Ale Si Míaɖee Afia Be Míenye Xexea Ƒe Akpa Aɖeke O

 1. Nu ka dzie Yesu te gbe ɖo le zã si do ŋgɔ na eƒe ku me?

LE Zà si do ŋgɔ na Yesu ƒe ku me la, eɖe ale si wòtsi dzi ɖe eyomedzelawo ƒe dedienɔnɔ le eƒe dzodzo megbe ŋui la gblɔ. Edo gbe ɖa tso nya sia ŋu gɔ̃ hã hegblɔ na Fofoa be: “Nyemele biabiam be nàɖe wo ɖa le xexea me o, ke boŋ be nàkpɔ wo ta le vɔ̃ɖitɔ la ta. Womenye xexea ƒe akpa aɖeke o, abe ale si ko nyemenye xexea ƒe akpa aɖeke o ene.” (Yohanes 17:15, 16) Gbe sia si Yesu do ɖa tso dzi me la ɖe lɔlɔ̃ deto si le esi na eyomedzelawo la fia, eye wòganye gbe tete ɖe nya si wògblɔ na wo dometɔ aɖewo do ŋgɔ le zã ma ke me la ƒe vevienyenye dzi be: “Mienye xexea ƒe akpa aɖeke o.” (Yohanes 15:19) Eme kɔ ƒãa be ale si Yesu yomedzelawo manye xexea ƒe akpa aɖeke o nɔ vevie na Yesu ŋutɔ!

 2. Nu kae nye “xexea” si ŋu Yesu ƒo nu tsoe?

² Nu si Yesu yɔ be “xexea” ye nye ameƒomea me tɔ siwo te wo ɖokui ɖe aga tso Mawu gbɔ, siwo le Satana ƒe ŋusẽ te eye wozu kluvi na eƒe ɖokuitɔdidi kple dada gbɔgbɔ la. (Yohanes 14:30; Efesotɔwo 2:2; 1 Yohanes 5:19) Le nyateƒe me la, “xɔlɔ̃dzedze [xexe ma] nye futɔnyenye na Mawu.” (Yakobo 4:4) Ke aleke ame siwo katã di be yewoayi edzi anɔ Mawu ƒe lɔlɔ̃ la me la anɔ xexea me, evɔ womanye eƒe akpa aɖeke o? Míadzro mɔ atɔ̃ aɖewo siwo nu míate ŋu awɔ esia le la me: ale si míanɔ Mawu Fiaɖuƒe si ƒe fia Kristo nye ƒe akpa dzi nuteƒewɔwɔtɔe ahaƒo asa na nudede dunyahehe me, ale si míatsi tre ɖe xexea ƒe gbɔgbɔ ŋu, ale si míada asɔ le awudodo kple dzadzraɖo me, ale si míanɔ agbe tsɛ, kple ale si míakpla míaƒe gbɔgbɔmeʋawɔnu blibo lae.

 3. (a) Nu ka tae Yesu mede nu dunyahehe me esi wònɔ anyigba dzi o? (b) Gɔmesese ka nue Yesu yomedzela amesiaminawo nye dukɔteƒenɔlawo le? (Kpɔ etenuŋɔŋlɔa hã.)

³ Yesu meƒo eɖokui ɖe eƒe ɣeyiɣia me dunyahehe me o, ke boŋ eƒe ŋku biã ɖe gbeƒãɖeɖe Mawu Fiaɖuƒea, si nye dziƒodziɖuɖu si ƒe fia wònya nyuie be yeava zu la ŋu vevie. (Daniel 7:13, 14; Luka 4:43; 17:20, 21) Eya ta Yesu te ŋu gblɔ le Roma Mɔmefia Pontio Pilato ŋkume be: “Nye Fiaɖuƒe menye xexe sia ƒe akpa aɖeke o.” (Yohanes 18:36) Le Kristo sɔsrɔ̃ me la, eyomedzela wɔnuteƒewo nɔa eya kple eƒe Fiaɖuƒea ƒe akpa dzi heɖea gbeƒã tso Fiaɖuƒe ma ŋu na xexea. (Mateo 24:14) Apostolo Paulo gblɔ be: “Míenye amedɔdɔwo le Kristo teƒe . . . Abe Kristo teƒenɔlawo ene la, míeɖea kuku be: ‘Mina woadzra mia kple Mawu dome ɖo.’”a—2 Korintotɔwo 5:20.

 4. Aleke Kristotɔ vavãwo katã ɖenɛ fiana be yewole Mawu Fiaɖuƒea ƒe akpa dzi? (Kpɔ aɖaka si nye “Kristotɔ Gbãtɔwo Mede Nu Dunyahehe Me O.”)

⁴ Dukɔteƒenɔlawo medea nu dukɔ si me wole dɔ wɔm le la ƒe dunyahenyawo me o. Ke boŋ wo dedukɔ si teƒe wole la ƒe dziɖuɖu ŋue woƒoa nu tsoe. Nenemae wòle le Kristo yomedzela amesiamina siwo ƒe “dumevinyenye le dziƒo” hã gome. (Filipitɔwo 3:20) To gbeƒãɖeɖe Fiaɖuƒea veviedodotɔe dzi la, wole kpekpem ɖe Kristo ƒe ‘alẽ bubu’ miliɔn geɖewo ŋu be ‘woadzra woa kple Mawu dome ɖo.’ (Yohanes 10:16; Mateo 25:31-40) Alẽ bubu siawo kpea asi ɖe Yesu nɔvi amesiaminaawo ŋu le dɔ sia wɔwɔ me. Esi hatsotso evea va zu alẽha ɖeka si le Mesia Fiaɖuƒea ƒe akpa dzi ta la, womedea nu dunyahehe me o.—Xlẽ Yesaya 2:2-4.

 5. Aleke Kristo hamea to vovo tso blema Israel dukɔa gbɔe, eye aleke vovototo sia dzena le Kristotɔwo ŋui?

⁵ Menye nuteƒewɔwɔ na Kristo ta koe Kristotɔwo medea nu dunyahehe me o. To vovo na blema Israel si Mawu ŋutɔ tia teƒe aɖe koŋ na be woanɔ la, míawo ya míenye xexea me katã ƒe nɔviwo ƒe habɔbɔ me tɔwo. (Mateo 28:19; 1 Petro 2:9) Eya ta ne míeva ma ɖe dukɔ si me míele ƒe dunyaheha vovovowo ƒe akpa dzi la, míagate ŋu atsɔ dzinɔameƒo aɖe gbeƒã Fiaɖuƒegbedeasia o, eye míaƒe Kristotɔwo ƒe ɖekawɔwɔa hã me agblẽ. (1 Korintotɔwo 1:10) Azɔ hã, ema awɔe be ne aʋa dzɔ la, míava tsɔ lãnu ɖe míaƒe haxɔsetɔwo ŋu, evɔ wode se na mí be míalɔ̃ mía nɔewo. (Yohanes 13:34, 35; 1 Yohanes 3:10-12) Eya ta esɔ be Yesu gblɔ na eƒe nusrɔ̃lawo be woagakpɔ gome le aʋawɔwɔ me o. Egblɔ na wo be woalɔ̃ woƒe futɔwo gɔ̃ hã.—Mateo 5:44; 26:52; kpɔ aɖaka si nye “Ðe Meƒoa Asa Na Nudede Dunyahehe Mea?

 6. Aleke wò adzɔgbeɖeɖe na Mawu akpɔ ŋusẽ ɖe nu siwo nàtsɔ ana Kaisaro dzii?

⁶ Mawue mí Kristotɔ vavãwo míeɖe adzɔgbe na, ke menye na amegbetɔ, habɔbɔ, alo dukɔ aɖeke o. Wogblɔ le 1 Korintotɔwo 6:19, 20 be: “Mienye mia ɖokui tɔ hã o, elabena ho gã aɖee wotsɔ ƒle mi.” Eya ta togbɔ be Yesu yomedzelawo tsɔa bubu, toɖoɖo, kple adzɔ si “Kaisaro” dze na la nanae hã la, wotsɔa ‘nu siwo nye Mawu tɔ la naa Mawu.’ (Marko 12:17; Romatɔwo 13:1-7) Nu siawo dometɔ aɖewoe nye tadedeagu, lɔlɔ̃ si tso dzi blibo me, kple toɖoɖo nuteƒewɔwɔtɔe. Ne ehiã la, wolɔ̃na faa be yewoaku le Mawu ƒe lɔlɔ̃nu wɔwɔ ta.—Luka 4:8; 10:27; xlẽ Dɔwɔwɔwo 5:29; Romatɔwo 14:8.

7, 8. Nu kae nye “xexea ƒe gbɔgbɔ,” eye aleke gbɔgbɔ ma le “dɔ wɔm” le tosẽlawo mee?

⁷ Mɔ bubu si nu Kristotɔwo ɖenɛ fiana le be yewomenye xexe sia ƒe akpa aɖeke o ye nye be, wotsia tsitre ɖe eƒe gbɔgbɔ si kpɔa ŋusẽ vɔ̃ɖi ɖe ame dzi la ŋu. Paulo gblɔ be: “Menye xexea ƒe gbɔgbɔe míexɔ o, ke boŋ gbɔgbɔ si tso Mawu gbɔ lae míexɔ.” (1 Korintotɔwo 2:12) Egblɔ na Efesotɔwo be: “Miezɔna . . . tsã le xexe sia ƒe nuɖoanyi la nu, le yameŋusẽ ƒe fia, si nye gbɔgbɔ si le dɔ wɔm le vi sẽtowo me fifia la, ƒe lɔlɔ̃nu nu.”—Efesotɔwo 2:2, 3.

⁸ Xexe sia ƒe ya, alo eƒe “gbɔgbɔ,” nye ŋusẽ makpɔmakpɔ si ƒonɛ ɖe ame nu be wòagbe toɖoɖo Mawu ahati “ŋutilã ƒe nudzodzro kple ŋkuwo ƒe nudzodzro” yome. (1 Yohanes 2:16; 1 Timoteo 6:9, 10) ‘Ŋusẽ’ si le xexea ƒe gbɔgbɔ si medzena gaglã o, si ƒoa nya ɖe ame nu, eye wòxɔ aƒe ɖe afi sia afi abe ya ene, la sie nye ale si wòblea ame nu be wòaɖi kɔ na ŋutilã madebliboa ƒe nudzodzrowo. Tsɔ kpe ɖe eŋu la, ele “dɔ wɔm” le tosẽlawo me le mɔ sia nu be, enana nɔnɔme siwo mewɔ ɖeka kple Mawu ƒe nudidiwo o la nyɔna ɖe wo me vivivi, abe ɖokuitɔdidi, ɖokuidodoɖedzi, ŋukeklẽ, kpakple ɖokuisinɔnɔ kple aglãdzedze ƒe gbɔgbɔ ene.b Ne míagblɔe kpuie la, xexea ƒe gbɔgbɔ ƒãa Abosam ƒe nɔnɔmewo ɖe amewo ƒe dzi me vivivi.—Yohanes 8:44; Dɔwɔwɔwo 13:10; 1 Yohanes 3:8, 10.

 9. Mɔ kawo nue xexea ƒe gbɔgbɔ ate ŋu age ɖe mewò le?

⁹ Ðe xexea ƒe gbɔgbɔ ate ŋu akpɔ ŋusẽ ɖe wò susu kple dzi dzia? Ɛ̃, ate ŋui, gake ne mèle ŋudzɔ o, eye nèɖe mɔ le ɖokuiwò ŋu ko hafi. (Xlẽ Lododowo 4:23.) Eƒe ŋusẽkpɔɖeamedzia dzea egɔme le mɔ si medzena gaglã o nu; ɖewohĩ to hadede kple ame siwo adze ame nyuiwoe, gake le nyateƒe me la, womenye ame siwo lɔ̃ Yehowa o dzi. (Lododowo 13:20; 1 Korintotɔwo 15:33) Gbɔgbɔ manyomanyo sia ate ŋu age ɖe mewò hã ne èxlẽa agbalẽ siwo mesɔ o, ne èkea ŋku ɖe Internet dzi nyatakakadzraɖoƒe siwo amamaɖeɖenuwɔnawo alo xɔsegbelawo ƒe nufiafiawo nɔna dzi, alo ne èkpɔa gome le modzakaɖeɖe gbegblẽwo kple kamedefefe siwo me woʋlia ho le vevie me—ɛ̃, ate ŋu age ɖe mewò to ame sia ame alo nu sia nu si ɖea Satana kple eƒe nuɖoanyia ƒe nuŋububu fiana dzi.

10. Aleke míawɔ atsi tsitre ɖe xexea ƒe gbɔgbɔ ŋu?

¹⁰ Aleke míawɔ atsi tsitre ɖe xexea ƒe gbɔgbɔ gblẽnu sia si menya kpɔna dzea sii bɔbɔe o ŋu ale be míayi edzi anɔ Mawu ƒe lɔlɔ̃ la me? Eya koe nye be míawɔ ɖoɖo siwo katã Yehowa wɔ na mí be woakpe ɖe mía ŋu le esubɔsubɔ me la dzi nyuie ahanɔ gbe dom ɖa edziedzi be wòana gbɔgbɔ kɔkɔea mí. Yehowa tri akɔ wu Abosam kple xexe vɔ̃ɖi sia si le eƒe kpɔkplɔ te la sãsãsã. (1 Yohanes 4:4) Eya ta aleke gbegbe wòle vevie be míato gbedodoɖa dzi anɔ Yehowa ŋu kplikplikplii ye nye esi!

11. Aleke xexea ƒe gbɔgbɔ dzena le ale si amewo doa awui me?

¹¹ Gbɔgbɔ si le ŋusẽ kpɔm ɖe ame dzi la dzena le ame ƒe awudodo, eƒe dzadzraɖo, kple ale si wòbua dzadzɛnyenyee me. Awudodo ɖe nɔnɔme nyui me yi to le dukɔ geɖe me ale gbegbe be television dɔwɔla aɖe gblɔ be eteƒe madidi o, asesẽ ŋutɔ hafi nàkpɔ vovototo si le gbolowo kple ame siwo menye gbolowo o dome. Nɔnɔme sia va le ŋusẽ kpɔm ɖe nyɔnuvi siwo meɖo woƒe ƒewuiwo me haɖe o gɔ̃ hã dzi. Abe ale si nyadzɔdzɔgbalẽ aɖe gblɔe ene la, “wodoa awu siwo nana ametia ƒe akpa geɖe nɔa dzedzem, siwo meɖea ŋuɖɔɖo aɖeke kura fiana o.” Nɔnɔme bubu hãe nye awudodo ɖewoɖewoe, si ɖea aglãdzedze ƒe gbɔgbɔ, ameŋumabumabu, kple bubumademade ame ɖokui ŋu fiana.

12, 13. Gɔmeɖose kawoe wòle be wòakpɔ ŋusẽ ɖe míaƒe awudodo kple dzadzraɖo dzi?

¹² Esi míenye Yehowa subɔlawo ta la, esɔ be míadi be míadzra ɖo nyuie, si fia be míado awu siwo le dzadzɛ, siwo metɔa ŋku o, eye wosɔ ɖe ɣeyiɣi si me míedoe nu. Ele be míaƒe dzedzeme naɖe “ŋukpekpe” alo ‘ameŋububu,’ kple “ŋuɖɔɖo” afia, eye esia dze ame siwo katã “vɔ̃a Mawu”—ŋutsuwo kple nyɔnuwo siaa—ne wotsɔ “dɔ nyuiwo wɔwɔ” kpe ɖe eŋu. Susu si koŋ ta míewɔa esia ɖoe nye be míedi be “[míanɔ] Mawu ƒe lɔlɔ̃ la me ɖaa,” ke menye be míahe amewo ƒe susu ava mía ɖokui dzi o. (1 Timoteo 2:9, 10; Yuda 21) Ɛ̃, míedi be míaƒe atsyɔ̃ɖoɖo nanye “dzi me ƒe ame ɣaɣla . . . , si xɔ asi ŋutɔ le Mawu ŋkume.”—1 Petro 3:3, 4.

¹³ Nenɔ susu me na wò hã be míaƒe awudodo kple dzadzraɖo ate ŋu akpɔ ŋusẽ ɖe ale si amewo abu tadedeagu vavãtɔae dzi. Ne wozã Helagbe me nya ‘ameŋububu’ le nuƒoƒo tso agbe nyui nɔnɔ ŋu me la, nu si wòfianae nye sisiɖa kple bubudede ame bubuwo ƒe seselelãme kple nukpɔsusu ŋu. Eya ta ele be míaƒe taɖodzinu nanye be míabu amewo ƒe dzitsinya ŋu le nu siwo míesusu be míekpɔ mɔ awɔ gɔ̃ hã me. Ƒo wo katã ta la, míedi be míawɔ nu wòanye bubu na Yehowa kple eƒe amewo eye míaɖee afia be míenye Mawu subɔla siwo wɔa “nuwo katã hena Mawu ƒe kafukafu.”—1 Korintotɔwo 4:9; 10:31; 2 Korintotɔwo 6:3, 4; 7:1.

14. Nya kawoe wòle be míabia mía ɖokui ku ɖe míaƒe dzedzeme kple dzadzɛnyenye ŋu?

¹⁴ Ehiã vevie be míalé ŋku ɖe míaƒe awudodo, dzadzraɖo, kple dzadzɛnyenye ŋu geɖe wu ne míeyina gbeadzi alo Kristotɔwo ƒe kpekpewo. Bia ɖokuiwò be: ‘Ðe nye dzedzeme kple ŋutilãmedzadzɛnyenye hea amewo ƒe susu madzemadzeea? Ðe wòɖea fu na ame bubuwoa? Ðe medina be mawɔ nu si dzrom le go siawo me tsɔ wu be mawɔ nu si ana madze na subɔsubɔmɔnukpɔkpɔwo xɔxɔ le hamea mea?’—Psalmo 68:6; Filipitɔwo 4:5; 1 Petro 5:6.

15. Nu ka tae Mawu ƒe Nya la mede se gbogbo aɖewo na mí ku ɖe awudodo, dzadzraɖo, kple dzadzɛnyenye ŋu o?

¹⁵ Biblia mede se gbogbo aɖewo na Kristotɔwo ku ɖe awudodo, dzadzraɖo, kple dzadzɛnyenye ŋu o. Yehowa medi kura be yeazi mía dzi ne míagawɔ míaƒe tiatiawɔblɔɖe kple nuŋububu ŋutetewo ŋu dɔ o. Ke boŋ edi be míazu ame siwo tsi le susu me, siwo anya ale si woatsɔ Biblia ƒe gɔmeɖosewo awɔ dɔe, kple ame siwo “na hehe woƒe nugɔmeseseŋutetewo to wo zazã me, be woate ŋu ade vovo nyui kple vɔ̃ dome.” (Hebritɔwo 5:14) Ƒo wo katã ta la, edi be lɔlɔ̃ na Mawu kple mía havi naʋã mí le nu sia nu wɔwɔ me. (Xlẽ Marko 12:30, 31.) Togbɔ be ele alea hã la, míate ŋu akpɔ awudodo kple dzadzraɖo ƒe atsyã nyui vovovo geɖewo. Eƒe kpeɖodzie nye awu ƒe atsyã nyui vovovo siwo Yehowa ƒe amewo dona ne wokpe dzidzɔtɔe, eɖanye dukɔ ka mee wole o.

16. Nu ka tae míate ŋu agblɔ be xexea ƒe gbɔgbɔ mewɔ ɖeka kple Yesu ƒe nufiafiawo o, eye nya kawoe wòle be míabia mía ɖokui?

¹⁶ Xexea ƒe gbɔgbɔ blea ame miliɔn geɖewo nu wosusuna be ga kple nunɔamesiwoe ana yewoakpɔ dzidzɔ. Gake Yesu gblɔ be: “Ne nu gbogbo aɖewo le ame si hã la, nu siawo mana agbee o.” (Luka 12:15) Togbɔ be Yesu mede nuteameɖokuigbenɔnɔ ƒe dzi ƒo o hã la, efia nu be ame siwo kpɔa dzidzɔ vavãtɔe nye ame siwo “nyae be gbɔgbɔmenuwo hiã yewo” eye wonɔa agbe tsɛ ale be woate ŋu alé fɔ ɖe gbɔgbɔmenuwo ŋu. (Mateo 5:3; 6:22) Bia ɖokuiwò be: ‘Ðe mexɔ nu si Yesu fia la dzi se vavã loo alo ɖe mena “aʋatsokafofo” la le ŋusẽ kpɔm ɖe dzinyea? (Yohanes 8:44) Nu kae nye nuƒoƒo, taɖodzinuwo, didiwo, kple ale si menɔa agbee ɖena fiana le nya sia ŋu?’—Luka 6:45; 21:34-36; 2 Yohanes 6.

17. Gblɔ viɖe siwo ame siwo nɔa agbe tsɛ kpɔna la dometɔ aɖewo.

¹⁷ Yesu gblɔ be: “Nunya ƒe dɔwɔwɔwo tsoa afia dzɔdzɔe nɛ.” (Mateo 11:19) Wò ya bu viɖe siwo gbegbe ame siwo nɔa agbe tsɛ kpɔna la dometɔ aɖewo ŋu kpɔ. Wokpɔa dzidzeme vavãtɔ le Fiaɖuƒedɔa wɔwɔ me. (Mateo 11:29, 30) Wometsia dzimaɖi yakatsyɔ o, si wɔe be woƒe susu dzea akɔ anyi eye wokpɔa gbɔdzɔe. (Xlẽ 1 Timoteo 6:9, 10.) Esi agbemenuhiahiã vevi siwo sua wo si la dzea wo ŋu ta la, wote ŋu kpɔa vovo ɖe woƒe ƒomea kple wo nɔvi Kristotɔwo ŋu. Ete ŋu wɔnɛ hã be wodɔa alɔ̃ wòvivia wo nu. (Nyagblɔla 5:12) Wokpɔa dzidzɔ geɖe si dona tso nunana me le esi wonaa nu le mɔ vovovo siwo woate ŋui nu ta. (Dɔwɔwɔwo 20:35) ‘Mɔkpɔkpɔ sɔa gbɔ ɖe edzi’ na wo, eye wokpɔa ŋutifafa kple dzidzeme geɖe. (Romatɔwo 15:13; Mateo 6:31, 32) Yayra gã kawo gbegbee nye esi!

18. Nya kawoe Biblia gblɔ tso míaƒe futɔ la, eƒe amedzidzedze mɔnuwo, kple aʋa si ƒomevi wɔm míele ŋu?

¹⁸ Ame siwo nɔa Mawu ƒe lɔlɔ̃ la me la kpɔa gbɔgbɔmetakpɔkpɔ tso Satana, si di be yeagblẽ Kristotɔwo ƒe dzidzɔ me ahana agbe mavɔ nato wo ŋu la si me. (1 Petro 5:8) Paulo gblɔ be: “Míele kame tem, menye kple ʋu kpakple ŋutilã o, ke boŋ mía kple dziɖuɖuwo, ŋusẽwo, xexe doviviti sia me dziɖulawo kple gbɔgbɔmeŋusẽ vɔ̃ɖi siwo le dziƒonutowo me lae le kame tem.” (Efesotɔwo 6:12) Nyagbɔgblɔ si nye “míele kame tem” mefia be woanɔ adzɔge anɔ aʋa wɔm kple ame nɔewo—be ame aɖe nabe ɖe teƒe aɖe anɔ nu dam nɔvia—o, ke boŋ enye avuwɔwɔ ŋkume kple ŋkume. Tsɔ kpe ɖe eŋu la, nya siwo nye “dziɖuɖuwo,” “ŋusẽwo,” kple xexea me “dziɖulawo” ɖee fia be míaƒe futɔa wɔ ɖoɖo aɖewo koŋ ɖe mía dzi dzedze ŋu le gbɔgbɔmeʋa sia me.

19. Ƒo nu tso Kristotɔwo ƒe gbɔgbɔmeʋawɔnu la ŋu.

¹⁹ Togbɔ be míenye amegbetɔ siwo ŋu ŋusẽ boo aɖeke mele o hã la, míate ŋu aɖu dzi le aʋa sia me. Aleke wòanya awɔe? Eyae nye be míado “aʋawɔnu blibo si tso Mawu gbɔ la.” (Efesotɔwo 6:13) Efesotɔwo 6:14-18 ɖɔ aʋawɔnu sia ale: “Minɔ tsitre sesĩe, eye mitsɔ nyateƒe ƒe alidziblanu la bla miaƒe aliwo dzi, eye mido dzɔdzɔenyenye ƒe akɔtakpoxɔnu la, eye mitsɔ dzadzraɖo ɖe ŋutifafa nya nyuia gbɔgblɔ ŋu do ɖe miaƒe afɔwo. Gawu la, milé xɔse ƒe akpoxɔnu gã, si miatsɔ atsi vɔ̃ɖitɔ la ƒe aŋutrɔ bibiawo katã nu la ɖe asi. Miɖɔ xɔxɔ [alo mɔkpɔkpɔ] ƒe gakuku la, eye mitsɔ gbɔgbɔ la ƒe yi, si nye Mawu ƒe nya la, ɖe asi, eye minɔ gbedodoɖa ɖe sia ɖe ƒomevi kple kokoƒoƒo dzi ɣeawokatãɣi le gbɔgbɔ me.”

20. Aleke aʋa si wɔm míele la to vovo na asrafo ŋutɔŋutɔwo tɔe?

²⁰ Esi wònye Mawue na gbɔgbɔmeʋawɔnu sia mí ta la, ne míekplae ɣeawokatãɣi ko la, akpɔ mía ta godoo. Menye ɣesiaɣie asrafowo nɔa aʋagbedzi o, gake mí Kristotɔwo ya míele agbe kple ku ƒe aʋa aɖe wɔm gbeawotsyogbe, si ayi edzi va se ɖe esime Mawu tsrɔ̃ Satana ƒe xexea hede gbɔgbɔmeŋusẽ vɔ̃ɖiwo katã aʋli me. (Nyaɖeɖefia 12:17; 20:1-3) Eya ta mègana ta le avuwɔwɔ kple wò gbɔdzɔgbɔdzɔwo alo dzodzro vɔ̃wo me o, elabena ele na mí katã be ‘míaƒo míaƒe ŋutilã vevie’ hafi ate ŋu ayi edzi awɔ nuteƒe na Yehowa. (1 Korintotɔwo 9:27) Le nyateƒe me la, ɣeyiɣi si me wòawɔ na mí abe míele kame aɖeke tem o ene boŋue wòle be míatsi dzi.

21. Nu kawo wɔwɔ koe ate ŋu akpe ɖe mía ŋu míaɖu dzi le gbɔgbɔmeʋa si wɔm míele me?

²¹ Gake míate ŋu aɖu aʋa sia dzi le mía ŋutɔwo ƒe ŋusẽ me o. Esia tae Paulo xlɔ̃ nu mí be míado gbe ɖa na Yehowa “ɣeawokatãɣi le gbɔgbɔ me” ɖo. Azɔ hã, ele be míaɖo to Yehowa to eƒe Nya la sɔsrɔ̃ kple hadede kple mía ‘hati asrafowo’ ɣesiaɣi me, elabena menye míawo ɖeɖee le aʋa sia wɔm o. (Filemon 2; Hebritɔwo 10:24, 25) Ame siwo wɔa nuteƒe le go siawo katã me la aɖu aʋa la dzi godoo, eye woanɔ klalo hã ɣesiaɣi na woƒe xɔse ta ʋiʋli.

22, 23. (a) Nu ka tae wòle be míanɔ dzadzraɖoɖi na míaƒe xɔse ta ʋiʋli ɣeawokatãɣi, eye nya kawoe wòle be míabia mía ɖokui? (b) Nya ka mee míadzro le ta si kplɔe ɖo me?

²² Yesu gblɔ be: “Esi mienye xexea ƒe akpa aɖeke o . . . tae xexea léa fu mi ɖo.” (Yohanes 15:19) Eya ta ele be mí Kristotɔwo míanɔ dzadzraɖoɖi ɣesiaɣi be míaʋli míaƒe xɔse ta, eye míawɔ esia le bubu kple tufafa me. (Xlẽ 1 Petro 3:15.) Bia ɖokuiwò be: ‘Ðe mese nu si tae Yehowa Ðasefowo mewɔa ɖeka kple amewo le nanewo wɔwɔ me o ɖo la gɔmea? Ne vovototo alea ƒe gbetɔame dze ŋgɔm ɖe, ɖe maɖee afia be meka ɖe edzi bliboe be nu si Biblia kple kluvi nuteƒewɔlaa gblɔ lae nye nyateƒea? (Mateo 24:45; Yohanes 17:17) Eye ɖe mele klalo be mawɔ nu si adze Yehowa ŋu eye wònye dzidzɔ nam hã be mato esia dzi ato vovo tso xexea gbɔa?’—Psalmo 34:2; Mateo 10:32, 33.

²³ Gake zi geɖe la, wodoa didi si le mía me be míaganye xexea ƒe akpa aɖeke o kpɔna le mɔ siwo medzena gaglã o nu. Le kpɔɖeŋu me, abe ale si míegblɔe va yi ene la, Abosam dzea agbagba be yeato xexea ƒe modzakaɖeɖewo dzi able Yehowa subɔlawo nu woawɔ ɖeka kple xexea. Aleke míawɔ atia modzakaɖeɖe siwo ana dzidzeme mí ahana míalé dzitsinya dzadzɛ me ɖe asi? Míadzro nya sia me le ta si kplɔe ɖo me.