Nukae Akpe Ðe Mía Ŋu Míawɔ Nyateƒenyaa Ŋudɔ Pɛpɛpɛ?

NYADZƆDZƆŊLƆDƆWƆƑE aɖe ƒe fefewɔwɔwo me tola yi ɖakpɔ fefe aɖe gbeɖeka. Mekpɔ ŋudzedze ɖe fefea ŋu boo o, eye wòŋlɔ emegbe be: “Ne fefe maɖinu madodzidzɔnamee nèdi be yeakpɔ la, ke dze agbagba godoo nàɖakpɔ fefe sia.” Emegbe la, fefea ŋuti ɖoɖowɔlawo yɔ nya tso numetolaa ƒe nyawo me hezã le boblododo aɖe si wota me. Nyayɔyɔa yi ale: “Dze agbagba godoo nàɖakpɔ fefe sia”! Nya siwo numetolaa gblɔ la tututue woyɔ le boblododoa me, gake ɖe wotsɔ nya tso wo me tsɔ ɖo kpe nukpɔsusu bubu kura si menye nusi wòwɔnɛ o la dzi.

Kpɔɖeŋu sia ɖe alesi nya siwo ƒo xlã nyagbɔgblɔ aɖe le veviee la fia. Nyatsɔtsɔ tso nya aɖe me ate ŋu atro nya bliboa ƒe gɔmesese, abe alesi Satana tro Ŋɔŋlɔa ƒe gɔmesesee esime wòte kpɔ be yeable Yesu la ene. (Mateo 4:1-11) Gake ŋugbledede le nya siwo katã ƒo xlã nyagbɔgblɔ aɖe ŋu akpe ɖe mía ŋu míase nusi nyaa fia ŋutɔŋutɔ gɔme. Le susu sia ta la, ne míele mawunyakpukpui aɖe me xlẽm la, enye nusi me nunya le ɣesiaɣi be míalé ŋku ɖe mawunyakpukpui siwo katã ƒo xlã kpukpui ma ahanya nusi ŋu wòku ɖo bena míase nusi gblɔm nuŋlɔlaa le gɔme nyuie.

Wɔ Eŋudɔ Nyuie

Nyagɔmeɖegbalẽ aɖe ɖe nya siwo ƒo xlã nya aɖe gɔme be “nuŋlɔɖi alo nuƒo me nya siwo do ŋgɔ alo kplɔ nya alo nyagbɔgblɔ gobii aɖe ɖo, si kpɔa ŋusẽ ɖe eƒe gɔmesese alo dɔwɔwɔ dzi.” Nya siwo ƒo xlã nya aɖe agate ŋu afia “nɔnɔme alo nya vovovo siwo ku ɖe nudzɔdzɔ alo nɔnɔme gobii aɖe ŋu, kple bubuawo.” Le gɔmesese evelia sia nu la, nya si woagate ŋu azã na “nya siwo ƒo xlã nya aɖe” anye “nudzɔdzɔ siwo ku ɖe nya aɖe ŋu.” Nya siwo ƒo xlã mawunyakpukpui aɖe ŋu bubu le vevie ŋutɔ, le nya si apostolo Paulo ŋlɔ ɖo ɖe Timoteo ta: “Do vevie be, natsɔ ɖokuiwò afia Mawu abe ame like kple dɔwɔla, si mehiã be, ŋu nakpee o, kpakple amesi [wɔa nyateƒenya la ŋudɔ, NW] pɛpɛpɛ ene.” (Timoteo II, 2:15) Be míate ŋu awɔ Mawu ƒe Nyaa ŋudɔ pɛpɛpɛ la, ehiã be míase egɔme nyuie ahaɖe eme na ame bubuwo pɛpɛpɛ le anukwareɖiɖi me. Bubudede Yehowa, amesi nye Biblia la Ŋlɔla, ŋu aʋã mí be míadze agbagba be míawɔ esia, eye nya siwo ƒo xlã nyaawo ŋu bubu anye kpekpeɖeŋu xɔasi aɖe na mí.

Nudzɔdzɔ Siwo Ku Ðe Timoteo ƒe Agbalẽ Evelia Ŋu

Le kpɔɖeŋu me, mina míade ŋugble le Biblia-gbalẽ si nye Timoteo ƒe Agbalẽ Evelia ŋu.a Be míadze numedzodzroa gɔme la, míate ŋu abia nu tso nudzɔdzɔ siwo ku ɖe agbalẽa ŋu la ŋu. Amekae ŋlɔ Timoteo ƒe Agbalẽ Eveliaa? Ɣekaɣie wòŋlɔe? Nɔnɔme kawo mee wònɔ hafi ŋlɔe? Emegbe míate ŋu abia be, Nɔnɔme ka mee “Timoteo,” si ƒe ŋkɔ wotsɔ na agbalẽa la nɔ? Nukatae wòhiã nya siwo le agbalẽa me? Nyabiase siawo ƒe ŋuɖoɖowo ana míade asixɔxɔ geɖe agbalẽa ŋu eye wòakpe ɖe mía ŋu míakpɔ viɖe si míate ŋu akpɔ egbea tso agbalẽa me la adze sii.

Timoteo ƒe Agbalẽ Evelia ƒe kpukpui gbãtɔwo ɖee fia be lɛtae agbalẽa nye apostolo Paulo ŋlɔ ɖo ɖe Timoteo. Kpukpui bubuwo ɖee fia be le ɣeyiɣi si me Paulo ŋlɔe la, enɔ gaxɔ me le nyanyuia ta. Esi ame geɖe gblẽ Paulo ɖi ta la, ese le eɖokui me be yeƒe kuɣi gogo. (Timoteo II, 1:15, 16; 2:8-10; 4:6-8) Eyata anye ɣeyiɣi si me wodee gaxɔ me le Roma zi evelia, le ƒe 65 M.Ŋ. me lɔƒo, ye wòanya ŋlɔ agbalẽa. Anye be le ema megbe kpuie la, Nero tso kufia nɛ.

Nudzɔdzɔ siwo ku ɖe Timoteo ƒe Agbalẽ Evelia ŋue nye esia. Gake eɖe dzesi be Paulo meŋlɔ agbalẽa na Timoteo be yeagblɔ kuxi siwo me tom ye ŋutɔ yenɔ la nɛ o. Ke boŋ exlɔ̃ nu tso ɣeyiɣi sesẽ siwo nɔ Timoteo ŋgɔ la ŋu hede dzi ƒo na exɔlɔ̃a be wòaƒo asa na susuhenuwo, be wòayi edzi anɔ ‘ŋusẽm,’ ahatsɔ Paulo ƒe nuxlɔ̃amea ayi na ame bubuwo. Eye ame mawo hã ava su te bliboe akpe ɖe ame bubuwo hã ŋu. (Timoteo II, 2:1-7) Ðetsɔtsɔ le ame bubuwo me ɖokuitɔmadimaditɔe le ɣeyiɣi sesẽwo gɔ̃ hã me ƒe kpɔɖeŋu nyui ka gbegbee nye si! Eye nuxlɔ̃ame nyui ka gbegbee nye si wònye na mí egbea!

Paulo yɔ Timoteo be “vinye lɔlɔ̃tɔ.” (Timoteo II, 1:2) Woƒo nu tso ɖekakpuia ŋu zi geɖe le Kristotɔwo ƒe Hela Ŋɔŋlɔawo me be enye Paulo ƒe zɔhɛ wɔnuteƒe. (Dɔwɔwɔwo 16:1-5; Romatɔwo 16:21; Korintotɔwo I, 4:17) Esime Paulo ŋlɔ agbalẽ sia ɖo ɖe Timoteo la, edze abe enɔ eƒe ƒe 30-awo me ene—amesi wogabuna ɖekakpuii kokoko. (Timoteo I, 4:12) Ke hã, exɔ ŋkɔ nyui aɖe xoxo le nuteƒewɔwɔ me, ‘esubɔ kple Paulo’ abe ƒe 14 ene. (Filipitɔwo 2:19-22) Togbɔ be Timoteo kpɔtɔ nye ɖekakpui hã la, Paulo na ŋusẽe be wòaxlɔ̃ nu ame tsitsiwo be ‘woagawɔ dzre ɖe nya ta o,’ ke boŋ woatsi dzi ɖe nya veviwo, abe xɔse kple dzidodo, ene ŋu. (Timoteo II, 2:14) Wona ŋusẽ Timoteo be wòakpɔ dzikpɔlawo kple subɔsubɔdɔwɔlawo ɖoɖo hã gbɔ le hamea me. (Timoteo I, 5:22) Ke hã, anya nɔ vɔvɔ̃m vie be yeawɔ ŋusẽ si wonae la ŋudɔ.—Timoteo II, 1:6, 7.

Kuxi sesẽ aɖewo dze ŋgɔ hamemegã sia si nye ɖekakpui la. Kuxi siawo dometɔ ɖekae nye be ame eve aɖewo, siwo nye Himenaio kple Fileto, nɔ ‘ame aɖewo ƒe xɔse trɔm tsyɔ anyi’ henɔ nu fiam be “tsitretsitsi va yi xoxo.” (Timoteo II, 2:17, 18) Edze abe woxɔe se be tsitretsitsi si ko li la nye gbɔgbɔmetɔ ene, eye be eva na Kristotɔwo xoxo. Ðewohĩ nya si Paulo gblɔ be Kristotɔwo nye ame kukuwo le woƒe dzidada me gake wogbɔ agbe wo to Mawu ƒe gbɔgbɔ dzi la mee woanya nɔ nya tsɔm tsoe. (Efesotɔwo 2:1-6) Paulo xlɔ̃ nu be xɔsegbelawo ƒe ŋusẽkpɔɖeamedzi ma ava dzi ɖe edzi. Eŋlɔ bena: “Ɣeyiɣi le vava ge, esime womaxɔ nufiafia, si le blibo la o; . . . Eye woaɖe to ɖa le nyateƒe la ŋuti, eye woatrɔ ayi gliwo gbɔ.” (Timoteo II, 4:3, 4) Nuxlɔ̃ame sia si Paulo do ŋgɔ na la ɖee fia be ehiã kpata be Timoteo nawɔ apostoloa ƒe nuxlɔ̃amea dzi.

Asixɔxɔ si Le Agbalẽa Ŋu Egbea

Le nya siwo ŋu míeƒo nu tsoe va yi nu la, míekpɔe be Paulo ŋlɔ Timoteo ƒe Agbalẽ Evelia la ɖe susu siwo gbɔna ya teti ta: (1) Enya be yeƒe kuɣi gogo, eye wòdi be yeadzra Timoteo ɖo ɖe ɣeyiɣi si me yemeli ado alɔ Timoteo o la ŋu. (2) Edi be yeadzra Timoteo ɖo ɖe hame si le eƒe dzikpɔkpɔ te la ta kpɔkpɔ tso xɔsegbegbe kple ŋusẽkpɔɖeamedzi gbegblẽ bubuwo me ŋu. (3) Edi be yeade dzi ƒo na Timoteo be wòawɔ Yehowa ƒe subɔsubɔdɔa kple moveviɖoɖo ahawɔ Ŋɔŋlɔ siwo tso gbɔgbɔ me la me sidzedze vavãtɔ ŋudɔ le tsitretsitsi ɖe alakpanufiafiawo ŋu me.

Nudzɔdzɔ siwo ku ɖe Timoteo ƒe Agbalẽ Evelia ŋu gɔmesese alea wɔe be míegase egɔme ɖe edzi. Egbea hã, xɔsegbelawo li abe Himenaio kple Fileto ene, amesiwo doa woa ŋutɔwo ƒe nukpɔsusuwo ɖe ŋgɔ eye woadi be yewoagblẽ míaƒe xɔse dome. Gawu la, míele “ɣeyiɣi vɔ̃wo,” si ŋu Paulo ƒo nu tsoe la me. Ame geɖe kpɔ nuxlɔ̃ame si Paulo na be, “Amesiwo katã dina be, yewoanɔ agbe ɖe mawusosroɖa nu le Kristo Yesu me la, woati woawo hã yome tsã” la ƒe nyateƒenyenye. (Timoteo II, 3:1, 12) Aleke míawɔ anɔ te sesĩe? Abe Timoteo ene la, ehiã be míase amesiwo subɔ Yehowa ƒe geɖe la ƒe aɖaŋuɖoɖo. Eye to ɖokuisinusɔsrɔ̃, gbedodoɖa, kple hadede kple Kristotɔwo me la, míate ŋu ‘ayi edzi anɔ ŋusẽm’ to Yehowa ƒe amenuveve me. Gawu la, ne míeka ɖe ŋusẽ si le sidzedze vavãtɔa ŋu dzi la, míate ŋu awɔ ɖe Paulo ƒe nuxlɔ̃ame sia dzi be: ‘Yi edzi nàlé nya, siwo le blibo la ƒe kpɔɖeŋu me ɖe asi.’—Timoteo II, 1:13.

‘Nya Siwo Le Blibo la ƒe Kpɔɖeŋu’

“Nya, siwo le blibo” siwo ŋu Paulo ƒo nu tsoe lae nye kawo? Nyateƒe Kristotɔwo ƒe nufiafiae wòzã nya ma na. Le agbalẽ gbãtɔ si Paulo ŋlɔ na Timoteo me la, eɖe nu me be “Aƒetɔ Yesu Kristo ƒe nya” koŋue “nya, siwo le blibo” la nye. (Timoteo I, 6:3) Nya siwo le blibo la ƒe kpɔɖeŋu sɔsrɔ̃ naa susumekɔkɔ, lɔlɔ̃, kple ameŋububu ƒe nɔnɔme sua ame si. Esi Yesu ƒe subɔsubɔdɔ kple nufiafiawo wɔ ɖeka kple Biblia ƒe nufiafia bubuwo katã ta la, nyagbɔgblɔ, “nya, siwo le blibo” la agate ŋu afia Biblia ƒe nufiafiawo katã.

Le Timoteo, kple Kristotɔ hamemegãwo katã, gome la, nya siwo le blibo ƒe kpɔɖeŋu la nye ‘dɔ nyui, si wode asi na wo’ si ta wòle be woakpɔ. (Timoteo II, 1:13, 14) Ele na Timoteo be ‘wòaɖe gbeƒã nya la, wòanɔ edzi, vovoɣi li alo vovoɣi meli o, wòaka mo, agbe nya, axlɔ̃ nu le dzigbɔɖeanyi kple nufiafia katã me.’ (Timoteo II, 4:2) Ne míekpɔe dze sii be xɔsegbegbe nufiafiawo nɔ kakam le Timoteo ŋɔli la, ekema míase nusita Paulo te gbe ɖe edzi be ehiã kpata be woafia nya, siwo le blibo la gɔme. Míekpɔe hã be ehiã be Timoteo ‘naka mo, agbe nya, axlɔ̃ nu’ le dzigbɔɖeanyi me, wòawɔ nufiafiaŋutete nyui ŋudɔ le alẽha la ta kpɔkpɔ me.

Amekae wòle be Timoteo naɖe gbeƒã nya la na? Nya siwo ƒo xlã nyaa ɖee fia be esi Timoteo nye hamemegã ta la, aɖe gbeƒã nya la le Kristo-hamea me. Le tsitretsiɖeŋulawo ƒe nyaƒoɖeamenuwo ta la, ehiã be Timoteo nayi edzi ada asɔ le gbɔgbɔ me ahaɖe gbeƒã Mawu ƒe nya la kple dzinɔameƒo, ke menye amegbetɔwo ƒe nunya, ame ŋutɔ ƒe nukpɔsusuwo, alo nususugblɔ maɖeviwo o. Enye nyateƒe be amesiwo si nɔnɔme gbegblẽwo le atsi tre ɖe esia ŋu ya. (Timoteo II, 1:6-8; 2:1-3, 23-26; 3:14, 15) Gake ne Timoteo wɔ ɖe Paulo ƒe nuxlɔ̃amea dzi la, ayi edzi anye mɔxenu na xɔsegbegbe, abe alesi Paulo ŋutɔ nyee ene.—Dɔwɔwɔwo 20:25-32.

Ðe nya siwo Paulo gblɔ tso gbeƒãɖeɖe nyaa ŋu lɔ gbeƒãɖeɖe le hamea godo hã ɖe emea? Ẽ, elɔe ɖe eme, abe alesi nya siwo ƒo xlã nyaa fia ene. Paulo yi edzi gblɔ be: “Ke wò la nɔ mo xexi le nuwo katã me, do dzi le fukpekpewo me, wɔ nyanyuigblɔla ƒe dɔ, eye nawu wò subɔsubɔdɔ la nu blibo.” (Timoteo II, 4:5) Nyanyuigbɔgblɔ—si nye gbeƒãɖeɖe xɔxɔ nyanyuia na dzimaxɔsetɔwo—nye Kristotɔwo ƒe subɔsubɔdɔa ƒe akpa vevi aɖe. (Mateo 24:14; 28:19, 20) Eye abe alesi míeɖea gbeƒã Mawu ƒe nyaa le hamea me le ‘ɣeyiɣi madeamedziwo’ gɔ̃ hã me ene la, nenemae míedoa vevie gbeƒãɖeɖe nyaa na hamea godo tɔwo le nɔnɔme sesẽwo gɔ̃ hã mee.—Tesalonikatɔwo I, 1:6.

Mawu ƒe Nya si tso gbɔgbɔ me dzie míetua míaƒe gbeƒãɖeɖe kple nufiafia la katã ɖo. Míeka ɖe Biblia dzi bliboe. Paulo gblɔ na Timoteo bena: “Ŋɔŋlɔ sia ŋɔŋlɔ, si tso Mawu ƒe [gbɔgbɔ] me la, enyo hã na nufiafia, na mokaka, na ɖɔɖɔɖo, na amehehe, si le dzɔdzɔenyenye me.” (Timoteo II, 3:16) Woyɔa nya mawo edziedzi tsɔ ɖoa kpe edzi be Mawu ƒe Nya si tso gbɔgbɔ mee Biblia nye, eye esɔ nenema. Gake taɖodzinu ka tae Paulo ŋlɔ wo ɖo?

Hamemegã, si wode dɔ asi na be ‘wòaka mo, wòana ɖɔɖɔɖo, ana amehehe, si le dzɔdzɔenyenye me’ le hamea me, ye Paulo nɔ nua ƒom na. Eyata ɖe wònɔ nu xlɔ̃m Timoteo be wòaka ɖe nunya si le Mawu ƒe Nya si tso gbɔgbɔ me, si wotsɔ fia nu Timoteo tso ɖevime ke, la dzi. Abe Timoteo ene la, ele be hamemegãwo naka mo na nugbegblẽwɔlawo ɣeaɖewoɣi. Ne wole ewɔm la, ele be woaka ɖe Biblia dzi ɣesiaɣi. Gawu la, esi Mawu ƒe gbɔgbɔ mee Ŋɔŋlɔawo tso ta la, mokaname ɖesiaɖe si wotu ɖe wo dzi la nye mokaname si tso Mawu ŋutɔ gbɔ. Amesiame si gbea mokaname si tso Biblia me la le nuxlɔ̃ame si tso Yehowa ŋutɔ gbɔ la gbem, ke menye amegbetɔ aɖe ƒe nukpɔsusuwo o.

Aleke gbegbe mawumenunya bɔ ɖe Timoteo ƒe Agbalẽ Evelia mee nye si! Eye aleke gbegbe wòaɖe vii enye si ne míede ŋugble le eƒe nuxlɔ̃ame ŋu hekpe ɖe nya siwo katã ƒo xlãe ŋu! Le nyati sia me la, nyatakaka nyui si tso gbɔgbɔ me si le agbalẽ sia me ƒe akpa sue aɖe ko mee míedzro kpuie, gake enye kpeɖodzi be edea ame dzi ne míede ŋugble le nusi míexlẽna le Biblia me ŋu hekpe ɖe nya siwo katã ƒo xlãe hã ŋu. Ema ana míaka ɖe edzi kɔte be míele ‘nyateƒenya la ŋudɔ wɔm pɛpɛpɛ.’

[Etenuŋɔŋlɔ]

[Nɔnɔmetata si le axa 27]

Enye Paulo ƒe didi be yeadzra Timoteo ɖo ɖe hamea ta kpɔkpɔ ŋu

[Nɔnɔmetata si le axa 30]

Paulo xlɔ̃ nu Timoteo be wòaka ɖe Nya si tso gbɔgbɔ me la ƒe nunya dzi