Ðe Nèyi Mawu Ƒe Dzudzɔ La Mea?
“Amesi yi ɖe [Mawu ƒe] dzudzɔ me la, eya hã dzudzɔ tso eƒe dɔwɔwɔwo me.”—HEBRITƆWO 4:10.
1. Nukata wòhiã nenema gbegbe be míadzudzɔ mía ɖokui?
DZUDZƆ. Nya vivi nyoameŋu kae nye si wònye! Esi míele egbe ƒe xexe si me nuwo yia edzi kabakaba eye amewo tsoa hloloe me ta la, mía dometɔ akpa gãtɔ alɔ̃ ɖe edzi be anyo ŋutɔ be míadzudzɔ mía ɖokui vie. Míeɖanye ɖeviwo alo ame tsitsiwo, srɔ̃tɔwo alo trewo o, míakpɔe be míexaxana eye ɖeɖi tea mía ŋu le gbesiagbegbenɔnɔ me dɔwɔnawo ta. Le amesiwo ƒe lãme gblẽ alo woƒe lãme megasẽ o gome la, agbenɔnɔ gbesiagbe nye avu kple kɔ. Abe alesi Ŋɔŋlɔawo gblɔe ene la, “nuwɔwɔ blibo la katã le ŋeŋem, eye fu le eɖum vaseɖe fifi.” (Romatɔwo 8:22) Amesi le eɖokui dzudzɔm la menye kuviatɔ kokoko o. Gbɔɖeme nye amegbetɔ ƒe nuhiahiã si gbɔ wòle be woakpɔ.
2. Tso ɣekaɣie Yehowa le eɖokui dzudzɔm?
2 Yehowa Mawu ŋutɔ le eɖokui dzudzɔm. Míexlẽ le Mose ƒe Agbalẽ Gbãtɔ me be: “Ale wowu dziƒo kple anyigba kple wo me nu gbogboawo katã nu enye si. Eye Mawu wu eƒe dɔ, si wòwɔ la nu le ŋkeke adreagbe, eye wòdzudzɔ le ŋkeke adreagbe tso eƒe dɔ, siwo katã wòwɔ la me.” Yehowa wɔ “ŋkeke adreagbe” wònye ŋkeke vevi, elabena nuŋlɔɖi si tso gbɔgbɔ me la yi edzi gblɔ be: “Mawu yra ŋkeke adrelia, eye wòkɔ eŋuti.”—Mose I, 2:1-3.
Mawu Dzudzɔ tso Eƒe Dɔwɔwɔ Me
3. Anye be menye susu kawo tae Mawu dzudzɔ eɖokui o?
3 Nukata Mawu dzudzɔ eɖokui le “ŋkeke adreagbe”? Le nyateƒe me la, menye ɖeɖi ye te eŋu ta wòdzudzɔ o. “Ŋusẽ geɖe kple alɔkame sesẽ” le Yehowa si, “nu metia kɔ nɛ o, [eye] ɖeɖi metea eŋu o.” (Yesaya 40:26, 28) Eye Mawu megbɔ ɖe eme le esi wòdi be yeatɔ vie alo atrɔ yeƒe dɔwɔɖoɖo ta o, elabena Yesu gblɔ na mí be: “Fofonye le dɔ wɔm vaseɖe fifi, eye nye hã mele dɔ wɔm.” (Yohanes 5:17) Aleke ke nya la le o, ‘Mawu nye Gbɔgbɔ’ eye nusiwo yia edzi le míaƒe ametia me kple ŋutilãmenuwɔwɔwo ƒe nuhiahiãwo mekpɔa ŋusẽ ɖe edzi o.—Yohanes 4:24.
4. Mɔ ka nue “ŋkeke adrelia” to vovo tso “ŋkeke” ade siwo do ŋgɔ gbɔ?
4 Aleke míawɔ ase nusita Mawu dzudzɔ le “ŋkeke adreagbe” la gɔme? Eyae nye be míade dzesii be togbɔ be Mawu kpɔ ŋudzedze ɖe dɔ si wòwɔ le nuwɔwɔ ƒe “ŋkeke” ade siwo do ŋgɔ siwo nye ɣeyiɣi didi me ŋu hã la, eɖoe koŋ yra “ŋkeke adrelia” eye “wòkɔ eŋuti.” Concise Oxford Dictionary ɖe “kɔkɔe” gɔme be enye “nusi woɖo ɖi koŋ alo wotsɔ na (mawu aɖe loo alo ɖe mawusubɔsubɔ me dɔwɔna aɖe ta).” Eyata esi Yehowa yra “ŋkeke adrelia” hekɔ eŋu la, efia be kadodo aɖe le ŋkeke ma kple eƒe “dzudzɔ” kpakple eƒe lɔlɔ̃nu kple tameɖoɖo kɔkɔe dome, ke menye be nanee le ehiãm tae o. Kadodo kae le wo dome?
5. Nukae Mawu na wòte dɔwɔwɔ le nuwɔwɔ ƒe “ŋkeke” ade gbãtɔwo me?
5 Le nuwɔwɔ ƒe “ŋkeke” ade siwo do ŋgɔ me la, Mawu wɔ ɖoɖo kple se siwo katã nu anyigba kple nusianu si ƒo xlãe azɔ ɖo eye wòna wote dɔwɔwɔ. Fifia dzɔdzɔmeŋutinunyalawo le nu srɔ̃m tso alesi wotrɔ asi le nusiawo ŋu nukutɔe ŋu. Le “ŋkeke adelia” ƒe nuwuƒe lɔƒo la, Mawu wɔ atsu kple asi gbãtɔ eye wòda wo ɖe “abɔ [me le] Eden le ɣedzeƒe.” Mlɔeba Mawu ɖe tame si wòɖo ɖe ameƒomea kple anyigba la ŋu fia le nyagblɔɖinya siawo me be: “Midzi, ne miasɔ gbɔ, eye miayɔ anyigba la dzi, eye mianye agbo ɖe edzi, miaɖu ƒumelãwo kple dziƒoxe dzodzoewo kple lã, siwo katã zɔna le anyigba dzi la dzi.”—Mose I, 1:28, 31; 2:8.
6. (a) Aleke Mawu se le eɖokui me le nusianu si wòwɔ ŋu le “ŋkeke adelia” ƒe nuwuwu? (b) Gɔmesese ka nue wokɔ “ŋkeke adrelia” ŋu le?
6 Ale nuŋlɔɖia gblɔ na mí le “ŋkeke adelia” ƒe nuwuwu enye si: “Mawu kpɔ nusiwo katã wòwɔ la, eye kpɔ ɖa, wonyo ŋutɔ.” (Mose I, 1:31) Mawu kpɔ ŋudzedze ɖe nusianu si wòwɔ ŋu. Eyata edzudzɔ, alo ɖe asi le anyigba dzi nuwɔwɔ ƒe dɔwo ŋu. Gake togbɔ be paradisobɔ la de blibo hedze ani ŋutɔ hã la, teƒe sue aɖe ko wòxɔ, eye amegbetɔ eve koe nɔ anyigba dzi. Axɔ ɣeyiɣi hafi anyigba kple amegbetɔƒomea naɖo nɔnɔme si ƒe tame Mawu ɖo me. Le esia ta etia “ŋkeke adrelia” si me nusiwo katã wòwɔ le “ŋkeke” ade siwo do ŋgɔ me nakeke ta wòasɔ ɖe eƒe lɔlɔ̃nu kɔkɔe nu le. (Tsɔe sɔ kple Efesotɔwo 1:11.) Le “ŋkeke adrelia” ƒe nuwuwu la, anyigba azu xexeame katã ƒe paradiso si me amegbetɔƒome deblibo anɔ ayi mavɔmavɔ me. (Yesaya 45:18) Woɖo “ŋkeke adrelia” ɖi alo kɔ eŋu be Mawu ƒe lɔlɔ̃nu na anyigba kple ameƒomea nayi edzi ava eme. Le gɔmesese ma nu la, ele “kɔkɔe.”
7. (a) Nuka wɔwɔ mee Mawu dzudzɔ eɖokui le le “ŋkeke adrelia” dzi? (b) Kaka “ŋkeke adrelia” nava eƒe nuwuwu la, aleke nusianu ava nɔ?
7 Eyata Mawu dzudzɔ tso eƒe nuwɔwɔdɔwo me le “ŋkeke adreagbe.” Enɔ abe ɖe wòɖe asi le dɔa wɔwɔ ŋu ene eye wòɖe mɔ be nusiwo wòɖo la nawɔ dɔ aɖo taɖodzinua gbɔ. Kakaɖedzi blibo le esi be kaka “ŋkeke adrelia” ƒe nuwuwu naɖo la, nusianu anɔ abe alesi wòɖo eƒe tamee ene. Ne kplamatsedonuwo do mo ɖa hã, aɖu wo dzi. Ne Mawu ƒe lɔlɔ̃nu va eme bliboe la, aɖe vi na ameƒomea me tɔ toɖolawo katã. Naneke maxe mɔ na esia o elabena Mawu yra “ŋkeke adrelia,” eye “wòkɔ eŋuti.” Ŋutikɔkɔe mɔkpɔkpɔ ka gbegbee nye si le ameƒomea me tɔ toɖolawo si!
Israel-Viwo Mete Ŋu Yi Mawu ƒe Dzudzɔ me O
8. Ɣekaɣie Israel-viwo va te Sabat ɖuɖu eye aleke woɖunɛ?
8 Ðoɖo si Yehowa wɔ ɖe dɔwɔwɔ kple dzudzɔ xɔxɔ ŋu ɖe vi na Israel-dukɔa. Hafi Mawu natsɔ Sea ana Israel-viwo le Sinai Toa gbɔ gɔ̃ hã la, egblɔ na wo to Mose dzi be: “Mikpɔ ɖa, Yehowa na dzudzɔgbe mi, eyata wòna nuɖuɖu mi le ŋkeke adelia dzi ɖe ŋkeke eve nu. Amesiame natsi aƒe, eye ame aɖeke nagado go le aƒe me le ŋkeke adrelia dzi o!” Esia wɔe be “dukɔ la dzudzɔ eɖokui le ŋkeke adrelia dzi.”—Mose II, 16:22-30.
9. Nukata ɖikeke mele eme o be Israel-viwo kpɔ dzidzɔ ɖe Sabat-sea ŋu?
9 Ðoɖo sia nye nu yeye na Israel-viwo, amesiwo woɖe tso kluvinyenye me le Egipte eteƒe medidi o. Togbɔ be ŋkeke atɔ̃ vaseɖe ewo dzie Egipte kple dukɔ bubuwo bua woƒe ɣeyiɣi ƒe didime ɖo hã la, anɔ eme be womena ŋkeke Israel-vi siwo nye kluviwo la be woatsɔ adzudzɔ wo ɖokui o. (Tsɔe sɔ kple Mose II, 5:1-9.) Eyata esɔ be míagblɔ be Israel-dukɔa kpɔ dzidzɔ ɖe tɔtrɔ sia ŋu. Le esi teƒe be woabu Sabat nudidia be enye agba alo mɔxenu na yewo la, woanya wɔ ɖe edzi kple dzidzɔ. Le nyateƒe me la, Mawu gblɔ na wo emegbe be Sabat la nye woƒe kluvinyenye le Egipte kple alesi wòɖe woe ƒe ŋkuɖodzinu.—Mose V, 5:15.
10, 11. (a) Ne ɖe Israel-viwo ɖo to la, anye ne nuka mee woate ŋu akpɔ mɔ be yewoase vivi le? (b) Nukata Israel-viwo mete ŋu ge ɖe Mawu ƒe dzudzɔ la me o?
10 Ne ɖe Israel-vi siwo kplɔ Mose ɖo do go tso Egipte la ɖo to la, anye ne mɔnukpɔkpɔ asu wo si be woayi ɖe ‘ŋugbedodonyigba si dzi notsi kple anyitsi bɔ ɖo’ la dzi. (Mose II, 3:8) Anye ne woakpɔ dzudzɔ vavãtɔ le afima, menye le Sabat dzi ɖeɖeko o ke le woƒe agbe me katã. (Mose V, 12:9, 10) Gake meva eme nenema o. Apostolo Paulo ŋlɔ le wo ŋu be: “Amekawoe see, eye wòve dɔme na wo mahã? Alo menye wo katãe, amesiwo Mose kplɔ do go tso Egipte la o mahã? Ke amekawo ƒe nue ku dzi nɛ ƒe blane sɔŋ mahã? Alo menye amesiwo wɔ nuvɔ̃, amesiwo ƒe ƒu kotsoewo tsi gbedzi lae o ɖe? Ke amekawo wòka atam na bena, ne woahade yeƒe dzudzɔ la me fĩ? Ðe menye na tosẽlawo o mahã? Eye míekpɔ bena, womete ŋu yi ɖe eme o le dzimaxɔse ŋuti.”—Hebritɔwo 3:16-19.
11 Nufiame vevi ka gbegbee nye si wònye na mí! Esi womexɔ Yehowa dzi se o ta la, dzidzime ma mete ŋu ge ɖe dzudzɔ si ƒe ŋugbe wòdo na wo la me o. Ke boŋ wotsrɔ̃ le gbedzi. Womete ŋu de dzesii be esi wonye Abraham ƒe dzidzimeviwo ta la, yewo dzie Mawu ato ana eƒe lɔlɔ̃nu si nye be wòayra anyigbadzidukɔwo katã la nava eme o. (Mose I, 17:7, 8; 22:18) Le esi teƒe be woawɔ nu wòasɔ kple Mawu ƒe lɔlɔ̃nu la, ŋutilãmenuwo kple ɖokuitɔdidi ƒe dzodzrowo boŋue va xɔ susu me na wo. Megadzɔ ɖe mía dzi gbeɖe be míava wɔ nu nenema o!—Korintotɔwo I, 10:6, 10.
Dzudzɔ aɖe Gali
12. Mɔkpɔkpɔ kae ganɔ anyi na ƒe alafa gbãtɔ me Kristotɔwo, eye aleke woawɔ wòaka wo si?
12 Esi Paulo ɖee fia be Israel-viwo mete ŋu yi ɖe Mawu ƒe dzudzɔ me o le xɔsemanɔamesi ta vɔ la, etrɔ susu ɖe ehati xɔsetɔwo ŋu. Abe alesi míekpɔe le Hebritɔwo 4:1-5 ene la, ena kakaɖedzi wo be Mawu ƒe “dzudzɔ me yiyi ŋugbedodo gali.” Paulo de dzi ƒo na wo vevie be woaxɔ “nyanyui” la dzi ase, elabena “mí amesiwo xɔe se la, míayi ɖe dzudzɔ ma me.” Esi Yesu ƒe tafevɔsa ɖe Sea ɖa xoxo ta la, menye ŋutilã me dzudzɔ si me wonɔna le Sabat dzie Paulo wɔnɛ le afisia o. (Kolosetɔwo 2:13, 14) Paulo yɔ nya tso Mose I, 2:2 kple Psalmo 95:11 tsɔ de dzi ƒo na Hebritɔ Kristotɔwo vevie be woayi ɖe Mawu ƒe dzudzɔ la me.
13. Esi Paulo yɔ nya tso Psalmo 95 me la, nukata wòhe susu yi nya “egbegbe” dzi?
13 Alesi wòanya wɔ be woage ɖe Mawu ƒe dzudzɔ me la anya nye “nyanyui” na Hebritɔ Kristotɔwo, abe alesi Sabat ƒe dzudzɔ la nye “nyanyui” na Israel-vi siwo nɔ anyi do ŋgɔ ene. Eyata Paulo de dzi ƒo na ehati xɔsetɔwo vevie be womegava wɔ vodada ma ke si Israel-viwo wɔ le gbeadzi o. Eƒo nu tso nya siwo le Psalmo 95:7, 8 fifia ŋu eye wòhe susu yi nya “egbegbe” dzi, togbɔ be ɣeyiɣi didi aɖee nye ma tso esime Mawu dzudzɔ tso eƒe nuwɔwɔ ƒe dɔwo me hã. (Hebritɔwo 4:6, 7) Nukae Paulo wɔnɛ? Eyae nye be “ŋkeke adrelia” si Mawu ɖo ɖi be eƒe tameɖoɖo na anyigba kple ameƒomea nava eme bliboe la ganɔ edzi yim. Eyata ehiã kpata be ehati Kristotɔwo nawɔ nu wòasɔ ɖe tameɖoɖo ma nu tsɔ wu be woavu ɖe woa ŋutɔwo ƒe nuwo didi ŋu. Egbugbɔ nuxlɔ̃amenya la gblɔ be: “Migasẽ miaƒe dzime o.”
14. Aleke Paulo ɖee fiae be Mawu ƒe “dzudzɔ” gali?
14 Tsɔ kpe ɖe eŋu la, Paulo ɖee fia be menye Ŋugbedodonyigba la dzi nɔnɔ le Yosua ƒe kpɔkplɔ te dzro koe “dzudzɔ” si ƒe ŋugbe wodo la nye o. (Yosua 21:44) Paulo ɖe eme be: “Elabena ɖe Yosua kplɔ wo yi ɖe dzudzɔ me la, anye ne megaƒo nu emegbe . . . le ŋkeke bubu aɖe ŋuti o.” Le ema ta Paulo gagblɔ be: “Sabat ƒe dzudzɔ gasusɔ na Mawu ƒe dukɔ la.” (Hebritɔwo 4:8, 9) Nukae “sabat ƒe dzudzɔ” ma nye?
Yi ɖe Mawu ƒe Dzudzɔ la Me
15, 16. (a) Nukae nyagbɔgblɔ “sabat ƒe dzudzɔ” fia? (b) Nukae wòfia be ame ‘nadzudzɔ tso eya ŋutɔ ƒe dɔwɔwɔ me’?
15 Helagbe me nya si gɔmee nye “sabat ɖuɖu” mee woɖe “sabat ƒe dzudzɔ” gɔme tsoe. (Kingdom Interlinear) Nufialagã William Lane gblɔ be: “Sabat ŋuti mɔfiame siwo va nɔ Yuda-subɔsubɔ me si wotu ɖe Mose II, 20:8-10 dzi me koŋue ɖe nyagbɔgblɔ la me, afisi wote gbe ɖe edzi le be nu ɖekae dzudzɔ kple kafukafu nye . . . Ete gbe ɖe azãɖuɖu kple dzidzɔkpɔkpɔ ƒe akpa tɔxɛ aɖe dzi, si nye bubu kple kafukafu tsɔtsɔ na Mawu.” Eyata menye dɔmawɔmawɔ dzro koe dzudzɔ si ŋugbe wodo la nye o. Enye asiɖeɖe le dagbadagba dzodzro ŋu ava nɔ dzidzɔdɔ si dea bubu Yehowa ŋu wɔm.
16 Nya siwo Paulo gagblɔ ɖo kpe esia dzi be: “Elabena amesi yi ɖe eƒe dzudzɔ me la, eya hã dzudzɔ tso eƒe dɔwɔwɔwo me, abe alesi Mawu dzudzɔ tso etɔwo me la ene.” (Hebritɔwo 4:10) Menye ɖeɖi ye te Mawu ŋu tae wòdzudzɔ le nuwɔwɔ ƒe ŋkeke adrelia dzi o. Ke boŋ eɖe asi le anyigba dzi nuwo wɔwɔ ŋu ale be wòana eƒe asinudɔwɔwɔ natsi eye woava nɔ ŋutikɔkɔe me bliboe, be wòanye kafukafu kple bubu nɛ. Esi míawo hã míenye Mawu ƒe nuwɔwɔwo ta la, ele be míawɔ akpa aɖe le ɖoɖo ma me. Ele be ‘míadzudzɔ tso mía ŋutɔwo míaƒe dɔwɔwɔ me,’ si fia be míadzudzɔ agbagbadzedze be míatso afia na mía ɖokui le Mawu ƒe ŋkume kple susu be míakpɔ ɖeɖe. Ðe ema teƒe la, ele be míaxɔe se be Yesu Kristo, amesi dzi woato ana nuwo katã nagava wɔ ɖeka kple Mawu ƒe tameɖoɖo la, ƒe tafevɔsa dzie míaƒe ɖeɖekpɔkpɔ nɔ te ɖo.—Efesotɔwo 1:8-14; Kolosetɔwo 1:19, 20.
Mawu ƒe Nya Sẽa Ŋu
17. Israel-viwo ƒe nuwɔna kae wòle be míatsri?
17 Israel-viwo mete ŋu yi Mawu ƒe dzudzɔ si ŋugbe wòdo me o le woƒe tomaɖomaɖo kple xɔsemanɔsi ta. Eyata Paulo de dzi ƒo na Hebritɔ Kristotɔwo vevie be: “Azɔ minɛ míado vevie, bene míayi ɖe dzudzɔ ma me, bene ame aɖeke nagadze tosesẽ ma ke tɔgbe aɖeke me o.” (Hebritɔwo 4:11) Ƒe alafa gbãtɔ me Yudatɔ akpa gãtɔ mexɔ Yesu dzi se o, eye wo dometɔ geɖe kpe fu vevie esime Yudatɔwo ƒe nuɖoanyia wu enu le ƒe 70 M.Ŋ. me. Aleke gbegbe wòhele vevie enye si be míaxɔ Mawu ƒe ŋugbedodo dzi ase egbea!
18. (a) Susu kawoe Paulo ɖe gblɔ si ta wòle be míaxɔ Mawu ƒe nya dzi ase? (b) Mɔ ka nue Mawu ƒe nya ‘ɖana wua yi nuevee sia yi nuevee’?
18 Susu nyuiwo le mía si si ta míaxɔ Yehowa ƒe nya dzi ase. Paulo ŋlɔ bena: “Mawu ƒe nya la le agbe, eye wòsẽa ŋu, eye wòɖana wua yi nuevee sia yi nuevee, eye wòƒona ɖe ame yina ɖe eme, halase esime wòmãa luʋɔ kple gbɔgbɔ kple ƒunukpeƒeewo kpakple ƒutomemi me, eye wònye tamesusuwo kple dzimedidiwo ƒe ʋɔnudrɔ̃la.” (Hebritɔwo 4:12) Ẽ, Mawu ƒe nya, alo gbedasi, “[ɖana] wua yi nuevee sia yi nuevee.” Ehiã be Hebritɔ Kristotɔwo naɖo ŋku nusi dzɔ ɖe wo tɔgbuiwo dzi la dzi. Woŋe aɖaba ƒu Yehowa ƒe ʋɔnudɔdrɔ̃ be woatsrɔ̃ avɔ le gbeadzi la dzi hete kpɔ be yewoayi Ŋugbedodonyigba la dzi. Gake Mose xlɔ̃ nu wo be: “Amalekitɔwo kple Kanaanitɔwo le mia ŋgɔ le afima, eye miatsi yi nu.” Esi Israel-viwo sẽ to heyi la, “Amalekitɔwo kple Kanaanitɔwo, amesiwo le to sia dzi la, va si wo, eye woka wo hlẽ vaseɖe Xorma ke.” (Mose IV, 14:39-45) Yehowa ƒe nya ɖana wu yi nuevee ɖesiaɖe, eye amesiame si aŋe aɖaba aƒu edzi akpɔ emetsonua godoo.—Galatiatɔwo 6:7-9.
19. Ŋusẽ kae Mawu ƒe nya tsɔ ‘mãa’ nu mee, eye nukata wòle be míalɔ̃ ɖe edzi be míabu akɔnta na Mawu?
19 Ŋusẽ ka gbegbee nye si Mawu ƒe nya tsɔ “[mãa] luʋɔ kple gbɔgbɔ kple ƒunukpeƒeewo kpakple ƒutomemi me”! Egena ɖe amewo ƒe susu kple seselelãme me eye wòte ŋu ɖoa ƒutomemi si le ƒua titina ke me le kpɔɖeŋumɔ nu! Togbɔ be Israel-viwo do le Egiptetɔwo ƒe kluvinyenye te eye wolɔ̃ be yewoawɔ ɖe Sea dzi hã la, Yehowa nya be le woƒe dzi ƒe gogloeƒe ke la, womekpɔ ŋudzedze ɖe yeƒe mɔnuɖoɖo kple nudidiwo ŋu o. (Psalmo 95:7-11) Le esi teƒe be woawɔ eƒe lɔlɔ̃nu la, wotsi dzi ɖe kɔɖiɖi na woƒe ŋutilãmenudzodzrowo boŋ ŋu. Eyata womeyi ɖe dzudzɔ si ƒe ŋugbe Mawu do me o, ke boŋ wotsrɔ̃ le gbeadzi. Ele be míasrɔ̃ nu tso nya ma me, elabena “nuwɔwɔ aɖeke mele ɣaɣla le [Mawu ƒe] ŋku me o; ke boŋ woklo nu le nuwo katã dzi, eye wotsi ƒeƒle le amesi gbɔ míaƒe nya le la ŋku me!” (Hebritɔwo 4:13) Eyata neva eme be míawɔ ɖe adzɔgbe si míeɖe na Yehowa dzi eye ‘míagagbugbɔ ayi gbegblẽ me o.’—Hebritɔwo 10:39.
20. Nukae le ŋgɔ gbɔna, eye nukae wòle be míawɔ be míayi ɖe Mawu ƒe dzudzɔ me?
20 Togbɔ be “ŋkeke adrelia”—Mawu ƒe dzudzɔŋkeke la—gale edzi yim hã la, ele ŋudzɔ ɖe tame si wòɖo ɖe anyigba kple ameƒomea ŋu me vava ŋu. Eteƒe madidi kura o, Mesia Fia, Yesu Kristo, atso aɖe amesiwo katã tsia tre ɖe Mawu ƒe lɔlɔ̃nu wɔwɔ ŋu kple Satana Abosam hã ɖa le anyigba dzi. Le Kristo ƒe Ƒe Akpe Ðeka Dziɖuɖua me la, Yesu kple eƒe hatidziɖula 144,000 ana anyigba kple ameƒomea naɖo nɔnɔme si ƒe tame Mawu ɖo la me. (Nyaɖeɖefia 14:1; 20:1-6) Fifiae wòle be míaɖee afia be Yehowa Mawu ƒe lɔlɔ̃nu wɔwɔe nye nu vevitɔ le míaƒe agbe me. Le esi teƒe be míadi be míatso afia na mía ɖokui le Mawu ƒe ŋkume eye míatsi dzi ɖe mía ŋutɔwo ƒe nuwo ŋu la, fifiae boŋue wòle be ‘míadzudzɔ tso mía ŋutɔ ƒe dɔwo me’ eye míatso dzi blibo me awɔ Fiaɖuƒea ƒe dɔwo. Ne míewɔe nenema eye míeyi edzi wɔ nuteƒe na mía Fofo, Yehowa, si le dziƒo la, mɔnukpɔkpɔ asu mía si míase vivi le Mawu ƒe dzudzɔ ƒe viɖewo me fifia ayi mavɔmavɔ me.
Àte Ŋu Aɖe Wo Mea?
◻ Tameɖoɖo ka tae Mawu dzudzɔ le “ŋkeke adrelia” dzi?
◻ Dzudzɔ ka mee Israel-viwo ate ŋu ayi hafi, gake nukata womete ŋu yi ɖe eme o?
◻ Nukae wòle be míawɔ be míayi ɖe Mawu ƒe dzudzɔ la me?
◻ Aleke Mawu ƒe nya le agbe, sẽ ŋu, eye wòɖana wua yi nuevee sia yi nuevee?
[Nɔnɔmetata si le axa 16]
Israel-viwo ɖu Sabat, gake womeyi Mawu ƒe dzudzɔ la me o. Ènya nusitaea?