Xɔse Na Míegbɔa Dzi Ði Hedoa Gbe Ða
“Migbɔ dzi blewu, mido ŋusẽ miaƒe dziwo; elabena Aƒetɔ ƒe vavaɣi ɖo vɔ.”—YAKOBO 5:8.
1. Nukata wòle be míade ŋugble le Yakobo 5:7, 8 ŋu?
YESU KRISTO ƒe ‘anyinɔnɔ’ si wokpɔ mɔ na ɣeyiɣi didi aɖe la va eme azɔ. (Mateo 24:3-14) Ele be amesiwo katã gblɔna be yewoxɔ Mawu kple Kristo dzi se la nabu nusrɔ̃la Yakobo ƒe nya siawo ŋu fifia wu ɣeyiɣi bubu ɖesiaɖe be: “Migbɔ dzi blewu, nɔvinyewo, halase Aƒetɔ la ƒe vavagbe. Kpɔ ɖa, agbledela lalaa anyigba dzi nuʋaʋã xɔasiwo, eye wògbɔa dzi blewu, halase esime ada kple kele dzana nɛ. Miawo hã migbɔ dzi blewu, mido ŋusẽ miaƒe dziwo; elabena Aƒetɔ ƒe vavaɣi ɖo vɔ.”—Yakobo 5:7, 8.
2. Kuxi siwo amesiwo Yakobo ŋlɔ lɛta na do goe la dometɔ aɖewo ɖe?
2 Enɔ na amesiwo Yakobo ŋlɔ eƒe lɛta si tso gbɔgbɔ me na la be woagbɔ dzi ɖi eye woakpɔ kuxi vovovowo gbɔ. Ame geɖe nɔ nusiwo to vovo na nusi wokpɔ mɔ be amesiwo be yewoxɔ Mawu dzi se nawɔ la wɔm. Le kpɔɖeŋu me, ele be woawɔ nane tso dzodzro aɖewo siwo ɖo woƒe dzime ŋu. Ele be woana ŋutifafa nagava nɔ Kristotɔ gbãtɔ mawo dome. Wohiã aɖaŋuɖoɖo le alesi woagbɔ dzi ɖi eye woanɔ gbedodoɖa dzi hã ŋu. Esi míele nya si Yakobo gblɔ na wo me dzrom la, mina míakpɔ alesi míate ŋu awɔ eƒe nyawo ŋudɔe le míaƒe agbenɔnɔ mee ɖa.
Dzodzro Vɔ̃wo Gblẽa Nu
3. Nukawoe na dzrehehe ɖo hamea me, eye nukae míate ŋu asrɔ̃ tso esia me?
3 Ŋutifafa menɔ amesiwo gblɔ be Kristotɔwoe yewonye la dometɔ aɖewo dome o, eye dzodzro vɔ̃wo gbɔe nɔnɔme sia tso. (Yakobo 4:1-3) Dzrehehewo he tɔtɔ vɛ, eye ame aɖewo nɔ ʋɔnu drɔ̃m wo nɔviwo amemalɔ̃malɔ̃tɔe. Nusiawo nɔ dzɔdzɔm le esi ŋutilãmevivisese ƒe dzodzrowo nɔ avu wɔm le woƒe ŋutinuwo me ta. Ðewohĩ ahiã be mía ŋutɔwo míado gbe ɖa abia kpekpeɖeŋu be míatsri ŋutilãmenudzodzro siwo nye ɖoƒekɔkɔnɔnɔ, ŋusẽ, kple nunɔamesiwo ale be míagawɔ naneke atsɔ agblẽ hamea ƒe ŋutifafa me o. (Romatɔwo 7:21-25; Petro I, 2:11) Ŋukeklẽ ɖo ƒe alafa gbãtɔ me Kristotɔ aɖewo me ale gbegbe be eva zu fuléle ƒe gbɔgbɔ vɔ̃ɖi. Esi Mawu meɖi kɔ na woƒe dzodzro vɔ̃wo o ta la, woyi edzi nɔ dagbadagbam be yewoaɖo yewoƒe taɖodzinuwo gbɔ. Ne dzodzro vɔ̃ mawo tɔgbe le mía me la, míabia gake míaƒe asi makae o, elabena míaƒe Mawu kɔkɔe la meɖoa gbedodoɖa mawo tɔgbe ŋu o.—Konyifahawo 3:44; Yohanes III, 9, 10.
4. Nukata Yakobo yɔ ame aɖewo be “ahasiwɔlawo,” eye dɔ kae wòle be eƒe nya nawɔ ɖe mía dzi?
4 Xexemenɔnɔmewo abe ŋubiabiã kple dada ene nɔ Kristotɔ gbãtɔ aɖewo dome. (Yakobo 4:4-6) Yakobo yɔ ame aɖewo be “ahasiwɔlawo” elabena wodze xɔlɔ̃ xexeame eye woto ema me wɔ ahasi le gbɔgbɔ me. (Xezekiel 16:15-19, 25-45) Míedi be míaƒe nɔnɔme, nuƒoƒo, kple nuwɔnawo naɖi xexemetɔwo tɔ kura o, elabena ema awɔ mí Mawu ƒe futɔwoe. Eƒe Nya fia mí be ‘ŋuʋaʋã ƒe dzodzro’ nye nɔnɔme, alo “gbɔgbɔ” manyomanyo si le amegbetɔ nuvɔ̃mewo me. (Mose I, 8:21; Mose IV, 16:1-3; Psalmo 106:16, 17; Nyagblɔla 4:4) Eyata ne míekpɔe be ehiã be míawɔ aʋa atsi tre ɖe ŋuʋaʋã, dada alo nɔnɔme gbegblẽ bubu aɖe ŋu la, mina míadi Mawu ƒe kpekpeɖeŋu to gbɔgbɔ kɔkɔea dzi. Ŋusẽ ma si míekpɔna to Mawu ƒe amenuveve me la tri akɔ wu ‘ŋuʋaʋã ƒe dzodzro.’ Eye esi Yehowa tsia tre ɖe dadalawo ŋu ta la, ave mía nu ne míewɔ aʋa kple vɔ̃wɔwɔ ƒe dzodzrowo.
5. Nudidi kawo gbɔe wòle be míaɖo be míakpɔ Mawu ƒe amenuveve?
5 Aleke míawɔ Mawu nave mía nu? (Yakobo 4:7-10) Be míakpɔ amenuveve tso Yehowa gbɔ la, ele be míaɖo toe, míaxɔ eƒe mɔnuɖoɖowo, eye míabɔbɔ mía ɖokui ɖe nusianu si nye eƒe lɔlɔ̃nu te. (Romatɔwo 8:28) Ele be ‘míatsi tre,’ alo ‘atso ɖe’ Abosam ŋu hã. Ne míenɔ te sesĩe henye Yehowa ƒe xexeame katã ƒe fianyenye dzidelawo la, ‘asi le mía gbɔ.’ Yesu, amesi ɖoa asi xexeame ƒe ŋusẽ vɔ̃ɖiwo dzi ale be naneke magblẽ nu le mía ŋu ɖaa o la li akpe ɖe mía ŋu. Eye migaŋlɔ nya sia be gbeɖe o be: Míetena ɖe Mawu ŋu to gbedodoɖa, toɖoɖo, kple xɔse me, eye eya hã tena ɖe mía ŋu.—Kronika II, 15:2.
6. Nukata Yakobo yɔ Kristotɔ aɖewo be “nuvɔ̃wɔlawo”?
6 Nukata Yakobo zã nya “nuvɔ̃wɔlawo” na ame aɖewo siwo gblɔ be yewoxɔ Mawu dzi se? Elabena wowɔa ‘aʋa’ eye woléa fu wo nɔewo kaɖikaɖi—nɔnɔme siwo medze na Kristotɔwo o. (Tito 3:3) Ehiã be woaklɔ woƒe “asiwo,” siwo yɔ fũ kple nu baɖawo. Ele be woawɔ woƒe ‘dzi’ si me ameʋaʋã tsona hã kɔkɔe. (Mateo 15:18, 19) ‘Dzimevesusula’ mawo tsi vedomesi le xɔlɔ̃dzedze Mawu kple xɔlɔ̃dzedze xexeame dome. Mina woƒe kpɔɖeŋu gbegblẽa nanye nuxlɔ̃ame na mí be míanɔ ŋudzɔ ɣesiaɣi ale be nusiawo nagagblẽ míaƒe xɔse o.—Romatɔwo 7:18-20.
7. Nukata Yakobo gblɔ na ame aɖewo be ‘woafa konyi ahafa avi’?
7 Yakobo gblɔ na eƒe nuxlẽlawo be ‘woalé blanui, woafa konyi eye woafa avi.’ Ne woɖe mawumeblanuiléle fia la, aɖo kpe edzi be wotrɔ dzime. (Korintotɔwo II, 7:10, 11) Egbea ame aɖewo siwo gblɔna be xɔse le yewo si la le xɔlɔ̃ dzem xexeame. Ne mía dometɔ aɖe le afɔ sia ɖem la, ɖe mele be míafa konyi ɖe alesi míegbɔdzɔ le gbɔgbɔ me ta ahawɔ ɖɔɖɔɖo kaba oa? Ne míewɔ ɖɔɖɔɖo si hiã eye Mawu tsɔe ke mí la, míakpɔ dzidzɔ le mía ɖokui me le esi dzitsinya dzadzɛ asu mía si eye míatsɔ dzidzɔ anɔ mɔ kpɔm na agbe mavɔ nɔnɔ ta.—Psalmo 51:12-19; Yohanes I, 2:15-17.
Migadrɔ̃ Ʋɔnu Mia Nɔewo O
8, 9. Nukata mele be míaƒo nu tsi tre ɖe mía nɔewo ŋu alo adrɔ̃ ʋɔnu o?
8 Nuvɔ̃ wònye be míaƒo nu tsi tre ɖe haxɔsetɔ ŋu. (Yakobo 4:11, 12) Ke hã ame aɖewo ɖea ɖeklemi wo hati Kristotɔwo, ɖewohĩ le esi woa ŋutɔwo wobua wo ɖokui ame dzɔdzɔewoe alo esi wodi be yewoada ame bubuwo ɖe anyi atsɔ ado yewo ɖokui ɖe dzi ta. (Psalmo 50:20; Lododowo 3:29) Helagbe me nya si gɔme woɖe be ‘ƒo nu tsi tre ɖe ame ŋu’ gɔmee nye fuléle eye wòfia ami ɖeɖe ɖe nya alo aʋatsonutsotso. Esia sɔ kple fɔbuʋɔnu dɔdrɔ̃ nɔvi. Aleke esia nye ‘vlododo Mawu ƒe sea kple ʋɔnudɔdrɔ̃e’? Agbalẽfialawo kple Farisitɔwo ‘tsɔ aɖaŋudzedze ɖe Mawu ƒe sedede ɖa’ eye wotsɔ woa ŋutɔwo ƒe dzidzenuwo drɔ̃ ʋɔnu amewoe. (Marko 7:1-13) Nenema ke ne míebu fɔ nɔvi si Yehowa mabu fɔe o la, ɖe manye ‘ʋɔnudɔdrɔ̃ Mawu ƒe sea’ ahanɔ fiafiam vɔ̃ɖitɔe be mede tututu oa? Eye ne míeɖea ɖeklemi mía nɔvi la, ke menye lɔlɔ̃ ƒe sea dzi wɔmee míele o.—Romatɔwo 13:8-10.
9 Mina míaɖo ŋku nya sia dzi be: “Ame ɖeka koe nye sedela kple ʋɔnudrɔ̃la”—Yehowae. Eƒe ‘sea de blibo,’ eye kpɔtsotso aɖeke mele eŋu o. (Psalmo 19:8; Yesaya 33:22) Mawu koe kpɔ mɔ aɖo ɖeɖekpɔkpɔ ƒe dzidzenuwo kple sewo. (Luka 12:5) Eyata Yakobo bia be: “Ameka nènye hele ʋɔnu drɔ̃m hawòvi mahã?” Menye míaƒe dɔ wònye be míadrɔ̃ ʋɔnu ame bubuwo ahabu fɔ wo o. (Mateo 7:1-5; Romatɔwo 14:4, 10) Ele be ŋugbledede le Mawu ƒe fiagãnyenye kple ameŋkumemakpɔmakpɔ kple mía ŋutɔwo ƒe nuvɔ̃menyenye ŋu nakpe ɖe mía ŋu míatsri mía ɖokui bubu ame dzɔdzɔewoe ahanɔ ʋɔnu drɔ̃m ame bubuwo.
Mitsri Kakaɖeameɖokuidzi ƒe Adegbeƒoƒo
10. Nukata wòle be míabu Yehowa ŋu le míaƒe gbesiagbegbenɔnɔ me?
10 Ele be míabu Yehowa kple eƒe se ŋu ɣesiaɣi. (Yakobo 4:13-17) Esi amesiwo kana ɖe wo ɖokui dzi mebua Mawu ɖe naneke me o ta wogblɔna be: ‘Egbe alo etsɔ míayi du aɖe me, míanɔ afima ƒe ɖeka, atsa asi, eye míakpɔ viɖe.’ Ne ‘míeƒo kesinɔnuwo nu ƒu na mía ɖokui gake míenye kesinɔtɔwo le Mawu gbɔ o’ la, míaƒe agbe nu ate ŋu atso etsɔ eye ɖewohĩ mɔnukpɔkpɔ magasu mía si be míasubɔ Yehowa o. (Luka 12:16-21) Yakobo gblɔ be míele abe afu le ŋdime “si dzena ɣeyiɣi kpui aɖe, eye emegbe la megadzena o” ene. (Kronika I, 29:15) Ne míexɔ Yehowa dzi se ko hafi míate ŋu akpɔ mɔ na dzidzɔ si nɔa anyi ɖaa kple agbe mavɔ nɔnɔ.
11. Nukae wòfia be míagblɔ be, “Ne Yehowa lɔ̃”?
11 Le esi teƒe be míaƒo adegbe aŋe aɖaba aƒu Mawu dzi la, ele be míagblɔ boŋ be: “Ne [Yehowa, NW] lɔ̃ la, míanɔ agbe, eye míawɔ esi kple esi.” Gbɔgblɔ be, “Ne Yehowa lɔ̃” fia be míele agbagba dzem be míawɔ nu wòawɔ ɖeka kple eƒe lɔlɔ̃nu. Ðewohĩ ahiã be míawɔ dɔ atsɔ akpɔ míaƒe ƒomea dzi, míazɔ mɔ le Fiaɖuƒedɔa wɔwɔ me, kple bubuwo. Gake migana míaƒo adegbe o. “Kakaɖenuŋu sia katã la vɔ̃ wònye” elabena mena woɖoa ŋu ɖe Mawu ŋu o.—Psalmo 37:5; Lododowo 21:4; Yeremya 9:23, 24.
12. Nukae Yakobo 4:17 me nyawo fia?
12 Edze ƒã be Yakobo gblɔ nya sia tsɔ ƒo nya siwo wògblɔ le kakaɖeameɖokuidzi kple adegbeƒoƒo ŋu la tae be: “Amesi ke nya nu nyui wɔwɔ, eye mewɔnɛ o la, enye nuvɔ̃ nɛ.” Ele be Kristotɔ ɖesiaɖe nakpɔe ɖokuibɔbɔtɔe be Mawu dzie yeƒe agbe nɔ te ɖo. Ne mewɔe nenema o la, “enye nuvɔ̃ nɛ.” Le nyateƒe me la, gɔmeɖose sia ku ɖe nusianu si Mawu dzixɔxɔse bia tso mía si la mawɔmawɔ ŋu.—Luka 12:47, 48.
Nuxlɔ̃ame le Kesinɔtɔwo Ŋu
13. Nukae Yakobo gblɔ le amesiwo zãa woƒe kesinɔnuwo madzemadzee ŋu?
13 Esi Kristotɔ gbãtɔawo dometɔ aɖewo va zu ŋutilãmenudilawo alo wonɔ bubu dem kesinɔtɔwo ŋu ta la, Yakobo gblɔ nya sẽŋu aɖewo le kesinɔtɔ aɖewo ŋu. (Yakobo 5:1-6) Xexemetɔ siwo zãa woƒe kesinɔnuwo ɖe mɔ gbegblẽ nu ‘afa avi, eye woado wuwui le fukpekpe siwo ava wo dzi’ ne Mawu tu fe na wo ɖe woƒe dɔwɔnawo nu ta. Le ŋkeke mawo me la, awu, agblemenukuwo, kple wein koŋue nye kesinɔnu siwo nɔ ame geɖe si. (Yoel 2:19; Mateo 11:8) Nusiawo dometɔ aɖewo ate ŋu anyunyɔ alo ‘agbagblaʋuiwo naɖu wo,’ gake menye alesi kesinɔnuwo te ŋu gblẽna dzie Yakobo le gbe tem ɖo o, ke woƒe numaɖinunyenye boŋ dzie. Togbɔ be sika kple klosalo menyunyɔna o hã la, ne míeli kɔ wo ɖi la, viɖe manɔ wo ŋu o, eye woanɔ abe nusiwo nyunyɔ ene. “Nyunyɔ” fia be womezã ŋutilãmekesinɔnuwo nyuie o. Eyata ele be mí katã míaɖo ŋku edzi be ‘nusiwo le abe dzo ene’ nue amesiwo ɖoa ŋu ɖe woƒe ŋutilãmenunɔamesiwo ŋu la ‘ƒo ƒu ɖi le nuwuwu ŋkekeawo me’ esime Mawu ƒe dziku ava wo dzi. Esi wònye ‘nuwuɣia’ mee míele ta la, gɔmesese tɔxɛ le nya siawo ŋu na mí.—Daniel 12:4; Romatɔwo 2:5.
14. Aleke kesinɔtɔwo wɔa nui zi geɖe, eye nukae wòle be míawɔ le nɔnɔme ma ŋu?
14 Zi geɖe la, kesinɔtɔwo tafaa woƒe nuŋelawo, amesiwo ƒe fetu si wogbe wo nana ‘doa ɣli’ biaa teƒeɖoɖo. (Tsɔe sɔ kple Mose I, 4:9, 10.) Xexemekesinɔtɔwo ‘ɖu agbe.’ Esi wonɔa ŋutilãmevivisese yome fũ ta la, wonyi woƒe dzi masenuawo wode ami eye woanɔ esia wɔwɔ dzi le woƒe “wuwugbe.” ‘Wobua fɔ ame dzɔdzɔe hewunɛ.’ Yakobo bia be: “Ðe metsia tre ɖe mia ŋu oa?” (NW) Gake woagate ŋu agblɔe be, “wò ame dzɔdzɔe la; mele tsitre tsim ɖe ŋuwò o [ɖe?]” Aleke ke wòɖale o, mele be míanɔ kesinɔtɔwo dzi dem o. Ele be míatsɔ gbɔgbɔmenuwo aɖo nɔƒe gbãtɔ le agbe me.—Mateo 6:25-33.
Xɔse Kpena Ðe Mía Ŋu Míegbɔa Dzi Ði
15, 16. Nukata wòle vevie alea gbegbe be míagbɔ dzi ɖi?
15 Esi Yakobo ƒo nu tso xexemekesinɔtɔ siwo tea ame ɖe anyi ŋu vɔ la, ede dzi ƒo na Kristotɔ siwo wote ɖe anyi be woagbɔ dzi ɖi. (Yakobo 5:7, 8) Ne xɔsetɔwo to woƒe nɔnɔme sesẽwo me dzigbɔɖitɔe la, woaɖo woƒe nuteƒewɔwɔ teƒe na wo le Kristo ƒe anyinɔɣi, esime woadrɔ̃ ʋɔnu amesiwo te wo ɖe anyi. (Mateo 24:37-41) Ehiã be Kristotɔ gbãtɔ mawo nanɔ abe agbledela si tsɔa dzigbɔɖi lalaa kele me tsidzadza gbãtɔ, esime wòate ŋu ado nu, kple adametsi si dzana emegbe henaa nukuwo tsina. (Yoel 2:23) Ele be míawo hã míagbɔ dzi ɖi eye míado ŋusẽ míaƒe dzi, vevietɔ esime míele “Aƒetɔ [Yesu Kristo] ƒe vavaɣi” me fifia ta!
16 Nukata wòle be míagbɔ dzi ɖi? (Yakobo 5:9-12) Dzigbɔɖi kpena ɖe mía ŋu be ne haxɔsetɔwo do dziku na mí la, míeɖua tse alo ɖea hũ o. Ne míetsɔ susu vɔ̃ ‘ɖu tse ɖe mía nɔewo ŋu’ la, Ʋɔnudrɔ̃la Yesu Kristo abu fɔ mí. (Yohanes 5:22) Fifia si eƒe ‘anyinɔɣia’ dze egɔme eye ‘wòtsi tre ɖe ʋɔtrua nu’ la, mina míagbɔ dzi ɖi na mía nɔviwo, amesiwo doa go xɔse ƒe dodokpɔ geɖe, ne míatsɔ ana ŋutifafa naxɔ aƒe ɖi. Edoa ŋusẽ mía ŋutɔwo ƒe xɔse ne míeɖo ŋku edzi be Mawu ɖo eteƒe na Hiob le esi wòdo dzi le eƒe tetekpɔwo me dzigbɔɖitɔe ta. (Hiob 42:10-17) Ne míeɖe xɔse kple dzigbɔɖi fia la, míakpɔe be “Aƒetɔ la yɔ fũ kple dɔmetɔtrɔ kple nublanuikpɔkpɔ.”—Mixa 7:18, 19.
17. Nukata Yakobo gblɔ be, “Migatà nu o”?
17 Ne míegbɔ dzi ɖi o la, míazã aɖe la ɖe mɔ gbegblẽ nu ne nu te ɖe mía dzi. Le kpɔɖeŋu me, ɖewohĩ míatsi klokloklo aka atam. Yakobo gblɔ tsɔ xlɔ̃ nu mí le atam dzodzro kaka ŋu be: “Migatà nu o.” Atamkaka ɖe nyawo dzi ɣesiaɣi hã dzena alakpanuwɔwɔe. Eyata ele be míagblɔ nyateƒea ko, eye míana míaƒe ẽ nanye ẽ, eye míaƒe o nanye o. (Mateo 5:33-37) Le nyateƒe me la, Yakobo mele gbɔgblɔm be nu gbegblẽ wònye be míaka atam le ʋɔnu be míato nyateƒe o.
Xɔse Kple Míaƒe Gbedodoɖawo
18. Nɔnɔme kawo mee wòle be ‘míado gbe ɖa’ eye ‘míadzi kafukafuhawo’ le?
18 Ele be gbedodoɖa nanye míaƒe agbenɔnɔ ƒe akpa vevi aɖe bene míate ŋu aɖu míaƒe nuƒoƒo dzi, míagbɔ dzi ɖi, ahalé xɔse sesẽ me ɖe asi na Mawu. (Yakobo 5:13-20) Vevietɔ ne míele tetekpɔ me tom la, ele be ‘míado gbe ɖa.’ Ne dzi le mía dzɔm la, mina ‘míadzi kafukafuhawo,’ abe alesi Yesu kple eƒe apostolowo wɔ esime wòɖo eƒe ku ƒe Ŋkuɖodzia anyi ene. (Marko 14:26, NW ƒe etenuŋɔŋlɔ) Ɣeaɖewoɣi la, akpedada na Mawu ayɔ mía me ale gbegbe be míadzi kafukafuhawo le dzime gɔ̃ hã. (Korintotɔwo I, 14:15; Efesotɔwo 5:19) Eye dzidzɔ ka gbegbee nye si wònye be míadzi ha akafu Yehowa le Kristotɔwo ƒe kpekpewo me!
19. Nukae wòle be míawɔ ne míedze dɔ le gbɔgbɔ me, eye nukata wòle be míawɔ afɔɖeɖe sia?
19 Ðewohĩ madzro mí be míadzi ha o ne míedze dɔ le gbɔgbɔ me, ɖewohĩ le nuvɔ̃ aɖe si míewɔ alo numaɖumaɖu le Yehowa ƒe kplɔ̃ ŋu edziedzi ta. Ne míele nɔnɔme ma me la, ke mina míatsɔ ɖokuibɔbɔ ayɔ hamemegãwo ale be ‘woado gbe ɖa ɖe mía ta.’ (Lododowo 15:29) ‘Woasi ami hã na mí le Yehowa ƒe ŋkɔ me.’ Woƒe akɔfanya siwo le abe ami si faa nu na ame si woɖo abi dzi ene kple Ŋɔŋlɔawo me aɖaŋuɖoɖo ana nuteɖeamedzi, ɖikeke, kple vɔvɔ̃ si le mía me dzi naɖe akpɔtɔ. ‘Xɔse ƒe gbedodoɖa ado ŋusẽ mí’ ne míetsɔ mía ŋutɔwo ƒe xɔse wɔ eŋu dɔ. Ne hamemegãwo kpɔe be nuvɔ̃ gã aɖe si míewɔ gbɔe gbɔgbɔmedɔlélea tso la, woagblɔ nuvɔ̃ si míewɔ la na mí dɔmenyotɔe eye woadze agbagba be yewoakpe ɖe mía ŋu. (Psalmo 141:5) Eye ne míetrɔ dzime la, míate ŋu axɔe se be Mawu ase woƒe gbedodoɖawo eye wòatsɔe ake mí.
20. Nukata wòle be míaʋu míaƒe nuvɔ̃wo me ahado gbe ɖa ɖe mía nɔewo ta?
20 Ele be ‘míaƒe nuvɔ̃wo me ʋuʋu na mía nɔewo’ naxe mɔ na mí be míagava wɔ nuvɔ̃ ake o. Ele be wòana míakpɔ nublanui na mía nɔewo, si nye nɔnɔme si aʋã mí ‘míado gbe ɖa ɖe mía nɔewo ta.’ Míate ŋu axɔe se be esia aɖe vi elabena ‘ame dzɔdzɔe’—amesi si xɔse le eye fɔɖiɖi mele eŋu le Mawu ŋkume o—ƒe gbedodoɖa wɔa nu geɖe le Yehowa gbɔ. (Petro I, 3:12) Gbɔdzɔgbɔdzɔwo nɔ Eliya ŋu abe míawo ke ene, gake woɖo eƒe gbedodoɖawo ŋu. Edo gbe ɖa, eye tsi medza o ƒe etɔ̃ kple afã sɔŋ. Esi wògado gbe ɖa ake la, tsi gadza.—Fiawo I, 17:1; 18:1, 42-45; Luka 4:25.
21. Nukae ɖewohĩ míate ŋu awɔ ne hati Kristotɔ aɖe “tre mɔ tso nyateƒe la gbɔ”?
21 Ke ne wona hamea me tɔ aɖe “tre mɔ tso nyateƒe la gbɔ,” eye wògblẽ nufiafia kple agbenɔnɔ nyuitɔ ɖi ya ɖe? Ðewohĩ míate ŋu ato Biblia ƒe aɖaŋuɖoɖo, gbedodoɖa, kple kpekpeɖeŋu bubu dzi aɖee le vo si wòda me. Ne míete ŋu wɔ esia la, ana wòava nɔ Kristo ƒe tafea te eye aɖee tso gbɔgbɔmeku kple tsɔtsrɔ̃ ƒe fɔbuame me. Ne míekpe ɖe amesi da vo ŋu la, ke míetsyɔ nu eƒe nuvɔ̃wo ƒe agbɔsɔsɔ dzi. Ne nuvɔ̃wɔla si woka mo na ɖe asi le eƒe nuvɔ̃wɔwɔ ŋu, wòtrɔ dzime, eye wòbia tsɔtsɔke la, míakpɔ dzidzɔ be míewɔ nu tsɔ tsyɔ eƒe nuvɔ̃wo dzi.—Psalmo 32:1, 2; Yuda 22, 23.
Nusi Aɖe Vi na Mí Katã
22, 23. Dɔ kae wòle be Yakobo ƒe nyawo nawɔ ɖe mía dzi?
22 Edze ƒã be nya si le Yakobo ƒe lɛtaa me nye nusi aɖe vi na mí katã. Efia mí alesi míadze ŋgɔ tetekpɔwoe, eɖo aɖaŋu na mí le ameŋkumekpɔkpɔ ŋu, eye wòxlɔ̃ nu mí be míawɔ dɔ nyuiwo. Yakobo de dzi ƒo na mí be míakpɔ míaƒe aɖe dzi nyuie, míatsri xexeame ƒe ŋusẽkpɔɖeamedziwo, eye míana ŋutifafa naxɔ aƒe ɖi. Ele be eƒe nyawo nana míanye dzigbɔɖitɔwo kple amesiwo doa gbe ɖa hã.
23 Enye nyateƒe be Kristotɔ gbãtɔ siwo nye amesiaminawoe Yakobo ŋlɔ eƒe lɛtaa na koŋ ya. Ke hã ele be mí katã míana nuxlɔ̃ame siwo le eme nakpe ɖe mía ŋu míalé míaƒe xɔse me ɖe asi. Yakobo ƒe nyawo ate ŋu ado ŋusẽ míaƒe xɔse eye wòaʋã mí míawɔ dɔ geɖe le Mawu subɔsubɔ me. Eye lɛta sia si tso Mawu ƒe gbɔgbɔ me la tua xɔse sẽŋu si wɔa mí Yehowa ƒe Ðasefo siwo gbɔa dzi ɖi hedoa gbe ɖa egbea la ɖo, le ‘Aƒetɔ’ Yesu Kristo ‘ƒe anyinɔɣia me.’
Aleke Nàɖo Wo Ŋui?
◻ Nukata wòhiã be Kristotɔ gbãtɔ aɖewo natrɔ woƒe nɔnɔme kple agbenɔnɔ?
◻ Nuxlɔ̃ame kae Yakobo na kesinɔtɔwo?
◻ Nukata wòle be míagbɔ dzi ɖi?
◻ Nukata wòle be míado gbe ɖa ɣesiaɣi?
[Nɔnɔmetata Tsoƒe si le axa 19]
Pictorial Archive (Near Eastern History) Est.
[Nɔnɔmetata si le axa 23]
Ehiã be Kristotɔ gbãtɔ aɖewo nagbɔ dzi ɖi na haxɔsetɔwo geɖe wu
[Nɔnɔmetata si le axa 24]
Ele be Kristotɔwo nagbɔ dzi ɖi, woalɔ̃ ame, ahanɔ gbedodoɖa dzi