Nyuiwɔwɔ le Xexe si me Vɔ̃wɔwɔ Xɔ Aƒe Ðo Me

“Miwɔ nuwo katã liʋiliʋilili kple ɖikeke manɔmee, bena miazu mokaka manɔŋutɔwo kple ame dzadzɛwo, mawuvi, siwo nye ame maɖifɔwo le dzidzime gɔglɔ̃ totro kpaɖikpaɖi titina.”—FILIPITƆWO 2:14, 15.

 1, 2. Nukatae Mawu ɖe gbe be woatsrɔ̃ Kanaanitɔwo ɖa?

YEHOWA ƒe sewo meɖe mɔ be woatsɔ nyui kple vɔ̃ atsaka o. Esi wòsusɔ vie ko Israel-viwo naɖo Ŋugbedodonyigba la dzi la, nyagblɔɖila Mose gblɔ na wo be: “[Tsrɔ̃] Xititɔwo, Amoritɔwo, Kanaanitɔwo, Perizitɔwo, Xiwitɔwo kple Yebusitɔwo gbidigbidi, abe alesi Yehowa, wò Mawu, de se na wò ene.”—Mose V, 7:2; 20:17.

² Esi wònye Mawu si kpɔa nublanuie Yehowa nye la, nukatae wòɖe gbe be woatsrɔ̃ Kanaanitɔwo gbidigbidi? (Mose II, 34:6) Nusiwo tae ƒe ɖee nye be ‘ne Kanaanitɔwo magava fia ŋunyɔnu siwo katã wowɔna na woƒe mawuwo la wɔwɔ Israel-viwo eye woawɔ nuvɔ̃ ɖe Yehowa Mawu ŋu o.’ (Mose V, 20:18) Mose gagblɔ be: “Dukɔ sia ƒe vɔ̃ɖivɔ̃ɖi ta Yehowa, wò Mawu, nyã wo ɖa le ŋgɔwò.” (Mose V, 9:5) Kanaanitɔwo megblẽ vɔ̃wɔwɔ ƒe akpa aɖeke ɖi o. Gbɔdɔdɔ ƒe nutovowɔwɔ kple trɔ̃subɔsubɔ nye woƒe subɔsubɔ ƒe akpa vevi aɖe. (Mose II, 23:24; 34:12, 13; Mose IV, 33:52; Mose V, 7:5) Ƒometɔ kpamkpam gbɔdɔdɔ, ŋutsu kple ŋutsu alo nyɔnu kple nyɔnu gbɔdɔdɔ kple gbɔdɔdɔnuwɔna tovo bubuwo, kpakple lãwo gbɔdɔdɔ nye ‘Kanaanitɔwo ƒe agbenɔnɔ.’ (Mose III, 18:3-25) Wotsɔa ŋutasesẽ tsɔa ɖevi maɖifɔwo saa vɔe na alakpamawuwo. (Mose V, 18:9-12) Eyata mewɔ nuku o be Yehowa bui be dukɔ siawo ƒe anyinɔnɔ ɖeɖe kura nye afɔku na yeƒe dukɔa ƒe ŋutilã me, agbenɔnɔ, kple gbɔgbɔ me nyonyo!—Mose II, 34:14-16.

 3. Nukae dzɔ le esi Israel-viwo mewɔ ɖe Mawu ƒe gbeɖeɖe be woatsrɔ̃ Kanaan-nyigbadzinɔlawo katã ɖa dzi o ta?

³ Esi Israel-viwo mewɔ ɖe Mawu ƒe gbeɖeɖewo dzi bliboe o ta la, Kanaanitɔ geɖewo gatsi anyi le woƒe Ŋugbedodonyigba la xɔxɔ vɔ megbe. (Ʋɔnudrɔ̃lawo 1:19-21) Esi ɣeyiɣiawo va nɔ yiyim la, Kanaanitɔwo ƒe nuwɔnawo va nɔ ŋusẽ kpɔm ɖe wo dzi vivivi, eye wote ŋu gblɔ be: “[Israel-viwo do] vlo [Yehowa ƒe] ɖoɖowo kple nu, si wòbla kple wo fofowo kpakple eƒe se, si wòde na wo la, eye wowɔ yakanuwo hezu ame ɖigbɔwo, eye wodze dukɔ, siwo ƒo xlã wo la yome, evɔ wònye Yehowa de se na wo be, womegawɔ abe woawo ene o hafi.” (Fiawo II, 17:15) Nyateƒee, esi ƒeawo va nɔ yiyim la, Israel-viwo va nɔ nusiwo tututu na Mawu ɖe gbe be woatsrɔ̃ Kanaanitɔwo la wɔm—trɔ̃subɔsubɔ, gbɔdɔdɔ ƒe nugbɔmewo wɔwɔ, kple ɖeviwo tsɔtsɔ sa vɔe gɔ̃ hã!—Ʋɔnudrɔ̃lawo 10:6; Fiawo II, 17:17; Yeremya 13:27.

 4, 5. (a) Nukae dzɔ ɖe Israel kple Yuda mawɔnuteƒewo dzi? (b) Nuxlɔ̃amenya kae wogblɔ ɖe Filipitɔwo 2:14, 15, eye nyabiabia kawoe fɔ ɖe te?

⁴ Eyata nyagblɔɖila Hosea gblɔ be: “Israel-viwo, mise Yehowa ƒe nya, Yehowa le dzre hem kple anyigbadzitɔwo, elabena nuteƒewɔwɔ, lɔlɔ̃ kple sidzedze Mawu mele anyigba dzi o. Wole atam dzodzro kam, eye wole alakpa dam, wole ame wum, wole fi fim, eye wole ahasi wɔm, wole kpɔ dzem, eye hlɔ̃dodo tsiã ɖe wo nɔewo nu. Eyata anyigba axa nu, eye nu ati kɔ na edzinɔlawo katã, eye woatsrɔ̃ gbemelãwo, dziƒoxewo kple keke atsiaƒumelãwo ke hã.” (Hosea 4:1-3) Le ƒe 740 D.M.Ŋ. me la, Assyria va ɖu Israel ƒe dziehe fiaɖuƒe gbegblẽ la dzi keŋkeŋ. Le ƒe alafa ɖeka kple nu vi aɖe megbe la, Babilon ɖu Yuda ƒe anyiehe fiaɖuƒe mawɔnuteƒea dzi.

⁵ Nudzɔdzɔ siawo fia alesi gbegbe wònye afɔkui be míaɖe mɔ vɔ̃wɔwɔ naɖu mía dzi. Mawu nyɔ ŋu numadzɔmadzɔwɔwɔ eye maɖe mɔ ɖe eŋu le eƒe amewo dome o. (Petro I, 1:14-16) Nyateƒee, ‘fifi nuɖoanyi vɔ̃ɖi’ la si nye xexe si le gbegblẽm ɖe edzi ɖaa mee míele. (Galatiatɔwo 1:4; Timoteo II, 3:13) Togbɔ be ele alea hã Mawu ƒe Nya la xlɔ̃ nu Kristotɔwo vevie be woaɖɔ ŋu ɖo ale gbegbe be woanye “mokaka manɔŋutɔwo kple ame dzadzɛwo, mawuvi, siwo nye ame maɖifɔwo le dzidzime gɔglɔ̃ totro kpaɖikpaɖi titina, amesiwo dome [woklẽna] le abe akaɖiwo ene le xexeame.” (Filipitɔwo 2:14, 15) Gake aleke míawɔ alé nyuiwɔwɔ me ɖe asi le xexe si me vɔ̃wɔwɔ tso aƒe ɖo me? Ðe wòanya awɔ ŋutɔŋutɔa?

Romatɔwo ƒe Xexe si me Vɔ̃wɔwɔ Tso Aƒe Ðo

 6. Nukatae nyuiwɔwɔ menɔ bɔbɔe na ƒe alafa gbãtɔ me Kristotɔwo o?

⁶ Nyuiwɔwɔ menɔ bɔbɔe na ƒe alafa gbãtɔ me Kristotɔwo o elabena vɔ̃wɔwɔ xɔ Romatɔwo ƒe agbenɔnɔ ƒe akpa sia akpa. Romatɔ nunyafiala Seneca gblɔ le eŋɔlimetɔwo ŋu be: “Amewo kea nu vɔ̃ɖi wɔwɔ ƒe ɖi wo nɔewo ŋkubiãtɔe. Vɔ̃wɔwɔ ƒe ame dzodzro tsina ɖe amewo me gbesiagbe, vɔvɔ̃ na ewɔwɔ dzi ɖena kpɔtɔna.” Etsɔ Romatɔwo sɔ kple “gbemelã wɔadãwo.” Eyata mewɔ nuku be Romatɔwo tsɔa yivuwɔwɔ kple gbegblẽnuwɔnawo kpɔkpɔ le fefewɔƒe doa dzidzɔ na wo ɖokui le woƒe modzakaɖeɖewo me o.

 7. Aleke Paulo ƒo nu tso nu gbegblẽ siwo ame geɖe wɔna le ƒe alafa gbãtɔ M.Ŋ. me ŋui?

⁷ Anye amewo ƒe gbegblẽ le ƒe alafa gbãtɔ mee nɔ susu me na apostolo Paulo esi wòŋlɔ be: “Mawu tsɔ wo de asi na ahɔhlɔ̃bɔbɔ yomenɔnɔ; elabena woƒe nyɔnuwo tsɔ dzɔdzɔme ƒe kɔnu wɔ nusi mele dzɔdzɔme nu o; nenema ke woƒe ŋutsuwo hã gblẽ nyɔnuwo ƒe dzɔdzɔmekɔnu ɖi, eye wofiã le woƒe fiẽŋufiẽŋui me ɖe wo nɔewo ŋu, eye ŋutsu kple ŋutsu wɔ ŋukpenanuwo, eye wokpɔ woƒe vodada ŋuti fetu, si dze wo la, le wo ɖokui ŋu.” (Romatɔwo 1:26, 27) Esi Romatɔwo ɖoe be ŋutilãmenudzodzro makɔmakɔwo yome koe yewoanɔ ta la, ena vɔ̃wɔwɔ xɔ aƒe ɖe wo me.

 8. Aleke blema Hela kple Roma tɔwo lɔ̃a ɖeviwo gbegblẽe?

⁸ Womegblɔ alesi ŋutsu kple ŋutsu alo nyɔnu kple nyɔnu ƒe dɔdɔ bɔe ɖe Romatɔwo domee ya o. Gake ɖikekemanɔmee la, wo tɔ Helatɔ agbe ma nɔlawo, siwo dome nu ma wɔwɔ bɔ ɖo fũ ƒe nuwɔnawoe gblẽ wo. Ebɔ be ŋutsu tsitsiwo nagblẽ ŋutsuviwo, woxɔa wo ale be wo dome va nɔna abe sukuvi kple eƒe nufiala tɔ ene eye zi geɖe la, woblea ɖeviawo dea gbɔdɔdɔgbenɔnɔ tovowo me. Ðikekemanɔmee la, Satana kple eƒe gbɔgbɔ vɔ̃woe le megbe na gbegblẽ kple vɔ̃wɔwɔ ɖe ɖeviwo ŋu alea.—Yoel 4:3; Yuda 6, 7.

 9, 10. (a) Aleke Korintotɔwo I, 6:9, 10 tsi tre ɖe vɔ̃wɔwɔ ƒomevi vovovo ŋui? (b) Aleke Korinto-hamea me tɔ aɖewo nɔ tsã, eye tɔtrɔ kawoe wowɔ?

⁹ Esi apostolo Paulo nɔ agbalẽ ŋlɔm le Mawu ƒe gbɔgbɔ ƒe ameʋaʋã te la, egblɔ na Kristotɔ siwo nɔ Korinto be: “Alo mienyae bena, ame madzɔmadzɔwo manyi mawufiaɖuƒe la ƒe dome oa? Migana woable mi o: Ahasiwɔlawo kple trɔ̃subɔlawo kple matrewɔlawo kple hadzelawo kple ŋutsu, siwo dɔna kple ŋutsuwo, kple fiafitɔwo kple ŋubiãlawo kple ahamulawo kple busubɔlawo kple adzodalawo la womanyi mawufiaɖuƒe la ƒe dome o. Eye nenem mia dome ame aɖewo nɔ tsã; ke wole tsi na mi, ke wona mia ŋuti kɔ, ke wotso afia na mi le Aƒetɔ Yesu ƒe ŋkɔ la kple mía Mawu ƒe Gbɔgbɔ la me.”—Korintotɔwo I, 6:9-11.

¹⁰ Eyata Paulo tsi tre ɖe gbɔdɔdɔ ƒe agbegbegblẽnɔnɔ ŋu le eƒe lɛta si tso gbɔgbɔ me la me, esi wògblɔ be “ahasiwɔlawo” ‘manyi mawufiaɖuƒe la ƒe dome o.’ Gake esi Paulo yɔ nu gbegblẽawo dometɔ geɖe vɔ la, egblɔ be: “Nenem mia dome ame aɖewo nɔ tsã; ke wole tsi na mi, ke wona mia ŋuti kɔ.” To Mawu ƒe kpekpeɖeŋu me la, vɔ̃wɔlawo ŋuti te ŋu kɔ le eŋkume.

11. Aleke nuwo nɔ na ƒe alafa gbãtɔ me Kristotɔwo le vɔ̃wɔwɔ siwo ƒo xlã wo me le woƒe ŋkekea me?

¹¹ Ẽ, Kristotɔwo kpɔ dzidzedze nyui le nyuiwɔwɔ me le ƒe alafa gbãtɔ si me vɔ̃wɔwɔ bɔ ɖo me ke hã. Xɔsetɔwo ƒe ‘nɔnɔme trɔ esi wowɔ woƒe tamesusu yeyee.’ (Romatɔwo 12:2) Woɖe asi le ‘agbe si wonɔ tsã’ ŋu eye ‘wowɔ wo yeyee le ŋusẽ si ʋãa woƒe tamesusu me.’ Esia wɔe be wosi le xexeame ƒe vɔ̃wɔwɔwo nu eye ‘wodo amenyenye yeye si wowɔ le Mawu ƒe lɔlɔ̃nu nu le dzɔdzɔenyenye kple nuteƒewɔwɔ vavãtɔ me.’—Efesotɔwo 4:22-24.

Egbexexe si me Vɔ̃wɔwɔ Tso Aƒe Ðo

12. Aleke nuwo trɔe le xexeame katã tso ƒe 1914 me?

¹² Ke míaƒe ŋkekea me hã ɖe? Vɔ̃wɔwɔ yɔ xexe si me míele gbagba fifia wu ɣeyiɣi ɖesiaɖe. Tso ƒe 1914 me koŋ la, gbegblẽm ɖe edzi koe amewo ƒe agbenɔnɔ le le afisiafi. (Timoteo II, 3:1-5) Esi ame geɖe gbe nusi nye amewo ƒe susu le nyuiwɔwɔ, agbenyuinɔnɔ, nusi ŋu bubu le, kple gɔmeɖose dzɔdzɔewoe ŋu tso gbaɖegbe ke ta la, nusi dze woawo ŋutɔ ɖokui ŋu ko wobuna eye “woƒe dzitsinya ku atri.” (Efesotɔwo 4:19) Newsweek magazine gblɔ be: “Míele ɣeyiɣi si me amewo ɖoa agbenɔnɔdzidzenu na wo ɖokui me,” eye wògagblɔ kpee be amewo ƒe agbenɔnɔ fifia “va zu nusi dze ame ŋu, ame ŋutɔ ƒe seselelãme alo be nusi ame detɔwo wɔna ye afia nusi nye nyui kple nusi nye vɔ̃.”

13. (a) Aleke egbe modzakaɖeɖe ƒe akpa gã aɖe de vɔ̃wɔwɔ dzii? (b) Ŋusẽ vɔ̃ kae modzakaɖeɖe gbegblẽ ate ŋu akpɔ ɖe ame dzi?

¹³ Abe ƒe alafa gbãtɔ me ene la, modzakaɖeɖe gbegblẽwo bɔ egbea. Television, radio, sinima, kple video, wo katã wonɔa nya siwo do ƒome kple gbɔdɔdɔ gbɔgblɔ dzi. Vɔ̃wɔwɔ va ge ɖe kɔmpiuta dzi nyatakakananawo ke hã me. Yunivɛsiti aɖe ƒe numekuku gblɔ be fifia agbegbegblẽnɔnɔ ɖeɖefia le kɔmpiuta dzi va zu “kɔmpiuta dzi nyatakakaxɔlawo ƒe modzakaɖenu vevitɔwo dometɔ ɖeka (ne menye eyae nye vevitɔ o ye nye ema).” Ŋusẽ ka kpɔm esiawo katã le ɖe amewo dzi? Nyadzɔdzɔŋlɔla aɖe gblɔ be: “Ne wotrɔ ʋukɔkɔɖi kple anyrawɔwɔ kple gbɔdɔdɔ si ŋu woklo bubu le kɔ ɖe nu vevi siwo me míesrɔ̃a agbenɔnɔ le me wòyɔ gbagba la, ʋukɔkɔɖi kple anyrawɔwɔ kple gbɔdɔdɔ si ŋu woklo bubu le va mãa mí. Eƒe mía mamã naa eƒe nuvɔ̃nyenye megadzena na mí o. Vivivi la, míeva nɔa mɔ ɖem ɖe nutovowo wɔwɔ ŋu elabena vivivi la, megablea fu lãme na mí o.”—Tsɔe sɔ kple Timoteo I, 4:1, 2.

14, 15. Kpeɖodzi kae li be amewo ƒe agbenɔnɔ ƒaƒã le gbɔdɔdɔnyawo me le afisiafi?

¹⁴ Se nyatakaka sia si dze le The New York Times me ɖa: “Nusi woabu ŋukpenyae ƒe 25 siwo va yi la va zu agbenɔnɔ si dzi woda asi ɖo. Ŋutsu kple nyɔnu siwo ŋu wòdze be yewoanɔ yewo nɔewo gbɔ srɔ̃maɖemaɖee tsɔ wu be yewoaɖe yewo nɔewo la dzi ɖe edzi ɖo alafa memamã 80 [le United States] le ƒe 1980 kple 1991 dome.” Menye Dziehe Amerika tɔwo ɖeɖeko ƒe nyae o. Asiaweek magazine gblɔ be: “Agbenɔnɔ ŋuti nyaʋiʋli aɖe le edzi yim le [Asia] ƒe afisiafi. Nya si ʋlim wole ye nye woaɖe mɔ ɖe gbɔdɔdɔ ŋu gbadzaa loo alo woanɔ anyi abe alesi wonɔa agbee tsã ene, eye nyaƒoƒoɖeamenu be woatrɔ nuwo le dzidzim ɖe edzi ɖaa.” Akɔntabubuwo fia be amesiwo ƒe xexlẽme le dzidzim ɖe edzi le asi dam ɖe ahasiwɔwɔ kple gbɔdɔdɔ do ŋgɔ na srɔ̃ɖeɖe dzi le dukɔ geɖe me.

¹⁵ Biblia gblɔe ɖi be Satana ƒe ŋku abiã le míaƒe ŋkekea me. (Nyaɖeɖefia 12:12) Esi wòle alea ta la, mele be wòawɔ nuku na mí be vɔ̃wɔwɔ do agbogbo alea gbegbe o. Le kpɔɖeŋu me, ɖeviwo gbɔdɔdɔ va bɔ wu gbɔgblɔ.a Dukɔ Ƒoƒua ƒe Ðeviwo ƒe Nyagbɔkpɔha ka nya ta be “gbɔdɔdɔ tsɔtsɔ tsa asii le nu gblẽm le ɖeviwo ŋu le xexemedukɔ ɖesiaɖe kloe me.” Ƒe sia ƒe “ɖevi siwo dzi wogblɔ be wozina dea gbolowɔwɔ me wu miliɔn 1, wokplɔa wo dzonae yina ɖe dukɔ bubuwo me va dzrana be woawɔ gbolo, eye wozãa wo tsɔ wɔa ɖeviwo ƒe agbegbegblẽnɔnɔgbalẽwo alo sinimawoe.” Ŋutsu kple ŋutsu ƒe dɔdɔ kple nyɔnu kple nyɔnu tɔ hã bɔ, eye dunyahela kple subɔsubɔhaŋgɔnɔla aɖewo xɔa ŋgɔ nɔa edzi dem be “agbenɔnɔmɔnu bubu” koe eya hã nye.

Xexeame ƒe Vɔ̃wɔwɔwo Tsitsri

16. Aleke Yehowa Ðasefowo wɔa nui le gbɔdɔdɔ ƒe agbenyuinɔnɔ me?

¹⁶ Yehowa Ðasefowo mewɔa ɖeka kple amesiwo daa asi ɖe gbɔdɔdɔgbe ɖesiaɖe si dze ame ŋu ko nɔnɔ dzi o. Tito 2:11, 12 gblɔ be: “Mawu ƒe amenuveve la ɖe eɖokui fia hetsɔ xɔxɔ vɛ na amewo katã, eye wòhea mí, bena míagbe mawumavɔ̃mavɔ̃ kple xexeame nudzodzrowo, eye míanɔ anyi le ɖokuidziɖuɖu kple nu dzɔdzɔe wɔwɔ kpakple mawusosroɖa me le xexe sia me.” Nyateƒee, míesrɔ̃a alesi míalé fu vɔ̃wɔwɔ siawo abe gbɔdɔdɔ do ŋgɔ na srɔ̃ɖeɖe, ahasiwɔwɔ, kple ŋutsuwo ɖeɖe alo nyɔnuwo ɖeɖe ƒe dɔdɔ ene vevie, míenyɔa ŋu wo ŋutɔ.b (Romatɔwo 12:9; Efesotɔwo 5:3-5) Paulo xlɔ̃ nu vevie be: “Amesiame, si yɔa Aƒetɔ ƒe ŋkɔ la, nate ɖa le madzɔmadzɔnyenye gbɔ.”—Timoteo II, 2:19.

17. Aleke Kristotɔ vavãtɔwo bua ahasesẽnonoe?

¹⁷ Kristotɔ vavãtɔwo mexɔa xexeame ƒe susu le vɔ̃ siwo adze nu tsɛe me o. Le kpɔɖeŋu me, ame geɖe tsɔa ahatsunono fefee. Gake Yehowa ƒe amewo ya wɔna ɖe nuxlɔ̃ame si le Efesotɔwo 5:18 dzi, si gblɔ be: “Migamu aha, esi me nu baɖabaɖa wɔwɔ le la o; ke boŋ Gbɔgbɔ la nayɔ mi fũ.” Ne Kristotɔ aɖe be yeano aha la, enonɛ megbɔa eme o.—Lododowo 23:29-32.

18. Aleke Biblia ƒe gɔmeɖosewo fiaa mɔ Yehowa subɔlawoe le nuwɔwɔ ɖe woƒe ƒometɔwo ŋu me?

¹⁸ Mí Yehowa subɔlawo míexɔa xexeametɔ aɖewo siwo gblɔna be bublu kple aƒadodo ɖe ame srɔ̃ kple ame viwo ta alo wo dzudzu alo nya veamewo gbɔgblɔ ɖe wo ŋu nyo hã o. Esi Kristotɔ srɔ̃ŋutsuwo kple srɔ̃nyɔnuwo ɖoe kplikpaa be yewoanɔ nyuiwɔwɔ yome ta la, wodzea agbagba ɖekae wɔna ɖe aɖaŋu si Paulo ɖo dzi, be: “Mina woaɖe veve heliheli kple dɔmedzoe kple dziku kple ɣlidodo kple busubɔbɔ katã kpakple nu tovo wɔwɔ katã ɖa le mia dome. Ke mikɔ dɔme ɖe mia nɔewo ŋu, eye miaƒe dɔme natrɔ ɖe mia nɔewo ŋu, eye mitsɔ ke mia nɔewo, abe alesi Mawu tsɔ ke mi le Kristo me la ene.”—Efesotɔwo 4:31, 32.

19. Aleke nugbegblẽwɔwɔ va bɔe ɖe asitsalawo dome?

¹⁹ Anukwaremaɖimaɖi, ayemefififi, aʋatsokaka, amebaba ƒe asitsamɔnuwo kple fi hã bɔ egbea. Asitsatsa magazine si nye CFO me nyati aɖe gblɔ be: “Numekuku aɖe si wowɔ le dɔwɔla 4,000 gbɔ . . . fia be amesiwo wobia nyae dome ame 31 le alafa me kpɔ ‘nugbegblẽwɔwɔ gã’ aɖe teƒe le ƒe si do ŋgɔ me.” Nu gbegblẽ siawo ƒe ɖewoe nye alakpadada, nuŋlɔɖiwo tɔtrɔ, gbɔdɔdɔ tsɔtsɔ ɖe fu na amee, kple fififi. Ne míedi be míanɔ dzadzɛ le Yehowa ŋkume la, ele be míatsri agbe siawo tɔgbe nɔnɔ eye míaɖi anukware le ganyawo me.—Mixa 6:10, 11.

20. Nukatae mele be Kristotɔwo ‘nalɔ̃ ga o’?

²⁰ Bu nusi dzɔ ɖe ŋutsu aɖe si susu be yeakpɔ vovo ɖe Mawu ƒe dɔa ŋu wu ne yewɔ ga gbogbo aɖe zi ɖeka le asitsadɔ aɖe me dzi la ŋu kpɔ. Ena ame geɖe de ga dɔ aɖe me eye wòdzi viɖe si woakpɔ ɖe edzi yi ŋgɔ nyuie. Esi agbaɖuɖu va la, etsi dzi ɖe fe gbogbo si wòɖu la xexe ŋu ale gbegbe be wòfi ga si woda ɖe egbɔ. Ðe nuwɔna siawo kple eƒe dzimematrɔmatrɔ ta la, woɖee le Kristo-hamea me. Nyateƒe tututue Biblia to esi wòxlɔ̃ nu be: “Amesiwo dina be yewoazu kesinɔtɔwo la, gena ɖe tetekpɔwo kple mɔ̃tetrewo kpakple movidzɔdzɔ kple nuveviwɔame ƒe nudzodzro geɖe, siwo tsɔa amewo xlãna ɖe gbegblẽ kple tsɔtsrɔ̃ me la me. Elabena nuvɔ̃wo katã ƒe ke enye galɔlɔ̃, si yome mɔ ame aɖewo di, eye wotre mɔ tso xɔse la gbɔ, eye wotsɔ nuxaxa geɖe ŋɔ wo ɖokui flofloflo.”—Timoteo I, 6:9, 10.

21. Nuwɔna kae bɔ ɖe amesiwo le ŋusẽnɔƒewo le xexeame dome, gake aleke amesiwo le agbanɔamedzinɔƒewo le Kristo-hamea me wɔa nui?

²¹ Zi geɖe la, xexemetɔ siwo le ŋusẽ alo bubu nɔƒewo mete ŋu wɔa nyui o eye wonaa nyagbɔgblɔ si nye be ‘Ŋusẽ ɖe wògblẽa ame’ ƒe nyateƒenyenye dzena. (Nyagblɔla 8:9) Le dukɔ aɖewo me la, zãnuxɔxɔ kple nufitifitiwɔwɔ ƒomevi bubuwo zu numãme na ʋɔnudrɔ̃lawo, kpovitɔwo, kple dunyahelawo. Gake ele be amesiwo xɔa ŋgɔ le Kristo-hamea me nanye nyuiwɔlawo eye womegaɖu aƒetɔ ɖe ame dzi o. (Luka 22:25, 26) Menye “viɖe ƒoɖi ta” hamemegãwo kpakple subɔsubɔdɔwɔlawo siaa subɔna ɖo o. Mele be wòanɔ wo me be woadi be yewoatrɔ gbo nyadɔdrɔ̃wo le esi wosusu be ɖuɖu anɔ eme na yewo ta alo woana esia nakpɔ ŋusẽ ɖe wo dzi o.—Petro I, 5:2; Mose II, 23:8; Lododowo 17:23; Timoteo I, 5:21.

22. Nuka mee míadzro le nyati si kplɔe ɖo me?

²² Ne míagblɔe gbadzaa la, Kristotɔwo te ŋu le te nɔm ɖe nyuiwɔwɔ me léle ɖe asi ƒe kplamatsedonu siwo le xexe si me vɔ̃wɔwɔ xɔ aƒe ɖo me la nu egbea. Gake nyuiwɔwɔ mefia nu vɔ̃ɖiwo tsitsri ko evɔ o. Míadzro nusi nyuiwɔwɔ tutuɖo bia la me le nyati si kplɔe ɖo me.

[Etenuŋɔŋlɔwo]

Nya Veviawo Me Dzodzro

◻ Nukatae Mawu ɖe gbe be woatsrɔ̃ Kanaanitɔwo gbidii?

◻ Nugbegblẽwɔwɔ kawoe bɔ le ƒe alafa gbãtɔ me, eye aleke nuwo nɔ na Kristotɔwo le nɔnɔme mawo me?

◻ Kpeɖodzi kae li be amewo ƒe agbenɔnɔ le gbegblẽm ɖe edzi tso ƒe 1914 me ke?

◻ Vɔ̃wɔwɔ siwo bɔ kawoe wòle be Yehowa ƒe amewo natsri?

[Nɔnɔmetata si le axa 9]

Ƒe alafa gbãtɔ me Kristotɔwo nye nyuiwɔlawo, togbɔ be xexe si me vɔ̃wɔwɔ xɔ aƒe ɖo mee wonɔ hã

[Nɔnɔmetata si le axa 10]

Vɔ̃wɔwɔ va ge ɖe kɔmpiuta dzi nyatakakawo ke hã me eye wòfiaa agbegbegblẽnɔnɔ nuwɔnawo ɖeviwo kple ame bubuwo

[Nɔnɔmetata si le axa 12]

Ele be Kristotɔwo nanye nyuiwɔlawo, womegasrɔ̃ ame bubuwo ƒe anukwaremaɖimaɖi nuwɔnawo o