De Dzi Ƒo Le Lɔlɔ̃ Kple Dɔ Nyui Wɔwɔ Me—Alekee?

“Míalé ŋku ɖe mía nɔewo ŋu, bena míade dzi ƒo na mía nɔewo le lɔlɔ̃ kple dɔ nyui wɔwɔ me . . . míaxlɔ̃ nu mía nɔewo, eye míawɔ esia geɖe wu, zi alesi miekpɔ bena, ŋkeke la le ɖoɖom la.”—HEBRITƆWO 10:24, 25.

 1, 2. (a) Nukatae wòhiã be Kristotɔ gbãtɔwo nakpɔ akɔfafa kple dzideƒo le woƒe kpekpewo me? (b) Paulo ƒe aɖaŋuɖoɖo kae gblɔ alesi gbegbe wòhiã be woakpe ta ɖekae?

WOKPE ta le adzame, hete ɖe xɔ aɖe me hetu ʋɔawo. Afɔku de xa ɖi na wo le afisiafi le gota. Ðeko wowu wo Kplɔla Yesu le gaglãgbe enye ma, eye exlɔ̃ nu eyomedzelawo be eme manyo na wo o abe ye ke ene. (Yohanes 15:20; 20:19) Gake esi wonɔ dalĩ dom le woƒe lɔlɔ̃tɔ Yesu ŋu la, wokpɔe be yewoƒe ta kpekpe ɖekae na yewole dedie.

² Esi ƒeawo vanɔ yiyim la, dodokpɔ kple yometiti vovovowo va Kristotɔwo dzi. Abe nusrɔ̃la gbãtɔ mawo ene la, ta kpekpe ɖekae nye akɔfafa kple dzideƒo na wo. Eyata apostolo Paulo ŋlɔ le Hebritɔwo 10:24, 25 be: “Míalé ŋku ɖe mía nɔewo ŋu, bena míade dzi ƒo na mía nɔewo le lɔlɔ̃ kple dɔ nyui wɔwɔ me, eye míagagblẽ mía ŋutɔwo míaƒe ƒuƒoƒewo ɖi, abe alesi ame aɖewo wɔna ene o, ke boŋ míaxlɔ̃ nu mía nɔewo, eye míawɔ esia geɖe wu, zi alesi miekpɔ bena, ŋkeke la le ɖoɖom la.”

 3. Nukatae nàgblɔ be Hebritɔwo 10:24, 25 de ŋgɔ wu sedede ko be Kristotɔwo nakpe ta ɖekae?

³ Nya mawo de ŋgɔ sã wu sedede be woanɔ kpekpewo dede dzi. Wonye dzidzenu siwo tso Mawu ƒe gbɔgbɔ me na Kristotɔwo ƒe kpekpewo—eye le nyateƒe me la, eku ɖe wɔna ɖesiaɖe ŋu ne Kristotɔwo ƒo ƒu. Egbea si míekpɔe kɔte be Yehowa ƒe ŋkekea le aƒe tum wu ɣeyiɣi bubu ɖesiaɖe la, nuɖoanyi vɔ̃ɖi sia ƒe nyaƒoɖeamenu kple afɔkuwo na wòhiã vevie be míaƒe kpekpewo nanye dedienɔƒe, ŋusẽ kple dzideƒo tsoƒe na amesiame. Nukae míawɔ be wòanɔ alea? Mina míabia nya vevi etɔ̃ atsɔ adzro Paulo ƒe nyawo me nyuie: Nukae wòfia be “míalé ŋku ɖe mía nɔewo ŋu”? Nukae wòfia be “míade dzi ƒo na mía nɔewo le lɔlɔ̃ kple dɔ nyui wɔwɔ me”? Eye azɔ aleke míate ŋu ‘ade dzi ƒo na mía nɔewo’ le ɣeyiɣi sesẽ siawo mee?

“Míalé Ŋku Ðe Mía Nɔewo Ŋu”

 4. Nukae wòfia be “míalé ŋku ɖe mía nɔewo ŋu”?

⁴ Esi Paulo ƒoe ɖe Kristotɔwo nu be ‘woalé ŋku ɖe wo nɔewo ŋu’ la, Helagbe me dɔwɔnya si wòzãe nye ka·ta·no·eʹo, si fia nya si ame geɖe gblɔna be “woadze si nu” si nu sẽ wu. Theological Dictionary of the New Testament gblɔ be efia be “woatsɔ ame ƒe susu katã aɖo nane ŋu.” W. E. Vine gblɔ be agate ŋu afia be “woase nu gɔme bliboe, woalé ŋku ɖe nu ŋu tsitotsito.” Eyata ne Kristotɔwo ‘lé ŋku ɖe wo nɔewo ŋu’ la, menye amea ƒe dzedzeme koe wokpɔna o ke wozãa woƒe susu ƒe ŋutete katã dzea agbagba be yewoakpɔ amea me ke.—Tsɔe sɔ kple Hebritɔwo 3:1.

 5. Ame ƒe nɔnɔme bubu kawoe manya kpɔ enumake o, eye nukata wòle be míabu nusiawo ŋu?

⁵ Ele be míaɖo ŋku edzi be ame aɖe ƒe amenyenye ŋutɔŋutɔ deto wu nusi eƒe dzedzeme, dɔwɔnawo, alo nuwɔna ɖeɖe aɖe afia. (Samuel I, 16:7) Zi geɖe la, nuwɔwɔ blewu le gota gome tsyɔa nu ame ƒe seselelãme ememetɔ alo eƒe mokɔkɔ ɖe ame ŋu si tso dzi me la dzi. Azɔ hã nɔnɔme si me amewo nɔ to vovo na wo nɔewo ŋutɔ. Ame aɖewo to nɔnɔme dziŋɔwo me le woƒe agbe me; ame aɖewo hã le nɔnɔme aɖewo, siwo ŋu manya bu na mí o me tom fifi laa. Edzɔna zi geɖe be ne nɔviŋutsu alo nɔvinyɔnu aɖe ƒe nuwɔna na míedo dziku ɖe eŋu la, enu va fana ne míeva nya nu geɖe le nusi me wòto kple nɔnɔme si me wòle ŋu nyuie.—Lododowo 19:11.

 6. Mɔ siwo dzi míato anya mía nɔewo nyuie wu dometɔ aɖewo ɖe, eye nu nyui kae ate ŋu ado tso eme?

⁶ Gake esia mefia be míanɔ ŋku kem ɖe mía nɔewo ƒe nyawo me esi womebia mí hafi o. (Tesalonikatɔwo I, 4:11) Ke hã la, míate ŋu atsɔ ɖe le eme na mía nɔewo. Esia bia nu geɖe wu gbedodo na ame le Fiaɖuƒe Akpata me ko. Nukata màtia ame aɖe si nàdi be yeanya nyuie la eye nàɖoe be yewoaɖo dze aɖabaƒoƒo ʋee aɖewo do ŋgɔ na kpekpea alo le emegbe o? Anyo hã ŋutɔ be ‘nànɔ amedzrowɔwɔ dzi’ be nàkpe xɔlɔ̃ ɖeka alo eve va aƒewò me ne miadi nanewo aɖe nu mee. (Romatɔwo 12:13) Ðe ɖetsɔleme fia. Ðo to. Biabia be aleke ame wɔ va dzesi Yehowa helɔ̃e hã ɖeɖe dzaa aɖe nu geɖe afia. Gake àganya nu geɖe le eŋu to aƒeme yi aƒeme subɔsubɔdɔa wɔwɔ ɖekae me. Ŋkuléle ɖe mía nɔewo ŋu le mɔ siawo nu akpe ɖe mía ŋu be veveseɖeamenu kple nugɔmesesename vavãtɔ nasu mía si.—Filipitɔwo 2:4; Petro I, 3:8.

“Míade Dzi Ƒo na Mía Nɔewo”

 7. (a) Aleke Yesu ƒe nufiafia wɔ dɔ ɖe amewo dzii? (b) Nukae na ŋusẽ nɔ eƒe nufiafia ŋu nenema gbegbe?

⁷ Ne míeléa ŋku ɖe mía nɔewo ŋu la, míasu te nyuie wu be míade dzi ƒo ahade dzo mía nɔewo me ɖe dɔwɔwɔ ŋu. Kristotɔ hamemegãwo vevietɔ wɔa akpa vevi aɖe le go sia me. Míexlẽ le ɣeyiɣi si me Yesu ƒo nu le dutoƒo ŋu be: “Kuvia ɖo amehawo le eƒe nufiafia la ŋuti.” (Mateo 7:28) Ɣebubuɣi asrafo aɖewo siwo wodɔ be woaɖalée gɔ̃ hã trɔ gbɔ va gblɔ be: “Ame aɖeke meƒo nu ale, abe alesi amesia ƒo nui ene kpɔ o.” (Yohanes 7:46) Nukae na ŋusẽ nɔ Yesu ƒe nufiafia ŋu nenema gbegbe? Seselelãmewo ɖeɖefia ta yea? Ao; Yesu ƒo nu bubutɔe. Gake ekpɔ egbɔ ɣesiaɣi be yeaɖo yeƒe nyaselawo ƒe dzi gbɔ. Esi wòléa ŋku ɖe amewo ŋu ta la, enya alesi tututu wòaʋã woe. Ezã kpɔɖeŋu bɔbɔe wɔdɔɖeamedzi siwo ɖe gbesiagbegbenɔnɔ ƒe nudzɔdzɔ ŋutɔŋutɔwo fia. (Mateo 13:34) Nenema ke wòle be amesiwo wɔa dɔ le míaƒe kpekpewo me nasrɔ̃ Yesu be woatsɔ vividoɖeameŋu kple dzonɔameme aƒo nuƒo siwo aʋã amewo. Míate ŋu adi kpɔɖeŋu siwo asɔ na míaƒe nyaselawo ahaɖo woƒe dzi gbɔ ɣesiaɣi abe Yesu ene.

 8. Aleke Yesu tsɔ kpɔɖeŋu de dzi ƒo na amewoe, eye aleke míate ŋu asrɔ̃e le go sia me?

⁸ Mí katã míate ŋu ade dzi ƒo na mía nɔewo le mía Mawu subɔsubɔ me to kpɔɖeŋu ɖoɖo me. Ẽ, Yesu de dzi ƒo na eƒe nyaselawo. Elɔ̃ Kristotɔwo ƒe subɔsubɔdɔa eye wòdo subɔsubɔdɔa ɖe dzi. Egblɔ be ele abe yeƒe nuɖuɖu ene. (Yohanes 4:34; Romatɔwo 11:13) Dzonɔameme sia ate ŋu age ɖe ame bubuwo hã me. Ðe wò hã àte ŋu ana dzidzɔ si nèkpɔna le subɔsubɔdɔa me nadze ame bubuwo nakpɔa? Gblɔ wò nuteƒekpɔkpɔ nyuiwo na hamea me tɔ bubuwo, gake kpɔ nyuie be màgatsɔe aƒo adegbee o. Ne èkpe amewo be woawɔ dɔ kpli wò la, kpɔe ɖa be àte ŋu akpe ɖe wo ŋu be nuƒoƒo tso mía Wɔla Gã Yehowa ŋu na ame bubuwo nanye dzidzɔ vavã na wo hã.—Lododowo 25:25.

 9. (a) Nukawoe nye dzidede ƒo na ame bubuwo ƒe mɔnu aɖewo siwo míadi be míaƒo asa na, eye nukatae? (b) Nukae le be wòaʋã mí míatsɔ mía ɖokui ana le Yehowa subɔsubɔ me?

⁹ Gake kpɔ nyuie be màgade dzi ƒo na ame bubuwo le mɔ gbegblẽ nu o. Le kpɔɖeŋu me, ɖewohĩ le manyamanya me míana woase fɔɖiɖi le wo ɖokui me be yewomele dɔ geɖe wɔm o. Ðewohĩ míado ŋukpe wo le manyamanya me to wo tsɔtsɔ sɔ kple ame bubu siwo wɔa geɖe wu me madzemadzee, alo míate ŋu aɖo dzidzenu sesẽwo ahaɖi gbɔ amesiwo meɖo wo gbɔ o. Mɔ siawo dometɔ ɖesiaɖe ate ŋu ade dzo ame aɖewo me ɖe dɔwɔwɔ ŋu ɣeyiɣi aɖe ya, gake Paulo meŋlɔ be ‘Míade dzi ƒo na mía nɔewo le fɔbuame kple dɔ nyui wɔwɔ me o.’ Gbeɖe, ele be míade dzi ƒo le lɔlɔ̃ me, ekema dɔwɔna siwo tso dzi nyui me akplɔe ɖo. Mele be alesi hamea me tɔ bubuwo abu ame ne mete ŋu le nusi wokpɔ mɔ be wòawɔ gbɔ ɖom tututu o ŋu bubu nanye dzizizi na ame aɖeke o.—Tsɔe sɔ kple Korintotɔwo II, 9:6, 7.

10. Nukata wòle be míaɖo ŋku edzi be míenye aƒetɔwo ɖe ame bubuwo ƒe xɔse dzi o?

¹⁰ Dzidede ƒo na ame nɔewo mefia ŋusẽkpɔkpɔ ɖe ame nɔewo dzi o. Togbɔ be Mawu na ŋusẽ geɖe apostolo Paulo hã la, etsɔ ɖokuibɔbɔ ɖo ŋku edzi na Korinto-hamea be: “Míeɖua aƒetɔ ɖe miaƒe xɔse dzi o.” (Korintotɔwo II, 1:24) Ne míawo hã míekpɔe ɖokuibɔbɔtɔe abe alesi wòkpɔe ene be menye míaƒe dɔe wònye be míaɖo dɔ si wòle be ame bubuwo nawɔ le Yehowa subɔsubɔ me o, alo míafia mɔ woƒe dzitsinya le ame ŋutɔ ƒe nyametsotso bubuwo wɔwɔ me o la, ekema míanye ‘nu dzɔdzɔe vivivo wɔlawo,’ dzidzɔmakpɔlawo, tamesẽlawo, ɖeklemiɖelawo, alo sedelawo o. (Nyagblɔla 7:16) Nɔnɔme mawo medea dzi ƒo na ame o; ɖe wotea ame ɖe anyi boŋ.

11. Nukae na wodzɔ nu le Israel-viwo ŋɔli hena gbedoxɔa tutu, eye aleke esia ate ŋu adzɔ le míaƒe ŋkekea me?

¹¹ Míedi be míatsɔ gbɔgbɔ ma ke si nɔ blema Israel-viwo me esi wòhiã be woadzɔ nu na gbedoxɔa tutu la awɔ dɔ sia dɔ le Yehowa subɔsubɔ me. Mose II, 35:21 xlẽ be: “Amesiame, si wòdzɔ dzi na, eye wòlɔ̃ kple dzi faa la, va dzɔ nu na Yehowa, bena woatsɔ awɔ [dɔa].” Menye gotanuwoe ʋã wo o, ke eʋã wo tso ememe ke, tso woa ŋutɔwo ƒe dzi me. Le nyateƒe me la, afisia xlẽ le Hebrigbe me le nya la ŋutɔŋutɔ nu be “amesiame si ƒe dzi ti kpo” la tsɔ nunana siawo vɛ. (Míawoe te gbe ɖe edzi.) Be míawɔe ɖe edzi la, mina míadze agbagba ana mía nɔewo ƒe dzi nati kpo ɣesiaɣi ne míekpe ta. Yehowa ƒe gbɔgbɔ ate ŋu awɔ mamlea.

“Míaxlɔ̃ Nu Mía Nɔewo”

12. (a) Helagbe me nya si gɔme woɖe be “míade dzi ƒo” ƒe gɔmesese aɖewo ɖe? (b) Aleke Hiob xɔlɔ̃wo do kpo dzidede ƒo nɛ? (d) Nukata mele be míadrɔ̃ ʋɔnu mía nɔewo o?

¹² Esi Paulo ŋlɔ bena “míaxlɔ̃ nu mía nɔewo” la, Helagbe me nya pa·ra·ka·leʹo ƒomevi aɖee wòzã, si agate ŋu afia be ‘woado ŋusẽ ame, woafa akɔ na ame.’ Wozã nya sia ke le Hela Ŋɔŋlɔawo me le Hiob 29:25, afisi woƒo nu tso Hiob ŋu le be efaa akɔ na konyifalawo. Nublanuitɔe la, esi Hiob ŋutɔ nɔ dodokpɔ sesẽ me la, mekpɔ dzideƒoname ma ƒe ɖeke o. Eƒe “akɔfala” etɔ̃awo nɔ ʋɔnu drɔ̃mee henɔ mo kam nɛ vevie ale gbegbe be womese nu gɔme nɛ o eye womese veve hã ɖe enu o. Le nyateƒe me la, womeyɔ Hiob ŋkɔ zi ɖeka hɔ̃ hã hafi ƒo nu nɛ le woƒe nuƒowo katã me o. (Kpɔ nusi to vovo nɛ le Hiob 33:1, 31.) Edze ƒã be wobui be enye agba wu be woabui be enye ame. Eyata mewɔ nuku o be Hiob tsɔ dzi gbagbã gblɔ na wo be: “Ðe wònye miawoe xɔ ɖe tenyeƒe la”! (Hiob 16:4) Nenema ke ne èdi be yeade dzi ƒo na ame aɖe egbea la, se veve ɖe enu! Mègadrɔ̃ ʋɔnui o. Romatɔwo 14:4 gblɔ be, “wò la, ameka nènye be, nèdrɔ̃a ʋɔnu ame bubu ƒe dɔla? Ye ŋutɔ ƒe aƒetɔ wòle tsitre na, alo wòdze anyi na; gake anɔ tsitre, elabena Mawu ate ŋu alée ɖe tsitre.”

13, 14. (a) Nyateƒe vevi ka gɔmee wòhiã be míana mía nɔviŋutsuwo kple nɔvinyɔnuwo nase be wòafa akɔ na wo? (b) Aleke mawudɔla aɖe do ŋusẽ Daniel?

¹³ Woɖe pa·ra·ka·leʹo aɖe kple nuŋkɔ si do ƒome kplii gɔme be “akɔfafa” le Tesalonikatɔwo II, 2:16, 17 be: “Ke mía Aƒetɔ Yesu Kristo ŋutɔ kple Mawu, mía Fofo, amesi lɔ̃ mí, eye wòtsɔ akɔfafa mavɔmavɔ kple mɔkpɔkpɔ nyui na mí to amenuveve me la, nafa akɔ na miaƒe dziwo, eye wòado ŋusẽ mi le dɔwɔwɔ nyui kple nya nyui katã me.” De dzesii be Paulo gblɔ be nyateƒe vevi si nye be Yehowa lɔ̃ mí la afa akɔ na míaƒe dziwo. Eyata míate ŋu ate gbe ɖe nyateƒe vevi ma dzi atsɔ ade dzi ƒo ahafa akɔ na mía nɔewo.

¹⁴ Ɣeaɖeɣi la, nyagblɔɖila Daniel tɔtɔ esi wòkpɔ ŋutega dziŋɔ aɖe vɔ ale gbegbe be wògblɔ be: “Nye mo ƒe nyonyome trɔ ɖe ƒomevii, eye ŋusẽ aɖeke menɔ ŋunye o.” Yehowa dɔ mawudɔla aɖe wòva ɖo ŋku edzi na Daniel enuenu be enye “ame malɔ̃nugbɔa” le Mawu ƒe ŋkume. Nukae do tso eme? Daniel gblɔ na mawudɔla la be: “Èdo ŋusẽm.”—Daniel 10:8, 11, 19.

15. Aleke wòle be hamemegãwo kple dzikpɔla mɔzɔlawo nada asɔ le kafukafu kple ɖɔɖɔɖo nana me?

¹⁵ Azɔ mɔ aɖe enye si si hã dzi míade dzi ƒo na ame bubuwo le. Kafu wo! Ðeklemiɖeɖe kple ɖikeke ƒe nɔnɔme te ŋu gena ɖe mía me bɔbɔe. Ele eme be ɖɔɖɔɖowo ahiã ɣeaɖewoɣi, vevietɔ tso hamemegãwo kple dzikpɔla mɔzɔlawo gbɔ. Gake aɖe vi na wo ne woade bubu wo ŋu le esi wodea dzi ƒo na ame bɔkɔɔ ta tsɔ wu be woanye vodadadilawo.

16. (a) Ne míele dzi dem ƒo na blanuilélawo la, zi geɖe la, nukata mesɔ gbɔ be míaƒoe ɖe wo nu be woawɔ geɖe le Yehowa ƒe subsɔubɔ me ko evɔ o? (b) Aleke Yehowa kpe ɖe Eliya ŋu esime wòlé blanui?

¹⁶ Blanuilélawo koŋ ye hiã dzideƒo, eye Yehowa kpɔ mɔ be mí hati Kristotɔwo—míakpe ɖe wo ŋu—vevietɔ ne hamemegãwoe míenye. (Lododowo 21:13) Nukae míate ŋu awɔ? Ŋuɖoɖoa manɔ bɔbɔe abe gbɔgblɔ na wo ko be woawɔ geɖe le Yehowa ƒe subɔsubɔa me ene o. Nukata? Elabena ema afia be woƒe dɔ geɖe mawɔmawɔ gbɔe woƒe blanuilélea tso. Menɔna alea zi geɖe o. Nyagblɔɖila Eliya lé blanui vevie kpɔ ale gbegbe be wòdi be yeaku; evɔ ɣeyiɣi si tututu eƒe ŋku biã le Yehowa subɔsubɔ me vevie mee nusia dzɔ ɖe edzi. Aleke Yehowa wɔ nu ɖe eŋui? Edɔ mawudɔla aɖe ɖa be wòakpe ɖe eŋu. Eliya gblɔ eƒe dzimenyawo na Yehowa be yekpɔe be yemenyo wu ye fofo kukuwo o, be dɔ gbɔlowo sɔŋ ko yewɔ, eye be yetsi akogo vevie. Yehowa ɖo toe eye wòtsɔ Eƒe ŋusẽ ƒe ɖeɖefia dziŋɔwo fa akɔ nɛ heka ɖe edzi nɛ be metsi akogo kura o eye be awu dɔ si gɔme wòdze la nu. Yehowa do ŋugbe hã be yeana zɔhɛ aɖe Eliya wòana hehee, amesi ava xɔ ɖe eteƒe mlɔeba.—Fiawo I, 19:1-21.

17. Aleke hamemegã ate ŋu akpe ɖe amesi ɖea ɖeklemi eɖokui fũ la ŋui?

¹⁷ Dzideƒonya kae nye si! Mina míawo hã míade dzi ƒo na amesiwo tɔtɔ le mía dome nenema ke. Midze agbagba miase nu gɔme na wo to woƒe nyawo sese me! (Yakobo 1:19) Mitsɔ Ŋɔŋlɔawo fa akɔ na wo wòasɔ ɖe wo dometɔ ɖesiaɖe ƒe nuhiahiãwo nu. (Lododowo 25:11; Tesalonikatɔwo I, 5:14) Be hamemegãwo nade dzi ƒo na amesiwo ɖea ɖeklemi wo ɖokui vevie la, woate ŋu agblɔ Ŋɔŋlɔawo me kpeɖodziwo na wo dɔmenyotɔe be Yehowa lɔ̃ wo hedea asixɔxɔ wo ŋu.a Tafea ƒe nya la me dzodzro ate ŋu ade dzi ƒo na amesiwo mebua wo ɖokui ɖe ɖeke me o la vevie. Ahiã be woaɖee afia amesi lé blanui le nuvɔ̃ si wòwɔ va yi ta be ne etrɔ̃ dzime vavã hedzudzɔ nu mawo dometɔ ɖesiaɖe wɔwɔ la, tafea kɔ eŋuti.—Yesaya 1:18.

18. Aleke wòle be woatsɔ tafea ŋuti nufiafia ade dzi ƒo na amesi ŋu ame bubu wɔ nu gbegblẽ ɖo, abe to gbɔdɔdɔ sesẽe me ene?

¹⁸ Le nyateƒe me la, hamemegã abu nya si dzɔ ŋu ale be wòate ŋu awɔ nufiafia ma ŋudɔ nyuie. Bu kpɔɖeŋu sia ŋu kpɔ: Lãwo tsɔtsɔ sa vɔe le Mose ƒe Sea te si hiã hafi woatsɔ nuvɔ̃wo katã ake tsi tre ɖi na Kristo ƒe tafevɔsa. (Mose III, 4:27, 28) Gake womebia be nyɔnu si gbɔ wodɔ sesẽe la nasa nuvɔ̃vɔ ma o. Se la gblɔ be ‘woagawɔ naneke’ atsɔ ahe to nɛ o. (Mose V, 22:25-27) Eyata ne wodze nɔvinyɔnu aɖe dzi hedɔ egbɔ sesẽe egbea eye esia na wòse le eɖokui me be yeƒo ɖi hezu ame maɖinu la, ɖe wòasɔ be woate gbe ɖe edzi be ehiã na tafea be wòakɔ eŋuti tso nuvɔ̃ ma mea? Kura o. Mewɔ nuvɔ̃ le esi wodze edzi ta o. Amesi dɔ egbɔ sesẽe lae wɔ nuvɔ̃ eye eya ŋue wohiã be woakɔ. Gake woate ŋu azã lɔlɔ̃ si Yehowa kple Kristo woɖe fia le tafea nana me wòanye kpeɖodzi be ame bubu aɖe ƒe nuvɔ̃ mena wòƒo ɖi le Mawu ŋkume o, ke be exɔ asi na Yehowa eye wòkpɔtɔ le eƒe lɔlɔ̃ la me.—Tsɔe sɔ kple Marko 7:18-23; Yohanes I, 4:16.

19. Nukata mele be míakpɔ mɔ be míaƒe hadede ɖesiaɖe kple mía nɔviŋutsuwo kple nɔvinyɔnuwo ade dzi ƒo na mí o, gake nukae wòle be míaɖo kplikpaa awɔ?

¹⁹ Ẽ, nɔnɔme ka mee ame aɖe le le agbe me o, eɖanye nɔnɔme sesẽ kawoe na eƒe tsãgbenɔnɔ do viviti o, ele be wòakpɔ dzideƒo le Yehowa ƒe amewo ƒe hamea me. Eye akpɔe hã ne mí katã míedze agbagba lé ŋku ɖe mía nɔewo ŋu, de dzi ƒo na mía nɔewo, hexlɔ̃ nu mía nɔewo ɣesiaɣi si míakpe ta ɖekae. Gake esi míede blibo o ta la, mí katã míedoa kpo nusia wɔwɔ ɣeaɖewoɣi. Míeɖea dzi le mía nɔewo ƒo godoo, eye míedoa nuxaxa gɔ̃ hã na mía nɔewo ɣeaɖewoɣi. Midze agbagba miagatsɔ miaƒe susu aɖo ame bubuwo ƒe gbɔdzɔgbɔdzɔwo ŋu le go sia me o. Ne gbɔdzɔgbɔdzɔwo ko nèdina la, ke àte ŋu ava nɔ ɖi kem hamea vevie eye mɔ̃ si Paulo di vevie be yeakpe ɖe mía ŋu míaƒo asa na si nye mía ŋutɔwo ƒe ƒuƒoƒewo gbegblẽ ɖi la ate ŋu aɖe wò. Esia megadzɔ gbeɖe o! Esi nuɖoanyi xoxo sia va zu afɔku teƒe si tea ame ɖe anyi wu la, mina míaɖoe kplikpaa awɔ nusianu si míate ŋui ana míaƒe hadedewo le kpekpewo me natu ame ɖo—eye míawɔe geɖe wu esi míekpɔ bena Yehowa ƒe ŋkekea le aƒe tum!

[Etenuŋɔŋlɔ]

Aleke Nàɖo Wo Ŋui?

◻ Nukata wòle vevie be míaƒe kpekpewo kple hadedewo nade dzi ƒo na ame le ŋkeke mamle siawo me?

◻ Nukae wòfia be míalé ŋku ɖe mía nɔewo ŋu?

◻ Nukae wòfia be míade dzi ƒo na mía nɔewo?

◻ Nukae dzidede ƒo na mía nɔewo bia?

◻ Aleke miate ŋu ade dzi ƒo na ame- si lé blanui kple amesi ƒe dzi gbã?

[Nɔnɔmetata si le axa 16]

Amedzrowɔwɔ kpena ɖe mía ŋu míenyaa mía nɔewo nyuie wu

[Nɔnɔmetata si le axa 18]

Esi Eliya lé blanui la, Yehowa fa akɔ nɛ dɔmenyotɔe