Nɔ “Sitsoƒedu” La Me Ne Nànɔ Agbe!

“[Ele be] wòanɔ sitsoƒedu la me, vaseɖe esime nunɔlagã naku.”—MOSE IV, 35:28.

 1. Amekae nye Hlɔ̃biala la, eye afɔ kae wòaɖe kpuie?

ESUSƆ vie ko Yehowa ƒe Hlɔ̃biala Yesu Kristo nada nu. Hlɔ̃biala sia kple eƒe mawudɔlawo ƒe aʋakɔ aho ɖe ʋufɔɖila matrɔdzimewo katã ŋu kpuie. Ẽ, Yesue anye Mawu ƒe Ametsrɔ̃la le “xaxa gã” si le aƒe tum kabakaba la me. (Mateo 24:21, 22; Yesaya 26:21) Ameƒomea adze ŋgɔ ʋufɔ si woɖi la ŋkume kple ŋkume ɣemaɣi.

 2. Afikae nye sitsoƒe vavã ɖeka hɔ̃ la, eye biabia kawo ŋue wòle be míaɖo?

² Mɔ si dzi woato anɔ dedie enye be woaɖo ta kpɔɖeŋusitsoƒedua me eye woasi aɖe ame ƒe agbe! Ne woxɔ sitsoƒedila ɖe dua me la, ele be wòanɔ afima elabena afima koe nye sitsoƒe vavãtɔ. Gake ɖewohĩ àbia be, ‘Esi mí ame akpa gãtɔ míewu ame kpɔ o ɖe, ɖe míeɖi ʋufɔ nyateƒea? Nukata Yesu nye Hlɔ̃biala? Nukae nye egbegbe sitsoƒedu la? Ðe woate ŋu ado le eme dedie gbaɖegbea?’

Ðe Míeɖi Ʋufɔ Nyateƒea?

 3. Mose ƒe Sea ƒe akpa kae akpe ɖe mía ŋu míakpɔe be ame biliɔn siwo le anyigba dzi ɖi ʋufɔ?

³ Mose ƒe Sea ƒe akpa aɖe akpe ɖe mía ŋu míakpɔe be ame biliɔn siwo le anyigba dzi ɖi ʋufɔ. Mawu daa ƒuƒoƒo ƒe ʋukɔkɔɖi ƒe agba ɖe Israel-viwo dzi. Ne wofɔ ame kuku aɖe eye womenya ewula o la, ʋɔnudrɔ̃lawo dzidzea ame kukua kple du siwo ƒo xlãe la dome bene woakpɔ du si tsɔ ɖe egbɔ wu. Bene du ma si edze be eyae anya ɖi ʋufɔa naɖe fɔɖiɖi ɖa la, dua me ame tsitsiwo ŋea kɔ le nyinɔvi si wometsɔ wɔ dɔe kpɔ o nu le bali si me womede agble ɖo kpɔ o me. Lewi-vi nunɔlawo ŋkumee wowɔnɛ le ‘elabena woawoe Yehowa tia be woakpɔ dzrenyawo gbɔ.’ Dua me ame tsitsiawo klɔa asi ɖe nyinɔa dzi hegblɔna be: “Menye míaƒe asie kɔ ʋu sia ɖi o, eye míaƒe ŋku mekpɔ eteƒe o. Yehowa, lé avu wò dukɔ, si nèxɔ ƒle la, eye megabia ʋu maɖifɔ tso wò dukɔ Israel si o!” (Mose V, 21:1-9) Yehowa Mawu medi be woatsɔ ʋu aƒo ɖi Israel-nyigba lae alo be emenɔlawo naɖi ʋufɔ akpe ɖe ame bubuwo ŋu o.

 4. Ʋufɔɖiɖi kae le Babilon Gã la dzi?

⁴ Ẽ, ʋufɔɖiɖi te ŋu nɔa ƒuƒoƒo alo amehawo dzi. Bu ʋufɔ gã si Babilon Gã, alakpasubɔsubɔ ƒe xexemefiaɖuƒea, ɖi ŋu kpɔ. Ẽ, eno Yehowa subɔlawo ƒe ʋu mu! (Nyaɖeɖefia 17:5, 6; 18:24) Kristodukɔa ƒe sɔlemehawo gblɔna be Ŋutifafafia la yomedzelawoe yewonye, gake aʋawɔwɔ, subɔsubɔhawo ƒe ŋutasẽʋɔnuwo, kple atitsogaʋa vɔ̃ɖiwo na woɖi ʋufɔ le Mawu ŋkume. (Yesaya 9:5; Yeremya 2:34) Le nyateƒe me la, eya koŋ dzie ame miliɔn nane siwo ku le xexemeʋa eve siwo wowɔ le ƒe alafa sia me ƒe fɔɖiɖi gãtɔ le. Eyata alakpasubɔsubɔhawo me nɔlawo kple wo dzidelawo kpakple amesiwo kpɔa gome le amegbetɔwo ƒe aʋawɔwɔ me ɖi ʋufɔ le Mawu gbɔ.

 5. Aleke ame aɖewo le abe amesi mebua wu ame o le Israel ene?

⁵ Ame aɖewo bua wu ame alo woƒe ɖekematsɔleme na ame aɖe ku kpɔ. Bubuwo kpe asi ɖe amewuwu ŋu, ɖewohĩ le esi subɔsubɔhaŋgɔnɔlawo ble wo be Mawu ƒe lɔlɔ̃nue ta. Eye bubuwo hã ti Mawu subɔlawo yome hewu wo. Gake ne míewɔ nusiawo kpɔ o hã la, ne ame aɖe bu eƒe agbe la, agba le mí amesiwo dome wole la dzi elabena míenya Mawu ƒe se kple eƒe lɔlɔ̃nu o. Míeɖi amesi mebua wu ame o ‘si wu nɔvia evɔ wònye mebua o, eye melé fui tsã hã o.’ (Mose V, 19:4) Ele be ame mawo naɖe kuku abia Mawu ƒe nublanuikpɔkpɔ eye woasi ayi kpɔɖeŋusitsoƒedua me. Ne menye nenema o la, woava do go Hlɔ̃biala la eye wòawu wo.

Akpa Vevi Siwo Yesu Wɔ

 6. Nukata woate ŋu agblɔ be Yesue nye ameƒomea ƒe ƒometɔ kplikplikpli wu?

⁶ Le Israel la, ame kukua ƒe ƒometɔ kplikplikplie nyea hlɔ̃biala. Hafi egbegbe Hlɔ̃biala la nabia amesiwo katã wowu le anyigba dzi vevietɔ Yehowa subɔla siwo wowu ƒe hlɔ̃ la, ele be wòanye ameƒomea katã ƒe ƒometɔ. Yesu Kristoe le ɖoƒe ma. Wodzii ame debliboe. Yesu tsɔ eƒe agbe si ŋu nuvɔ̃ mele o xe tafevɔsae, eye esi wofɔe ɖe tsitre wòyi dziƒo la, etsɔ eƒe asixɔxɔ yi na Mawu ɖe nuvɔ̃wɔla Adam ƒe dzidzime siwo le kukum la ta. Kristo to esia me zu ameƒomea Ðela si nye míaƒe ƒometɔ kplikplikpli wu—Hlɔ̃biala si dze. (Romatɔwo 5:12; 6:23; Hebritɔwo 10:12) Woyɔ Yesu be enye eyomedzela amesiaminawo nɔvi. (Mateo 25:40, 45; Hebritɔwo 2:11-17) Esi wònye Dziƒofia ta la, eva zu “fofo mavɔ” na amesiwo eƒe vɔsa aɖe vi na eye woanye eteviwo le anyigba dzi. Amesiawo anɔ agbe tegbee. (Yesaya 9:5, 6) Eyata esɔ be Yehowa tia ameƒomea ƒe Ƒometɔ sia be wòanye Hlɔ̃biala.

 7. Esi Yesu nye Nunɔla Gãtɔ ta la, nukae wòwɔ na amegbetɔwo?

⁷ Yesu ganye Nunɔlagã nuvɔ̃manɔŋutɔ, veveseɖeamenula, si wodo kpɔ hã. (Hebritɔwo 4:15) Le ɖoƒe sia si wòle ta la, ewɔa eƒe nuvɔ̃vulévɔsa ƒe asixɔxɔ ŋudɔ ɖe ameƒomea ta. “Israel-viwo kple amedzrowo kpakple wo gbɔ mewo” ye woɖo sitsoƒeduawo na. (Mose IV, 35:15) Eyata Nunɔla Gãtɔ la yomedzela amesiaminawo, “Israel-viwo” ye wòzã eƒe vɔsa ƒe asixɔxɔ na gbã. Fifia “amedzrowo” kple “wo gbɔ mewo” ye wòle ezãm na le kpɔɖeŋusitsoƒedua me. Aƒetɔ Yesu Kristo ƒe “alẽ bubu” siawo le mɔ kpɔm be yewoanɔ agbe mavɔ le anyigba dzi.—Yohanes 10:16; Psalmo 37:29, 34.

Sitsoƒedu si Li Egbea

 8. Nukae nye kpɔɖeŋusitsoƒedu la?

⁸ Nukae nye kpɔɖeŋusitsoƒedu la? Menye teƒe aɖe koŋ wònye abe Xebron si nye Lewitɔwo ƒe sitsoƒedu adeawo dometɔ ɖeka ene, afisi Israel ƒe nunɔlagã nɔ o. Sitsoƒedu si li egbea nye ɖoɖo si Mawu wɔ be yeakpɔ mía ta tso ku me le esi míeda le eƒe se si ku ɖe ʋu ƒe kɔkɔenyenye ŋu dzi ta. (Mose I, 9:6) Ele be amesiame si da le se ma dzi, eɖaɖoe alo meɖaɖoe hafi o, nadi Mawu ƒe nublanuikpɔkpɔ kple eƒe nuvɔ̃a ɖeɖeɖa to Nunɔlagã Yesu Kristo ƒe ʋua dzixɔxɔse me. Kristotɔ amesiamina siwo si dziƒomɔkpɔkpɔ le kple “ameha gã” siwo si anyigba dzi nɔnɔ ƒe mɔkpɔkpɔ le la wɔ Yesu ƒe nuvɔ̃vulévɔsa ƒe viɖewo ŋudɔ eye wole kpɔɖeŋusitsoƒedua me.—Nyaɖeɖefia 7:9, 14; Yohanes I, 1:7; 2:1, 2.

 9. Aleke Saul si tso Tarso da le Mawu ƒe ʋusea dzii, gake aleke wòtrɔ nɔnɔmee?

⁹ Hafi apostolo Paulo nava zu Kristotɔ la, eda le ʋusea dzi. Eyae nye Saul si tso Tarso si ti Yesu yomedzelawo yome helɔ̃ ɖe wo wuwu dzi gɔ̃ hã. Paulo gblɔ be: “Ke wokpɔ nublanui nam, elabena mewɔe le numanyamanya me, le dzimaxɔse me.” (Timoteo I, 1:13; Dɔwɔwɔwo 9:1-19) Dzimetɔtrɔ ƒe nɔnɔme nɔ Saul si, emegbe ewɔ xɔsedɔ geɖe tsɔ ɖo kpe edzi. Gake bene woage ɖe kpɔɖeŋusitsoƒedua me la, wobia nu geɖe tso ame si wu tafea dzixɔxɔse ko.

10. Aleke wòanya wɔ be dzitsinya nyui nasu ame si, eye nukae wòle be woawɔ be wòanɔ ame si ɖaa?

¹⁰ Ne amesi mebua wu ame o ɖo kpe edzi be dzitsinya nyui le ye si le Mawu gbɔ le ʋukɔkɔɖinyaa me ko hafi wòate ŋu anɔ Israel ƒe sitsoƒeduawo ƒe ɖe me. Be dzitsinya nyui nanɔ mía si la, ele be míaxɔ Yesu ƒe vɔsa dzi se, atrɔ le míaƒe nuvɔ̃wo me, ahatrɔ míaƒe agbenɔnɔ. Ele be míabia dzitsinya nyui le adzɔgbeɖeɖe ƒe gbedodoɖa me na Mawu to Kristo dzi, eye míatsɔ nyɔnyrɔ̃xɔxɔ ɖe tsi me awɔ eƒe kpɔɖeŋui. (Petro I, 3:20, 21) Dzitsinya nyui sia akpe ɖe mía ŋu be ƒomedodo dzadzɛ nanɔ mía kple Yehowa dome. Mɔ ɖeka kolia si dzi míato dzitsinya nyui nakpɔtɔ anɔ mía si enye be míawɔ Mawu ƒe nudidiwo dzi ahawɔ dɔ si wode mía si le kpɔɖeŋusitsoƒedua me, abe alesi wòle be sitsoƒedila siwo nɔ blemasitsoƒeduawo me nawɔ ɖe Sea dzi eye woawɔ dɔ si wode asi na wo ene. Gbeƒãɖeɖe Fiaɖuƒe gbedasiae nye Yehowa ƒe amewo ƒe dɔ vevitɔ egbea. (Mateo 24:14; 28:19, 20) Dɔ ma wɔwɔ akpe ɖe mía ŋu míanye dumevi nyuiwo le egbegbe sitsoƒedua me.

11. Nukae wòle be míatsri ne míedi be míanɔ sitsoƒedu si li egbea me dedie?

¹¹ Ne míedo le sitsoƒedu si li egbea me la, ke míetsɔ mía ɖokui de tsɔtsrɔ̃ me elabena Hlɔ̃biala la aho ɖe ʋufɔɖilawo katã ŋu kpuie. Menye fifiae wòle be woakpɔ mí le ametakpɔdu sia godo alo le afɔkuteƒe le eƒe lãnyiƒe ƒe liƒowo dzi o. Ne míaƒe Nunɔlagã la ƒe avulévɔsa dzixɔse nu fa la, kpɔɖeŋusitsoƒedua godoe míava nɔ. (Hebritɔwo 2:1; 6:4-6) Ne míawo hã míetrɔ ɖe xexeame ƒe mɔwo ŋu, míenɔ Yehowa ƒe habɔbɔa me bliboe o, alo míetra tso míaƒe Dziƒofofo ƒe dzidzenu dzɔdzɔeawo gbɔ la, míanɔ dedie o.—Korintotɔwo I, 4:4.

Woɖe Wo tso Sitsoƒedu la Me

12. Ɣeyiɣi didi kae wòle be amesiwo ɖi ʋufɔ tsã nanɔ kpɔɖeŋusitsoƒedua me?

¹² Wobia tso amesi mebua wu ame o si le Israel be wòanɔ sitsoƒedua me “vaseɖe esime nunɔlagã naku.” (Mose IV, 35:28) Eyata ɣeyiɣi didi kae wòle be amesiwo ɖi ʋufɔ tsã la nanɔ kpɔɖeŋusitsoƒedua me? Vaseɖe esime womagahiã Nunɔlagã Yesu Kristo ƒe subɔsubɔdɔwo o. Paulo gblɔ be: “Ate ŋu axɔ amesiwo to edzi va Mawu gbɔ la, ɖe agbe blibo keŋkeŋ.” (Hebritɔwo 7:25) Zi alesi nuvɔ̃ ƒe ɖiƒoƒo kple ʋufɔ si woɖi tsã kpɔtɔ li ko la, wohiã Nunɔlagã ƒe subɔsubɔdɔwo bene tenɔnɔ dzɔdzɔe nanɔ amegbetɔ madeblibowo si le Mawu gbɔ.

13. Amekawoe nye “Israel-viwo” egbea, eye ɣeyiɣi didi kae wòle be woanɔ “sitsoƒedua” me?

¹³ Miɖo ŋku edzi be “Israel-viwo,” amedzrowo, kple wo gbɔ mewoe woɖo blemasitsoƒeduawo na. ‘Israel-viawoe’ nye gbɔgbɔ me Israel-viwo. (Galatiatɔwo 6:16) Zi alesi wogale anyigba dzi ko la, ele be woanɔ kpɔɖeŋusitsoƒedua me. Nukata? Nusitae nye be wogale ŋutilã madebliboa me eye esia ta wohiã woƒe Nunɔlagã si le dziƒo ƒe avuléle. Gake ne Kristotɔ amesiamina siawo ku eye wofɔ wo yi gbɔgbɔmegbenɔnɔ me le dziƒo la, womagahiã Nunɔlagã la ƒe avuléle ƒe subɔsubɔdɔwo o; woagblẽ ŋutilã kple ʋufɔɖiɖi si le edzi la ɖi tegbee. Nunɔlagã la aku le avuléle ƒe ametakpɔkpɔ gome na amesiamina siawo siwo woafɔ ɖe tsitre.

14. Nu bubu ka hãe gabia be amesiwo si dziƒomɔkpɔkpɔ le la nanɔ sitsoƒedu si li egbea me?

¹⁴ Amegbetɔ ƒe nɔnɔme si le ame mawo siwo anye “Kristo ƒe hadomenyilawo” le dziƒo si la bia be woanɔ kpɔɖeŋusitsoƒedua me vaseɖe esime woawu woƒe anyigba dzi subɔsubɔdɔa nu nuteƒewɔwɔtɔe le ku me. Ne woku la, woatsɔ woƒe amegbetɔ ƒe nɔnɔmewo asa vɔe tegbee. (Romatɔwo 8:17; Nyaɖeɖefia 2:10) Amesiwo si amegbetɔ ƒe nɔnɔme le koe Yesu ƒe vɔsa wɔa dɔ na. Eyata Nunɔlagã la aku na amesiwo nye gbɔgbɔ me Israel-viwo ne wofɔ wo ɖe tsitre wozu gbɔgbɔmenuwɔwɔ siwo anɔ dziƒo tegbee anye “Mawu ƒe dzɔdzɔme gomekpɔlawo.”—Petro II, 1:4.

15. Amekawoe nye “amedzrowo” kple “wo gbɔ mewo” egbea, eye nukae Nunɔla Gãtɔ la awɔ na wo?

¹⁵ Ɣekaɣie Nunɔlagã la ‘aku’ na egbegbe “amedzrowo” kple “wo gbɔ mewo” bene mɔ naʋu na wo woado le kpɔɖeŋusitsoƒedua me? Ameha gã me tɔ siawo mate ŋu ado le sitsoƒedu sia me enumake le xaxa gã la megbe o. Nukatae? Elabena woagakpɔtɔ anɔ woƒe nuvɔ̃ŋutilã madeblibo la me eye wòahiã be woaganɔ Nunɔlagã la ƒe takpɔkpɔ te. Ne wowɔ eƒe avuléle ƒe subɔsubɔdɔwo ŋudɔ le eƒe ƒe akpe ɖeka fianyenye kple nunɔlanyenye me la, woaɖo amegbetɔ ƒe blibodede gbɔ. Ɣemaɣi Yesu atsɔ wo aɖo Mawu ŋkume hena woƒe nuteƒewɔwɔ ƒe nyametsododokpɔ mamlea yi ɖe mavɔmavɔ me esime woaɖe asi le Satana kple eƒe gbɔgbɔ vɔ̃wo ŋu ɣeyiɣi kpui aɖe. Le esi woto dodokpɔ sia me do eye Mawu kpɔ ŋudzedze ɖe wo ŋu ta la, Yehowa abu wo ame dzɔdzɔewoe. Esia ana woaɖo amegbetɔ ƒe blibodede ŋutɔŋutɔ gbɔ keŋkeŋ.—Korintotɔwo I, 15:28; Nyaɖeɖefia 20:7-10.a

16. Ɣekaɣie Nunɔlagã la ƒe avuléle subɔsubɔdɔwo magahiã na xaxa gã me agbetsilawo o?

¹⁶ Esia ta ele be xaxa gã me agbetsilawo nalé dzitsinya nyui me ɖe asi le esi woanɔ kpɔɖeŋusitsoƒedua me vaseɖe esime Kristo ƒe Ƒe Akpe Ðeka Dziɖuɖua nawu enu. Ne wozu amegbetɔ deblibowo la, Nunɔlagã la ƒe avuléle ƒe subɔsubɔdɔwo magahiã wo o eye woado le eƒe takpɔkpɔ te. Yesu aku na wo abe Nunɔlagã ene ɣemaɣi, elabena magahiã be wòazã eƒe vɔsa ƒe ameŋuklɔʋua ƒe viɖewo na wo o. Woado le kpɔɖeŋusitsoƒedua me ɣemaɣi.

17. Nukata mahiã be amesiwo woafɔ ɖe tsitre le Kristo ƒe Ƒe Akpe Ðeka Dziɖuɖua me la nayi kpɔɖeŋusitsoƒedua me ahanɔ afima o?

¹⁷ Ðe wòle be amesiwo woafɔ ɖe tsitre le Yesu ƒe Ƒe Akpe Ðeka Dziɖuɖua me ayi kpɔɖeŋusitsoƒedua me nanɔ afima vaseɖe esime nunɔlagã la nakua? Ao, elabena esi woku la, woxe woƒe nuvɔ̃tohehe ŋuti fe. (Romatɔwo 6:7; Hebritɔwo 9:27) Gake Nunɔlagã la akpe ɖe wo ŋu be woaɖo blibodede gbɔ. Ne woto dodokpɔ mamlea me dedie le Ƒe Akpe Ðeka la megbe la, Mawu agatso dzɔdzɔenyenye ƒe afia na wo eye wòana agbe mavɔ wo le anyigba dzi. Gake Mawu ƒe nudidiwo dzi mawɔmawɔ ahe fɔbuʋɔnudɔdrɔ̃ kple tsɔtsrɔ̃ ava amesiwo katã mewɔ nuteƒe le dodokpɔ mamlea me o la dzi.

18. Nukae anɔ anyi kple ameƒomea tegbee le Yesu ƒe fianyenye kple nunɔlanyenye gome?

¹⁸ Israel-viwo ƒe nunɔlagãwo va kuna mlɔeba. Gake Yesu ya “va zu nunɔlagã le Melxizedek ƒe ɖoɖo la nu yi ɖe mavɔmavɔ me.” (Hebritɔwo 6:19, 20; 7:3) Eyata ɖoƒe si le Yesu si abe Nunɔlagã si léa avu ɖe ameƒomea nu ene ƒe tɔtɔ menye eƒe agbe ƒe nuwuwu o. Nu nyui siwo do tso Fia kple Nunɔlagã ƒe subɔsubɔdɔ siwo wòwɔ me aɖe vi na ameƒomea ɖaa, eye amegbetɔwo ada akpe nɛ tegbee le ɖoƒe siawo siwo me wòsubɔ le la ta. Hekpe ɖe eŋu la, Yesu axɔ ŋgɔ le subɔsubɔ dzadzɛ tsɔtsɔ na Yehowa me yi ɖe mavɔmavɔ me.—Filipitɔwo 2:5-11.

Nufiame Vevi Siwo Le Eme na Mí

19. Fuléle kple lɔlɔ̃ ŋuti nufiame kae míate ŋu asrɔ̃ tso sitsoƒeduawo ƒe ɖoɖoa me?

¹⁹ Míate ŋu asrɔ̃ nu vovovowo le sitsoƒeduawo ɖoɖo me. Le kpɔɖeŋu me, womeɖe mɔ be amewula si lé fu ame kukua helĩhelĩ aɖeke nanɔ sitsoƒedu me o. (Mose IV, 35:20, 21) Eyata aleke kpɔɖeŋusitsoƒedua me nɔla aɖe naɖe mɔ fuléle naɖo eƒe dzime ɖe nɔvi aɖe ŋu? Apostolo Yohanes ŋlɔ be: “Amesiame, si léa fu nɔvia la, amewula wònye, eye mienya bena, amewula sia amewula mekpɔa agbe mavɔ wònɔa eme o.” Eyata mina “míalɔ̃ mía nɔewo; elabena lɔlɔ̃ la tso Mawu me.”—Yohanes I, 3:15; 4:7.

20. Nukae wòle be amesiwo le kpɔɖeŋusitsoƒedua me nawɔ be woakpɔ wo ta tso Hlɔ̃biala la si me?

²⁰ Ele be amesi mebua wu ame o la nanɔ sitsoƒedu me, eye magbɔ eƒe lãnyiƒe ƒe liƒowo dzi ayi o, hena takpɔkpɔ tso hlɔ̃biala si me. Ke amesiwo le kpɔɖeŋusitsoƒedua me ya ɖe? Bene woakpɔ wo ta tso Hlɔ̃biala gã la si me la, mele be woadzo le dua me o. Le nyateƒe me le kpɔɖeŋunyagbɔgblɔ nu la, ele be woanɔ ŋudzɔ ɖe nusiwo able wo ayi lãnyiƒea ƒe liƒo dzi ŋu. Ele be woakpɔ nyuie be womaɖe mɔ lɔlɔ̃ na Satana ƒe xexeame natsi ɖe woƒe dzime o. Esia abia gbedodoɖa kple agbadzedze, gake eya dzie woƒe agbe nɔ te ɖo.—Yohanes I, 2:15-17; 5:19.

21. Dɔ si ŋu teƒeɖoɖo le ka wɔmee amesiwo le egbegbe sitsoƒedua me le?

²¹ Wobia tso amesiwo mebua wu ame o si le blemasitsoƒeduawo me be woanye dɔwɔla ɖeviwo. Nenema ke ‘Israel-vi’ amesiaminawo ɖo kpɔɖeŋu nyui ɖi le nuŋelawo kple Fiaɖuƒe gbeƒãɖelawo nyenye me. (Mateo 9:37, 38; Marko 13:10) Esi Kristotɔ siwo si anyigba dzi nɔnɔ ƒe mɔkpɔkpɔ le nye “amedzrowo” kple “wo gbɔ mewo” le sitsoƒedu si li egbea me ta la, mɔnukpɔkpɔ su wo si be woawɔ agbeɖedɔ sia kple amesiamina siwo gale anyigba dzi. Eye dɔ si ŋu teƒeɖoɖo le kae nye si! Amesiwo le dɔ wɔm nuteƒewɔwɔtɔe le kpɔɖeŋusitsoƒedua me asi le ku mavɔ nu le Hlɔ̃biala la si me. Le nyateƒe me la, viɖe mavɔwo boŋue eƒe Mawu ƒe Nunɔla Gãtɔ nyenye ƒe subɔsubɔdɔwo anye na wo. Ànɔ sitsoƒedua me be nànɔ agbe tegbeea?

[Etenuŋɔŋlɔ]

Aleke Nàɖo Wo Ŋui?

◻ Nukatae woate ŋu agblɔ be ame biliɔn siwo le anyigba dzi ɖi ʋufɔ?

◻ Ðoƒe kawoe Yesu Kristo le na ameƒomea?

◻ Nukae nye kpɔɖeŋusitsoƒedu la, eye aleke woawɔ age ɖe eme?

◻ Ɣekaɣie woaɖe amewo tso kpɔɖeŋusitsoƒedua me?

◻ Nufiame vevi kawoe míate ŋu asrɔ̃ tso sitsoƒeduawo ƒe ɖoɖoa me?

[Nɔnɔmetata si le axa 16]

Ènya ɖoƒe vevi siwo Yesu Kristo xɔa?