‘Wɔ Nyateƒenya la Ŋudɔ Pɛpɛpɛ’

MAWU ƒe Nya la nye nudzraɖoƒe si me gɔmeɖose siwo hiã vevie na agbe ƒe dzidzedzekpɔkpɔ la le. Ate ŋu akpe ɖe subɔla ŋu wòafia nu, aka mo, eye wòana ɖɔɖɔɖo. (Timoteo II, 3:16, 17) Gake hafi míate ŋu akpɔ viɖe bliboe tso mɔfianu sia si tso Mawu gbɔ me la, ele be míawɔ ɖe apostolo Paulo ƒe aɖaŋu si wòɖo na Timoteo la dzi: “Do vevie be natsɔ ɖokuiwò afia Mawu abe ame like kple dɔwɔla si mehiã be ŋu nakpee o, kpakple amesi [wɔa nyateƒenya la ŋudɔ pɛpɛpɛ ene, NW].”—Timoteo II, 2:15.

Nusiwo wotsɔ Mawu ƒe Nya la sɔ kplii dometɔ aɖewoe nye notsi si me nunyiame le, nuɖuɖu sesẽ, tsi si naa gbɔɖeme eye wòklɔa ɖi ɖa, ahuhɔ̃e, kpakple yi ɖaɖɛ. Nusi nya siawo fia la nyanya akpe ɖe subɔla ŋu be wòawɔ Biblia la ŋudɔ aɖaŋutɔe.

Mawu Nya la ƒe Notsi Tsɔtsɔna

Notsi nye nuɖuɖu si vidzĩ kokoewo hiã. Ne vidzĩa le tsitsim la wotsɔa nuɖuɖu sesẽ kpena ɖe nusiwo wòɖuna la ŋu ʋeʋeʋe, gake notsi koe eƒe dɔgboa ate ŋu atu tso gɔmedzedzea me. Le go geɖe me la, amesiwo menya nu tso Mawu ƒe Nya la ŋu boo o la sɔ kple vidzĩwo. Ne ame aɖe tsɔ ɖe le Mawu ƒe Nya la me eteƒe medidi o, alo nya nu tso eŋu ɣeyiɣi didi aɖe o, ne nusi Biblia gblɔ ƒe gɔmedzenuwo koe wònya la, ke enye gbɔgbɔmevidzĩ eye wòhiã nunyiame si wòate ŋu atu bɔbɔe—gbɔgbɔ me “notsi.” Mate ŋu atu “nuɖuɖu sesẽ” si nye Mawu ƒe Nya la me nu goglowo haɖe o.—Hebritɔwo 5:12.

Aleae wònɔ le hame yeye si woɖo le Korinto la me esime Paulo ŋlɔ agbalẽ na wo be: “Mena notsi mi mieno, eye menye nuɖuɖu sesẽ o, elabena miesẽ ŋu haɖe o.” (Korintotɔwo I, 3:2) Ehiã be Korintotɔawo nasrɔ̃ “Mawu ƒe nyawo ƒe gɔmedzenuwo” gbã. (Hebritɔwo 5:12) Le afisi wotsi ɖo ɣemaɣi la, womate ŋu atu “Mawu ƒe nu gogloawo” o.—Korintotɔwo I, 2:10.

Abe Paulo ene la, egbe subɔla Kristotɔwo ɖea woƒe ɖetsɔleme na gbɔgbɔmevidzĩwo fiana to “notsi” nana wo me, si nye be, wokpena ɖe wo ŋu be gɔmeɖoɖoanyi sesẽ nasu wo si le Kristotɔwo ƒe gɔmedzenufiafiawo me. Wodea dzi ƒo na ame yeye alo ame matsimatsi siawo be ‘nya la ƒe notsi tsimatɔ la nadzro wo vevie.’ (Petro I, 2:2) Apostolo Paulo ɖee fia be yenya beléle tɔxɛ si ame yeyewo hiã esi wòŋlɔe bena: “Amesiame, si nɔa notsi nom la, menya naneke le dzɔdzɔenyenye ƒe nya ŋuti o; elabena vidzĩ ko wònye.” (Hebritɔwo 5:13) Ehiã be dzigbɔɖi, ameŋububu, nugɔmesese, kple tufafa nanɔ Mawu ƒe subɔlawo si ne wole Nya la ƒe notsi akuaku gblɔm na ame yeyewo kple amemakpɔnuteƒewo le aƒeme Biblia nusɔsrɔ̃wo me kple le hamea me.

Mawu ƒe Nya la me Nuɖuɖu Sesẽ Ŋudɔwɔwɔ

Be Kristotɔ natsi aɖo agbexɔxɔ gbɔ la, ehiã nu geɖe wu “notsi.” Ne wònya se Biblia me gɔmedzenyateƒewo gɔme nyuie eye wòlɔ̃ ɖe wo dzi ko la, ke ele klalo be yeayi ŋgɔ aɖu ‘nuɖuɖu sesẽ si li na amesiwo tsi zu blibo’ la. (Hebritɔwo 5:14) Aleke wòate ŋu awɔ esiae? Ðokuisinusɔsrɔ̃ si wòatsɔ ɖo dɔ anɔ wɔwɔm enuenu kple hadede le Kristotɔwo ƒe kpekpewo me koŋ mee wòato. Numame nyui siawo akpe ɖe Kristotɔ ŋu le gbɔgbɔ me be wòasẽ ŋu, atsi, eye wòabi le subɔsubɔdɔa me. (Petro II, 1:8) Mele be míaŋlɔ be o be hekpe ɖe sidzedze ŋu la, Yehowa ƒe lɔlɔ̃nu wɔwɔ hã nye gbɔgbɔmenuɖuɖu.—Yohanes 4:34.

Woɖo “dɔla nuteƒewɔla kple aɖaŋudzela” egbea be wòana nuɖuɖu Mawu subɔlawo le ɣeyiɣi nyui dzi eye wòakpe ɖe wo ŋu be woase “Mawu ƒe nunya bubu ƒomevi geɖe la” me. Yehowa to eƒe gbɔgbɔa dzi le Ŋɔŋlɔawo me nyateƒe goglowo ɖem ɖe go to dɔla nuteƒewɔla sia dzi, amesiwo hã taa gbɔgbɔ me “nuɖuɖu le ɣeyiɣi nyui dzi” nuteƒewɔwɔtɔe. (Mateo 24:45-47; Efesotɔwo 3:10, 11; tsɔe sɔ kple Nyaɖeɖefia 1:1, 2.) Enye Kristotɔ ɖesiaɖe ƒe agbanɔamedzi be wòawɔ agbalẽnunana mawo ŋudɔ bliboe.—Nyaɖeɖefia 1:3.

Ele eme be nya aɖewo le Biblia la me siwo “gɔmesese nye dɔ” na Kristotɔ tsitsiwo gɔ̃ hã. (Petro II, 3:16) Nyagbɔgblɔ, nyagblɔɖi, kple lododo aɖewo li siwo blua tame na ame esiwo hiã nusɔsrɔ̃ kple ŋugbledede geɖe. Eyata Mawu ƒe Nya la me kuku nye ɖokuisinusɔsrɔ̃ ƒe akpa aɖe. (Lododowo 1:5, 6; 2:1-5) Agba le hamemegãwo koŋ dzi le esia gome ne wole nu fiam hamea. Ne Hamea ƒe Agbalẽ me Nusɔsrɔ̃ alo Gbetakpɔxɔ Nusɔsrɔ̃ dzi kpɔm wole, dutoƒonuƒo ƒom wole, alo nufiafiadɔ bubu aɖe wɔm wole o, ele be hamemegãwo nanya nyati si ŋu wole nu ƒom le la nyuie ahanɔ klalo alé ŋku ɖe woƒe “nufiafiaɖaŋu” la ŋu elabena gbɔgbɔmenuɖuɖu sesẽ nam wole hamea.—Timoteo II, 4:2, NW.

Tsi si Naa Gbɔɖeme Heklɔa Ði Le Ame Ŋu

Yesu gblɔ na Samaria nyɔnua le vudoa to be yeana tsinono aɖee si azu “tsivudo le eme, esi anɔ dzidzim ayi ɖe agbe mavɔ me.” (Yohanes 4:13, 14; 17:3) Mawu ƒe mɔnuɖoɖowo katã hena agbekpɔkpɔ to Mawu ƒe Alẽvi la dzi la le tsi sia si naa agbe la me, eye woɖe mɔnuɖoɖo siawo gɔme ɖe Biblia la me. Abe ame ɖekaɖeka siwo “tsi” ma dzro be yewoano la, míexɔ amekpekpe si gbɔgbɔ la kple Kristo ƒe ŋugbetɔ la le nanam la be ‘míaxɔ agbetsi la no faa.’ (Nyaɖeɖefia 22:17) Tsi sia nono ate ŋu ana agbe mavɔ ame.

Gakpe ɖe eŋu la, Biblia la na agbenɔnɔ kple gbɔgbɔ me ƒe dzidzenuwo nyateƒe Kristotɔwo. Ne míele mawumedzidzenu siawo ŋudɔ wɔm la, Yehowa ƒe Nya la klɔa mía ŋu, “wole tsi na” mí tso nuwɔna siwo katã Yehowa Mawu tsri la me. (Korintotɔwo I, 6:9-11) Le susu sia ta la, woyɔa nyateƒe si le Nya si tso gbɔgbɔ me la me be “tsilele.” (Efesotɔwo 5:26) Ne míeɖe mɔ na Mawu ƒe nyateƒe la wòklɔ mía ŋu alea o la, míaƒe subɔsubɔ madze eŋu o.

Nukutɔe la, wotsɔa hamemegã siwo ‘wɔa nyateƒenya la ŋudɔ pɛpɛpɛ’ la sɔ kple tsi. Yesaya gblɔ be wole abe “tɔʋu le gbegbe” ene. (Yesaya 32:1, 2) Hamemegã lɔlɔ̃tɔwo naa nuɖɔɖɔ sia vaa eme ne woyi ɖasrã wo nɔviwo kpɔ abe gbɔgbɔmelẽkplɔlawo ene, eye wowɔa Mawu ƒe Nya si naa gbɔɖeme la ŋudɔ tsɔ naa gbɔgbɔmenufiame tuameɖo fakɔname si doa ŋusẽ ame hedea dzi ƒo na ame.—Tsɔe sɔ kple Mateo 11:28, 29.a

Hamea me tɔwo kpɔa mɔ na hamemegãwo ƒe sasrãkpɔwo. Bonnie gblɔ be: “Menya alesi hamemegãwo te ŋu faa dzi na amee, eye enye dzidzɔ nam be Yehowa wɔ mɔnuɖoɖo sia.” Lynda, si nye vinɔ si si srɔ̃ mele o la ŋlɔe be: “Hamemegãwo to Ŋɔŋlɔawo me dzideƒoname dzi na mete ŋu nɔ te. Woɖo to eye woɖe veveseseɖeameti fia.” Michael gblɔ be: “Wona mese le ɖokuinye me be menye habɔbɔ si tsɔa ɖe le eme na ame la me tɔ.” Ame bubu gblɔ be: “Hamemegãwo ƒe sasrãkpɔwo kpe ɖe ŋu nye be meɖu blanuiléle sesẽ ƒe ɣeyiɣiwo dzi.” Hamemegã ƒe gbɔgbɔ me sasrãkpɔ si tua ame ɖo la le abe nunono si faa dzi ene. Hamemegã lɔlɔ̃tɔwo faa akɔ na amesiwo si alẽ ƒe nɔnɔme le elabena wokpena ɖe wo ŋu wokpɔa alesi Ŋɔŋlɔawo me gɔmeɖosewo ku ɖe woƒe nɔnɔmea ŋui.—Romatɔwo 1:11, 12; Yakobo 5:14.

Wɔ Mawu ƒe Nya Ŋudɔ abe Ahuhɔ̃e Ene

Ne ame aɖe le nu ɖum la, menye taɖodzinua enye be wòase nua ƒe vivi ko o. Ke boŋ ekpɔa mɔ be yeakpɔ nunyiame si ana yeanɔ ame me la tso eme. Ne ɖevie wònye la, ekpɔa mɔ be nuɖuɖua akpe ɖe ye ŋu yeatsi azu ame tsitsi. Nenema tɔgbe ke wòle le gbɔgbɔmenuɖuɖu hã gome. Dzidzɔ ate ŋu anɔ ɖokuisi Biblia sɔsrɔ̃ me, gake menye taɖodzinua koe nye ema o. Ele be gbɔgbɔmenuɖuɖu natrɔ míaƒe nɔnɔme. Ekpena ɖe mía ŋu míedzea si gbɔgbɔa ƒe kuwo eye míetsea wo eye be míado ‘amenyenye yeyea si wowɔ yeyee to sidzedze vavãtɔ me ɖe Amesi wɔe la ƒe nɔnɔme nu.’ (Kolosetɔwo 3:10; Galatiatɔwo 5:22-24) Gbɔgbɔmenuɖuɖu gakpena ɖe mía ŋu be mía zu ame tsitsiwo, eye wònaa míete ŋu wɔa Ŋɔŋlɔa me gɔmeɖosewo ŋudɔ nyuie wu le míaƒe kuxiwo gbɔ kpɔkpɔ me eye míete ŋu kpena ɖe ame bubuwo ŋu be woakpɔ wo tɔ gbɔ.

Aleke míawɔ anya be Biblia le ŋusẽ ma kpɔm ɖe mía dzi? Míazã Biblia la abe ahuhɔ̃e ene. Yakobo gblɔe be: “Mizu nyadziwɔlawo, eye menye nyasela, . . . ɖeɖeko o. Elabena ne ame aɖe nye nyasela, eye menye edziwɔla o la, eyama ɖi ŋutsu aɖe, si kpɔ eƒe dzɔdzɔmemo le ahũhɔ̃e me. Elabena ekpɔ eɖokui dze sii, eye wòdzo heyi, eye enumake la eŋlɔ alesi wòle la be. Ke amesi kpɔ se blibo, si nye ablɔɖese la me, eye wònɔ edzi la, eya menye nyasela, si ŋlɔa nu be o, ke boŋ dɔ ƒe wɔla, eye woayra eyama le eƒe nuwɔwɔ me.”—Yakobo 1:22-25.

‘Míekpɔa’ Mawu ƒe Nya la me ne míedzroa eme tsitotsito hetsɔa alesi míele la sɔ kple Mawu ƒe dzidzenuwo. Ne míele esia wɔm la, míazu ‘nyadziwɔlawo, ke menye nyaselawo ɖeɖeko o.’ Biblia la anɔ ŋusẽ nyui kpɔm ɖe mía dzi.

Mawu ƒe Nya la abe Yi Ene

Mlɔeba la, apostolo Paulo kpe ɖe mía ŋu be míakpɔ alesi míate ŋu awɔ Mawu ƒe Nya ŋudɔ abe yi ene. Esi wònɔ nu xlɔ̃m mí le “dziɖulanyenye kple ŋusẽ kple xexe sia me fia, siwo le fifi viviti sia me kpakple vɔ̃ɖinyenye ƒe gbɔgbɔ, siwo le dziƒonutowo me” ŋu la, eƒoe ɖe mía nu be “mihe Gbɔgbɔ ƒe yi, si nye mawunya la, ɖe asi.” (Efesotɔwo 6:12, 17) Mawu ƒe Nya la nye aʋawɔnu vevi aɖe si míate ŋu atsɔ sẽ susu ɖesiaɖe “si kɔa eɖokui ɖe dzi ɖe sidzedze Mawu ŋuti la” ɖa.—Korintotɔwo II, 10:3-5.

Ðikekemanɔmee la, “Mawu ƒe nya la le agbe, eye wòsẽa ŋu.” (Hebritɔwo 4:12) Yehowa ƒoa nu na ameƒomea to eƒe Nya si tso gbɔgbɔ me la dzi. Zãe nyuie le nufiafia amewo kple nukoklo le alakpanufiafiawo dzi me. Wɔ eŋudɔ ne èle dzi dem ƒo na ame bubuwo, le wo tum ɖo, le gbɔɖeme nam wo, le akɔ fam na wo, le dzo dem wo me, kple ne ele ŋusẽ dom wo le gbɔgbɔ me. Eye Yehowa “nadzra [wò] ɖo blibo le dɔ nyui sia dɔ nyui wɔwɔ me,” ale be nàwɔ nusi “dze eŋu” ɣesiaɣi.—Hebritɔwo 13:21.

[Etenuŋɔŋlɔwo]

[Nɔnɔmetata si le axa 31]

Hamemegãwo “wɔa nyateƒenya la ŋudɔ pɛpɛpɛ” tsɔ dea dzi ƒo na ame bubuwo