Ele Be Mɔkpɔkpɔ Nali Ke Mí Eye Lɔlɔ̃ Naʋã Mí

“Xɔse kple mɔkpɔkpɔ kpakple lɔlɔ̃, nu etɔ̃ siawo nɔa anyi; ke lɔlɔ̃ la ƒo wo katã ta.”—KORINTOTƆWO I, 13:13.

 1. Nuxlɔ̃ame kae apostolo Paulo na mí?

APOSTOLO Paulo xlɔ̃ nu mí be míaƒe xɔse ate ŋu adze go abe tɔdziʋu ene. Eƒo nu tso alesi ‘woalé xɔse kple dzitsinya nyui me ɖe asi, si nye nusi ame aɖewo tsɔ ƒu gbe, eye wodze go le xɔse gome abe ʋu dzego ene’ la ŋu. (Timoteo I, 1:19) Le ƒe alafa gbãtɔ M.Ŋ. me la, atie wotsɔ kpaa tɔdziʋuwoe. Ʋuawo ƒe nyonyo nɔa te ɖe ati si wotsɔ kpae ƒe nyonyome kple tɔdziʋukpakpa ƒe aɖaŋu dzi.

 2. Nukata wòle be míakpa míaƒe xɔse ƒe ʋua nyuie, eye nukae esia bia tso mía si?

² Ele be nusi míate ŋu ayɔ be míaƒe xɔse ƒe tɔdziʋu la nayi edzi anɔ te le ameƒomea ƒe ƒu dzeagboa dzi. (Yesaya 57:20; Nyaɖeɖefia 17:15) Eyata ekpo ɖe mía gbɔ be míakpae nyuie. Esi Yudatɔwo kple Romatɔwo ƒe “atsiaƒua” dze agbo de Kristotɔ gbãtɔwo vevie la, Yuda ŋlɔ bena: “Mi lɔlɔ̃tɔwo la, mitu mia ɖokui ɖe miaƒe xɔse kɔkɔe, si ƒo wo katã ta la dzi, eye mido gbe ɖa le [gbɔgbɔ] kɔkɔe la me, eye midzra mia ɖokui ɖo le Mawu ƒe lɔlɔ̃ la me, anɔ lalam na mía Aƒetɔ Yesu Kristo ƒe nublanuikpɔkpɔ la hena agbe mavɔ.” (Yuda 20, 21) Esi Yuda ƒo nu tso “xɔse, si wode asi na ame kɔkɔewo” taʋiʋli hã ŋu ta la, nyagbɔgblɔ si nye “xɔse kɔkɔe” ate ŋu afia Kristotɔwo ƒe nufiafiawo ƒe ƒuƒoƒo bliboa katã, si me xɔxɔ ƒe nyanyui la hã le. (Yuda 3) Kristoe nye xɔse ma ƒe gɔmeɖoanyi. Ele be xɔse sesẽ nanɔ mía si hafi míate ŋu alé Kristotɔwo ƒe xɔse vavãtɔa me ɖe asi goŋgoŋ.

Tenɔnɔ Ðe “Vɔvɔ̃ na Kɔmamawo” ƒe Kuxia Nu

 3. Aleke ame aɖewo le “vɔvɔ̃ na kɔmamawo” ŋudɔ wɔmee?

³ Le ƒe siawo me la, nya dziŋɔ geɖe dzɔ ku ɖe vivimehawo ŋu si me ame gbogbowo ƒe wo ɖokui wuwu, amewuwu, kple ŋɔdzidonamelawo ƒe amedzidzedzewo le. Eme kɔ be ame geɖe kple dunyahelawo ƒe ŋgɔnɔlawo tsi dzi ɖe ame maɖifɔwo, vevietɔ ɖeviwo, ta kpɔkpɔ tso kɔmama siwo ŋu afɔku le alea la si me. “Xexe sia me mawu” si ɖikeke mele eme o be eyae le megbe na nu vlo dziŋɔ siawo la to esia me he nɔnɔme si ame aɖewo yɔna be vɔvɔ̃ na kɔmamawo la vɛ, eye ele esia zãm ɖe Yehowa ƒe amewo ŋu. (Korintotɔwo II, 4:4; Nyaɖeɖefia 12:12) Ame aɖewo wɔ nɔnɔme sia ŋudɔ tsɔ na amewo tsi tre ɖe míaƒe dɔa ŋu. Le dukɔ aɖewo me la, wowɔ ɖoɖo si dze ƒã be eƒe taɖodzinue nye be woatsɔ akpɔ amewo ta tso “kɔmama siwo ŋu afɔku le” si me, gake woyɔ Yehowa Ðasefowo ŋkɔ de kɔmama siawo me vodadatɔe eye woto esia me le eɖem fia be ayemenuwɔlawoe míenye. Esia na wòva sesẽ be woaɖi ɖase tso aƒeme yi aƒeme le Europa-dukɔ aɖewo me eye ena ame aɖewo siwo míesrɔ̃a Biblia kpli tsã la dzudzɔ nua sɔsrɔ̃. Esia hã ɖe dzi le mía nɔvi aɖewo ƒo.

 4. Nukata mele be tsitretsiɖeŋu naɖe dzi le mía ƒo o?

⁴ Gake le esi teƒe be tsitretsiɖeŋu naɖe dzi le mía ƒo la, ele be wòana míaka ɖe edzi geɖe wu boŋ be míele Kristotɔnyenye vavãtɔ ŋudɔ wɔm. (Mateo 5:11, 12) Wotso Kristotɔ gbãtɔwo nu be wonye kɔmama si dea zi amewo me, eye ‘woƒo nu tsi tre ɖe wo ŋu’ le afisiafi. (Dɔwɔwɔwo 24:5; 28:22) Gake apostolo Petro ŋlɔ tsɔ na kakaɖedzi haxɔsetɔwo be: “Lɔlɔ̃tɔwo, migana fiafiã ƒe tetekpɔ, si va mia dzi hena mia dodokpɔ la, nawɔ yaa ɖe mi, abe nya aɖe ƒomevie va dzɔ ɖe mia dzi ene o; ke boŋ zi geɖe alesi miekpɔ gome le Kristo ƒe fukpekpewo me la, zi geɖe ma ke mikpɔ dzidzɔ bena, le eƒe ŋutikɔkɔe ƒe ɖeɖefia me hã la miakpɔ dzidzɔ, eye miatso aseye.” (Petro I, 4:12, 13) Nenema ke ƒe alafa gbãtɔ me dziɖuha la me tɔ aɖe ŋlɔ bena: “Nɔvinyewo, ne miege ɖe tetekpɔ bubu ƒomeviwo me la, mibui dzidzɔ sɔŋ, esi mienyae bena, miaƒe xɔse ƒe dodokpɔ wɔa dzidodo. Ke dzidodo la nakpɔ eƒe dɔwɔwɔ blibo, bena mianye ame blibowo keŋkeŋ, eye naneke nagahiã mi o.” (Yakobo 1:2-4) Abe alesi ya sesẽwo doa tɔdziʋu ƒe nyonyome kpɔnae ene la, nenemae tsitretsiɖeŋu ƒe ahom ana gbɔdzɔgbɔdzɔ ɖesiaɖe si le míaƒe xɔse ƒe tɔdziʋua ŋu nadzee.

Xaxa Dzia Dzidodo

 5. Aleke míate ŋu aka ɖe edzi be míaƒe xɔse li ke le xaxa me?

⁵ Ne Kristotɔwo to xaxa ƒe ahom me ko hafi woate ŋu aka ɖe woƒe dzidodo dzi ahanya be yewoƒe xɔse li ke. Míaƒe dzidodo ‘ate ŋu akpɔ eƒe dɔwɔwɔ blibo’ le ƒu dzeagbo dzi ne ‘míenye ame blibo siwo naneke mehiã o,’ eye ne xɔse sesẽ le mía si. Paulo ŋlɔ bena: “Le nuwo katã me la míeɖea mía ɖokui fiana abe Mawu ƒe subɔlawo ene: Le dzidodo geɖe me, le xaxawo me, le hiãkamewo me, le momenuvevewo me.”—Korintotɔwo II, 6:4.

 6. Nukata wòle be ‘míaƒo adegbe le xaxawo me,’ eye aleke esia doa ŋusẽ míaƒe mɔkpɔkpɔe?

⁶ Ele be míabu xaxa ƒe ya sesẽ siwo me míato ɣeaɖewoɣi la be enye mɔnukpɔkpɔ be míaɖo kpe edzi be míaƒe xɔse ƒe tɔdziʋua sesẽ heli ke. Paulo ŋlɔ na Kristotɔ siwo le Roma be: “Míeƒoa adegbe le xaxawo me hã, esi míenyae bena, xaxa dzia dzidodo; ke dzidodo dzia kelili, ke kelili dzia mɔkpɔkpɔ; ke mɔkpɔkpɔ menana ŋu kpea ame o.” (Romatɔwo 5:3-5) Tenɔnɔ le dodokpɔwo me na Yehowa kpɔa ŋudzedze ɖe mía ŋu. Esia hã doa ŋusẽ míaƒe mɔkpɔkpɔ.

Nusita Ame Aɖewo ƒe Xɔse Dzea Go

 7. (a) Abe alesi Paulo ƒe nyawo fia ene la, aleke ame aɖewo ƒe xɔse dze goe? (b) Aleke ame aɖewo tra tso nyateƒea gbɔe egbea?

⁷ Esi Paulo xlɔ̃ nu le ‘godzedze’ ŋu la, ame aɖewo siwo tsɔ woƒe dzitsinya nyui “ƒu gbe” eye xɔse meganɔ wo si o ye nɔ eƒe susu me. (Timoteo I, 1:19) Wo dometɔ aɖewoe nye Himenaio kple Aleksandro, amesiwo va gbe xɔse eye wotre mɔ tso xɔse la gbɔ hegblɔ vlodoamenyawo. (Timoteo I, 1:20, NW ƒe etenuŋɔŋlɔ; Timoteo II, 2:17, 18) Egbea xɔsegbela siwo tre mɔ tso nyateƒea gbɔ toa woƒe nyagbɔgblɔ dzi ƒoa “dɔla nuteƒewɔla kple aɖaŋudzela” la, si fia be woɖu asi si doa nuɖuɖu na wo le gbɔgbɔ me tsã. Wo dometɔ aɖewo ɖi “dɔla vɔ̃ɖi” la, eye wogblɔna kaŋ be, “Nye aƒetɔ la tsi anyi.” (Mateo 24:44-49; Timoteo II, 4:14, 15) Wogbena be nuɖoanyi vɔ̃ɖi sia ƒe nuwuwu meɖo o eye woɖea ɖeklemi dɔla ƒe ha si le ŋudzɔ le gbɔgbɔ me la le esi wona hiahiã kpata ƒe susu le Yehowa ƒe amewo si ta. (Yesaya 1:3) Xɔsegbela siawo te ŋu ‘trɔa ame aɖewo ƒe xɔse tsyɔa anyi,’ si na wodzea go le gbɔgbɔ me.—Timoteo II, 2:18.

 8. Nukae na ame aɖewo ƒe xɔse ƒe ʋua dze go alo gbã?

⁸ Kristotɔ ɖeadzɔgbe bubuwo na woƒe xɔse dze go esi wotsɔ woƒe dzitsinya ƒu gbe henyrɔ wo ɖokui ɖe xexe sia me vivisesedidi yakatsyɔ kple eƒe gbɔdɔdɔ ƒe agbegbegblẽnɔnɔ me. (Petro II, 2:20-22) Ame bubuwo hã na woƒe xɔse ƒe tɔdziʋua nyrɔ elabena le woƒe susu nu la, edze abe menye egbee nuɖoanyi yeyea me nu nyuiwo ava o ene. Esi womete ŋu bu ɣeyiɣiwo kpɔ nyagblɔɖi aɖewo me vaɣi o, eye woɖe ‘Yehowa ƒe ŋkekea’ le susu me ta la, wodo le tadedeagu vavãtɔ me. (Petro II, 3:10-13; Petro I, 1:9) Eteƒe medidina o wogava nɔa fifi nuɖoanyia ƒe ƒu dzeagbo si dzi xe litii la dzi. (Yesaya 17:12, 13; 57:20) Ame aɖewo siwo dzudzɔ hadede kple Kristo-hamea gaxɔe se kokoko be eyae nye subɔsubɔha vavãtɔ. Gake edze ƒã be dzigbɔɖi kple dzidodo si hiã mele wo si woatsɔ alala xexe yeye si ŋugbe Yehowa do la o. Agbenɔnɔ le Paradiso me menɔ tsɔtsɔm na wo alesi wodi o.

 9. Nuka Kristotɔ adzɔgbeɖela ʋɛ aɖewo le wɔwɔm, eye nuka ŋue wòle be nya sia nana míabu?

⁹ Le xexeame ƒe akpa aɖewo la, edze abe Kristotɔ adzɔgbeɖela ʋɛ aɖewo ɖiɖi woƒe tɔdziʋua ƒe abalawo vie ene. Tɔdziʋua gale ƒua dzi ya, gake le esi teƒe be woatsɔ xɔse blibo anɔ ŋgɔ yimee la, wole yiyim blewu. Esi mɔkpɔkpɔ na “Paradiso si ava kpuie” ʋã wo dometɔ aɖewo ta la, wodze agbagba vevie be yewoƒe asi nasu edzi—wodo vevie le gbeƒãɖeɖedɔa me eye wodea kpekpewo katã edziedzi, tsɔ kpe ɖe nutome sue kple nutome gã takpekpewo ŋu. Fifia esi wobu be nusi wole mɔ kpɔm na la le etsɔme ʋĩ wu alesi yewosusui ta la, woƒe lãme fa. Esia dzena le woƒe gbeƒãɖeɖedɔ si dzi ɖe kpɔtɔ, kpekpewo mayimayi ɖe ɖoɖo nu, kple alesi wonaa takpekpe suewo alo gãwo me nuƒo aɖewo toa wo ŋu me. Ame bubuwo va le ɣeyiɣi geɖe zãm ɖe modzakaɖeɖe kple ŋutilãmenuwo didi ŋu. Nya siawo na míebua nusi wòle be wòanye ameʋãnu le míaƒe agbe me si asɔ ɖe míaƒe adzɔgbeɖeɖe na Yehowa nu ŋu. Ðe wòle be míatu míaƒe veviedodo le esubɔsubɔ me ɖe “Paradiso si ava kpuie” ƒe mɔkpɔkpɔ dzia?

Wotsɔ Mɔkpɔkpɔ Sɔ Kple Seke

10, 11. Nukae Paulo tsɔ sɔ kple míaƒe mɔkpɔkpɔ, eye nukata wòsɔ nenema?

¹⁰ Paulo ɖee fia be Yehowa do ŋugbe be woayra amewo to Abraham dzi. Azɔ apostoloa kɔ eme be: “Mawu [tsɔ] nutàta heɖo kpe edzi, bena míato nu eve, siwo meɖɔlina o [eƒe nya kple eƒe atamkaka], esiwo me Mawu mate ŋu aka aʋatso le o la me akpɔ dzideƒo sesẽ, mí amesiwo sii tso, bene míalé mɔkpɔkpɔ, si wotsɔ ɖo mía ŋku me la, ɖe asi sesĩe; eye mɔkpɔkpɔ ma le mía si abe luʋɔ ƒe seke, si li dedie, eye wòsesẽ . . . ene.” (Hebritɔwo 6:17-19; Mose I, 22:16-18) Mɔkpɔkpɔ si wotsɔ ɖo Kristotɔ amesiaminawo ŋkume nye makumakugbenɔnɔ le dziƒo. Egbea mɔkpɔkpɔ dodzidzɔname si le Yehowa subɔla akpa gãtɔ sie nye be yewoanɔ agbe mavɔ le paradisonyigba dzi. (Luka 23:43) Xɔse mate ŋu anɔ ame si mɔkpɔkpɔ sia manɔmee o.

¹¹ Seke nye dɔwɔnu sẽŋu aɖe si wotsɔ léa nui, eye ehiã vevie be woatsɔ alé tɔdziʋu ɖe teƒe ɖeka ale be tsi nagakplɔe adzoe o. Ƒudzidela aɖeke malɔ̃ aho ʋu dzoe le ʋudzeƒe seke matsɔmatsɔe o. Esi ʋu gbã ɖe Paulo enuenu ta la, eya ŋutɔ va nya be seke dzie ƒudzimɔzɔlawo ƒe agbe nɔa te ɖo zi geɖe. (Dɔwɔwɔwo 27:29, 39, 40; Korintotɔwo II, 11:25) Le ƒe alafa gbãtɔ me la, mɔ̃ menɔa tɔdziʋu ŋu si ana ʋumefia nakui alesi wòdi o. Yaƒoƒo ŋu koŋ tɔdziʋuwo ɖoa ŋu ɖo, negbe aʋawɔtɔdziʋu siwo wotsɔa akɔfa kuna ko. Ne tɔdziʋu ɖo afɔku me si ana wòava lɔ kpe la, nusi ʋumefia ate ŋu awɔ koe nye be wòada seke ahanɔ ahom la nu vaseɖe esime wòafa, eye anɔ ŋu ɖom ɖe seke la ŋu be ayi edzi alé ɖe ƒua gɔme. Eyata Paulo tsɔ Kristotɔwo ƒe mɔkpɔkpɔ sɔ kple “luʋɔ ƒe seke, si li dedie, eye wòsesẽ.” (Hebritɔwo 6:19) Ne tsitretsiɖeŋu ƒe ahom ɖe kpe na mí alo míedo go dodokpɔ bubuwo la, míaƒe mɔkpɔkpɔ wɔnukua nɔa abe seke ene heléa mí amesiwo nye luʋɔ gbagbewo la ɖe te, ale be míaƒe xɔse ƒe tɔdziʋua nagate ayi ɖikeke ƒe agado ɖivɔvɔ̃ me alo wòava lɔ xɔsegbegbe ƒe kpe si gbãa nu o.—Hebritɔwo 2:1; Yuda 8-13.

12. Aleke míawɔ be míagatrɔ megbe ade Yehowa o?

¹² Paulo xlɔ̃ nu Hebritɔ Kristotɔwo be: “Nɔviwo, mikpɔ nyuie be, dzi vɔ̃ɖi maxɔse naganɔ mia dometɔ aɖeke me o, bene wòagatrɔ atso Mawu gbagbe la gbɔ o.” (Hebritɔwo 3:12) Le Helagbe me la, ‘trɔ tso egbɔ’ gɔme ŋutɔŋutɔe nye be “woanɔ adzɔge,” si fia be woagbe xɔse. Gake míate ŋu aƒo asa na godzedze keŋkeŋ alea. Xɔse kple mɔkpɔkpɔ ana míalé ɖe Yehowa ŋu goŋgoŋ ne míeɖo tetekpɔ ƒe ahom vɔ̃ɖitɔ kekeake gɔ̃ hã me. (Mose V, 4:4; 30:19, 20) Míaƒe xɔse manɔ abe tɔdziʋu si xɔsegbegbe ƒe ya ƒona yina gbɔna ene o. (Efesotɔwo 4:13, 14) Eye esi mɔkpɔkpɔ nye mí Yehowa subɔlawo ƒe seke ta la, míate ŋu adze ŋgɔ agbe me ahomwo.

Lɔlɔ̃ Kple Gbɔgbɔ Kɔkɔe Ʋãa Mí

13, 14. (a) Nukata míaƒe mɔkpɔkpɔ si nye seke la ɖeɖe mesɔ gbɔ o? (b) Nukae wòle be wòaʋã mí le subɔsubɔ kɔkɔe tsɔtsɔ na Yehowa me, eye nukatae?

¹³ Kristotɔ mate ŋu ayi ŋgɔ aɖo nuɖoanyi yeyea me o ne mɔkpɔkpɔ na agbenɔnɔ le paradisonyigba dzi ta koe wòsubɔa Yehowa ɖo. Ne ena eƒe mɔkpɔkpɔ ƒe seke la li kee le eƒe agbenɔnɔ me la, egahiã hã be wòatsɔ lɔlɔ̃ ƒe ŋusẽ si ʋãa ame la akpe ɖe nusia kple eƒe xɔse ŋu. Paulo te gbe ɖe nyateƒenya sia dzi esime wòŋlɔ bena: “Xɔse kple mɔkpɔkpɔ kpakple lɔlɔ̃, nu etɔ̃ siawo nɔa anyi; ke lɔlɔ̃ la ƒo wo katã ta.”—Korintotɔwo I, 13:13.

¹⁴ Ele be nusi aʋã mí le subɔsubɔ kɔkɔe tsɔtsɔna me nanye lɔlɔ̃ si tso dzi blibo me na Yehowa le lɔlɔ̃ manyagblɔ si wòɖe fia mí ta. Apostolo Yohanes ŋlɔ bena: “Amesi ke melɔ̃a ame o la, medze si Mawu o; elabena Mawu enye lɔlɔ̃. Esia me woɖe Mawu ƒe lɔlɔ̃ la ɖe go fia le le mía me bena, Mawu dɔ eƒe Tenuvi ɖo ɖe xexeame, bena míanɔ agbe to eyama me. Minɛ míalɔ̃e, elabena etre mí lɔlɔ̃!” (Yohanes I, 4:8, 9, 19) Esi míedi be míada akpe na Yehowa ta la, menye mía ŋutɔwo ƒe ɖeɖekpɔkpɔe anye míaƒe nu vevitɔ o, ke ele be míadi vevie be míakpɔ eƒe ŋkɔ kɔkɔe la ŋutikɔkɔ kple eƒe fianyenye dzɔdzɔe la taʋiʋli teƒe boŋ.

15. Aleke míaƒe lɔlɔ̃ na Yehowa do ƒome kple eƒe dziɖulanyenye ƒe nya lae?

¹⁵ Yehowa di be míasubɔe le esi míelɔ̃ eyama ta, menye le Paradiso me nɔnɔ ta ko o. Biblia ŋuti numekugbalẽ si nye Insight on the Scripturesa gblɔ be: “Edzɔa dzi na Yehowa be lɔlɔ̃ dzie yeƒe dziɖulanyenye nɔ te ɖo eye be eya koŋue ʋãa eƒe nuwɔwɔwo wonɔa megbe nɛ. Amesiwo lɔ̃a eƒe dziɖulanyenye le eƒe nɔnɔme nyuiwo kple le esi wòle dzɔdzɔe ta, amesiwo eƒe dziɖulanyenye dzɔa dzi na wu bubu ɖesiaɖe la koe wòlɔ̃na. (Ko I, 2:9) Wotiae be yewoasubɔ le eƒe dziɖulanyenye te tsɔ wu be yewoadze agbagba be yewoanɔ yewo ɖokui si—le esi wonya eyama kple eƒe lɔlɔ̃, dzɔdzɔenyenye, kple eƒe nunya si wokpɔ be ede ŋgɔ wu yewo tɔ sã ta. (Ps 84:11, 12)”—Babla 2, axa 275.

16. Aleke lɔlɔ̃ na Yesu nye ameʋãnu le míaƒe agbe mee?

¹⁶ Mí Kristotɔwo míeɖea lɔlɔ̃ fiaa Yesu hã le eƒe lɔlɔ̃ na mí ta. Paulo ɖe eme be: “Kristo ƒe lɔlɔ̃ la le mía kplɔm, eye míedzro eme kpɔ kpɔ esia bena, esi ame ɖeka ku ɖe amewo katã ta, eyata amewo katã ku. Eye wòku ɖe wo katã ta, bena amesiwo le agbe la, naganɔ agbe na wo ɖokui o, ke ne woanɔ agbe hena amesi ku, eye wògatsi tre le wo ta la boŋ.” (Korintotɔwo II, 5:14, 15) Kristoe nye gɔmeɖokpe si tututu dzi wotu míaƒe gbɔgbɔmegbenɔnɔ, míaƒe xɔse, kple míaƒe mɔkpɔkpɔ ɖo. Míaƒe lɔlɔ̃ na Kristo Yesu doa ŋusẽ míaƒe mɔkpɔkpɔ eye ena míaƒe xɔse lia ke, vevietɔ le tetekpɔ ƒe ɣeyiɣi sesẽwo me.—Korintotɔwo I, 3:11; Kolosetɔwo 1:23; 2:6, 7.

17. Ŋusẽ gã kae Yehowa naa mí, eye aleke woɖe eƒe vevienyenye fiae le Dɔwɔwɔwo 1:8 kple Efesotɔwo 3:16?

¹⁷ Togbɔ be lɔlɔ̃ na Mawu kple Via ye nye ameʋãnu vevitɔ le mí Kristotɔwo ƒe agbenɔnɔ me hã la, Yehowa gana nu bubu aɖe mí si ʋãa mí míewɔa nu, eye wòdoa ŋusẽ mí be míayi ŋgɔ le eƒe subɔsubɔ me. Eyae nye eƒe dɔwɔŋusẽ, alo gbɔgbɔ kɔkɔe. Nusi Hebri kple Hela gbe me nya siwo gɔme woɖena be “gbɔgbɔ” fia koŋue nye alesi ya ƒona yia afisiafii. Tɔdziʋu siwo zãa abala abe esi Paulo ɖo ene ɖoa ŋu ɖe yaƒoƒo ƒe ŋusẽ makpɔmakpɔa ŋu be wòakplɔ wo ayi afisi woyina. Nenema ke míehiã lɔlɔ̃ kple Mawu ƒe dɔwɔŋusẽ makpɔmakpɔa ƒe dɔwɔwɔ hafi míaƒe xɔse ƒe ʋua nana míayi ŋgɔ le Yehowa subɔsubɔ me.—Dɔwɔwɔwo 1:8; Efesotɔwo 3:16.

Ŋgɔyiyi Aɖo Afisi Yim Míele!

18. Nukae ana míado dzi le nusianu si ate míaƒe xɔse kpɔ le etsɔme la me?

¹⁸ Ðewohĩ woado míaƒe xɔse kple lɔlɔ̃ akpɔ vevie hafi míaɖo nuɖoanyi yeyea me. Gake Yehowa na seke “si li dedie, eye wòsesẽ” la mí—eyae nye míaƒe mɔkpɔkpɔ wɔnuku la. (Hebritɔwo 6:19; Romatɔwo 15:4, 13) Ne tsitretsiɖeŋu alo dodokpɔ bubuwo ɖe kpe na mí la, míate ŋu ado dzi ne míaƒe mɔkpɔkpɔ lé mí ɖe te sesĩe. Ne míeto ahom aɖe me do la, mina míaɖoe kplikpaa be míali ke míaƒe mɔkpɔkpɔ ahado ŋusẽ míaƒe xɔse hafi ahom bubu nagadze egɔme.

19. Aleke míawɔ ana míaƒe xɔse ƒe tɔdziʋua nanɔ yiyim aɖo dedienɔƒe si nye Mawu ƒe xexe yeyea mee?

¹⁹ Hafi Paulo naƒo nu tso “luʋɔ ƒe seke” ŋu la, egblɔ be: “Míele didim vevie bena, mia dome amesiame naɖe veviedodo ma ke afia [be “wòaɖe abla,” NW ƒe etenuŋɔŋlɔ] le mɔkpɔkpɔ ƒe kakaɖedzi blibo vaseɖe nuwuwu la ŋuti, bene miagazu kuviatɔwo o; ke boŋ mizu amesiwo toa xɔse kple dzigbɔgbɔ blewu me nyia ŋugbedodowo ƒe dome la, srɔ̃lawo.” (Hebritɔwo 6:11, 12) Mina lɔlɔ̃ na Yehowa kple Via naʋã mí eye gbɔgbɔ kɔkɔe nado ŋusẽ mí ale be míana míaƒe xɔse ƒe ʋua nanɔ ŋgɔ yim vaseɖe esime míaɖo dedienɔƒe si nye Mawu ƒe xexe yeye si ŋugbe wòdo la me.

[Etenuŋɔŋlɔ]

Numetoto

◻ Nuxlɔ̃ame kae Paulo na mí le míaƒe xɔse ŋu?

◻ Aleke ame aɖewo dze goe le gbɔgbɔ me, eye aleke ame bubuwo ƒe lãme fae?

◻ Mawumenɔnɔme kae wòhiã be wòakpe ɖe míaƒe xɔse ŋu?

◻ Nukae ana míate ŋu aɖo dedienɔƒe si nye Mawu ƒe xexe yeyea me?

[Nɔnɔmetata si le axa 16]

Ele be míakpa míaƒe xɔse ƒe ʋua nyuie ale be wòate ŋu anɔ te ɖe agbe me ahomwo nu

[Nɔnɔmetata si le axa 17]

Míaƒe xɔse ate ŋu adze go

[Nɔnɔmetata si le axa 18]

Mɔkpɔkpɔ nye agbe ƒe seke na mí Kristotɔwo