Ta 16

Mawu Vavã la Kple Wò Etsɔ Me

“Le xexe manyatalenu sia me la, nu ɖeka li si dzi Amegbetɔ ate ŋu aka ɖo. Kakaɖedzitɔe la, menye Amegbetɔ ŋutɔe nye gbɔgbɔmeme gãtɔ kekeake si le Xexeame Godoo o. . . . Ame aɖe le Xexeame Godoo si nye gbɔgbɔmeme si de ŋgɔ wu Amegbetɔ ŋutɔ. . . . Amegbetɔ ƒe taɖodzinue nye be kadodo nanɔ ye kple amesi le megbe na nudzɔdzɔwo la dome, eye yeadii kple susu be yeana ɖekawɔwɔ nanɔ ye ŋutɔ yeƒe amenyenye kple gbɔgbɔmeme sia si ƒo nusianu ta la dome.”—An Historian’s Approach to Religion, si Arnold Toynbee ŋlɔ.

 1. (Tsɔ ŋgɔdonya hã kpee.) (a) Nukae ŋutinyaŋlɔla Toynbee de dzesii le amegbetɔ kple xexeame dome? (b) Amekae Biblia yɔ be eyae nye “gbɔgbɔmeme . . . si ƒo nusianu ta”?

LE ƑE AKPE ade siwo va yi ƒe akpa gãtɔ me la, ameƒomea tsɔ dzonɔameme gã alo esi mede ŋgɔ boo o di “gbɔgbɔmeme” ma “si ƒo nusianu ta” lae. Subɔsubɔha gã ɖesiaɖe tsɔ ŋkɔ vovovo na ame ma. Le subɔsubɔha si me nèle nu—Hindu, Moslem, Buddha, Shinto, Konfusio, Tao, Yuda, Kristo tɔ, alo subɔsubɔ bubu ɖesiaɖe o, ŋkɔ aɖe li si nèyɔna na “gbɔgbɔmeme sia si ƒo nusianu ta” la. Gake Biblia yɔ nuwokatãtaƒola sia ŋkɔ, ne ŋutsue alo nyɔnue wònye, kple eƒe amenyenye—eyae nye Yehowa, Mawu gbagbe la. Mawu tɔxɛ ma gblɔ na Kores Gãtɔ si tso Persia be: “Nyee nye Yehowa, ɖeke megali o; mawu aɖeke mekpe ɖe ŋunye o; . . . Nyee wɔ anyigba eye mewɔ ame ɖe edzi.”—Yesaya 45:5, 12, 18; Psalmo 68:19, 20.

Yehowa—Mawu si ƒe Nyagblɔɖiwo Ŋu Kakaɖedzi Le

 2. Ne míedi etsɔ si gbɔna ŋuti nyatakaka si ŋu kakaɖedzi le la, ameka ŋue wòle be míatrɔ ɖo, eye nukatae?

² Yehowa ye nye taɖodzinu vavãtɔ si ŋu woake ɖo le ameƒomea ƒe Mawu didi me. Yehowa ɖe eɖokui fia be yee nye nyagblɔɖi Mawu si ate ŋu agblɔ nu ƒe nuwuwu tso eƒe gɔmedzedze. Egblɔ to nyagblɔɖila Yesaya dzi be: “Miɖo ŋu nusiwo dzɔ va yi tso blema la be, nyee nye Mawu, ɖeke megali o, nyee nye Mawu, ame aɖeke mesɔ kplim o; nye amesi ɖe nuwuwu fia le gɔmedzedzea me ke kple nusi gbɔna dzɔdzɔ ge la fia le blema gblɔ bena: Nye tameɖoɖo ava me, eye mawɔ nye didiwo katã dzi; . . . megblɔ nya, eye mana wòava eme hã, meɖo nu, eye mawɔe hã.”—Yesaya 46:9-11; 55:10, 11.

 3. (a) Nudzɔdzɔ kawoe Biblia ƒe nyagblɔɖi kpe ɖe mía ŋu be míate ŋu akpɔ do ŋgɔ? (b) Nukae Satana wɔ na dzimaxɔsetɔwo, eye nukatae?

³ Esi Mawu si ƒe nyagblɔɖi ŋu kakaɖedzi le sia le mía si ta la, míate ŋu anya nusi gbɔna dzɔdzɔ ge ɖe subɔsubɔha siwo me mã ƒe xexemenuɖoanyi la dzi. Míate ŋu anya nusi adzɔ ɖe dunyahehabɔbɔ sẽŋu siwo dzena abe woawoe kpɔ ŋusẽ ɖe xexeame dzi ene la hã dzi. Gawu ema kura la, míate ŋu anya nuwuwu si ƒomevi le ‘nuɖoanyi sia ƒe mawu’ la lalam, eya amesi “gbã ŋku na dzimaxɔsetɔwo ƒe tamesusu” to subɔsubɔha gbogbo siwo kplɔ amewo trae tso nyateƒe Mawu, Yehowa, gbɔe la dzi. Eye nukatae Satana gbã ŋku na amewo alea? “Bene Kristo, si nye Mawu ƒe nɔnɔme la, ƒe ŋutikɔkɔe nyanyui la ƒe kekeli nagaklẽ na wo o.”—Korintotɔwo II, 4:3, 4; Yohanes I, 5:19.

 4. Nyabiabia siwo ku ɖe anyigba kple amegbetɔ ƒe etsɔ me ŋu kawoe hiã ŋuɖoɖo?

⁴ Míate ŋu anya nusi adzɔ le nudzɔdzɔ siawo siwo wogblɔ ɖi megbe la hã. Nɔnɔme ka mee anyigba la ava nɔ mlɔeba? Woaƒo ɖiia? Woagblẽea? Avewo avɔ le edzia? Alo ɖe woagbugbɔ anyigba la kple amegbetɔƒomea aɖɔ ɖoa? Abe alesi míele ekpɔ ge ene la, Biblia ɖo nya siawo katã ŋu. Gake gbã la, mina míatrɔ míaƒe susu ɖe nusiwo adzɔ le ɣeyiɣi si gbɔna kpuie me la ŋu.

Wogblɔ Amesi “Babilon Gã la” Nye

 5. Nukae Yohanes kpɔ le ŋutega me?

⁵ Woɖe Biblia ƒe agbalẽ si nye Nyaɖeɖefia la fia apostolo Yohanes le Patmos-ƒukpo dzi le ƒe 96 M.Ŋ. me. Eƒo nu tso nu vevi siwo adzɔ le nuwuɣia me ŋu wo me kɔ nyuie, eye Biblia me kpeɖodziwo fia be ameƒomea ge ɖe ɣeyiɣi sia me tso ƒe 1914 me ke.a Kpɔɖeŋunu siwo Yohanes kpɔ dometɔ ɖekae nye gbolo mabuame si ƒe lekewɔwɔ tɔ ŋku si woyɔna be “Babilon Gã la, gbolowo kple anyigba dzi ŋunyɔnuwo dada.” Nɔnɔme ka mee wònɔ? “Eye mekpɔ nyɔnu la mu ame kɔkɔewo ƒe ʋu kple Yesu ƒe ɖaseɖilawo ƒe ʋu.”—Nyaɖeɖefia 17:5, 6.

 6. Nukatae Babilon Gã la menye xexe sia me ƒe dunyahedziɖulawo o?

⁶ Amekae nyɔnu sia tsi tre ɖi na? Womegblẽ mí ɖi be míasusu amesi wònye agblɔ o. Ne woɖe nuwo le eŋu keŋkeŋ la, míate ŋu akpɔ amesi wònye. Le ŋutega ma ke me la, Yohanes se mawudɔla aɖe gblɔ be: “Va afii, ne mafia gbolo gã, si bɔbɔ nɔ tsi geɖewo dzi la, ƒe ʋɔnudɔdrɔ̃ wò; amesia kple anyigba dzi fiawo wɔ ahasi, eye wòna anyigbadzinɔlawo mu eƒe ahasiwɔwɔ ƒe aha la.” Ne anyigbadzifiawo, alo dziɖulawo, wɔ ahasi kplii la, ke efia be gbolo la mate ŋu anye xexe sia me dunyahedziɖulawo o.—Nyaɖeɖefia 17:1, 2, 18.

 7. (a) Nukatae Babilon Gã la metsi tre ɖi na asitsatsa o? (b) Nukae nye Babilon Gã la?

⁷ Nuŋlɔɖi ma ke gblɔ na mí be “anyigba dzi sitsalawo trɔ zu kesinɔtɔwo le eƒe hadzedze vivivo ƒe ŋusẽ ŋuti.” Eyata Babilon Gã la mate ŋu atsi tre ɖi na asitsatsa alo xexe sia me “sitsalawo” o. Gake nya si tso gbɔgbɔ me la gblɔ be: “Tsi, siwo nèkpɔ, siwo dzi gbolo la bɔbɔ nɔ la, wonye dukɔwo kple amehawo kpakple gbegbɔgblɔwo.” Xexemenuɖoanyi sia ƒe akpa veviwo dometɔ kae gasusɔ si sɔ ɖe kpɔɖeŋugbolo sia si le ahasi wɔm kple dunyahedziɖulawo eye wòle asi tsam hebɔbɔ nɔ amewo, amehawo, dukɔwo, kple gbegbɔgblɔwo dzi le ŋutikɔkɔe me? Eyae nye alakpasubɔsubɔha le nɔnɔme vovovo siwo katã me wòtrɔna eɖokui ɖo la me!—Nyaɖeɖefia 17:15; 18:2, 3.

 8. Nu bubu kawoe gaɖo kpe nusi Babilon Gã la nye la dzi?

⁸ Mawudɔla aɖe ƒe fɔbubu nyɔnua ɖe alesi “[wòble] dukɔwo katã to [eƒe] afakaka me” la ɖo kpe amesia si Babilon Gã la nye dzi. (Nyaɖeɖefia 18:23) Afakaka ƒomevi ɖesiaɖe nye subɔsubɔnuwɔna eye gbɔgbɔ vɔ̃wo gbɔe wotsona. (Mose V, 18:10-12) Eyata ele be Babilon Gã la natsi tre ɖi na subɔsubɔha. Biblia me ɖaseɖiɖiwo ɖee fia be eyae nye Satana ƒe alakpasubɔsubɔ ƒe xexemefiaɖuƒe bliboa, eye eyae ƒãnɛ ɖe amewo me bene yeatsɔ ahe amewo ƒe susu ɖae tso Mawu vavã, Yehowa gbɔ.—Yohanes 8:44-47; Korintotɔwo II, 11:13-15; Nyaɖeɖefia 21:8; 22:15.

 9. Kadodo ɖeka tɔgbe kawoe le subɔsubɔha geɖe me?

⁹ Abe alesi míekpɔe le agbalẽ sia katã mee ene la, ɖekawɔwɔ aɖewo dze le xexeamesubɔsubɔhawo ƒe ƒomedodo si wɔ nyamaa la me. Glitoto dzie wotu subɔsubɔha geɖe ɖo. Amegbetɔ ƒe luʋɔ si wogblɔna be mekuna o si nɔa agbe le ku megbe heyina ɖe ŋɔlixexe me alo gagena ɖe nuwɔwɔ bubu me la ƒe nufiafia bla subɔsubɔhawo katã kloe ɖekae. Fuwɔame kple funyafunyawɔƒe si woyɔna be dzomavɔ ƒe dzixɔse le ɖeka le wo dometɔ geɖe me. Blematrɔ̃subɔsubɔ me mawuetɔ̃ƒokpliwo, mawuɖekaetɔ̃wo, kple mawu kpakple mawunɔwo nye nusi wɔ wo dometɔ geɖe ɖekae. Eyata ɖeko wòsɔ be woƒo wo katã nu ƒu ɖekae tsɔ gbolo la ƒe kpɔɖeŋuŋkɔ “Babilon Gã” na wo.—Nyaɖeɖefia 17:5.

Game Su be Woasi tso Alakpasubɔsubɔha la Me

10. Aleke wogblɔ ɖi be subɔsubɔha ƒe gbolo la ƒe nuwuwu anɔ?

¹⁰ Nukae Biblia gblɔ ɖi ɖe xexeame katã ƒe gbolo sia ŋu? Le kpɔɖeŋunyagbɔgblɔ me la, Nyaɖeɖefia-gbalẽa ɖɔ alesi wòatsrɔ̃e le dunyahelawo si me. Woawoe “dzo ewo” siwo le megbe na Dukɔ Ƒoƒuawo, “lã wɔadã dzẽ” la si nye Satana ƒe dunyahenuɖoanyi si ƒo ʋu ƒe legba la tsi tre ɖi na.—Nyaɖeɖefia 16:2; 17:3-16.b

11. (a) Nukatae Mawu bu fɔ alakpasubɔsubɔ? (b) Nukae adzɔ ɖe Babilon Gã la dzi?

¹¹ Satana ƒe alakpasubɔsubɔ ƒe xexemefiaɖuƒea tsɔtsrɔ̃ sia anye Mawu ƒe fɔbubuʋɔnudɔdrɔ̃ hehe va subɔsubɔha siawo dzi la ƒe emetsonu. Le alesi wowɔ babla kple woƒe ahiãvi dunyahela siwo tea ame ɖe to kple eƒe megbe nɔnɔ na wo ta la, woaɖi gbɔgbɔmehasiwɔwɔ ƒe fɔ. Alakpasubɔsubɔha tsɔ ame maɖifɔwo ƒe ʋu ƒo eƒe awutogae esi wòtsɔ dukɔmevinyenye ƒe zazɛ̃nyahehe kpe asi ɖe dziɖula ŋkutawo ŋu le dukɔ ɖesiaɖe me le woƒe aʋawɔwɔwo me. Eyata Yehowa tsɔe de dunyahelawo ƒe dzi me be woawɔ nusi yedi ɖe Babilon Gã la ŋu eye woawɔe aƒedoe.—Nyaɖeɖefia 17:16-18.

12. (a) Nukae wòle be nàwɔ be womagatsrɔ̃ wò le Babilon tsrɔ̃ɣi o? (b) Nufiafia kawoe de dzesi subɔsubɔha vavãtɔ?

¹² Esi wònye afɔku ma adzɔ ɖe xexeamesubɔsubɔhawo dzi godoo la, nukae wòle be nàwɔ? Ŋuɖoɖoae nye nusi Yohanes se gbe aɖe si tso dziƒo nɔ gbɔgblɔm la, be: “Mi amesiwo nye nye dukɔ la, mido go tso me, bene miagade ha kplii le eƒe nuvɔ̃wo me o, eye bena miagaxɔ eƒe fuwɔame ƒe ɖeke o; elabena eƒe nuvɔ̃wo kɔ yi ɖatɔ dziƒo, eye Mawu ɖo ŋku eƒe nu madzɔmadzɔ wɔwɔwo dzi.” Eyata fifiae nye ɣeyiɣia be nàse mawudɔla la ƒe nuxlɔ̃mea be woado go tso Satana ƒe alakpasubɔsubɔ ƒe xexemefiaɖuƒea me eye woawɔ ɖeka kple Yehowa ƒe tadedeagu vavãtɔ. (Kpɔ aɖaka si le axa 377.)—Nyaɖeɖefia 17:17; 18:4, 5; tsɔe sɔ kple Yeremya 2:34; 51:12, 13.

Harmagedon Gogo

13. Nukawoe adzɔ kpuie?

¹³ Nyaɖeɖefia gblɔ be “le ŋkeke ɖeka dzi la eƒe fukpekpewo ava edzi: Ku kple konyifafa kpakple dɔwuame, eye woatɔ dzoe wòafiã keŋkeŋ.” Biblia me nyagblɔɖiwo katã me vava fia asii be “ŋkeke ɖeka,” alo tsɔtsrɔ̃ kpata ƒe ɣeyiɣi kpui, ma tu aƒe fifia. Le nyateƒe me la, Babilon Gã la ƒe tsɔtsrɔ̃ ahe “xaxa gã” si ava wu enu ɖe “Mawu, ŋusẽkatãtɔ la, ƒe ŋkeke gã la ƒe aʋawɔwɔ . . . [le] Harmagedon” me vɛ. Woatsrɔ̃ Satana ƒe dunyahehenuɖoanyia le Armagedon-ʋa ma me eye woade eya ŋutɔ aʋli me. Ekema dzɔdzɔenyenye ƒe xexeme yeyea adze egɔme!—Nyaɖeɖefia 16:14-16; 18:7, 8; 21:1-4; Mateo 24:20-22.

14, 15. Biblia me nyagblɔɖi ka mevava ƒe aƒetutue dze ƒã?

¹⁴ Biblia me nyagblɔɖi vevi bubu aɖe me vava ƒe aƒetutu le dzedzem míele kpɔkpɔm xoxo. Apostolo Paulo gblɔ nya ɖi hexlɔ̃ nu be: “Ke le ɣeyiɣiwo kple azãgbewo ŋuti la, nɔviwo, mehiã mi be, míaŋlɔe aɖo ɖe mi o; elabena mia ŋutɔwo mienyae kɔte bena, Yehowa ƒe ŋkeke la gbɔna, abe fiafitɔ ene. Elabena ne wole gbɔgblɔm be: ‘Ŋutifafa kple dedienɔnɔ!’ la, tete tsɔtsrɔ̃ kpata ava lili wo kpoyi abe alesi fuɖuame va lilia funɔ ene, eye womate ŋu asi le enu o.”—Tesalonikatɔwo I, 5:1-3, NW.

¹⁵ Awɔ abe ɖe dukɔ siwo nɔ aʋa wɔm kple wo nɔewo kple esiwo tsɔ dzreŋku nɔa wo nɔewo kpɔmee tsã la le azɔli dzi aɖaŋutɔe azɔ yina ɖe nɔnɔme si me woate ŋu aɖe gbeƒã xexeame katã ƒe ŋutifafa kple dedienɔnɔ le me ene. Eyata ne míegatsɔ nukpɔsusu bubu bu eŋui la, míenyae be Mawu ƒe ʋɔnudrɔ̃ŋkeke hehe va alakpasubɔsubɔha, dukɔwo, kple woƒe fia, Satana dzi, ɖo vɔ.—Zefanya 2:3; 3:8, 9; Nyaɖeɖefia 20:1-3.

16. Nukatae Yohanes ƒe nuxlɔ̃me la sɔ alea gbegbe egbea?

¹⁶ Ame miliɔn geɖe nɔa agbe egbea abe ŋutilãmenuwo ɖeɖekoe nɔa anyi didina eye asixɔxɔ le wo ŋu ene. Gake nu tsɛ kple ɣeyiɣi kpui aɖe ƒe nuwoe le xexeme gbegblẽ sia si wòana ame. Eyatae Yohanes ƒe nuxlɔ̃mea sɔ alea gbegbe, be: “Migalɔ̃ xexeame kple nusiwo le eme o. Ne ame aɖe lɔ̃ xexeame la, Fofoa ƒe lɔlɔ̃ mele eme o. Elabena nusianu, si le xexeame: ŋutilã ƒe nudzodzrowo kple ŋkuwo ƒe ŋubiabiã kple agbe ƒe adegbe ƒuƒlu ƒoƒo la, metso Fofo la gbɔ o, ke boŋ xexeame wotso. Eye xexeame va yina kple eƒe nudzodzrowo; ke amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.” Ðe màdi be yeanɔ anyi ayi mavɔmavɔ me boŋ oa?—Yohanes I, 2:15-17.

Xexeme Yeye si ƒe Ŋugbe Wodo

17. Etsɔ me kae li na amesiwo dia Mawu vavã la?

¹⁷ Esi wònye Mawu ato Kristo Yesu dzi adrɔ̃ ʋɔnu xexeame ta la, nukae adzɔ akplɔ esia ɖo? Tso gbaɖegbe ʋĩ ke la, Mawu gblɔe ɖi le Hebri Ŋɔŋlɔawo me be yeawɔ tame si yeɖo ɖe anyigba sia ŋu tso gɔmedzedzea me la dzi, esi nye be yeana amegbetɔ toɖolawo ƒe ƒome nase vivi le agbe deblibo nɔnɔ me le paradisonyigba dzi. Satana ƒe agbagbadzedze be yeablu afɔ na tameɖoɖo ma mete ŋu gblẽ Mawu ƒe ŋugbedodoa me o. Eyatae Fia Dawid te ŋu ŋlɔe ɖo be: “Elabena woatsrɔ̃ ame vlowo, ke amesiwo kpɔa mɔ na Yehowa la, woanyi anyigba la dome. Ekpɔtɔ vie ko ame vɔ̃ɖi la maganɔ anyi o, . . . Ame dzɔdzɔewo anyi anyigba la dome, eye woanɔ edzi tegbee.”—Psalmo 37:9-11, 29; Yohanes 5:21-30.

18-20. Tɔtrɔ kawoe ava anyigba sia dzi?

¹⁸ Nɔnɔme ka mee anyigba anɔ le ema megbe? Woaƒo ɖii keŋkeŋ loo? Woatɔ dzoea? Avewo avɔ le edzia? Kpao! Yehowa ƒe tameɖoɖo le gɔmedzedzea mee nye be anyigba la nanye paradisobɔ si me dza eye nusianu nada asɔ pɛpɛpɛ le eme. Togbɔ be amegbetɔ gblẽ nu geɖe le anyigba ŋu hã la, ŋutete li be atrɔ azu nenema. Gake Yehowa do ŋugbe be ‘yeahe gbegblẽ ava amesiwo gblẽa anyigba la dzi.’ Ƒe alafa 20 lia me koe wòva eme le kpɔ be nɔnɔme si me wòanya wɔ le kloe be woate ŋu agblẽ anyigba la katã la va li. Eyata esia ganye susu sẽŋu bubu si tae míaxɔe ase be Yehowa atso akpɔ eƒe nu, si nye eƒe nuwɔwɔ la, ta.—Nyaɖeɖefia 11:18; Mose I, 1:27, 28.

¹⁹ Tɔtrɔ sia ava eme kpuie le Mawu ƒe “dziƒo yeye kple anyigba yeye” ƒe ɖoɖo la te. Manye dziƒo yeye kple ɣletinyigba yeye siwo woagbugbɔ awɔ ŋutɔŋutɔ o, ke boŋ anye gbɔgbɔmedziɖuɖu yeye si aɖu amewo ƒe habɔbɔ si ƒe agbenɔnɔ ŋu wotrɔ asi le wònyo si anɔ anyigba si wowɔ yeyee la dzi. Le xexe yeye ma me la, amegbetɔ magagblẽ nu le nɔvia amegbetɔ alo lãwo ŋu o. Ŋutasẽnuwɔwɔ kple ʋukɔkɔɖi maganɔ anyi o. Aƒemanɔamesi, dɔwuame, kple ameteteɖeto aɖeke maganɔ anyi o.—Nyaɖeɖefia 21:1; Petro II, 3:13.

²⁰ Mawu ƒe Nya la gblɔ be: “Woatu xɔ anɔ eme, eye woade weingble aɖu eme kutsetse. Womatu xɔ ame bubu nanɔ eme o, eye womaƒã nu ame bubu naɖu o; elabena nye dukɔ atsi, abe alesi ati tsinae ene, eye nye ame tiatiawo aɖu woawo ŋutɔ ƒe asinudɔwɔwɔwo. . . . Amegãxi kple alẽvi woaɖu gbe le wo nɔewo gbɔ, dzata aɖu gbe abe nyi ene, eye da ƒe nuɖuɖu anye kewɔ. Womawɔ vɔ̃ aɖeke o, eye womahe gbegblẽ ava nye to kɔkɔe blibo la dzi o, Yehowa ye gblɔe.”—Yesaya 65:17-25.

Xexeme Yeyea ƒe Gɔmeɖoanyi

21. Nukatae kakaɖedzi li be xexeme yeyea ava godoo?

²¹ Ðewohĩ àbia be, ‘Aleke nusiawo katã awɔ ava eme?’ Eyae nye be, “Mawu, amesi [mekaa] aʋatso o la, do ŋugbe, hafi ɣeyiɣi mavɔmavɔwo dze gɔme” be ameƒomea agaɖo nɔnɔme gbãtɔ me eye woanɔ agbe mavɔ le blibodede me. Eye gɔmeɖokpe si dzi wotu mɔkpɔkpɔ sia ɖoe nye esi apostolo Petro gblɔ le eƒe lɛta gbãtɔ si wòŋlɔ na ehati Kristotɔ amesiaminawo me be: “Woakafu Mawu, mía Aƒetɔ Yesu Kristo Fofo, amesi gbugbɔ mí gadzi le eƒe nublanuikpɔkpɔ geɖe la nu to Yesu Kristo ƒe tsitretsitsi tso ame kukuwo dome la me, hena domenyinyi magblẽmagblẽ, maƒoɖi, maluxe, si wodzra ɖo ɖi le dziƒo na mí.”—Tito 1:1, 2; Petro I, 1:3, 4.

22. Nuka dzie wotu xexeme yeyea ƒe mɔkpɔkpɔ ɖo, eye nukatae?

²² Yesu Kristo ƒe tsitretsitsi nye gɔmeɖokpe tɔxɛ na dzɔdzɔenyenye xexeme yeyea elabena eyae Mawu tia be wòaɖu anyigba si ŋu wokɔ la dzi tso dziƒowo. Paulo hã te gbe ɖe alesi gbegbe tsitretsitsia le vevie dzi esi wòŋlɔe be: “Ke azɔ Kristo la tsi tre tso ame kukuwo dome, eye wòzu amesiwo dɔ alɔ̃ la dome ŋgɔgbetɔ. Elabena esi wònye ame mee ku la to va ŋuti la, ame kukuwo ƒe tsitretsitsi la hã to ame ke me va. Elabena alesi wo katã ku le Adam me la, nenema ke woagbɔ agbe wo katã hã le Kristo me.”—Korintotɔwo I, 15:20-22.

23. (a) Nukatae Kristo ƒe tsitretsitsia le vevie? (b) Se kae Yesu si wofɔ ɖe tsitre la de na eyomedzelawo?

²³ Kristo ƒe vɔsaku la si nye tafe si sɔ ɖe enu, kple eƒe tsitretsitsi la ɖo gɔmeɖokpe anyi na “dziƒo yeye” si nye Fiaɖuƒedziɖuɖu la, kple amegbetɔƒomea si zu yeye eye wogagbɔ agbee la ƒe “anyigba yeye” habɔbɔ la. Eƒe tsitretsitsia de dzo lãme na eƒe apostolo nuteƒewɔlawo ƒe gbeƒãɖeɖe kple nufiafiadɔ hã. Nuŋlɔɖia gblɔ na mí be: “Ke nusrɔ̃la wuiɖekɛawo yi Galilea ɖe to, si Yesu [si wofɔ ɖe tsitre] fia wo ɖi la dzi. Eye esi wokpɔe la, wodze klo nɛ, ke ame aɖewo ke ɖi. Eye Yesu te va wo gbɔ, ƒo nu na wo gblɔ bena: Wotsɔ ŋusẽ katã, si le dziƒo kple anyigba dzi la, de asi nam. Eyata miheyi ɖawɔ dukɔwo katã me nɔlawo ne woanye nusrɔ̃lawo, mianyrɔ̃ wo ɖe Fofo la kple Vi la kpakple gbɔgbɔ kɔkɔe la ƒe ŋkɔa me, miafia wo bena, woawɔ nusiwo katã meɖo na mi la dzi. Eye, kpɔ ɖa, nye la meli kpli mi ŋkekeawo katã vaseɖe nuɖoanyiawo ƒe nuwuwu.”—Mateo 19:28, 29; 28:16-20, NW; Timoteo I, 2:6.

24. Yayra bubu ka ŋue Yesu ƒe tsitretsitsia na kakaɖedzi le?

²⁴ Yesu ƒe tsitretsitsia ganye kpeɖodzi na ameƒomea ƒe yayra bubu—ame kukuwo ƒe tsitretsitsi la. Yesu ƒe Lazaro fɔfɔ ɖe tsitre tso ame kukuwo dome nye ameƒomea ƒe tsitretsitsi si lolo wu si ava le etsɔ me la ƒe dzesi. (Kpɔ axa 249-50.) Yesu gblɔ be: “Esia megawɔ mo yaa na mi o, elabena gaƒoƒo la gbɔna, le esi me amesiwo katã le ŋkuɖodziyɔdowo me la, woase eƒe gbe, eye woado go; amesiwo wɔ nu nyuiwo la hena agbe ƒe tsitretsitsi, ke amesiwo wɔ nu vlowo la hena ʋɔnudɔdrɔ̃ ƒe tsitretsitsi.”—Yohanes 5:28, 29, NW; 11:39-44; Dɔwɔwɔwo 17:30, 31.

25. (a) Tiatia kae anɔ anyi na amesiame le xexe yeyea me? (b) Tadedeagumɔnu kae axɔ xexe yeyea me katã?

²⁵ Dzidzɔ kae nye si wòanye be míagaxɔ míaƒe lɔlɔ̃tɔwo atuu eye ɖewohĩ dzidzime ɖesiaɖe nanɔ ewɔm akplɔ wo nɔewo ɖo! Le xexe yeyea me afima la, amesiame ate ŋu atso nya me azɔ le nɔnɔme siwo de blibo me be yeasubɔ Yehowa, Mawu vavã la loo, alo yeatsi tre ɖe eŋu abu yeƒe agbe. Ẽ, le xexe yeyea me la, subɔsubɔha ɖeka, tadedeagumɔnu ɖeka, pɛ koe anɔ anyi. Kafukafuwo katã ayi na Wɔla lɔlɔ̃ la, eye amegbetɔ toɖola ɖesiaɖe agblɔ hakpala la ƒe nya siawo be: “Nye Mawu, mado wò ɖe dzi, wò fia, eye makafu wò ŋkɔ ɖaa tegbee. . . . Yehowa lolo, eye wòdze kafukafu ŋutɔ, eƒe gãnyenye me dzodzro meli o.”—Psalmo 145:1-3; Nyaɖeɖefia 20:7-10.

26. Nukatae wòle be nàdzro Mawu ƒe Nya, Biblia la, me?

²⁶ Fifia esi nètsɔ xexeame ƒe subɔsubɔha gãwo sɔ kple wo nɔewo la, míele kpewòm be nàgaku Mawu ƒe Nya, Biblia la, si dzi Yehowa Ðasefowo tu woƒe dzixɔsewo ɖo, la me. Wò ŋutɔ kpɔ kpeɖodzia be woate ŋu ake ɖe Mawu vavã la ŋu. Hindutɔ, Moslemtɔ, Buddhatɔ, Shintotɔ, Konfusiotɔ, Taotɔ, Yudatɔ, Kristotɔ, alo xɔse bubu ɖesiaɖe me tɔe nènye o, fifiae wòle be nàdzro ƒomedodo si le mia kple Mawu vavã si le agbe dome la me. Ðewohĩ afisi wodzi wò le tae nèle subɔsubɔha si me tɔe nènye la me, eye naneke meli nète ŋu wɔ le eŋu o. Kakaɖedzitɔe la, nusi Biblia gblɔ tso Mawu ŋu la me dzodzro magblẽ naneke le ŋuwò o. Esia ate ŋu anye wò agbe me mɔnukpɔkpɔ wɔnuku be nànya Dziɖulagã Aƒetɔ Mawu ƒe tameɖoɖo na anyigba kple ameƒomea si le edzi la ŋutɔŋutɔ. Ẽ, Yehowa ƒe dɔtsɔlawo, eƒe Ðasefowo, amesiwo tsɔ agbalẽ sia vɛ na wò ate ŋu akpe ɖe ŋuwò nàɖo wò taɖodzinu gbɔ le wò Mawu vavã la didi anukwaretɔe me.

27. (a) Nukae Yesu le kpewòm be nàwɔ? (b) Le ɖekawɔwɔ me kple agbalẽ sia ƒe tanya la, nukae Yesaya le amesiame kpem be wòawɔ?

²⁷ Menye dzodzroe Yesu gblɔ be: “Minɔ ebiabia dzi, eye woana mi; minɔ edidi dzi, eye miakpɔe; minɔ ʋɔ ƒoƒo dzi, eye woaʋui na mi” o. Àte ŋu anɔ amesiwo ke ɖe nyateƒe Mawu la ŋu dome ne èɖo to nyagblɔɖila Yesaya ƒe gbedasia be: “Midi Yehowa, ŋkeke alesi wòle gaglãgbe, miyɔe, esime wòtsɔ kpuiƒe. Ame vɔ̃ɖi neɖe asi le eƒe mɔ ŋu, eye nu vlo wɔla neɖe asi le eƒe susuwo ŋu, ne wòatrɔ ɖe Yehowa ŋu, ekema akpɔ nublanui nɛ, eye wòatrɔ ɖe mía Mawu ŋu, elabena etsɔa nuvɔ̃ kena geɖe.”—Mateo 7:7; Yesaya 55:6, 7.

28. Amekawoe ate ŋu akpe ɖe ŋuwò nàke ɖe Mawu vavã la ŋu?

²⁸ Ne èle Mawu vavã la dim la, te ɖe Yehowa Ðasefowo ŋu faa.c Adzɔ dzi na wo be yewoakpe ɖe ŋuwò femaxee be nànya Fofo la kple eƒe lɔlɔ̃nu nyuie esime ɣeyiɣi gakpɔtɔ li.—Zefanya 2:3.

[Etenuŋɔŋlɔwo]

[Aɖaka/Nɔnɔmetata si le axa 377]

SiDzedze Subɔsubɔha Vavãtɔ

1. Subɔsubɔha vavãtɔ dea ta agu na nyateƒe Mawu, Yehowa, ɖeɖeko.—Mose V, 6:4, 5; Psalmo 146:5-10; Mateo 22:37, 38.

2. Subɔsubɔha vavãtɔ kplɔa amewo yia Mawu gbɔ to Kristo Yesu dzi.—Yohanes 17:3, 6-8; Timoteo I, 2:5, 6; Yohanes I, 4:15.

3. Subɔsubɔha vavãtɔ fiaa ɖokuitɔmadimadi ƒe lɔlɔ̃ ame eye wònɔa agbe ɖe enu.—Yohanes 13:34, 35; Korintotɔwo I, 13:1-8; Yohanes I, 3:10-12.

4. Subɔsubɔha vavãtɔ metsɔa xexeame ƒe dunyahehe kple aʋawɔwɔwo ƒoa ɖi eɖokui o. Medea akpa aɖeke dzi le aʋaŋɔli o.—Yohanes 18:36; Yakobo 1:27.

5. Subɔsubɔha vavãtɔ naa Mawu nyea nyateƒetɔ elabena woxɔa Biblia dzi sena be enye Mawu ƒe Nya.—Romatɔwo 3:3, 4; Timoteo II, 3:16, 17; Tesalonikatɔwo I, 2:13.

6. Subɔsubɔha vavãtɔ medea aʋawɔwɔ alo ŋutasẽnuwɔwɔ dzi o.—Mixa 4:2-4; Romatɔwo 12:17-21; Kolosetɔwo 3:12-14.

7. Subɔsubɔha vavãtɔ te ŋu naa ŋutigbalẽ, gbegbɔgblɔ, kple dukɔ ɖesiaɖe me tɔwo wɔa ɖeka bɔbɔe. Mefiaa dukɔmevinyenye alo fuléle o, lɔlɔ̃ koe wòfiana.—Yesaya 2:2-4; Kolosetɔwo 3:10, 11; Nyaɖeɖefia 7:9, 10.

8. Subɔsubɔha vavãtɔ dea Mawu subɔsubɔ ƒe dzi ƒo, menye le ɖokuitɔdidi ƒe viɖe alo fetu ta o, ke boŋ le lɔlɔ̃ ta. Medoa amewo ɖe dzi o. Mawue wòdona ɖe dzi.—Petro I, 5:1-4; Korintotɔwo I, 9:18; Mateo 23:5-12.

9. Subɔsubɔha vavãtɔ ɖea gbeƒã Mawu Fiaɖuƒea be eyae nye amegbetɔ ƒe mɔkpɔkpɔ si ŋu kakaɖedzi le, menye dunyahehe alo hadomegbenɔnɔ ƒe nufiafia aɖeke o.—Marko 13:10; Dɔwɔwɔwo 8:12; 28:23, 30, 31.

10. Subɔsubɔha vavãtɔ fiaa nyateƒe si ku ɖe Mawu ƒe tameɖoɖo ɖe amegbetɔ kple anyigba ŋu. Mefiaa subɔsubɔhawo ƒe alakpa si nye luʋɔ makumaku kple funyafuanyawɔwɔ le dzomavɔ me o. Efiaa nu be Mawu nye lɔlɔ̃.—Ʋɔnudrɔ̃lawo 16:30; Yesaya 45:12, 18; Mateo 5:5; Yohanes I, 4:7-11; Nyaɖeɖefia 20:13, 14.

[Nɔnɔmetata si le axa 377]

Ðasefowo le gbeƒã ɖem le Netherlands

[Nɔnɔmetata si le axa 373]

Ŋutete le anyigba la si be wòazu paradiso—xexemedziɖuɖu dzɔdzɔe mavɔ hiã na esia, eye Mawu do eƒe ŋugbe

[Nɔnɔmetata si le axa 374]

Hafi Yesu natrɔ ayi dziƒo la, ede se na eƒe nusrɔ̃lawo be woaɖe gbeƒã nyanyuia ahafiae le anyigba la katã dzi

[Nɔnɔmetata si le axa 379]

Ame kukuwo ƒe tsitretsitsi anye dzidzɔ na ameƒomea le anyigba la katã dzi