Ðe Ame Aɖe Ate Ŋu Atrɔ Xexea Vavãa?

“Ame dahewo gblɔna na mí be, nusi dim yewole vevie wue nye ŋutifafa kple dedienɔnɔ—eye emegbe yewodi mɔnukpɔkpɔ siwo ŋudɔ yewoawɔ be agbe nagaka ɖe eme na yewo. Wodi ɖoɖo siwo ana nudzɔdzɔewɔwɔ nanɔ dukɔa kple dukɔwo dome bene dukɔ siwo si alɔme le kple dɔwɔƒe siwo si ga le la nagagblẽ yewoƒe agbagbadzedzewo dome o.”

ALEAE dukɔwo dome kpekpeɖeŋunaha aɖe dzikpɔla ɖɔ ame dahewo ƒe mɔkpɔkpɔwo kple didiwoe. Le nyateƒe me la, eƒe nyawo ate ŋu asɔ nyuie ɖe amesiwo katã afɔkuwo kple madzɔmadzɔnyenye wɔ fui le xexeame la ƒe didiwo nu. Wo katã wokpɔa mɔ na xexe aɖe si me ŋutifafa kple dedienɔnɔ anɔ la vevie. Ðe xexe sia ƒomevi ate ŋu ava nyateƒea? Ðe ŋusẽ kple ŋutete le ame aɖe ŋu be wòatrɔ xexe si me madzɔmadzɔnyenye ƒo ke ɖo sesĩe laa?

Agbagba Siwo Wodze be Woatrɔe

Ame geɖe te ewɔwɔ kpɔ. Le kpɔɖeŋu me, Florence Nightingale, si nye ƒe alafa 19 lia me England-nyɔnu aɖe, tsɔ eƒe agbe ɖo anyi na dzadzɛnyenye kple veveseseɖeamenu tsɔtsɔ akpɔ dɔnɔwo dzii. Le eƒe ŋkekea me—hafi woto dɔlékuiwutikewo vɛ—la, menye alesi wokpɔa dɔnɔwo gbɔe le kɔdzi egbea míenya lae nɔ anyi o. Agbalẽ aɖe gblɔ be: “Dɔnɔdzikpɔlaawo nye amemadesukuwo, ame ƒoɖiwo, eye woxɔ ŋkɔ le ahamumu kple agbegbegblẽnɔnɔ me.” Ðe Florence Nightingale kpɔ dzidzedze aɖe le agbagba siwo wòdze be yeatrɔ mo na dɔnɔdzikpɔkpɔdɔa mea? Ekpɔe. Nenema kee ɖetsɔlemetɔ ɖokuitɔmadila gbogbo aɖewo hã kpɔ dzidzedze tɔxɛwo le agbenɔnɔ ƒe akpa vovovowo—agbalẽsɔsrɔ̃, sukudede, dɔdada, aƒewo tutu, nuɖuɖunana, kple bubuawo—tɔtrɔ me. Esia wɔe be nublanuitɔ miliɔn geɖe ƒe agbenɔnɔ va ka ɖe eme wu tsã.

Ke hã, míate ŋu aŋe aɖaba aƒu nɔnɔme sesẽ ŋutɔŋutɔ siwo gakpɔtɔ li dzi o be: Aʋawɔwɔ, nuvlowɔwɔ, dɔléle, dɔwuame, kple nu doafɔkuame bubuwo gakpɔtɔ le ame miliɔn alafa gbogbowo ƒe agbe dome gblẽm. Irelandtɔwo ƒe kpekpeɖeŋunaha si woyɔna be Concern gblɔ be: “Hiãkame wua ame 30,000 gbesiagbe.” Kluvisitsatsa si ŋuti ɖɔɖɔɖowɔla gbogbo aɖewo ho aʋa ɖo le ƒe alafa siwo va yi me la gɔ̃ hã gakpɔtɔ li. Agbalẽ si nye Disposable People—New Slavery in the Global Economy gblɔ be: “Kluvi siwo li egbea la sɔ gbɔ sasasã wu amesiwo katã wofi tso Afrika dzoe le kluvisitsatsa si yi edzi le Atlantik-ƒua dzi me.”

Nukae tu afɔkpo agbagba siwo amewo dze be yewoahe tɔtrɔ si anɔ anyi ɖaa vɛ me? Ŋusẽ gã si le kesinɔtɔwo kple ŋusẽtɔwo ŋu la koe loo alo nu bubu aɖe hãe le eme?

Nusiwo Na Tɔtrɔwo Menya Le Wɔwɔm O

Mawu ƒe Nya gblɔ be, amesi koŋue le afɔ tum agbagba siwo dzem amegbetɔwo le bene yewoahe xexeme si me dzɔdzɔenyenye vavã le vɛ mee nye Satana Abosam. Apostolo Yohanes gblɔ na mí be “xexeme blibo la katã le vɔ̃ɖitɔ la me.” (Yohanes I, 5:19) Le nyateƒe me la, Satana le ‘xexeame katã blem’ fifi laa. (Nyaɖeɖefia 12:9) Halase esime woava ɖe eƒe ŋusẽkpɔɖeamedzi gbegblẽa ɖa la, amewo anɔ fu kpem le vɔ̃ɖinyenye kple madzɔmadzɔnyenye si me. Nukae he nɔnɔme wɔnublanui sia vɛ?

Anyigba si ŋu wotrɔ asi le be wòanye paradiso-ƒe deblibo na ameƒomea katã—si nye xexe aɖe si ‘nyo ŋutɔ’—lae wona mía dzila gbãtɔwo, Adam kple Xawa. (Mose I, 1:31) Amekae trɔ nuawo? Satanae. Etsi tre ɖe mɔ si Mawu kpɔ awɔ se na amewo bene woanɔ agbe ɖe enu la ŋu. Edoe ɖa be alesi Mawu ɖua dzi la medzɔ o. Eble Adam kple Xawa be woaxɔ ɖokuisinɔnɔ bene woa ŋutɔwo woawɔ nyui kple vɔ̃ ŋuti nyametsotsowo. (Mose I, 3:1-6) Esia he nu evelia—si nye nuvɔ̃ kple blibomademade—si le kplamatse dom agbagba siwo dzem amegbetɔ le be dzɔdzɔenyenye nava xexeame la vɛ.—Romatɔwo 5:12.

Nukatae Wòɖe Mɔ ɖe Eŋu Ðo?

Ame aɖewo abia be: ‘Gake nukatae Mawu ɖe mɔ nuvɔ̃ kple blibomademade do mo ɖa ɖo? Nukata mezã eƒe ŋusẽ mavɔ la tsɔ ɖe aglãdzelawo ɖa hegbugbɔ ame bubuwo wɔ o?’ Adze abe kuxia gbɔkpɔnu bɔbɔe aɖee nye ema ene. Gake alesi wozãa ŋusẽe la fɔa ŋkubiãnyawo ɖe te. Ðe menye nyateƒe be ŋusẽ si zãm wole ɖe mɔ gbegblẽ nu lae nye nusiwo le nuxaxa dom na ame dahewo kple amesiwo wote ɖe anyi le xexeame la dometɔ ɖeka oa? Ne ŋutasẽdziɖula aɖe zã eƒe ŋusẽ tsɔ ɖe amesi meda asi ɖe eƒe ɖoɖowo dzi o ɖa la, ɖe ema mefɔa nyabiasewo ɖe nuteƒewɔlawo ƒe susu me oa?

Be Mawu nana dzianukwaretɔwo naka ɖe edzi be Yemenye ŋutasẽdziɖula si zãa yeƒe ŋusẽ ɖe mɔ gbegblẽ nu o la, eɖe mɔ be Satana kple amegbetɔ dzeaglãwo nawɔ nu le wo ɖokui si, Mawu ƒe sewo kple gɔmeɖosewo manɔmee—hena ɣeyiɣi kpui aɖe. Le ɣeyiɣi aɖe megbe la, ava dze ƒã be mɔ si nu Mawu ɖua dzi le la koe nye nyuitɔ. Esia aɖee afia be míaƒe nyonyo tae wòxea nanewo ƒe mɔ na mí ɖo. Le nyateƒe me la, aglãdzedze ɖe Mawu ƒe se ŋu me tsonuwo ɖee fia xoxo be esia nye nyateƒe. Eye woɖo kpe edzi be ne Mawu tso hezã eƒe ŋusẽ gã la tsɔ ɖe vɔ̃ɖinyenye katã ɖa la, etɔ adzɔ keŋkeŋ. Esia adzɔ kpuie.—Mose I, 18:23-32; Mose V, 32:4; Psalmo 37:9, 10, 38.

Halase esime Mawu naɖe afɔ sia la, míakpɔtɔ anɔ nuɖoanyi madzɔmadzɔ sia me, ‘anɔ ŋeŋem ahanɔ veve sem.’ (Romatɔwo 8:22) Nuka kee míeɖawɔ be nuwo natrɔ o, míate nu aɖe Satana ɖa loo alo aɖe blibomademade, si koŋ gbɔ fu siwo katã kpem míele la tso, ɖa keŋkeŋ o. Kpuie ko la, nusiwo nuvɔ̃ si ƒe dome míenyi tso Adam gbɔ le gbegblẽm la ɖɔɖɔɖo gbɔ míaƒe ŋutete ŋu.—Psalmo 49:7-9.

Yesu Kristo Ahe Tɔtrɔ Mavɔ Vɛ

Ðe esia fia be wɔna aɖeke kura megali oa? Kura o! Wode dɔ asi na ame aɖe si si ŋusẽ le sãa wu amegbetɔ si kuna la be wòahe tɔtrɔ mavɔ vɛ. Amekae? Yesu Kristoe. Woɖɔe le Biblia me be Mawu ƒe Agbefia si dzi woato aɖe amegbetɔƒomea.—Dɔwɔwɔwo 5:31, NW.

“Ɣeyiɣi” si Mawu ɖo ɖi la ko lalamee Yesu le ne wòadze dɔ gɔme. (Nyaɖeɖefia 11:18) Nuka tututue wòawɔ? ‘Aɖɔ nusiwo katã ŋu Mawu ƒo nu le, to eƒe nyagblɔɖila kɔkɔewo katã ƒe nu me tso xexeame ƒe gɔmedzedzea me la ɖo.’ (Dɔwɔwɔwo 3:21) Le kpɔɖeŋu me, Yesu “aɖe ame dahe, si le ɣli dom, kple hiãtɔ, si xɔnametɔ aɖeke meli na o la. . . . Aɖe woƒe luʋɔ tso teteɖeanyi kple ŋutasesẽ me.” (Psalmo 72:12-16) Mawu do ŋugbe be yeato Yesu Kristo dzi “atsi aʋawɔwɔwo nu vaseɖe anyigba ƒe mlɔenu ke.” (Psalmo 46:9) Edo ŋugbe be “[anyigba si ŋuti wokɔ la dzinɔla] aɖeke magblɔ be, yele dɔ lém o.” Lãmesẽ blibo aɖo ŋkunɔwo, tokunɔwo, xɔdrɔ̃wo—amesiwo katã dɔlélewo wɔa fui la—ŋu. (Yesaya 33:24; 35:5, 6; Nyaɖeɖefia 21:3, 4) Aɖe vi na amesiwo ku la gɔ̃ hã. Edo ŋugbe be yeagagbɔ agbe amesiwo ku le madzɔmadzɔnyenye kple ameteteɖeanyi ƒe xexe sia me la.—Yohanes 5:28, 29.

Yesu Kristo mawɔ tɔtrɔ sia le teƒe ɖeka aɖe ko alo be wòanye ɣeyiɣi kpui aɖe ƒe tɔtrɔ ko o. Aɖe nusiwo katã le ewɔm be dzɔdzɔenyenye vavãtɔ mete ŋu le xexeame ɖom o la ɖa. Aɖe nuvɔ̃ kple blibomademade ɖa eye wòatsrɔ̃ Satana Abosam kple amesiwo katã dze eƒe aglãdzedzea yome ɖa. (Nyaɖeɖefia 19:19, 20; 20:1-3, 10) Nuxaxa kple fukpekpe si ŋu Mawu ɖe mɔ ɖo kpuie la ‘magado ta ɖa zi evelia o.’ (Naxum 1:9) Nusiae nɔ susu me na Yesu esime wòfia mí be míado gbe ɖa be Mawu ƒe Fiaɖuƒea nava eye be woawɔ Mawu ƒe lɔlɔ̃nu ‘le anyigba dzi, sigbe alesi wowɔna le dziƒo ene!’—Mateo 6:10.

‘Gake’ àbia be, ‘ɖe Yesu ŋutɔ megblɔ be “ame dahewo anɔ kpli mí ɖaa” oa? Ðe ema mefia be madzɔmadzɔnyenye kple hiãkame anɔ anyi ɖaa oa?’ (Mateo 26:11) Ele eme baa be Yesu gblɔ be ame dahewo anɔ anyi ɖaa ya. Gake nya si gblɔm wònɔ hafi gblɔe de eme, tsɔ kpe ɖe Mawu ƒe Nya me ŋugbedodowo ŋu, ɖee fia be enɔ gbɔgblɔm be ame dahewo anɔ anyi ɖaa zi alesi nuɖoanyi sia gakpɔtɔ li ko. Enyae be amegbetɔ aɖeke mate ŋu ava ɖe hiãkame kple madzɔmadzɔnyenye ɖa le xexeame gbeaɖekegbe o. Enyae hã be yee ava trɔ emawo katã. Eteƒe madidi o ahe nuɖoanyi yeye aɖe kura—si nye “dziƒo yeye kple anyigba yeye” si me vevesese, dɔléle, hiãkame, kple ku manɔ o—vɛ.—Petro II, 3:13; Nyaɖeɖefia 21:1.

‘Migaŋlɔ Dɔmenyowɔwɔ Be O’

Ðe esia fia be agbagba ɖesiaɖe si míadze be míakpe ɖe amewo ŋu la nye dzodzroa? Kura o. Biblia de dzi ƒo na mí be míakpe ɖe amewo ŋu ne woɖo tetekpɔwo kple nɔnɔme donuxaxanamewo me. Blema Fia Salomo ŋlɔ bena: “Megate nu nyui hiãtɔ, nenye be ŋutete le ŋuwò na ewɔwɔ o.” (Lododowo 3:27) Apostolo Paulo xlɔ̃ nu be: “Migaŋlɔ dɔmenyowɔwɔ kple hamenunana be o.”—Hebritɔwo 13:16.

Yesu Kristo ŋutɔ hã de dzi ƒo na mí be míawɔ nusianu si míate ŋui atsɔ akpe ɖe amewo ŋu. Edo lo aɖe ku ɖe Samariatɔ aɖe si va do go ɖe ame aɖe si woƒo heda adzoe la ŋu. Yesu gblɔ be Samariatɔ la ƒe “dɔme trɔ ɖe eŋu” ale be wòzã eya ŋutɔ ƒe nunɔamesiwo tsɔ bla abiawo na amesi dze adzoblasuawo si me la eye wòkpe ɖe eŋu be wòhaya. (Luka 10:29-37) Samariatɔ nublanuikpɔla ma metrɔ xexeame o, ke hã, ewɔ nusi he tɔtrɔ gã aɖe va ame aɖe ya ƒe agbe me. Míate ŋu awɔ nenema ke.

Gake Yesu Kristo ate ŋu awɔ geɖe wu kpekpeɖeŋunana amewo ko. Ate ŋu atrɔ nuwo, eye awɔe kpuie. Ne ewɔe la, amesiwo ŋu xexe madzɔmadzɔ sia gblẽ nu le la ƒe agbe anyo ɖe edzi eye woanɔ ŋutifafa kple dedienɔnɔ vavãtɔ me.—Psalmo 4:8; 37:10, 11.

Esi míele esia lalam la, negadzɔ gbeɖe be míahe megbelele le nusianu si míate ŋu awɔ, le gbɔgbɔ me kple ŋutilã me siaa bene “míawɔ nu nyui na” amesiwo katã ŋu xexe madzɔmadzɔ sia gblẽ nu le, la wɔwɔ ŋu o.—Galatiatɔwo 6:10.

[Nɔnɔmetata si le axa 4]

The Star, Johannesburg, S.A.

[Nɔnɔmetata si le axa 5]

Courtesy National Library of Medicine

Florence Nightingale trɔ mo na dɔnɔdzikpɔkpɔdɔa

[Nɔnɔmetata si le axa 7]

Kristo yomedzelawo wɔa nyui na amewo