Gbeƒãɖeɖe Nyanyuia Kple Kakaɖedzi Sẽŋu

¹ Le ƒe alafa gbãtɔ ƒe gɔmedzedze la, Yesu Kristo de dɔ asi na eyomedzelawo be woaɖe gbeƒã Fiaɖuƒe ŋuti nyanyuia eye ‘woawɔ dukɔwo katã me tɔwo woanye nusrɔ̃lawo.’ (Mat. 24:14; 28:19, 20) Yehowa Ðasefowo tsɔ eƒe mɔfiamea nya vevii, ale be kaka ƒe alafa 20 lia ƒe nuwuwu naɖo la, míaƒe Kristotɔwo ƒe nɔviwo ƒe habɔbɔa me tɔwo dzi ɖe edzi ɖo nusrɔ̃lawo 5,900,000 kple edzivɔ le dukɔ 234 me. Kafukafu gã kae nye si wònye na mía Fofo si le dziƒo!

² Fifia míege ɖe ƒe alafa 21 lia me. Míaƒe Futɔa le agbagba dzem ayetɔe be yeado kplamatse míaƒe dɔ vevitɔ si nye Fiaɖuƒegbeƒãɖeɖe kple nusrɔ̃lawɔwɔ dɔa. Ezãa nuɖoanyi sia me nyaƒoɖeamenuwo tsɔ dzea agbagba be yeahe míaƒe susu ɖe nu bubuwo ŋu, yeaxɔ míaƒe ɣeyiɣi, eye yeatsɔ dzimaɖitsitsi ɖe nusiwo mele vevie o ŋu kple wo yome titi ana nu nate mía ŋu belibeli. Le esi teƒe be míaɖe mɔ nuɖoanyi sia naɖo nusi le vevie le agbe me na mí la, míeɖoa kpe nusi le vevie wu dzi na mía ɖokui tso Mawu ƒe Nya la me boŋ—eyae nye Yehowa ƒe lɔlɔ̃nu wɔwɔ. (Rom. 12:2) Ema fia be míawɔ ɖe Ŋɔŋlɔawo me nuxlɔ̃ame si nye be ‘míaɖe gbeƒã nya la, vovoɣi li alo vovoɣi meli o, eye míawu míaƒe subɔsubɔdɔa nu bliboe’ la dzi.—Tim. II, 4:2, 5.

³ Tu Kakaɖedzi Sẽŋu Ðo: Ele be Kristotɔwo ‘nanɔ tsitre bliboe, eye woakpɔ kakaɖedzi blibo le Mawu ƒe lɔlɔ̃nu katã me.’ (Kol. 4:12) Woɖe nya “kakaɖedzi” me be enye “nya aɖe xɔxɔ vevie alo dzixɔse sẽŋu; alesi woaka ɖe nane dzii.” Ele be mí Kristotɔwo míaka ɖe edzi be kakaɖedzi le Mawu ƒe nyagblɔɖinya la ŋu eye be míele nuwuɣia me ʋĩ fifia. Ele be dzixɔse si sẽŋu abe apostolo Paulo tɔ ene nanɔ mía si, amesi gblɔ be nyanyuia “enye Mawu ƒe ŋusẽ, si naa agbexɔxɔ amesiame, si xɔna sena.”—Rom. 1:16.

⁴ Abosam zãa ame vɔ̃ɖiwo kple ameblela siwo ŋutɔ hã woble tsɔ kpɔa ŋusẽ ɖe ame bubuwo dzi heblea woe. (Tim. II, 3:13) Esi woxlɔ̃ nu mí le esia ŋu do ŋgɔ ta la, míewɔa nu tsɔ doa ŋusẽ míaƒe kakaɖedzi be nyateƒea mee míele. Le esi teƒe be míana agbemedzimaɖitsitsiwo nafa lãme na mí la, míeyia edzi boŋ tsɔa Fiaɖuƒea ɖoa nɔƒe gbãtɔ. (Mat. 6:33, 34) Eye míedi hã be míaŋe aɖaba aƒu alesi ɣeyiɣia bia nuwɔwɔ kpata dzi eye ɖewohĩ míava bu be nuɖoanyi sia ƒe nuwuwu le etsɔme ʋĩ o. Ele aƒe tum ɖe edzi gbesiagbe. (Pet. I, 4:7) Togbɔ be ɖewohĩ míase le mía ɖokui me be nyanyuia kaka maɖe vi boo le dukɔ aɖewo me o le esi woɖi ɖase le afima xoxo ta hã la, ele be míayi edzi axlɔ̃ nu amewo.—Xez. 33:7-9.

⁵ Nya vevi siwo wòle be míabia le nuwuɣi sia mee nye be: ‘Ðe mebua dɔ si Yesu de asi na mí be míawɔ nusrɔ̃lawo la nu veviia? Ne mele gbeƒã ɖem nyanyuia la, ɖe meɖea kakaɖedzi sẽŋu fiana be Fiaɖuƒea nye nu ŋutɔŋutɔa? Ðe meɖoe kplikpaa be mawɔ geɖe le agbeɖeɖedɔ sia me alesi mate ŋuia?’ Esi míede dzesii be míele nuwuɣia me ʋĩ ta la, ele be míalé ŋku ɖe mía ɖokui kple míaƒe gbeƒãɖeɖe kpakple nufiafia dɔa ŋu. Esia wɔwɔ ana woaxɔ mía kple amesiwo ɖoa to mí siaa ɖe agbe. (Tim. I, 4:16) Aleke mí subɔlawo katã míawɔ ado ŋusẽ míaƒe kakaɖedzii?

⁶ Srɔ̃ Tesalonikatɔwo: Esi apostolo Paulo nɔ nu ƒom tso Tesalonika nɔviwo ƒe dɔ sesẽ wɔwɔ ŋu la, egblɔ na wo be: ‘Míaƒe nyanyui la meva mia gbɔ le nya me ɖeɖeko o, ke boŋ le ŋusẽ kple gbɔgbɔ kɔkɔe kpakple kakaɖedzikpɔkpɔ geɖe me hã, abe alesi mienya amesi ƒomeviwo míenye le mia dome le mia ta la ene. Eye miawo miezu míawo kple Aƒetɔ la srɔ̃lawo, esi miexɔ nya la le xaxa geɖe me kple gbɔgbɔ kɔkɔe ƒe dzidzɔ.’ (Tes. I, 1:5, 6) Ẽ, Paulo kafu Tesalonika-hamea elabena togbɔ be woto xaxa geɖe me hã la, wotsɔ veviedodo kple kakaɖedzi sẽŋu ɖe gbeƒãe. Nukae na wote ŋu wɔ esia? Nusi kpe ɖe wo ŋu geɖe enye be, veviedodo kple kakaɖedzi si wokpɔ le apostolo Paulo kple eƒe hadɔwɔlawo ŋu la kpɔ ŋusẽ nyui ɖe wo dzi. Alekee?

⁷ Paulo kple eƒe hati mɔzɔlawo ƒe agbenɔnɔ ŋutɔ ɖo kpe edzi be Mawu ƒe gbɔgbɔ nɔ wo dzi eye be woxɔ nya si wonɔ gbeƒã ɖemee la dzi se tso dzime ke. Hafi Paulo kple Sila nava Tesalonika la, wodo vlo wo vevie le Filipi. Togbɔ be womedrɔ̃ nya na wo o hã la, woƒo wo, wode wo gaxɔ me, eye wobɔ pã woƒe afɔwo. Gake dodokpɔ sia mefa lãme na wo ɖe nyanyuia ŋu o. Mawu de asi nyaa me ale be woɖe asi le wo ŋu, ena gaxɔdzikpɔla kple eƒemetɔwo trɔ dzime, eye eʋu mɔ na nɔvi siawo be woayi woƒe subɔsubɔdɔa dzi.—Dɔw. 16:19-34.

⁸ Le Mawu ƒe gbɔgbɔ ƒe ŋusẽdoame me la, Paulo va Tesalonika. Le afima la, ewɔ dɔ tsɔ kpɔ eya ŋutɔ ƒe nuhiahiãwo gbɔ eye wòƒo eɖokui ɖe nyateƒea fiafia Tesalonikatɔwo me bliboe. Ewɔ mɔnukpɔkpɔ ɖesiaɖe ŋudɔ tsɔ ɖe gbeƒã nyanyuiae. (Tes. I, 2:9) Kakaɖedzi sẽŋu si Paulo tsɔ ɖe gbeƒãe kpɔ ŋusẽ ɖe dua me tɔwo dzi ale gbegbe be wo dometɔ aɖewo ɖe asi le trɔ̃ siwo wosubɔna tsã ŋu va zu Mawu vavã, Yehowa, subɔlawo.—Tes. I, 1:8-10.

⁹ Yometiti mena xɔsetɔ yeyeawo gbe gbeƒãɖeɖe nyanyuia o. Esi xɔse yeye si ŋu Tesalonikatɔwo ke ɖo la ʋã wo eye woka ɖe edzi bliboe be yewoakpɔ yayra mavɔwo la, ena woɖe gbeƒã nyateƒe si wotsɔ dzonɔameme xɔ lae. Dzo va nɔ hame ma me ale gbegbe be woƒe xɔse kple veviedodo ŋu nya kaka yi Makedonia ƒe akpa bubuwo kple keke Axaya ke hã. Eyata esime Paulo ŋlɔ eƒe lɛta gbãtɔ na Tesalonikatɔwo la, wonya woƒe dɔnyuiwɔwɔwo nyuie xoxo. (Tes. I, 1:7) Kpɔɖeŋu ɖedzesi kae nye si wonye!

¹⁰ Lɔlɔ̃ na Mawu Kple Amewo Ʋãa Mí: Aleke míawɔ kakaɖedzi nanɔ mía ŋutɔwo si abe Tesalonikatɔwo ene ne míele gbeƒã ɖem nyanyuia egbea? Paulo gblɔ le wo ŋu be: ‘Míeɖoa ŋku miaƒe xɔse ƒe dɔwɔwɔ kple lɔlɔ̃ ƒe agbagbadzedze la dzi.’ (Tes. I, 1:3, NW ƒe etenuŋɔŋlɔ) Edze ƒã be lɔlɔ̃ deto si tso dzime nɔ wo si na Yehowa Mawu kple amesiwo woɖe gbeƒã na. Lɔlɔ̃ sia ke wɔe be ‘menye Mawu ƒe nyanyui la ɖeɖeko Paulo kple eƒe zɔhɛwo tsɔ na Tesalonikatɔwo o, ke wotsɔ woa ŋutɔwo ƒe agbe hã na wo.’—Tes. I, 2:8.

¹¹ Nenema ke míaƒe lɔlɔ̃ deto na Yehowa kple na mía havi ʋãa mí míedina be míakpɔ gome le gbeƒãɖeɖedɔ si Mawu de asi na mí be míawɔ la me bliboe. Esi lɔlɔ̃ sia le mía si ta la, míekpɔnɛ dzea sii be enye míaƒe agbanɔamedzi si tso Mawu gbɔ be míaɖe gbeƒã nyanyuia. Ne míetsɔ susu nyui kple ŋudzedzekpɔkpɔ bu nusiwo katã Yehowa wɔ na mí esi wòfia “agbe vavã” la ƒe mɔ mí ŋu la, eʋãa mí be míagblɔ nyateƒe dodzidzɔname ma ke si míexɔ se tso dzi blibo me la na ame bubuwo.—Tim. I, 6:19.

¹² Esi míaƒe ŋku biã ɖe gbeƒãɖeɖedɔa wɔwɔ ŋu la, ele be míaƒe lɔlɔ̃ na Yehowa kple amewo nu nasẽ ɖe edzi. Ne edzɔ nenema la, aʋã mí be míadzi míaƒe gomekpɔkpɔ le aƒeme yi aƒeme dɔa wɔwɔ me ɖe edzi eye míawɔ ɖaseɖiɖimɔnu bubu siwo katã ʋu ɖi na mí la ŋudɔ. Míazã mɔnukpɔkpɔa aɖi ɖase na ƒometɔwo, aƒelikawo, kple ame nyanyɛwo le vome. Togbɔ be ame akpa gãtɔ agbe nyanyui si míeɖea gbeƒãe eye ame aɖewo ate kpɔ be yewoado kplamatse gbeƒãɖeɖe Fiaɖuƒea hã la, míekpɔa dzidzɔ le ememe. Nukatae? Elabena míenyae be míewɔ nusi míate ŋui tsɔ ɖi ɖase le Fiaɖuƒea ŋu eye míekpe ɖe amewo ŋu be woakpɔ ɖeɖe. Eye Yehowa ayra ɖe míaƒe agbagbadzedzewo dzi be míake ɖe dzinyuitɔwo ŋu. Ne agbemenuteɖeamedziwo ɖe kpe na mí eye Satana di be yeaxɔ míaƒe dzidzɔ le mía si hã la, míete ŋu léa míaƒe kakaɖedzi sẽŋu kple veviedodo me ɖe asi le ɖaseɖiɖi na ame bubuwo me. Ne mí katã míewɔ míaƒe akpa dzi la, ena hameawo sẽa ŋu hedoa vevie nu abe esi nɔ Tesalonika la ene.

¹³ Mègana Ta le Dodokpɔ me Gbeɖe O: Míehiã kakaɖedzi hã ne míedo go dodokpɔ vovovowo. (Pet. I, 1:6, 7) Yesu na eme kɔ na eƒe nusrɔ̃lawo be ne wodze ye yome la, “dukɔwo katã woalé fu” wo. (Mat. 24:9) Paulo kple Sila kpɔ esia teƒe esime wonɔ Filipi. Nuŋlɔɖi si le Dɔwɔwɔwo ta 16 gblɔ be wode Paulo kple Sila gaxɔ emetɔ me eye wobɔ pã woƒe afɔwo. Zi geɖe la, gaxɔa ŋutɔ nyea teƒe gbadza alo xɔ gã si ŋu gaxɔ suewo nɔna eye keklẽ kple ya nɔa eme. Gake keklẽ menɔa gaxɔ emetɔ ya me o eye yatoƒe sue aɖe koe nɔa eŋu. Ele be Paulo kple Sila nanɔ te ɖe viviti, dzoxɔxɔ, kple gaxɔ madeamedzi sia ƒe ʋeʋẽ nu. Àte ŋu akpɔ veve si wose le esi wobɔ pã woƒe afɔwo gaƒoƒo geɖe eye ƒoƒoa na woƒe dzi me wɔ abi henɔ ʋu tom la le susu mea?

¹⁴ Togbɔ be Paulo kple Sila to dodokpɔ siawo me hã la, woyi edzi wɔ nuteƒe. Woɖe kakaɖedzi si tso dzime fia eye edo ŋusẽ wo wosubɔ Yehowa togbɔ be wonɔ dodokpɔ me hã. Woƒe kakaɖedzi dze le ta 16 lia ƒe kpukpui 25 lia me, afisi gblɔ be Paulo kple Sila ‘nɔ gbe dom ɖa, eye wodzi kafukafuhawo na Mawu.’ Togbɔ be ŋutsu siawo nɔ gaxɔ emetɔ me hã la, woka ɖe edzi bliboe be Mawu le megbe na yewo ale gbegbe be wodzi ha wòɖi sesĩe ale be gamenɔla bubuwo see! Ele be kakaɖedzi sia tɔgbe nanɔ mía si ne míedze ŋgɔ xɔse ƒe dodokpɔwo.

¹⁵ Dodokpɔ siwo Abosam hena vaa mía dzi la sɔ gbɔ. Ame aɖewo tɔ anye yometiti si tso ƒometɔwo gbɔ. Mía nɔvi geɖe dze ŋgɔ senyawo. Xɔsegbelawo ate ŋu atsi tre ɖe mía ŋu. Gakuxiwo kple dzitsitsi ɖe alesi míawɔ akpɔ míaƒe nuhiahiãwo gbɔe hã li. Sɔhɛwo dzea ŋgɔ hatiwo ƒe nyaƒoɖeamenu le suku. Aleke míawɔ adze ŋgɔ dodokpɔ siawo dzidzedzetɔe? Nukae hiã hafi míate ŋu aɖe kakaɖedzi afia?

¹⁶ Nu gbãtɔ kple vevietɔ enye be ele be ƒomedodo kplikplikpli nanɔ ame ŋutɔ kple Yehowa dome. Esime Paulo kple Sila nɔ gaxɔ emetɔ me la, womezã ɣeyiɣi ma tsɔ nɔ nɔnɔme si me wova le ŋu bum alo na woƒe nu wɔ nublanui na wo ɖokui o. Wotrɔ ɖe Mawu ŋu le gbedodoɖa me enumake eye wodzi ha kafui. Nukatae? Elabena ƒomedodo kplikplikpli nɔ woa ŋutɔwo kple wo Fofo si le dziƒo la dome. Wokpɔe dze sii be dzɔdzɔenyenye tae yewonɔ fu kpem ɖo eye be Yehowa ƒe asi mee yewoƒe ɖeɖekpɔkpɔ le.—Ps. 3:8.

¹⁷ Ne míedze ŋgɔ dodokpɔwo egbea la, ele be míawo hã míakpɔ Yehowa sinu. Paulo de dzi ƒo na mí Kristotɔwo be ‘míana Mawu nanya míaƒe dzimedidiwo; eye Mawu ƒe ŋutifafa, si ƒo gɔmesesewo katã ta la, adzɔ míaƒe dziwo kple míaƒe tamesusuwo ŋu.’ (Fil. 4:6, 7) Aleke gbegbe wòfaa akɔ na amee nye si be míanya be Yehowa magblẽ mí ɖi be míawo ɖeɖe míato dodokpɔwo me o! (Yes. 41:10) Anɔ mía ŋu ɣesiaɣi zi alesi míetsɔ kakaɖedzi vavãtɔ le esubɔmee ko.—Ps. 46:8.

¹⁸ Kpekpeɖeŋunu bubu si ana míaɖe kakaɖedzi afia enye be míayi edzi abiã ŋku ɖe Yehowa ƒe subɔsubɔdɔa ŋu. (Kor. I, 15:58) Wode Paulo kple Sila gaxɔ me le esi wobiã ŋku ɖe gbeƒãɖeɖe nyanyuia ŋu ta. Ðe wodzudzɔ gbeƒãɖeɖe le woƒe dodokpɔwo ta? Ao, woyi edzi ɖe gbeƒã esi wonɔ gaxɔ me gɔ̃ hã, eye le asiɖeɖe le wo ŋu megbe la, wozɔ mɔ yi Tesalonika heyi Yudatɔwo ƒe ƒuƒoƒe va ‘dzro Ŋɔŋlɔawo me kpli wo.’ (Dɔw. 17:1-3) Ne míexɔ Yehowa alo xɔ edzi se vevie eye míeka ɖe edzi be míekpɔ nyateƒea la, naneke “mate ŋu amã mí atso Mawu ƒe lɔlɔ̃, si le Kristo Yesu, mía Aƒetɔ me la gbɔ o.”—Rom. 8:35-39.

¹⁹ Kakaɖedzi Sẽŋu ƒe Kpɔɖeŋu Siwo Li Egbea: Amesiwo ɖea kakaɖedzi sẽŋu fiana le míaƒe ŋkekea me abe Paulo kple Sila ene la ƒe kpɔɖeŋu ɖedzesiwo li. Nɔvinyɔnu aɖe si tsi agbe le Auschwitz-fuwɔamesaɖa me ƒo nu tso xɔse maʋãmaʋã kple kakaɖedzi si nɔviŋutsuwo kple nɔvinyɔnuwo ɖe fia le afima ŋu. Egblɔ be: “Gbeɖeka esi wonɔ gbe biam mí la, amegã aɖe ŋlɔ kɔ hete ɖe ŋunye. Ebia kple ɣli be: ‘Nuka koŋ míawɔ na mi? Ne míelé mi la, mietsɔa ɖeke le eme o. Ne míede mi gaxɔ me hã la, metsɔa fu lãme na mi o. Ne míekplɔ mi yi fuwɔamesaɖa me hã la, meɖea fu na mi o. Ne míetso kufia na mi hã la, ɖeko mietɔna ɖi ɖekematsɔlemetɔe. Nuka koŋ míagawɔ na mi?’” Aleke gbegbe wòdoa ŋusẽ xɔse enye si be míakpɔ xɔse si nɔ mía nɔviwo si le nɔnɔme sesẽ siawo me! Wokpɔa Yehowa sinu ɣesiaɣi be wòakpe ɖe yewo ŋu yewoado dzi.

²⁰ Nyateƒee, míeɖoa ŋku kakaɖedzi si nɔ mía nɔvi geɖe si esi wodze ŋgɔ gbevovodolawo dome fuléle si do mo ɖa le ƒe siwo va yi nyitsɔ laa me. Togbɔ be wonɔ nɔnɔme siwo me afɔku nɔ me hã la, nɔvi siwo xɔa ŋgɔ la ɖoe be yewoakpɔ egbɔ kokoko be gbɔgbɔmenuɖuɖu le yewo nɔviŋutsu kple nɔvinyɔnuwo sum. Wo katã woyi edzi wɔ nuteƒe eye kakaɖedzi sẽŋu nɔ wo si be ‘lãnu sia lãnu si woatu ɖe yewo ŋu la, madze edzi o.’—Yes. 54:17.

²¹ Mía nɔviŋutsu kple nɔvinyɔnu geɖe siwo srɔ̃wo nye dzimaxɔsetɔwo hã le xɔse sesẽ ɖem fia hele dzi dom. Nɔviŋutsu aɖe si le Guadeloupe do go tsitretsiɖeŋu sesẽ aɖe tso srɔ̃a dzimaxɔsetɔ gbɔ. Le esi nyɔnua di be yeaɖe dzi le eƒo ahado kplamatsee le eƒe Kristotɔwo ƒe kpekpewo dede me ta la, megaɖaa nu nɛ o, menyaa eƒe awuwo o, eye meɖoa eƒe awuwo dzi alo tɔa wo o. Nyɔnua meƒoa nu nɛ o ɣeyiɣi didi aɖe. Gake esi nɔviŋutsu sia ɖe kakaɖedzi si tso dzime fia le Yehowa subɔsubɔ me eye wòdi eƒe kpekpeɖeŋu le gbedodoɖa me la, ete ŋu do dzi to nusiawo katã me. Ɣeyiɣi didi kae wòtsɔ do dzi? Ade ƒe 20—eye emegbe srɔ̃a ƒe dzi va nɔ tɔtrɔm vivivi. Nɔviŋutsua te ŋu tso aseye mlɔeba elabena srɔ̃a va xɔ Mawu Fiaɖuƒea ƒe mɔkpɔkpɔ.

²² Mlɔeba la, mele be míaŋlɔ mía nɔviŋutsu kple nɔvinyɔnu sɔhɛ siwo yia suku gbesiagbe eye wodzea ŋgɔ hatiwo ƒe nyaƒoɖeamenu kple kuxi bubuwo la ƒe kakaɖedzi sẽŋu be o. Nyɔnuvi aɖe si nye Ðasefo gblɔ le ame bubuwo ƒe nɔnɔme sɔsrɔ̃ ƒe nyaƒoɖeamenua ŋu be: “Ne èle suku la, amesiame dea dzi ƒo na wò ɣesiaɣi be nadze aglã vie. Ðeviawo dea bubu ŋuwò geɖe wu ne èwɔ aglãdzenu aɖe.” Nyaƒoɖeamenu ka gbegbee nye si míaƒe sɔhɛwo dzea ŋgɔe! Ele be woaɖoe kplikpaa le susu me kple dzime be yewoatsi tre ɖe tetekpɔ ɖesiaɖe ŋu.

²³ Míaƒe sɔhɛwo dometɔ geɖe le agbagba dzem le woƒe nuteƒewɔwɔ me léle ɖe asi me. Woƒe kpɔɖeŋu ɖekae nye nɔvinyɔnu sɔhɛ aɖe si le France. Gbeɖeka le ŋdɔnuɖuɖu megbe la, ŋutsuvi aɖewo te kpɔ be yewoazi edzi wòagbugbɔ nu na yewo, gake edo gbe ɖa eye wògbe gbidii be yemawɔe o, ale be ŋutsuviawo dzo le egbɔ. Emegbe wo dometɔ ɖeka trɔ va gblɔ nɛ be eƒe dzideƒoa wɔ dɔ ɖe ye dzi. Nɔvinyɔnua te ŋu ɖi ɖase nɛ nyuie tso Fiaɖuƒea ŋu, eye wòɖe dzidzenu kɔkɔ si Yehowa ɖo na amesiwo katã di be yewoakpɔ eƒe yayrawo la me nɛ. Le ƒe ma me le suku la, eɖe eƒe dzixɔsewo me na eƒe klass bliboa hã.

²⁴ Mɔnukpɔkpɔ xɔasi kae nye si su mía si be woabu mí ɖe amesiwo ŋu Yehowa kpɔa ŋudzedze ɖo be yeazã woaƒo nu tso yeƒe lɔlɔ̃nu ŋu kple kakaɖedzi sẽŋu la dome! (Kol. 4:12) Tsɔ kpe ɖe eŋu la, mɔnukpɔkpɔ nyui aɖe le mía si be míaɖe míaƒe nuteƒewɔwɔ afia ne míaƒe Futɔ, Satana Abosam, si le abe dzata ene la dze mía dzi. (Pet. I, 5:8, 9) Mègaŋlɔe be gbeɖe o be Yehowa le Fiaɖuƒegbedasia ŋudɔ wɔm be yeatsɔ axɔ mí amesiwo ɖea gbeƒãe kple amesiwo ɖoa to mí la siaa ɖe agbe. Neva eme be nyametsotso siwo míewɔna kple alesi míenɔa agbee gbesiagbe naɖee afia be míetsɔ Fiaɖuƒea ɖo nɔƒe gbãtɔ. Mina míayi edzi aɖe gbeƒã nyanyuia kple kakaɖedzi sẽŋu.