Yi Edzi Nàna Hehe Wò Nugɔmesese Ƒe Ŋutetewo
ALEKE gbegbe wòdoa dzidzɔ na amee be wòakpɔ kamedefefewɔla bibi aɖe wòanɔ atsyã nyuiwo ɖem aɖaŋutɔe enye esi! Biblia de dzi ƒo na Kristotɔwo be woana hehe woƒe tamebubu ƒe ŋutetewo abe ale si ko kamedefefewɔla naa hehe eɖokui ene.
Le lɛta si apostolo Paulo ŋlɔ na Hebritɔwo me la, egblɔ be: “Ame tsitsiwo tɔe nye nuɖuɖu sesẽ, ame siwo na hehe woƒe nugɔmesese ƒe ŋutetewo [alo ŋutilã ƒe sidzenuwo, le gɔmesesea ŋutɔŋutɔ nu, abe kamedefefewɔla ene] to wo zazã me, bene woade vovototo nyui kple vɔ̃ dome.” (Heb. 5:14) Nu ka tae Paulo xlɔ̃ nu Hebri Kristotɔwo be woana hehe woƒe tamebubu ƒe ŋutetewo abe ale si kamedefefewɔla bibi aɖe naa hehe eƒe lãmekawo ene? Aleke míana hehe míaƒe nugɔmesese ƒe ŋutetewoe?
“Ele Be Mianye Nufialawo”
Esi Paulo nɔ ale si Yesu nye “nunɔlagã abe Melxizedek ene” me ɖem la, eŋlɔ bena: “Nya geɖewo li míagblɔ tso [Yesu ŋu], eye wo gɔme ɖeɖe sesẽ, le esi nusese zu dɔ na mi ta. Elabena le nyateƒe me la, togbɔ be ele be mianye nufialawo le ɣeyiɣi la nu hã la, egahiã be ame aɖe nafia Mawu ƒe gbedeasi kɔkɔeawo ƒe gɔmedzenuwo mi tso nu gbãtɔwo dzi; eye mieva zu abe ame siwo hiã notsi, ke menye nuɖuɖu sesẽ o, la ene.”—Heb. 5:10-12.
Edze ƒãa be Yuda Kristotɔ siwo nɔ anyi le ƒe alafa gbãtɔ me la dometɔ aɖewo menɔ ŋgɔyiyi wɔm le nugɔmesese me o eye womete ŋu nɔ gbɔgbɔmeŋgɔyiyi hã wɔm o. Le kpɔɖeŋu me, enɔ sesẽm na wo be woaxɔ nyateƒe ƒe kekeli si nɔ kɔkɔm ɖe edzi ku ɖe Se la kpakple aʋatsotso ŋu la ade eme. (Dɔw. 15:1, 2, 27-29; Gal. 2:11-14; 6:12, 13) Enɔ sesẽm na wo dometɔ aɖewo be woadzudzɔ gomekpɔkpɔ le kwasiɖa sia kwasiɖa ƒe Sabat la kpakple ƒe sia ƒe ƒe Avuléŋkekea ƒe kɔnuawo me. (Kol. 2:16, 17; Heb. 9:1-14) Eya ta Paulo de dzi ƒo na wo be woana hehe woƒe nugɔmesese ƒe ŋutetewo bene woate ŋu ade vovototo nyui kple vɔ̃ dome, eye wògblɔ na wo be ‘woayi ŋgɔ aɖo tsitsinyenye gbɔ.’ (Heb. 6:1, 2) Eƒe nuxlɔ̃amea anya ʋã wo dometɔ aɖewo be woade ŋugble le ale si wonɔ woƒe tamebubu ƒe ŋutetewo ŋu dɔ wɔmee ŋu, eye anɔ eme be esia kpe ɖe wo ŋu wowɔ gbɔgbɔmeŋgɔyiyi. Ke míawo ya ɖe?
Na Hehe Wò Nugɔmesese Ƒe Ŋutetewo
Aleke míate ŋu ana hehe míaƒe tamebubu ƒe ŋutetewo bena míazu ame siwo tsi le gbɔgbɔ me? Paulo gblɔ be, “To wo zazã me.” Abe kamedefefewɔla si naa hehe eƒe lãmekawo kple ŋutilã ale be wòate ŋu aɖe atsyãwo ahawɔ nu siwo wɔwɔ asesẽ na ame bubuwo ene la, ele be míawo hã míana hehe míaƒe tamebubu ƒe ŋutetewo nenema ke be woate ŋu ade vovototo nyui kple vɔ̃ dome.
Aƒetɔ John Ratey, si nye tagbɔdɔléleŋutinunya nufialagã ƒe kpɔɖeŋutɔ le Harvard Atikeŋutinunya Suku la, gblɔ be: “Hehenana [susu] ye nye nu nyuitɔ ɖeka kolia si nàte ŋu awɔ na wò ahɔhɔ̃.” Eye le Aƒetɔ Gene Cohen, si nye dɔnunɔla le Tsitsi, Lãmesẽ, Kple Ameƒomea Ƒe Nyawo Gbɔ Kpɔƒe si le George Washington Yunivɛsiti, ƒe nya nu la, “ne míeɖo dɔ sesẽwo na míaƒe ahɔhɔ̃ la, ahɔhɔ̃menugbagbeviwo dzia ahɔhɔ̃meka yeyewo, eye esia nana be ahɔhɔ̃mekatsiãƒewo dzina ɖe edzi.”
Eya ta nunya anɔ eme be míana hehe míaƒe tamebubu ƒe ŋutetewo bene míadzi Mawu ƒe Nya la ŋuti sidzedze si le mía si la ɖe edzi. Esia wɔwɔ ana míasu te nyuie wu awɔ ‘Mawu ƒe lɔlɔ̃nu si le blibo la.’—Rom. 12:1, 2.
Na “Nuɖuɖu Sesẽ” Nadzro Wò Vevie
Ne enye míaƒe didi be “míayi ŋgɔ aɖo tsitsinyenye gbɔ” la, ke ehiã be míabia mía ɖokuiwo be: ‘Ðe mele ŋgɔyiyi wɔm le Biblia me nyateƒea gɔme sese mea? Ðe ame bubuwo buam be menye gbɔgbɔmeme tsitsia?’ Enyea dzidzɔ na vidada be yeana no kpakple vidzĩwo ƒe nuɖuɖu ye via ne ekpɔtɔ nye vidzĩ. Gake bu ale si gbegbe vidada ma atsi dzii nenye be ƒe aɖewo va yi evɔ ɖevia mele nuɖuɖu sesẽ ɖum o la ŋu kpɔ. Le mɔ ma ke nu la, dzidzɔ gã aɖee wònyena na mí be míakpɔ míaƒe Biblia nusrɔ̃vi wòanɔ ŋgɔyiyi wɔm ʋuu ava ɖe adzɔgbe axɔ nyɔnyrɔ. Gake ne amea meva le gbɔgbɔmeŋgɔyiyi wɔm le eƒe nyɔnyrɔxɔxɔa megbe o ɖe? Ðe esia mate ɖe mía dzi ŋutɔ oa? (1 Kor. 3:1-4) Nufialaa kpɔa mɔ be le ɣeyiɣi aɖe megbe la, nusrɔ̃via hã nava zu nufiala.
Míaƒe nugɔmesese ƒe ŋutetewo zazã atsɔ abu nuwo ŋu biaa ŋugbledede, eye ema wɔwɔ biaa agbagbadzedze. (Ps. 1:1-3) Mele be míaɖe mɔ nuwo, abe televisionkpɔkpɔ alo modzakaɖedɔwo, siwo mebiaa susu ŋu dɔ wɔwɔ boo o la, naxɔ ɣeyiɣi si míatsɔ ade ŋugble tso nya veviwo ŋu la le mía si o. Be míadzi míaƒe tamebubu ƒe ŋutetewo ɖe edzi la, ehiã be míadze agbagba be Biblia kple Biblia srɔ̃gbalẽ siwo “kluvi nyateƒetɔ kple aɖaŋudzela” tana la sɔsrɔ̃ nadzro mí vevie eye míaɖi kɔ na dzodzro ma. (Mat. 24:45-47) Tsɔ kpe ɖe Biblia xexlẽ edziedzi ƒe ɖoɖo wɔwɔ ŋu la, ele vevie be míaɖo ɣeyiɣi aɖe koŋ ɖi na Ƒometadedeagu kple numekuku deto wɔwɔ tso Biblia me nyawo ŋu.
Jerónimo, si nye dzikpɔla mɔzɔla le Mexico, gblɔ be yesrɔ̃a Gbetakpɔxɔ ƒe tata ɖe sia ɖe ne yenya xɔe teti ko. Eɖo ɣeyiɣi hã ɖi si me eya kple srɔ̃a wosrɔ̃a nu ɖekae. Jerónimo gblɔ be: “Abe atsu kple asi ene la, míewɔ ɖoɖo xlẽa Biblia ɖekae gbe sia gbe, eye míewɔa numekugbalẽwo abe ‘Anyigba Nyui La’ ƒe agbalẽ gbadzaa ene ŋu dɔ.” Nɔviŋutsu aɖe hã si ŋkɔe nye Ronald gblɔ be yekpɔa egbɔ be yexlẽ Biblia ƒe akpa si wotia be hamea naxlẽ kwasiɖa sia kwasiɖa la. Ewɔ ɖoɖo hã tsɔ agbalẽ ɖeka alo eve siwo sɔsrɔ̃ axɔ ɣeyiɣi didi aɖe la wɔa ɖokuisinusɔsrɔ̃e. Ronald gblɔ be: “Ðoɖo sia wɔe be mekpɔa mɔ na ŋkeke si dzi mesrɔ̃a nu le la vevie.”
Alekee wòle le míawo ya gome? Ðe míezãa ɣeyiɣi agbɔsɔsɔme si sɔ ɖe Biblia sɔsrɔ̃ kple ŋugbledede le Mawu ƒe Nya la ŋu ŋutia? Ðe míele hehe nam míaƒe tamebubu ƒe ŋutetewo, eye míetea ŋu wɔa nyametsotso siwo wɔ ɖeka kple Ŋɔŋlɔawo me gɔmeɖosewo fifia wu tsãa? (Lod. 2:1-7) Mina wòanye míaƒe taɖodzinu be míazu gbɔgbɔmeme tsitsiwo, bene gɔmesese kple nunya si nɔa ame siwo na hehe woƒe nugɔmesese ƒe ŋutetewo bena woate ŋu ade vovototo nyui kple vɔ̃ dome si la nasu míawo hã si!
[Nɔnɔmetata si le axa 23]
Míenaa hehe míaƒe tamebubu ƒe ŋutetewo to “wo zazã me”