Ta 15

Ƒome Si Nyea Bubu Na Mawu Ðoɖo Anyi

 1-3. Nukatae ame aɖewo mete ŋu kpɔa kuxi siwo bɔna ɖe srɔ̃ɖeɖe kple vinyinyi me gbɔ o, gake nukatae Biblia ate ŋu akpe ɖe ame ŋu?

TSƆE be yeɖoe be yeatso ye ŋutɔ yeƒe aƒe. ȃle anyigbaa vɔ. Ètsɔ didi vevie kpɔ wò aƒe yeyea le susu me ɖaa. Gake ne dɔwɔnuwo mele asiwò o eye mènya naneke le xɔtutu ŋu o ɖe? Kpɔ alesi wò agbagbadzedzewo atsi akpo dzii ɖa!

² Srɔ̃tɔ geɖe gena ɖe srɔ̃ɖeɖe me kple susu be ƒome kpɔdzidzɔ aɖe anɔ yewo si, gake dɔwɔnu kple aɖaŋu si ana woaɖo ƒome la menɔa wo si o. Le srɔ̃kpegbea megbe sẽ ko la, wova nɔa nɔnɔme manyomanyowo kpɔm le wo nɔewo ŋu. Wonɔa avu kple kɔ dzi gbesiagbe. Ne wova dzi vi la, vifofo kple vidada yeyeawo kpɔnɛ be alesi yewomenya nu le srɔ̃ɖeɖe ŋui o la, nenema ke yewomenya vinyinyi hãe o.

³ Gake enye dzidzɔ be Biblia ate ŋu akpe ɖe ame ŋu. Eƒe gɔmeɖosewo le abe dɔwɔnuwo ene siwo akpe ɖe ŋuwò nàɖo ƒome kpɔdzidzɔ anyi. (Lododowo 24:3) Mina míakpɔ alesi wòwɔnɛ ɖa.

DƆWƆNU SIWO NÀTSƆ AÐO SRƆ̃ÐEÐE SI ME DZIDZƆ LE LA ANYII

 4. Nukata wòle be woakpɔ mɔ be kuxiwo anɔ srɔ̃ɖeɖe me, eye dzidzenu kawoe Biblia na mí?

⁴ Aleke kee atsu kple asi aɖe adze abe ɖe wosɔ na wo nɔewoe ene hã la, woƒe seselelãmewo, ɖevime nuteƒekpɔkpɔwo, kple nɔnɔme si le ƒome siwo me wotso me la toa vovo. Eyata ele be woakpɔ mɔ na kuxi aɖewo le srɔ̃ɖeɖea megbe. Aleke woakpɔ wo gbɔe? Ne xɔtulawo le xɔ tum la, wokpɔa xɔtutunɔnɔmetata dzi. Nɔnɔmetata siawo nye mɔfiame siwo dzi wòle be woanɔ kpɔkpɔm hafi anɔ xɔa tum. Biblia na Mawu ƒe dzidzenu siwo woatsɔ aɖo ƒome kpɔdzidzɔ anyii la mí. Mina míalé ŋku ɖe wo dometɔ ʋee aɖewo ŋu kpɔ.

 5. Aleke Biblia te gbe ɖe nuteƒewɔwɔ le srɔ̃ɖeɖe me ƒe vevienyenye dzii?

⁵ Nuteƒewɔwɔ. Yesu gblɔ be: “Nusi ke Mawu bla la, ame nagamã eme o.”a (Mateo 19:6) Apostolo Paulo ŋlɔ be: “Bubu nanɔ srɔ̃ɖeɖe me le amewo katã dome, eye womagaƒo ɖi srɔ̃ɖeba la o; elabena ahasiwɔlawo kple matrewɔlawo la, Mawu adrɔ̃ ʋɔnu wo.” (Hebritɔwo 13:4) Eyata ele be srɔ̃tɔwo nakpɔe be agba le yewo dzi le Yehowa gbɔ be yewoawɔ nuteƒe na yewo nɔewo.—Mose I, 39:7-9.

 6. Aleke nuteƒewɔwɔ akpɔ srɔ̃ɖeɖe tae?

⁶ Nuteƒewɔwɔ na bubu nɔa srɔ̃ɖeɖea me eye wònɔa dedie hã. Srɔ̃tɔ siwo wɔa nuteƒe na wo nɔewo nya be nuka kee le dzɔdzɔm o, yewoakpe ɖe yewo nɔewo ŋu anɔ te ɖe enu. (Nyagblɔla 4:9-12) Kpɔ alesi gbegbe wòto vovo tso amesiwo gbea wo srɔ̃wo kaka kuxi sue aɖe nya do mo ɖa ko gbɔe ɖa! Ame mawo ƒoa nya ta enumake be ‘menye ame nyuitɔe yewoɖe o,’ be ‘yewomegalɔ̃ yewo nɔewo o,’ eye be srɔ̃ bubu ɖeɖee akpɔ nya la gbɔ. Gake ebubu alea menaa srɔ̃tɔawo dometɔ aɖeke tsina le seselelãme gome o. Ðe wònaa srɔ̃tɔ mawɔnuteƒe mawo tsɔa kuxi mawo ke yia srɔ̃ yeye si woaɖe mee. Ne aƒe nyui aɖe le ame si eye wokpɔ be xɔa le ɖuɖum la, ɖeko wodzea agbagba dzranɛ ɖo. Womeʋuna ko yia aƒe bubu me o. Nenema ke menye ame bubu ɖeɖee akpɔ nusiwo le srɔ̃ɖekuxia hem vɛ gbɔ o. Ne kuxiwo va la, mègadze agbagba be yeaɖe ta le srɔ̃ɖeɖea me o, dze agbagba vevie nàkpɔ eta boŋ. Nuteƒewɔwɔ sia léa srɔ̃ɖeɖea abe nusi ŋu wòle be woadzɔ, akpɔ eta, eye woade asixɔxɔ eŋu ene.

 7. Nukatae dzeɖoɖo sesẽna na srɔ̃tɔwo zi geɖe, gake aleke ‘amenyenye yeye’ la dodo akpe ɖe wo ŋui?

⁷ Dzeɖoɖo. Biblia ƒe lododo aɖe gblɔ be: “Afisi adaŋudede mele o la, tameɖoɖowo tsia akpo dzi.” (Lododowo 15:22) Gake srɔ̃tɔ aɖewo mete ŋu ɖoa dze o. Nukae na? Esi amewo ƒe dzeɖoɖomɔnuwo to vovo tae. Esia nye nusi hea ame nɔewo gɔmemasemase kple dziɖeleameƒo gã aɖe vɛ. Ate ŋu atso hehe si wona wo le ɖevime hã gbɔ. Le kpɔɖeŋu me, ɖewohĩ wonyi wo dometɔ aɖewo le aƒe siwo me wo dzilawo wɔa dzre le me. Azɔ esi woɖe srɔ̃ la, womanya alesi wotsɔa gbeɖɔɖɔe ƒoa nu na ame srɔ̃ lɔlɔ̃tɔe o. Ke hã mele be nuwo nagblẽ le wò aƒea ŋu kaka wòazu ‘aƒe si me dzre yɔ fũ’ o. (Lododowo 17:1) Biblia te gbe ɖe edzi be míado ‘amenyenye yeye la,’ eye meɖe mɔ ɖe veve helĩhelĩ, ɣlidodo, kple amedzudzu ŋu o.—Efesotɔwo 4:22-24, 31.

 8. Nukae akpe ɖe ŋuwò ne wò susu mewɔ ɖeka kple srɔ̃wò tɔ o?

⁸ Nukae nàte ŋu awɔ ne masɔmasɔwo do mo ɖa? Ne nane di be yeado dziku na mi la, anyo be nàtsɔ aɖaŋu si Lododowo 17:14 ɖo la awɔ dɔe, be: “Dzudzɔ hafi [dzre nava] do gã.” Ẽ, àte ŋu aɖe asi le nya si gblɔm miele ŋu gbɔ, vaseɖe esime mia kple srɔ̃wò miaƒe dzi fa. (Nyagblɔla 3:1, 7) Nuka kee le dzɔdzɔm o, dze agbagba ‘nàɖe abla le nusese me, nànɔ blewu le nuƒoƒo me, nànɔ blewu hã le dzikukpɔkpɔ me.’ (Yakobo 1:19) Ele be wò taɖodzinu nanye be yewoakpɔ nya la gbɔ, menye be ye tɔ nedzɔ o. (Mose I, 13:8, 9) Tia nya siwo nàgblɔ kple alesi nàƒo nui be mia kple srɔ̃wò ƒe dzi nadze eme. (Lododowo 12:18; 15:1, 4; 29:11) Ƒo wo katã ta la, migalé dziku ɖe dɔme o, ke boŋ mido gbe ɖa ɖekae ne miabia Mawu ɖokuibɔbɔtɔe be wòakpe ɖe mia ŋu.—Efesotɔwo 4:26, 27; 6:18.

 9. Nukatae míate ŋu agblɔ be dzi mee dzeɖoɖo dzea egɔme tsoe?

⁹ Biblia me lododo aɖe gblɔ be: “Nugɔmesela ƒe dzi nana eƒe nù dzea nunya, eye eƒe nuyiwo dzia nufiame ɖe dzi.” (Lododowo 16:23) Eyata le nyateƒe me la, nu vevi si akpe ɖe mia ŋu be dzeɖoɖo nyui nanɔ mia dome la le miaƒe dzi me, menye miaƒe nu me o. Aleke nèwɔa nu ɖe srɔ̃wò ŋui? Biblia de dzi ƒo na Kristotɔwo be ‘ame ƒe nu nawɔ nublanui na wo.’ (Petro I, 3:8) Ðe nàte ŋu awɔ esia ne srɔ̃wò le nɔnɔme sesẽwo me toma? Ne àte ŋui la, ke akpe ɖe ŋuwò nànya alesi nàɖo nya ŋui nɛ.—Yesaya 50:4.

10, 11. Aleke srɔ̃ŋutsu ate ŋu atsɔ aɖaŋu si woɖo ɖe Petro I, 3:7 la awɔ dɔe?

¹⁰ Asixɔxɔ Kple Bubu Dede Ame Ŋu. Wogblɔ na Kristotɔ srɔ̃ŋutsuwo be woanɔ anyi kple wo srɔ̃wo “le nunya me, esi wonye gbɔdzɔgbɔdzɔtɔwo wu la ŋuti, eye [woatsɔ] bubu na wo.” (Petro I, 3:7) Bubu alo asixɔxɔ dede ame srɔ̃nyɔnu ŋu ƒe akpa aɖee nye be woakpɔ eƒe vevienyenye adze sii. Ŋutsu si nɔa anyi kple srɔ̃a “le nunya me” la dea asixɔxɔ gã aɖe nyɔnua ƒe seselelãmewo, eƒe ŋutetewo, eƒe nunya, kple bubu si le eŋu la ŋu. Alɔ̃ be yeasrɔ̃ alesi Yehowa bua nyɔnuwoe kple alesi wòdi be woawɔ nu ɖe wo ŋui hã.

¹¹ Mítsɔe be nugoe aɖe si nye ŋudɔwɔnu vevi aɖe si hiã beléle tɔxɛ la le asiwò le aƒeme. Ðe màlé be nɛ nyuie etɔxɛe oa? Nenema ke Petro zã nya “gbɔdzɔgbɔdzɔtɔwo,” le gɔmesese ma tɔgbe ke nu, eye ele be esia naʋã Kristotɔ srɔ̃ŋutsu be wòade asixɔxɔ srɔ̃a lɔlɔ̃a ŋu tufafatɔe.

12. Aleke srɔ̃nyɔnu aɖee fia be yedea bubu deto ye srɔ̃ ŋu?

¹² Ke aɖaŋu kae Biblia ɖo na srɔ̃nyɔnu? Paulo ŋlɔ be: “Nyɔnu la nasi srɔ̃a ɖa.” (Efesotɔwo 5:33) Abe alesi wòhiã be srɔ̃nyɔnu nakpɔ be ye srɔ̃ dea asixɔxɔ ye ŋu eye wòlɔ̃ ye vevie ene la, nenema ke wòhiã be srɔ̃ŋutsua hã nakpɔe be ye srɔ̃ bua yee. Nyɔnu buame manɔ srɔ̃a ƒe vodadawo kakam o, ne ŋutsua nye Kristotɔ alo menyee o. Matsɔ nyahehe kple gbɔɖiame aklo bubu le eŋu le woawo ɖeɖe dome loo alo le dutoƒo o.—Timoteo I, 3:11; 5:13.

13. Aleke woate ŋu agblɔ ame ƒe susu le ŋutifafa mee?

¹³ Mefia be srɔ̃nyɔnu mate ŋu agblɔ eƒe susu o. Ne nane le fu ɖem nɛ la, ate ŋu agblɔe bubutɔe. (Mose I, 21:9-12) Woate ŋu atsɔ eƒe nya gbɔgblɔ na srɔ̃aŋutsu asɔ kple bɔl dada nɛ. Ate ŋu adae nɛ blewu be wòate ŋu alée bɔbɔe, alo ate ŋu adae sesĩe ale gbegbe be wòawɔ nuvevii. Aleke gbegbe wòanyo wui enye si ne srɔ̃tɔwo manɔ gbe dam ɖe wo nɔewo gbɔ anɔ wo nɔewo ƒe vodadawo gblɔm o, ke boŋ woaƒo nu na wo nɔewo dɔmenyo kple tufafatɔe!—Mateo 7:12; Kolosetɔwo 4:6; Petro I, 3:3, 4.

14. Nukae wòle be nàwɔ ne srɔ̃wò metsɔ ɖeke le Biblia ƒe gɔmeɖosewo ŋudɔwɔwɔ me o?

¹⁴ Abe alesi míekpɔe ene la, Biblia ƒe gɔmeɖosewo ate ŋu akpe ɖe ŋuwò nàɖo srɔ̃ɖeɖe si me dzidzɔ le anyi. Gake ne srɔ̃wò metsɔ ɖeke le nusi Biblia gblɔ me o ɖe? Le ema me hã àte ŋu awɔ nu geɖe ne wò ya ètsɔ sidzedze Mawu wɔ wò akpa dzii. Petro ŋlɔ be: “Mi nyɔnuwo la, mibɔbɔ mia ɖokui na mia ŋutɔwo mia srɔ̃wo, bena ne ame aɖewo meɖo to nya la o la, nyɔnuwo ƒe agbenɔnɔ nya aɖeke magblɔ la naɖe wo, esi wokpɔ miaƒe agbenɔnɔ dzadzɛ le vɔvɔ̃ me ɖa la.” (Petro I, 3:1, 2) Nyateƒee, nenema ke wòle be srɔ̃ŋutsu nawɔ ɖe srɔ̃a si metsɔ ɖeke le Biblia me o hã ŋu. Nukae srɔ̃wò ɖaɖo be yeawɔ o, na Biblia ƒe gɔmeɖosewo nàwɔ wò ya nànye srɔ̃tɔ nyui. Sidzedze Mawu ate ŋu akpe ɖe ŋuwò nànye dzila nyui hã.

ÐEVIWO NYINYI LE SIDZEDZE MAWU ME

15. Aleke vinyinyimɔnu manyomanyowo tsia anyi tso dzidzime yi dzidzimee, gake aleke woate ŋu atrɔ nɔnɔme siae?

¹⁵ Laxalaxa kple zu ƒe amesinɔnɔ ɖeɖeko menaa wozua atikpala nyui o. Nenema ke vi ƒe amesinɔnɔ ɖeɖe menaa wozua dzila nyui o. Dzilawo ɖonɛ nyia wo viwo abe alesi wonyi woawo ŋutɔe ene alo wonyia wo nenema le manyamanya me. Ewɔnɛ be ɣeaɖewoɣi la, vinyinyimɔnu manyomanyowo tsia anyi tso dzidzime yi dzidzime. Blema Hebri lododo aɖe gblɔ be: “Fofowo ɖu weintsetse hɔhlɔ̃e, eye aɖu nyɔ viwo.” Gake Ŋɔŋlɔawo fia be mehiã be woasrɔ̃ ame dzilawo ƒe kpɔɖeŋu kokoko o. Woate ŋu atia mɔ bubu, esi dzi Yehowa ƒe sewo kpɔ ŋusẽ ɖo.—Xezekiel 18:2, 14, 17.

16. Nukatae wòle vevie be nàkpɔ wò ƒomea dzi, eye nukae nusia wɔwɔ bia?

¹⁶ Yehowa di tso Kristotɔ dzilawo si be woafia mɔ wo viwo nyuie eye woatsɔ beléle si asɔ ana wo. Paulo ŋlɔ be: “Ne ame aɖe melé be na ye ŋutɔ tɔwo o, eye vevietɔ na ye ŋutɔ ƒe aƒemetɔwo o la, egbe xɔse la, eye wòvɔ̃ɖi wu dzimaxɔsetɔ.” (Timoteo I, 5:8) Nya mawo nu sẽ lo! Wò dzikpɔkpɔ ƒe agbanɔamedzia tsɔtsɔ, si ƒe akpa aɖewoe nye viwòwo ƒe ŋutilã me, gbɔgbɔ me, kple seselelãme nuhiahiãwo gbɔkpɔkpɔ, nye mɔnukpɔkpɔ kple mawusosroɖa ƒe agbanɔamedzi. Biblia na gɔmeɖose siwo ate ŋu akpe ɖe dzilawo ŋu be woawɔ nusiwo ana wo viwo nakpɔ dzidzɔ la na wo. Kpɔ eƒe ɖewo ɖa.

17. Nukae hiã hafi Mawu ƒe se la nanɔ viwòwo ƒe dzi me?

¹⁷ Miɖo kpɔɖeŋu nyui. Wode se na dzila siwo nye Israel-viwo be: “Ku [Mawu ƒe nyawo] ɖe to me na viwòwo, eye naƒo nu le wo ŋu, ne èbɔbɔ nɔ aƒewò me, alo nèle mɔ dzi, ne èmlɔ anyi, alo nèfɔ.” Ele be dzilawo nafia Mawu ƒe dzidzenuwo wo viwo. Gake nusi wogblɔ do ŋgɔ na nya siae nye: “Nya, siwo megblɔ na wò egbe la, natsi dzi me na wò.” (Mose V, 6:6, 7) Nyateƒee, dzilawo mate ŋu ana nusi mele wo si o. Ele be miaŋlɔ Mawu ƒe seawo ɖe mia ŋutɔwo miaƒe dzi me gbã hafi miate ŋu aŋlɔ wo ɖe mia viwo ƒe dzi me.—Lododowo 20:7; tsɔe sɔ kple Luka 6:40.

18. Aleke Yehowa ɖo kpɔɖeŋu nyuitɔ kekeake ɖi na dzilawo le lɔlɔ̃ ɖeɖefia mee?

¹⁸ Mina woaka ɖe edzi be mielɔ̃ yewo. Le Yesu ƒe nyɔnyrɔ̃xɔxɔ me la, Yehowa gblɔ be: “Wòe nye Vinye, si gbɔ nyemelɔ̃a nu le o, wò me mekpɔa ŋudzedze lena.” (Luka 3:22) Yehowa to esia me lɔ̃ ɖe edzi be ye Vie wònye, egblɔe kɔte be yekpɔ ŋudzedze ɖe eŋu heka ɖe edzi nɛ be Yelɔ̃e. Yesu gblɔ na Fofoa emegbe be: “Èlɔ̃m, hafi woɖo xexeame gɔme anyi.” (Yohanes 17:24) Eyata mi dzila siwo vɔ̃a Mawu, migblɔ alesi mielɔ̃ mia viwoe na wo le nyagbɔgblɔ kple nuwɔna me—eye miwɔe edziedzi. Miɖo ŋku edzi ɣesiaɣi be “lɔlɔ̃ tua ame [ɖo].”—Korintotɔwo I, 8:1.

19, 20. Nukawoe tohehe si dze nana ɖeviwo bia, eye aleke Yehowa ƒe kpɔɖeŋu ate ŋu aɖe vi na dzilawoe?

¹⁹ Tohehe. Biblia te gbe ɖe tohehe si me lɔlɔ̃ le ƒe vevienyenye dzi. (Lododowo 1:8) Ƒã hafi dzila siwo ɖea ta le woƒe agbanɔamedzi si nye be woafia mɔ wo viwo te egbea la nagbe gododo dzigbãnyawo le etsɔme. Gake wogaxlɔ̃ nu dzilawo be womegawɔe wòatso eme o. Paulo ŋlɔ be: “Mi fofowo la, migado dziku na mia viwo, bene dzika nagatso wo ƒo o.” (Kolosetɔwo 3:21) Mele be dzilawo nahe to na wo viwo wòagbɔ eme alo woalé woƒe gbɔdzɔgbɔdzɔwo ɖe nu anɔ vodada dim le wo ŋu o.

²⁰ Yehowa Mawu, mía Fofo si le dziƒo, ɖo alesi woahe toe ƒe kpɔɖeŋu ɖi. Mehea to wòtsoa eme gbeɖe o. Mawu gblɔ na eƒe dukɔ la be: “Mahe to na wò ɖe ɖoɖo la nu.” (Yeremya 46:28) Ele be dzilawo nasrɔ̃ Yehowa le esia me. Le nyateƒe me la, tohehe si tso eme alo si gbɔ taɖodzinu si wòdi be wòanye, si nye be wòaɖɔ ame ɖo afia nui ŋu la doa dziku na ame.

21. Aleke dzilawo awɔ anya ne woƒe tohehe le vi ɖem?

²¹ Aleke dzilawo awɔ anya ne woƒe tohehe le dɔ wɔm? Woate ŋu abia wo ɖokui se be, ‘Dɔ kae nye tohehea wɔna?’ Ele be wòafia nu. Ele be viwòa nase nusitae nèle to hem nɛ gɔme. Ele be dzilawo nabu nusiwo atso woƒe tohehea me hã ŋu. Nyateƒee, tohehe ave dɔme na ɖevi ɖesiaɖe kloe le gɔmedzedzea me. (Hebritɔwo 12:11) Gake mele be tohehe natso dzika ƒo na ɖevi alo wòana wòawɔ nɛ be wometsɔ ɖeke le eme na ye o alo be ɖevi gbegblẽ ko yenye o. Hafi Yehowa nahe to na eƒe dukɔa la, egblɔ be: “Megavɔ̃ o; . . . elabena meli kpli wò.” (Yeremya 46:28) Ẽ, ele be tohehea nanɔ ale gbegbe be mia vi la nasee le eɖokui me be mieli kpli ye eye mienye dzila lɔlɔ̃ siwo kpena ɖe ye ŋu.

‘MƆFIAME NYUI XƆXƆ’

22, 23. Aleke nàwɔ axɔ mɔfiame si hiã hena ƒome kpɔdzidzɔ ɖoɖo anyii?

²² Ele be míada akpe be Yehowa na dɔwɔnu siwo hiã be míatsɔ aɖo ƒome kpɔdzidzɔ anyi la mí. Gake dɔwɔnuawo ƒe amesinɔnɔ ɖeɖe mesɔ gbɔ o. Ele be míasrɔ̃ wo zazã nyuie. Le kpɔɖeŋu me, ate ŋu adzɔ be dɔwɔla aɖe manya eƒe dɔwɔnuwo zazã tututu o. Ate ŋu azã ɖewo ɖe nu bubu ŋu kura. Ne aleae wòwɔa dɔe la, ke eƒe dɔ mate ŋu anyo tututu o. Nenema ke ɖewohĩ fifia èkpɔe be nɔnɔme manyomanyo aɖewo va ge ɖe wò ƒomea me. Ðewo amã ame ale gbegbe be asiɖeɖe le wo ŋu azu dɔ. Gake wɔ ɖe aɖaŋu si Biblia ɖo dzi, be: “Nunyala nasee, eye wòadzi eƒe nunya ɖe dzi, eye mɔ sɔsɔe nasu nugɔmesela si.”—Lododowo 1:5.

²³ Ne èyi edzi le wò sidzedze Mawu dzim ɖe edzi la, mɔfiame nyui ate ŋu asu asiwò. Nɔ ŋudzɔ ɖe Biblia ƒe gɔmeɖose siwo ku ɖe ƒomegbenɔnɔ ŋuti la ŋu, eye nàwɔ tɔtrɔ siwo hiã. Lé ŋku ɖe Kristotɔ siwo ɖoa kpɔɖeŋu nyui le srɔ̃ɖeɖe kple vinyinyi me ŋu. Ðo dze kple wo. Ƒo wo katã ta la, tsɔ wò dzimaɖitsitsiwo katã yi Yehowa gbɔe le gbedodoɖa me. (Psalmo 55:23; Filipitɔwo 4:6, 7) Ate ŋu akpe ɖe ŋuwò nàkpɔ dzidzɔ le ƒomegbenɔnɔ si nyea bubu nɛ me.

[Etenuŋɔŋlɔwo]

DO WÒ SIDZEDZE KPƆ

Aleke nuteƒewɔwɔ, dzeɖoɖo, kple bubu na dzidzɔ nɔa srɔ̃ɖeɖe mee?

Mɔ kawo nue dzilawo ate ŋu aka ɖe edzi na wo viwo be yewolɔ̃ wo?

Nukawo ŋue wòle be woabu le tohehe si dze me?

[Nɔnɔmetata si xɔ axa 147]