Ta Wuiɖekɛlia
‘Nɔ Fiaɖuƒea Didi Dzi Gbãgbiagbã’
1. (a) Nukatae Yesu de dzi ƒo na eƒe nyaselawo be woadi Fiaɖuƒea gbãgbiagbã? (b) Nya kae wòle be míabia mía ɖokui?
LE NUƑO aɖe si Yesu ƒo le Galilea ƒe 1,900 kple edzivɔe nye sia me la, ede dzi ƒo na eƒe nyaselawo be: “Midi mawufiaɖuƒe la kple [Mawu ƒe] dzɔdzɔenyenye gbãgbiagbã.” Gake nukatae wòte gbe ɖe nuwɔwɔ kpata dzi nenema? Ðe ƒe alafa nanewo mava yi hafi Kristo nava xɔ Fiaɖuƒeŋusẽ oa? Ẽ, gake Mesia Fiaɖuƒea dzie Yehowa ato aʋli eƒe dziɖulanyenye ta eye wòana eƒe tameɖoɖo wɔnuku siwo ku ɖe anyigba la ŋu nava eme. Amesiame si kpɔ nusiawo ƒe vevienyenye dze sii la ada Fiaɖuƒea ɖe nɔƒe gbãtɔ le eƒe agbe me. Ne nenemae wònɔ le ƒe alafa gbãtɔ me la, ke aleke gbegbe wòle vevie wue nye si fifia si woɖo Kristo zi dzi wòzu Fia! Eyata nya si míabiae nye, Ðe alesi menɔa agbee fia be mele Mawu Fiaɖuƒea dim gbãgbiagbãa?—Mateo 6:33.
2. Nukawo yomee ame akpa gãtɔ tina vevie?
2 Egbea le xexeame godoo la, ame miliɔn geɖe le Fiaɖuƒea dim gbãgbiagbã vavã. Wotsɔ wo ɖokui ɖe adzɔgbe na Yehowa eye woɖenɛ fiana be yewole megbe na Fiaɖuƒedziɖuɖua esi wonaa eƒe lɔlɔ̃nu wɔwɔ xɔa nɔƒe vevitɔ le woƒe agbe me. Gake ameƒomea me tɔ akpa gãtɔ ya ƒe didi enye be woati ŋutilãmenuwo yome. Amewo tia ga kple nunɔamesiwo kpakple dzidzɔ siwo ga ate ŋu ana woakpɔ la yome. Alo wodagbana vevie be yewoakpɔ ŋgɔyiyi le yewoƒe dɔwɔɖuiwo me. Woƒe agbenɔnɔ ɖenɛ fiana be nusi ŋu wotsia dzi ɖoe nye woawo ŋutɔ wo ɖokui, ŋutilãmenuwo, kple vivisesewo. Wodaa Mawu ɖe nɔƒe evelia, ne woxɔ edzi see nye ma.—Mateo 6:31, 32.
3. (a) Kesinɔnu kawo ƒomevie Yesu de dzi ƒo na eƒe nusrɔ̃lawo be woadi, eye nukatae? (b) Nukatae mehiã be míatsi dzi fũ ɖe ŋutilãmenuwo ŋu o?
3 Gake Yesu xlɔ̃ nu eƒe nusrɔ̃lawo ya be: “Migadzra nu nyuiwo ɖo na mia ɖokui le anyigba dzi . . . o,” elabena kesinɔnu mawo dometɔ aɖeke menɔa anyi ɖaa o. Egblɔ be: “Ke boŋ midzra nu nyuiwo ɖo na mia ɖokui le dziƒo” to Yehowa subɔsubɔ me. Yesu de dzi ƒo na eyomedzelawo be woana woƒe ŋku dzi ‘nadza’ to alesi woazã woƒe susu kple ŋutetewo hena Mawu ƒe lɔlɔ̃nu wɔwɔ me. Egblɔ na wo be: “Miate ŋu asubɔ Mawu kple anyigba dzi nuwo o.” Ke ŋutilãmenuhiahiãwo—nuɖuɖu, nudodo, kple nɔƒe—hã ɖe? Yesu xlɔ̃ nu wo be: “Migatsi dzimaɖi . . . o.” Ehe woƒe susu yi xeviwo dzii—Mawu naa nuɖuɖu wo. Yesu de dzi ƒo na eyomedzelawo be woasrɔ̃ nu tso seƒoƒowo ŋu—Mawu ɖoa atsyɔ̃ na wo. Ðe amegbetɔ siwo nye Yehowa subɔla siwo nya nu mexɔ asi wu nusiawo dometɔ ɖesiaɖe oa? Yesu gblɔ be: “Midi mawufiaɖuƒe la kple eƒe dzɔdzɔenyenye gbãgbiagbã, eye woatsɔ nusiawo katã [siwo hiã] akpe ɖe eŋuti na mi.” (Mateo 6:19-34) Ðe wò nuwɔna ɖenɛ fiana be nèxɔ nya ma dzi sea?
Mègana Nuwo Navu Tsyɔ Fiaɖuƒe Nyateƒea Dzi O
4. Nukae ate ŋu anye emetsonu ne ame aɖe tsia dzi fũ akpa ɖe ŋutilãmenuwo ŋu?
4 Esɔ be woatsi dzi ɖe nusi asu hena ame ŋutɔ ƒe ŋutilãmenuhiahiãwo kpakple eƒe ƒomea me tɔwo dzi kpɔkpɔ ŋu. Gake afɔku ate ŋu anɔ eme be woatsi dzi fũ akpa ɖe ŋutilãmenuwo ŋu. Togbɔ be amea agblɔ be yexɔ Fiaɖuƒea dzi se hã la, ne le eƒe dzi me wòtsɔ nu bubuwo ɖo nɔƒe gbãtɔ la, nu mawo ava vu atsyɔ Fiaɖuƒenyateƒea dzi. (Mateo 13:18-22) Le kpɔɖeŋu me, ɖekakpui dziɖula kesinɔtɔ aɖe bia Yesu gbeɖeka be: “Nuka mawɔ, bena manyi agbe mavɔ la dome mahã?” Enɔa agbe nyui eye eƒe nuwɔna ɖe amewo ŋu hã nyo, gake eku ɖe ŋutilãmenunɔamesiwo ŋu akpa. Mate ŋu aɖe asi le wo ŋu ava zu Kristo yomedzela o. Eyata ena mɔnukpɔkpɔ si ate ŋu ana wòava nɔ dziƒo Fiaɖuƒea me kple Kristo la to eŋu. Yesu gblɔ ɣemaɣi be: “Aleke gbegbe wòsẽ na amesiwo si kesinɔnuwo le la, bena woayi ɖe mawufiaɖuƒe la mee!”—Marko 10:17-23.
5. (a) Nuka ƒe dzie Paulo de ƒo na Timoteo be wòana wòadze eŋu, eye nukatae? (b) Aleke Satana zãa “galɔlɔ̃” wònyea mɔ̃ si kplɔa ame yia tsɔtsrɔ̃ mee?
5 Ƒe aɖewo megbe la, apostolo Paulo ŋlɔ agbalẽ na Timoteo, amesi nɔ Efeso si nye du si me kesinɔnuwo bɔ ɖo fũ ɣemaɣi. Paulo ɖo ŋku edzi nɛ be: “Míetsɔ naneke va xexe sia me o, eye edze ƒã bena, míate ŋu atsɔ naneke ayii hã o; ke ne nunyiame kple avɔtata le mía si la, mina nusiawo nasɔ gbɔ na mí.” Esɔ be woawɔ dɔ akpɔ ame ŋutɔ kple eƒe ƒomea ƒe “nunyiame kple avɔtata.” Gake Paulo xlɔ̃ nu be: “Amesiwo dina be, yewoazu kesinɔtɔwo la, gena ɖe tetekpɔwo kple mɔ̃tetrewo kpakple movidzɔdzɔ kple nuveviwɔame ƒe nudzodzro geɖe, siwo tsɔa amewo xlãna ɖe gbegblẽ kple tsɔtsrɔ̃ me la me.” Ayetɔe Satana nye. Gbã la, atsɔ nu suesue aɖewo able ame nui. Emegbe la, atsɔ nyaƒoɖeamenu si nu sẽ wu akplɔe ɖoe, ɖewohĩ ate ŋu anye dodoɖeŋgɔ le dɔ me alo dɔ si nyo si ƒe fetu hã nyo wu gake wòaxɔ ɣeyiɣi si nèɖo ɖi tsã na gbɔgbɔmenuwo. Ne míele ŋudzɔ o la, “galɔlɔ̃” ate ŋu avu atsyɔ Fiaɖuƒea ƒe nu siwo le vevie wu la dzi. Ale Paulo gblɔe nye si: “Ame aɖewo di [galɔlɔ̃ yomemɔ], eye wotre mɔ tso xɔse la gbɔ, eye wotsɔ nuxaxa geɖe ŋɔ wo ɖokui flofloflo.”—Timoteo I, 6:7-10.
6. (a) Nukae wòle be míawɔ be ŋutilãmenudidi nagazu mɔ̃ aɖe mí o? (b) Kakaɖedzi kae ate ŋu anɔ mía si togbɔ be ganyawo le sesẽm le xexeame egbea hã?
6 Esi Paulo lɔ̃ nɔvia Kristotɔ Timoteo vavã ta la, exlɔ̃ nui be: “Si le nusiawo nu,” kple be “Ʋli xɔse ƒe ʋiʋli nyui la.” (Timoteo I, 6:11, 12) Ehiã agbagbadzedze vevie bene ŋutilãmenudidi ƒe nɔnɔme si le xexeme si ƒo xlã mí me la nagakplɔ mí atrae o. Gake ne míeʋli wɔ nusi wɔ ɖeka kple míaƒe xɔse la, Yehowa magblẽ mí ɖi akpɔ o. Togbɔ be nuwo ƒe asi le dzi yim eye dɔmakpɔwɔe bɔ hã la, akpɔ egbɔ be nusiwo hiã mí ŋutɔŋutɔ la su mía si. Paulo ŋlɔ be: “Mina miaƒe susu navo tso galɔlɔ̃ me, eye nusiwo le mia si la, nadze mia ŋu; elabena [Mawu] ŋutɔ gblɔ be: ‘Nyemele asi ɖe ge le mia ŋu o, eye nyemele mia gblẽ ge ɖi akpɔ o.’ Ale bena míatsɔ dzideƒo agblɔ be: ‘Yehowa ye nye nye kpeɖeŋutɔ, nyemavɔ̃ o; nuka amegbetɔ awɔm ma?’” (Hebritɔwo 13:5, 6) Fia Dawid hã ŋlɔ be: “Menɔ ɖevime tsã, eye azɔ metsi, ke nyemekpɔ be, wogblẽ ame dzɔdzɔe ɖi, eye viawo ɖo abologbe kpɔ o.”—Psalmo 37:25.
Nusrɔ̃la Gbãtɔwo Ðo Kpɔɖeŋu Ði
7. Gbeƒãɖeɖe ŋuti nufiame kawoe Yesu na eƒe nusrɔ̃lawo, eye nukatae nya siawo sɔ?
7 Esi Yesu na hehe si sɔ eƒe apostoloawo vɔ la, edɔ wo ɖa le Israel be woaɖe gbeƒã nyanyuia agblɔ be: “Dziƒofiaɖuƒe la ɖo vɔ!” Gbedasi ʋãme kae nye si! Mesia Fia, Yesu Kristo, nɔ wo dome. Esi apostoloawo tsɔ wo ɖokui ke hena Mawu ƒe subɔsubɔdɔa wɔwɔ ta la, Yesu de dzi ƒo na wo be woaka ɖe edzi be Mawu ana woƒe nuhiahiãwo wo. Eyata egblɔ be: “Migatsɔ naneke ɖe asi hena mɔzɔzɔ o, ati loo, alo kotoku alo abolo alo klosalo alo awu eve o. Eye aƒe, si ke me miage ɖo la, minɔ afima, eye miagadze mɔ tso afima.” (Mateo 10:5-10; Luka 9:1-6) Yehowa akpɔ egbɔ be wo nɔvi Israel-viwo, amesiwo wɔa amedzro ŋutɔ, nana woƒe nuhiahiãwo wo.
8. (a) Nukatae Yesu gblɔ gbeƒãɖeɖe ŋuti mɔfiame si to vovo na gbãtɔ ɣeyiɣi kpui aɖe do ŋgɔ na eƒe ku? (b) Nukae wòle be wòaganye nu gbãtɔ le Yesu yomedzelawo ƒe agbenɔnɔ me kokoko?
8 Emegbe, ɣeyiɣi kpui aɖe do ŋgɔ na Yesu ƒe ku la, ena eƒe apostoloawo nya be le ɣeyiɣi aɖe megbe la, woava nɔ dɔ wɔm le nɔnɔme siwo atrɔ me. Esi dziɖuɖua ava tsi tre ɖe woƒe dɔa ŋu ta la, magabɔ be woawɔ amedzro na wo le Israel o. Eye eteƒe madidi o woatsɔ Fiaɖuƒegbedasia ayi Trɔ̃subɔdukɔwo me tɔwo ƒe anyigba dzii. Ele be woatsɔ “gakotoku” ɖe asi tsɔ kpe ɖe “mɔzɔkotoku” ŋu azɔ. Ke hã la, ele be woayi edzi anɔ Yehowa ƒe Fiaɖuƒea kple Mawu ƒe dzɔdzɔenyenye didi dzi gbãgbiagbã, eye kakaɖedzi nanɔ wo si be ayra ɖe yewoƒe agbagbadzedzewo be yewoakpɔ nunyiame kple nudodo la dzi.—Luka 22:35-37.
9. Aleke Paulo da Fiaɖuƒea ɖe nɔƒe gbãtɔ le eƒe agbe mee esime wònɔ eƒe ŋutilãmenuhiahiãwo gbɔ kpɔm, eye nuxlɔ̃amenya kawoe wògblɔ le nya sia ŋu?
9 Apostolo Paulo nye amesiwo wɔ ɖe Yesu ƒe nuxlɔ̃amea dzi ƒe kpɔɖeŋu nyui aɖe. Paulo tu eƒe agbenɔnɔ katã ɖe subɔsubɔdɔa dzi. (Dɔwɔwɔwo 20:24, 25) Ne eyi gbeƒãɖeƒe le nuto aɖe me la, ekpɔa eya ŋutɔ ƒe ŋutilãmenuhiahiãwo gbɔ, ewɔa avɔgbadɔ gɔ̃ hã tsɔ kpɔa eɖokui dzii. Mekpɔa mɔ be amewo akpɔ ye dzi o. (Dɔwɔwɔwo 18:1-4; Tesalonikatɔwo I, 2:9) Ke hã etsɔa ŋudzedzekpɔkpɔ xɔnɛ ne wowɔ amedzro nɛ alo wona nui tsɔ ɖe woƒe lɔlɔ̃ fia. (Dɔwɔwɔwo 16:15, 34; Filipitɔwo 4:15-17) Paulo de dzi ƒo na Kristotɔwo be womegagblẽ woƒe ƒomegbanɔamedziwo ɖi ɖe gbeƒãɖeɖe ta o, ke boŋ woada asɔ le woƒe agbanɔamedzi vovovoawo tsɔtsɔ me. Exlɔ̃ nu wo be woawɔ dɔ, woalɔ̃ woƒe ƒomewo, eye woana nu amewo. (Efesotɔwo 4:28; Tesalonikatɔwo II, 3:7-12) Ede dzi ƒo na wo be woana woƒe kakaɖedzi nanɔ Mawu me, menye ŋutilãmenunɔamesiwo me o, eye woanɔ agbe le mɔ si aɖee afia be wose nusiwo le vevie wu la gɔme vavã. Le ɖekawɔwɔ me kple Yesu ƒe nufiafiawo la, efia be woadi Mawu Fiaɖuƒea kple eƒe dzɔdzɔenyenye gbãgbiagbã.—Filipitɔwo 1:9-11.
Nɔ Fiaɖuƒea Didi Dzi Gbãgbiagbã le Wò Agbenɔnɔ Me
10. Nukae wòfia be woadi Fiaɖuƒea gbãgbiagbã?
10 Afikae mía dometɔ ɖesiaɖe míegblɔa Fiaɖuƒenyanyuia na amewo sena ɖo? Eƒe akpa aɖe nɔ te ɖe nɔnɔme si me míele kple míaƒe ŋudzedzekpɔkpɔ ƒe todede dzi. Nenɔ susu me na wò be Yesu megblɔ be, ‘Midi Fiaɖuƒea ne naneke megale mia si miawɔ o.’ Esi wònya alesi gbegbe Fiaɖuƒea le vevie ta la, egblɔ nusi nye Fofoa ƒe lɔlɔ̃nu be: “Minɔ eƒe Fiaɖuƒea didi dzi ɣesiaɣi.” (Luka 12:31, NW) Togbɔ be ehiã be mía dometɔ akpa gãtɔ míawɔ dɔ atsɔ akpɔ mía ŋutɔwo kple míaƒe ƒomewo ƒe nuhiahiãwo gbɔ hã la, ne xɔse le mía si la, Fiaɖuƒedɔ si Mawu de asi na mí ye axɔ nɔƒe gbãtɔ le míaƒe agbe me hafi nu bubuwo nakplɔe ɖo. Le ɣeyiɣi ma ke me la, míakpɔ míaƒe ƒomegbanɔamedziwo hã gbɔ.—Timoteo I, 5:8.
11. (a) Aleke Yesu ɖee fiae be menye amesiamee ate ŋu awɔ dɔ agbɔsɔsɔme ɖeka le Fiaɖuƒegbedasia gbɔgblɔ me o? (b) Nɔnɔme kawo dzie dɔ agbɔsɔsɔme si ame aɖe ate ŋu awɔ nɔ te ɖo?
11 Mía dometɔ aɖewo míete ŋu zãa ɣeyiɣi geɖe ɖe gbeƒãɖeɖe Fiaɖuƒenyanyuia ŋu wu ame bubuwo. Gake le Yesu ƒe lododo aɖe si ku ɖe anyigba ƒomevi vovovowo ŋu me la, eɖee fia be amesiwo katã ƒe dzi le abe anyigba nyui ene la atse ku. Agbɔsɔsɔme kae woatse? Ameawo ƒe nɔnɔmewo menye ɖeka o. Wole nɔnɔme vovovowo me le tsitsi, lãmesẽ, ƒomegbanɔamedziwo, kple nu bubuwo me. Gake ne ŋudzedzekpɔkpɔ vavã le mía me la, míate ŋu awɔ nu geɖe.—Mateo 13:23.
12. Gbɔgbɔmetaɖodzinu nyui ka ŋue wode dzi ƒo na sɔhɛwo koŋ be woabu?
12 Nunya le eme be míaɖo taɖodzinu siwo akpe ɖe mía ŋu be míakeke míaƒe gomekpɔkpɔ le Fiaɖuƒesubɔsubɔdɔa me ɖe enu. Ele be sɔhɛwo nabu kpɔɖeŋu nyui si Kristotɔ ɖekakpui veviedonula si nye Timoteo ɖo la ŋu vevie. (Filipitɔwo 2:19-22) Nukae agate ŋu anyo na wo wu be woaƒo wo ɖokui ɖe ɣeyiɣiawo katã ƒe subɔsubɔdɔa me ne wowu suku nu? Aɖe vi na ame tsitsiwo hã ne woɖo gbɔgbɔmetaɖodzinu nyuiwo na wo ɖokui.
13. (a) Amekae atso nya me le nusi míate ŋu awɔ le Fiaɖuƒesubɔsubɔdɔa me ŋu? (b) Ne míedia Fiaɖuƒea gbãgbiagbã vavã la, nuka dzie míele kpe ɖomee?
13 Le esi míanɔ ɖeklemi ɖem amesiwo míesusu be ele be woate ŋu awɔ geɖe teƒe la, ele be xɔse naʋã mí míadze agbagba be nusi míewɔna la míagawɔe memie wu ale be míate ŋu asubɔ Mawu bliboe le alesi mía ŋutɔwo míaƒe nɔnɔmewo aɖe mɔe nu. (Romatɔwo 14:10-12; Galatiatɔwo 6:4, 5) Abe alesi wòdze le Hiob ƒe nya la mee ene la, Satana ʋlia nya be nusi ŋu koŋ míetsia dzi ɖoe nye míaƒe ŋutilãmenunɔamesiwo, mía ŋutɔwo míaƒe dzidzeme, kple mía ŋutɔwo míaƒe nudzedziname eye be ɖokuitɔdidi tae míesubɔa Mawu ɖo. Gake ne le nyateƒe me, míedia Fiaɖuƒea gbãgbiagbã la, ekema míele gome kpɔm le kpeɖoɖo edzi be aʋatsokafofo ŋutɔŋutɔe Abosam nye me. Eye míegale kpe ɖom edzi be Mawu subɔsubɔe nye nu gbãtɔ na mí le agbe me. Míato esia wɔwɔ me aɖe alesi gbegbe míaƒe lɔlɔ̃ na Yehowa de toe, alesi míele eƒe dziɖulanyenye si ƒo ɖesiaɖe ta ƒe akpa dzi nuteƒewɔwɔtɔe, kple alesi gbegbe míelɔ̃ mía havi amegbetɔwoe afia le míaƒe nuwɔna kple nyagbɔgblɔ siaa me.—Hiob 1:9-11; 2:4, 5; Lododowo 27:11.
14. (a) Nukatae wònyo be míawɔ ɖoɖo ɖe gbeadzisubɔsubɔdɔa wɔwɔ ŋu? (b) Afikae Ðasefo geɖe le gome kpɔm le gbeadzisubɔsubɔdɔa me se ɖo?
14 Ðoɖowɔɖi ƒe amesinɔnɔ ate ŋu akpe ɖe mía ŋu míawɔ dɔ geɖe wu alesi wòanɔ ne ɖoɖowɔɖi mele mía si o. ‘Ɣeyiɣi ɖoɖi’ le Yehowa ŋutɔ si hena eƒe tameɖoɖo dzi wɔwɔ. (Mose II, 9:5; Marko 1:15) Ne anya wɔ la, anyo be míakpɔ gome le gbeadzisubɔsubɔdɔa me le ɣeyiɣi ɖoɖi aɖe dzi zi ɖeka alo wu nenema kwasiɖa sia kwasiɖa. Yehowa Ðasefo akpe alafa geɖe le xexeame godoo nye kpekpeɖeŋu mɔɖela siwo zãa abe gaƒoƒo eve ene gbesiagbe tsɔ ɖea gbeƒã nyanyuiae. Wo dometɔ bubu akpe alafa geɖe nye gbesiagbe mɔɖelawo, amesiwo zãa abe gaƒoƒo eve kple afã ene gbesiagbe tsɔ ɖea gbeƒã Fiaɖuƒegbedasia. Mɔɖela veviwo kple dutanyanyuigblɔlawo zãa ɣeyiɣi si gasɔ gbɔ wu kura le Fiaɖuƒesubɔsubɔdɔa me. Míawo hã míate ŋu adi mɔnukpɔkpɔwo agblɔ Fiaɖuƒemɔkpɔkpɔa le vome na amesiame si adi be yeasee. (Yohanes 4:7-15) Ele be wòanye míaƒe didi be míakpɔ gome le dɔ ma wɔwɔ me bliboe alesi míaƒe nɔnɔmewo aɖe mɔe, elabena Yesu gblɔ ɖi be: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.”—Mateo 24:14; Efesotɔwo 5:15-17.
15. Nukatae nèsusu be nuxlɔ̃ame si le Korintotɔwo I, 15:58 sɔ ɖe ɣeyiɣia dzi na mí le míaƒe subɔsubɔdɔa gome?
15 Yehowa Ðasefowo katã tsɔ ɖekawɔwɔ le gome kpɔm le subɔsubɔ mɔnukpɔkpɔ sia me le xexeame katã, eɖanye dukɔ ka mee wole o. Wowɔna ɖe Biblia ƒe nuxlɔ̃ame sia si tso gbɔgbɔ me dzi, esi nye: “Minɔ te sesĩe, maʋãmaʋã, eye migba go ɖaasi le Aƒetɔ la ƒe dɔwɔwɔ me, esi mienyae bena, miaƒe agbagbadzedze menye dzodzro le Aƒetɔ la me o ŋuti la.”—Korintotɔwo I, 15:58.
Numetoto
• Esi Yesu gblɔ be ‘míayi edzi anɔ Fiaɖuƒea dim gbãgbiagbã’ la, nukae wòfia be ele be míada ɖe nɔƒe evelia?
• Nukae wòle be wòanye míaƒe nukpɔsusu le mía ŋutɔwo kple míaƒe ƒomeawo ƒe ŋutilãmenuhiahiãwo gbɔ kpɔkpɔ ŋu? Kpekpeɖeŋu kae Mawu ana mí?
• Fiaɖuƒesubɔsubɔdɔa ƒe akpa kawo mee míate ŋu akpɔ gome le?
[Nɔnɔmetata si le axa 107]
Yehowa Ðasefowo le gbeƒã ɖem nyanyuia le dukɔ ɖesiaɖe me, hafi nuwuwua nava