Xɔse Ʋãa Mí Míewɔa Dɔ!

“Èkpɔ bena, [Abraham ƒe] xɔse wɔ dɔ kpe ɖe eƒe dɔwɔwɔwo ŋu, eye wòtsɔ dɔwɔwɔwo wɔ xɔse la blibo.”—YAKOBO 2:22.

1, 2. Aleke míawɔ nui ne xɔse le mía si?

AME geɖe gblɔna be yewoxɔ Mawu dzi se. Ke hã egbɔgblɔ ko be xɔse le ye si nye nusi me agbe mele o abe nu kuku ene. Nusrɔ̃la Yakobo ŋlɔ bena: “Xɔse hã, ne dɔwɔwɔwo mele eŋu o la, enye nu kuku le eɖokui me.” Egblɔ hã be xɔse si ‘wɔ dɔ kpe ɖe dɔwɔwɔ ŋu’ nɔ mawuvɔ̃la Abraham si. (Yakobo 2:17, 22) Gɔmesese kae le nya siawo ŋu na mí?

² Ne xɔse vavã le mía si la, menye ɖeko míaxɔ nya si míesena le Kristotɔwo ƒe kpekpewo me dzi ase ko o. Míaɖee afia be xɔse le mía si elabena míenye Yehowa ƒe Ðasefo veviedolawo. Ẽ, xɔse aʋã mí míatsɔ Mawu ƒe Nya la awɔ dɔe le agbe me eye aʋã mí ɖe dɔ ŋu.

Ameŋkumekpɔkpɔ Mesɔ ɖe Xɔse Nu O

3, 4. Aleke wòle be xɔse nakpɔ ŋusẽ ɖe alesi míewɔa nu ɖe ame bubuwo ŋui dzi?

³ Ne Mawu kple Kristo dzixɔse akuakua le mía si la, míakpɔ ame ŋkume o. (Yakobo 2:1-4) Amesiwo Yakobo ŋlɔ agbalẽa na dometɔ aɖewo menɔ ameŋkumemakpɔmakpɔ si wodi tso nyateƒe Kristotɔwo si ɖem fia o. (Romatɔwo 2:11) Eyata Yakobo gblɔ be: “Migatsɔ ame ŋkumekpɔkpɔ lé Yesu Kristo, mía Aƒetɔ, si nye ŋutikɔkɔe ƒe Aƒetɔ la, ƒe dzixɔse me ɖe asi o.” Ne kesinɔtɔ dzimaxɔsetɔ si do sikasigɛwo kple awu dzeaniwo va kpekpe aɖe eye dzimaxɔsetɔ si nye “ame dahe aɖe hã do awu ƒoɖi” va la, ele be woaxɔ wo ame evea nyuie hafi, gake wonɔ kesinɔtɔwo gbɔ kpɔm etɔxɛe. Wonaa zikpui wo ɖe “teƒe nyui,” eye wogblɔna na ame dahe dzimaxɔsetɔwo be woatsi tre alo woanɔ anyigba le ame aɖe ƒe afɔnu.

⁴ Kesinɔtɔwo kple ame dahewo siaa ye Yehowa wɔ Yesu Kristo ƒe tafevɔsa ƒe ɖoɖoa na. (Korintotɔwo II, 5:14) Eyata ne míelɔ̃a kesinɔtɔwo wu la, ke míele nusi to vovo na Kristo ƒe xɔse ɖem fia, amesi ‘va zu ame dahe be míawo míate ŋu azu kesinɔtɔwo to eƒe ahedadaa me.’ (Korintotɔwo II, 8:9) Migana míatsɔ susu sia abu amewoe gbeɖe o—si nye susu gbegblẽ si wotsɔ dea bubu amegbetɔwo ŋu. Mawu mekpɔa ame ŋkume o, gake ne míawo míede vovo amewo dome la, míazu “tamesusu vɔ̃wo [ƒe] ʋɔnudrɔ̃lawo.” (Hiob 34:19) Ne didi le mía me be míadze Mawu ŋu la, míage ɖe ameŋkumekpɔkpɔ ƒe tetekpɔa me alo ‘míakpɔ dzidzɔ ɖe ame aɖewo ŋu ɖe viɖe si mía ŋutɔwo míakpɔ ta o.’—Yuda 4, 16.

 5. Amekawoe Mawu tia be woanye “kesinɔtɔwo le xɔse me,” eye aleke ŋutilãmekesinɔtɔwo wɔa nui edziedzi?

⁵ Yakobo ɖe amesi nye kesinɔtɔ ŋutɔŋutɔ fia eye wòƒoe ɖe mía nu be míalɔ̃ amesiame ameŋkumekpɔkpɔ manɔmee. (Yakobo 2:5-9) ‘Mawu tia ame dahewo be woanye kesinɔtɔwo le xɔse me kple fiaɖuƒea domenyilawo.’ Esia le alea elabena zi geɖe la, ame dahewoe ɖoa to nyanyuia wu. (Korintotɔwo I, 1:26-29) Ne míagblɔe gbadzaa la, ŋutilãmekesinɔtɔwoe tea ame bubuwo ɖe anyi le fenyinyi, fetu, kple senyawo gome. Wogblɔa busunya le Kristo ŋu eye wotia mía yome le esi eƒe ŋkɔ le mía ŋu ta. Gake mina míaɖoe kplikpaa be míawɔ ɖe “fiasedede,” si bia be míalɔ̃ mía haviwo la dzi—míaɖe lɔlɔ̃ afia kesinɔtɔwo kple ame dahewo sɔsɔe. (Mose III, 19:18; Mateo 22:37-40) Esi wònye nusia dim Mawu le ta la, ameŋkumekpɔkpɔ nye ‘nuvɔ̃wɔwɔ.’

‘Nublanuikpɔkpɔ Ðua Dzi le Ʋɔnudɔdrɔ̃ Me’

 6. Aleke míazu sedzidalawoe ne míekpɔ nublanui na ame bubuwo o?

⁶ Ne míekpɔ ame ŋkume nublanuimakpɔmakpɔtɔe la, ke sedzidalawo míenye. (Yakobo 2:10-13) Ne míeɖe afɔ gbegblẽ le go sia me la, míezua Mawu ƒe sewo katã dzi dalawo. Israel-vi siwo mewɔ ahasi o gake wonye fiafiwo la va zu Mose ƒe Sea dzi dalawo. Esi míenye Kristotɔwo ta la, ‘ablɔɖeviwo’—gbɔgbɔ me Israel si le nubabla yeyea me eye woŋlɔ eƒe sewo ɖe woƒe dziwo me—‘ƒe se’ lae wotsɔ drɔ̃a ʋɔnu mí.—Yeremya 31:31-33.

 7. Nukata amesiwo yia edzi kpɔa ame ŋkume makpɔ mɔ be Mawu nakpɔ nublanui na yewo o?

⁷ Ne míegblɔ be xɔse le mía si gake míeyi edzi kpɔa ame ŋkume la, ke míele afɔku me. Woadrɔ̃ ʋɔnu amesiwo melɔ̃a ame o eye womekpɔa nublanui o la nublanuimakpɔmakpɔtɔe. (Mateo 7:1, 2) Yakobo gblɔ be: “Nublanuikpɔkpɔ ƒoa adegbe ɖe ʋɔnudɔdrɔ̃ ŋuti.” Ne míexɔ Yehowa ƒe gbɔgbɔ kɔkɔe ƒe mɔfiafia heɖe nublanuikpɔkpɔ fia le míaƒe nuwɔnawo katã me la, womabu fɔ mí ne wole ʋɔnu drɔ̃m mí o. Ke boŋ woakpɔ nublanui na mí eye míato ema me aɖu seŋudɔwɔwɔ kpaɖii alo fɔbuʋɔnu dzi.

Xɔse na Wowɔa Dɔ Nyuiwo

 8. Nɔnɔme ka mee amesi gblɔna be xɔse le ye si gake dɔwɔwɔ mekpe ɖe eŋu o la le?

⁸ Tsɔ kpe ɖe alesi xɔse ana míazu ame lɔ̃amewo kple nublanuikpɔlawo ŋu la, ana míawɔ dɔ nyui bubuwo hã. (Yakobo 2:14-26) Le nyateƒe me la, xɔse si wogblɔ be ele ame si si ŋu dɔwɔwɔ mekpe ɖo o mate ŋu aɖe mí o. Nyateƒee, Sea ƒe dɔwɔwɔwo mana tenɔnɔ dzadzɛ nasu mía si le Mawu gbɔ o. (Romatɔwo 4:2-5) Dɔwɔwɔ siwo tso xɔse kple lɔlɔ̃ me, ke menye esi se aɖe bia tae o, ŋue Yakobo le nu ƒom tsoe. Ne nɔnɔme siawoe ʋãa mí la, menye ɖeko míagblɔ nyuidinamenyawo na hati subɔla si hiã tu ko evɔ o. Míana ŋutilãmekpekpeɖeŋu nɔviŋutsu alo nɔvinyɔnu si hiã nudodo alo nuɖuɖu. Yakobo bia be: ‘Ne miegblɔ na nɔvi si hiã tu be: “Miheyi le ŋutifafa me, miƒu dzo, eye miɖu nu ɖi ƒo” gake miena nusiwo hiãe o la, viɖe kae wòanye?’ Maɖe vi aɖeke o. (Hiob 31:16-22) “Xɔse” sia tɔgbe nye nu kuku!

 9. Nukae ɖenɛ fiana be xɔse le mía si?

⁹ Ðewohĩ míanɔ ha dem kple Mawu ƒe amewo vaseɖe afi aɖe, gake dɔwɔwɔ siwo tso dzi blibo me koe ate ŋu aɖo kpe xɔse si míebe ele mía si dzi. Míawɔe nyuie ne míegbe Mawuɖekaetɔ̃ ƒe nufiafia eye míexɔe se be Mawu vavã ɖeka koe li. Ke hã dzixɔse ɖeɖe menye xɔse o. “Gbɔgbɔ vɔ̃wo hã xɔnɛ sena,” eye “wodzona nyanyanya” le vɔvɔ̃ me elabena tsɔtsrɔ̃ le wo lalam. Ne xɔse le mía si nyateƒe la, aʋã mí míawɔ dɔ si ƒe ɖewoe nye gbeƒãɖeɖe nyanyuia kple nuɖuɖu kple nudodowo nana haxɔsetɔ siwo hiã tu. Yakobo bia be: “Wò ame gbɔlo [si si Mawu ŋuti sidzedze vavãtɔ geɖe mele o], ɖe nèle didim be, yeanyae bena, xɔse dɔwɔwɔ manɔŋutɔ la enye nu kuku mahã?” Ẽ, xɔse bia dɔwɔwɔ.

10. Nukata woyɔ Abraham be enye “fofo na amesiwo katã xɔna sena”?

¹⁰ Blemafofo Abraham ƒe xɔse ʋãe ɖe dɔ ŋu. Esi wònye “fofo na amesiwo katã xɔna sena” ta la, “dɔwɔwɔwo wotsɔ tso afia [nɛ] esime wòtsɔ via Isak ɖo vɔsamlekpui dzi.” (Romatɔwo 4:11, 12; Mose I, 22:1-14) Nukae adzɔ ne ɖe Abraham mexɔe se be Mawu ate ŋu afɔ Isak ɖe tsitre eye wòawɔ Eƒe ŋugbedodo be yeana dzidzimevi aɖe nado tso eme dzi o? Anye ne Abraham mate kpɔ gbeɖe be yeatsɔ ye viŋutsua asa vɔe o. (Hebritɔwo 11:19) Dɔ siwo Abraham wɔ le toɖoɖo mee wɔ “[eƒe] xɔse la blibo,” alo na wòde edeƒe. Ale “wowu ŋɔŋlɔ [Mose I, 15:6], si gblɔ bena: ‘Abraham xɔ Mawu dzi se, eye wobui nɛ dzɔdzɔenyenye la’ nu enye esi.” Dɔ si Abraham wɔ esi wòdze agbagba be yeatsɔ Isak asa vɔe la ɖo kpe nya si Mawu gblɔ do ŋgɔ be Abraham nye ame dzɔdzɔe la dzi. Eto xɔse ƒe dɔwɔwɔwo dzi ɖe eƒe lɔlɔ̃ na Mawu fia eye wova yɔe be ‘Yehowa xɔlɔ̃.’

11. Xɔse ƒe kpeɖodzi kae le mía si le Raxab gome?

¹¹ Abraham ɖee fia “bena, wotsɔ dɔwɔwɔwo [tsoa] afia na ame, eye menye xɔse ɖeɖekoe o.” Nenemae wònɔ le Raxab, gbolo si nɔ Yerixo, la hã gome. “Dɔwɔwɔwo wotsɔ tso afia nɛ, le esi wòxɔ [Israel] ame dɔdɔwo, eye wòna woto mɔ bubu dzo la ŋuti,” ale wode axa na woƒe futɔ Kanaanitɔwo. Hafi wòado go Israel-ŋkutsalawo la, ekpɔe dze sii be Yehowae nye Mawu vavã la, eye nya siwo wòva gblɔ emegbe kple alesi wòdzudzɔ gbolowɔwɔ la ɖo kpe eƒe xɔse dzi. (Yosua 2:9-11; Hebritɔwo 11:31) Esi Yakobo gblɔ xɔse si woɖe fia to dɔwɔwɔ me ƒe kpɔɖeŋu evelia sia vɔ la, egblɔ be: “Abe alesi ŋutilã gbɔgbɔ manɔmee nye nu kuku [ene] la, nenema ke xɔse dɔwɔwɔ manɔŋui hã nye nu kuku.” Ne ame ku la, ameʋãŋusẽ, alo “gbɔgbɔ,” aɖeke meganɔa eme o, eye mete ŋu wɔa naneke o. Gbɔgblɔ ko be xɔse le ye si nye nu kuku eye viɖe aɖeke mele eŋu o abe ŋutilã kuku ene. Gake ne xɔse le mía si ŋutɔŋutɔ la, aʋã mí míawɔ mawumedɔwo.

Kpɔ Wò Aɖe Dzi Nyuie!

12. Nukae wòle be hamemegãwo nawɔ?

¹² Nuƒoƒo kple nufiafia hã ate ŋu aɖe xɔse afia, gake ehiã be míaɖo seɖoƒe nɛ. (Yakobo 3:1-4) Esi hamemegãwo nye nufialawo le hamea me ta la, agba gã aɖe le wo dzi le Mawu gbɔ eye woabu akɔnta nɛ geɖe. Eyata ele be woatsɔ ɖokuibɔbɔ adzro woƒe susuwo kple nɔnɔmewo me akpɔ. Tsɔ kpe ɖe sidzedze kple ŋutete ŋu la, ele be lɔlɔ̃ deto nanɔ ŋutsu siawo si na Mawu kple haxɔsetɔwo. (Romatɔwo 12:3, 16; Korintotɔwo I, 13:3, 4) Ele be hamemegãwo natu woƒe aɖaŋuɖoɖo ɖe Ŋɔŋlɔawo dzi. Ne hamemegã da vo le eƒe nufiafia me eye esia he kuxiwo vɛ na ame bubuwo la, Mawu adrɔ̃ fɔbuʋɔnui to Kristo dzi. Eyata ele be hamemegãwo nabɔbɔ wo ɖokui ahasrɔ̃ nu, eye woalé ɖe Mawu ƒe Nya la ŋu nuteƒewɔwɔtɔe.

13. Nukata míedaa vo le nuƒoƒo me?

¹³ Nufiala bibiwo gɔ̃ hã—le nyateƒe me mí katã—“[míedaa] vo le nu geɖewo me” le blibomademade ta. Gbɔdzɔgbɔdzɔ siwo dzena edziedzi wu eye woate ŋu agblẽ nu la dometɔ ɖekae vo dada le nuƒoƒo me nye. Yakobo gblɔ be: “Ne ame aɖe meda vo le nuƒoƒo me o la, eyae nye ame blibo, eye wòkpɔ ŋusẽ bena, wòaɖu ŋutilã blibo la katã hã dzi.” Míete ŋu kpɔa míaƒe aɖe dzi bliboe abe Yesu Kristo ene o. Ne míete ŋu kpɔa edzi la, anye ne míate ŋu aɖu mía ŋutinu bubuwo hã dzi. Míete ŋu zãa ka kple numegawo tsɔ naa sɔwo yia afisi míafia wo, eye kuɖɔɖola ate ŋu azã kuɖɔ sue afia mɔ tɔdziʋu gã si ya sesẽwo tutuna ayi afisi wòdi.

14. Aleke Yakobo te gbe ɖe alesi agbagbadzedze vevie hiã hafi míate ŋu amlã aɖeae dzi?

¹⁴ Ele be mí katã míalɔ̃ ɖe edzi le anukwareɖiɖi me be ebia agbagbadzedze vevie be míakpɔ míaƒe aɖe dzi. (Yakobo 3:5-12) Numega nye nu sue aɖe ne míetsɔe sɔ kple sɔ; nenema ke enye kuɖɔ ne míetsɔe sɔ kple tɔdziʋu. Eye ne míetsɔ aɖe la sɔ kple ametia la, nu sue aɖe ko wònye “eye wòkana ɖe nu gãwo ŋu.” Esi Ŋɔŋlɔawo na eme kɔ ƒã be adegbeƒoƒo medzea Mawu ŋu o ta la, mina míadi eƒe kpekpeɖeŋu be míatsrii. (Psalmo 12:4, 5; Korintotɔwo I, 4:7) Mina míakpɔ míaƒe aɖe dzi hã ne wodo dziku na mí, eye míaɖo ŋku edzi be dzo sue aɖe koe tɔa dzo ave. Yakobo ɖee fia be “aɖe la, dzo wònye” si te ŋu gblẽa nu geɖe. (Lododowo 18:21) “Madzɔmadzɔnyenye ƒe xexemee” nye aɖe si menɔa anyi kpoo o! Nɔnɔme vɔ̃ɖi ɖesiaɖe si le mawumavɔ̃mavɔ̃ ƒe xexe sia me do ƒome kple aɖe si dzi womekpɔ nyuie o. Eya gbɔe nusiwo gblẽa nu si ƒe ɖewoe nye amegɔmezɔzɔ kple alakpanufiafia la tso. (Mose III, 19:16; Petro II, 2:1) Nukae nèsusu? Ðe mele be míaƒe xɔse naʋã mí míadze agbagba vevie aɖu míaƒe aɖe dzi oa?

15. Nukae aɖe si womemlã o ate ŋu agblẽ?

¹⁵ Aɖe si dzi womekpɔ o la ‘ƒoa ɖi mí’ keŋkeŋ. Le kpɔɖeŋu me, ne wokpɔe be míekaa aʋatso edziedzi la, woate ŋu abu mí aʋatsokalawoe. Gake aleke aɖe si menɔa anyi kpoo o ‘tɔa dzo agbenɔnɔ ƒe tododo blibo katãe’? To alesi wònaa agbenɔnɔ va zua abe nusi dzia vɔ̃ ɖe vɔ̃ dzi ene mee. Aɖe ɖeka si dzi womekpɔ nyuie o ate ŋu atɔtɔ hame bliboa katã. Yakobo yɔ “Gehenna” (NW) si nye Hinom Bali me. Wotsɔa ɖeviwo saa vɔ le afima tsã, eye emegbe eva zu aɖukpo, afisi wotɔa dzo Yerusalem-gbeɖuɖɔwo ɖo. (Yeremya 7:31) Eyata Gehenna nye tsɔtsrɔ̃ ɖikaa ƒe kpɔɖeŋu. Le gɔmesese aɖe nu la, Gehenna ƒe ŋusẽ gblẽnua sɔ kple aɖe si menɔa anyi kpoo o. Ne míemlã míaƒe aɖe o la, mía ŋutɔwo míatsi dzo si míetɔ la me. (Mateo 5:22) Ðewohĩ woaɖe mí le hamea me gɔ̃ hã ɖe dzugbe si míezã ɖe ame aɖe ŋu ta.—Korintotɔwo I, 5:11-13.

16. Le nusi aɖe si menɔa anyi kpoo o ate ŋu agblẽ ta la, nukae wòle be míawɔ?

¹⁶ Abe alesi ɖewohĩ Mawu ƒe Nya la xexlẽ na nèkpɔe ene la, Yehowa de se be amegbetɔ naɖu nuwɔwɔ siwo nye lãwo dzi. (Mose I, 1:28) Eye wote ŋu mlã lã ƒomeviwo katã. Le kpɔɖeŋu me, wozã aʋako siwo womlã le adedada me. Da siwo gbesalawo mlã ate ŋu anɔ ‘nutata’ siwo Yakobo yɔ me. (Psalmo 58:5, 6) Amegbetɔ te ŋu mlãa bosowo gɔ̃ hã, gake esi míenye nuvɔ̃mewo ta la, míate ŋu amlã aɖe la bliboe o. Gake ele be míatsri dzugbe, nya tɔame, alo ameŋuzɔnyawo gbɔgblɔ. Aɖe si menɔa anyi kpoo o ate ŋu azu afɔkunu si yɔ fũ kple aɖi wuame. (Romatɔwo 3:13) Nublanuitɔe la, alakpanufialawo ƒe aɖe na Kristotɔ gbãtɔ aɖewo trɔ le Mawu yome. Eyata migana míaɖe mɔ le mía ɖokui ŋu be xɔsegbelawo ƒe nyagbɔgblɔ si nye aɖi la naɖu mía dzi o, eɖanye nya si wogblɔ loo alo esi woŋlɔ o.—Timoteo I, 1:18-20; Petro II, 2:1-3.

17, 18. Nuwɔna matomɔɖeka kae woɖe gblɔ le Yakobo 3:9-12, eye nukae wòle be míawɔ le go sia me?

¹⁷ Mawu dzixɔxɔse kple didi be míadze eŋu ate ŋu akpɔ mía ta tso xɔsegbegbe me eye mana míazã aɖea agblɔ nya siwo tsi tre ɖe wo nɔewo ŋu o. Yakobo he susu yi ame aɖewo siwo zãe ɖe mɔ vovovo nu dzi hegblɔ be ‘míetsɔa aɖea kafua mía Fofo, Yehowa, eye míetsɔnɛ ƒoa fi dea amegbetɔ siwo wowɔ le Mawu ƒe nɔnɔme nu.’ (Mose I, 1:26) Yehowae nye mía Fofo le gɔmesese sia nu be “[ena] agbe kple gbɔgbɔ kpakple nuwo katã amesiame.” (Dɔwɔwɔwo 17:24, 25) Eya hãe nye Kristotɔ amesiaminawo Fofo le gbɔgbɔmegɔmesese nu. “Mawu ƒe nɔnɔme” nue mí katã míele le susu kple agbenyuinɔnɔ me nɔnɔmewo, kpakple lɔlɔ̃, dzɔdzɔenyenye, kple nunya si na míeto vovo na lãwo la gome. Eyata aleke wòle be míawɔ nui ne míexɔ Yehowa dzi se?

¹⁸ Ne míeƒo fi de amewo la, afia be míele vɔ̃ dim, alo le ɖiŋu dom na wo. Esi menye nyagblɔɖila siwo Mawu ƒe gbɔgbɔ ʋã be woado ɖiŋu na ame aɖee míenye o ta la, nya siawo gbɔgblɔ anye fuléle si ana míaƒe Mawu kafukafu nazu dzodzro. Mesɔ be “yayra kple fiƒode” siaa nado go tso nu ɖeka ma me o. (Luka 6:27, 28; Romatɔwo 12:14, 17-21; Yuda 9) Aleke wòanye nu vɔ̃ɖie nye si be míadzi kafukafuhawo na Mawu le kpekpewo me eye emegbe míava ƒo nu gbegblẽ le haxɔsetɔwo ŋu! Tsi vivi kple tsi veve mate ŋu adzi tso vudo ɖeka me o. Abe alesi ‘gboti mate ŋu atse amititsetsewo, alo weinkawo natse gbotitsetsewo o’ ene la, nenema ke dzetsi mate ŋu adzi tsi vivi o. Ne mí amesiwo wòle na be míagblɔ nya nyuiwo míegblɔa nya tɔamewo atraɖii la, ke nane gblẽ le mía ŋu le gbɔgbɔ me. Ne nɔnɔme ma le mía ŋu la, ke mina míado gbe ɖa abia Yehowa ƒe kpekpeɖeŋu be míadzudzɔ nu ƒoƒo alea.—Psalmo 39:2.

Tsɔ Dziƒonunya Wɔ Nui

19. Ne dziƒonunyae le mɔ fiam mí la, ŋusẽ kae wòate ŋu akpɔ ɖe ame bubuwo dzi?

¹⁹ Mí katã míehiã nunya be míaƒo nu ahawɔ nusiwo dze amesiwo si xɔse le. (Yakobo 3:13-18) Ne vɔvɔ̃ nyui le mía me na Mawu la, enaa dziƒonunya, si nye sidzedze ŋudɔwɔwɔ nyuie ƒe ŋutete mí. (Lododowo 9:10; Hebritɔwo 5:14) Eƒe Nya fiaa mí alesi míaɖe “nunya ƒe dɔmefafa” afia. Eye esi míefa tu ta la, míenaa ŋutifafa nɔa hamea me. (Korintotɔwo I, 8:1, 2) Amesiwo katã ƒoa adegbe be haxɔsetɔwo ƒe nufialagãwoe yewonye la le ‘aʋatso kam ɖe Kristotɔwo ƒe nyateƒe,’ si tsi tre ɖe woƒe ɖokuiŋudzedze la ŋuti. (Galatiatɔwo 5:26) Woƒe “nunya” nye ‘anyigbadzitɔ’—si nye amegbetɔ wɔnuvɔ̃ siwo ɖe aga tso Mawu gbɔ la ƒe nɔnɔme. ‘Dzɔdzɔmetɔ’ wònye elabena ŋutilãmenɔnɔmewo mee wòtso. Enye ‘gbɔgbɔ vɔ̃ tɔ’ gɔ̃ hã, elabena gbɔgbɔ vɔ̃wo ɖe wodana! (Timoteo I, 3:6) Eyata mina míawɔ nu le nunya kple ɖokuibɔbɔ me ale be míagawɔ naneke si ado ‘nu vɔ̃ɖi wɔwɔwo’ abe amegɔmezɔzɔ kple ameŋkumekpɔkpɔ ene ɖe ŋgɔ o.

20. Aleke nàɖɔ dziƒonunyae?

²⁰ “Nunya, si tso dziƒo la, gbã la eŋuti kɔna,” si na míenɔa dzadzɛ le agbenɔnɔ kple gbɔgbɔ me. (Korintotɔwo II, 7:11) “Eƒe dɔme fana,” eʋãa mí be míadi ŋutifafa. (Hebritɔwo 12:14) Dziƒonunya na ‘míefaa tu,’ míeléa nya ɖeka me ɖe asi o eye míaƒe nya me hã mesẽna o. (Filipitɔwo 4:5) Nunya si tso dziƒo ‘lɔ̃na wogbea nya nɛ,’ si nye toɖoɖo Mawu ƒe nufiafia kple nu wɔwɔ aduadu kple Yehowa ƒe habɔbɔa. (Romatɔwo 6:17) Nunya si tso dziƒo wɔa mí nublanuikpɔlawo hã, eye míaƒe dɔme trɔna ɖe ame ŋu. (Yuda 22, 23) Esi “kutsetse nyuiwo yɔe fũ” ta la, eʋãa ame wòtsɔa ɖe le ame bubuwo me eye wòwɔa nusiwo wɔ ɖeka kple nyuiwɔwɔ, dzɔdzɔenyenye, kple nyateƒe. (Efesotɔwo 5:9) Eye esi míenye ŋutifafadilawo ta la, míesea vivi le “dzɔdzɔenyenye ƒe kutsetse” si tsina ɖe edzi le ŋutifafanɔƒewo la me.

21. Le Yakobo 2:1–3:18 ƒe nya nu la, nukawoe wòle be míaƒe Mawu dzixɔse naʋã mí míawɔ?

²¹ Ekema edze ƒã be xɔse ʋãa mí ɖe dɔwɔwɔ ŋu. Ewɔa mí ameŋkumemakpɔlawo, nublanuikpɔlawo, kple dɔ nyui wɔlawo. Xɔse kpena ɖe mía ŋu míekpɔa míaƒe aɖe dzi eye míetsɔa dziƒonunya wɔa nui. Gake menye nu mawo koe míate ŋu asrɔ̃ tso lɛta sia me o. Aɖaŋuɖoɖo bubuwo gale Yakobo si siwo akpe ɖe mía ŋu míawɔ nu le mɔ si dze amesiwo xɔ Yehowa dzi se nu.

Aleke Nàɖo Wo Ŋui?

◻ Nukata ameŋkumekpɔkpɔ nye nu gbegblẽ?

◻ Aleke xɔse kple dɔwɔwɔwo do ƒomee?

◻ Nukata wòle vevie alea gbegbe be míakpɔ aɖea dzi nyuie?

◻ Aleke dziƒonunya le?