Fia Nu Kple Nugɔmesese Nàzã Nyaƒoɖeamenu

“Nugɔmesela ƒe dzi nana eƒe [nu] dzea nunya, eye eƒe nuyiwo dzia nufiame ɖe dzi.”—LODODOWO 16:23.

 1. Nukata Mawu ƒe Nya fiafia bia nu geɖe wu nyagbɔgblɔ na ame dzro ko?

MENYE mí Mawu ƒe Nya fialawo ƒe taɖodzinue nye be míana míaƒe nusrɔ̃viwo ƒe susu ɖeɖeko nase nu gɔme o, ke woƒe dzi hã. (Efesotɔwo 1:18) Eyata nufiafia menye nyagbɔgblɔ na ame dzro ko o. Lododowo 16:23 gblɔ be: “Nugɔmesela ƒe dzi nana eƒe [nu] dzea nunya, eye eƒe nuyiwo dzia nufiame ɖe dzi.”

 2. (a) Nukae wòfia be woaƒo nya ɖe ame nu? (b) Aleke wòanya wɔ be Kristotɔwo katã nanye nufiala nyaƒoɖeamenulawo?

² Apostolo Paulo wɔ gɔmeɖose sia ŋudɔ le eƒe nufiafiadɔ me nyateƒe. Esime wònɔ Korinto la, ‘eƒoa nu le ƒuƒoƒe la le Sabat ɖesiaɖe dzi, eye wòƒo nya ɖe Yudatɔwo kple Helatɔwo siaa nu.’ (Dɔwɔwɔwo 18:4) Numekugbalẽ aɖe gblɔ be Helagbe me nya si gɔme woɖe le afisia be ‘ƒo nya ɖe ame nu’ fia be “woazã nya siwo me susu le alo nukpɔsusu nyuiwo atsɔ atrɔ ame ƒe susui.” Paulo zã nya siwo gɔme nya se ale be amewo lɔ̃ trɔ alesi tututu wobua tamee. Eƒe nyaƒoɖeamenu ŋutete wɔ nuku ale gbegbe be eƒe futɔwo vɔ̃na nɛ. (Dɔwɔwɔwo 19:24-27) Ke hã menye amegbetɔ ƒe ŋutete ɖeɖefiae dze le Paulo ƒe nufiafia me o. Egblɔ na Korintotɔwo be: “Nye nyagbɔgblɔ kple nye gbeƒãɖeɖe mele nunya ƒe nya, siwo ƒoa nya ɖe ame nu la me o; ke boŋ le gbɔgbɔ kple ŋusẽ ƒe ɖeɖefia la me, bene miaƒe xɔse la naganɔ amewo ƒe nunya me o, hafi nenɔ Mawu ƒe ŋusẽ me boŋ.” (Korintotɔwo I, 2:4, 5) Esi Yehowa Mawu ƒe gbɔgbɔa kpena ɖe Kristotɔwo katã ŋu ta la, wo katã woate ŋu azu nufiala nyaƒoɖeamenulawo. Gake aleke woawɔe? Mina míalé ŋku ɖe nufiafiaɖaŋu aɖewo siwo ɖea kpe ŋu kpɔ.

Nye Toɖola Nyui

 3. Nukatae nugɔmesese hiã le nufiafia amewo me, eye aleke míawɔ aɖo Biblia-nusrɔ̃vi ƒe dzi gbɔ?

³ Toɖoɖoe nye nufiafiaɖaŋu gbãtɔ ke menye nuƒoƒo o. Abe alesi wòdze le Lododowo 16:23 ene la, ele be míanye nugɔmeselawo hafi ate ŋu aƒo nya ɖe ame nu. Yesu se nu gɔme na amesiwo wòfia nui. Yohanes 2:25 gblɔ be: “Eya ŋutɔ dze si nusi le ame me.” Gake aleke míawɔ anya amesiwo míefiaa nui ƒe dzimenyawo? Mɔ ɖekae nye be míanye toɖola nyuiwo. Yakobo 1:19 gblɔ be: “Amesiame naɖe abla le nusese me, nanɔ blewu le nuƒoƒo me.” Nyateƒee, menye amesiamee lɔ̃na gblɔa nusi wòsusu o. Ne míaƒe Biblia-nusrɔ̃viwo va ka ɖe edzi be míetsɔ ɖe le yewo me vavã la, anɔ bɔbɔe be woagblɔ woƒe seselelãmewo ŋutɔŋutɔ. Zi geɖe la, nya siwo míabia dɔmenyotɔe gake woana míase nya gɔme la ate ŋu akpe ɖe mía ŋu míaɖo amewo ƒe dzi gbɔ ‘woaƒo nu faa.’—Lododowo 20:5.

 4. Nukata wòle be Kristotɔ hamemegãwo nanye toɖola nyuiwo?

⁴ Ele vevie na Kristotɔ hamemegãwo vevietɔ be woanye toɖola nyuiwo. Ema ko hafi woate ŋu “[anya] alesi wòdze be, [woaɖo] nya ŋuti na amesiame” pɛpɛpɛ. (Kolosetɔwo 4:6) Lododowo 18:13 xlɔ̃ nu be: “Ne ame aɖe mekpɔ se nya, hafi ɖo eŋu o la, bometsitsi kple ŋukpe wònye nɛ.” Gbeɖeka nɔviŋutsu eve siwo meɖo susu vɔ̃ aɖeke o la ɖo aɖaŋu na nɔvinyɔnu aɖe le xexemegbenɔnɔ ŋu le esi nyɔnua da kpekpe aɖewo ƒu ta. Ete ɖe nɔvinyɔnua dzi vevie be womebia ye nusita yemeva o. Wowɔ dɔ nɛ eteƒe medidi o eye eƒe lãmee mesẽ vɔ o. Ekema aleke gbegbe wòle vevie enye si be míase nya hafi aɖo aɖaŋu!

 5. Aleke hamemegãwo akpɔ dzre siwo aɖo nɔviwo dome gbɔe?

⁵ Le hamemegãwo gome la, nufiafia bia aɖaŋuɖoɖo na amewo zi geɖe. Ele vevie be woanye toɖola nyuiwo le go sia hã me. Toɖoɖo hiã vevietɔ ne dzre dzɔ ɖe hati Kristotɔwo dome. Ne hamemegãwo se nyaa vɔ ko hafi woate ŋu asrɔ̃ ‘Fofo si mekpɔa ame ŋkume o.’ (Petro I, 1:17) Dziku sesẽwo nɔa amewo me le nɔnɔme siawo me, eye anyo ne hamemegãa lé Lododowo 18:17 ƒe aɖaŋuɖoɖo ɖe susu me, si gblɔ be: “Ame gbãtɔ dzena abe dzɔdzɔetɔ ene le dzrenya me; ke evelia va ɖea egɔme ɖe go.” Nufiala bibi aɖo to akpa evea. Ne edo gbe ɖa la, ana tomefafa nanɔ teƒea. (Yakobo 3:18) Ne dziku flã la, àte ŋu aɖo aɖaŋu be nɔviawo dometɔ ɖesiaɖe nagblɔ eƒe nyawo na ye tẽ, tsɔ wu be ame evea nanɔ nya hem kple wo nɔewo. Hamemegã la ate ŋu abia nya siwo sɔ atsɔ akɔ nya siwo hem wole me. Le nya geɖe me la, menye fulélee na wowɔa dzre o, nugɔmemasemase gbɔe wòtsona. Gake ne Biblia ƒe gɔmeɖosewo dzie woda la, ke nufiala lɔ̃ame ate ŋu afia nu nugɔmesesetɔe le esi wòse ame evea ƒe nya vɔ ta.

Nya Bɔbɔewo ƒe Vevienyenye

 6. Aleke Paulo kple Yesu woɖo kpɔɖeŋu le nya bɔbɔewo tsɔtsɔ fia nui me?

⁶ Nyawo gbɔgblɔ be woanɔ bɔbɔe hã nye nufiafia ŋutete xɔasi bubu. Nyateƒee, míedi be Biblia-nusrɔ̃viwo nate ŋu “adze si nusi nye [nyateƒea ƒe] kekeme kple didime kple goglome kple kɔkɔme.” (Efesotɔwo 3:18) Biblia ƒe nufiafia aɖewo li siwo léa dzi na ame eye wo gɔme sese sesẽna zi geɖe. (Romatɔwo 11:33) Ke hã esi Paulo ɖe gbeƒã na Helatɔwo la, ‘Kristo si woklã ɖe ati ŋue’ nye gbedasi si wògblɔ. (Korintotɔwo I, 2:1, 2) Nenema ke Yesu hã ɖe gbeƒã eƒe nyawo wo me kɔ eye wo nya se. Ezã nya bɔbɔewo le eƒe Todzimawunya la me. Ke hã nyateƒenya goglo siwo wogblɔ kpɔ lae nɔ wo me.—Mateo, ta 5-7.

 7. Aleke míawɔ nuwo nanɔ bɔbɔe ne míele Biblia-nusɔsrɔ̃wo wɔm?

⁷ Míawo hã míate ŋu ana nyawo nanɔ bɔbɔe ne míele Biblia-nusɔsrɔ̃wo wɔm. Alekee? Ne míelé fɔ ɖe ‘nu vevitɔwo’ ŋu. (Filipitɔwo 1:10) Ne míele nyati goglowo me ɖem la, ele be míazã nyagbɔgblɔ siwo me kɔ. Ele be míazã mawunyakpukpui veviwo ko tsɔ wu be míadze agbagba be míaxlẽ Biblia ƒe kpukpui ɖesiaɖe si woyɔ le agbalẽa me ahadzro wo me. Esia bia tso mía si be míadzra ɖo nyuie do ŋgɔ. Ele be míatsri nya geɖe tsɔtsɔ ɖe fu na nusrɔ̃via, eye míagaɖe mɔ nya siwo mele vevie boo o nate mí ɖa le nusɔsrɔ̃a gbɔ o. Ne nusrɔ̃via bia nya si meka nusɔsrɔ̃a tẽ o la, míate ŋu atsɔ ŋuɖɔɖɔɖo aɖo aɖaŋu be míadzro eme ne míewu nusɔsrɔ̃a nu.

Nyabiasewo Zazã Nyuie

 8. Aleke Yesu zã nyabiasewo nyuie?

⁸ Nufiafia ƒe ŋutete bubu si ɖea vie nye nya siwo ɖea kpe biabia. Yesu Kristo bia nya geɖe le eƒe nufiafia me. Le kpɔɖeŋu me, Yesu bia Petro be: “Simon, nuka nèsusuna? Anyigba dzi fiawo la, ameka si woxɔa adzɔ alo nudzɔdzɔ lena mahã? Le woa ŋutɔwo ƒe viwo si loo, alo le amedzrowo si mahã? Egblɔ bena: Le amedzrowo si. Yesu gblɔ nɛ bena: Ekema viwo le wo ɖokui si.” (Mateo 17:24-26) Esi Yesu nye Amesi wosubɔna le gbedoxɔa me ƒe Tenuvi ta la, mele be wòaxe gbedoxɔ me dzɔ o. Gake Yesu to nyabiabia si ɖea kpe biabia me na wonya nyateƒe sia. Eyata Yesu kpe ɖe Petro ŋu wònɔ te ɖe nusi wònya xoxo dzi ƒo nya ta si sɔ.

 9. Aleke míate ŋu azã nyabiasewo le Biblia-nusɔsrɔ̃wo wɔwɔ me?

⁹ Míate ŋu awɔ nyabiasewo ŋudɔ nyuie le Biblia-nusɔsrɔ̃wo wɔwɔ me. Ne nusrɔ̃vi na ŋuɖoɖo gbegblẽ la, ɖewohĩ adzro mí be míagblɔ nyuitɔa nɛ, gake ɖe nyaa atsi tame nɛa? Zi geɖe la, anyo wu be míada nusrɔ̃via ɖe mɔ dzi wòawɔ nyataƒoƒo nyuitɔ to nyawo biabiae me. Le kpɔɖeŋu me, ne mete ŋu le nusita wòle be wòazã Mawu ƒe ŋkɔa gɔme sem o la, míate ŋu abiae be, ‘Ðe ŋkɔwò le vevie na wòa? . . . Nukatae? . . . Aleke nàse le ɖokuiwò me ne ame aɖe gbe wò ŋkɔa yɔyɔ na wò? . . . Ðe susu mele eme be Mawu nadi be míazã yeƒe ŋkɔ oa?’

10. Aleke hamemegãwo azã nyabiasewo akpe ɖe amesiwo dzi nu te ɖo ŋui?

¹⁰ Hamemegãwo hã ate ŋu azã nyabiasewo nyuie ne wole alẽawo kplɔm. Satana ƒe xexeame nyama hamea me tɔ geɖe eye nu te ɖe wo dzi wosusu be yewo ŋu mekɔ o eye be womelɔ̃ yewo o. Hamemegã ate ŋu alé susu kpɔ kple amesia tɔgbe abia be: ‘Togbɔ be èbu be yemele kɔkɔe o hã la, aleke Yehowa susuna le ŋuwòe? Ne mía Fofo si le dziƒo ɖe mɔ be Via naku axe fe ɖe tawò la, ɖe ema mefia be Mawu lɔ̃ wò oa?’—Yohanes 3:16.

11. Dɔ kae biabia siwo mehiã ŋuɖoɖo o wɔna, eye aleke woate ŋu azã wo le dutoƒonuƒowo mee?

¹¹ Biabia siwo mehiã ŋuɖoɖo o nye nufiafiaɖaŋu bubu si ɖea vi. Womekpɔa mɔ be nyaselawo naɖo wo ŋu woase o gake wotoa wo biabia me kpena ɖe wo ŋu be woabu nyawo ŋu. Blemanyagblɔɖilawo zãa nyabiase siawo zi geɖe bene woƒe nyawo selawo nabu tame vevie. (Yeremya 18:14, 15) Yesu zã biabia siwo mehiã ŋuɖoɖo o nyuie. (Mateo 11:7-11) Dutoƒonuƒowo koŋ mee nyabiase siawo wɔa dɔ le. Le esi teƒe be woagblɔ na nyaselawo be ele be woawɔ nu tso dzi blibo me hafi adze Yehowa ŋu la, aɖe vi wu ne wobia wo be, ‘Ne menye dzi blibo ŋutɔŋutɔe míetsɔ wɔ míaƒe subɔsubɔdɔ o la, ɖe wòadze Yehowa ŋua?’

12. Viɖe kae le nukpɔsusu ƒe biabiawo biabia ŋu?

¹² Nukpɔsusu ƒe biabiawo hã wɔa dɔ ne wodi be woanya nenye be Biblia-nusrɔ̃vi xɔ nusiwo srɔ̃m wòle dzi se nyateƒe. (Mateo 16:13-16) Ðewohĩ nusrɔ̃vi aɖo nya ŋu nyuie be matrewɔwɔ menyo o. Gake nukata màbia nya siawo akpee o, be, Aleke wò ŋutɔ nèsusu le Mawu ƒe agbenyuinɔnɔ ƒe dzidzenuwo ŋui? Ðe wòwɔ na wò be wosesẽ akpa? Èɖawɔ Mawu ƒe dzidzenuwo dzi loo alo mèwɔ wo dzi o, ɖe nàgblɔ be ele veviea?

Kpɔɖeŋu Siwo Ðoa Dzi Gbɔ

13, 14. (a) Nukae wòfia be woawɔ nane ƒe kpɔɖeŋu? (b) Nukatae kpɔɖeŋu nyuiwo ɖea kpe?

¹³ Mɔ bubu si dzi míato aɖo nyaselawo kple Biblia-nusrɔ̃viwo ƒe dzi gbɔe nye to kpɔɖeŋu nyuiwo wɔwɔ me. Helagbe me nya si gɔme woɖe be “kpɔɖeŋu” la fia “nuwo tsɔtsɔ ɖo wo nɔewo xa alo teƒe ɖeka” le nyaa ŋutɔŋutɔ nu. Ne èle kpɔɖeŋu wɔm la, ke èle nua me ɖem tsɔe le nusi ɖii la ‘xa ɖom.’ Le kpɔɖeŋu me, Yesu bia be: “Nuka ŋu míatsɔ mawufiaɖuƒe la aɖoe mahã? Alo kpɔɖeŋu ka míawɔ le eŋu mahã?” Yesu zã logoku nyanyɛa le nyaa ŋu ɖoɖo me.—Marko 4:30-32, NW.

¹⁴ Mawu ƒe nyagblɔɖilawo zã kpɔɖeŋu sẽŋu geɖe. Esi Asiriatɔ siwo Mawu zã tsɔ he to na Israel-viwo te anyrawɔwɔ yakayaka la, Yesaya wɔ kpɔɖeŋu aɖe tsɔ ɖe woƒe dadagbɔgbɔa ɖe go be: “Ðe fía aƒo adegbe ɖe amesi tsɔe le nu lãmee la ŋua? Alo ɖe laxalaxa atɔ asi akɔ ɖe amesi le ehem la ŋua?” (Yesaya 10:15) Esi Yesu nɔ nu fiam amewo la, eya hã wɔ kpɔɖeŋu geɖe. Wogblɔ le eŋu be “ne menye kpɔɖeŋuwo o la, meƒoa nu na wo o.” (Marko 4:34, NW) Kpɔɖeŋu nyuiwo wɔa dɔ elabena ewɔa dɔ ɖe susu kple dzi dzi. Ewɔnɛ be nya yeyewo ɖoa susu me na nyaselawo bɔbɔe ne wotsɔe sɔ kple nusi wonya xoxo.

15, 16. Nukae ana kpɔɖeŋuwo naɖe kpe wu? Gblɔ eƒe kpɔɖeŋuwo.

¹⁵ Aleke míawɔ kpɔɖeŋu siwo aɖo dzi gbɔ ŋutɔŋutɔ? Gbã la, ele be kpɔɖeŋua nasɔ kple nusi me ɖem wole la nyuie alesi dze. Ne nuawo mesɔ kple wo nɔewo tututu o la, kpɔɖeŋua atɔtɔ nyaselawo tsɔ wu be wòakɔ nu me na wo. Gbeɖeka nuƒola aɖe si meɖo susu vɔ̃ aɖeke o la dze agbagba be yeana woakpɔ alesi amesiaminawo bɔbɔa wo ɖokui na Yesu Kristoe ale be wòtsɔ wo sɔ kple avu nɔamegbɔ wɔnuteƒe aɖe. Gake ɖe amebɔbɔɖeanyi ƒe kpɔɖeŋu sia sɔ ŋutɔŋutɔa? Biblia gblɔ nya ma ke le mɔ si nya se wu eye wòde bubu ame ŋu nu. Etsɔ Yesu yomedzela amesiamina 144,000 la sɔ kple “ŋugbetɔ, si wowɔ leke na hena srɔ̃a.”—Nyaɖeɖefia 21:2.

¹⁶ Kpɔɖeŋuwo wɔa dɔ nyuie wu ne woku ɖe amewo ƒe agbenɔnɔ ŋu. Kpɔɖeŋu si Natan wɔ le alẽvi si wowu ŋu la de Fia Dawid ƒe dzi gbɔ elabena elɔ̃ alẽwo, le esi wòkplɔ alẽwo kpɔ le eƒe ɖekakpui me ta. (Samuel I, 16:11-13; Samuel II, 12:1-7) Ne nyitsu ŋue kpɔɖeŋua ku ɖo la, anye ne mewɔ dɔ de nenema o. Nenema ke kpɔɖeŋu siwo ku ɖe dzɔdzɔmeŋutinunya me nudzɔdzɔ aɖe alo ŋutinya manyamanya aɖe ŋu maɖe vi boo na míaƒe nyaselawo o. Yesu zã gbesiagbegbenɔnɔ me nuwo tsɔ wɔ eƒe kpɔɖeŋuwoe. Ezã nusiwo wonya nyuie abe akaɖi, dziƒoxewo, kple dzogbenya ene. (Mateo 5:15, 16; 6:26, 28) Enɔ bɔbɔe na Yesu ƒe nusrɔ̃lawo be woakpɔ ƒomedodo si le nyaawo kple nusiawo dome.

17. (a) Nukawo dzie míate ŋu atu míaƒe kpɔɖeŋuwo ɖo? (b) Aleke míate ŋu atrɔ asi le kpɔɖeŋu siwo wowɔ le míaƒe agbalẽwo me ŋu be woasɔ ɖe míaƒe nusrɔ̃viwo ƒe nɔnɔmewo nui?

¹⁷ Mɔnukpɔkpɔ geɖe sua mía si le míaƒe subɔsubɔdɔ me be míawɔ kpɔɖeŋu siwo le bɔbɔe gake woɖea kpe. Lé ŋku ɖe nu ŋu. (Dɔwɔwɔwo 17:22, 23) Ðewohĩ àte ŋu anɔ te ɖe nyaselaa ƒe viwo, aƒeme, dɔwɔna, alo modzakaɖedɔ dzi awɔ kpɔɖeŋu. Alo míate ŋu anɔ te ɖe nusi mía ŋutɔwo míenya le Biblia-nusrɔ̃vi ŋu dzi ana wòase kpɔɖeŋu siwo wowɔ le míaƒe nusrɔ̃gbalẽwo me xoxo gɔme ɖe edzi. Le kpɔɖeŋu me, bu kpɔɖeŋu nyui si wowɔ le agbalẽ si nye Sidzedze si Kplɔa Ame Yia Agbe Mavɔ Me ƒe ta 8 lia ƒe memamã 14 me ŋu kpɔ. Eƒo nu tso dzila lɔ̃ame si ŋu aƒelika aɖe va gblẽ ŋu. Anyo ŋutɔ be míakpɔe ɖa be aleke míatrɔ asi le kpɔɖeŋua ŋu wòasɔ na Biblia-nusrɔ̃vi si hã nye dzilae.

Ŋɔŋlɔawo Xexlẽ Nyuie

18. Nukata wòle be míadze agbagba anye amesiwo xlẽa nu wòzɔna tẽe?

¹⁸ Paulo xlɔ̃ nu Timoteo be: “Nɔ agbalẽxexlẽ kple nuxɔxlɔ̃ kple nufiafia dzi.” (Timoteo I, 4:13) Esi Biblia dzie míetu míaƒe nufiafia ɖo ta la, aɖe vi ŋutɔ ne míete ŋu xlẽnɛ nyuie. Mɔnukpɔkpɔ su Lewi-viwo si be woxlẽa Mose ƒe Sea na Mawu ƒe amewo. Ðe woxlẽa nua ale be nyawo yɔyɔ nɔa sesẽm na wo alo agbe menɔa eme oa? Ao, Biblia gblɔ le Nexemya 8:8 be: “Woxlẽ Mawu ƒe segbalẽ la eme kɔ, eye woɖe eme, ale be wose nusi woxlẽ la gɔme.”

19. Aleke míawɔ be alesi míexlẽa Ŋɔŋlɔawo nanyo ɖe edzi?

¹⁹ Ŋutsu Kristotɔ aɖewo siwo bi le nuƒoƒo me mete ŋu xlẽa nu nyuie o. Aleke woawɔe wòanyo? To esɔsrɔ̃ ɖaa mee. Ẽ, ne woxlẽa nu sesĩe zi gbɔ zi geɖe vaseɖe esime woaxlẽe wòazɔ tẽ. Ne Biblia ƒe kasɛtwo le mia degbe me la, anyo be nàlé to ɖe alesi nuxlẽla la tea gbe ɖe gɔmesesea dzi kple alesi wòkɔa gbe dzi hebɔbɔnɛ eye nàde dzesi alesi wòyɔa ŋkɔwo kple nya siwo mebɔ o. Amesiwo si New World Translation le le wo degbe me ate ŋu azã nyayɔyɔ ƒe mɔfiafia si wona la.a To esɔsrɔ̃ edziedzi me la, ŋkɔwo abe Maʹher-shalʹal-hash-baz anya yɔ bɔbɔe wu tsã.—Yesaya 8:1, NW.

20. Aleke ‘míakpɔ míaƒe nufiafia dzi nyuiee’?

²⁰ Esi míenye Yehowa ƒe amewo ta la, mɔnukpɔkpɔ ka gbegbee nye si wònye be míenye nufiala siwo zãm wòle! Ekema mina mía dometɔ ɖesiaɖe natsɔ agbanɔamedzi sia nu vevii. Mina ‘míakpɔ mía ɖokui kple míaƒe nufiafia dzi nyuie.’ (Timoteo I, 4:16) Míate ŋu anye nufiala nyuiwo ne míenye toɖola nyuiwo, ne míezãa nya siwo le bɔbɔe, ne míebiaa nya siwo hea nyawo ɖe go, ne míewɔa kpɔɖeŋu siwo ɖea kpe, eye ne míexlẽa ŋɔŋlɔawo nyuie. Neva eme be hehe si nam Yehowa le to eƒe habɔbɔa dzi naɖe vi na mí katã, elabena esia ate ŋu akpe ɖe mía ŋu be “nusrɔ̃viwo ƒe aɖe” nanɔ mía si. (Yesaya 50:4) Ne míezãa dɔwɔnu siwo katã wona mí, siwo ƒe ɖewoe nye agbalẽ gbadzawo, kasɛtwo, kple video kasɛtwo, bliboe tsɔ wɔ míaƒe subɔsubɔdɔa la, míate ŋu anya alesi míatsɔ nugɔmesese kple nyaƒoɖeamenu afia nui.

[Etenuŋɔŋlɔ]

Èɖo Ŋku Wo Dzia?

◻ Aleke toɖola nyui nyenye ate ŋu akpe ɖe mía ŋu le míaƒe nufiafia mee?

◻ Aleke míate ŋu asrɔ̃ Paulo kple Yesu le nya bɔbɔewo tsɔtsɔ fia nui me?

◻ Nyabiase kawo ƒomevie míate ŋu azã ne míele nu fiam amewo?

◻ Kpɔɖeŋu kawo ƒomevie ɖea kpe wu?

◻ Aleke míawɔe be míaƒe nuxexlẽ le dutoƒo naganyo wu?

[Nɔnɔmetata si le axa 16]

Nufiala nyui ɖoa to be yease nyaa gɔme

[Nɔnɔmetata si le axa 18]

Yesu zã gbesiagbegbenɔnɔ me nuwo tsɔ wɔ kpɔɖeŋuwoe