Ðe Xexeame ƒe Gbɔgbɔ Le Aɖi Dem Lãme na Wòa?

NANE wó le mɔ̃ɖaŋudɔwɔƒe aɖe le Kazakstan le September 12, 1990 dzi. Etú aɖiya vɔ̃ɖi aɖewo ɖe yame, si ate ŋu agblẽ nu le afimanɔla 120,000 ƒe lãmesẽ ŋu, eye ameawo dometɔ geɖe lɔ gbɔ tsi tre ɖe aɖi wuamea ŋu.

Gake esi numekɔkɔ geɖe va nɔ wo si sum la, wova kpɔe be aɖi mee yewole ƒe geɖe. Le ƒe geɖe siwo va yi me la, wotsɔ aɖiɖuɖɔ tɔn 100,000 ƒu gbe ɖe gbadzaƒe aɖe bemalémalétɔe. Togbɔ be afɔkunua de xa ɖe wo ŋu hã la, ame aɖeke mebu eŋu o. Nukatae?

Gbesiagbe la, tatɔwo va klãa aɖi agbɔsɔsɔme si wobu be ele yame ŋuti nyatakaka ɖe dua ƒe lãmesẽfefewɔƒe, si na wosusui be nya vɔ̃ aɖeke madzɔ o. Akɔntabubua de pɛpɛpɛ, gake ya si nye gamma agbɔsɔsɔme si kaka ɖe yame koe wòfiana. Alpha si kaka ɖe yame, si ƒe akɔnta womebu o la ate ŋu awu ame nenema ke. Vinɔ geɖe va kpɔ nusita wo viwo nɔ dɔ dzem nenema gbegbe la azɔ.

Aɖi makpɔmakpɔ aɖe ate ŋu age ɖe míawo hã míaƒe lãme le gbɔgbɔ me. Eye ame akpa gãtɔ menya nu tso afɔku sia si ate ŋu awu wo la ŋu o, abe alesi nublanuitɔ siwo nɔ Kazakstan hã menyae o ene. Menye ame aɖeke wu Satana Abosam ye le aɖi sia si Biblia yɔ be “xexeme ƒe gbɔgbɔ” la kakam o. (Korintotɔwo I, 2:12) Mawu ƒe Futɔ sia si ɖo tame vɔ̃ la le xexeame ƒe gbɔgbɔ sia—alo agbenɔnɔ si bɔ—zãm be yeatsɔ agblẽ míaƒe mawusosroɖa me.

Aleke xexeame ƒe gbɔgbɔ awɔ axɔ míaƒe gbɔgbɔ me ŋusẽ le mía si? Ana nusiwo ŋku kpɔna nadzro mí eye azã mía ɖokui tɔ didi si míedzɔ kplii hã. (Efesotɔwo 2:1-3; Yohanes I, 2:16) Abe kpɔɖeŋu ene la, míalé ŋku ɖe mɔ vovovo etɔ̃ siwo nu xexeame ƒe tamebubu ate ŋu agblẽ míaƒe gbɔgbɔmemenyenye me vivivii la ŋu.

Fiaɖuƒea Didi Gbãgbiagbã

Yesu ƒoe ɖe Kristotɔwo nu be ‘woadi Fiaɖuƒea kple Mawu ƒe dzɔdzɔenyenye gbãgbiagbã.’ (Mateo 6:33) Gake xexeame ƒe gbɔgbɔ ate ŋu atrɔ míaƒe susu ale be míava nɔ mía ŋutɔwo míaƒe nudidiwo kple dzidzeme ŋu bum wu alesi hiã. Menye asiɖeɖe le gbɔgbɔmenudidiwo ŋu dzie afɔkua dzea egɔme tsoe o, ke boŋ eɖoɖo nɔƒe evelia dzie wòtsona. Míate ŋu aŋe aɖaba aƒu afɔkua dzi—abe alesi Kazakstantɔwo wɔe ene—le esi míasusui vodadatɔe be míele dedie ta. Alesi míesubɔ nuteƒewɔwɔtɔe ƒe geɖe eye míekpɔa ŋudzedze ɖe míaƒe gbɔgbɔ me nɔviŋutsuwo kple nɔvinyɔnuwo ŋu la agbã ŋku na mí míasusu be madzɔ gbeɖe be míadzo le nyateƒemɔa dzi o. Anɔ eme be ame geɖe nɔ Efeso-hamea me siwo bui nenema.

Le ƒe 96 M.Ŋ. me lɔƒo la, Yesu gblɔ nuxlɔ̃menya si gbɔna la na wo be: “Mekpɔ nusia le ŋutiwò bena, nègblẽ wò gbã lɔlɔ̃ la ɖi.” (Nyaɖeɖefia 2:4) Kristotɔ siawo siwo subɔ ƒe geɖe la do dzi to kuxi sesẽ geɖe me. (Nyaɖeɖefia 2:2, 3) Hamemegã wɔnuteƒe geɖe ye fia nu wo, siwo dometɔ aɖee nye apostolo Paulo. (Dɔwɔwɔwo 20:17-21, 27) Gake esi ƒeawo va nɔ yiyim la, woƒe lɔlɔ̃ na Yehowa nu fa, eye woƒe gbɔgbɔ me ameʋãŋusẽa nu tsi.—Nyaɖeɖefia 2:5.

Anɔ eme be dua me ƒe asitsatsa kple nudzedziname ye kpɔ ŋusẽ ɖe Efesotɔawo dometɔ aɖewo dzi. Nublanuitɔe la, ŋutilãmenudidi ƒe ya si le ƒoƒom le egbe xexeame la kplɔ Kristotɔ aɖewo trae nenema ke. Ne míeɖoe kplikpaa be míaɖu agbe la, ana míatra tso gbɔgbɔmetaɖodzinuwo ŋu godoo.—Tsɔe sɔ kple Mateo 6:24.

Esi Yesu nɔ nu xlɔ̃m le afɔku sia ŋu la, egblɔ be: “Ame blibo la ƒe akaɖi enye ŋku; ne wò ŋku dzi dza la, wò ame blibo la katã me lakɔ. Ke ne ŋku vɔ̃ [“biãŋu,” NW ƒe etenuŋɔŋlɔ] li na wò la, wò ame blibo la katã me lado viviti.” (Mateo 6:22, 23) Ŋku si dzi “dza” nye ŋku si le gbɔgbɔmenuwo dzi, ŋku si wofɔ ɖe Mawu Fiaɖuƒea dzi. Gake ŋku “vɔ̃” alo ŋku “biãŋu” mekpɔa nu dea didiƒe o, ŋutilãmenudzroame siwo ƒo xlãe koe wòkpɔna. Gbɔgbɔmetaɖodzinuwo kple etsɔme teƒeɖoɖowo metsɔ ɖe eƒe nukpɔkpɔ gbɔ o.

Yesu gblɔ le kpukpui si do ŋgɔ me be: “Afisi wò nu nyui le la, afima wò dzi hã lanɔ.” (Mateo 6:21) Aleke míawɔ anya be míaƒe dzi ku ɖe gbɔgbɔmenuwo ŋu loo alo ŋutilãme tɔwo ŋu? Esi wònye be ‘nya si ke wu dzi lae nu gblɔna’ ta la, ɖewohĩ míaƒe dzeɖoɖo mee míate ŋu akpɔe le wu. (Luka 6:45) Ne míekpɔe be ŋutilãmenuwo kple nusiwo míete ŋu wɔ le xexeame ŋue míeƒoa nu tsoe ɣesiaɣi la, ke enye dzesi be míaƒe dzi me mã eye be míaƒe gbɔgbɔmeŋku mekpɔa nu nyuie o.

Carmen si nye nɔvinyɔnu Spaintɔ aɖe wɔ avu kple kuxi sia.a Carmen gblɔ be: “Nyateƒea mee wonyim le, gake nye ŋutɔ meɖo nye abɔdzokposuku esime mexɔ ƒe 18. Dɔwɔla ene va nɔ asinye le ƒe etɔ̃ megbe, dɔa nɔ afɔ tsɔm eye menɔ ga geɖe kpɔm. Gake ewɔ abe nusi dze ŋunye wue nye be nyemebiaa ga ame aɖeke o, eye ‘nu dze edzi’ nam. Mato nyateƒe be nye dɔa ŋue nye dzi ku ɖo—melɔ̃e wu nu bubu ɖesiaɖe.

“Mesusui be mate ŋu akpɔtɔ anye Ðasefo aganɔ nye ɣeyiɣi akpa gãtɔ zãm ɖe dɔwɔnyawo ŋu. Gake seselelãme aɖe nɔ fu ɖem nam ɣesiaɣi be mate ŋu asubɔ Yehowa geɖe awu hafi. Xɔlɔ̃ eve aɖewo siwo nye mɔɖelawo ƒe kpɔɖeŋue nye nusi va ƒlɔ dzo ɖe menye mlɔeba be meva ɖo Fiaɖuƒea ƒe nuwo nɔƒe gbãtɔ. Wo dometɔ ɖeka si nye Juliana nɔ míaƒe hamea me. Mezi mɔɖeɖedɔa wɔwɔ ɖe dzinye o, gake eƒe dzeɖoɖowo kple dzidzɔ si wònɔ kpɔkpɔm tso eƒe subɔsubɔdɔa me si dze ƒã la kpe ɖe ŋunye be megbugbɔ bu nye ŋutɔ ƒe gbɔgbɔmenu veviwo ŋu.

“Ɣeyiɣi aɖe le ema megbe esi meyi mɔkeke le United States la, menɔ Gloria si nye nɔvinyɔnu mɔɖela aɖe gbɔ. Srɔ̃a ku eteƒe medidi o, eye enɔ vianyɔnuvi si xɔ ƒe atɔ̃ kple dadaa si ŋu kansa nɔ la dzi kpɔm. Gake eganɔ mɔɖeɖedɔa wɔm. Eƒe kpɔɖeŋu kple alesi wòkpɔ ŋudzedze ɖe subɔsubɔdɔa ŋu tso dzi blibo me la ʋã dzi nam. Ŋkeke ene siwo va yi kaba siwo metsɔ nɔ eƒe aƒeme la wɔe be meɖoe kplikpaa be matsɔ nye nu nyuitɔ kekeake ana Yehowa. Mezu gbesiagbe mɔɖela gbã, eye le ƒe ʋee aɖewo megbe la, wokpe mía kple srɔ̃nye be míava wɔ dɔ le Betel. Meɖe asi le nye dɔ—si nɔ mɔ xem na nye gbɔgbɔ me ŋgɔyiyi—ŋu eye fifia mekpɔe be agbe dze edzi nam le Yehowa ƒe ŋkume, eye eyae le vevie wu.”—Luka 14:33.

Ne míesrɔ̃ alesi ‘míade dzesi nu vevitɔwo’ abe alesi Carmen wɔe ene la, akpe ɖe mía ŋu be míawɔ nyametsotso siwo me nunya le le míaƒe dɔwɔɖui, sukudede, xɔnyawo, kple agbenɔnɔ ŋu. (Filipitɔwo 1:10) Gake ɖe míedea dzesi nusiwo nye vevitɔwo le modzakaɖeɖe hã gomea? Go bubu si me xexeame ƒe gbɔgbɔ kpɔa ŋusẽ gã aɖe ɖe ame dzie nye esia.

Na Modzakaɖeɖe Nanɔ Afisi Sɔ Nɛ

Xexeame ƒe gbɔgbɔ toa ayeme zãa dzɔdzɔmedidi si le amewo me ɖe gbɔɖeme kple modzakaɖeɖe ŋu tsɔ gblẽa nui. Esi mɔkpɔkpɔ gbagbe aɖeke mele ame akpa gãtɔ si na etsɔme o ta la, eme kɔ be ele be woatsɔ modzakaɖeɖe kple ɖiɖiɖeme axɔ fifi ƒe ɣeyiɣi mee fũ. (Tsɔe sɔ kple Yesaya 22:13; Korintotɔwo I, 15:32.) Ðe míekpɔnɛ be míele kukum ɖe modzakaɖeɖe ŋu geɖe wua? Ema ate ŋu anye dzesi si fia be xexeame ƒe tamebubu le ŋusẽ kpɔm ɖe míaƒe nukpɔsusu dzi.

Biblia xlɔ̃ nu be: “Amesi lɔ̃a dzidzɔkpɔkpɔ [“modzakaɖeɖe,” Lamsa] la, azu hiãtɔ.” (Lododowo 21:17) Dzidzɔdodo na ame ɖokui megblẽ o, gake elɔlɔ̃, alo ebubu nu vevii wu nusianu, ana woada ahe le gbɔgbɔ me. Ana alesi gbɔgbɔmenuwo dzroa mí la nu afa godoo, eye ɣeyiɣi geɖe maganɔ mía si ɖe nyanyuia gbɔgblɔ ŋu o.

Susu sia tae Mawu ƒe Nya la ɖo aɖaŋu na mí be ‘míabla míaƒe tamesusuwo ƒe aliwo dzi, eye míaɖu mía ɖokui dzi bliboe.’ (Petro I, 1:13) Ðokuidziɖuɖu hiã hafi míate ŋu atso modzakaɖeɖe ƒe ɣeyiɣi dzi wòasɔ. Be míabla ali dzi ɖe dɔ ŋu fia be míanɔ dzadzraɖoɖi na gbɔgbɔmedɔ wɔwɔ, eɖanye nusɔsrɔ̃, kpekpewo dede, alo gbeadziyiyi o.

Ke gbɔɖeme si hiã ya ɖe? Ðe wòle be míasusu be míedze agɔ ne míezã ɣeyiɣi aɖe tsɔ ɖi ɖe emea? Kura o. Gbɔɖeme hiã, vevietɔ le egbe xexe si me nuteɖeamedzi bɔ ɖo me. Gake mele be mí Kristotɔ ɖeadzɔgbewo ƒe agbenɔnɔ naku ɖe modzakaɖeɖe sɔŋ ko ŋu o. Modzakaɖeɖe fũ akpa ate ŋu ana míaƒe lãme nafa ale be míava nɔ alɔgblɔdɔ wɔm le dɔ si ŋu viɖe le wɔwɔ ŋu vivivi. Ate ŋu ana míagakpɔ alesi nuwɔwɔ hiã kpatae la nyuie o, eye awɔe be míava nɔ agbe bliba nɔm gɔ̃ hã. Ke Aleke míawɔ be nukpɔsusu si da sɔ nanɔ mía si le gbɔɖeme ŋu?

Biblia ɖo aɖaŋu be míagbɔ ɖe eme vie tsɔ wu be míanɔ hloloe tsom kakaka—vevietɔ ne ŋutilãmedɔ si wɔm míele mehiã nenema gbegbe o. (Nyagblɔla 4:6) Togbɔ be gbɔɖeme wɔnɛ be ŋusẽ gaɖoa míaƒe ŋutilã ŋu hã la, Mawu ƒe dɔwɔŋusẽe naa gbɔgbɔmeŋusẽ ame. (Yesaya 40:29-31) Míaƒe Kristotɔwo ƒe dɔwo wɔwɔ mee míexɔa gbɔgbɔ kɔkɔe sia le. Ðokuisinusɔsrɔ̃ nyia míaƒe dzi eye wòtua dzodzro nyuiwo ɖo ɖe mía me. Kpekpewo dede tua ŋudzedzekpɔkpɔ ɖe mía Wɔla la ŋu ɖo. Gomekpɔkpɔ le Kristotɔwo ƒe subɔsubɔdɔa me nyɔa ɖetsɔtsɔ le amewo me ɖe mía me. (Korintotɔwo I, 9:22, 23) Abe alesi Paulo gblɔe nyateƒetɔe ene la, “ne míaƒe gotame gblẽna hã la, míaƒe ememe la zua yeye gbesiagbe.”—Korintotɔwo II, 4:16.

Ileana nye vinɔ si si vi ade le evɔ eganye srɔ̃ŋutsu dzimaxɔsetɔ srɔ̃ eye mevona le agbe me kura o. Ele be wòakpɔ eya ŋutɔ ƒe ƒomea me tɔwo kple ƒometɔ bubu geɖe dzi, si fia be ewɔ abe enɔa kplakplakpla dzi le afisiafi ɣesiaɣi ene. Ke hã eɖoa kpɔɖeŋu ɖedzesi aɖe le gbeƒãɖeɖe kple dzadzraɖo ɖe kpekpewo ŋu hã me. Aleke wòwɔ te ŋu kpɔa dɔ gbogbo mawo gbɔ?

Ileana ɖe eme be: “Kpekpewo kple gbeadzidede kpena ɖe ŋunye ŋutɔŋutɔ be mete ŋu wɔa nye dɔ bubuwo. Le kpɔɖeŋu me, ne metso gbeƒãɖeƒe gbɔ la, nu geɖe nɔa anyi siwo ŋu mebua tame lena ne mele nye aƒemedɔwo wɔm. Zi geɖe la, menɔa ha dzim ne mele dɔ wɔm. Gake ne kpekpe aɖe to ŋunye alo dɔ sue aɖe koe mewɔ le gbeadzi la, ke aƒemedɔwo zua agba kpekpe.”

Vovototo ka gbegbee nye si le esia kple modzakaɖeɖe fũ dome!

Gbɔgbɔ me Nyonyoe Dzea Yehowa Ŋu

Xexe si me gotagome dzedzeme le susu xɔm na ame geɖe wu mee míele. Amewo gblẽa ga gbogbo ɖe atikewɔwɔ siwo woɖo be woana ame nanya kpɔ wu eye bene tsitsi nagadze le wo ŋu o la ŋu. Nusiawo dometɔ aɖewoe nye taɖadodo kple amadedee, nowɔwɔ be wòaƒo ƒu, kple dɔwɔwɔ na ame ƒe mo be tsitsi nagadze o. Ame miliɔn geɖe dea lolomedziɖeƒewo, lãmesẽfefewɔƒewo, kple lãmesẽŋutinusrɔ̃ƒewo, alo woƒlea lãmesẽfefewɔwɔ videowo kple lolomedziɖegbalẽwo. Xexeame ana míasusui be míaƒe gotagome dzedzemee nye nusi ana míakpɔ dzidzɔ, be míaƒe “dzedzeme” ye nye nu vevitɔ.

Le United States la, numekuku aɖe ƒe nya si Newsweek magazine ŋlɔ la fia be Amerika-yevu ƒewuivi 90 le alafa me “mekpɔ ŋudzedze ɖe woƒe dzedzeme ŋu o.” Ne míeɖoe godogodo be dzedzeme tɔxɛ aɖe nanɔ mía si la, agblẽ nu le míaƒe gbɔgbɔmemenyenye ŋu. Dora nye Yehowa ƒe Ðasefo sɔhɛ aɖe si ƒe dzedzeme kpea ŋu nɛ le esi wòwɔ abe ɖe wòlolo akpa ene ta. Egblɔ be: “Ne meyi nuƒleƒe la, esesẽna nam be makpɔ awu si asɔm. Ewɔ abe ƒewuivi tsralɛwo koe wowɔ awu siwo le tsia dzi na ene. Nusi gavloe wue nye be amewo gblɔa vlodoamenyawo le nye lolome ŋu, eye etena ɖe dzinye ŋutɔ, vevietɔ ne gbɔgbɔ me nɔvinyeŋutsuwo kple nɔvinyenyɔnuwoe gblɔe.

“Ewɔe be nye susu katã va nɔ nye gotagome dzedzeme ŋu wu, ale gbegbe be meva tsɔ gbɔgbɔmedzidzenuwo ɖo nɔƒe evelia le nye agbe me. Eva wɔ abe nye lolome dzie nye dzidzɔkpɔkpɔ nɔ te ɖo ene. Ƒe geɖe va yi, eye esi mezu nyɔnu kple Kristotɔ si tsi le gbɔgbɔ me fifia la, mebua nuwo ŋu bubui. Togbɔ be meléa be na nye dzedzeme hã la, meva kpɔe be gbɔgbɔ me tugbedzedzee le vevie wu, eye eyae naa nye dzi dzea eme wu. Esi meva kpɔe nenema ko la, mete ŋu va tsɔa Fiaɖuƒea ƒe nuwo ɖoa afisi sɔ.”

Sara nye blemanyɔnu wɔnuteƒe aɖe si si nukpɔsusu sia si da sɔ la nɔ. Togbɔ be Biblia ƒo nu tso eƒe tugbedzedze ŋu esime wòxɔ ƒe 60 hã la, eƒe nɔnɔme nyuiwo koŋ dzie wòhe susu yii—dzime ƒe ame ɣaɣla la. (Mose I, 12:11; Petro I, 3:4-6) Eɖɔ ʋu hefa tu, eye etsɔ ɖokuibɔbɔ ɖoa to srɔ̃a. Sara metsi dzi ɖe alesi amewo kpɔnɛ ŋu o. Togbɔ be kesinɔtɔwo ƒe ƒome mee wòtso hã la, elɔ̃ ɖanɔ avɔgbadɔwo me ƒe 60 kple edzivɔ. Etsɔ tufafa kple ɖokuitɔmadimadi kpe ɖe srɔ̃a ŋu; enye nyɔnu xɔsetɔ. Nu mae wɔe wònye nyɔnu si dze tugbe vavã.—Lododowo 31:30; Hebritɔwo 11:11.

Mí Kristotɔwo míedi be míaɖɔ míaƒe gbɔgbɔmenyonyo ɖo, nyonyo si ne míetu ɖo edziedzi la, anyo ɖe edzi ahanɔ anyi ɖaa. (Kolosetɔwo 1:9, 10) Míate ŋu alé be na míaƒe gbɔgbɔmedzedzeme le mɔ eve nu.

Míaƒe gomekpɔkpɔ le míaƒe agbeɖeɖedɔa mee ana míanya kpɔ le Yehowa ƒe ŋkume geɖe wu. (Yesaya 52:7; Korintotɔwo II, 3:18–4:2) Gakpe ɖe eŋu la, ne míele alesi míaɖe Kristotɔwo ƒe nɔnɔmewo afia srɔ̃m la, míaganyo ɖe edzi. Mɔnukpɔkpɔ geɖe li siwo dzi míato ana míaƒe gbɔgbɔmenyonyo nagadze wu: “Lɔlɔ̃ na mia nɔewo nayɔ fũ kple dadavilɔlɔ̃, mitre mia nɔewo bubu! . . . Mixɔ dzo le gbɔgbɔ me. . . . Minɔ amedzrowɔwɔ dzi! . . . Midzɔ dzi kple amesiwo dzi le dzɔdzɔm la, mifa avi kple amesiwo le avi fam la! . . . Migaɖo vɔ̃ vɔ̃ teƒe na ame aɖeke o, . . . minɔ anyi kple amewo katã le ŋutifafa me!” (Romatɔwo 12:10-18) Ne míetu nɔnɔme mawo ɖo la, ana míaƒe nu nanyo Mawu kple amewo ŋu, eye ana be nuvɔ̃wɔwɔ ƒe dome si míenyi la maganɔ dzedzem kakaka o.—Galatiatɔwo 5:22, 23; Petro II, 1:5-8.

Míate Ŋu Awɔ Avu Kple Xexeame ƒe Gbɔgbɔ La!

Xexeame ƒe gbɔgbɔ si nye aɖi la ate ŋu agbɔdzɔ míaƒe nuteƒewɔwɔ me to ayemɔ geɖe dzi. Ate ŋu awɔe be nusiwo le mía si la madze mía ŋu o eye míatsi dzi atsɔ mía ŋutɔwo míaƒe nuhiahiãwo kple nudidiwo aɖo ŋgɔgbe na Mawu tɔwo. Alo ate ŋu ana be míasusu amegbetɔwo ƒe susu tsɔ wu Mawu tɔ, ahanɔ modzakaɖeɖe alo gotagome dzedzeme bum nu vevii wu alesi dze.—Tsɔe sɔ kple Mateo 16:21-23.

Satana ɖoe be yeagblẽ míaƒe gbɔgbɔmemenyenye dome, eye xexeame ƒe gbɔgbɔe nye eƒe aʋawɔnu vevitɔwo dometɔ ɖeka. Ðo ŋkui be Abosam ate ŋu atrɔ eƒe ayemɔwo ale be maganye dzata si le gbe ɖem o ke ava wɔ eɖokui da si dze aye. (Mose I, 3:1; Petro I, 5:8) Ɣeaɖewoɣi la, yometiti anyratɔe ye xexeame tsɔ ɖua Kristotɔ dzi, gake zi geɖe la, edea aɖi lãme nɛ vivivi. Afɔku evelia sia ŋue Paulo tsi dzi ɖo wu: “Mele vɔvɔ̃m bena, ame aɖe menya nu o, alesi da la tsɔ eƒe aɖaŋu vɔ̃ ble Xawa la, nenema ke woagblẽ miaƒe tamesusuwo tso dzimekɔkɔ, si miekɔ na Kristo la me mahĩ.”—Korintotɔwo II, 11:3.

Bene míakpɔ mía ɖokui ta tso da la ƒe ayemɔwo ŋu la, ehiã be míade dzesi nukpɔsusu siwo ‘tso xexeame gbɔ’ eye míagbe wo gbidii. (Yohanes I, 2:16) Mele be míana woable mí míaxɔe se be xexeame ƒe nukpɔsusuwo medze vɔ̃ o. Afisi Satana ƒe nuɖoanyia ƒe aɖiya la nu sẽ ɖoe la ɖi vɔvɔ̃.—Efesotɔwo 2:2.

Ne míede dzesi xexeame ƒe tamesusu ko la, míate ŋu aɖu edzi ne míetsɔ Yehowa ƒe nufiafia dzadzɛ la de míaƒe susu kple dzime fũ. Mina míanɔ abe Fia Dawid ene agblɔ be: “Yehowa, ɖe wò mɔwo fiam, eye nafia wò toƒewom! Na mazɔ le wò nyateƒe me, eye nafia num; elabena wòe nye nye xɔname Mawu.”—Psalmo 25:4, 5.

[Etenuŋɔŋlɔ]

[Nɔnɔmetata si le axa 26]

Agbeɖuɖu yomenɔnɔ ate ŋu ana míatra tso gbɔgbɔ me taɖodzinuwo gbɔ