Ta 17
‘Luʋɔ Siwo Wowu’ la Xɔ Teƒeɖoɖo
1. Ɣeyiɣi ka mee míele fifia, eye esia ŋuti ɖaseɖiɖi kae li?
MAWU ƒe Fiaɖuƒea le dzi ɖum! Sɔ ɣi Dola la yina eƒe aʋadziɖuɖu la nu wu ge! Sɔ dzĩa, sɔ yibɔa kple sɔ hẽ la le du dzi to anyigba dzi! Ðikeke mele eme o be Yesu ŋutɔ ƒe nyagblɔɖi siwo ku ɖe eƒe anyinɔnɔ abe Fia ene ŋu la le eme vam. (Mateo ta 24, 25; Marko ta 13; Luka ta 21) Ẽ, míele nuɖoanyi sia ƒe ŋkeke mamleawo me. (Timoteo II, 3:1-5) Esi nya la le alea ta la, mina míalé ŋku ɖe Alẽvi Yesu Kristo ŋu nyuie esime wòle agbalẽ ŋɔ́ŋlɔ ma ƒe nutrenu atɔ̃lia ɖem ɖa. Nyaɖeɖefia bubu ka mee míakpɔ gome le azɔ?
2. (a) Nukae Yohanes kpɔ esi woɖe nutrenu atɔ̃lia ɖa? (b) Nukatae mele be wòawɔ nuku na mí be míaxlẽe be kpɔɖeŋu ƒe vɔsamlekpui le dziƒo o?
2 Yohanes ƒo nu tso nukpɔkpɔ ʋãme aɖe ŋu be: “Eye esime wòɖe nutrenu atɔ̃lia ɖa la, mekpɔ amesiwo wowu le Mawu ƒe nya kple ɖaseɖiɖi, si wolé ɖe asi ŋuti la, ƒe luʋɔwo le vɔsamlekpui la te.” (Nyaɖeɖefia 6:9) Nukae nye ma? Vɔsamlekpui le dziƒoa? Ẽ! Esiae nye zi gbãtɔ si Yohanes ƒo nu tso vɔsamlekpui ŋu. Gake eƒo nu tso Yehowa, amesi le Eƒe fiazikpui dzi, kerubi siwo ƒo xlãe, atsiaƒu si me kɔ, dzokakatiawo kple amegã xoxo 24 siwo le dzudzɔ ʋeʋẽe dom la ŋu xoxo—eye esiawo katã ɖi anyigba dzi avɔgbadɔ si nye Yehowa ƒe kɔkɔeƒe le Israel la me nuwo. (Mose II, 25:17, 18; 40:24-27, 30-32; Kronika I, 24:4) Ekema ɖe wòle be wòawɔ nuku na mí be míakpɔ kpɔɖeŋu ƒe vɔsamlekpui hã le dziƒoa?—Mose II, 40:29.
3. (a) Le blema Yudatɔwo ƒe takpegbadɔa me la, aleke wokɔ luʋɔwo “ɖe vɔsamlekpui . . . la te”? (b) Nukatae Yohanes kpɔ ɖasefo siwo wowu la ƒe luʋɔwo le kpɔɖeŋu ƒe vɔsamlekpui te le dziƒo?
3 “Amesiwo wowu le Mawu ƒe nya kple ɖaseɖiɖi, si wolé ɖe asi ŋuti la, ƒe luʋɔwo” le vɔsamlekpui sia te. Nukae esia fia? Esiawo mate ŋu anye luʋɔ siwo do go tso ŋutilã me—abe esiwo dzi Helatɔ trɔ̃subɔlawo xɔ se ene—la o. (Mose I, 2:7; Xezekiel 18:4) Ðe ema teƒe la, Yohanes nya be wotsɔa ʋu tsia tre ɖi na luʋɔ alo agbe, eye ne nunɔlawo wu vɔsalã aɖe le blema Yudatɔwo ƒe takpegbadɔa me la, wohlẽa ʋu la “ɖe vɔsamlekpui la ŋu godoo ava kpe” alo wokɔnɛ “ɖe vɔsamlekpui . . . la te.” (Mose III, 3:2, 8, 13; 4:7; 17:6, 11, 12) Eyata kadodo kplikplikpli le lã la ƒe luʋɔ kple vɔsamlekpui la dome. Gake nukatae wokpɔ Mawu ƒe subɔla siawo ƒe luʋɔwo alo ʋu le kpɔɖeŋu ƒe vɔsamlekpui te le dziƒo? Nusitae nye be wobu woƒe ku la vɔsakue.
4. Mɔ ka nue Kristotɔ siwo wotsɔ gbɔgbɔ dzi ƒe ku nye vɔsa le?
4 Le nyateƒe me la, amesiwo katã wodzi abe Mawu ƒe gbɔgbɔ me viwo ene la kua vɔsaku. Le akpa si woawɔ le Yehowa ƒe Dziƒofiaɖuƒea me ta la, enye Mawu ƒe lɔlɔ̃nu be woaɖe asi le agbe mavɔ nɔnɔ le anyigba dzi ƒe mɔkpɔkpɔ ɖesiaɖe ŋu ahatsɔe asa vɔe. Le go sia me la, wolɔ̃na kua vɔsaku le Yehowa ƒe fianyenye ta. (Filipitɔwo 3:8-11; tsɔe sɔ kple 2:17.) Esia nye nyateƒe ŋutɔŋutɔ le amesiwo Yohanes kpɔ le vɔsamlekpuia te la gome. Wonye amesiamina siwo wowu le wo ŋɔli le subɔsubɔdɔ si wowɔ veviedodotɔe le Yehowa ƒe Nya kple eƒe fianyenye ta ʋiʋli me la ta. ‘Wowu woƒe luʋɔwo le Mawu ƒe nya kple ɖaseɖiɖi [mar·ty·riʹan], si wolé ɖe asi la ta.’
5. Aleke wònye be nuteƒewɔlawo ƒe luʋɔwo ku gake wole ɣli dom be woabia hlɔ̃ ɖe yewo tae?
5 Nukpɔkpɔ la yi edzi: “Eye wodo ɣli kple gbe gã le gbɔgblɔm bena: Aƒetɔ kɔkɔetɔ kple nyateƒetɔ, ŋkeke nenie nye si mèdrɔ̃ ʋɔnu, eye mèbia hlɔ̃ ɖe míaƒe ʋu ta le amesiwo le anyigba dzi la si o mahã?” (Nyaɖeɖefia 6:10) Aleke woƒe luʋɔwo alo ʋu ate ŋu ado ɣli agblɔ be woabia hlɔ̃e, esi wònye Biblia ɖee fia be ame kukuwo menya naneke o? (Nyagblɔla 9:5) Ðe ame dzɔdzɔe Habel ƒe ʋu ƒe gbe meɖi le esime Kain wui la megbe oa? Yehowa gblɔ na Kain ɣemaɣi be: “Nuka enye esi nèwɔ? Kpɔ ɖa, nɔviwò ƒe ʋu, si nèkɔ ɖe anyi la ƒe gbe le ɖiɖim tso anyigba dzi mese!” (Mose I, 4:10, 11; Hebritɔwo 12:24) Menye ɖe Habel ƒe ʋu nɔ nu ƒom ŋutɔŋutɔ o. Ke boŋ Habel nye amesi meɖi fɔ o hafi ku, eyata ʋɔnu dzɔdzɔe dɔdrɔ̃ bia be woahe to na ewula. Nenema kee xɔsetakukula Kristotɔ mawo meɖi fɔ o, eyata ele be woabia hlɔ̃ ɖe wo ta le dzɔdzɔenyenye nu. (Luka 18:7, 8) Ɣlidodo be woabia hlɔ̃ la le ɖiɖim sesĩe elabena ame akpe geɖe ye ku nenema.—Tsɔe sɔ kple Yeremya 15:15, 16.
6. Ʋu maɖifɔ kɔkɔ ɖe anyi ka ƒe hlɔ̃e wobia le ƒe 607 D.M.Ŋ. me?
6 Míate ŋu atsɔ nɔnɔmea asɔ kple esi nɔ Yuda si gbe xɔse la esime Fia Manase va nɔ zia dzi le ƒe 716 D.M.Ŋ. me. Ekɔ ʋu maɖifɔ geɖe ɖi, eye anye be eyae ‘dze’ nyagblɔɖila Yesaya ‘kple laxalaxa.’ (Hebritɔwo 11:37; Fiawo II, 21:16) Togbɔ be emegbe Manase trɔ dzime heɖɔ agbenɔnɔ ɖo hã la, ʋufɔɖiɖi ma nɔ anyi. Esi Babilontɔwo wɔ Yuda-fiaɖuƒea aƒedoe le ƒe 607 D.M.Ŋ. la, “le Yehowa ƒe nya la nu ko esia va Yuda dzi ɖo, ne wòatee ɖa le eƒe ŋku ta le Manase ƒe nuvɔ̃wo kple nusiwo katã wòwɔ la ŋuti; hekpe ɖe ʋu maɖifɔ, si wòkɔ ɖe anyi, eye wòtsɔ ʋu maɖifɔ yɔ Yerusalem taŋ la ŋuti; eyata Yehowa mebe yeatsɔe ake o.”—Fiawo II, 24:3, 4.
7. Ameka koŋ ye ɖi “ame kɔkɔewo ƒe ʋu” kɔkɔ ɖi ƒe fɔ?
7 Abe alesi wònɔ le Biblia ƒe ɣeyiɣiwo me ene la, egbea ame geɖe siwo wu Mawu ƒe ɖasefowo la ku xoxoxo. Gake habɔbɔ si na wowu wo la kpɔtɔ li eye eɖi ʋufɔ. Eyae nye Satana ƒe anyigba dzi habɔbɔ si nye eƒe dzidzimevi le anyigba dzi la. Eƒe akpa vevi aɖe enye Babilon Gã si nye alakpasubɔsubɔ ƒe xexemefiaɖuƒe la.a Woƒo nu tso eŋu be emu “ame kɔkɔewo ƒe ʋu kple Yesu ƒe ɖaseɖilawo ƒe ʋu.” Ẽ, “wokpɔ nyagblɔɖilawo kple ame kɔkɔewo kpakple amesiwo katã wowu le anyigba dzi la, ƒe ʋu le eme.” (Nyaɖeɖefia 17:5, 6; 18:24; Efesotɔwo 4:11; Korintotɔwo I, 12:28) Ʋufɔɖiɖi gã kae nye si! Zi alesi Babilon Gã la li ko la, amesiwo wòwu la ƒe ʋu anɔ ɣli dom be woawɔ nu ɖe dzɔdzɔenyenye nu na yewo.—Nyaɖeɖefia 19:1, 2.
8. (a) Amekawoe ku le woƒe xɔse ta le Yohanes ƒe agbenɔɣi? (b) Yometiti kawoe Roma-fiawo he vɛ?
8 Yohanes ŋutɔ kpɔ amewo ƒe xɔsetaku kuku teƒe le ƒe alafa gbãtɔ me esime Da sẽŋuta la kple eƒe dzidzimevi si le anyigba dzi la wɔ aʋa kple Kristotɔ amesiaminawo ƒe hame si nɔ dzidzim ɖe edzi la. Yohanes kpɔ eteƒe esime woklã míaƒe Aƒetɔ ɖe ati ŋu eye wòdo le eme esime wowu Stefano, eya ŋutɔ nɔvia Yakobo, Petro, Paulo kple eƒe zɔhɛ kplikplikpli bubuwo. (Yohanes 19:26, 27; 21:15, 18, 19; Dɔwɔwɔwo 7:59, 60; 8:2; 12:2; Timoteo II, 1:1; 4:6, 7) Le ƒe 64 M.Ŋ. me la, Roma-fia Nero da ame bubu ƒe nu gbegblẽ wɔwɔ ƒe agba ɖe Kristotɔwo dzi hetso wo nu be woawoe tɔ dzo dua, be wòatsɔ atsi nya si gblɔm amewo le be eyae wɔe la nu. Ŋutinyaŋlɔla Taxito ka nya ta bena: “[Kristotɔwo] woku le vlodoame ƒe mɔwo nu; wofa lã wɔadãwo ƒe ŋutigbalẽ ɖe wo dometɔ aɖewo ŋu hena avũwo vuvu wo, eye [woklã] wo dometɔ aɖewo [ɖe ati ŋu], wotɔ dzo wo dometɔ aɖewo abe akakatiwo ene le zã me.” Yometiti bubu si va le Fia Domitian ƒe dziɖuɣi (ƒe 81-96 M.Ŋ.) na woɖe aboyo Yohanes yi Patmo-ƒukpoa dzi. Abe alesi Yesu gblɔe ene la: “Ne woti yonyeme la, woati miawo hã yome.”—Yohanes 15:20; Mateo 10:22.
9. (a) Ameblenu gã kae Satana ɖo anyi le ƒe alafa enelia M.Ŋ. me, eye nuka ƒe akpa vevitɔe wònye? (b) Aleke Kristodukɔa me dziɖula aɖewo wɔ nu ɖe Yehowa Ðasefowo ŋue le Xexemeʋa I kple II me?
9 Le ƒe alafa enelia M.Ŋ. me la, Da xoxo ma, si nye Satana Abosam, ɖo eƒe ameblenu gã si nye Kristodukɔa ƒe alakpasubɔsubɔ si gbe xɔse—si nye Babilon-nuɖoanyi si wotsɔ “Kristotɔnyenye” tsyɔ ŋkume na—la anyi. Eyae nye Da la ƒe dzidzimevi la ƒe akpa vevitɔ eye edzi ɖe edzi va zu kɔmamã geɖe siwo tsi tre ɖe wo nɔewo ŋu. Abe blema Yuda si mewɔ nuteƒe o ene la, Kristodukɔa ɖi ʋufɔ gã aɖe le esi wòde akpa evea siaa dzi vevie le Xexemeʋa I kple II me ta. Kristodukɔa me dunyahedziɖula aɖewo gɔ̃ hã tsɔ aʋawɔwɔ siawo wɔ taflatsedodo hena Mawu ƒe subɔla amesiaminawo wuwu. Esi Friedrich Zipfel ƒe agbalẽ si nye Kirchenkampf in Deutschland (Sɔlemehawo ƒe Avuwɔwɔ le Germania) ƒe numetoto aɖe nɔ nya ta kam le Yehowa Ðasefowo yome si Hitler ti ŋuti la, egblɔ be: “Wowu [Ðasefoawo] dometɔ ɖeka le etɔ̃ ɖesiaɖe me, to wo wuwu, ŋutasẽnuwɔna bubuwo, dɔwuame, dɔléle alo kluvidɔ wɔwɔ dzi. Alesi teteɖeto sia sẽ ŋue la tɔgbe menɔ anyi kpɔ o eye etso xɔse maʋãmaʋã si mewɔ ɖeka kple Nusianu Nanye Dukɔa Tɔ ƒe dunyahehe ƒe nukpɔsusua o la gbɔ.” Nyateƒee, woate ŋu agblɔ le Kristodukɔa kple eƒe osɔfowo ŋu be: “Ame maɖifɔ dahewo ƒe ʋu hã le wò avɔ toga.”—Yeremya 2:34.b
10. Yometiti kawo ƒe fue ɖekakpui siwo nye ameha gã la me tɔwo kpe le anyigba geɖe dzi?
10 Tso ƒe 1935 me la, ɖekakpui anukwareɖila siwo le ameha gã la me dzie yometiti sesẽtɔ kekeake va le anyigba geɖe dzi. (Nyaɖeɖefia 7:9) Esime Xexemeʋa II nɔ enu wum le Europa kura gɔ̃ hã la, wowu Yehowa ƒe ɖasefo sɔhɛ 14 to ka dede ve na wo dzi. Nuvɔ̃ kae wowɔ? Wobe ‘yewomagasrɔ̃ aʋawɔwɔ azɔ o.’ (Yesaya 2:4) Nyitsɔ laa la, woƒo ɖekakpuiwo woku alo woda tu wo woku le Ɣedzeƒe kple le Afrika le nya ma ke ta. Kakaɖedzi li be woafɔ xɔsetakukula sɔhɛ siawo siwo nye Yesu nɔvi amesiaminawo ƒe kpeɖeŋutɔ siwo dze la ɖe tsitre woanɔ anyigba yeye si ŋugbe wodo la dzi.—Petro II, 3:13; tsɔe sɔ kple Psalmo 110:3; Mateo 25:34-40; Luka 20:37, 38.
Awu Ʋlaya Ɣi
11. Gɔmesese ka nue wonaa “awu ʋlaya ɣi” Kristotɔ amesiamina siwo ku xɔsetaku la le?
11 Esi apostolo Paulo ŋlɔ nu tso nuteƒewɔla blematɔwo ƒe xɔse ŋu vɔ la, egblɔ be: “Eye amesiawo katã la, wònye woxɔ ɖaseɖiɖi nyui to xɔse me hafi, gake woƒe asi mesu ŋugbedodo la dzi o; elabena Mawu kpɔ nu aɖe, si nyo wu la, da ɖi na mí, bena womagawɔ wo blibo míawo mía eme manɔmanɔ o.” (Hebritɔwo 11:39, 40) Nukae nye “nu aɖe, si nyo wu” ma si Paulo kple Kristotɔ amesiamina bubuwo le mɔ kpɔm na? Yohanes kpɔe le ŋutega me le afisia: “Eye wona awu ʋlaya ɣi wo dome amesiame, eye wogblɔ na wo bena, woadzudzɔ ɣeyiɣi kpui aɖe, yiɖase esime woƒe hadɔlawo kple wo nɔvi, siwo wole wuwu ge abe woawo ke ene la, hã ƒe xexlẽme nu nade.” (Nyaɖeɖefia 6:11) “Awu ʋlaya ɣi” si wona wo la ku ɖe wo fɔfɔ ɖe tsitre be woazu gbɔgbɔ me nuwɔwɔ makumakuwo la ŋu. Womegale vɔsamlekpuia te abe luʋɔ siwo wowu ene o, ke boŋ wofɔ wo ɖe tsitre be woanɔ amegã xoxo 24 ƒe ha si dea ta agu le Mawu ƒe dziƒofiazikpuia ŋgɔ la me. Wona fiazikpuiwo woa ŋutɔwo le afima, esi fia be fianyeye ƒe mɔnukpɔkpɔwo su wo si. Eye “wodo awu ʋlaya ɣiwo” hetsɔ le fiafiam be wotso dzɔdzɔenyenye ƒe afia na wo be wodze na bubunɔƒe le Yehowa ŋkume le dziƒoʋɔnu ma. Esia hã nye ŋugbe si Yesu do na Kristotɔ amesiamina siwo le Sardis-hamea me la ƒe emevava: “Amesi ke ɖu dzi la, woado awu ɣiwo na eyama.”—Nyaɖeɖefia 3:5; 4:4; Petro I, 1:4.
12. Aleke amesiamina siwo wofɔ ɖe tsitre la ‘dzudzɔna ɣeyiɣi kpui aɖee,’ eye vaseɖe ɣekaɣi?
12 Ðaseɖiɖia katã ɖee fia be tsitretsitsi yi dziƒo sia dze egɔme le ƒe 1918 me le Yesu ɖoɖo fiae le ƒe 1914 me kple eƒe gododo be wòadze eƒe aʋadziɖuɖu abe fia ene gɔme to Satana kple eƒe gbɔgbɔ vɔ̃wo ɖeɖe ɖa le dziƒo dzi la megbe. Gake wogblɔ na amesiamina mawo siwo wofɔ ɖe tsitre la be ele be “woadzudzɔ ɣeyiɣi kpui aɖe, yiɖase esime woƒe hadɔlawo . . . hã ƒe xexlẽme” nu nade. Ele be Yohanes habɔbɔ la me tɔ siwo kpɔtɔ le anyigba dzi la naɖe woƒe nuteƒewɔwɔ afia le dodokpɔ kple yometiti me, eye ɖewohĩ woagawu wo dometɔ aɖewo. Gake mlɔeba la, woabia ʋu dzɔdzɔe siwo katã Babilon Gã la kple eƒe dunyahehiãviwo kɔ ɖi la ƒe hlɔ̃. Ke fifia la, ɖikeke mele eme o be amesiwo wofɔ ɖe tsitre la ƒe ŋku biã ɖe dziƒodɔwo wɔwɔ ŋu. Womele ɖiɖim ɖe eme le dɔ aɖeke mawɔmawɔ ƒe vivisese me o, ke boŋ wole ɖiɖim ɖe eme le gɔmesese sia nu be wole Yehowa ƒe hlɔ̃biaŋkeke la lalam dzigbɔɖitɔe. (Yesaya 34:8; Romatɔwo 12:19) Woawu woƒe ɖiɖiɖeme la nu ne wokpɔ alakpasubɔsubɔ ƒe tsɔtsrɔ̃ teƒe eye wokpe ɖe Aƒetɔ Yesu Kristo ŋu abe “ame yɔyɔwo kple ame tiatiawo kpakple nuteƒewɔlawo” ene eye wohe ʋɔnudɔdrɔ̃ va Satana ƒe dzidzimevi vɔ̃ɖi si le anyigba dzi afisia la ƒe akpa bubuawo katã dzie.—Nyaɖeɖefia 2:26, 27; 17:14; Romatɔwo 16:20.
‘Amesiwo Ku Atsi Tre Gbã’
13, 14. (a) Le apostolo Paulo ƒe nya nu la, ɣekaɣie dziƒotsitretsitsi la dze egɔme, eye amekawoe wofɔ ɖe tsitre? (b) Ɣekaɣie woafɔ amesiamina siwo le agbe le Aƒetɔ ƒe ŋkekea me la ɖe tsitre be woayi dziƒo?
13 Nugɔmesese si nutrenu atɔ̃lia ɖeɖe ɖa na mí la wɔ ɖeka bliboe kple ŋɔŋlɔ bubu siwo ku ɖe dziƒotsitretsitsia ŋu la. Le kpɔɖeŋu me, apostolo Paulo ŋlɔe bena: “Elabena míele esia gblɔm na mi le Yehowa ƒe nya nu bena, mí amesiwo susɔ le agbe yiɖase ɖe Aƒetɔ la ƒe anyinɔɣi la, míadze ŋgɔ na amesiwo dɔ alɔ̃ le ku me la le mɔ aɖeke nu o; elabena Aƒetɔ la ŋutɔ atsɔ gbeɖeɖe sesẽ kple mawudɔla gã ƒe gbe kple Mawu ƒe kpẽɖiɖi aɖi tso dziƒo, eye amesiwo ku le Kristo me la, woatsi tre gbã. Emegbe la mí amesiwo susɔ le agbe la, woahe mí kpakpli wo siaa le alilikpowo me aɖakpe Aƒetɔ la le ya me, eye ale míanɔ anyi kple Aƒetɔ la ɖaasi.”—Tesalonikatɔwo I, 4:15-17, New World Translation.
14 Nya ʋãme kae nye si gblɔm kpukpui siawo le! Yesu nɔvi amesiamina siwo ku xoxo la, woayi dziƒo do ŋgɔ na wo nɔvi siwo le agbe vaseɖe Yesu ƒe anyinɔɣi, esi nye amesiwo kpɔtɔ le agbe le anyigba dzi le eƒe anyinɔɣi la. Ame mawo siwo ku le Kristo me la afɔ gbã. Yesu aɖi ava, esi fia be atrɔ eƒe susu ɖe wo ŋu ahafɔ wo ɖe tsitre ayi gbɔgbɔmegbenɔnɔ me, eye wòana “awu ʋlaya ɣi” wo. Emegbe la, wo dometɔ siwo kpɔtɔ le agbe abe amegbetɔwo ene la awu woƒe anyigba dzi nɔnɔa nu; wo dometɔ geɖe aku le tsitretsiɖeŋulawo si me ŋutasẽtɔe. Gake womadɔ alɔ̃ le ku me abe amesiwo do ŋgɔ na wo la ene o. Ke boŋ ne woku la, wotrɔa wo enumake—“kasia le aɖabaƒoƒo ɖeka me”—hekplɔa wo yia dziƒo be woanɔ Yesu kple wo hati Kristo ƒe ŋutilã la me tɔwo gbɔ. (Korintotɔwo I, 15:50-52; tsɔe sɔ kple Nyaɖeɖefia 14:13.) Eyata Kristotɔ amesiaminawo ƒe tsitretsitsia dze egɔme ɣeyiɣi kpui aɖe le Nyaɖeɖefia me sɔdola eneawo ƒe sɔdodoa ƒe gɔmedzedze megbe.
15. (a) Nya nyui kae nutrenu atɔ̃lia ɖeɖe ɖa he vɛ? (b) Aleke Aʋadziɖula si le sɔ ɣia dom la awu eƒe sɔdodoa nue?
15 Nutrenu atɔ̃lia ɖeɖe ɖa he nya nyui si ku ɖe nuteƒewɔla amesiamina siwo ɖu dzi anukwareɖiɖitɔe vaseɖe ku me ŋu la vɛ. Gake mehe nya nyui aɖeke ɖe asi na Satana kple eƒe dzidzimevi la o. Aʋadziɖula si le sɔ ɣia dzi la ƒe sɔdodoa le edzi yim eye naneke mete ŋu le mɔ xem nɛ o, eye awu enu kple akɔntabuɣi na xexeame si “le vɔ̃ɖitɔ la me” la. (Yohanes I, 5:19) Esia me kɔ ƒã esime Alẽvi la ɖe nutrenu adelia ɖa.
[Etenuŋɔŋlɔwo]
[Aɖaka si le axa 102]
‘Luʋɔ siwo wowu’
McClintock kple Strong ƒe Cyclopedia gblɔ be John Jortin si nye ƒe alafa 18 lia me Eŋlisi Protestantɔ si dzilawo nye Franse Huguenottɔwo la gblɔ bena: “Afisi yometiti dze egɔme le la, Kristotɔnyenye wua nu le afima . . . Esi wotsɔ Kristotɔnyenye wɔ [Roma] fiaɖuƒe la ƒe subɔsubɔhae, eye wona kesinɔnu kple bubu eƒe subɔlawo la megbee nuvɔ̃ gã si nye yometiti la kpɔ ŋusẽ gã aɖe, eye wòkpɔ nugbagbã ƒe ŋusẽ ɖe Nyanyui la ƒe mawusubɔsubɔ dzi.”
[Nɔnɔmetata si le axa 103]
“Eye wona awu ʋlaya ɣi wo dome amesiame”