Fiaɖuƒe Gbeƒãɖelawo Ka Nya Ta

“Wɔ Nyanyuigblɔla ƒe Dɔ”

NUKAE wòfia be woanye nyanyuigblɔla? Helagbe me nya eu·ag·ge·li·stesʹ gɔmee woɖe nenema eye edo ƒome kplikplikpli kple nya eu·ag·geʹli·on si gɔmee nye “nyanyui.” Eyata nyanyuigblɔlae nye nyanyuia ƒe gbeƒãɖela, alo eƒe dɔla.

Kristotɔ vavãwo katã nye nyanyuigblɔlawo elabena woɖea gbeƒã Mawu ƒe Fiaɖuƒe ŋuti nyanyuia. Eyata esɔ be apostolo Paulo xlɔ̃ nu Timoteo be, “wɔ nyanyuigblɔla ƒe dɔ.” Ebia tso Timoteo si be wòalé fɔ ɖe dɔ sia ŋu vevie. Paulo ƒoe ɖe enu be ‘wòanɔ mo xexi le nuwo katã me’ eye wòawu ‘eƒe subɔsubɔdɔ la nu blibo.’—Timoteo II, 4:5.

Esi míenye nyanyuigblɔlawo ta la, míawo hã míeléa fɔ ɖe míaƒe subɔsubɔdɔa ŋu ‘henɔa mo xexi,’ alo nɔa ŋudzɔ bene míagblɔ nyanyuia na amewo le mɔnukpɔkpɔ ɖesiaɖe me. Ame geɖe to esia me va nya Yehowa kple eƒe ŋugbedodowo esi Yehowa Ðasefowo ƒo nu na wo le vomeɖaseɖiɖi me. Aleae wòdzɔ ɖe Seymore, ŋutsu aɖe si le Barbados la dzi.

Seymore nye nufiala le dziɖuɖusuku aɖe me. Charles si nye ɣeyiɣi aɖe ƒe nufiala le suku ma ke me eye wònye Yehowa Ðasefo la nye nyanyuigblɔla nɔŋudzɔ aɖe. Enye ɣeyiɣiawo katã ƒe subɔla alo mɔɖela tsã, eye ewɔ mɔnukpɔkpɔ ɖesiaɖe ŋudɔ tsɔ gblɔ nyanyuia na ame bubuwo. Charles ƒe vomeɖaseɖiɖi mee Seymore se Fiaɖuƒe gbedasia le zi gbãtɔ.

Eteƒe medidi o Seymore hã ɖoe kplikpaa be yeagblɔ Biblia me nyateƒea na ame geɖe alesinu yeate ŋui. Eyata edze vomedzeɖoɖo gɔme kple amewo le eƒe dɔwɔƒe, vevietɔ kple eƒe sukuviwo. Togbɔ be womefiaa mawunya le dziɖuɖu ƒe sukuwo me le dukɔ aɖewo me o hã la, wode dɔ ŋutsu sia si be wòafia mawusubɔsubɔ kple agbenyuinɔnɔ ŋuti dzidzenuwo. Gake Biblia me sidzedze yeye si va su Seymore si fifia va xɔ ɖe susu xoxo siwo nɔ esi le nya siawo ŋuti teƒe. Le ɖiɖiɖemeɣiwo la, egblɔa Mawu ƒe ŋugbedodo le xexeme yeye aɖe ŋu kple agbe mavɔ nɔnɔ ƒe mɔkpɔkpɔa ŋuti nya na eƒe sukuviwo.

Aleke ɖeviawo xɔ nya lae? Wo dometɔ geɖe ɖe ɖetsɔleme vavã fia ɖe Yehowa ƒe Fiaɖuƒe ŋuti nyanyuia ŋu. Ɣeyiɣi aɖe megbe la, Seymore va nɔ Biblia srɔ̃m kple eƒe sukuvi 13. Woƒe ɖetsɔlemea nu sẽ ale gbegbe be wowɔ ɖoɖo be yewoasrɔ̃ Biblia zi eve le kwasiɖa me. Mlɔeba la, wo ame akpa gãtɔ te Kristotɔwo ƒe kpekpewo dede le Yehowa Ðasefowo ƒe Fiaɖuƒe Akpata si le wo gbɔ me. Vaseɖe fifia la, wo dometɔ asieke zu Yehowa ƒe Ðasefo ɖeadzɔgbe xɔnyɔnyrɔ̃wo. Eye Seymore hã le eƒe subɔsubɔdɔa wɔm bliboe fifia esi wònye gbesiagbe mɔɖela kple hamemegã le Yehowa Ðasefowo ƒe hame ɖeka me le Barbados.

Alesi Yehowa Ðasefowo siwo le xexeame katã le ‘nyanyuigblɔlawo ƒe dɔa wɔm’ to vomeɖaseɖiɖi me ƒe kpɔɖeŋu ɖeka koe nye sia. Wowɔa Biblia ƒe nuxlɔ̃amenya si le Kolosetɔwo 4:5, 6 dzi, esi gblɔ be: “Mizɔ le nunya me le amesiwo le egodo la ŋku me, eye miwɔ ɣeyiɣi la ŋuti dɔ blibo. Mina amenuveve kple dze nanɔ miaƒe nya me ɖaasi, bena mianya alesi wòdze be, miaɖo nya ŋuti na amesiame.”