Kpɔɖeŋunyagbɔgblɔ Siwo Wozã Le Biblia Me—Èsea Wo Gɔmea?

NUTATA aɖe ate ŋu ahe nya gbogbo aɖewo ŋutɔ ava susu me na ekpɔla, gake ɣeaɖewoɣi la, nya ɖeka alo eve aɖewo ko woatsɔ aɖɔ nanee bene woakpɔ eƒe nɔnɔmetata le susu me. Kpɔɖeŋunyagbɔgblɔwo, alo nya siwo nana nuxlẽlaa kpɔa nɔnɔmetata aɖe le susu me la bɔ ɖe Biblia me fũu. Le kpɔɖeŋu me, numekuku ɖee fia be le mawunyagbɔgblɔ ɖeka pɛ—Todzimawunya La—ko me la, Yesu zã kpɔɖeŋunyagbɔgblɔ 50 kple edzivɔwo.

Nu ka tae wòle be nàtsɔ ɖe le kpɔɖeŋunyagbɔgblɔ siawo me? Susuawo dometɔ ɖekae nye be wo gɔmesese ana Biblia xexlẽ navivi nuwò ahade dzi gbɔ na wò wu, si awɔe be wò ŋudzedzekpɔkpɔ ɖe Mawu ƒe Nyaa ŋu agade to ɖe edzi. Tsɔ kpe ɖe eŋu la, àse Biblia me gbedeasia gɔme ɖe edzi nyuie wu ne ènya nu siwo kpɔɖeŋunyagbɔgblɔ siwo wozã le eme la le tsitre ɖi na. Le nyateƒe me la, menye ɖeko nu si kpɔɖeŋunyagbɔgblɔ aɖe si wozã le Biblia me fia la manyamanya ate ŋu ana ame natɔtɔ ko o, ke ana hã be amea nase nuwo gɔme bubui.

Kpɔɖeŋunyagbɔgblɔwo Gɔme Sese

Wotoa kpɔɖeŋunyagbɔgblɔwo dzi tsɔa nane sɔna kple bubu. Míayɔ nu si wotsɔ nane le sɔsɔm kple la be nyati la, eye míayɔ nu si wotsɔe le sɔsɔm kple la be kpɔɖeŋu la. Míayɔ nu siwo me nu eve siwo wotsɔ le sɔsɔm kple wo nɔewo sɔ kple wo nɔewo le la be go si me wosɔ kple wo nɔewo le. Eya ta nu vevi si ana nànya gɔmesese si tututu le kpɔɖeŋunyagbɔgblɔ aɖe ŋu lae nye dzesidede nu etɔ̃ mawo dometɔ ɖe sia ɖe kple wo gɔme sese.

Ɣeaɖewoɣi la, anɔ bɔbɔe be nàde dzesi nyatia kple kpɔɖeŋua. Gake go si me wosɔ kple wo nɔewo le ya ate ŋu asɔ gbɔ. Nu kae akpe ɖe ŋuwò nàte ŋu ade dzesi go si me wosɔ kple wo nɔewo le hena gɔmesese nyuitɔa? Zi geɖe la, nya siwo ƒo xlã kpɔɖeŋunyagbɔgblɔa ye kpena ɖe ame ŋu.a

Le kpɔɖeŋu me, Yesu gblɔ na hame si nɔ Sardes la be: “Ɛ̃, ne mènyɔ o la, mava abe fiafitɔ ene.” Le afi sia la, Yesu tsɔ eƒe vava (nyati la) nɔ sɔsɔm kple fiafitɔ ƒe vava (kpɔɖeŋu la). Gake nu ka mee nu eve siawo sɔ kple wo nɔewo le? Nya siwo ƒo xlãe kpe ɖe mía ŋu. Yesu yi edzi gblɔ be: “Mànya gaƒoƒo si dzi mava do ɖe dziwò la kura o.” (Nyaɖeɖefia 3:3) Eya ta menye susu si ta wòava ɖo la dzie kpɔɖeŋu sia le susu hem yi o. Menye ɖee wònɔ gbɔgblɔm be yeava fi nane o. Ke boŋ nya la ku ɖe ale si wòava le vo me, alo mana wòanya gaƒoƒoa do ŋgɔ o la ŋu.

Gake ɣeaɖewoɣi la, kpɔɖeŋunyagbɔgblɔ si dze le Biblia ƒe teƒe aɖe ate ŋu akpe ɖe ŋuwò nàse etɔgbi aɖe si wozã le teƒe bubu la gɔme. Le kpɔɖeŋu me, apostolo Paulo zã kpɔɖeŋunyagbɔgblɔ si tututu Yesu zã la esi wòŋlɔ be: “Mia ŋutɔwo mienyae nyuie be, Yehowa ƒe ŋkeke la gbɔna abe ale si tututu fiafitɔ vana le zã me ene.” (1 Tesalonikatɔwo 5:2) Nya siwo Paulo gblɔ ƒo xlã kpɔɖeŋunyagbɔgblɔ sia mena gɔmesesea dze tẽe o. Ke hã, eƒe kpɔɖeŋunyagbɔgblɔa tsɔtsɔ sɔ kple esi Yesu zã le Nyaɖeɖefia 3:3 ate ŋu akpe ɖe ŋuwò nàse egɔme. Aleke gbegbe kpɔɖeŋunyagbɔgblɔ sia na Kristotɔwo tea ŋu ɖoa ŋkui vevie be ele be yewoanɔ ŋudzɔ le gbɔgbɔ mee nye esi!

Kpɔɖeŋunyagbɔgblɔ Siwo Fiaa Nu Mí Tso Mawu Ŋu

Amegbetɔ aɖeke mate ŋu ase Ŋusẽkatãtɔ la ƒe amenyenye ƒe akpa sia akpa kple eƒe ŋusẽ triakɔ la gɔme bliboe o. Fia David ŋlɔ le blema be Yehowa ƒe “gãnyenye me dzodzro meli o.” (Psalmo 145:3) Esi Hiob de ŋugble tso Mawu ƒe asinudɔwɔwɔ aɖewo ŋu la, edo ɣli be: ‘Kpɔ ɖa, esiawo nye eƒe mɔwo toga, eye nu si sem míele la, nye dalĩdodo. Ke ame kae ate ŋu ase eƒe ŋusẽ ƒe gbeɖeɖe gɔme?’—Hiob 26:14.

Togbɔ be ele nenema hã la, Biblia zã kpɔɖeŋunyagbɔgblɔwo tsɔ kpe ɖe mía ŋu be míase mía Mawu si le dziƒo la ƒe nɔnɔme wɔnukuawo gɔme va se ɖe afi aɖe. Woɖɔ Yehowa be enye Fia, Senala, Ʋɔnudrɔ̃la, kple Aʋakalẽtɔ—si na wòdze ƒãa be ele be míade bubu eŋu. Wogblɔ hã be enye Alẽkplɔla, Aɖaŋuɖola, Nufiala, Fofo, Gbedala, kple Ðela—si na wòdze ƒãa be ele be míalɔ̃ eyama. (Psalmo 16:7; 23:1; 32:8; 71:17; 89:27; 103:3; 106:21; Yesaya 33:22; 42:13; Yohanes 6:45) Dzesideŋkɔ vovovo siawo dometɔ ɖe sia ɖe nye kpɔɖeŋunyagbɔgblɔ si akpe ɖe mía ŋu míanya nu dodzidzɔname geɖewo tso Mawu ŋu. Kpɔɖeŋunyagbɔgblɔ siawo na míese nu geɖe siwo womate ŋu azã nya gbogbowo atsɔ agblɔ wòade edeƒe gɔ̃ hã o la gɔme.

Biblia tsɔ Yehowa sɔ kple nu siwo me agbe mele o gɔ̃ hã. Woɖɔe be enye ‘mɔ̃ sesẽ’ kple “Israel ƒe agakpe.” (2 Samuel 23:3; Psalmo 18:3; 5 Mose 32:4) Nu ka tae wotsɔe sɔ kple nu siawo? Abe ale si ko agakpe sẽa ŋu, eye wòlia ke sesĩe ene la, nenemae Yehowa Mawu ate ŋu anye dedienɔƒe sẽŋu aɖe na wò.

Kpɔɖeŋunyagbɔgblɔ siwo ƒo nu tso Yehowa ƒe amenyenye ƒe akpa vovovowo ŋu la yɔ Psalmowo ƒe agbalẽa me fũu. Le kpɔɖeŋu me, Psalmo 84:12 gblɔ be Yehowa nye “ɣe kple akpoxɔnu” le esi eyae nye kekeli, agbe, ŋusẽ, kple ametakpɔkpɔ Tsoƒe gãtɔ ta. Le go bubu me la, Psalmo 121:5 gblɔ be “Yehowa enye wò vɔvɔli le wò nuɖusi me.” Abe ale si nane ƒe vɔvɔli te nɔnɔ kpɔa tawò ne ŋdɔ le ʋuʋum helĩhelĩ ene la, Yehowa kpɔa ame siwo subɔnɛ la ta tso dzɔgbevɔ̃e ƒe dzoxɔxɔwo nu henana wonɔa eƒe ‘asi’ alo “aʋala” ƒe ametakpɔkpɔ ƒe vɔvɔli te.—Yesaya 51:16; Psalmo 17:8; 36:8.

Kpɔɖeŋunyagbɔgblɔ Siwo Ƒo Nu Tso Yesu Ŋu

Biblia yɔ Yesu enuenu be “Mawu ƒe Vi.” (Yohanes 1:34; 3:16-18) Nya sia gɔme sese sesẽna na ame aɖewo siwo menye Kristotɔwo o, le esi wònye be srɔ̃ ŋutɔŋutɔ mele Mawu si o, eye menye amegbetɔ hãe wònye o ta. Le nyateƒe me la, Mawu medzia vi abe ale si amegbetɔ dzia vi ene o. Eya ta kpɔɖeŋunyagbɔgblɔe wònye wozãna nɛ. Ðe wogblɔ alea bene nuxlẽla nase egɔme be ƒomedodo si le Yesu kple Mawu dome la le abe esi nɔa vi kple tɔ dome ene. Kpɔɖeŋunyagbɔgblɔ sia gahe susu yi nyateƒe si wònye be Yehowa gbɔe Yesu ƒe agbe dzɔ tso—be eyae wɔe—la dzi. Le mɔ ma ke nu la, woƒo nu tso ame gbãtɔ Adam ŋu be enye “Mawu ƒe vi.”—Luka 3:38.

Yesu zã kpɔɖeŋunyagbɔgblɔwo tsɔ ɖɔ akpa vovovo siwo wòwɔna le Mawu ƒe tameɖoɖo me vava me. Le kpɔɖeŋu me, egblɔ be: “Nyee nye wainti vavã la, eye Fofonyee nye agbledela la.” Eyome Yesu tsɔ eƒe nusrɔ̃lawo sɔ kple wainti ƒe alɔdzewo. (Yohanes 15:1, 4) Nu vevi kawoe kpɔɖeŋunyagbɔgblɔ sia le mía fiam? Hafi wainti ƒe alɔdzewo nanɔ agbe ahatse ku la, ele be woakpɔtɔ anɔ ati la ŋutɔ ŋu. Nenema kee wòle be Kristo ƒe nusrɔ̃lawo nanɔ ɖekawɔwɔ me kplii. Yesu gblɔ be: “Nye manɔmee la, miate ŋu awɔ naneke kura o.” (Yohanes 15:5) Eye abe ale si ko waingbledela kpɔa mɔ be yeƒe wainti natse ku ene la, Yehowa hã kpɔa mɔ be ame siwo le ɖekawɔwɔ me kple Kristo la natse gbɔgbɔmekuwo.—Yohanes 15:8.

Dze Agbagba Be Yease Kpɔɖeŋunyagbɔgblɔwo Gɔme

Nukpɔsusu bubu kuraa ate ŋu asu mía si ne míexlẽ kpɔɖeŋunyagbɔgblɔ aɖe, evɔ míese nu si tututu wòfia la gɔme o. Le kpɔɖeŋu me, bu nya si dze le Romatɔwo 12:20 ŋu kpɔ: “Ne dɔ le wò futɔ wum la, na nui wòaɖu; ne tsikɔ le ewum la, na nanee wòano; elabena ne èwɔ esia la, àlɔ dzoka xɔxɔwo akɔ ɖe eƒe ta dzi.” Ðe dzoka xɔxɔwo lɔlɔ akɔ ɖe eƒe ta dzi fia wɔɖenuiwɔwɔa? Ne míese kpɔɖeŋunyagbɔgblɔ sia gɔme nyuie la, míakpɔe be mefia nenema kura o. Ale si wolóloa ga le blema la mee woɖe kpɔɖeŋu sia tsoe. Wodaa tomenu si me woɖea ga tsonae la ɖe dzoka xɔxɔwo dzi hegakɔa dzoka xɔxɔ bubuwo ɖe edzi. Wotoa esia dzi lóloa tomenua eye ɖinuwo ɖena le eŋu si nana wokena ɖe ga akuakua ŋuti. Nenema kee dɔmenyonyo na ame nana amea va ɖea nɔnɔme nyuiwo fiana.

Menye ɖeko kpɔɖeŋunyagbɔgblɔwo gɔme sese nana nuwo me kɔna na mí nyuie ko o, ke wodea míaƒe dzi gbɔ hã. Nu vɔ̃ tsɔtsɔ sɔ kple fenyinyi nana míekpɔa ale si gbegbe wònye ŋkubiãnyae la dzea sii. (Luka 11:4) Gake ne Yehowa tsɔ fe sia si wòle be míaxe la ke mí la, ɖe esia menaa gbɔdzɔe mí ŋutɔ oa? Esi wogblɔ be ‘etsyɔa nu’ míaƒe nu vɔ̃wo dzi, alo ‘tutua’ wo ɖa—abe ale si wotutua nuŋɔŋlɔ ɖa le nuŋlɔkpe dzi ene—la enana kakaɖedzi sua mía si be magahe to na mí ɖe wo ta le etsɔme o. (Psalmo 32:1, 2; Dɔwɔwɔwo 3:19) Eye aleke gbegbe wòfaa akɔ na amee nye esi be míanya be Yehowa ate ŋu atrɔ míaƒe nu vɔ̃ siwo le abe nyagadzĩ ene alo biã abe aɖabɛ ene la, woafu abe sno ene!—Yesaya 1:18.

Kpɔɖeŋunyagbɔgblɔ alafa geɖe siwo le Mawu ƒe Nya, Biblia la me la dometɔ ʋɛ aɖewo koe nye esiawo. Eya ta ne èle Biblia xlẽm la, lé ŋku ɖe kpɔɖeŋunyagbɔgblɔwo ŋu etɔxɛe. Gbɔ dzi ɖi nàdi nu si tututu kpɔɖeŋunyagbɔgblɔawo fia, eye nàde ŋugble tso wo ŋu. Esia wɔwɔ ana nàgase Ŋɔŋlɔawo gɔme ɖe edzi nyuie eye wò ŋudzedzekpɔkpɔ ɖe wo ŋu ade to ɖe edzi.

[Etenuŋɔŋlɔ]

[Aɖaka si le axa 13]

Ale Si Kpɔɖeŋunyagbɔgblɔwo Kpena Ðe Ame Ŋu

Kpɔɖeŋunyagbɔgblɔwo kpena ɖe mía ŋu le mɔ geɖewo nu. Woate ŋu ato kpɔɖeŋunyagbɔgblɔ dzi atsɔ nane si gɔmesese sesẽ la asɔ kple nu bubu aɖe si gɔme woate ŋu ase bɔbɔe. Woate ŋu azã kpɔɖeŋunyagbɔgblɔ geɖewo atsɔ aɖe nya ɖeka aɖe ƒe akpa vovovowo me. Woate ŋu azã kpɔɖeŋunyagbɔgblɔwo atsɔ ate gbe ɖe nyati vevi aɖe dzi alo ana wòade dzi gbɔ na ame wu.

[Aɖaka si le axa 14]

Kpɔɖeŋunyagbɔgblɔa Ƒe Akpa Vovovowo

KPƆÐEŊUNYAGBƆGBLƆA: “Miawoe nye anyigba ƒe dze.” (Mateo 5:13)

NYATIA: Miawo (Yesu ƒe nusrɔ̃lawo)

KPƆÐEŊUA: Dze

NU SIWO SƆ KPLE WO NƆEWO LE GO SIA ME: Nutakpɔkpɔ

NUFIAMEA: Wotsɔ gbedeasi aɖe si ate ŋu akpɔ amewo ƒe agbe ta la de nusrɔ̃lawo si

[Aɖaka si le axa 15]

“Yehowa enye kplɔlanye, naneke mehiãam o.”

PSALMO 23:1