Nɔ Mawu Ƒe Habɔbɔa Me Be Nàkpɔtɔ Anɔ Dedie
“Yehowa ƒe ŋkɔ enye [mɔ] sesẽ; afima ame dzɔdzɔe la sina yina, eye wònɔa dedie.”—LODODOWO 18:10.
1. Le gbe si Yesu do ɖa nu la, nɔnɔme sesẽ ka mee Kristotɔwo le?
ESI wòsusɔ vie Yesu naku la, edo gbe ɖa na Fofoa si le dziƒo ɖe eyomedzelawo ta. Etsi dzi ɖe wo ŋu lɔlɔ̃tɔe gblɔ be: “Nye la metsɔ wò nya la na wo, eye xexeame lé fu wo, elabena wometso xexeame o, abe alesi nye hã nyemetso xexeame o ene. Nyemele biabiam be, naɖe wo tso xexeame o, ke boŋ bena, nadzra wo ɖo tso vɔ̃ɖitɔ la si me.” (Yohanes 17:14, 15) Yesu nya be afɔku anɔ xexeame na Kristotɔwo. Xexeame aɖe alesi wòlé fu wo afia to alakpadada ɖe wo si kple wo yometiti me. (Mateo 5:11, 12; 10:16, 17) Ate ŋu agblẽ woƒe nɔnɔme hã.—Timoteo II, 4:10; Yohanes I, 2:15, 16.
2. Afikae Kristotɔwo ate ŋu akpɔ gbɔgbɔmededienɔƒe le?
2 Amesiwo te ɖa tso Mawu gbɔ eye wole Satana ƒe ŋusẽ tee nye xexeme si alé fu Kristotɔwo. (Yohanes I, 5:19) Xexe sia lolo sasasã wu Kristo-hamea, eye ŋusẽ le Satana ŋutɔ ŋu wu amegbetɔ ɖesiaɖe. Eyata afɔku gã aɖee xexeame ƒe fuléle nye. Afikae anye gbɔgbɔmededienɔƒe na Yesu yomedzelawo? Ŋuɖoɖoa dze le nya aɖe si wogblɔ le December 1, 1922, Eŋlisigbe me Gbetakpɔxɔ me be: “Míele ŋkeke vɔ̃ la me azɔ. Satana ƒe habɔbɔ kple Mawu ƒe habɔbɔ le aʋa wɔm. Aʋa sesẽ aɖee wònye.” Mawu ƒe habɔbɔa nye gbɔgbɔmededienɔƒe le aʋawɔwɔ sia me. Nya “habɔbɔ” medze le Biblia me o, eye nya yeyee “Mawu ƒe habɔbɔ” nye le ƒe 1920 ƒeawo me. Ke nukae habɔbɔ sia nye? Eye aleke wòakpɔ mía tae?
Yehowa ƒe Habɔbɔ
3, 4. (a) Le nyagɔmeɖegbalẽ aɖe kple Gbetakpɔxɔ ƒe nyawo nu la, nukae nye habɔbɔ? (b) Gɔmesese ka nue woate ŋu agblɔ le be Yehowa Ðasefowo ƒe dukɔwo dome ƒuƒoƒoa nye habɔbɔ?
3 Concise Oxford Dictionary gblɔ be habɔbɔ nye “ƒuƒoƒo si le ɖoɖo nu.” Esi míenyae alea la, ke míase egɔme be esi apostoloawo wɔ ɖoɖo ƒe alafa gbãtɔ me Kristotɔwo nɔ hamewo me le woƒe nutowo me eye wonɔ dziɖuha si nɔ Yerusalem ƒe dzikpɔkpɔ te ta la, esɔ be míagblɔ be ‘nɔviwo ƒe ha’ la nye habɔbɔ. (Petro I, 2:17) Habɔbɔ ma tɔgbe ye le Yehowa Ðasefowo si egbea. ‘Nunana siwo nye amewo’ abe “kplɔlawo kple nufialawo” ene do ŋusẽ ƒe alafa gbãtɔ me ha la be wowɔ ɖeka. Amesiawo dometɔ aɖewo tsana le hameawo dzi, eye bubuwo nye hamemegãwo le woƒe nutome hamewo me. (Efesotɔwo 4:8, 11, 12; Dɔwɔwɔwo 20:28) ‘Nunana’ mawo ƒomeviwoe doa ŋusẽ Yehowa Ðasefowo wowɔ ɖeka egbea.
4 November 1, 1922 ƒe Eŋlisigbe me Gbetakpɔxɔ gblɔ le nya “habɔbɔ” ŋu be: “Habɔbɔ nye amewo ƒe ƒuƒoƒo si woɖo be woaminya tameɖoɖo aɖe.” Gbetakpɔxɔ la yi edzi ɖe nu me be Yehowa Ðasefowo yɔyɔ be wonye habɔbɔ mefia be wonye “kɔmamã abe alesi wozãa nya la ene o, ke boŋ efia ko be Biblia Nusrɔ̃viawo [Yehowa Ðasefowo] le agbagba dzem be yewoawɔ Mawu ƒe tameɖoɖowo dzi ahawɔe abe alesi Aƒetɔ la wɔa nusianu ene, ɖe ɖoɖo nu.” (Korintotɔwo I, 14:33) Apostolo Paulo ɖee fia be Kristotɔ siwo nɔ anyi le ye ŋɔli la wɔ nu ɖe ɖoɖo nu nenema ke. Etsɔ Kristotɔ siwo wosi ami na ƒe ha la sɔ kple ameti si ŋu ŋutinu geɖe le, eye ɖesiaɖe wɔa eƒe wɔƒe bene ametia nanɔ agbe. (Korintotɔwo I, 12:12-26) Habɔbɔ ƒe kpɔɖeŋu nyui aɖee nye ma! Nukatae Kristotɔwo nɔ habɔbɔ me? Bene woawɔ “Mawu ƒe tameɖoɖowo” dzi, awɔ Yehowa ƒe lɔlɔ̃nu.
5. Nukae nye Mawu ƒe habɔbɔ si wokpɔna la?
5 Biblia gblɔe ɖi be woana egbegbe Kristotɔwo nawɔ ɖeka, woaƒo wo nu ƒu ɖe ‘anyigba’ ɖeka dzi woanye ‘dukɔ’ ɖeka, afisi ‘woaklẽ le abe akaɖiwo ene le xexeame.’ (Yesaya 66:8; Filipitɔwo 2:15) ‘Dukɔ’ sia si le ha me la me tɔwo sɔ gbɔ wu miliɔn atɔ̃ kple afã fifia. (Yesaya 60:8-10, 22) Gake Mawu ƒe habɔbɔa mese ɖe afima o. Mawudɔlawo hã le eme.
6. Ne míekeke gɔmesesea ɖe enu la, amekawoe nye Mawu ƒe habɔbɔa me tɔwo?
6 Kpɔɖeŋu geɖe li siwo me mawudɔlawo kpe ɖe Mawu subɔla amegbetɔwo ŋu wowɔ dɔ. (Mose I, 28:12; Daniel 10:12-14; 12:1; Hebritɔwo 1:13, 14; Nyaɖeɖefia 14:14-16) Ekema esɔ be May 15, 1925 ƒe Eŋlisigbe me Gbetakpɔxɔ gblɔ be: “Mawudɔla kɔkɔewo katã nye Mawu ƒe habɔbɔa ƒe akpa aɖe.” Egagblɔ be: “Aƒetɔ Yesu Kristo, amesi ƒe ŋusẽ kple tanyenye ƒo ɖesiaɖe ta lae le Mawu ƒe habɔbɔa nu.” (Mateo 28:18) Eyata ne míekeke gɔmesesea ɖe enu la, Mawu ƒe habɔbɔa me tɔwo nye amesiwo katã le dziƒo kple anyigba dzi siwo kpea asi ɖe Mawu ƒe lɔlɔ̃nu wɔwɔ ŋu. (Kpɔ aɖaka.) Mɔnukpɔkpɔ gã ka gbegbee nye si wònye be míanɔ eme! Eye dzidzɔ ka gbegbee nye si wònye be míakpɔ mɔ na ɣeyiɣi si me nugbagbe siwo katã le dziƒo kple anyigba dzi ava nɔ ha me akafu Yehowa Mawu le ɖekawɔwɔ me! (Nyaɖeɖefia 5:13, 14) Gake takpɔkpɔ kae Mawu ƒe habɔbɔa nana egbea?
Dedienɔnɔ le Mawu ƒe Habɔbɔa Me—Alekee?
7. Mɔ ka nue Mawu ƒe habɔbɔa kpɔa mía ta le?
7 Mawu ƒe habɔbɔa ate ŋu akpe ɖe mía ŋu be míaƒo asa na Satana kple eƒe ayemɔwo. (Efesotɔwo 6:11) Taɖodzinu ɖekae le Satana si wòtsɔ ƒoa nya ɖe Yehowa subɔlawo nu, wòtsɔ tia wo yome hetea wo kpɔna: eyae nye be yeahe wo ɖa tso ‘mɔ si dzi wòle be woato la’ dzi. (Yesaya 48:17; tsɔe sɔ kple Mateo 4:1-11.) Míate ŋu aƒo asa na amedzidzedze mawo keŋkeŋ le nuɖoanyi sia me o. Gake ƒomedodo kplikplikpli si le mía kple Mawu kpakple eƒe habɔbɔa dome doa ŋusẽ mí hekpɔa mía ta ale be míenɔa ‘mɔ la’ dzi. Ewɔnɛ be míaƒe mɔkpɔkpɔ metsia akpo dzi o.
8. Aleke Yehowa ƒe habɔbɔ si womekpɔna o la doa alɔ esubɔla siwo le anyigba dzii?
8 Aleke Mawu ƒe habɔbɔa naa ametakpɔkpɔ siae? Gbã la, Yehowa ƒe gbɔgbɔmedɔla siwo medoa kpo nu le kpekpeɖeŋu nana me o la li na mí. Esime nu te ɖe Yesu dzi vevie la, mawudɔla aɖe va subɔe. (Luka 22:43) Esime woɖo be woawu Petro la, mawudɔla aɖe va ɖee nukutɔe. (Dɔwɔwɔwo 12:6-11) Togbɔ be womegawɔa nukunuwo nenema egbea o hã la, wodo ŋugbe na Yehowa ƒe amewo be mawudɔlawo ado alɔ wo le woƒe gbeƒãɖeɖedɔa me. (Nyaɖeɖefia 14:6, 7) Zi geɖe ne woɖo nɔnɔme sesẽwo me la, ŋusẽ si gbɔ dzɔdzɔmetɔ ŋu ɖoa wo ŋu. (Korintotɔwo II, 4:7) Gakpe ɖe eŋu la, wonya be “Yehowa ƒe dɔla ƒua asaɖa anyi ɖe amesiwo vɔ̃nɛ la ŋu, eye wòhea wo doa goe.”—Psalmo 34:8.
9, 10. Susu ka nue míagblɔe le be “Yehowa ƒe ŋkɔ enye mɔ sesẽ,” eye aleke gɔmeɖose sia wɔa dɔ le Mawu ƒe habɔbɔ bliboa gomee?
9 Yehowa ƒe habɔbɔ si wokpɔna hã nye dedienɔƒe. Alekee? Míexlẽ le Lododowo 18:10 be: “Yehowa ƒe ŋkɔ enye mɔ sesẽ; afima ame dzɔdzɔe la sina yina, eye wònɔa dedie.” Mefia be Mawu ƒe ŋkɔ yɔyɔ enuenu kpɔa ame ta o. Ke boŋ Mawu ƒe ŋkɔ si mía si atso fia be míaɖo ŋu ɖe Yehowa ŋutɔ ŋu. (Psalmo 20:2; 122:4) Efia megbenɔnɔ na eƒe dziɖulanyenye, eƒe sewo kple gɔmeɖosewo dzi wɔwɔ, kple eƒe ŋugbedodowo dzixɔxɔse. (Psalmo 8:2-10; Yesaya 50:10; Hebritɔwo 11:6) Efia hã be woasubɔ Yehowa ɖeɖeko. Amesiwo subɔa Yehowa alea koe ate ŋu awɔ ɖeka kple hakpala la agblɔ be: “Míaƒe dzi le dzidzɔ kpɔm le [Yehowa ŋu], eye míele ŋu ɖom ɖe eƒe ŋkɔ kɔkɔe la ŋu.”—Psalmo 33:21; 124:8.
10 Egbea amesiwo katã le Mawu ƒe habɔbɔ si wokpɔna me wɔ ɖeka kple Mixa le gbɔgblɔm be: “Míawo ya míazɔ le Yehowa, mía Mawu la ƒe ŋkɔ me ɖaa tegbee.” (Mixa 4:5) Egbegbe habɔbɔa le hadede me kple “Mawu ƒe Israel” si woyɔ le Biblia me be ‘dukɔ si tɔ eƒe ŋkɔ.’ (Galatiatɔwo 6:16; Dɔwɔwɔwo 15:14; Yesaya 43:6, 7; Petro I, 2:17) Eyata Yehowa ƒe habɔbɔa me nɔnɔ fia be woanɔ amesiwo dina be Mawu ƒe ŋkɔa nakpɔ yewo ta eye wòkpɔa wo ta la dome.
11. Mɔ gobi kawo nue Yehowa ƒe habɔbɔa kpɔa emetɔwo ta le?
11 Gakpe ɖe eŋu la, Mawu ƒe habɔbɔ si wokpɔna la nye xɔsetɔwo ƒe ƒuƒoƒo, haxɔsetɔwo ƒe ha si me tɔwo tua wo nɔewo ɖo hedea dzi ƒo na wo nɔewo. (Lododowo 13:20; Romatɔwo 1:12) Enye teƒe si Kristotɔ alẽkplɔlawo léa be na alẽawo, dea dzi ƒo na esiwo dze dɔ kple esiwo lé blanui, eye wodzea agbagba be yewoagafɔ esiwo dze anyi la ɖe te. (Yesaya 32:1, 2; Petro I, 5:2-4) “Dɔla nuteƒewɔla kple aɖaŋudzela” la toa habɔbɔa dzi ‘naa nuɖuɖu le ɣeyiɣi nyui dzi.’ (Mateo 24:45) “Dɔla” la, si me tɔwo nye Kristotɔ amesiaminawo, naa gbɔgbɔmenu nyuitɔwo kekeake—sidzedze vavãtɔ si wotu ɖe Biblia dzi si ate ŋu akplɔ ame ayi agbe mavɔ me. (Yohanes 17:3) “Dɔla” la ƒe mɔfiafia kpe ɖe Kristotɔwo ŋu be wonɔa agbe ɖe agbenyuinɔnɔ ƒe dzidzenu kɔkɔwo nu eye ewɔe be ‘wodze aɖaŋu abe dawo ene, eye wodza abe ahɔ̃nɛwo ene’ le ame vlo siwo ƒo xlã wo dome. (Mateo 10:16) Eye wokpena ɖe wo ŋu be ‘wogbaa go le Aƒetɔ la ƒe dɔwɔwɔ’ si hã nye ametakpɔnu sesẽ aɖe la me.—Korintotɔwo I, 15:58.
Amekawoe Nye Mawu ƒe Habɔbɔa me Tɔwo?
12. Amekawoe wode dzesii be wonye Mawu ƒe dziƒohabɔbɔa me tɔwo?
12 Esi wònye amesiwo nye Mawu ƒe habɔbɔa me tɔwo tae wokpɔna alea ta la, ke amekawoe amesiawo nye? Le dziƒohabɔbɔa gome la, ɖikeke aɖeke mele nya sia ƒe ŋuɖoɖo ŋu o. Satana kple eƒe dɔlawo megale dziƒo o. Gake mawudɔla wɔnuteƒewo ya gale afima le “takpekpe” me. Apostolo Yohanes kpɔe be le ŋkeke mamlɛawo me la, “alẽvi la,” kerubiwo (“nu gbagbe eneawo”), kple “mawudɔla geɖe” anɔ afisi te ɖe Mawu ƒe fiazikpuia ŋu tututu. Amegã xoxo 24 la hã anɔ wo dome—amesiawo tsi tre ɖi na Kristotɔ amesiamina siwo ɖo woƒe dziƒodomenyinu kɔkɔe la me xoxo. (Hebritɔwo 12:22, 23; Nyaɖeɖefia 5:6, 11; 12:7-12) Edze ƒã be wo katã wole Mawu ƒe habɔbɔa me. Gake nuwo medze gaglã le amegbetɔwo ya gome nenema o.
13. Aleke Yesu de dzesi amesiwo nye Mawu ƒe habɔbɔa me tɔwo kple amesiwo mele eme o lae?
13 Yesu gblɔ le ame aɖewo siwo agblɔ be yewonye eyomedzelawo ŋu be: “Ame geɖewo lagblɔ nam le ŋkeke ma dzi bena: Aƒetɔ! Aƒetɔ! Alo menye wò ŋkɔ dzi míegblɔ nya ɖe anyi le o ɖe, eye wò ŋkɔ dzi míenyã gbɔgbɔ vɔ̃wo do goe le o ɖe, eye wò ŋkɔ dzi míewɔ ŋusẽdɔ geɖewo le o ɖe? Ekema nye hã maʋu me na wo bena: Nyemenya mi kpɔ o, mi nu madzɔmadzɔ wɔlawo; mite ɖa le gbɔnye!” (Mateo 7:22, 23) Nya ka ke ame aɖe aƒu asi akɔ agblɔ alo afika ke wòdea ta agu le o, ne numadzɔmadzɔwɔla wònye ko la, menye Mawu ƒe habɔbɔa mee wòle kura o. Azɔ hã Yesu gblɔ alesi míawɔ ade dzesi amesi nye Mawu ƒe habɔbɔa me tɔ. Egblɔ be: “Menye amesiame, si le gbɔgblɔm nam bena: Aƒetɔ! Aƒetɔ! ayi ɖe dziƒofiaɖuƒe la me o, negbe amesi le Fofonye, si le dziƒowo la, ƒe lɔlɔ̃nu wɔm la koe.”—Mateo 7:21.
14. Mawu ƒe lɔlɔ̃nu kawoe wòle kokoko na Mawu ƒe habɔbɔa me tɔwo be woawɔ?
14 Eyata hafi ame aɖe nanye Mawu ƒe habɔbɔ—si ƒe akpa vevitɔe nye ‘dziƒofiaɖuƒea’—me tɔ la, ele be amea nanɔ Mawu ƒe lɔlɔ̃nu wɔm. Nukae nye eƒe lɔlɔ̃nu? Paulo de dzesi wo dometɔ vevi aɖe esime wògblɔ be: “[Mawu] le didim be, woaxɔ amewo katã, bene woava nyateƒe ƒe sidzedze la me.” (Timoteo I, 2:4) Ne ame aɖe di le nyateƒe me be yeanya Biblia me sidzedze vavãtɔ, yeatsɔe awɔ dɔ le yeƒe agbenɔnɔ me, kple be yeagblɔe na “amewo katã” la, ke ele Mawu ƒe lɔlɔ̃nu wɔm. (Mateo 28:19, 20; Romatɔwo 10:13-15) Enye Mawu ƒe lɔlɔ̃nu hã be woanyi Yehowa ƒe alẽwo ahalé be na wo. (Yohanes 21:15-17) Kristotɔwo ƒe kpekpewo wɔa esia ƒe akpa vevi aɖe. Ne ame aɖe vo ate ŋu ade kpekpeawo gake wòŋea aɖaba ƒua wo dede dzi la, ke mekpɔ ŋudzedze ɖe nɔƒe si le esi le Mawu ƒe habɔbɔa me ŋu o.—Hebritɔwo 10:23-25.
Xɔlɔ̃dzedze Xexeame
15. Nuxlɔ̃me kae Yakobo na hame siwo nɔ anyi le eŋɔli?
15 Esi Yesu ku anɔ ƒe 30 megbe la, dadaavi Yakobo de dzesi nanewo siwo ate ŋu ana ame ƒe Mawu ƒe habɔbɔa me nɔnɔ naɖo afɔku me. Eŋlɔ be: “Mi ahasiwɔla, mienya bena, xexeame ƒe xɔlɔ̃dzedze enye ketɔnyenye na Mawu oa? Eyaŋuti amesi dina be, yeanye xexeame ƒe xɔlɔ̃ la, etsɔ eɖokui wɔ Mawu ƒe ketɔ.” (Yakobo 4:4) Amesi nye Mawu ƒe ketɔ menye eƒe habɔbɔa me tɔ kura o. Ke nukae nye xɔlɔ̃dzedze xexeame? Woɖe eme be ele mɔ vovovo nu, eye ɖewoe nye vividodo ɖe ha baɖawo ŋu kpakple wo dede. Gakpe ɖe eŋu la, Yakobo ƒo nu tso nu gobi aɖe ŋu—eyae nye nukpɔsusu gbegblẽ siwo naa wowɔa nu tovo.
16. Nya ka gblɔm Yakobo nɔ esi wòxlɔ̃ nu be xɔlɔ̃dzedze xexeame nye ketɔnyenye na Mawu?
16 Míexlẽ le Yakobo 4:1-3 be: “Afika aʋawɔwɔ kple dzrewɔwɔ, siwo le mia dome la tsoa? Ðe menye afima wotso, tso miaƒe nudzodzro, siwo wɔa aʋa le miaƒe ŋutinuwo me la me o mahã? Miedzroa nu, eye miekpɔnɛ o; miewua ame, eye mieʋãa ŋu, eye miaƒe asi metea ŋu sua nu dzi o; miewɔa dzre, eye miewɔa aʋa; miate ŋu akpɔ naneke o; elabena miebiana o. Miebiana, eye miexɔnɛ o; elabena miebiana le mɔ vɔ̃ dzi, bene miagblẽ nu la le miaƒe dzidzɔkpɔkpɔwo me.” Nya siawoe Yakobo ŋlɔ vɔ hafi xlɔ̃ nu le xɔlɔ̃dzedze xexeame ŋu.
17. Mɔ ka nue “aʋawɔwɔ” kple “dzrewɔwɔ” nɔ ƒe alafa gbãtɔ me Kristo-hamea me le?
17 Ƒe alafa geɖe le Yakobo ƒe ku megbe la, alakpa Kristotɔwo wɔ aʋa hewu wo nɔewo ŋutɔŋutɔ. Gake ƒe alafa gbãtɔ me “Mawu ƒe Israel” me tɔ siwo ava nye ‘nunɔlawo kple fiawo’ le dziƒo ye Yakobo nɔ agbalẽa ŋlɔm na. (Nyaɖeɖefia 20:6) Woawo ya mewua wo nɔewo alo wɔa aʋa ŋutɔŋutɔ kple wo nɔewo o. Ke nukata Yakobo ƒo nu tso nu mawo ŋu be wole Kristotɔwo dome? Apostolo Yohanes yɔ amesi léa fu nɔvia be enye amewula. Eye Paulo yɔ nyaʋiʋli kple fuléle siwo nɔ amewo dome le hameawo me be wonye “dzrehehewo” kple “avuwɔwɔwo.” (Tito 3:9; Timoteo II, 2:14; Yohanes I, 3:15-17) Edze ƒã be nenema ke alesi wodo kpo hati Kristotɔwo lɔlɔ̃ nɔ susu me na Yakobo. Alesi xexemetɔwo wɔa nu ɖe wo nɔewo ŋui la, nenemae Kristotɔwo nɔ nu wɔm le wo nɔewo domee.
18. Nukae ate ŋu awɔe be amemalɔ̃malɔ̃ nuwɔnawo kple seselelãmewo nanɔ Kristotɔwo dome?
18 Nukatae nu mawo tɔgbe dzɔ le Kristo-hameawo me? Le nɔnɔme gbegblẽwo abe ŋukeklẽ kple ‘agbeɖuɖu yomenɔnɔ’ ene tae. Dada, ŋuʋaʋã, kple ŋkɔxɔxɔ hã ate ŋu agblẽ Kristotɔwo ƒe hadede lɔlɔ̃tɔe si le hamea me la me. (Yakobo 3:6, 14) Nɔnɔme mawo wɔa ame xexeame xɔlɔ̃, eye wòna wozua Mawu ƒe ketɔ. Mele be amesiwo si nɔnɔme siawo le nasusu be yewoakpɔtɔ anɔ Mawu ƒe habɔbɔa me o.
19. (a) Amekae nye ame gbãtɔ si Kristotɔ aɖe agɔdzedze na ne wòkpɔ be susu gbegblẽwo le yeƒe dzime ɖom? (b) Aleke Kristotɔ awɔ aɖu susu gbegblẽwo dzii?
19 Amekae míaɖe agɔdzedze na ne míekpɔ be susu gbegblẽwo le míaƒe dzime ɖom? Satana yea? Míagblɔ be ẽ le go aɖewo me. Eyae nye xexe sia si me nɔnɔme siawo bɔ ɖo la ƒe “yameŋusẽ ƒe fia.” (Efesotɔwo 2:1, 2; Tito 2:12) Gake zi geɖe la, mía ŋutɔwo ƒe ŋutilã madebliboa gbɔe susu vɔ̃awo tsona. Esi Yakobo xlɔ̃ nu le xɔlɔ̃dzedze xexeame ŋu vɔ la, eŋlɔ be: “Ðe miebuna bena ŋɔŋlɔ la ƒoa nu dzodzro bena: ‘Ŋuʋaʋã dzroa gbɔgbɔ si xɔ aƒe ɖe mía me ɖaa’ mahã?” (Yakobo 4:5, NW) Wotsɔ nuvɔ̃wɔwɔ ƒe dzodzro dzi mí katã. (Mose I, 8:21; Romatɔwo 7:18-20) Gake míate ŋu aɖu dzodzro ma dzi ne míelɔ̃ ɖe míaƒe gbɔdzɔgbɔdzɔwo dzi eye míeɖo ŋu ɖe Yehowa ŋu be wòakpe ɖe mía ŋu míaɖu wo dzi. Yakobo gblɔ be: “Ke [Mawu na] amenuveve geɖe wu [ŋuʋaʋã ƒe dzodzro si míedzɔ kplii].” (Yakobo 4:6) Le Mawu ƒe gbɔgbɔ kɔkɔea kple nɔvi Kristotɔ nuteƒewɔlawo ƒe kpekpeɖeŋu kpakple le Yesu ƒe tafevɔsa la ƒe viɖe ta la, Kristotɔ nuteƒewɔlawo ƒe ŋutilã ƒe gbɔdzɔgbɔdzɔwo meɖua wo dzi o. (Romatɔwo 7:24, 25) Wole dedie le Mawu ƒe habɔbɔa me, eye Mawu ƒe xɔlɔ̃woe wonye ke menye xexeame ƒe xɔlɔ̃wo o.
20. Yayra gbogbo kawoe Mawu ƒe habɔbɔa me tɔwo xɔna?
20 Biblia do ŋugbe be: “Yehowa atsɔ ŋusẽ na eƒe dukɔ; Yehowa atsɔ ŋutifafa ayra eƒe dukɔ!” (Psalmo 29:11) Ne míenye Yehowa ƒe egbeŋkekea me ‘dukɔ’ si nye eƒe habɔbɔ si wokpɔna me tɔwo nyateƒe la, ŋusẽ si wònana la aɖo míawo hã ŋu eye míase vivi na ŋutifafa si wòtsɔ yra eƒe amewoe. Nyateƒe wònye be Satana ƒe xexeame lolo wu Yehowa ƒe habɔbɔ si wokpɔna, eye Satana sẽ wu mí sasasã. Gake Yehowae nye Ŋusẽkatãtɔ. Naneke mate ŋu aɖu eƒe dɔwɔŋusẽ dzi o. Eƒe dɔla sẽŋuawo hã wɔ ɖeka kpli mí míele Mawu subɔm. Eyata togbɔ be woléa fu mí hã la, míate ŋu anɔ te. Míawo hã míate ŋu aɖu xexeame dzi abe alesi Yesu ɖu edzii ene.—Yohanes 16:33; Yohanes I, 4:4.
Àte Ŋu Aɖe Wo Mea?
◻ Nukae nye Mawu ƒe habɔbɔ si wokpɔna?
◻ Mɔ kawo nue Mawu ƒe habɔbɔa kpɔa ame ta le?
◻ Amekawoe le Mawu ƒe habɔbɔa me?
◻ Aleke míawɔ aƒo asa na xɔlɔ̃dzedze xexeame?
[Aɖaka si le axa 9]
Nukae Nye Mawu ƒe Habɔbɔa?
Wozãa nyagbɔgblɔ “Mawu ƒe habɔbɔ” le mɔ etɔ̃ nu le Yehowa Ðasefowo ƒe agbalẽwo me.
1 Yehowa ƒe dziƒohabɔbɔ si womekpɔna o si me gbɔgbɔmenuwɔwɔ nuteƒewɔlawo le. Woyɔnɛ le Biblia me be “dziƒo Yerusalem.”—Galatiatɔwo 4:26.
2 Yehowa ƒe amegbetɔhabɔbɔ si wokpɔna. Egbea emetɔwo nye amesiamina susɔeawo eye ameha gã la va kpe ɖe wo ŋu.
3 Yehowa ƒe xexeame katã ƒe habɔbɔ. Egbea emetɔwo nye Yehowa ƒe dziƒohabɔbɔa kpakple amesiamina siwo wòxɔ wozu viawo le anyigba dzi, amesiwo si gbɔgbɔ me mɔkpɔkpɔ le. Le ɣeyiɣi aɖe megbe la, amegbetɔ siwo wona wode blibo le anyigba dzi ava nɔ eme.
[Nɔnɔmetata si le axa 10]
Wonaa gbɔgbɔmenuɖuɖu nyuitɔ kekeake to Yehowa ƒe habɔbɔa dzi