Ðe Nèle Mawu Ƒe Lɔlɔ̃nu Wɔmaa?

YHOWA ÐASEFO eve do go Episcopal Sɔlemeha nunɔla aɖe le woƒe aƒeme yi aƒeme dɔa me. Edze dzidzɔmee, eɖo ge, axɔ abe ƒe 60 ene eye wòdo awudedee si dzi woŋlɔ eƒe sɔlemeha la ƒe ŋkɔ ɖo. Egblɔ zi ɖeka be: “Adzɔ dzi nam ŋutɔ ne míaƒe hameviwo hã ɖe wotsɔ dzo ɖe Nya la kaka ŋu abe miawo ene, gake ele be magblɔ na mi be miagava aƒenye me azɔ o.”

Ẽ, Yehowa Ðasefowo ƒe dɔa dzea ame geɖe ŋu eye wokafua wo ɖe woƒe veviedodo kple dzonɔnɔameme ta. Gake nusi wɔm Ðasefoawo le medzroa wo koŋ kaka woa ŋutɔwo nahayi dɔa wɔwɔ ŋu bu ge o. Gake nɔnɔme siawo siwo dze ƒã be wotsi tre ɖe wo nɔewo ŋu la menye nu yeye o. Yesu de dzesii le eƒe ŋkekea me eye wòtsɔ kpɔɖeŋu si nana wobua tame tsɔ te gbe ɖe edzii vevie.

“Nuka miesusuna? Vi eve le ame aɖe si, eye wòva gbãtɔ gbɔ gblɔ bena: Vinye, heyi nawɔ dɔ le weinbɔ la me egbe. Ke eɖo eŋu gblɔ bena: Megbe! Ke emegbe la evee, eye wòyi. Eye esi wòva evelia gbɔ la, egagblɔe nɛ nenema ke. Eya ɖo eŋu gblɔ bena: Aƒetɔ, mayi! Ke meyi o. Ame eve siawo dometɔ kae wɔ fofoa ƒe lɔlɔ̃nu mahã?”—Mateo 21:28-31.

Ŋuɖoɖoa dze ƒã. Míaɖo eŋu abe ameha siwo se Yesu ƒe nya la ene be “Gbãtɔ lae.” Gake ne míeda ŋku ɖe eme yi ŋgɔe la, míakpɔ be Yesu to kpɔɖeŋu ma dzi he míaƒe susu yi edzi be nusi Fofo la di wɔwɔ ye nye nusi le vevie. Togbɔ be vi gbãtɔa gblɔ be yemedi be yeayi o hã la, eva yi eye wokafui. Nenema ke dɔ nyuitɔ si sɔ la hã wɔwɔ le vevie. Vi gbãtɔa wɔ nu be wòyi va wɔ dɔ le fofoa ƒe weinbɔ me; metso va wɔ dɔ le eya ŋutɔ ƒe weinbɔ me o.

Gɔmesese kae le esiawo katã ŋu na mí? Nukae Mawu di tso esubɔlawo si egbea? Nukae míasrɔ̃ tso Yesu ƒe agbenɔnɔ me si akpe ɖe mía ŋu be míawɔ Fofoa ƒe lɔlɔ̃nu? Nyabiabia veviwoe esiawo nye eye ne míekpɔ ŋuɖoɖo nyuitɔwo la afia míaƒe nyonyo mavɔ elabena “amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.”—Yohanes I, 2:17; Efesotɔwo 5:17.

Nukae Nye “Mawu ƒe Lɔlɔ̃nu”?

Ŋkɔnya si nye “lɔlɔ̃nu” dze zi gbɔ zi 80 le Comprehensive Concordance of the New World Translation of the Holy Scriptures me. Wozãe abe zi gbɔ zi 60 ene le afisiwo wòdze le (alo alafa memamã 75 le wo katã me) tsɔ ƒo nu le Mawu ƒe lɔlɔ̃nu ŋui. Nyagbɔgblɔ siwo nye “Mawu ƒe didi,” “Fofonye ƒe lɔlɔ̃nu,” kple “Mawu ƒe lɔlɔ̃nu” dze zi gbɔ zi 20 kple vɔ. Míate ŋu akpɔe le afisia be ele be Mawu ƒe lɔlɔ̃nu nanye nu vevi gbãtɔ na mí. Ele be Mawu ƒe lɔlɔ̃nu wɔwɔ nanye nu vevitɔ si me míatsɔ ɖe le le agbe me.

Ŋkɔnya “lɔlɔ̃nu” le Eŋlisigbe me gɔmee nye ‘dzodzro, didi, tameɖoɖo kplikpaa, nudidi aɖe, vevietɔ amesi si ŋusẽ alo ŋutete le ƒe tiatia aɖe alo tameɖoɖo kplikpaa.’ Eyata lɔlɔ̃nu, didi alo tameɖoɖo kplikpaa le Yehowa, Ŋusẽtɔ Gãtɔ la si. Eyae nye didi ka? Ŋɔŋlɔawo gblɔ na mí be eƒe akpa aɖee nye “[Mawu] le didim be, woaxɔ amewo katã, bena woava nyateƒe ƒe sidzedze la [gbɔ].” (Timoteo I, 2:4) Yesu Kristo kple Kristotɔ gbãtɔwo tsɔ dzi blibo wɔ dɔe be woana sidzedze vavãtɔ sia nasu ame bubuwo si.—Mateo 9:35; Dɔwɔwɔwo 5:42; Filipitɔwo 2:19, 22.

Amekawoe le Mawu ƒe lɔlɔ̃nu wɔm egbea? Le ame biliɔn eve kloe siwo gblɔna be Yesu Kristo yomedzelawo yewonye dome la, ame nenie ɖi ŋutsuvi gbãtɔ si le Yesu ƒe lododoa me, amesi yi ɖawɔ fofoa ƒe lɔlɔ̃nu? Eŋuɖoɖo mesesẽ o. Yesu Kristo yomedzela vavãtɔwo anɔ dɔ si wògblɔ be woawɔ la wɔm be: “Ele be, woaɖe gbeƒã nyanyui la afia dukɔwo katã gbãgbiagbã.” (Marko 13:10) Yehowa Ðasefo siwo ƒe xexlẽme wu miliɔn ene kple afã le xexeame katã la tsɔ dzonɔameme le gbeƒã ɖem Mawu ƒe Fiaɖuƒe ŋutinya nyuia hele nu fiam ame bubuwo, eye wole asi fiam Fiaɖuƒea be eya koe nye ameƒomea ƒe mɔkpɔkpɔ ɖeka kolia si ahe ŋutifafa kple dedienɔnɔ vɛ. Ðe nèle gome kpɔm le Mawu ƒe lɔlɔ̃nu wɔwɔ me bliboea? Èle gbeƒã ɖem Fiaɖuƒe ŋutinya nyuia abe alesi Yesu wɔe enea?—Dɔwɔwɔwo 10:42; Hebritɔwo 10:7.

Dzidzɔkpɔkpɔ le Mawu ƒe Lɔlɔ̃nu Wɔwɔ Me

Togbɔ be dzidzɔ le nusi Fofo la ƒe lɔlɔ̃nu nye sɔsrɔ̃ me hã la, dzidzɔ geɖe wu le Mawu ƒe lɔlɔ̃nu fiafia ame bubuwo me. Yesu kpɔ dzidzɔ esi wòfia nu amewo le Fofoa ŋu. Enɔ nɛ ko abe nuɖuɖu ene. (Yohanes 4:34) Dzidzɔ vavãtɔ asu míawo hã mía si ne míewɔ nu abe alesi Yesu wɔe ene, si nye be míaɖe gbeƒã nusiwo wòfia mí, nusiwo wòxɔ tso Fofoa gbɔ la ahafia wo amewo. (Mateo 28:19, 20) Abe alesi Yesu do ŋugbee ene la, ‘Ne mienya nusiawo, eye miewɔ wo la, dzi adzɔ mi.’—Yohanes 13:17.

Le kpɔɖeŋu me: Vidada aɖe si gadze ɣeyiɣiawo katã ƒe subɔsubɔdɔa gɔme nyitsɔ laa la gblɔ be: “Enyea dzidzɔ ŋutɔ ne èkpɔ be dzi le Biblia-nusrɔ̃vi aɖe dzɔm le esi Biblia me nyateƒe vovovowo le eƒe dzi gbɔ ɖom ta! Dzidzɔ ma tɔgbee wònye nam ne mekpɔ nye nusrɔ̃vi ɖeka wòtsɔ asi ŋlɔ ŋɔŋlɔawo katã ɖi do ŋgɔ na nusɔsrɔ̃a eye wòde dzesi nuwo ne míele nua srɔ̃m ale be wòate ŋu aɖo numetotobiabia ɖesiaɖe ŋu emegbe.” Nyateƒea ɖo eƒe Biblia-nusrɔ̃viwo dometɔ bubu gbɔ le eƒe ƒewuiwo me. Esi wòɖe srɔ̃ fifia eye eya ŋutɔ ƒe kuxi aɖewo te ɖe edzi la, edi be yeake ɖe Ðasefoawo ŋu. Aleke gbegbe dzi dzɔe enye si esi nɔvinyɔnu mɔɖela la va ke ɖe eŋu! Wokpe ɖe ɖetugbi sia ŋu be wògadze eƒe Biblia-nusɔsrɔ̃ gɔme.

Dzidzɔkpɔkpɔ Ðaa le Mawu ƒe Lɔlɔ̃nu Wɔwɔ Me

Blema Israel-fia Dawid nye amesi di be yeawɔ Mawu ƒe lɔlɔ̃nu le eƒe agbe me katã. Togbɔ be nɔnɔme sesẽ kple nuteɖeamedzi geɖe va edzi hã la, gbɔgbɔ ʋãe wògblɔ be: “Nye Mawu, wò lɔlɔ̃nu wɔwɔ enye nye dzidzɔ, eye wò se la le nye dzi me.” (Psalmo 40:9) Yehowa ƒe lɔlɔ̃nu wɔwɔ nɔ Dawid ƒe luʋɔ, eƒe ametia ŋutɔŋutɔ me. Emae nye nusita wòkpɔa dzidzɔ si nu meyina o la le Yehowa subɔsubɔ me. Mawu ƒe lɔlɔ̃nu wɔwɔ menye nu sesẽ na Dawid o. Ke boŋ enye dzidzɔ nɛ, nusi tso eƒe dzime. Eʋli le eƒe agbe me katã be wòawɔ etɔ sinua be wòasubɔ Yehowa eƒe Mawu la togbɔ be ewɔ nuvɔ̃ hegbɔdzɔ ɣeaɖewoɣi hã.

Míaƒe dzidzɔkpɔkpɔ dzi ate ŋu aɖe kpɔtɔ ɣeaɖewoɣi. Nu ate ɖe mía dzi alo dzi aɖe le mía ƒo. Ðewohĩ nusiwo dzɔ va yi aganɔ fu ɖem na mí kokoko, míaƒe dzitsinya anɔ fu ɖem na mí le nuvɔ̃ aɖe si míewɔ gbaɖegbe va yi la ta. Zi geɖe la, míate ŋu aɖu seselelãme siawo dzi ne míegasrɔ̃ Mawu ƒe Nya la ɖe edzi nyuie. Míate ŋu aɖoe be míaŋlɔ Mawu ƒe se la ɖe míaƒe “dzi me” abe alesi Dawid wɔe ene. Ne míedze agbagba tsɔ dzi blibo wɔ Mawu ƒe lɔlɔ̃nu, si fia be míawɔe alesi míate ŋui la, aɖo eteƒe na mí pɛpɛpɛ elabena nuteƒetɔ wònye.—Efesotɔwo 6:6; Hebritɔwo 6:10-12; Petro I, 4:19.

Dzidzɔtɔe le Hebritɔwo 10:5-7 la, apostolo Paulo yɔ nya tso Dawid ƒe nya siwo le Psalmo 40:7-9 me eye wòzãe ɖe Yesu Kristo ŋu. Paulo wɔ esia tsɔ fia alesi Yesu nɔ kple Fofoa kplikplikplii. Hebrigbe me nya si wozã na “lɔlɔ̃nu” gɔme nye, ‘dzidzɔ, didi, lɔlɔ̃nu, alo nudzeameŋu.’ Eyata Psalmo 40:9 xlẽ ku ɖe Kristo ŋu ko be: “Nye Mawu, nusi dzea ŋuwò wɔwɔ enye nye dzidzɔ.”a Yesu di be yeawɔ nusi dzea ye Fofo ŋu. Yesu wɔ nu geɖe wu nusi wodi tso esi ko. Ewɔ nusi dzɔa dzi na Fofoa ƒe dzi eye ese vivi le ewɔwɔ me.

Yesu ƒe agbe katã nɔ te nufiafia ame bubuwo le nusi Mawu ƒe lɔlɔ̃nu nye kple nusi woawɔ be Mawu nayra wo la ŋuti dzi. Ɣeyiɣiawo katã ƒe gbeƒãɖela kple nufiala wònye eye ekpɔ dzidzɔ geɖe le dɔ ma wɔwɔ me. Eyata efia be zi alesi míewɔ Yehowa ƒe dɔ la, zi nenemae míakpɔ dzidzɔe. Ðe nàte ŋu awɔ ɣeyiɣiawo katã ƒe gbeƒãɖeɖedɔa, ale be wò hã wò dzidzɔ nagba goa?

Nu bubu si hã akpe ɖe mía ŋu be míakpɔtɔ akpɔ dzidzɔ ɖaa le Mawu ƒe lɔlɔ̃nu wɔwɔ mee nye be etsɔ me nanɔ susu me na mí vevie. Nenemae wònɔ susu me na Yesu. ‘Amesi do dzi kpe fu le fuwɔameti ŋuti, eye mebu ŋukpe o le dzidzɔ, si woɖo ɖi nɛ la ta.’ Le eya gome la, nuteƒewɔwɔ na Mawu vaseɖe nuwuwu emegbe fetu si nye fianyenye le Fofoa ƒe ɖusime si wòaxɔ lae nye dzidzɔ nɛ.—Hebritɔwo 12:2.

Kpɔ dzidzɔ si gbegbe amesiwo ayi edzi awɔ Mawu ƒe lɔlɔ̃nu akpɔ le etsɔ me ɖa. Woakpɔ eteƒe woatsrɔ̃ amesiwo tea tɔ ɖe woa ŋutɔwo ƒe ɖokuitɔdidi ƒe lɔlɔ̃nu wɔwɔ dzi ne esia ahe fukpekpe vɛ na amesiwo dzea agbagba be yewoawɔ Mawu ƒe lɔlɔ̃nu gɔ̃ hã. (Tesalonikatɔwo II, 1:7, 8) Bu dzidzɔ si lɔlɔ̃tɔ kukuawo akpɔ ne mɔnukpɔkpɔ su wo si be woasrɔ̃ Mawu ƒe lɔlɔ̃nu ahawɔe la ŋu kpɔ ko. Alo de ŋugble le Mawu ƒe tameɖoɖo be yeagbugbɔ awɔ anyigba wòazu Paradisoe la ŋu. Eye mlɔeba la, bu ablɔɖe si Satana amesi tsia tre ɖe Yehowa ƒe lɔlɔ̃nu ŋu tsɔtsrɔ̃ keŋkeŋ anye la ŋu kpɔ ko.

Ẽ, Mawu ƒe lɔlɔ̃nu wɔwɔ egbea ate ŋu ahe dzidzɔ geɖe vɛ fifia eye wòahe dzidzɔ mavɔ vɛ le etsɔ me. Aleke amewo ɖaxɔ mí le gbeƒãɖeɖedɔa mee o, mina míasrɔ̃ Yesu ƒe kpɔɖeŋua le esi wòkpɔ dzidzɔ ɖe Fofoa ƒe lɔlɔ̃nu wɔwɔ ŋu me.

[Etenuŋɔŋlɔ]