Mina Míalé Míaƒe Xɔse Xɔasi la me ɖe Asi Sesi̇̃e!
“Ðo ɖe amesiwo kpɔ xɔse xɔasi ma ke kpli mí.” —PETRO II, 1:1.
1. Nukae Yesu gblɔ tsɔ xlɔ̃ nu eƒe apostolowoe, gake aleke Petro ƒo adegbee?
LE ZÃ si do ŋgɔ na Yesu ƒe ku me la, egblɔ be yeƒe apostolowo katã agblẽ ye ɖi. Petro, si nye wo dometɔ ɖeka ƒo adegbe be: “Ne wo katã woakpɔ nuɖiaɖia le ŋutiwò la, nye la nyemele ekpɔ ge gbeɖe o.” (Mateo 26:33, míawoe te gbe ɖe edzi.) Gake Yesu nya be mate ŋui o. Eyatae wògblɔ na Petro le ɣeyiɣi ma ke me be: “Nye la meɖe kuku ɖe tawò, bena wò xɔse nu nagatsi o; eye wò la, gbesigbe nètrɔ la, nado ŋusẽ nɔviwòwo!”—Luka 22:32.
2. Togbɔ be Petro ka ɖe eɖokui dzi akpa hã la, nukawoe wòwɔ si fia be eƒe xɔse gbɔdzɔ?
2 Petro, amesi ka ɖe eƒe xɔse dzi akpa la gbe nu le Yesu gbɔ zã ma ke. Egbe be yemenya Kristo gɔ̃ hã o zi gbɔ zi etɔ̃! (Mateo 26:69-75) Esime ‘wòtrɔ gbɔ’ la, Aƒetɔ la ƒe nya siwo wògblɔ nɛ be “nado ŋusẽ nɔviwòwo” ava susu me nɛ zi geɖe. Nuxlɔ̃ame ma kpɔ ŋusẽ ɖe Petro dzi le eƒe agbemeŋkeke mamlɛawo me, abe alesi míakpɔe le eƒe lɛta eve siwo wòŋlɔ, siwo ta wokpɔ wole Biblia me na mí me ene.
Nusita Petro Ŋlɔ Eƒe Agbalẽawo Ðo
3. Nukatae Petro ŋlɔ eƒe agbalẽ gbãtɔ?
3 Anye ƒe 30 le Yesu ƒe ku megbe la, Petro ŋlɔ eƒe agbalẽ gbãtɔ ɖo ɖe nɔvia siwo le Ponto, Galatia, Kapadokia, Asia, kple Bitinia, siwo nye nuto siwo nye Turkey ƒe dziehe kple ɣetoɖoƒe gome fifia. (Petro I, 1:1) Ðikekemanɔmee la, Yudatɔwo, amesiwo dometɔ aɖewo anya zu Kristotɔwo le ƒe 33 M.Ŋ. ƒe Pentekoste-ŋkekea dzi la nɔ amesiwo Petro ŋlɔ lɛtaa na la dome. (Dɔwɔwɔwo 2:1, 7-9) Wo dometɔ geɖe nye Dukɔwo me tɔ siwo nɔ dodokpɔ sesẽwo me tom le futɔwo si me. (Petro I, 1:6, 7; 2:12, 19, 20; 3:13-17; 4:12-14) Eyata Petro ŋlɔ agbalẽ na wo tsɔ de dzi ƒo na wo. Eƒe taɖodzinue nye be yeakpe ɖe wo ŋu be ‘woaxɔ woƒe xɔse ƒe nuwuwu, si nye woƒe luʋɔwo ƒe ɖeɖe.’ Eyata le eƒe nuxlɔ̃amenya mamlɛawo me la, ede dzi ƒo na wo be: “Minɔ tsitre sesĩe ɖe [Abosam] ŋuti le xɔse me.”—Petro I, 1:9; 5:8-10.
4. Nukatae Petro ŋlɔ eƒe agbalẽ evelia?
4 Emegbe Petro ŋlɔ lɛta evelia ɖo ɖe Kristotɔ siawo. (Petro II, 3:1) Nukatae? Elabena afɔku aɖe si galolo wu kura nɔ anyi. Nugbegblẽwɔlawo adze agbagba be yewoaƒã yewoƒe agbeƒaƒãnɔnɔ ɖe haxɔsetɔwo me eye woakplɔ ame aɖewo atrae! (Petro II, 2:1-3) Petro xlɔ̃ nu le fewuɖulawo hã ŋu. Eŋlɔ ɖe eƒe lɛta gbãtɔ me be “nuwo katã ƒe nuwuwu ɖo vɔ,” eye edze abe ɖe ame aɖewo nɔ fewu ɖum le nya sia ŋu ene. (Petro I, 4:7; Petro II, 3:3, 4) Mina míadzro Petro ƒe lɛta evelia me eye míakpɔ alesi wòdo ŋusẽ nɔviawo be woali ke le xɔse mee ɖa. Míadzro Petro II, ta 1 me le nyati gbãtɔ sia me.
Nusita Wòŋlɔ Ta Gbãtɔ Ðo
5. Aleke Petro dzra eƒe nuxlẽlawo ƒe susu ɖoe ɖe kuxiwo me dzodzro ŋu?
5 Petro meƒo nu tso kuxi sesẽawo ŋu enumake o. Ke boŋ enyɔ eƒe nuxlẽlawo ƒe ŋudzedzekpɔkpɔ ɖe nusi woxɔ esime wozu Kristotɔwo ŋu tsɔ dzra woƒe susu ɖoe ɖe kuxi siawo me dzodzro ŋu. Eɖo ŋku Mawu ƒe ŋugbedodo wɔnukuwo kple kakaɖedzi si le Biblia ƒe nyagblɔɖiwo ŋu dzi na wo. Egblɔ nɔnɔmetɔtrɔ la, Kristo ƒe Fiaɖuƒeŋusẽ me nɔnɔ ƒe ŋutega, si eya ŋutɔ kpɔ la na wo tsɔ wɔ esiae.—Mateo 17:1-8; Petro II, 1:3, 4, 11, 16-21.
6, 7. (a) Nukae míate ŋu asrɔ̃ tso Petro ƒe lɛtaa ƒe ŋgɔdonya me? (b) Ne míele nu xlɔ̃m ame la, nuka dzie wòanyo ɣeaɖewoɣi be míalɔ̃ ɖo le mía ɖokui ŋu?
6 Ðe míate ŋu asrɔ̃ nane tso Petro ƒe ŋgɔdonyaa mea? Ðe aɖaŋuɖoɖo menya xɔna bɔbɔe wu ne míedzro Fiaɖuƒe mɔkpɔkpɔ wɔnuku si ŋu mí katã míedea asixɔxɔe me kple amesiwo míele aɖaŋua ɖom na oa? Eye mía ŋutɔwo míaƒe nuteƒekpɔkpɔwo zazã hã ɖe? Anɔ eme be le Yesu ƒe ku megbe la, Petro gblɔ Kristo ƒe Fiaɖuƒe ŋutikɔkɔe me nɔnɔ ƒe ŋutega ma ŋu nya na amewo zi geɖe.—Mateo 17:9.
7 Ðo ŋku edzi hã be le ɣeyiɣi si me Petro ŋlɔ eƒe lɛta evelia la, anɔ eme godoo be Mateo ƒe Nyanyuia kple apostolo Paulo ƒe lɛta si wòŋlɔ na Galatiatɔwo kaka ɖo didiƒe. Eyata Petro ŋɔlimetɔwo anya nu nyuie tso eƒe gbɔdzɔgbɔdzɔwo kple nuteƒewɔwɔ ŋu. (Mateo 16:21-23; Galatiatɔwo 2:11-14) Gake esia mena dzi ɖe le eƒo be wòaƒo nu dzideƒotɔe o. Le nyateƒe me la, ana eƒe lɛta la me nyawo nawɔ dɔ ɖe amesiwo tsia dzi ɖe woawo ŋutɔwo ƒe gbɔdzɔgbɔdzɔwo ŋu la dzi. Eyata ne míele kpekpem ɖe amesiwo ŋu kuxiwo le ŋu la, ɖe mawɔ dɔ wu ne míelɔ̃ ɖe edzi be míawo hã míewɔa vodada oa?—Romatɔwo 3:23; Galatiatɔwo 6:1.
Gbedoname si me Ŋusẽdodo Le
8. Anye gɔmesese ka nue Petro zã nya “xɔse” ɖo?
8 Bu Petro ƒe gbedoname ŋu azɔ. Eƒo nu tso xɔse ŋu enumake esi wòyɔ eƒe nuxlẽlawo be “amesiwo kpɔ xɔse xɔasi ma ke kpli mí le mía Mawu kple mía xɔla Yesu Kristo ƒe dzɔdzɔenyenye la me.” (Petro II, 1:1) Le afisia la, nyagbɔgblɔ “xɔse” afia “kakaɖedzi sẽŋu” eye enye Kristotɔwo ƒe dzixɔsewo alo nufiafia bliboa si woyɔna ɣeaɖewoɣi le Ŋɔŋlɔawo me be “nyateƒe la.” (Galatiatɔwo 5:7; Petro II, 2:2; Yohanes II, 1) Zi geɖe la, wolɔ̃a nya “xɔse” zazã le gɔmesese sia nu wu eƒe gɔmesese gbadza si nye kaka ɖe ame alo nane dzi alo ŋuɖoɖo ɖe eŋu.—Dɔwɔwɔwo 6:7; Korintotɔwo II, 13:5; Galatiatɔwo 6:10; Efesotɔwo 4:5; Yuda 3.
9. Nukatae Petro ƒe gbedonamea adzɔ dzi na Dukɔwo me tɔwo koŋ etɔxɛe?
9 Petro ƒe gbedonamea ado dzidzɔ geɖe na eƒe nuxlẽla siwo nye Dukɔwo me tɔwo koŋ. Yudatɔwo kple Dukɔwo me tɔwo menyina o, wodoa vlo wo gɔ̃ hã, eye nazãbubu ɖe Dukɔwo me tɔwo ŋu ganɔ Yudatɔ siwo zu Kristotɔwo me kokoko. (Luka 10:29-37; Yohanes 4:9; Dɔwɔwɔwo 10:28) Ke hã Petro si nye dzɔdzɔme Yudatɔ kple Yesu Kristo ƒe apostolo gblɔ na eƒe nuxlẽlawo—Yudatɔwo kple Dukɔwo me tɔwo—be xɔse ɖeka ma ke kple mɔnukpɔkpɔ ɖekae le ye kple wo si sɔsɔe.
10. Nukawoe míate ŋu asrɔ̃ tso Petro ƒe gbedonamea me?
10 Bu nufiame nyui siwo míakpɔ le Petro ƒe gbedonamea me egbea ŋu kpɔ. Mawu medea vovototo ame me o; mevea ŋutigbalẽ alo dukɔ aɖe me tɔwo nu wu bubu o. (Dɔwɔwɔwo 10:34, 35; 11:1, 17; 15:3-9) Abe alesi Yesu ŋutɔ fia nui ene la, nɔviwoe Kristotɔwo katã nye, eye mele be mía dometɔ aɖeke nasusui be yele ŋgɔ na ye tɔwo o. Gakpe ɖe eŋu la, Petro ƒe gbedonamea te gbe ɖe edzi be xexeame katã ƒe nɔviwo ƒe habɔbɔe míenye eye xɔse si nɔ Petro kple nɔvia apostolo bubuawo si la ƒe ‘mɔnukpɔkpɔ ma ke’ le míawo hã mía si.—Mateo 23:8; Petro I, 5:9.
Sidzedze Kple Mawu ƒe Ŋugbedodowo
11. Esi Petro do gbe na wo vɔ la, nu vevi kawo dzie wòte gbe ɖo?
11 Esi Petro do gbe na wo vɔ la, eŋlɔ be: “Amenuveve kple ŋutifafa nasɔ gbɔ ɖe dzi na mi.” Aleke amenuveve kple ŋutifafa asɔ gbɔ ɖe dzi na míi? Petro ɖo eŋu be: “Le sidzedze Mawu kple Yesu, mía Aƒetɔ, la me.” Egblɔ yi edzi be: “Eƒe Mawu me ŋusẽ tsɔ nusiwo katã nyo hena agbe kple mawusosroɖa la, ke mí.” Gake aleke míawɔ axɔ nu xɔasi siawo? “To sidzedze amesi tsɔ eya ŋutɔ ƒe ŋutikɔkɔe kple ŋusẽ yɔ mí la me.” Eyata Petro te gbe ɖe edzi zi gbɔ zi eve be Mawu kple Via ŋuti sidzedze vavãtɔ hiã vevie.—Petro II, 1:2, 3; Yohanes 17:3.
12. (a) Nukatae Petro te gbe ɖe edzi be sidzedze vavãtɔ le vevie? (b) Ne míedi be míaxɔ Mawu ƒe ŋugbedodowo ƒe mevava la, nukae wòle be míawɔ gbã?
12 ‘Aʋatsonufiala’ siwo ŋu Petro xlɔ̃ nu le le ta 2 lia me tsɔa “nyakpakpawo” blea Kristotɔwoe. Wotoa esia wɔwɔ me dzea agbagba be yewoagagbugbɔ wo ayi ɖe agbegbegblẽnɔnɔ si me sidzedze vavãtɔ ɖe wo tsoe la me. Afɔku gã aɖe le eme na amesiwo woɖe to “sidzedze aƒetɔ kple xɔla Yesu Kristo me” eye emegbe woɖe mɔ wogava ble wo ake. (Petro II, 2:1-3, 20) Edze ƒã be esi Petro susui be yeava ƒo nu tso kuxi sia ŋu emegbe ta la, ete gbe ɖe akpa si sidzedze vavãtɔ wɔna le tenɔnɔ dzadzɛ ƒe amesinɔnɔ le Mawu gbɔ me dzi le eƒe lɛta la ƒe gɔmedzedze ke. Petro gblɔ be Mawu “tsɔ ŋugbedodo xɔasi gãtɔwo ke mí, bene míato esiawo me azu Mawu ƒe dzɔdzɔme gomekpɔlawo.” Gake hafi ŋugbedodo siawo siwo nye míaƒe xɔse ƒe akpa vevi aɖe nasu mía si la, Petro gblɔ be ele be gbã, “[míasi] tso nudzodzrowo ƒe gbegblẽ, si le xexe sia me la gbɔ.”—Petro II, 1:4.
13. Nuka mee Kristotɔ amesiaminawo kple ‘alẽ bubuawo’ siaa di be yewoalé ɖe asi sesĩe?
13 Aleke nèbua Mawu ƒe ŋugbedodowoe? Abe alesi Kristotɔ amesiaminawo bunɛ enea? Le ƒe 1991 me, Frederick Franz si nye Gbetakpɔxɔ Habɔbɔa ƒe zimenɔla ɣemaɣi, si wɔ ɣeyiɣiawo katã ƒe subɔsubɔdɔa wu ƒe 75 la, gblɔ amesiwo le mɔ kpɔm be yewoaɖu fia kple Kristo la ƒe seselelãme kpuie be: “Míele te sesĩe vaseɖe gaƒoƒo sia dzi, eye míayi edzi anɔ te sesĩe vaseɖe esime Mawu naɖee afia be yena yeƒe ‘ŋugbedodo xɔasi wɔnukuwo va eme.’ ” Nɔviŋutsu Franz ka ɖe tsitretsitsi hena dziƒogbenɔnɔ si ŋugbe Mawu do dzi, eye elé xɔse la me ɖe asi sesĩe va de asi na eƒe kuku le ƒe 99 xɔxɔ me. (Korintotɔwo I, 15:42-44; Filipitɔwo 3:13, 14; Timoteo II, 2:10-12) Nenema ke ame miliɔn geɖe lé woƒe xɔse me ɖe asi sesĩe eye woƒe susu katã le anyigba dzi paradiso si me amewo anɔ tegbee le dzidzɔ me si ƒe ŋugbe Mawu do la me nɔnɔ ŋu. Èle amesiawo domea?—Luka 23:43; Petro II, 3:13; Nyaɖeɖefia 21:3, 4.
Nuwɔwɔ Wòasɔ ɖe Mawu ƒe Ŋugbedodowo Nu
14. Nukatae Petro yɔ nyuiwɔwɔ gbã be enye nɔnɔme si wòle be míatsɔ akpe ɖe xɔse ŋu?
14 Ðe míedaa akpe na Mawu ɖe nusi ƒe ŋugbe wòdo la ta? Ne míedanɛ la, ke Petro gblɔ be ele be míaɖee afia. “Eye esia ŋuti ke” (esi Mawu do ŋugbe xɔasi siawo na mí ta), ele be míadze agbagba ɖesiaɖe anɔ agbe ɖe enu. Mele be wòasɔ gbɔ na mí be míele xɔse la me alo be míenya Biblia ƒe nyateƒea ko evɔ o. Ema ɖeɖe mesɔ gbɔ o! Ðewohĩ le Petro ƒe ŋkekea me la, hamea me tɔ aɖewo ƒoa nu le xɔse ŋu ŋutɔ gake wonɔa agbe gbegblẽ. Ele be woaɖe nunyuiwɔwɔ afia le woƒe agbenɔnɔ me, eyata Petro xlɔ̃ nu wo be: “Miɖe [nyuiwɔwɔ, NW] fia le miaƒe xɔse me.”—Petro II, 1:5; Yakobo 2:14-17.
15. (a) Nukatae woyɔ sidzedze ɖe nyuiwɔwɔ yome be enye nɔnɔme si míatsɔ akpe xɔse? (b) Nɔnɔme bubu kawo hãe akpe ɖe mía ŋu be míalé xɔse la me ɖe asi sesĩe?
15 Esi Petro yɔ nyuiwɔwɔ vɔ la, egayɔ nɔnɔme ade bubu siwo wòle be míatsɔ akpe míaƒe xɔse. Nusiawo dometɔ ɖesiaɖe hiã hafi míate ŋu ‘anɔ tsitre sesĩe le xɔse me.’ (Korintotɔwo I, 16:13) Esi xɔsegbela aɖewo nɔ ‘Ŋɔŋlɔawo me nyawo trom’ eye wonɔ ‘amewo blem’ ta la, Petro yɔ sidzedze kplɔe ɖo be ehiã vevie, esi wògblɔ be: “[Le nyuiwɔwɔ me la mitsɔ] sidzedze [kpee].” Egayi edzi be: “Le sidzedze me la, [mitsɔ] ɖokuidziɖuɖu [kpee], eye le ɖokuidziɖuɖu me la dzidodo, eye le dzidodo me la mawusosroɖa, eye le mawusosroɖa me la nɔvilɔlɔ̃, eye le nɔvilɔlɔ̃ me la lɔlɔ̃ na amewo katã.”—Petro II, 1:5-7; 2:12, 13; 3:16.
16. Nukae adzɔ ne míetsɔ nɔnɔme siwo Petro yɔ la kpe ɖe xɔse ŋu, gake nukae adzɔ ne míetsɔ wo kpe ɖe eŋu o?
16 Nukae adzɔ ne míetsɔ nu adre siawo kpe ɖe míaƒe xɔse ŋu? Petro ɖo eŋu be: “Ne nusiawo le mia me, eye wole agbɔ sɔm ɖe dzi la, mana mianye kuviatɔwo kple ame matsekuwo le sidzedze [vavãtɔ le] mía Aƒetɔ Yesu Kristo la me o.” (Petro II, 1:8) Gake Petro gblɔ be: “Amesi si nusiawo mele o la, enye ŋkuagbãtɔ, eye mekpɔa didiƒenu o, eye wòŋlɔ eƒe tsã nuvɔ̃wo kɔklɔɖa la be.” (Petro II, 1:9) De dzesii be Petro trɔ tso “mi” kple “míaƒe” zazã dzi va zã “amesi,” ‘eyama,’ kple “eƒe.” Togbɔ be ewɔ nublanui be ame aɖewo nye ŋkuagbãtɔwo, nuŋlɔbelawo, kple ame makɔmakɔwo hã la, dɔmenyotɔe la, Petro mele gbɔgblɔm be nenema yeƒe nuxlẽlawo hã le o.—Petro II, 2:2.
Ŋusẽdodo Nɔviawo
17. Anye nukae ʋã Petro wògblɔ tufafatɔe be woanɔ “nusiawo” wɔwɔ dzi?
17 Ðewohĩ esi Petro nya be woate ŋu able ame yeyewo koŋ bɔbɔe ta la, etsɔ tufafa de dzi ƒo na wo be: “Nɔviwo, mido vevie wu tsãtɔ, bena miali ke mia yɔyɔ kple tiatia la sesĩe; elabena ne miewɔ nusiawo la, miada vo akpɔ o.” (Petro II, 1:10; 2:18) Kristotɔ amesiamina siwo tsɔa nu adre siawo kpea woƒe xɔse la axɔ teƒeɖoɖo xɔasi aɖe, abe alesi Petro gblɔe ene be: “Woana gege ɖe mía Aƒetɔ kple xɔla Yesu Kristo ƒe fiaɖuƒe mavɔ la me mi wòasɔ gbɔ fũ.” (Petro II, 1:11) ‘Alẽ bubuawo’ axɔ Mawu Fiaɖuƒea ƒe dziɖuƒe si nye anyigba la ƒe domenyinyi mavɔ.—Yohanes 10:16; Mateo 25:33, 34.
18. Nukatae Petro lɔ̃ faa be ‘yeanɔ ŋkuɖoɖo nu dzi dzi’ na ye nɔviwo?
18 Petro di vevie be ye nɔviwo naxɔ teƒeɖoɖo xɔasi sia. Eŋlɔ be: “Eyaŋuti nyemadzudzɔ ŋkuɖoɖo nusiawo dzi na mi akpɔ o, wònye mienyae, eye wona mieli ke ɖe nyateƒe, si li kpli mi la me hafi.” (Petro II, 1:12) Petro zã Helagbe me nya ste·riʹzo si gɔme woɖe le afisia be “mieli ke” gake woɖe egɔme be ‘do ŋusẽ’ le nuxlɔ̃amenya si Yesu gblɔ na Petro do ŋgɔ me be: “Nado ŋusẽ nɔviwòwo!” (Luka 22:32) Esi Petro zã nya ma la, efia be ɖewohĩ eɖo ŋku nuxlɔ̃amenya vevi si wòxɔ tso eƒe Aƒetɔ gbɔ la dzi. Petro gblɔ azɔ be: “Mebui nusi dzɔ be, ŋkeke alesi mele agbadɔ sia [amegbetɔ ƒe ŋutilã] me la, matsɔ ŋkuɖoɖonudzi na mi anɔ mia nyɔmi. Elabena menyae bena, nye agbadɔ la ɖeɖeɖa la lilim.”—Petro II, 1:13, 14.
19. Kpekpeɖeŋunu kawoe míehiã egbea?
19 Togbɔ be Petro gblɔ dɔmenyotɔe be yeƒe nuxlẽlawo ‘li ke ɖe nyateƒea me’ hã la, enya be woƒe xɔse me ate ŋu agblẽ. (Timoteo I, 1:19) Esi wònya be magadidi hafi yeaku o ta la, egblɔ nusiwo dzi nɔviawo anɔ ŋku ɖomee emegbe si ana ŋusẽ nanɔ wo ŋu le gbɔgbɔ me tsɔ do ŋusẽ woe. (Petro II, 1:15; 3:12, 13) Nenema ke míawo hã míehiã ŋkuɖodzinyawo edziedzi bene míali ke le xɔse la me egbea. Amekae míenye alo ɣeyiɣi didi kae míele nyateƒea me o, míate ŋu agbe Biblia xexlẽ edziedzi, ɖokuisinusɔsrɔ̃, kple hamea ƒe kpekpewo dede o. Ame aɖewo doa taflatse be ɖeɖi te yewo ŋu akpa alo be wogblɔa nya ɖeka tɔgbe akpa alo be womewɔa dɔdasiawo nyuie o, gake Petro nya alesi mía dometɔ ɖesiaɖe ate ŋu abu xɔsee ne míeka ɖe mía ɖokui dzi akpa.—Marko 14:66-72; Korintotɔwo I, 10:12; Hebritɔwo 10:25.
Gɔmeɖokpe Sesẽ na Míaƒe Xɔse
20, 21. Aleke Yesu ƒe nɔnɔmetɔtrɔa do ŋusẽ Petro kple eƒe lɛtaawo xlẽlawo, siwo me míawo hã míele egbea, ƒe xɔsee?
20 Nya siwo wokpa aɖaŋutɔe dzie wotu míaƒe xɔse ɖoa? Petro ɖo eŋu ŋusẽtɔe be: “Menye gli, siwo wokpa kple aɖaŋu la, yome míedze, esime míena mienya mía Aƒetɔ Yesu Kristo ƒe ŋusẽ kple eƒe vava la o; ke boŋ míenye eƒe gãnyenye, si míekpɔ kple ŋku la, ƒe ɖaseɖilawo.” Petro, Yakobo, kple Yohanes nɔ anyi kple Yesu esime wokpɔ eƒe Fiaɖuƒeŋusẽ me nɔnɔ ƒe ŋutega. Petro ɖe eme be: “Exɔ bubu kple ŋutikɔkɔe tso Mawu Fofo la gbɔ, esime nenem gbe sia ɖi tso ŋutikɔkɔe gã nyui la me va egbɔ bena: ‘Amesia nye Vinye, si nyemelɔ̃a nu egbɔ o, si dzea ŋunye!’ Eye mía ŋutɔwo míese gbe sia tso dziƒo, esime míeli kplii le to kɔkɔe la dzi.”—Petro II, 1:16-18.
21 Ðikekemanɔmee la, esi Petro, Yakobo, kple Yohanes kpɔ ŋutega ma la, Fiaɖuƒea zu nu ŋutɔŋutɔ na wo! Petro gblɔ be: “Eye nyagblɔɖi, si li ke sesĩe wu la, le mía si, eye miewɔ nyuie bena, miekpɔa edzi.” Nyateƒee, kpeɖodzi sẽŋuwo li si tae Petro ƒe agbalẽa xlẽlawo, si me mí amesiwo li egbea hã míele, alé ŋku ɖe Mawu Fiaɖuƒea ŋuti nyagblɔɖiwo ŋu ɖo. Aleke wòle be míalé ŋku ɖe eŋui? Petro ɖo eŋu be: “Abe akaɖi, si le keklẽm le tsyɔtsyɔƒe ene, halase esime ŋu lake, eye ŋukeɣletivi ladze le miaƒe dziwo me.”—Petro II, 1:19; Daniel 7:13, 14; Yesaya 9:5, 6.
22. (a) Nuka ŋue wòle be míanɔ ŋudzɔ ɖo le dzime? (b) Aleke míawɔ alé ŋku ɖe nyagblɔɖinya la ŋu?
22 Míaƒe dzime ado viviti ne nyagblɔɖinya la meklẽ ɖe eme o. Gake esi Kristotɔwo léa ŋku ɖe eŋu ta woƒe dzi le ŋudzɔ ɖe ŋkeke si dzi “ŋukeɣletivi” Yesu Kristo ado le Fiaɖuƒe ŋutikɔkɔe me ŋu. (Nyaɖeɖefia 22:16) Aleke míawɔ alé ŋku ɖe nyagblɔɖinya la ŋu egbea? To Biblia sɔsrɔ̃, dzadzraɖo ɖe kpekpewo ŋu kple gomekpɔkpɔ le wo me, kpakple ‘ŋugbledede le nusiawo ŋu, kple nana be woaxɔ mía me’ mee. (Timoteo I, 4:15) Ne nyagblɔɖinya la aklẽ abe akaɖi ene le “tsyɔtsyɔƒe” (míaƒe dzime) la, ele be míaɖe mɔ be wòawɔ dɔ ɖe mía dzi vevie—ɖe míaƒe didiwo, seselelãmewo, nusiwo ʋãa mí, kple míaƒe taɖodzinuwo dzi. Ele be míanye Biblia srɔ̃lawo, elabena Petro wu ta gbãtɔ nu be: “Ŋɔŋlɔ la me nyagblɔɖiwo katã metso ame ŋutɔ ƒe gɔmefiafia gbɔ o; elabena nyagbɔgblɔɖi aɖeke metso ame ƒe lɔlɔ̃nu me kpɔ o, ke boŋ Gbɔgbɔ kɔkɔe lae ʋã Mawu ƒe ame kɔkɔewo, hafi wogblɔ nya ɖi.”—Petro II, 1:20, 21.
23. Nuka ŋue Petro II, ƒe ta gbãtɔ dzra nuxlẽlawo ƒe susu ɖo?
23 Le Petro ƒe agbalẽ evelia ƒe ta gbãtɔ me la, egblɔ ŋusẽdoamenya vevi aɖe si akpe ɖe mía ŋu be míalé míaƒe xɔse xɔasia me ɖe asi sesĩe. Fifia míele klalo ɖe nya vevi siwo kplɔe ɖo me dzodzro ŋu. Nyati si kplɔe ɖo adzro Petro II, ta 2, afisi apostoloa ƒo nu tso ŋusẽkpɔɖeamedzi gbegblẽ siwo va ge ɖe hameawo me ŋu le la me.
Èɖo Ŋku Wo Dzia?
◻ Nukatae Petro te gbe ɖe edzi be sidzedze vavãtɔ le vevie?
◻ Anye nukatae Petro yɔ nyuiwɔwɔ be enye nɔnɔme si míatsɔ akpe xɔse?
◻ Nukata Petro lɔ̃ faa be yeanɔ ŋku ɖom nu dzi na ye nɔviwo?
◻ Gɔmeɖokpe sesẽ kae Petro gblɔ be eli na míaƒe xɔse?
[Nɔnɔmetata si le axa 9]
Petro ƒe gbɔdzɔgbɔdzɔwo mena wòɖe asi le xɔse la ŋu o