Agbalẽ Si Tso Mawu Gbɔ
“Nyagbɔgblɔɖi aɖeke metso ame ƒe lɔlɔ̃nu me kpɔ o, ke boŋ gbɔgbɔ kɔkɔe lae ʋã Mawu ƒe ame kɔkɔewo, hafi wogblɔ nya ɖi.”—PETRO II, 1:21.
1, 2. (a) Nukata ame aɖewo meka ɖe edzi be Biblia ate ŋu aɖe vi le agbenɔnɔ me egbea o? (b) Kpeɖodzinya etɔ̃ kawoe míate ŋu azã atsɔ afia be Biblia tso Mawu gbɔ?
ÐE BIBLIA sɔ na amesiwo ɖo ƒe alafa 21 lia ƒe agbo nua? Ame aɖewo mesusui nenema o. Esi Ðk. Eli S. Chesen nɔ nusita wòsusu be Biblia me nyawo do xoxo me ɖem la, eŋlɔ be: “Ame aɖeke magblɔ be woazã ƒe 1924 me dzɔdzɔmenuwo ƒe nɔnɔmefiagbalẽ le egbe dzɔdzɔmenuwo ƒe nɔnɔme ŋuti nusɔsrɔ̃ me o—nusiwo wosrɔ̃ le dzɔdzɔmenuwo ƒe nɔnɔme ŋu tso ɣemaɣi la de ŋgɔ akpa.” Numeɖeɖe sia adze abe nya si me kɔ ene. Ne èbu eŋu kpɔ la, amegbetɔ srɔ̃ nu geɖe le dzɔdzɔmeŋutinunya, susu ƒe dɔwɔwɔ ɖe ɖoɖo nu kple amegbetɔ ƒe agbenɔnɔ ŋu tso esime woŋlɔ Biblia. Eyata ame aɖewo abia be: ‘Aleke dzɔdzɔmeŋutinunya me vodadawo agbe agbalẽ si do xoxo alea me nɔnɔ? Aleke aɖaŋuɖoɖo nyui ate ŋu anɔ eme hena agbenɔnɔ egbeae?’
2 Biblia ŋutɔ ɖo eŋu. Wogblɔ na mí le Petro II, 1:21 be ‘gbɔgbɔ kɔkɔe lae ʋã Biblia ƒe nyagblɔɖilawo hafi wogblɔ nya siwo tso Mawu gbɔ.’ Eyata Biblia fia be Mawu ƒe agbalẽe yenye. Gake aleke míawɔ ana eme nakɔ na ame bubuwo be nyateƒee nya sia nye? Mina míadzro kpeɖodzi etɔ̃ siwo fia be Biblia nye Mawu ƒe Nya la me: (1) Eƒe dzɔdzɔmeŋutinunya le eteƒe (2) gɔmeɖose siwo ɖea vi ɣesiaɣi eye wosɔ na agbenɔnɔ le egbeŋkekewo me la le eme, eye (3) nyagblɔɖi tɔxɛ aɖewo le eme siwo va eme, eye ŋutinya me nyawo hã ɖo kpe wo dzi.
Agbalẽ si Wɔ Ðeka Kple Dzɔdzɔmeŋutinunya
3. Nukatae dzɔdzɔmeŋutinunya ƒe nutovɛwo mete ŋu da Biblia ɖe anyi o?
3 Biblia menye dzɔdzɔmeŋutinunyasrɔ̃gbalẽ o. Gake nyateƒegbalẽe wònye, eye nyateƒe nu meyina o. (Yohanes 17:17) Dzɔdzɔmeŋutinunya me nutovɛwo mete ŋu da Biblia ɖe anyi o. Ne wògblɔ nya si do ƒome kple dzɔdzɔmeŋutinunya la, blema “dzɔdzɔmeŋutinunya” ƒe nufiafia siwo va zu nyakpakpawo la metsakanɛ o. Le nyateƒe me la, menye dzɔdzɔmeŋutinunya akuakua koe le eme o ke emenyawo tsi tre ɖe nukpɔsusu siwo nɔ amewo si ɣemaɣi hã ŋu kura. Le kpɔɖeŋu me, de ŋugble le ɖekawɔwɔ si le Biblia kple atikeŋutinunya dome ŋu kpɔ.
4, 5. (a) Nuka gɔmee blema tikewɔlawo mese ku ɖe dɔléle ŋu o? (b) Nukata ɖikeke mele eme o be Mose nya Egipte-tikewɔlawo ƒe dɔdamɔnuwo?
4 Blema tikewɔlawo mese alesi dɔléle wɔna kakana gɔme bliboe o, eye womenya dzadzɛnyenye ƒe vevienyenye le mɔxexe na dɔléle me hã o. Blema tikewɔmɔnuwo dometɔ geɖe adze ŋkumaʋunui ne ètsɔe sɔ kple egbe tɔwo. Blema tikewɔwɔ ŋuti nuŋlɔɖi xoxotɔ siwo li dometɔ aɖee nye Ebers ƒe Papyrus, si me woŋlɔ Egiptetɔwo ƒe atikeŋutinunya me nyawo ɖo, eye ƒe 1550 D.M.Ŋ. me lɔƒoe woŋlɔe. Dɔ vovovo siwo ade 700 ƒe atikewo le eme, “tso loɖuame dzi va ɖo afɔfetsuveame dzi.” Atikeawo ƒe akpa gãtɔ meɖea vi aɖeke o, gake afɔku le wo dometɔ aɖewo ŋu ŋutɔ. Atike si wogblɔna be woatsɔ aɖo abi me dometɔ ɖekae nye amegbetɔ ƒe afɔdzi si wotsaka kple nu bubuwo.
5 Ɣeyiɣi si me woŋlɔ Biblia ƒe agbalẽ gbãtɔ siwo me Mose ƒe Sea hã le la me lɔƒoe woŋlɔ Egiptetɔwo ƒe atikegbalẽ sia. Egipte ye Mose si wodzi le ƒe 1593 D.M.Ŋ. me nɔ tsi. (Mose II, 2:1-10) Esi wonyi Mose le Farao ƒeme ta la, ‘wofia Egiptetɔwo ƒe nunyawo katãe.’ (Dɔwɔwɔwo 7:22) Enya Egiptetɔwo ƒe “atikewɔlawo” nyuie. (Mose I, 50:1-3) Ðe woƒe atikewɔmɔnu maɖevia alo esi me afɔku nɔ la kpɔ ŋusẽ ɖe nusiwo wòŋlɔ dzia?
6. Dzadzɛnyenyese kawoe le Mose ƒe Sea me siwo woabu le egbe ƒe atikewɔnunya nu be wonyo?
6 Kura o, ke boŋ dzadzɛnyenyese siwo woabu be wonyo le fifi ƒe atikeŋutinunya me lae nɔ Mose ƒe Sea me. Le kpɔɖeŋu me, asrafowo ƒe asaɖaƒuƒuanyi ŋuti se aɖe bia be woaɖi afɔdzi ɖe asaɖa la godo. (Mose V, 23:13) Esia nye mɔxexe ɖe dɔléle nu ƒe mɔnu deŋgɔ aɖe. Enana be dɔlékui megena ɖe woƒe tsi me o eye wòkpɔa ame ta tso kpetadede si tagbatsuwo kakana kple mitsinyedɔ bubu siwo gale ame miliɔn geɖe wum ƒe sia ƒe kokoko me, vevietɔ le dukɔ madeŋgɔwo me.
7. Dzadzɛnyenyese kawoe le Mose ƒe Sea me siwo xe mɔ be dɔxɔleameŋuwo mekaka o?
7 Dzadzɛnyenyeɖoɖo bubuwo le Mose ƒe Sea me siwo kpɔ wo ta tso dɔxɔleameŋuwo ƒe kaka me. Woɖea amesi ŋu dɔ si woate ŋu axɔ le ame ŋu le alo amesi wosusui be ele eŋu la ɖe aga. (Mose III, 13:1-5) Ele be woanyã nudodo siwo ka lã si ku le eɖokui si ŋu (si ɖewohĩ anye dɔléle aɖee wui) alo aklɔ agba siwo ka eŋu la hafi agazã alo woagblẽ wo dome kura. (Mose III, 11:27, 28, 32, 33) Wobua amesiame si ka asi ame kuku ŋu be eŋu mekɔ o eye ele be wòawɔ ŋutikɔkɔkɔnu aɖe si ƒe akpa aɖe bia be wòanyã eƒe awuwo ahale tsi. Le ŋkeke adre siwo me eŋu mekɔ o me la, mele be wòagogo ame bubu o.—Mose IV, 19:1-13.
8, 9. Nukata míate ŋu agblɔ be dzadzɛnyenyese siwo le Mose ƒe Sea me le ŋgɔ sasasã na eŋɔlime tɔwo?
8 Nunya si de ŋgɔ sasasã ye le dzadzɛnyenyese siawo me. Wova srɔ̃ nu geɖe tso dɔléle ƒe kaka kple mɔxexe ɖe enu ŋu le egbe ƒe atikeŋutinunya me. Le kpɔɖeŋu me, ŋgɔyiyi siwo wowɔ le atikewɔwɔ me le ƒe alafa 19 lia me na woto mɔxexeɖedɔlélenu ƒe aɖaŋu vɛ—dzadzɛnɔnɔ be woatsɔ aɖe dɔxɔxɔ dzi akpɔtɔ. Emetsonu nye alesi dɔxɔxɔ kple ku kpowo dzi ɖe kpɔtɔ ale gbegbe. Le ƒe 1900 me la, amewo ƒe agbenɔƒe le Europa-dukɔ geɖe me kple United States mede ƒe 50 o. Tso ɣemaɣi la, edzi ɖe edzi ŋutɔ, menye le mɔxexe ɖe dɔléle nu ƒe ŋgɔyiyi siwo wowɔ le atikewɔwɔ me ɖeɖeko ta o ke le esi wova le fɔ lém ɖe dzadzɛnyenye kple agbenɔnɔmɔnu siwo de ame dzi wu ŋu ta.
9 Gake ƒe akpe geɖe hafi woava srɔ̃ alesi dɔléle wɔna kakana le atikeŋutinunya me la, Biblia gblɔ mɔxexe ɖe wo nu ƒe mɔnu siwo me susu le be woatsɔ akpɔ ame tae tso dɔxɔxɔ me. Eyata mewɔ nuku o be Mose te ŋu gblɔ le Israel-viwo ŋu le eƒe ŋkekea me be wonɔa agbe wòɖoa ƒe 70 alo 80. (Psalmo 90:10) Aleke Mose wɔ hafi nya dzadzɛnyenyese mawo? Biblia ŋutɔ ɖe eme be: ‘Mawudɔlawo dzie woto ɖo Se la anyi.’ (Galatiatɔwo 3:19) Ẽ, menye amegbetɔ ƒe nunyagbalẽe Biblia nye o; enye agbalẽ si tso Mawu gbɔ.
Agbalẽ si Nyo na Agbenɔnɔ le Egbeŋkekewo Me
10. Togbɔ be woŋlɔ Biblia vɔ ƒe 2,000 kloe enye sia hã la, viɖe kae gale eƒe aɖaŋuɖoɖo ŋu?
10 Agbalẽ siwo ɖoa aɖaŋu va doa xoxo eye eteƒe medidina hafi wowɔa ɖɔɖɔɖo le wo me alo ɖɔa li wo o. Gake Biblia ya le etɔxɛ vavã. Psalmo 93:5 gblɔ be: “Wò sewo le eme tututu.” Togbɔ be ƒe 2,000 kloe enye sia si wowu Biblia ŋɔŋlɔ nu hã la, emenyawo gawɔa dɔ kokoko. Eye eɖanye ŋutigbalẽ kae le mía ŋu alo dukɔ ka mee míele o, wowɔa dɔ na amesiame sɔsɔe. Bu Biblia ƒe aɖaŋuɖoɖo si sɔ na ɣeyiɣi ɖesiaɖe, siwo “le eme tututu” ƒe kpɔɖeŋu aɖewo ŋu kpɔ.
11. Ƒe geɖe enye si va yi la, nukae wona dzila geɖe xɔ se le tohehe na vi ŋu?
11 Ƒe geɖe va yi la, dzila geɖewo—le “susu yeye siwo woto vɛ” le vihehe ŋu ta—bui be “menyo be woagbe nya na vi o.” Wovɔ̃ be ne yewova de se na yewo viwo la, ate ɖe wo dzi eye wòaɖe dzi le wo ƒo. Viheheŋuɖaŋuɖolawo tsɔ susu nyui nɔ gbe tem ɖe edzi be dzilawo megawɔ naneke wo viwo wu alesi woanyra ɖe wo dzi vie ko o. The New York Times ka nya ta be fifia eŋutinunyala mawo dometɔ geɖe le “eƒom ɖe dzilawo nu be woƒe nya me nasẽ vie, eye be woatso ɖe wo ŋu.”
12. Helagbe me ŋkɔnya si gɔme woɖe be “hehe” gɔme ɖe, eye nukatae ɖeviwo hiã hehe ma?
12 Gake le ɣeyiɣi siawo katã me la, Biblia ɖo vihehe ŋu ɖaŋu si me kɔ, si da sɔ. Eɖo aɖaŋu be: “Mi fofowo la, migado dziku na mia viwo o, ke minyi wo le Aƒetɔ la ƒe hehe kple nuxɔxlɔ̃ la me.” (Efesotɔwo 6:4) Helagbe me ŋkɔnya si gɔme woɖe be “hehe” la fia “vinyinyi, hehenana, nufiafia.” Biblia gblɔ be tohehe, alo nufiafia, sia fia be dzilawo lɔ̃a wo viwo. (Lododowo 13:24) Agbenɔnɔ dzea edzi na ɖeviwo ne wona agbenɔnɔ ŋuti mɔfiame siwo ɖe dzesi nyuie wo eye wokpe ɖe wo ŋu wote ŋu dea dzesi nyui kple vɔ̃. Tohehe na wo ɖe ɖoɖo nu na wokpɔnɛ be yewole dedie; efiaa wo be yewo dzilawo tsɔ ɖe le eme na yewo eye wòna wonyaa amesi ƒomevi woava zu.—Tsɔe sɔ kple Lododowo 4:10-13.
13. (a) Nuxlɔ̃me kae Biblia na dzilawo le tohehe ŋu? (b) Tohehe ka ƒomevie Biblia kafu?
13 Gake Biblia xlɔ̃ nu dzilawo le tohehe ƒe nya sia ŋu. Mele be dzilawo nazã woƒe ŋusẽ wòagbɔ eme gbeɖe o. (Lododowo 22:15) Mele be woatsɔ tagbɔsesẽ ahe toe na ɖevi aɖeke gbeɖe o. Mele be ameƒoƒo ŋutasesẽtɔe nanɔ ƒome si nɔa agbe ɖe Biblia nu me o. (Psalmo 11:5) Mele be dzigbãnyawo—nyatɔamewo, ɖeklemiɖeɖe enuenu, gbɔɖiamenya veame, siwo katã ate ŋu ado blanuitɔ ɖevia—nanɔ anyi o. (Tsɔe sɔ kple Lododowo 12:18.) Biblia xlɔ̃ nu dzilawo nunyatɔe be: “Migado dziku na mia viwo, bene dzika nagatso wo ƒo o [alo, “miagaɖe dzi le dɔme na wo keŋkeŋ o,” Phillips].” (Kolosetɔwo 3:21) Biblia kafui be woaxe mɔ na nanewo. Mose V, 11:19 de dzi ƒo na dzilawo be woawɔ vovoɣi ɖesiaɖe ƒe mɔnukpɔkpɔwo ŋudɔ afia agbenɔnɔ kple gbɔgbɔ me dzidzenuwo wo viwo. Vihehe ŋuti ɖaŋuɖoɖo sia si me kɔ eye wònyo la ɖea vi fifia abe alesi wònɔ le Biblia ƒe ɣeyiɣiwo me ene.
14, 15. (a) Aleke wòdzɔe be menye aɖaŋuɖoɖo nyuiwo koe le Biblia me o? (b) Biblia ƒe nufiafia kawoe akpe ɖe ŋutsu kple nyɔnu siwo ƒe ŋutigbalẽ kple dukɔwo to vovo ŋu be woabui be yewo sɔ?
14 Menye aɖaŋuɖoɖo nyuiwo koe le Biblia me o. Emenyawo ɖoa ame ƒe dzi gbɔ. Hebritɔwo 4:12 gblɔ be: “Mawu ƒe nya la le agbe, eye wòsẽa ŋu, eye wòɖana wua yi nuevee sia yi nuevee, eye wòƒona ɖe ame yina ɖe eme, halase esime wòmãa luʋɔ kple gbɔgbɔ kple ƒunukpeƒeewo kpakple ƒutomemi me, eye wònye tamesusuwo kple dzimedidiwo ƒe ʋɔnudrɔ̃la.” Kpɔ kpɔɖeŋu ɖeka si ɖe Biblia ƒe gbedasia ƒe ameʋãŋusẽ fia ɖa.
15 Egbea ŋutigbalẽ ƒe amadede, dukɔ, kple towo me vovototowo mãa amewo me. Mɔxenu siawo siwo amegbetɔ ŋutɔ ɖo hã gbɔe wòtso be wowu fɔmaɖilawo le aʋawɔwɔwo me le xexeame katã. Gake nufiafiawo le Biblia me siwo wɔe be ŋutsu kple nyɔnu siwo nye ameƒomevi vovovowo eye wotso dukɔ vovovo me la bua wo nɔewo be yewo sɔ. Le kpɔɖeŋu me, Dɔwɔwɔwo 17:26 gblɔ be Mawu “[wɔ] bena, amewo ƒe dukɔ sia dukɔ tso ʋu ɖeka me.” Nya sia fia be ameƒomevi ɖeka koe li—eyae nye amegbetɔƒomea! Biblia gade dzi ƒo na mí be ‘míazu Mawu srɔ̃lawo,’ amesi ŋu wògblɔ le be: “Mekpɔa ame ŋku me o, hafi boŋ le dukɔ sia dukɔ me, amesi ke vɔ̃nɛ, eye wòwɔa nu dzɔdzɔe la, eya dzea eŋu.” (Efesotɔwo 5:1; Dɔwɔwɔwo 10:34, 35) Sidzedze sia naa amesiwo dina le nyateƒe me be yewoanɔ agbe ɖe Biblia ƒe nufiafiawo nu la wɔa ɖeka. Ewɔa dɔ ɖoa ame me ʋĩ—dea ame ƒe dzi gbɔ—wògbãa mɔxenu siwo amegbetɔ wɔ tsɔ dea mamã amewo dome. Ðe wòwɔa dɔ le egbe xexeame ŋutɔŋutɔa?
16. Gblɔ nuteƒekpɔkpɔ aɖe si fia be Yehowa Ðasefowo nye dukɔwo dome nɔviwo ƒe habɔbɔ.
16 Ewɔa dɔ ale gbegbe! Wonya Yehowa Ðasefowo nyuie le nɔviwɔwɔ si le woa kple wo nɔvi dukɔ bubu me tɔwo dome ta, si na amesiwo tso teƒe vovovowo siwo mete ŋu nɔa wo nɔewo dome le ŋutifafa me tsã o la va wɔ ɖeka. Le kpɔɖeŋu me le gbevovodolawo dome ʋa siwo wowɔ le Rwanda la, Yehowa Ðasefo siwo nye to bubu me tɔwo kpɔ wo nɔviŋutsu kple nɔvinyɔnu Kristotɔ siwo tso to bubu me ta, eye wode woa ŋutɔwo ƒe agbe afɔku me le nu ma wɔwɔ me. Le nudzɔdzɔ aɖe me la, Ðasefo Hututɔ aɖe ɣla Tutsi-ƒome aɖe si me ame ade le eye woa kpli wo le hame ɖeka me la ɖe eƒeme. Ewɔ nublanui be wova ke ɖe Tutsi-ƒomea ŋu eye wowu wo. Azɔ amewulaawo va do dziku ɖe nɔviŋutsu Hututɔa kple eƒe ƒome ŋu eye wòhiã be woasi ayi Tanzania. Woka nya ta tso kpɔɖeŋu ma tɔgbe geɖe ŋu. Yehowa Ðasefowo lɔ̃ ɖe edzi ɖikekemanɔmee be esi Biblia ƒe gbedasia ƒe ŋusẽ ʋãa dzi na wo ta koe wowɔ ɖeka ɖo. Alesi Biblia na ɖekawɔwɔ le amewo dome le xexe sia si me fuléle bɔ ɖo la nye kpeɖodzi sẽŋu si fia be Mawu gbɔe wòtso.
Nyateƒe Nyagblɔɖigbalẽ Ye
17. Aleke Biblia ƒe nyagblɔɖiwo to vovo na amegbetɔ ƒe nyagblɔɖiwoe?
17 Petro II, 1:20 gblɔ be: “Ŋɔŋlɔ la me nyagblɔɖiwo katã metso ame ŋutɔ ƒe gɔmefiafia gbɔ o.” Biblia me nyagblɔɖilawo meda ŋku ɖe xexeame ƒe nyawo me eye emegbe wonɔ te ɖe edzi gblɔ nya ɖi le nusiwo woa ŋutɔwo susu le nudzɔdzɔ siawo ŋu o. Eye womegblɔ nyawo gbadzaa bene woate ŋu atrɔe wòava sɔ ɖe nyadzɔdzɔ aɖe nu emegbe o. Le kpɔɖeŋu me, mina míalé ŋku ɖe Biblia me nyagblɔɖi aɖe si wogblɔ hetɔ asi nuwo dzi etɔxɛe eye wogblɔ nusi amewo menɔ mɔ kpɔm na o ɖi ŋu.
18. Nukata ɖikeke menɔ eme o be blema Babilontɔwo susu be yewonɔ dedie, gake nya kae Yesaya gblɔ ɖi le Babilon ŋu?
18 Va ɖo ƒe alafa adrelia D.M.Ŋ. me la, Babilon-dua zu Babilon Fiaɖuƒea ƒe fiadu si dze abe ɖe womate ŋu aɖu edzi akpɔ gbeɖe o ene. Wotso dua ɖe Frat Tɔsisia ƒe go eveawo dzi, eye tɔsisia me tsiwo zu tɔʋu gã globo aɖe si nye akpoxɔnu na dua, eye woɖe tsimɔ geɖewo hã ɖe eŋu. Azɔ woɖo gli titri eve ɖe wo nɔewo ŋu ƒo xlã dua eye wotu dzɔlawo ƒe gbetakpɔxɔ gbogbo aɖewo ɖe eŋu. Eyata mewɔ nuku be Babilontɔwo sena le wo ɖokui me be yewole dedie o. Ke hã le ƒe alafa enyilia D.M.Ŋ. me, hafi Babilon naɖo eƒe ŋutikɔkɔe ƒe kɔkɔaƒe la, nyagblɔɖila Yesaya gblɔ ɖi be: “Ale wòava me na Babel, . . . abe alesi Mawu trɔ Sodom kple Gomora bu anyi ene. Womatso aƒe ɖe afima akpɔ o tegbee, eye wòatsi anyi aƒedoe tso dzidzime yi dzidzime, Arabiatɔwo matu agbadɔ ɖe afima o, eye lãkplɔviwo mana lãwo natsyɔ akɔ ɖe afima o.” (Yesaya 13:19, 20) De dzesii be menye ɖeko nyagblɔɖia gblɔ be woatsrɔ̃ Babilon ko evɔ o, ke egblɔ hã be womagatso aƒe ɖe afima akpɔ o tegbee. Ebia kalẽwɔwɔ be woagblɔ nya ma ɖi! Ðe wòanye be Yesaya kpɔe wotsrɔ̃ Babilon vɔ hafi wòŋlɔ eƒe nyagblɔɖia? Ŋutinya fia be menye nenemae o!
19. Nukatae Yesaya ƒe nyagblɔɖia meva eme keŋkeŋ le October 5, 539 D.M.Ŋ. me o?
19 Le October 5, 539 D.M.Ŋ. me ƒe zã la, Babilon dze Medo-Persia srafo siwo nɔ Kores Gã ƒe kpɔkplɔ te si me. Gake Yesaya ƒe nyagblɔɖia katã meva eme keŋkeŋ ɣemaɣi o. Esi Kores va xɔ Babilon vɔ megbe la, amewo ganɔ afima ƒe alafa geɖe—togbɔ be megakpɔ ŋusẽ de gbãtɔ nu o hã. Le ƒe alafa evelia D.M.Ŋ. me si nye ɣeyiɣi si me wogbugbɔ nɔ Ƒukukua ƒe Agbalẽxatsaxatsa si me Yesaya ƒe agbalẽa nɔ la ŋlɔm la, Partiatɔwo va xɔ Babilon si nye teƒe dzroame si ta dukɔ siwo nɔ nutoa me wɔa aʋa ɖo ɣemaɣi. Yudatɔ ŋutinyaŋlɔla Josephus ka nya ta be Yudatɔ “gbogbo aɖewo” nɔ afima le ƒe alafa gbãtɔ D.M.Ŋ. me. Agbalẽ si nye The Cambridge Ancient History gblɔ be Palmyratɔ asitsalawo va tso asitsadu kpɔdzidzedze aɖe ɖe Babilon le ƒe 24 M.Ŋ. me. Eyata va ɖo keke ƒe alafa gbãtɔ M.Ŋ. me ke hã la, wometsrɔ̃ Babilon keŋkeŋ o; gake wowu Yesaya ƒe agbalẽa ŋɔŋlɔ nu xoxoxo do ŋgɔ na ɣemaɣi.—Petro I, 5:13.
20. Kpeɖodzi kae li si fia be Babilon va zu “anyiglãgo” mlɔeba?
20 Yesaya menɔ agbe kpɔ Babilon ƒe dudozuzu o. Gake abe alesi nyagblɔɖia fia ene la, Babilon va zu “anyiglãgo” mlɔeba. (Yeremya 51:37) Hebritɔ agbalẽnyala Jerome (amesi wodzi le ƒe alafa enelia M.Ŋ. me), gblɔ be le ye ŋɔli la, Babilon nye adedaƒe si “lã ƒomevi ɖesiaɖe” ɖia tsa le, eye egakpɔtɔ nye dudo egbegbe. Ne wotrɔ asi le Babilon ƒe akpa aɖewo ŋu be wòanye nukpɔkpɔ na modzakatsaɖilawo la, adzro ame geɖe be woayi aɖakpɔe, gake be Babilon ƒe ‘dzidzimeviwo’ naganɔ anyi la, eya nu yi ɖikaa abe alesi Yesaya gblɔe ɖii ene.—Yesaya 14:22.
21. Nukatae nyagblɔɖila wɔnuteƒewo te ŋu gblɔ etsɔme ɖi eye meda ƒu o?
21 Nyagblɔɖila Yesaya meda ŋku ɖe nyadzɔdzɔwo me gblɔ nya ɖi o. Menye ŋutinyae wògbugbɔ ŋlɔ hã be wòadze abe nyagblɔɖi ene o. Nyagblɔɖila nyateƒetɔe Yesaya nye. Eye Biblia me nyagblɔɖila bubuwo katã hã nye nyateƒetɔwo. Aleke wòdzɔe be amesiawo wɔ nusi amegbetɔ bubu aɖeke mate ŋu awɔ o—be wote ŋu gblɔ nya ɖi eye ɖeke meda ƒu o? Ŋuɖoɖoa me kɔ. Nyagblɔɖi ƒe Mawu, Yehowa, “[Amesi] ɖe nuwuwu fia le gɔmedzedzea me ke” gbɔe wotso.—Yesaya 46:10.
22. Nukatae wòle be míawɔ mía tɔ sinua ade dzi ƒo na dzianukwaretɔwo be woadzro Biblia me na wo ɖokui?
22 Eyata ɖe wòdze be míadzro Biblia mea? Míenya be ele be míadzro eme! Gake ame geɖe mekpɔe nenema o. Togbɔ be womexlẽ Biblia kpɔ o hã la, wosusua nya aɖewo tso eŋu. Gaɖo ŋku nufialagã si ƒe nya míegblɔ le nyati si do ŋgɔ ƒe gɔmedzedzea dzi. Elɔ̃ wosrɔ̃ Biblia kplii, eye esi wòdzro Biblia me tsitotsito vɔ la, eme va kɔ nɛ be enye agbalẽ si tso Mawu gbɔ. Eva xɔ nyɔnyrɔ zu Yehowa Ðasefo mlɔeba, eye hamemegãe nufialagã ma nye egbea! Mina míawɔ mía tɔ sinua ade dzi ƒo na dzianukwaretɔwo be woadzro Biblia me na wo ɖokui hafi asusu nya aɖe tso eŋu. Míeka ɖe edzi be ne woa ŋutɔwo dzro eme la, woava kpɔe be agbalẽ tɔxɛ sia, Biblia la, nye agbalẽ si nyo na amesiame nyateƒe!
Àte Ŋu Aɖe Wo Mea?
◻ Aleke nàte ŋu azã Mose ƒe Sea atsɔ afia be menye amegbetɔ gbɔe Biblia tso o?
◻ Gɔmeɖose siwo sɔ na ɣeyiɣi ɖesiaɖe kawoe le Biblia me na agbenɔnɔ le egbeŋkekeawo me?
◻ Nukatae manye be ɖe nyagblɔɖi si le Yesaya 13:19, 20 la dzɔ vɔ hafi woŋlɔe o?
◻ Nukae wòle be míade dzi ƒo na dzianukwaretɔwo be woawɔ, eye nukatae?
[Aɖaka si le axa 19]
Ke Nusi Dzi Womate Ŋu Aɖo Kpee O Ya Ðe?
Nyagbɔgblɔ vovovo le Biblia me siwo dzi míate ŋu atsɔ ɖaseɖiɖi siwo li fifia aɖo kpee o. Le kpɔɖeŋu me, womate ŋu aɖo kpe nya siwo wògblɔ tso nutome makpɔmakpɔ si nye gbɔgbɔmemewo nɔƒe ƒe anyinɔnɔ ƒe nyateƒenyenye—alo eƒe aʋatsonyenye—dzi le dzɔdzɔmeŋutinunya me o. Ðe nya mawo siwo ŋu kpeɖodzi mele o fia kokoko be Biblia tsi tre ɖe dzɔdzɔmeŋutinunya ŋua?
Biabia siae ɖe fu na ɣletinyigbaŋutinunyala aɖe esi Yehowa Ðasefowo va dze Biblia sɔsrɔ̃ gɔme kplii ƒe aɖewoe nye esi. Egblɔ be: “Nyemable ame o be Biblia dzi xɔxɔ se sesẽ nam gbã elabena nyemete ŋu ɖo kpe Biblia ƒe nyagbɔgblɔ aɖewo dzi le dzɔdzɔmeŋutinunya nu o.” Ŋutsu dzimekɔkɔetɔ sia yi Biblia la sɔsrɔ̃ dzi eye mlɔeba eme va kɔ nɛ be kpeɖodzi siwo li fia be enye Mawu ƒe Nya. Egblɔ be: “Esia wɔe be nyemegadina kokoko be maɖo kpe Biblia ƒe nya ɖesiaɖe dzi le eɖokui si o. Ele be amesi nya dzɔdzɔmeŋutinunya la nalɔ̃ adzro Biblia me le gbɔgbɔ me gɔmesese nu, ne menye nenema o la, maxɔ nyateƒea gbeɖe o. Mele be míakpɔ mɔ be dzɔdzɔmeŋutinunya naɖo kpe Biblia me nya ɖesiaɖe dzi o. Gake ne womate ŋu aɖo kpe nya aɖewo dzi o la, mefia be nya ma menye nyateƒe o. Nu vevitɔe nye be, afisi wòhiã be woaɖo kpe edzi le la, Biblia de pɛpɛpɛ ate ŋu akɔ nu me.”
[Nɔnɔmetata si le axa 17]
Mose ŋlɔ dzadzɛnyenyese siwo nɔ ŋgɔ sasasã na ɣemaɣi me tɔwo