Di Ŋutifafa Vavãtɔ eye Nàti Eyome!
“Amesi le didim be, yealɔ̃ agbe, eye yeakpɔ ŋkeke nyuiwo la, . . . nete ɖa le vɔ̃ ŋu, eye wòawɔ nu nyui; nedi ŋutifafa, eye wòati eyome.”—PETRO I, 3:10, 11.
1. Yesaya ƒe nya nyanyɛ kawoe ava eme godoo?
“WOATSƆ woƒe yiwo atu kodziwoe, eye woatsɔ woƒe akplɔwo atu hɛ gobɛwoe; dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ hã azɔ o.” (Yesaya 2:4) Togbɔ be woŋlɔ mawunyakpukpui nyanyɛ sia ɖe Dukɔ Ƒoƒuawo ƒe xexeame katã ƒe dɔwɔƒegã gbɔ le New York City hã la, xexeamehabɔbɔ ma mewɔ naneke kura le nya mawo me vava ŋu o. Gake esi nyagbɔgblɔ ma hã nye Yehowa Mawu ƒe nya si medoa kpo emevava o ta la, ava eme godoo.—Yesaya 55:10, 11.
2. Le Yesaya 2:2, 3 ƒe nya nu la, nukae “ava me le ŋkeke mlɔeawo me”?
2 Nya siwo le Yesaya 2:4 nye nyagblɔɖi wɔnuku aɖe ƒe akpa aɖe, nyagblɔɖi le ŋutifafa vavãtɔ ŋu—eye ele eme vam le míaƒe ɣeyiɣi sia me tututu. Hafi nyagblɔɖia nagblɔ mɔkpɔkpɔ dodzidzɔnamewo ɖi be aʋawɔwɔ kple aʋawɔtuwo maganɔ anyi o la, egblɔ be: “Ava me le ŋkeke mlɔeawo me be, Yehowa ƒe aƒe ƒe to la akɔ ta agbɔ towo ŋu, eye wòaƒo togbɛwo ta, eye anyigba dzi dukɔwo aƒo zi ɖe eŋu. Eye dukɔ geɖewo atso agblɔ bena: Mina míayi Yehowa ƒe to la, Yakob ƒe Mawu ƒe aƒe la gbɔ, ne wòafia nu mí le eƒe mɔwo ŋu, eye míazɔ eƒe toƒewo! Elabena nufiame atso Zion, eye Yehowa ƒe nya atso Yerusalem.”—Yesaya 2:2, 3.
Amewo Ate Ŋu Azu Ŋutifafamewo
3. Aleke dzreme ate ŋu atrɔ azu ŋutifafamee?
3 De dzesii be hafi amewo nate ŋu ati ŋutifafa yome la, ele be woafia Yehowa ƒe mɔ wo. Wɔwɔ ɖe Yehowa ƒe nufiame dzi ate ŋu atrɔ ame ƒe tamebubu kple nuwɔna, ale be amesi nye dzreme tsã la nazu ame fafa. Aleke wowɔa tɔtrɔ siae? Romatɔwo 12:2 gblɔ be: “Migana miaƒe anyinɔnɔ naɖi xexe sia me o, hafi mitrɔ miaƒe nɔnɔme to miaƒe tamesusu ƒe yeyewɔwɔ me boŋ, bene miadzro nusi nye Mawu ƒe [lɔlɔ̃nu], si nyo, eye wòdzea eŋu nyuie, eye wòle blibo la me akpɔ.” Míetrɔa míaƒe tamesusu, alo míenaa wòsusua nuwo ŋu bubui, to Mawu ƒe Nya la me gɔmeɖosewo kple sededewo ŋububu me. Biblia sɔsrɔ̃ edziedzi naa míewɔa tɔtrɔ sia eye wòna mía ŋutɔwo míekana ɖe nusi nye Yehowa ƒe lɔlɔ̃nu na mí la dzi, ale be mɔ si míato la dzi nakɔ na mí keŋ.—Psalmo 119:105.
4. Aleke wodoa ŋutifafa ƒe amenyenye yeye lae?
4 Menye míaƒe tamesusu koe Biblia me nyateƒea trɔna o ke etrɔa míaƒe nuwɔna kple amenyenye hã. Enaa míewɔa nusi ƒe dzi apostolo Paulo de ƒo be: “[Miɖe] ame xoxo, si nɔ anyi le agbenɔnɔ tsãtɔ la nu, si gblẽa eɖokui le amebeble ƒe nudzodzrowo me la ɖa; ke boŋ mina woawɔ mi yeye le miaƒe tamesusu ƒe gbɔgbɔ la me, eye mido ame yeye, si wowɔ le Mawu ƒe nɔnɔme nu la, le nyateƒe la ƒe dzɔdzɔenyenye kple kɔkɔenyenye la me.” (Efesotɔwo 4:22-24) Ŋusẽ si wɔa dɔ ɖe míaƒe tamebubu dzi la nye nusi le mía me. Etrɔna eye ŋusẽ ɖoa eŋu esi míaƒe lɔlɔ̃ na Yehowa kple eƒe sewo le tsitsim, eye ena míezua gbɔgbɔmemewo kple ŋutifafamewo.
5. Aleke “se yeye” si Yesu de na eƒe nusrɔ̃lawo na ŋutifafa nɔ wo domee?
5 Alesi tɔtrɔwɔwɔ sia hiãe la dze le mɔfiame si Yesu na eƒe nusrɔ̃lawo le gaƒoƒo mamlɛtɔ si wònɔ wo gbɔ me, be: “Se yeye mena mi bena, mialɔ̃ mia nɔewo, sigbe alesi melɔ̃a mi ene, bena miawo hã mialɔ̃ mia nɔewo nenema ke. Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:34, 35) Ðokuitɔmadimadi ƒe lɔlɔ̃ sia si ɖi Kristo tɔ la bla nusrɔ̃lawo le ɖekawɔwɔ blibo me. (Kolosetɔwo 3:14) Amesiwo lɔ̃ be yewoaxɔ “se yeye” sia ahanɔ agbe ɖe enu koe akpɔ ŋutifafa si ŋugbe Mawu do. Ðe ame aɖewo le esia wɔm egbea?
6. Nukata Yehowa Ðasefowo le ŋutifafa me evɔ xexemetɔwo ya mele eme o?
6 Yehowa Ðasefowo dzea agbagba be yewoaɖe lɔlɔ̃ afia le woƒe xexeame katã ƒe nɔviwo ƒe habɔbɔa me. Togbɔ be xexemedukɔwo katã mee wotso hã la, womeƒoa wo ɖokui ɖe xexeame ƒe dzrehehewo me o ne dunyahelawo kple subɔsubɔhakplɔlawo zi wo dzi gɔ̃ hã. Wonye amesiwo wɔ ɖeka siwo Yehowa fiaa nui, eye ŋutifafa le wo dome. (Yesaya 54:13) Womedea akpa aɖeke dzi le dunyahehedzrewo me o, eye womekpɔa gome le aʋawɔwɔwo me o. Wo dometɔ siwo wɔa ŋutasẽnuwo tsã la ɖe asi le agbenɔnɔ ma ŋu. Wozu Kristotɔ ŋutifafalɔ̃lawo, amesiwo srɔ̃a Kristo Yesu ƒe kpɔɖeŋu. Eye wowɔna ɖe Petro ƒe aɖaŋuɖoɖo dzi be: “Amesi le didim be, yealɔ̃ agbe, eye yeakpɔ ŋkeke nyuiwo la, nekpɔ eƒe aɖe dzi ɖe vɔ̃ ŋu kple eƒe nuyiwo dzi, bene woagagblɔ alakpanya o; nete ɖa le vɔ̃ ŋu, eye wòawɔ nu nyui; nedi ŋutifafa, eye wòati eyome.”—Petro I, 3:10, 11; Efesotɔwo 4:3.
Amesiwo Le Ŋutifafa Yome Tim
7, 8. Gblɔ amesiwo dzudzɔ aʋawɔwɔ heva zu ŋutifafa vavãtɔ dilawo la ƒe kpɔɖeŋuwo. (Gblɔ bubu siwo hã nènya.)
7 Kpɔɖeŋu ɖekae nye Rami Oved si nye amegã le ŋɔdzidodonutsiha me tsã. Wona hehee be wòawu eƒe futɔwo. Exɔ eƒe Israel dukɔmevinyenye dzi se ale gbegbe vaseɖe gbesigbe wòva kpɔ be rabiwo medi be yeaɖe nyɔnu si yelɔ̃ la o le esi menye Yudatɔe wònye o ke Asiatɔe ta. Edze nyateƒea didi gɔme le Biblia me. Ke eva do go Yehowa Ðasefowo. Eƒe Biblia sɔsrɔ̃ kple Ðasefoawo na wòkpɔe be yemagate ŋu anye dukɔmevi zazɛ̃nyahela o. Kristotɔwo ƒe lɔlɔ̃ fia be wòadzudzɔ aʋawɔwɔ kple aʋawɔnuwo zazã ava asrɔ̃ alesi wòalɔ̃ ameƒomevi ɖesiaɖe. Aleke wòtsi yaa enye si esime wòxɔ lɛta nyui aɖe si dze egɔme kple nya siawo be, “Nɔvinyeŋutsu Rami”! Nukae wɔ nuku le nya mawo ŋu? Palestinatɔ si nye Ðasefoe ŋlɔ agbalẽa nɛ. Rami gblɔ be: “Mesusu be enye nusi mate ŋu adzɔ gbeɖe o, elabena nye futɔwoe Palestinatɔwo nye, gake wo dometɔ ɖekae nye sia le yɔyem be ‘Nɔvinyeŋutsu.’ ” Rami kple srɔ̃a wole ŋutifafa vavãtɔ yome tim fifia le Mawu ƒe didi nu.
8 Kpɔɖeŋu bubue nye Georg Reuter, amesi nɔ Germany-srafowo dome wodze Russia dzi le Xexemeʋa II me. Eteƒe medidi o Hitler ƒe nuɖoɖo sesẽ si nye be yeaɖu xexeame katã dzi la ƒe nya va tii. Esi wògbɔ tso aʋaa la, eva dze Biblia sɔsrɔ̃ gɔme kple Yehowa Ðasefowo. Eŋlɔ be: “Nuwo me va nɔ kɔkɔm nam azɔ. Meva kpɔe dze sii be menye Mawue wòle be woabu fɔe ɖe ʋukɔkɔɖi gbogbo ma ta o. . . . Mesrɔ̃e be eƒe tameɖoɖoe nye be yeawɔ anyigba katã wòazu paradiso si ahe yayra mavɔwo vɛ na ameƒomea me tɔ toɖolawo. . . . Hitler ƒo adegbe be yeaɖo ‘Ƒe Akpe Ðeka Dziɖuɖu’ anyi gake [ƒe] 12 koe wòɖu dzi—eye nusiwo do tso eme la dzi ŋɔ wu gbɔgblɔ! Kristo boŋ ye . . . ate ŋu aɖo ƒe akpe ɖeka dziɖuɖu anyi ɖe anyigba katã dzi eye aɖoe hã . . . ke menye Hitler ye o.” Georg nye ŋutifafa vavãtɔ ƒe dɔla le ɣeyiɣiawo katã ƒe subɔsubɔdɔa me anye ƒe 50 sɔŋ enye sia.
9. Aleke nusiwo teƒe Yehowa Ðasefowo kpɔ le Nazi Germany ɖo kpe edzi be wonye kalẽtɔwo ganye ŋutifafamewo?
9 Yehowa Ðasefo siwo nɔ Germany le Nazitɔwo ƒe dziɖuɣi ƒe nuteƒewɔwɔ kple akpaɖekedzimademade kpɔtɔ le ɖase ɖim le woƒe lɔlɔ̃ na Mawu kple ŋutifafa ŋu fifi laa gɔ̃ hã le ƒe 50 kple edzivɔ megbe. Agbalẽvi aɖe si United States Tsɔtsrɔ̃ Gã ƒe Ŋkuɖodzi Blemanudzraɖoƒe si le Washington, D.C., ta la gblɔ be: “Yehowa Ðasefowo do dzi le yometiti sesẽ me le Nazi-dziɖuɖua te. . . . Dzideƒo si wo dometɔ akpa gãtɔ ɖe fia le gbegbe [be yewomagbe nu le yewoƒe subɔsubɔha gbɔ o] me, togbɔ be wowɔ funyafunya wo, hewɔ ŋlɔmi le wo ŋu le ŋutasẽgaxɔwo me, eye ɣeaɖewoɣi wowua wo hã, na woƒe ɣeyiɣia me tɔ geɖewo de bubu wo ŋu.” Agbalẽvia gagblɔ be: “Esi woɖe asi le Yehowa Ðasefoawo ŋu le gaxɔawo me la, woyi woƒe dɔa dzi, wobɔa ha kple amesiwo tsi agbe tso eme, nɔ dzime trɔm na amewo.”
Tɔtrɔ si Lolo Sã Wu
10. (a) Tɔtrɔ gã kae hiã hafi ŋutifafa vavãtɔ nava? (b) Aleke wogblɔ esia le Daniel ƒe agbalẽa mee?
10 Ðe wòle fiafiam be Yehowa Ðasefowo susu be yewoate ŋu ato dzimetɔtrɔ na ame gbogbo aɖewo be woazu Kristotɔ akpaɖekedzimadelawo me ahe ŋutifafa va xexeame katã? Kpao! Bene ŋutifafa nagava anyigba dzi la, tɔtrɔ si lolo wu kurae hiã. Eyae nye ka? Ele be woaɖe amegbetɔ ƒe dziɖuɖu si hea mamã, ameteɖeanyi, kple ŋutasesẽ vɛ la ɖa ale be Mawu ƒe Fiaɖuƒe si Yesu fia eƒe nusrɔ̃lawo be woado gbe ɖa abia la naxɔ ɖe eteƒe. (Mateo 6:9, 10) Gake aleke nu ma adzɔe? Mawu na nyagblɔɖila Daniel ku drɔ̃e aɖe wòkpɔ be le ŋkeke mamlɛawo me la, Mawu ƒe Fiaɖuƒe si le abe kpe gã aɖe si “menye ame ƒe asie dae o” ene, agbã legba gã aɖe si nye kpɔɖeŋu na ameƒomea ƒe dunyahedziɖuɖu siwo le anyigba la dzi ɖum la gudugudu. Emegbe egblɔ be: “Le fia mawo ŋɔli la dziƒo ƒe Mawu la aɖo fiaɖuƒe aɖe anyi, si matsrɔ̃ gbeɖegbeɖe o, eye eƒe fiaɖuƒe mayi ɖe dukɔ bubu aɖeke si me o; agbã fiaɖuƒe mawo katã, eye wòagblẽ wo, ke eya ŋutɔ anɔ anyi tegbee.”—Daniel 2:31-44.
11. Mɔ ka dzie Yehowa ato ahe tɔtrɔ si hiã hafi ŋutifafa nava la vɛ?
11 Nukatae tɔtrɔ gã sia ava xexeame? Elabena Yehowa do ŋugbe be yeaɖe amesiwo katã le ɖi ƒom anyigba la eye wole egblẽm la ɖa. (Nyaɖeɖefia 11:18) Tɔtrɔ sia ava eme le Yehowa ƒe aʋa dzɔdzɔe si wòawɔ kple Satana kpakple eƒe xexe vɔ̃ɖia me. Míexlẽ le Nyaɖeɖefia 16:14, 16 be: “[Wonye nyagbɔgblɔ makɔmakɔwo,] gbɔgbɔ vɔ̃wo ƒe gbɔgbɔ, siwo nɔa dzesiwo wɔm, eye wonɔa xexeame katã ƒe fiawo [efia be dunyahedziɖulawo] gbɔ yim, bena woaƒo wo nu ƒu, hena Mawu, ŋusẽkatãtɔ la, ƒe ŋkeke gã la ƒe aʋawɔwɔ. Eye woƒo wo nu ƒu ɖe teƒe, si woyɔna le Hebri-gbe me bena Harmagedon.”
12. Aleke Harmagedon anɔ?
12 Aleke Harmagedon la anɔ? Manye nuklia ƒe nutsɔtsrɔ̃, alo afɔku si atso amegbetɔwo gbɔ o. Ao, Mawu ƒe aʋa si wòatsɔ atsi amegbetɔ ƒe aʋawɔwɔwo katã nu eye wòaɖe amesiwo katã hea aʋawɔwɔawo vɛ ɖa lae wònye. Enye Mawu ƒe aʋa si ahe ŋutifafa vavãtɔ vɛ na ŋutifafalɔ̃lawo. Ẽ, Harmagedon ava abe alesi Mawu ɖo tamee ene. Mahe ɖe megbe o. Gbɔgbɔ ʋã eƒe nyagblɔɖila Xabakuk wòŋlɔ be: “Azãgbe li na ŋutega la, eƒe nuwuwu le aƒe tum, eye maflu ame o; ke ne etsi megbe la, kpɔ esinu; elabena ele vava ge kokoko, eye mahe ɖe megbe o.” (Xabakuk 2:3) Mí amegbetɔwo ƒe seselelãmewo ate ŋu ana wòawɔ na mí abe ɖe wòle megbe tsim ene, gake gamedzinɔlae Yehowa nye. Harmagedon ava le gaƒoƒo si Yehowa ɖo ɖi dzi tututu.
13. Aleke Yehowa atu nu kple Satana Abosam si koŋ nye agɔdzela lae?
13 Afɔɖeɖe mamlɛ sia aʋu mɔ be ŋutifafa vavãtɔ nava! Gake be ŋutifafa vavãtɔ naxɔ aƒe ɖi nyuie la, ele be woawɔ nu bubu aɖe—si nye amesi hea mamã, fuléle, kple dzrehehe vɛ la ɖeɖeɖa. Eye nu ma tututue Biblia gblɔ ɖi be adzɔ—Satana, aʋadɔla kple aʋatsokafofo la dede aʋli me. Apostolo Yohanes kpɔ nudzɔdzɔ sia le nyagblɔɖiŋutega aɖe me si wòŋlɔ ɖe Nyaɖeɖefia 20:1-3 be: “Mekpɔ mawudɔla aɖe le ɖiɖim tso dziƒo, eye aʋli me safui kple kɔsɔkɔsɔ gã aɖe le esi. Eye wòlé ʋɔ driba, da xoxo, si nye Abosam kple Satana la, eye wòblae ƒe akpe ɖeka. Eye wotsɔe ƒu gbe ɖe aʋli me, eye wotu nu ɖe enu, eye wotre enu, bena ne wòagable dukɔwo o, halase esime ƒe akpe ɖeka la nu nava yi.”
14. Aleke nàƒo nu tso afɔ si Yehowa aɖe ɖe Satana ŋu hena aʋadziɖuɖu la ŋui?
14 Menye drɔ̃e wònye kura o; Mawu ƒe ŋugbedodoe—eye Biblia gblɔ be: ‘Mawu mate ŋu aka aʋatso o.’ (Hebritɔwo 6:18) Eyata Yehowa te ŋu gblɔ to eƒe nyagblɔɖila Yeremya dzi be: “Nyee nye Yehowa, amesi si me amenuveve, ʋɔnudɔdrɔ̃ kple dzɔdzɔenyenye le le anyigba dzi, elabena nusiawoe nyoa ŋunye, Yehowa ye gblɔe.” (Yeremya 9:23) Yehowa drɔ̃a ʋɔnu dzɔdzɔe hewɔa nu le dzɔdzɔenyenye me eye ŋutifafa si wòahe va anyigba dzi la ƒe nya dzɔa dzi nɛ ŋutɔ.
Ŋutifafafia la ƒe Dziɖuɖu
15, 16. (a) Amekae Yehowa tia be wòaɖu Fia? (b) Aleke woƒo nu tso dziɖuɖu ma ŋui, eye amekawoe anɔ eme?
15 Bene Yehowa nana ŋutifafa vavãtɔ amesiwo katã anɔ eƒe Fiaɖuƒeɖoɖoa te la, etsɔ dziɖulanyenyea de asi na Ŋutifafafia vavãtɔ Yesu Kristo, abe alesi wogblɔe ɖi ɖe Yesaya 9:5, 6 ene, be: “Wodzi vi na mí, eye wona ŋutsuvi mí, dziɖuɖu le abɔta nɛ, eye wotsɔ ŋkɔ nɛ be: Nukunu, adaŋudela, Mawu kalẽtɔ, fofo mavɔ, ŋutifafafia, ne eƒe dziɖuɖu nakeke ta, eye seƒeɖo manɔe [nɛ] . . . o. Yehowa Zebaot ƒe ŋuʋaʋã awɔ esia ade goe.” Hakpala la hã ŋlɔ nyagblɔɖinya le Mesia la ƒe ŋutifafa dziɖuɖua ŋu be: “Ekema ame dzɔdzɔe la amie le eƒe ŋkekewo me, eye ŋutifafa axɔ aƒe, vaseɖe esime dzinu maganɔ anyi o.”—Psalmo 72:7.
16 Hekpe ɖe eŋu la, Kristo nɔvi amesiamina 144,000 aɖu fia kplii le dziƒo. Kristo ƒe hatidziɖula siawo ŋue Paulo gblɔ le be: “Ŋutifafa Mawu la agbã Satana ɖe miaƒe afɔwo te gudugudu kpuie. Mía Aƒetɔ Yesu ƒe amenuveve la nanɔ anyi kpli mi katã!” (Romatɔwo 16:20) Ẽ, amesiawo atso dziƒo akpɔ gome kple Kristo le Satana, aʋadɔla la dzi ɖuɖu me!
17. Nukae wòle be míawɔ be míanyi ŋutifafa vavãtɔ dome?
17 Eyata nya si míabia azɔe nye be, Nukae wòle be nàwɔ anyi ŋutifafa vavãtɔ dome? Mawu ƒe mɔ dzi koe ŋutifafa vavãtɔ ato ava, eye ele be nàwɔ afɔɖeɖe siwo dze hafi wò asi nasu edzi. Ele be nàxɔ Ŋutifafafia la atrɔ ɖe eŋu. Efia be ele be nàlɔ̃ ɖe ɖoƒe si Kristo le si nye amegbetɔƒome siwo nye nuvɔ̃mewo ƒe Ðela kple Tafexela la dzi. Yesu ŋutɔ gblɔ nya nyanyɛ siawo be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.” (Yohanes 3:16) Ðe nèlɔ̃ faa be yeaxɔ Kristo Yesu dzi ase be eyae nye amesi dzi Mawu ato ahe ŋutifafa vavãtɔ kple ɖeɖekpɔkpɔ vɛa? Ŋkɔ bubu aɖeke megale dziƒoa te si ate ŋu ahe ŋutifafa vɛ eye wòate ŋu ana kakaɖedzi le eŋu o. (Filipitɔwo 2:8-11) Nukatae? Elabena Yesue nye Amesi Mawu Tia. Eyae nye ŋutifafa ƒe dɔla vevitɔ kekeake si nɔ anyigba sia dzi kpɔ. Àɖo to Yesu asrɔ̃ eƒe kpɔɖeŋua?
18. Nukae wòle be míawɔ le Yesu ƒe nya siwo le Yohanes 17:3 dzi wɔwɔ me?
18 Yesu gblɔ be: “Esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.” (Yohanes 17:3) Fifiae wòle be nàxɔ sidzedze vavãtɔ to Yehowa Ðasefowo ƒe kpekpewo dede edziedzi me le Fiaɖuƒe Akpata me. Kpekpe siawo siwo me wofiaa nu ame le la aʋã wò be nàgblɔ wò sidzedze kple mɔkpɔkpɔ na ame bubuwo. Wò hã àte ŋu azu Mawu me ŋutifafa ƒe dɔla. Ne èɖo ŋu ɖe Yehowa Mawu ŋu la, wò hã àte ŋu anɔ ŋutifafa me fifia, abe alesi Yesaya 26:3 gblɔe ene le New International Version me be: “Àdzra amesi ƒe susu li ke la ɖo ɖe ŋutifafa deblibo la me, elabena eɖoa dzi ɖe ŋuwò.” Ameka ŋue wòle be nàɖo ŋu ɖo? “Miɖo dzi ɖe Yehowa ŋu ɖaa, elabena Yehowa, ẽ, Yehowa enye agakpe tegbee.”—Yesaya 26:4.
19, 20. Nukae le amesiwo dia ŋutifafa hetia eyome egbea la lalam?
19 Eyata tia agbe mavɔ nɔnɔ le Mawu ƒe ŋutifafa xexe yeyea me fifi laa. Mawu ƒe Nya la ka ɖe edzi na mí le Nyaɖeɖefia 21:3, 4 be: “Kpɔ ɖa, Mawu ƒe agbadɔ la le amewo gbɔ, eye wòanɔ anyi kpli wo, eye woawo hã woanye eƒe dukɔ, eye Mawu ŋutɔ anɔ anyi kpli wo, eye wòanye woƒe Mawu. Eye Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.” Ðe menye etsɔme ŋutifafa mae dzroa wò vevie oa?
20 Ekema ɖo ŋku nusi ŋugbe Mawu do dzi. “Ame [fafawo] anyi anyigba la dome, eye dzi adzɔ wo ɖe ŋutifafa gbogbo la ŋuti. Lé ŋku ɖe ame maɖifɔ la ŋu, eye nakpɔ ame dzɔdzɔe la ɖa, elabena dzidzimeviwo le ŋutifafame la si.” (Psalmo 37:11, 37) Ne dzidzɔŋu ma ke la, neva eme be míatsɔ akpedada agblɔ be, “Ŋutifafa vavãtɔ la va ɖo mlɔeba! Akpe na Yehowa Mawu, ŋutifafa vavãtɔ la tsoƒe!”
Àte Ŋu Aɖe Wo Mea?
◻ Nukae ate ŋu ana ame natrɔ eƒe tamesusu kple nuwɔna?
◻ Aleke Yehowa Ðasefo ɖesiaɖe kple habɔbɔ bliboa katã ɖe ŋutifafa vavãtɔ didi fiae?
◻ Aleke Yehowa atu nu kple amesiwo katã doa fuléle kple aʋawɔwɔ ɖe ŋgɔ lae?
◻ Nukae Ŋutifafafia la ƒe dziɖuɖu awɔ na ameƒomea?
[Nɔnɔmetata siwo le axa 14]
Menye Dukɔ Ƒoƒuawoe na Yesaya ƒe nyawo va eme o, ke boŋ amesiwo wɔna ɖe Yehowa ƒe nufiafia dzie
[Nɔnɔmetata siwo le axa 15]
Ŋutsu eve siawo wɔ tɔtrɔwo heti ŋutifafa yome
Rami Oved
Georg Reuter
[Nɔnɔmetata si le axa 16]
Ŋutifafa vavãtɔ axɔ aƒe le Ŋutifafafia ƒe dziɖuɖu te