla geɖewo le nɔnɔme sesẽtɔwo kekeake gɔ̃ hã me. Le kpɔɖeŋu me, bu Nadine, si fu gblẽ na la ŋu kpɔ. Egblɔ be: “Esesẽ nam ŋutɔ be maɖe nye seselelãmewo agblɔ, eye medzea agbagba ɣesiaɣi be maɖo mo ta abe naneke mele dzɔdzɔm o ene. Gake le ememe la, nye dzi katã gbã. Gbe sia gbe kloe la, megblɔa nye dzimenyawo na Yehowa le gbedodoɖa me heƒoa koko nɛ be wòakpe ɖe ŋunye. Mekpɔ ŋusẽ si gbegbe le gbedodoɖa ŋu la dze sii, elabena ɣesiaɣi si dzi ɖe le ƒonye eye megblɔ na ɖokuinye be ‘nyemagate ŋu ado dzi atsɔe o la,’ dzidzeme kple ŋutifafa aɖe yɔa menye fũu. Eye megasena le ɖokuinye me be mele dedie.”

Wò Dzi Kple Susu Ta Kpɔkpɔ

Na míagatrɔ ayi Filipitɔwo 4:7. Egblɔ be Mawu ƒe ŋutifafa adzɔ míaƒe dziwo kple tamesusuwo ŋu. Abe ale si ko dzɔla dzɔa aƒe ŋui ene la, Mawu ƒe ŋutifafa dzɔa míaƒe dziwo ŋu hewɔnɛ be ŋutilãmenudidi ƒe nukpɔsusuwo, dzimaɖitsitsi madzemadzee, kple dzidzenu siwo mewɔ ɖeka kple Mawu ƒe lɔlɔ̃nu o megena ɖe eme o. Eƒe kpɔɖeŋu aɖee nye esi.

Ame geɖe siwo le xexe sia si me xaxawo bɔ ɖo me la bunɛ be hafi yewoate ŋu akpɔ dzidzɔ ahanɔ dedie la, ele be ga gbogbo aɖe kple nunɔamesi geɖe nanɔ yewo si. Wowɔna ɖe kesinɔtɔzuzu kaba ŋuti ɖaŋuɖolawo ƒe aɖaŋuɖoɖowo dzi dea ga geɖe adzɔhawo me. Ðe esia nana woƒe dzi dzea eme ŋutɔŋutɔa? Menɔa nenema kokoko o. Ðewohĩ woava nɔ ŋku lém ɖe ale si deme si woakpɔ nɔa tɔtrɔm la ŋu gbe sia gbe ahanɔ ga la ɖeɖe aɖade adzɔha bubu me alo egbegblẽ ɖi ŋu bum. Ne adzɔhaa de agba ɖu ge la, dzidzi ƒoa wo vevie. Le nyateƒe me la, Biblia meƒo nu tsi tsitre ɖe gadede adzɔhawo me hena viɖekpɔkpɔ ŋu o, ke hã eɖo aɖaŋu nyui sia na mí be: ‘Ame si lɔ̃a ga la, ga maɖi ƒo nɛ o, eye ame si lɔ̃a kesinɔnu la, viɖe aɖeke matso eme nɛ o. Esia hã toflokoe. Dɔwɔla ɖaɖu nu ʋee o, eɖaɖu nu geɖe o, alɔ̃ vivina nɛ; ke kesinɔtɔ ƒe nu gbogboawo menana wòdɔa alɔ̃ o.’—Nyagblɔla 5:9, 11.

Wowu Filipitɔwo 4:7 me nyawo nu be Mawu ƒe ŋutifafa adzɔ míaƒe dziwo kple tamesusuwo ŋu “to Kristo Yesu dzi.” Ƒomedodo kae le Kristo Yesu kple Mawu ƒe ŋutifafa dome? Yesu wɔa akpa vevi aɖe le Mawu ƒe tameɖoɖowo me vava me. Yesu tsɔ eƒe agbe na ɖe mía ta bene míakpɔ ɖeɖe tso nu vɔ̃ kple ku si me. (Yohanes 3:16) Azɔ hã, woɖoe Mawu Fiaɖuƒea ƒe Fia. Ðoƒe si le Yesu si nyanya naa susu me ƒe akɔdzeanyi kple dzidzeme geɖe mí. Le mɔ ka nu?

Ne míetrɔ dzime tso míaƒe nu vɔ̃wo me vavã henɔ te ɖe Yesu ƒe vɔsa dzi bia tsɔtsɔke la, Mawu atsɔe ake mí, eye esia hã ana míaƒe susu nadze akɔ anyi eye míaƒe dzi adze eme. (Dɔwɔwɔwo 3:19) Ne míese egɔme be míate ŋu ase vivi le agbe me bliboe hafi Kristo ƒe Fiaɖuƒea nava o la, akpe ɖe mía ŋu míaƒo asa na hloloetsotso akpa abe agbea katã koe nye esia ene. (1 Timoteo 6:19) Enye nyateƒe be xaxawo mado kpo mía dzi vava ya o, gake míate ŋu akpɔ akɔfafa tso mɔkpɔkpɔ gbagbe si le mía si be agbe vavã la ŋutɔ le ŋgɔ gbɔna la me.

Ale Si Nàwɔ Akpɔ Mawu Ƒe Ŋutifafa

Ke aleke nàwɔ akpɔ Mawu ƒe ŋutifafa? Aɖaŋuɖoɖo nyui aɖewo dze le Filipitɔwo 4:4, 5, afi si xlẽ be: “Dzi nedzɔ mi le Aƒetɔ la me ɖaasi. Megale egblɔm ake be: Dzi nedzɔ mi! Mina amewo katã nanyae be nugɔmeselawo mienye. Aƒetɔ la gogo.” Wode Paulo gaxɔ me madzemadzee le Roma hafi wònɔ nya mawo ŋlɔm. (Filipitɔwo 1:13) Esi teƒe be wòanɔ nu xam ɖe numadzɔmadzɔ si wɔm wonɔ ɖe eŋu ŋu la, ede dzi ƒo na haxɔsetɔwo be dzi nadzɔ wo le Aƒetɔ la me ɖaasi. Esia na wòdze ƒãa be menye nɔnɔme siwo me wònɔ la gbɔe eƒe dzidzɔ la tso o, ke boŋ ƒomedodo si le woa kple Mawu dome ye. Ele be míawo hã míasrɔ̃ ale si míakpɔ dzidzɔ le Mawu subɔsubɔ me, nɔnɔme ka ke me tom míeɖale o. Zi ale si míele Yehowa nyam hele eƒe lɔlɔ̃nu wɔm geɖe wu la, zi nenemae míakpɔ dzidzɔ le esubɔsubɔ me. Eye ema ana dziɖeɖi kple dzidzeme geɖe mí.

Tsɔ kpe ɖe eŋu la, wode dzi ƒo na mí be míanye nugɔmeselawo. Ne míenye nugɔmeselawo la, míadi nu siwo gbɔ míaƒe ŋutetewo ŋu la tso mía ɖokuiwo si o. Míenyae be míede blibo o, eye be míate ŋu awɔ nu sia nu wòade edeƒe pɛpɛpɛ o. Eya ta mahiã gbeɖe be míatsi zãdomadɔlɔ̃e anɔ agbagba dzem be míawɔ nu abe ɖe míede blibo ene, alo ate kpɔ be míawɔ nu wòanyo wu ame bubu ɖe sia ɖe o. Eye mele be míakpɔ mɔ be amewo nawɔ nu abe ɖe wode blibo ene o. Eya ta anyo be míalé mía ɖokui kpoo ne wowɔ nu madzɔmadzɔ aɖe ɖe mía ŋu. Woagate ŋu aɖe Helagbe me nya si gɔme woɖe be “nugɔmesesename” la gɔme be “asiɖeɖe le nu ŋu.” Ne míeɖea asi le nya siwo kuna ɖe ame ŋutɔ ƒe didiwo dzro ko ŋu ŋuti la, míaƒo asa na dzrehehe siwo meɖea vi aɖeke o, evɔ wogblẽa míaƒe ŋutifafamenɔnɔ kple amewo me zi geɖe, eye wonaa míaƒe dzi medzea eme o la.

Ðewohĩ nyagbɔgblɔ “Aƒetɔ la gogo,” si hã dze le Filipitɔwo 4:5 la adze abe ɖe medo ƒome kple nya siwo ƒo xlãe o ene. Nya lae nye be, eteƒe madidi o, Mawu atsɔ nuɖoanyi yeye aɖe si Fiaɖuƒea ahe vɛ la aɖɔli esi li fifia. Gake fifia kura gɔ̃ hã la, Mawu ate ŋu ate ɖe ame siwo tena ɖe eŋu la ŋu. (Dɔwɔwɔwo 17:27; Yakobo 4:8) Nyanya be ete ɖe mía ŋu naa dzi dzɔa mí, míeɖea nugɔmesesename fiana, eye míetsia dzimaɖi le kuxi siwo me tom míele egbea kple esiwo me míava to la ŋu o, abe ale si wòdze le kpukpui 6 lia me ene.

Ne míelé ŋku ɖe kpukpui 6 lia kple 7 lia ŋu la, míade dzesii be gbedodoɖae naa Mawu ƒe ŋutifafa sua ame si. Ame aɖewo bua gbedodoɖa be enye ŋugbledede ƒomevi aɖe ko, eye wobuna be gbedodoɖa ɖe sia ɖe ƒomevi ate ŋu ana yewoƒe dzi nadze eme geɖe wu. Gake Biblia ya gblɔ be enye nuƒoƒo na Yehowa tso dzi me, si nyea dzeɖoɖo faa tso dzi me abe ale si ɖevi ɖea eƒe dzidzɔ kple nuxaxawo gblɔna na edzila lɔ̃ame ene. Aleke gbegbee wòfaa akɔ na amee nye esi be míanya be míate ŋu atsɔ “nu sia nu” si hiã mí la aɖo Mawu ŋkume! Míate ŋu agblɔ nya sia nya si le susu me na mí alo le míaƒe dzi ƒe gogloeƒe ke la na mía Fofo si le dziƒo.

Kpukpui 8 lia de dzi ƒo na mí be míanɔ nu siwo dea dziƒo na ame la ŋu bum. Gake nu siawo ŋu bubu ɖeɖe mesɔ gbɔ o. Abe ale si kpukpui 9 lia gblɔe ene la, ele hã be míatsɔ aɖaŋuɖoɖo nyui siwo le Biblia me la ade dɔwɔna me. Ewɔwɔ alea ana dzitsinya dzadzɛ nasu mía si. Aleke gbegbe wònye nyateƒee nye esi be dzitsinya nyui naa ame ƒe dzi dzea eme!

Nyateƒee, àte ŋu akpɔ dzidzeme. Yehowa Mawu, ame si naa dzidzeme ame siwo tena ɖe eyama ŋu hedina be yewoawɔ eƒe mɔfiamewo dzi la gbɔe wòtsona. Ne èdzroa eƒe Nya Biblia me la, àte ŋu anya eƒe tamesusuwo. Eƒe aɖaŋuɖoɖowo dzi wɔwɔ menɔa bɔbɔe ɣesiaɣi o. Gake agbagbadzedze be woawɔ wo dzi ɖea vi geɖe, elabena enana ‘ŋutifafa ƒe Mawu la nɔa anyi kpli mí.’—Filipitɔwo 4:9.

[Nya si ɖe dzesi si le axa 10]

“Mawu ƒe ŋutifafa, . . . adzɔ miaƒe dziwo . . . ŋu.”​—FILIPITƆWO 4:7

[Nya si ɖe dzesi si le axa 12]

Aleke gbegbee wòfaa akɔ na amee nye esi be míanya be míate ŋu atsɔ “nu sia nu” si hiã mí la aɖo Mawu ŋkume