14, 15. Amewo nu ƒoƒo ƒu kae ayi edzi ne Gog si tso Magog dze Mawu ƒe amewo dzi teti, eye aleke woawɔ esiae?

¹⁴ Nu kae adzɔ ne Gog si tso Magog dze Mawu ƒe amewo dzi teti? Biblia gblɔ be Amegbetɔvi la adɔ “mawudɔlawo ɖa [eye] wòaƒo eƒe ame tiatiawo nu ƒu tso anyigba ƒe dzogoe eneawo dzi, tso anyigba ƒe seƒe va se ɖe dziƒo ƒe seƒe ke.” (Marko 13:27; Mateo 24:31) Amewo nu ƒoƒo ƒu sia to vovo na ɣeyiɣi si me wotia Kristotɔ amesiaminawo zi gbãtɔ. Eye menye amesiamina siwo kpɔtɔ le anyigba dzi la nu tetre mamlɛtɔa hã ye o. (Mateo 13:37, 38) Woatre wo nu zi mamlɛtɔ do ŋgɔ teti na xaxa gã la ƒe gɔmedzedze. (Nyaɖeɖefia 7:1-4) Ekema amewo nu ƒoƒo ƒu kae esia nye? Anye ɣeyiɣi si me amesiamina siwo kpɔtɔ le anyigba dzi la axɔ woƒe fetua eye woayi dziƒo. (1 Tesalonikatɔwo 4:15-17; Nyaɖeɖefia 14:1) Esia adzɔ ɣeyiɣi aɖe le Gog si tso Magog ƒe amedzidzedzea me. (Ezekiel 38:11) Ekema abe ale si Yesu gblɔe ene la, “ame dzɔdzɔewo aklẽ abe ɣe ene le wo Fofo ƒe Fiaɖuƒe la me.”—Mateo 13:43.b (Kpɔ etenuŋɔŋlɔa.)

¹⁵ Ðe esia fia be woakplɔ amesiaminawo ayi dziƒo le woƒe amegbetɔŋutilã mea? Sɔlemedela akpa gãtɔ xɔe se be woakɔ xɔsetɔwo ayi dziƒo le ŋutilã me. Woxɔe se hã be yewoakpɔ Yesu kple ŋku ŋutɔŋutɔ ne etrɔ gbɔna be yeava ɖu anyigba dzi. Gake Biblia na eme kɔ be mímakpɔ Yesu kple ŋku ŋutɔŋutɔ ne etrɔ gbɔ o, esi wògblɔ be “Amegbetɔvi la ƒe dzesi adze le dziƒo” eye Yesu ava “le dziƒolilikpowo dzi.” (Mateo 24:30) Biblia gblɔ hã be “ŋutilã kple ʋu mate ŋu anyi Mawu Fiaɖuƒe la dome o.” Eya ta ame siwo woakplɔ ayi dziƒo la, ahiã be ‘woatrɔ wo katã ƒe nɔnɔme’ “enumake, le aɖabaƒoƒo ɖeka me, le kpẽkuku mamlɛa me.”c (Kpɔ etenuŋɔŋlɔa.) (Xlẽ 1 Korintotɔwo 15:50-53.) Womakɔ amesiamina siwo kpɔtɔ le anyigba dzi la ayi dziƒo kple woƒe amegbetɔŋutilã abe ale si hakplɔlawo fiaa woƒe sɔlemeviwo ene o. Ke boŋ woaƒo amesiamina wɔnuteƒe siwo kpɔtɔ le anyigba dzi la nu ƒu ɖe dziƒo enumake.