Timoteo—“Vinye Vavã le Xɔse Me”

TIMOTEO nye sɔhɛ esime Kristotɔ apostolo Paulo tiae be wòanye yeƒe mɔzɔhati. Esia nye dɔ si woava wɔ aduadu anɔ ƒe 15 la ƒe gɔmedzedze. Ƒomedodo si va nɔ ŋutsu eveawo dome me sẽ ale gbegbe be Paulo te ŋu yɔ Timoteo be “vinye lɔlɔ̃tɔ kple nuteƒewɔla le Aƒetɔ me” kple be “vinye vavã le xɔse me.”—Korintotɔwo I, 4:17; Timoteo I, 1:2.

Amenyenye kae nɔ Timoteo si si ta Paulo lɔ̃e nenema gbegbe ɖo? Aleke Timoteo wɔ va zu zɔhɛ vevi sia ƒomevi? Eye nusɔsrɔ̃ nyui kawoe míate ŋu asrɔ̃ tso Timoteo ƒe dɔwɔnawo ŋuti nuŋlɔɖi si tso gbɔgbɔ me la me?

Paulo Tiae

Esime apostolo Paulo yi Listra (si le egbegbe Turkey) le eƒe dutanyanyuigbɔgblɔdɔa ƒe mɔzɔzɔ evelia me le ƒe 50 M.Ŋ. lɔƒoe wòke ɖe nusrɔ̃la si nye ɖekakpui Timoteo ŋu. Esi Timoteo anya nɔ eƒe ƒewuiwo ƒe nuwuwu alo ƒe 20-awo ƒe gɔmedzedze me la, Kristotɔ siwo nɔ Listra kple Ikonio ƒo nu nyuie le eŋu. (Dɔwɔwɔwo 16:1-3) Ewɔ nu wòsɔ kple eƒe ŋkɔ, si gɔmee nye “Amesi Dea Bubu Mawu Ŋu.” Timoteo mama Loide kple dadaa Eunike fia nui tso Ŋɔŋlɔ Kɔkɔeawo me tso ɖevime ke. (Timoteo II, 1:5; 3:14, 15) Anye ƒe ʋɛ aɖewo siwo va yi esime Paulo va wo de zi gbãtɔe wova zu Kristotɔwo. Azɔ, to gbɔgbɔ kɔkɔea ƒe dɔwɔwɔ me la, nyagblɔɖi aɖe ɖe amesi Timoteo ava nye le etsɔme fia. (Timoteo I, 1:18) Le zɔzɔ ɖe mɔfiame ma dzi me la, Paulo kple hamemegã siwo le hamea me da asi ɖe ɖekakpuia dzi heɖoe na dɔ vevi aɖe wɔwɔ, eye apostoloa tiae be wòanye yeƒe zɔhɛ dutanyanyuigblɔla.—Timoteo I, 4:14; Timoteo II, 1:6.

Timoteo metso aʋa o le esi fofoa nye Helatɔ dzimaxɔsetɔ ta. Esia menye Kristotɔwo ƒe nudidi ya o. Gake be wòaganye nukikli na Yudatɔ siwo gbɔ yi ge wòala o ta la, Timoteo ɖe mɔ ɖe wɔna sia si vena vevie la ŋu.—Dɔwɔwɔwo 16:3.

Do ŋgɔ la, ɖe wobu Timoteo be enye Yudatɔa? Agbalẽnyala aɖewo gblɔ be le rabiwo ƒe se nu la, “amesiwo ɖe srɔ̃ tso du bubu me ƒe viwo de nyea wo dadawo de, menye wo fofowo de o.” Efia be “Yuda-nyɔnu ƒe viwo nyea Yudatɔwo.” Ke hã kakaɖedzi menɔ nuŋlɔla Shaye Cohen si nenye be “rabiwo ƒe se sia si ku ɖe amewo ŋu la nɔ anyi tsã le ƒe alafa gbãtɔ M.Ŋ. me,” eye nenye be Yudatɔ siwo nɔ Asia Sue wɔ ɖe edzi o. Esi wòde ŋugble le ŋutinya me kpeɖodziwo ŋu vɔ la, eƒo nya ta be ne ŋutsu siwo nye Trɔ̃subɔlawo ɖe Israel-nyɔnuwo la, “ne ƒomea le Israel-viwo dome hafi wobua vi siwo wodzina le srɔ̃ɖeɖe siawo me be wonye Israel-viwo. Wotoa vidadawo dzi nyaa ƒome si me ame tso ne ƒomea le ɖeviawo dada de. Ne Israel-nyɔnu ʋu yi ɖanɔ srɔ̃a Trɔ̃subɔla gbɔ le wo de la, wobua viawo Trɔ̃subɔlawoe.” Aleke kee wòɖale o, du eve me vi si Timoteo nye anya de edzi le gbeƒãɖeɖedɔa wɔwɔ me. Tete ɖe Yudatɔwo alo Trɔ̃subɔlawo ŋu masesẽ nɛ o eye ɖewohĩ akpe ɖe eŋu wòaɖɔ masɔmasɔwo ɖo le wo dome.

Paulo ƒe Listra yiyi he tɔtrɔ ɖedzesi aɖe va Timoteo ƒe agbe mee. Ðekakpui sia ƒe lɔlɔ̃ faa be yeawɔ ɖe gbɔgbɔ kɔkɔea ƒe mɔfiamewo dzi ahawɔ dɔ aduadu kple Kristotɔ hamemegãwo ɖokuibɔbɔtɔe he yayra gãwo kple subɔsubɔ mɔnukpɔkpɔwo vɛ nɛ. Eya ŋutɔ ɖade dzesii le ɣeyiɣi ma me alo mede dzesii o, le Paulo ƒe mɔfiafia te la, woava zã Timoteo le teokrasidɔ veviwo wɔwɔ me, siwo ana wòadzo le wo de ayi keke Roma, si nye fiaɖuƒea ƒe fiadu la me emegbe.

Timoteo Do Fiaɖuƒea ƒe Nuwo Ðe Ŋgɔ

Timoteo ƒe dɔwɔnawo ŋuti nuŋlɔɖi ʋɛ aɖewo koe le mía si, gake ezɔ mɔ geɖe le Fiaɖuƒea ƒe nuwo dodo ɖe ŋgɔ me. Mɔ gbãtɔ si Timoteo zɔ kple Paulo kpakple Sila kplɔe yi ɖato Asia Sue va do ɖe Europa. Le afima la, ekpɔ gome le gbeƒãɖeɖedɔa wowɔ me le Filipi, Tesalonika, kple Beroia. Esi tsitretsiɖeŋu na Paulo dzo yi Atene la, egblẽ Timoteo kple Sila ɖe Beroia be woakpɔ nusrɔ̃lawo ƒe ƒuƒoƒo si woɖo le afima la dzi. (Dɔwɔwɔwo 16:6–17:14) Emegbe Paulo ɖo Timoteo ɖe Tesalonika be woaɖado ŋusẽ hame yeye si le afima. Esi Timoteo do go Paulo le Korinto la, egblɔ ŋgɔyiyi si wɔm hamea le ŋuti nyanyui nɛ.—Dɔwɔwɔwo 18:5; Tesalonikatɔwo I, 3:1-7.

Ŋɔŋlɔawo megblɔ ɣeyiɣi didi si Timoteo nɔ Korintotɔawo gbɔ o. (Korintotɔwo II, 1:19) Gake ɖewohĩ le ƒe 55 M.Ŋ. lɔƒo me la, Paulo susui be yeagadɔe ɖe wo gbɔ elabena nya siwo wòse tso wo ŋu medo dzidzɔ nɛ o. (Korintotɔwo I, 4:17; 16:10) Emegbe edɔ Erasto kpe ɖe Timoteo ŋu tso Efeso yi Makedonia. Eye esi Paulo nɔ agbalẽ ŋlɔm na Romatɔwo tso Korinto la, Timoteo ganɔ egbɔ.—Dɔwɔwɔwo 19:22; Romatɔwo 16:21.

Esime apostolo Paulo dze mɔ tso Korinto yina Yerusalem la, Timoteo kple ame bubuwo ɖoe ɖa vaseɖe keke Troa ya teti. Míenya ne Timoteo kplɔe ɖo va ɖo Yerusalem o. Gake Paulo yɔ eŋkɔ le lɛta etɔ̃ siwo wòŋlɔ le gaxɔ me le Roma le ƒe 60-61 M.Ŋ. me lɔƒo ƒe ŋgɔdonyawo me.a (Dɔwɔwɔwo 20:4; Filipitɔwo 1:1; Kolosetɔwo 1:1; Filemon 1) Paulo nɔ ɖoɖo wɔm be yeadɔ Timoteo tso Roma ayi Filipi. (Filipitɔwo 2:19) Eye esi woɖe asi le Paulo ŋu tso game la, Timoteo tsi Efeso abe alesi apostoloa bia tso esii ene.—Timoteo I, 1:3.

Esi mɔzɔzɔ le ƒe alafa gbãtɔ me menɔ bɔbɔe o eye vovo hã menɔ eme o ta la, Timoteo ƒe lɔlɔ̃ faa be yeazɔ mɔ geɖe le hameawo ta dze na kafukafu vavã. (Kpɔ Gbetakpɔxɔ, August 15, 1996, axa 29 ƒe aɖaka.) De ŋugble le mɔ siwo zɔ ge wògbɔna la dometɔ ɖeka ko kple nusi wòfia mí ku ɖe Timoteo ŋu kpɔ.

Timoteo ƒe Amenyenye Ŋuti Numekɔkɔ

Timoteo nɔ apostolo Paulo si nɔ gaxɔ me la gbɔ le Roma esime wòŋlɔ agbalẽ na Kristotɔ siwo yome tim wonɔ le Filipi gblɔ be: “Mele mɔ kpɔm le Aƒetɔ Yesu me bena, madɔ Timoteo aɖo ɖe mia gbɔ kpuie, bena ne menya miaƒe anyinɔnɔ me la, nye hã nye dzi nadze eme. Elabena ame aɖeke mele asinye, si ƒe tamesusu sɔ kple etɔ, amesi alé be na mi le nyateƒe me la o; elabena wo katã la woa ŋutɔwo tɔ dim wole, eye menye nusi nye Yesu Kristo tɔ o. Ke mienya eƒe kelili bena, abe vi kple tɔ ene la, nenema wòsubɔ kplim le nyanyuie la me.”—Filipitɔwo 1:1, 13, 28-30; 2:19-22.

Nya mawo ɖo kpe alesi Timoteo tsɔ ɖe le haxɔsetɔwo mee dzi. Ne meɖo tɔdziʋu o la, mɔ sia zɔzɔ kple afɔ tso Roma yi Filipi axɔ ŋkeke 40, tsɔ kpe ɖe ɣeyiɣi kpui aɖe ƒe Adriatik Ƒua tsotso ŋu, eye emegbe woatsɔ ŋkeke 40 bubu atrɔ agbɔ va Roma. Timoteo nɔ klalo be yeawɔ esiawo katã atsɔ asubɔ nɔviaŋutsuwo kple nyɔnuwoe.

Togbɔ be Timoteo zɔ mɔ geɖe hã la, ɣeaɖewoɣi lãmesẽ menɔa esi o. Edze ƒã be dɔmeɖui aɖe ƒomevi nɔ eŋu, eye eƒe ‘lãme gblẽna enuenu.’ (Timoteo I, 5:23) Ke hã eku kutri le nyanyuia ta. Eyata mewɔ nuku o be ƒomedodo kplikplikpli sia nɔ eya kple Paulo dome!

Edze ƒã be apostolo Paulo ƒe kpɔkplɔ kple nusiwo me wo ame evea to ɖekae kpe ɖe Timoteo ŋu be wòsrɔ̃ eƒe amenyenye. Eyata Paulo te ŋu gblɔ nɛ be: “Èdze nye nufiafia, nye agbenɔnɔ, nye tameɖoɖo, nye xɔse, nye dzigbɔgbɔ blewu, nye lɔlɔ̃, nye dzidodo, nye yometitiwo kple nye fukpekpe, siwo mekpe le Antioxia kple Ikonio kple Listra la yome; yometiti ma, siwo medo dzi kpe.” Timoteo fa avi ɖe Paulo ti eye wòɖoa ŋku edzi le eƒe gbedodoɖawo me, eye wo kpakplii wosubɔ abe kluviwo ene bene woatsɔ ado Fiaɖuƒea ƒe nuwo ɖe ŋgɔe.—Timoteo II, 1:3, 4; 3:10, 11.

Paulo de dzi ƒo na Timoteo be ‘wòagana ame aɖeke nado vlo eƒe ɖekakpuinyenye o.’ Esia ate ŋu afia be Timoteo kpea ŋu eye wòhena ɖe megbe ne ehiã be wòawɔ ŋusẽ si wonae la ŋudɔ dzideƒotɔe. (Timoteo I, 4:12; Korintotɔwo I, 16:10, 11) Ke hã ete ŋu wɔa subɔsubɔdɔa le eɖokui si, eye dzideƒo nɔa Paulo si wòdɔnɛ ɖe dɔ gãwo wɔƒe. (Tesalonikatɔwo I, 3:1, 2) Esi Paulo de dzesii be Efeso-hamea hiã na teokrasidzikpɔkpɔ vevie la, exlɔ̃ nu Timoteo be wòatsi afima “[ade] se na ame aɖewo be, womagafia nu bubu o.” (Timoteo I, 1:3) Gake togbɔ be wona agbanɔamedzi geɖe Timoteo hã la, ebɔbɔ eɖokui. Eye togbɔ be ekpea ŋu hã la, ewɔa nu dzideƒotɔe. Le kpɔɖeŋu me, eyi Roma ɖakpe ɖe Paulo, amesi nɔ dodokpɔwo me tom le eƒe xɔse ta la ŋu. Le nyateƒe me la, Timoteo ŋutɔ hã nɔ gaxɔ me ɣeyiɣi aɖe, anye le susu sia ke ta.—Hebritɔwo 13:23.

Ðikeke mele eme o be Timoteo srɔ̃ nu geɖe tso Paulo gbɔ. Nyateƒe si wònye be apostoloa ŋlɔ agbalẽ eve siwo tso gbɔgbɔ me si míakpɔ le Kristotɔwo ƒe Hela Ŋɔŋlɔawo me ɖo ɖee la ɖe asixɔxɔ si apostoloa de eƒe hadɔwɔla la ŋu fia kɔte. Le ƒe 65 M.Ŋ. lɔƒo esi Paulo de dzesii be yeƒe xɔsetakuɣi gogo la, egabia ake be Timoteo nava ye gbɔ. (Timoteo II, 4:6, 9) Ne Timoteo to mɔ aɖe dzi kpɔ apostolo Paulo hafi wowui alo mete ŋu kpɔe o, Ŋɔŋlɔawo megblɔ naneke tso eŋu o.

Tsɔ Ðokuiwò Na!

Míate ŋu asrɔ̃ nu geɖe tso kpɔɖeŋu nyui si Timoteo ɖo la me. Zɔzɔ kple Paulo ɖe vi nɛ geɖe, enye ɖekakpui si ŋu kpena si tsi va zu dzikpɔla. Kristotɔ ɖekakpui kple ɖetugbiwo ate ŋu akpɔ viɖe geɖe tso hadede sia ƒomevi me egbea. Eye ne wotsɔ Yehowa ƒe subɔsubɔdɔa wɔ woƒe dɔe la, dɔ ɖɔʋu geɖe anɔ wo si woawɔ. (Korintotɔwo I, 15:58) Woate ŋu ava zu mɔɖelawo, alo ɣeyiɣiawo katã ƒe gbeƒãɖelawo le woƒe hamewo me, alo woate ŋu asubɔ le teƒe si Fiaɖuƒe gbeƒãɖelawo hiã le vevie. Dɔ gbogbo siwo li woate ŋu awɔ dometɔ aɖewoe nye dutanyanyuigbɔgblɔdɔ wɔwɔ le dukɔ bubu me alo subɔsubɔ le Gbetakpɔxɔ Habɔbɔa ƒe xexeame katã ƒe dɔwɔƒegã alo le eƒe alɔdzewo dometɔ ɖeka. Eye le nyateƒe me la, Kristotɔwo katã ate ŋu aɖe gbɔgbɔ si Timoteo ɖe fia la ƒomevi afia ne wosubɔ Yehowa tso luʋɔ blibo me.

Èdi be yeayi edzi anɔ tsitsim le gbɔgbɔ me eye be Yehowa ƒe habɔbɔa nazã ye le mɔ sia mɔ si wòkpɔ be edze la nua? Ekema wɔ nu abe Timoteo ene. Tsɔ ɖokuiwò na alesi nàte ŋui. Amekae nya subɔsubɔ ƒe mɔnukpɔkpɔ siwo ate ŋu aʋu na wò le etsɔme?

[Etenuŋɔŋlɔ]

[Nɔnɔmetata si le axa 31]

‘Ame aɖeke mele asinye, si ƒe tamesusu sɔ kple etɔ o’