Srɔ̃ Dzigbɔɖi Tso Yehowa Kple Yesu Gbɔ

 1. Nya kae nuteƒewɔla aɖewo biana?

NƆVINYƆNU wɔnuteƒe aɖe si do dzi to kuxi geɖewo me ƒe gbogbo aɖe la bia eɖokui gbe ɖeka ɖokuibɔbɔtɔe be, “Ðe manɔ agbe akpɔ nuwuwua teƒea?” Ame geɖe siwo subɔ Yehowa ɣeyiɣi didi aɖe la hã biaa nya ma tɔgbi ke wo ɖokuiwo. Ele mía dzrom vevie be ɣesiɣi Mawu awɔ nuwo katã yeyee ahaɖe kuxi siwo me tom míele egbea ɖa la nava kaba. (Nyaɖ. 21:5) Togbɔ be susu geɖewo li siwo tae míaka ɖe edzi be Satana ƒe nuɖoanyia ƒe nuwuwu tu aƒe ŋutɔ hã la, ate ŋu asesẽ ŋutɔ be míagbɔ dzi ɖi alala ŋkeke ma.

 2. Nyabiase siwo ku ɖe Mawu ƒe dzigbɔɖi ŋu kawo mee míadzro?

² Gake Biblia ɖee fia be ele be dzigbɔɖi nanɔ mía si. Abe Mawu subɔla siwo do ŋgɔ na mí ene la, míaƒe asi asu ŋugbe siwo Mawu do la dzi ne xɔse sesẽ le mía si eye míelala ɣeyiɣi si ŋugbedodo mawo ava eme la dzigbɔɖitɔe. (Mixlẽ Hebritɔwo 6:11, 12.) Yehowa ŋutɔ le dzi gbɔm ɖi. Ate ŋu ahe vɔ̃ɖinyenye ava nuwuwui ɣesiaɣi si wòdi, gake ele ɣeyiɣi nyuitɔ lalam. (Rom. 9:20-24) Nu ka tae wògbɔ dzi ɖi alea gbegbe ɖo? Aleke Yesu srɔ̃ Mawu ƒe dzigbɔɖi heɖo kpɔɖeŋu ɖi na mí? Ne míesrɔ̃ Mawu ƒe dzigbɔɖi la, aleke wòaɖe vi na mí? Biabia siawo ƒe ŋuɖoɖowo ate ŋu akpe ɖe mía ŋu míana dzigbɔɖi kple xɔse sesẽ nasu mía si, ne ewɔ na mí be Yehowa mele wɔwɔm kabakaba o gɔ̃ hã.

3, 4. (a) Nu ka tae Yehowa le dzi gbɔm ɖi le tame si wòɖo ɖe anyigbaa ŋu la dzi wɔwɔ me? (b) Esi aglãdzedze do mo ɖa le Eden bɔa me la, aleke Yehowa wɔ nui?

³ Susu nyui aɖe tae Yehowa le dzi gbɔm ɖi ɖo. Nyateƒee wònye be eya koe ɖo kpo ɖe xexe blibo la katã dzi le ɣeyiɣi ɖe sia ɖe me; ke hã aglãdzedze si do mo ɖa le Eden bɔa me la fɔ nyabiase vevi aɖewo, siwo ƒe ŋuɖoɖowo aɖe vi na nuwɔwɔ siwo le dziƒo kple anyigba dzi la, ɖe te? Yehowa le dzi gbɔm ɖi, elabena enyae be ehiã ɣeyiɣi be woakpɔ ŋuɖoɖo deblibo na nyabiase mawo. Esi wònya ame siwo le dziƒo kple anyigba dzi la ƒe nɔnɔmewo nyuie ta la, kakaɖedzi li be míaƒe viɖe tae wòle dzi gbɔm ɖi ɖo.—Heb. 4:13.

⁴ Yehowa ƒe tameɖoɖoe nye be Adam kple Xawa ƒe dzidzimeviwo nayɔ anyigba la dzi. Esi Satana ble Xawa eye eyome Adam dze aglã la, Mawu metrɔ eƒe gɔmedzetameɖoɖoa o. Mawu metɔtɔ o, mewɔ nyametsotso dzimagbɔɖitɔe alo wɔ nu wògbɔ eme hegblẽ amegbetɔƒomea ɖi o. Ke boŋ ewɔ ɖoɖo aɖe si dzi wòato ana tame si wòɖo ɖe amegbetɔwo kple anyigba la ŋu la nava eme. (Yes. 55:11) Yehowa ɖe ɖokuidziɖuɖu kple dzigbɔɖi gã aɖe fia, eye ele lalam hena ƒe akpe geɖewo gɔ̃ hã be yeƒe tameɖoɖoa ƒe akpa aɖewo nava eme le mɔ nyuitɔ nu, ale be yeate ŋu ana yeƒe tameɖoɖoa nava eme bliboe eye yeaʋli yeƒe dziɖulanyenye ta.

 5. Nu kae nye Yehowa ƒe dzigbɔɖi me tsonu?

⁵ Susu bubu aɖe si tae Yehowa le lalam dzigbɔɖitɔe ɖo lae nye be ame gbogbotɔ kekeake nakpɔ agbe mavɔ. Ele ɖoɖo wɔm fifia be yeaxɔ “ameha gã” aɖe ɖe agbe. (Nyaɖ. 7:9, 14; 14:6) Yehowa le amewo kpem to míaƒe gbeƒãɖeɖedɔa dzi be woasrɔ̃ nu tso yeƒe Fiaɖuƒea kple yeƒe dzidzenu dzɔdzɔeawo ŋu. Fiaɖuƒegbedeasia nye nya nyuitɔ kekeake si wòle be amegbetɔƒomea nase—ɛ̃, “nya nyui” ye wònye vavã. (Mat. 24:14) Ame sia ame si Yehowa hena vae la va zua xexea me katã ƒe hame si me tɔwo nye xɔlɔ̃ vavãwo la me tɔwo eye wolɔ̃a nu dzɔdzɔe wɔwɔ. (Yoh. 6:44-47) Mía Mawu lɔ̃ame la kpena ɖe ame siawo ŋu be woƒe nu nadze ye ŋu. Egale amewo tiam tso amegbetɔwo dome hã be woava zu dziƒodziɖuɖua me tɔwo. Ne ame siawo siwo tsɔ wo ɖokuiwo na Mawu bliboe la va le woƒe dziƒonɔƒea la, woakpe ɖe amegbetɔ toɖolawo ŋu woade blibo ahanɔ agbe tegbee. Eme kɔ ƒãa be, togbɔ be Yehowa le lalam dzigbɔɖitɔe hã la, ele dɔ dzi vevie be yeawɔ yeƒe ŋugbedodowo dzi hena míaƒe nyui.

 6. (a) Aleke Yehowa wɔ nu dzigbɔɖitɔe le Noa ƒe ŋkekea me? (b) Aleke Yehowa le dzi gbɔm ɖi le míaƒe ŋkekea me?

⁶ Yehowa gbɔa dzi ɖi ne amewo wɔ nu baɖa siwo gbɔ eme tsɔ do vloe gɔ̃ hã, abe ale si míekpɔe le ale si wòwɔ nui esime vɔ̃ɖinyenye sɔ gbɔ ɖe anyigba la dzi do ŋgɔ na Tsiɖɔɖɔa me ene. Ɣemaɣi la, gbɔdɔdɔ manɔsenu kple ŋutasẽnuwɔwɔ va xɔ aƒe ɖe anyigba la dzi, eye ‘eɖu dzi na’ Yehowa, elabena amegbetɔwo ƒe zɔzɔme gblẽ keŋ. (1 Mose 6:2-8) Mate ŋu aɖe mɔ be nuwo nayi edzi nenema tegbee o, eya ta etso nya me be yeana tsiɖɔɖɔ natsrɔ̃ ame maɖotowo. Esime “Mawu ƒe dzigbɔgbɔ blewu la nɔ lalam le Noa ƒe ŋkekeawo me” la, Yehowa wɔ ɖoɖo be yeaxɔ Noa kple eƒe ƒomea ɖe agbe. (1 Pet. 3:20) Le ɣeyiɣi si sɔ dzi la, Yehowa gblɔ nu si wòɖo be yeawɔ la na Noa eye wòde dɔ asi nɛ be wòakpa aɖakaʋu aɖe. (1 Mose 6:14-22) Tsɔ kpe ɖe eŋu la, Noa nye “dzɔdzɔenyenye ƒe gbeƒãɖela” henɔ tsɔtsrɔ̃ si tu aƒe la ŋu nya gblɔm na amewo. (2 Pet. 2:5) Yesu gblɔ be míaƒe ɣeyiɣia sɔ kple Noa ƒe ŋkekeawo. Yehowa ɖo ŋkeke si dzi wòahe nuɖoanyi vɔ̃ɖi sia ava nuwuwui la ɖi. Amegbetɔ aɖeke menya “ŋkeke ma kple gaƒoƒo” si dzi nu sia adzɔ o. (Mat. 24:36) Gake fifia la, Mawu de dɔ asi na mí be míaxlɔ̃ nu amewo eye míagblɔ ale si woawɔ hafi akpɔ xɔxɔ la na wo.

 7. Ðe Yehowa le wɔwɔm blewuu le eƒe ŋugbedodowo dzi wɔwɔ mea? Ðe eme.

⁷ Eme kɔ ƒãa be Yehowa mele lalam ko naneke mawɔmawɔe be ɣeyiɣia nava yi o. Eye mele be míasusui be mele mía ŋu bum o, alo be metsɔ ɖeke le eme na mí o! Gake le nyateƒe me la, ate ŋu asesẽ be míayi edzi abu nuwo ŋu alea ne míele tsitsim alo le fu kpem le nuɖoanyi vɔ̃ɖi sia me. Ate ŋu adzɔ be dzi naɖe le mía ƒo alo míase le mía ɖokui me be Mawu le wɔwɔm blewuu le eƒe ŋugbedodowo dzi wɔwɔ me. (Heb. 10:36) Mègaŋlɔ be gbeɖe o be susu nyuiwo tae wòle dzi gbɔm ɖi ɖo, eye ele ɣeyiɣiawo ŋu dɔ wɔm hena esubɔla wɔnuteƒewo ƒe nyonyo. (2 Pet. 2:3; 3:9) Bu ale si Yesu hã ɖe Mawu ƒe dzigbɔɖi fiae ŋu kpɔ.

 8. Nɔnɔme kawo mee Yesu gbɔ dzi ɖi le?

⁸ Yesu le Mawu ƒe lɔlɔ̃nu wɔm eye wòle esia ewɔm veviedodotɔe ƒe akpe gbogbo manyaxlẽ aɖee nye esia. Esime Satana dze aglã la, Yehowa tso nya me be yeadɔ yeƒe Tenuvi la ɖe anyigba dzi abe Mesia ene. Bu ale si gbegbe wòhiã be Yesu nagbɔ dzi ɖii esime wònɔ lalam ƒe akpe geɖe be ɣeyiɣi ma naɖo ŋu kpɔ. (Mixlẽ Galatiatɔwo 4:4.) Mede asi asitɛ me nɔ lalam le ɣeyiɣi mawo katã me o; ke boŋ enɔ dɔ si Fofoa de asi nɛ la dzi vevie. Esi wòva anyigba dzi mlɔeba la, enyae be Satana ana woawu ye, abe ale si wogblɔe ɖi ene. (1 Mose 3:15; Mat. 16:21) Eyi edzi wɔ Mawu ƒe lɔlɔ̃nu ɖokuibɔbɔtɔe, togbɔ be esia bia be wòato vevesese helĩhelĩ me hã. Esia nye nuteƒewɔwɔ ƒe kpɔɖeŋu gãtɔ. Metsɔ susu ɖo eya ŋutɔ ƒe nyonyo kple ɖoƒe ko ŋu o, eye eƒe kpɔɖeŋua ate ŋu aɖe vi na mí.—Heb. 5:8, 9.

9, 10. (a) Nu ka wɔm Yesu le esi wòle Yehowa sinu kpɔm hena nuwɔwɔ? (b) Aleke míate ŋu asrɔ̃ Yesu?

⁹ Le Yesu ƒe tsitretsitsi megbe la, wotsɔ ŋusẽ nɛ le dziƒo kple anyigba dzi. (Mat. 28:18) Ewɔa ŋusẽ ma ŋu dɔ be yeana Yehowa ƒe tameɖoɖo nava eme le Mawu ƒe ɣeyiɣiɖoɖowɔɖi nu. Yesu lala le Mawu ƒe ɖusime dzigbɔɖitɔe va se ɖe ƒe 1914 me be woatsɔ eƒe futɔwo awɔ eƒe afɔɖodzinu. (Ps. 110:1, 2; Heb. 10:12, 13) Eteƒe madidi o, atso ɖe dɔ ŋu ahahe Satana ƒe nuɖoanyia va nuwuwui. Esi Yesu le lalam na esia wɔwɔ la, ele kpekpem ɖe amewo ŋu dzigbɔɖitɔe be Mawu nakpɔ ŋudzedze ɖe wo ŋu eye wòle wo kplɔm le “agbetsidzɔƒewo” gbɔ yim.—Nyaɖ. 7:17.

¹⁰ Èkpɔ ale si nàte ŋu asrɔ̃ Yesu ƒe kpɔɖeŋuaea? Enyae be ɣeyiɣiɖoɖowɔɖi aɖe le Yehowa si. Ðikeke mele eme o be, Yesu di vevie be yeawɔ nu sia nu si ye Fofo bia tso ye si; ke hã elɔ̃ faa be yealala akpɔ Mawu sinu va se ɖe Eƒe ɣeyiɣi ɖoɖia dzi. Esi míele Satana ƒe nuɖoanyi vɔ̃ɖia ƒe nuwuwu lalam la, ehiã be mí katã míasrɔ̃ Mawu ƒe dzigbɔɖi; ele be míakpɔ Mawu sinu ɣesiaɣi, eye mele be míana ta ne dzi ɖe le mía ƒo o. Nu kae míate ŋu awɔ be míasrɔ̃ Mawu ƒe dzigbɔɖi?

11. (a) Aleke dzigbɔɖi do ƒome kple xɔsee? (b) Nu ka tae susu nyuiwo le mía si siwo tae wòle be xɔse sesẽ nanɔ mía si?

¹¹ Hafi Yesu nava anyigba dzi la, nyagblɔɖilawo kple Mawu subɔla wɔnuteƒe bubuwo ɖo ale si amegbetɔ madeblibowo gɔ̃ hã ate ŋu ado dzi dzigbɔɖitɔe la ƒe kpɔɖeŋu ɖi. Ƒomedodo kplikplikpli aɖe nɔ woƒe xɔse kple woƒe dzigbɔɖi dome. (Mixlẽ Yakobo 5:10, 11.) Ne ɖe womexɔ nya siwo Yehowa gblɔ na wo la dzi se ŋutɔŋutɔ o—alo xɔse menɔ wo si o—la, ɖe woalala Mawu ƒe ŋugbedodowo me vava dzigbɔɖitɔea? Wodo dzi le dodokpɔ sesẽwo alo nɔnɔme doŋɔdzinamewo me zi gbɔ zi geɖe, elabena woxɔe se be Mawu awɔ nu si ƒe ŋugbe wòdo la godoo. (Heb. 11:13, 35-40) Susu nyui geɖewo le míawo ya si egbea siwo tae wòle be xɔse sesẽ nanɔ mía si ɖo, elabena Yesu le subɔsubɔm fifia abe ‘Ame si nana míaƒe xɔse dea blibo’ ene. (Heb. 12:2) Ena nyagblɔɖiwo va eme eye wòkpe ɖe mía ŋu míese Mawu ƒe tameɖoɖowo gɔme nyuie wu.

12. Nu kae míate ŋu awɔ be xɔse sesẽ nasu mía si?

¹² Afɔ kawoe míate ŋu aɖe be míado ŋusẽ míaƒe xɔse eye míagbɔ dzi ɖi geɖe wu? Afɔɖeɖe vevi ɖekae nye be míawɔ ɖe Mawu ƒe mɔfiafiawo dzi. Le kpɔɖeŋu me, bu susu siwo tae wòle le nàtsɔ Fiaɖuƒea aɖo nɔƒe gbãtɔ le wò agbe me ŋu kpɔ. Ðe nàte ŋu agadze agbagba geɖe wu le aɖaŋuɖoɖo si le Mateo 6:33 la dzi wɔwɔ mea? Esia ate ŋu afia be nàzã ɣeyiɣi geɖe wu le gbeadzisubɔsubɔdɔa me alo nàwɔ tɔtrɔ le wò agbenɔnɔ ƒe akpa aɖewo. Mègaŋlɔ ale si Yehowa yra ɖe wò agbagbadzedzewo dzi va se ɖe fifia la be o. Ðewohĩ ena nèkpɔ Biblia nusrɔ̃vi yeye aɖe alo ekpe ɖe ŋuwò nèkpɔ “Mawu ƒe ŋutifafa, si ƒoa susu ɖe sia ɖe ta la.” (Mixlẽ Filipitɔwo 4:7.) Ne wò susu le viɖe siwo wò ŋutɔ nèkpɔ tso Yehowa ƒe mɔfiafiawo dzi wɔwɔ me ŋu la, àgakpɔ ŋudzedze ɖe dzigbɔɖi ƒe vevienyenye ŋu geɖe wu.—Ps. 34:9.

13. Kpɔɖeŋu kae ɖe ale si míaƒe xɔse ate ŋu akpe ɖe mía ŋu míagbɔ dzi ɖi geɖe wu la me?

¹³ Esia wɔwɔ le abe ale si agbledela ƒãa nuku, ŋlɔa eme, eye wòva ŋea nu ene. Ɣesiaɣi si agbledela aɖe ŋe nu sɔgbɔ la, kakaɖedzi geɖe wu sua esi eye wòɖonɛ be yeagaƒã nu ake le nuƒãɣi si ava. Gake ahiã be wòakpɔ mɔ na nuŋeɣi la dzigbɔɖitɔe, ke hã ema maxe mɔ nɛ be wòagaƒã nu ake o, ɖewohĩ aƒã nu geɖe wu esi wòƒã le nuƒãɣi si va yi me la gɔ̃ hã. Eka ɖe edzi be yeaŋe nu godoo. Nenema kee ne míesrɔ̃ nu tso Yehowa ƒe mɔfiafiawo ŋu eye míewɔ ɖe wo dzi eye míekpɔ emetsonu nyuiawo la, míeva kana ɖe Yehowa dzi geɖe wu. Míaƒe xɔse hã tsina, eye eva nɔa bɔbɔe na mí be míakpɔ mɔ na yayra siwo míenya be woasu mía si godoo la.—Mixlẽ Yakobo 5:7, 8.

14, 15. Aleke wòle be míabu amegbetɔwo ƒe fukpekpewoe?

¹⁴ Mɔ bubu aɖe si dzi míato agbɔ dzi ɖi geɖe wu lae nye ŋugbledede le ale si wòle be míabu xexea kple nɔnɔme si me míawo ŋutɔwo míele la ŋu. Dze agbagba nàbu nuwo ŋu abe ale si Yehowa bua woe ene. Le kpɔɖeŋu me, de ŋugble tso ale si wòsena le eɖokui me tso amegbetɔwo ƒe fukpekpewo ŋui ŋu kpɔ. Ɣeyiɣi didi aɖee nye esia Yehowa le amegbetɔwo ƒe fukpekpewo teƒe kpɔm, eye esia na wòsea veve; ke hã vevesesea mena wògbɔdzɔ hedzudzɔ nyuiwɔwɔ o. Edɔ eƒe Tenuvi la ɖa be “wòagblẽ Abosam ƒe dɔwɔwɔwo me” eye wòaɖɔ nu siwo katã Satana gblẽ le amegbetɔwo ŋu la ɖo. (1 Yoh. 3:8) Le nyateƒe me la, fukpekpeawo anɔ anyi hena ɣeyiɣi kpui aɖe ko, gake ne Mawu va ɖɔ nuwo ɖo la, woanɔ anyi tegbee. Eya ta míedi be míaɖe mɔ be vɔ̃ɖinyenye si le Satana ƒe nuɖoanyi sia me nana míaƒe xɔse nagbɔdzɔ o. Eye míedi be míanɔ dzi tsim ɖe ɣeyiɣi si xexea awu enu nyanya ŋu o. Ke boŋ mina míaxɔ Mawu ƒe ŋugbedodowo dzi se. Yehowa ɖo ɣeyiɣi aɖe koŋ ɖi si dzi wòahe vɔ̃ɖinyenye ava nuwuwui, eye awɔ esia le game dzi tututu.—Yes. 46:13; Nah. 1:9.

¹⁵ Le nuɖoanyi sia ƒe ŋkeke mamlɛ sesẽ siawo ƒe nuwuwua la, ɖewohĩ ava hiã be míato nɔnɔme sesẽ siwo ado míaƒe xɔse kpɔ la me. Ne wowɔ ŋutasẽnu ɖe mía ŋu alo míaƒe ame veviwo le fu kpem la, mele be míado dziku o, ke boŋ ehiã be míaɖoe kplikpaa aɖo ŋu ɖe Yehowa ŋu bliboe. Ame madeblibowoe míenye, eya ta mele bɔbɔe be míawɔ esia o. Gake ɖo ŋku nu si Yesu wɔ, si ŋuti nya woŋlɔ ɖe Mateo 26:39 la dzi.—Mixlẽe.

16. Hafi nuwuwua nava la, nu kae wòle be míaƒo asa na?

¹⁶ Nɔnɔme gbegblẽ ate ŋu ava su ame si meka ɖe edzi be nuwuwua tu aƒe o la si. Ate ŋu asusu be ehiã be yeanɔ nanewo wɔm kple susu be ɖewohĩ Yehowa ƒe ŋugbedodowo mava eme abe ale si wògblɔe ene o. Agblɔ na eɖokui be, ‘Malala ne makpɔe ɖa be ɖe Yehowa awɔ nu si ƒe ŋugbe wòdo la hã.’ Nuŋububu gbegblẽ sia awɔe be asesẽ na ame sia be wòagbɔ dzi ɖi. Nu si ado tso emee nye be, ate ŋu adze agbagba be yeaxɔ ŋkɔ le xexe sia me alo ava nɔ ŋu ɖom ɖe ga ŋu eye adzudzɔ Mawu Fiaɖuƒea tsɔtsɔ ɖo nɔƒe gbãtɔ. Alo ate ŋu atso nya me be yeade yunivɛsiti, ale be yeanɔ agbe si me dzidzeme le fifia. Gake le nyateƒe me la, ɖe esia menye xɔsemanɔamesi ƒe nuwɔna oa? Ðo ŋku edzi be Paulo de dzi ƒo na mí be míazu nuteƒewɔla siwo xɔ yayra siwo ŋugbe Yehowa do na wo la “to xɔse kple dzigbɔɖi me” la srɔ̃lawo. (Heb. 6:12) Yehowa tso nya me xoxo be yeatsrɔ̃ xexe vɔ̃ɖi sia, eye mahe ɖe megbe o. (Hab. 2:3) Hafi ɣemaɣi naɖo la, ele be míaƒo asa na alɔgblɔlɔwɔwɔ le Yehowa ƒe subɔsubɔdɔa me. Ke boŋ ele be míayi edzi anɔ mo xexi eye míaku kutri vevie le nya nyui gbeƒãɖeɖedɔ si nana dzi dzɔa mí geɖe fifia gɔ̃ hã la me.—Luka 21:36.

17, 18. (a) Esi míele lalam dzigbɔɖitɔe la, mɔnukpɔkpɔ kae su mía si fifia? (b) Ne míegbɔ dzi ɖi la, yayra kawoe asu mía si?

¹⁷ Míeɖale Mawu subɔm ɣleti ʋɛ aɖewoe nye esia alo míele esubɔm ƒe gbogbo aɖee nye esia o, míedi be míasubɔe yi ɖe mavɔmavɔ me. Dzigbɔɖi kpena ɖe mía ŋu be míado dzi va se ɖe esime míekpɔ xɔxɔ, ɣeyiɣi agbɔsɔsɔme ka kee ɖasusɔ na nuɖoanyi sia o. Yehowa le mɔnukpɔkpɔ nam mí fifia be míaɖee afia be míekana ɖe eƒe nyametsotsowo dzi bliboe eye, ne ehiã la, míalɔ̃ faa be míakpe fu le vɔ̃ me le eƒe ŋkɔ la ta. (1 Pet. 4:13, 14) Mawu le hehe si ate ŋu akpe ɖe mía ŋu míado dzi dzigbɔɖitɔe eye míakpɔ ɖeɖe la hã nam mí.—1 Pet. 5:10.

¹⁸ Wotsɔ ŋusẽ katã si le dziƒo kple anyigba dzi la na Yesu, eye ne èyi edzi wɔ nuteƒe la, naneke mate ŋu axe mɔ nɛ be wòagakpɔ tawò o. (Yoh. 10:28, 29) Mehiã be míavɔ̃ na nu si adzɔ le etsɔme loo, alo avɔ̃ na ku gɔ̃ hã o. Ame siwo ado dzi va se ɖe nuwuwu lae akpɔ ɖeɖe. Eya ta ele be míakpɔ egbɔ be míagaɖe mɔ xexea nable mí alo ana míadzudzɔ ŋuɖoɖo ɖe Yehowa ŋu o. Ke boŋ ele be míaɖoe kplikpaa be míatsi le xɔse me eye míawɔ Mawu ƒe dzigbɔɖiɣia ŋu dɔ le nunya me.—Mat. 24:13; mixlẽ 2 Petro 3:17, 18.