Sɔhɛwo Biana Be . . . 

Aleke Mawɔ Anɔ Te Ðe Fewuɖuɖu Nu?

ATE ŋu adzɔ be woagblɔ fewuɖunya vloewo ɖe sɔhɛ siwo ƒe nuwɔna alo awudodo to vovo tso wo hatiwo tɔ gbɔ ŋu. Esia dzɔna ɖe Kristotɔ sɔhɛ siwo ƒe agbenɔnɔ toa vovo zi geɖe tsoa wo tɔ sɔhɛ bubuwo tɔ gbɔ dzi. Ðe Kristo megblɔ le eyomedzela vavãwo ŋuti be, “Ne woti yonyeme la, woati miawo hã yome” oa?​—Yohanes 15:⁠20.

Aleke esia kpɔa ŋusẽ ɖe sɔhɛ siwo nye Yehowa Ðasefowo dzi? Woɖua fewu le ɖewo ŋu le esi womeɖua ŋkekenyui aɖewo o ta; woɖea ɖeklemi le bubuwo ŋu le esi womedoa gbe na aflaga o ta. Woɖea fu na ɖewo kura gɔ̃ hã le gbegbe be yewomazã atikevɔ̃ɖiwo o ta, le woƒe anukwareɖiɖi ta, kple le Biblia ƒe agbenyuinɔnɔ ƒe dzidzenuwo me léle ɖe asi ta.

Nu sia menye nu yeye o. Le nyateƒe me la, apostolo Petro gblɔ na ƒe alafa gbãtɔ me Kristotɔwo be: “Esia wɔ yaa na [dukɔwo me tɔwo] bena mieƒu du kpli wo . . . o, eye wole busunyawo gblɔm le mia ŋuti.” (Petro I, 4:⁠4) Biblia gɔmeɖeɖe bubuwo ɖe esia gɔme be: “Wole ŋkɔ vɔ̃wo yɔm na mi” (Knox) alo, “Wole dzugbenyawo gblɔm ɖe mia ŋu.”​—Today’s English Version.

Ðe ame aɖe ɖu fewu le ŋuwò le wò mawusubɔsubɔdzixɔsewo ta kpɔa? Ne nenemae la, ke lé dzi ɖe ƒo. Menye wò ɖeɖee o! Eye adzɔ dzi na wò be nànya be yeate ŋu asrɔ̃ alesi wonɔa te ɖe dziɖeleameƒo si tsoa fewuɖuɖu le ame ƒe xɔse ŋu nu.

Nusita Woɖua Fewu le Ame Ŋu

Nukatae ame aɖewo ɖea alɔme le amesiwo ƒe dzixɔse kple agbenɔnɔ to vovo na wo tɔ ŋu? Ɣeaɖewoɣi fewuɖulawo​—abe anyrawɔlawo ene​—sena le wo ɖokui me be yewomele dedie o. Woaɖe alɔme le ŋuwò be woatsɔ ado wo ɖokui ɖe dzi le wo tɔwo ŋkume. Anɔ eme be ne fewuɖula mawo ɖeɖe dzaa koe li la, wo dometɔ ʋɛ aɖewo koe adi​—alo dzi nanɔ wo ƒo​—be yewoaɖe ɖeklemi le ŋuwò gaglã.

Gake abe alesi Petro ŋlɔe ene la, ‘ewɔa mo yaa’ na fewuɖula aɖewo. Ẽ, alesi nènɔa agbe la atɔtɔ wo le nyateƒe me. Le kpɔɖeŋu me, ne Yehowa Ðasefoe nènye la, woabui le nyateƒe me be enye nusi wɔ mo yaa be mèkpɔa gome le nuwɔna aɖewo siwo do ƒome kple ŋkekenyui aɖewo ɖuɖu me o. Ðewohĩ amesiwo ɖoe koŋ tsia tre ɖe Ðasefowo ŋu anya gblɔ nya totro aɖewo na wo tso wo ŋu.

Eɖanye nuka gbɔe wòtso o, ne wòdzɔ be wole fewu ɖum le ŋuwò vevie la, àlɔ̃ ɖe Biblia ƒe lododoa dzi be: “Ame aɖewo ƒe nuƒoƒo [nuŋumabumabutɔe] le abe yitɔame ene.” (Lododowo 12:​18) Gake ɖo ŋku edzi be ɖewohĩ manye be ɖe amesi gblɔa fewuɖunya ɖe ŋuwò lé fu wò o. Zi geɖe la, ate ŋu anye be wole nu wɔm tututu abe alesi Biblia ƒe lododoa gblɔe ene​—wole ‘nu ƒom eŋumabumabui.’

Ke hã fewuɖuɖu ate ŋu ave ame, abe abi si wotsɔ lãnu de ame ŋu ene. Ðewohĩ ava susu me na wò gɔ̃ hã be yeagbe yeƒe xɔse, be yeatsɔ axe mɔ ɖe fewuɖunya ɖefunameawo nu. Ke aleke nàte ŋu anɔ te ɖe enu ne woɖu fewu le wò dzixɔse ŋu?

Ame Ðokui Taʋiʋli

Apostolo Petro xlɔ̃ nu Kristotɔwo be: “Misu te ɖaasi, bene miana ŋuɖoɖo amesiame, si abia nya aɖe mi le mɔkpɔkpɔ, si le mia me la ŋuti; gake miwɔe kple dɔmefafa kpakple vɔvɔ̃.” (Petro I, 3:​15) Be nàte ŋu aʋli wò xɔse ta bia be sidzedze vavãtɔ nasu asiwò eye nànya nusiwo dzi wotu wò dzixɔsewo ɖo.

Gake ele hã be nàsrɔ̃ alesi nàɖe ɖokuiwò nu le amewo gbɔ le “bubu deto” me alo, abe alesi The Bible in Basic English ɖe egɔmee ene la, “dada manɔmee.” Mègana wò sidzedze Biblia kple eƒe nufiafiawo nana nàbu ɖokuiwò gã wu ame bubuwo o. Ke boŋ ele be nàdze agbagba atu apostolo Paulo ƒe nɔnɔme ɖo, amesi ŋlɔ le eƒe subɔsubɔdɔ ŋu be: “Metsɔ ɖokuinye wɔ amewo katã ƒe dɔla, bene asinye nasu ame geɖeawo dzi.”​—Korintotɔwo I, 9:⁠19.

Ne èkpɔ be dzi mele ye ƒo be yeaʋli yeƒe xɔse ta o la, mègana be esia naɖe dzi le ƒowò o. Sɔhɛ Ðasefo geɖe se le wo ɖokui me nenema kpɔ. Jamal gblɔ be: “Esi menɔ gɔmedzesuku la, nyemenya alesi maɖe nusita nyemeɖua ŋkekenyuiwo alo doa gbe na aflaga alo kura gɔ̃ hã, nusitae mewɔa ʋɔtru nu yi ʋɔtru nu subɔsubɔdɔa me na amewo o.” Nukae kpe ɖe eŋu? “Fofonye yi edzi nɔ kpekpem ɖe ŋunye vaseɖe esime mlɔeba mete ŋu ɖea nusiawo me, eye esia he tɔtrɔ gã aɖe va nye agbe me.” Ne wò dzixɔse me ɖeɖe na amewo sesẽna na wò la, àte ŋu abia kpekpeɖeŋu atso dziwòlawo alo Kristo-hamea me tɔ aɖe si tsi le gbɔgbɔ me gbɔ be woakpe ɖe ŋuwò be nàdze si Mawu tsitotsito.​—Efesotɔwo 3:​17-⁠19.

Sɔhɛ Ðasefo ƒe 16 vi aɖe gblɔ be ɖokuisi Biblia sɔsrɔ̃ ƒe ɖoɖowɔɖi si yewɔ kpe ɖe ye ŋu be dzi ɖo ye ƒo yete ŋu ƒoa nu vɔvɔ̃manɔmetɔe le suku. Elɔ̃ ɖe edzi be: “Tsã la, ne nye sukuxɔmehatiwo le fewu ɖum le ŋunye le esi menye Ðasefo ta la, nyemenyaa nusi magblɔ o. Fifia, esi mezu ɣeyiɣiawo katã ƒe nyanyuigblɔla la, mesrɔ̃a Biblia geɖe wu, eye mete ŋu ɖoa nya ŋu. Gbetakpɔxɔ kple Nyɔ! magazine yeye ɖesiaɖe siwo do xexlẽ kpena ɖe ŋunye be mete ŋu ƒoa nu na nye sukuhatiwo tso nye dzixɔsewo ŋu.”

Nyateƒee, nɔnɔmewo te ŋu toa vovo. Eyata nɔnɔme ɖesiaɖe kple alesi wòle be woawɔ nui. Gake ne wogblɔ gbɔɖiamenya aɖe tsɔ do dziku na wò la, masɔ gbeɖe be ‘nàɖo vɔ̃ vɔ̃ teƒe’ o. (Romatɔwo 12:​17-21) Dzugbenyawo ŋuɖoɖo, aleke ke wòadze be nèɖo wo ŋui le nunya me o, ɖeko wòawɔe be nya la nagagblẽ ɖe edzi eye kura gɔ̃ hã ɖewohĩ wòagade dzi ƒo na wo be woaɖu fewu le ŋuwò ɖe edzi. Le esia ta ame aɖewo kpɔe be anyo wu be yewomade nu eme ne wodzu yewo o.

Le go aɖewo me, abe ne nya siwo wogblɔna nye fefe le ame ŋu ko ene la, anye nusi me nunya le gɔ̃ hã be mía ko nu kpli wo ne wole nya siawo gblɔm tsɔ wu be míado dziku. (Nyagblɔla 7:⁠9) Ne fewuɖulaa kpɔ be yeƒe nyawo mevea wò o la, ate ŋu awɔe be wòadzudzɔ fuɖeɖe na wò.​—Tsɔe sɔ kple Lododowo 24:​29; Petro I, 2:⁠23.

Nuƒoƒo Vɔvɔ̃manɔmee

Gake eva hiãna ɣeaɖewoɣi be ne wòanya wɔ la, nàɖe wò dzixɔsewo me kpuie le aɖaŋudzedze me. Nyɔnuvi ƒe 13 vi aɖe wɔe kpɔ alea eye nusiwo do tso eme wɔ nuku nɛ. Egblɔ be: “Meyina suku esi mía tɔ sukuvi geɖewo dze alɔmeɖeɖe le Yehowa Ðasefowo ŋu. Esia ʋãm be maƒo nu dzideƒotɔe aɖe nu me na wo gake ɖeko wozɔ dzo le gbɔnye heyi nye koko dzi​—wo dometɔ ɖeka koe mewɔ nenema o.” Ðasefo sukuvia gblɔ be: “Nyɔnuvi aɖe si ŋkɔe nye Jaimee trɔ ɖe ŋunye eye wògblɔ nam be agbalẽ si nye Ate Ŋu Anɔ Agbe Tegbee le Paradiso me le Anyigba Dzi le ye si.a Egblɔ be yexlẽ eƒe akpa gãtɔ eye yedi be yeanya nu bubuwo tso míaƒe dzixɔsewo ŋuti. Medze Biblia sɔsrɔ̃ gɔme kple Jaimee.” Nuteƒekpɔkpɔ sia de dzi ƒo na sɔhɛ Ðasefo sia be wòdze nuƒoƒo gɔme na sɔhɛ bubuwo hã. Egblɔ be: “Mesrãa hati sukuvi ene bubu siwo ɖe ɖetsɔleme fia la kpɔ edziedzi eye meka ɖe edzi be woawo hã woadze nusɔsrɔ̃ gɔme kpuie.

Ƒe aɖewo va yi la, nusia tɔgbe dzɔ ɖe sukuvi aɖe si le Afrika-dukɔ si nye Liberia me hã dzi. Le woƒe hadomeŋutinunya srɔ̃ɣi la, eɖe eme bubutɔe be Yehowa Ðasefoe yenye eye nuwɔwɔ dzie yexɔ se ke menye amedzɔtsolãme nufiafia o. Gbã la, eƒe sukuhati geɖe ɖe ɖeklemii ŋutɔ. Gake woƒe nufiala ɖe mɔ nɛ be wòaɖe eƒe dzixɔsewo me na eƒe sukuxɔmeviwo, eye le ema megbe la, nufiala la xɔ agbalẽ si nye Life​—How Did It Get Here? By Evolution Or By Creation?b

Esi nufialaa xlẽ agbalẽa vɔ la, egblɔ na sukuviawo be: “Agbalẽ aɖeke menyo de agbalẽ sia nu o. Enye dzɔdzɔmeŋutinunyagbalẽ nyuitɔwo dometɔ ɖeka si mexlẽ kpɔ tso nuwɔwɔ ŋu.” Emegbe nufialaa ɖe nu me be yedi be yeazã Creation-gbalẽa kpe ɖe yewoƒe sukunusrɔ̃gbalẽ ŋu le ƒea ƒe sukudeɣi eve siwo gbɔna me eye wòbia tso sukuviawo si be woaxɔ agbalẽa ƒe ɖewo tso sukuvi Ðasefoa gbɔ. Wona agbalẽ gbogbo aɖewo, eye sukuvi geɖewo trɔ woƒe susu le alesi wobua Yehowa Ðasefowoe ŋu!

Xɔse si Wodo Kpɔ Nyea Xɔse Sesẽ

Enye nyateƒe be ɣeaɖewoɣi la, àtsi dzodzodzoe le ɖokuiwò me le ame gbogbo siwo ƒe dzixɔse mewɔ ɖeka kple wò Biblia me dzixɔsewo ŋu o​—alo womenya woƒe asixɔxɔ o. (Tsɔe sɔ kple Psalmo 3:​2, 3.) Eyata nunya le eme be nàde ha kple amesiwo mia kpli wo miaƒe nugɔmesese kple dzixɔsewo nye ɖeka. (Lododowo 27:​17) Gake ne sɔhɛ siwo ƒe xɔse sɔ kple tɔwò mele wò suku nutome o ɖe?

Ne womeli o la, ke ɖo ŋku edzi be ye Xɔlɔ̃ vevitɔe nye Yehowa Mawu, eye ate ŋu alé wò ɖe te. Enɔ te ɖe Satana Abosam ƒe alɔmeɖenyawo nu ƒe akpe geɖe enye sia. Eyata míate ŋu aka ɖe edzi bliboe be Yehowa ƒe dzi kpɔa dzidzɔ ne ènɔ te sesĩe maʋãmaʋãe heʋli wò xɔse la ta. Esia wɔwɔ naa mɔnukpɔkpɔe be ‘wòaɖo nya ŋu na Satana amesi le alɔme ɖem le eŋu.’​—Lododowo 27:⁠11.

Enye nusi wòle be nàkpɔ mɔ na be ɣeaɖewoɣi la, woado wò xɔse akpɔ. (Timoteo II, 3:​12) Gake apostolo Petro ka ɖe edzi na mí be woakpɔ míaƒe xɔse ƒe dodokpɔ be “exɔ asi geɖe wu sika, si gblẽna, wònye wodoe kpɔ kple dzo hafi.” (Petro I, 1:⁠7) Le esia ta ne wodo vlo wò ɖe wò xɔse ta la, bui be enye mɔnukpɔkpɔ si nàtsɔ ado ŋusẽ wò xɔse eye nàtsɔ aɖe wò dzidodo afiae. Apostolo Paulo ŋlɔe be dzidodo “dzia kelili.” (Romatɔwo 5:​3-⁠5) Ẽ, didi be yeadze Yehowa ŋu nye ŋusẽdoamenu si nu sẽ si akpe ɖe ŋuwò be nànɔ te ɖe enu ne woɖu fewu le ŋuwò ɖe wò xɔse ta!

[Etenuŋɔŋlɔwo]

[Nɔnɔmetata si le axa 13]

Ðe nàte ŋu aʋli wò xɔse taa?