Kpekpe Ðe Ame Bubuwo Ŋu Woasrɔ̃ Mawu ƒe Nudidiwo
“Ele nam kokoko be, mawɔe; elabena nenye be, nyemegblɔ nyanyui la fia o la, baba nam!”—KORINTOTƆWO I, 9:16.
1, 2. (a) Dɔ eve ƒokpli ka mee Yehowa di be míakpɔ gome le? (b) Nukae wòle be dzianukwaretɔwo nasrɔ̃ ale be woava zu Mawu ƒe Fiaɖuƒea teviwo?
NYANYUI le Yehowa si na ameƒomea. Fiaɖuƒe le esi, eye edi be amewo nase eŋuti nya le afisiafi! Ne míese nyanyui ma ko la, Mawu di be míagblɔe na ame bubuwo. Esia nye dɔ eve ƒokpli. Gbã la, ele be míaɖe gbeƒã Mawu ƒe Fiaɖuƒe ŋuti nyanyuia. Yesu gblɔ le eƒe nyagblɔɖi si ku ɖe “nuɖoanyiawo ƒe nuwuwu” ŋu me be: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.”—Mateo 24:3, 14.
2 Dɔ sia ƒe akpa eveliae nye nufiafia amesiwo xɔa Fiaɖuƒegbeƒãɖeɖea nyuie la. Le Yesu ƒe tsitretsitsi megbe la, egblɔ na eƒe nusrɔ̃lawo ƒe ha gã aɖe be: “Eyata miheyi ɖawɔ dukɔwo katã me nɔlawo ne woanye nusrɔ̃lawo, mianyrɔ wo ɖe Fofo la kple Vi la kpakple gbɔgbɔ kɔkɔe la ƒe ŋkɔa me, miafia wo bena, woawɔ nusiwo katã meɖo na mi la dzi. Eye, kpɔ ɖa, nye la meli kpli mi ŋkekeawo katã vaseɖe nuɖoanyiawo ƒe nuwuwu.” (Mateo 28:19, 20, NW) Menye ‘Kristo’ gbɔe ‘nusiwo wòɖo’ na wo la tso o; efia ame bubuwo be woawɔ Mawu ƒe sededewo, alo nudidiwo dzi. (Yohanes 14:23, 24; 15:10) Eyata nu fiafia amewo be ‘woawɔ nusiwo Kristo ɖo na mí’ la bia be míakpe ɖe wo ŋu woasrɔ̃ Mawu ƒe nudidiwo. Ele be dzianukwaretɔwo naɖo Mawu ƒe nudidiwo gbɔ ale be woate ŋu ava zu eƒe Fiaɖuƒea teviwo.
3. Nukae nye Mawu ƒe Fiaɖuƒe, eye nukae wòava wɔ si na Fiaɖuƒegbedasia nye nyanyui alea gbegbe?
3 Nukae Mawu ƒe Fiaɖuƒea nye? Eye nukae wòava wɔ si na Fiaɖuƒegbedasia nye nyanyui alea gbegbe? Dziƒodziɖuɖue Mawu ƒe Fiaɖuƒea nye. Enye nu vevi aɖe na Yehowa elabena eya dzie wòato akɔ eƒe ŋkɔ ŋu eye wòaɖe vlododo katã ɖa le eŋu. Fiaɖuƒe lae nye dɔwɔnu si Yehowa azã atsɔ ana woawɔ eƒe lɔlɔ̃nu le anyigba dzi abe alesi wowɔnɛ le dziƒo ene. Ema tae Yesu fia mí be míado gbe ɖa abia be Mawu ƒe Fiaɖuƒea nava eye wòƒoe ɖe mía nu be míatsɔe aɖo nɔƒe gbãtɔ le míaƒe agbe me. (Mateo 6:9, 10, 33) Èkpɔ nusita wòle vevie na Yehowa nenema gbegbe be míafia nu ame bubuwo le eƒe Fiaɖuƒea ŋua?
Dɔ Gãe Wònye Gake Menye Agba O
4. Aleke woate ŋu awɔ alesi dɔ si le mía dzi be míaɖe gbeƒã nyanyui la menye agba o la ƒe kpɔɖeŋui?
4 Agbae wònye be míaɖe gbeƒã nyanyui sia? Kura o! Le kpɔɖeŋu me: Enye vifofo ƒe dɔ be wòakpɔ eƒe ƒomea ƒe ŋutilãmenuhiahiãwo gbɔ. Esia mawɔmawɔ afia be egbe Kristotɔwo ƒe xɔse la. Apostolo Paulo ŋlɔ bena: “Ne ame aɖe melé be na ye ŋutɔ tɔwo o, eye vevietɔ na ye ŋutɔ ƒe aƒemetɔwo o la, egbe xɔse la, eye wòvɔ̃ɖi wu dzimaxɔsetɔ.” (Timoteo I, 5:8) Gake ɖe dɔ ma nye agba na ŋutsu Kristotɔa? Ao, menye agbae o ne elɔ̃ eƒe ƒomea eye wòdi be yeakpɔ woƒe nuhiahiãwo gbɔ.
5. Togbɔ be gbeƒãɖeɖe kple nusrɔ̃lawo wɔwɔ dɔa nye dɔ si le mía dzi hã la, nukata wòle be ewɔwɔ nadzɔ dzi na mí?
5 Nenema ke gbeƒãɖeɖe kple nusrɔ̃lawo wɔwɔ nye dɔ si wòle be míawɔ, eye enye nudidi si dzi míaƒe agbe ŋutɔŋutɔ nɔ te ɖo. Paulo gblɔe ale: “Ele nam kokoko be, mawɔe; elabena nenye be, nyemegblɔ nyanyui la fia o la, baba nam!” (Korintotɔwo I, 9:16; tsɔe sɔ kple Xezekiel 33:7-9.) Gake lɔlɔ̃e ʋãa mí míeɖea gbeƒã, menye esi wònye dɔ si wòle be míawɔ ta ko o. Gbã la, míelɔ̃ Mawu, gake míelɔ̃ mía haviwo hã, eye míenya alesi gbegbe wòle vevie be woase nyanyui lae. (Mateo 22:37-39) Enaa etsɔme mɔkpɔkpɔ wo. Eteƒe madidi o Mawu ƒe Fiaɖuƒea aɖɔ nu madzɔmadzɔwo ɖo, aɖe ameteteɖeanyi katã ɖa, eye wòana ŋutifafa kple ɖekawɔwɔ naxɔ aƒe ɖi—esiawo katã anye yayra mavɔ na amesiwo bɔbɔa wo ɖokui ɖe eƒe dziɖuɖu dzɔdzɔea te. Ðe medzɔa dzi na mí, ẽ, hevivia mía nu, be míagblɔ nyanyui sia na ame bubuwo oa?—Psalmo 110:3.
6. Nukata kuxi sesẽ aɖe le gbeƒãɖeɖe kple nusrɔ̃la wɔwɔ dɔa me?
6 Gake gbeƒãɖeɖe kple nusrɔ̃lawo wɔwɔ dɔ sia hea kuxi sesẽ aɖe vɛ. Amewo le vovovo. Wo katã ƒe ɖetsɔleme alo ŋutetewo mele ɖeka o. Ame aɖewo nya agbalẽ nyuie, eye bubuwo hã mesrɔ̃ agbalẽ yi ŋgɔ boo o. Fifia wobua nuxexlẽ—si nye modzakaɖenu tsã—be enye dɔ sesẽ zi geɖe. Agbalẽmaxlẽmaxlẽ, si gɔme woɖe be “nɔnɔme si nye be ame nanya nuxexlẽ gake madi be yeaxlẽ nu o,” la nye kuxi si le dzidzim ɖe edzi le dukɔ siwo me ame geɖe nya agbalẽ le wu gɔ̃ hã me. Ekema aleke míawɔ akpe ɖe ame siwo tso nɔnɔme vovovowo me eye nusiwo dzɔa dzi na wo to vovo alea la ŋu woasrɔ̃ nusi Mawu di?—Tsɔe sɔ kple Korintotɔwo I, 9:20-23.
Wodzra Mí Ðo Nyuie be Míakpe Ðe Ame Bubuwo Ŋu
7. Aleke “dɔla nuteƒewɔla kple aɖaŋudzela” la dzra mí ɖo be míakpe ɖe ame bubuwo ŋu woasrɔ̃ Mawu ƒe nudidiwoe?
7 Ne èkpɔ dɔwɔnu alo mɔ̃ siwo sɔ la, dɔ sesẽ wɔwɔ nɔa bɔbɔe wu. Woate ŋu atrɔ asi le dɔwɔnu si sɔ na dɔ aɖe koŋ egbea la ŋu alo woawɔ bubu le etsɔme le esi hiahiãwo le tɔtrɔm ta. Nenemae wòle le dɔ si wode asi na mí be míaɖe gbeƒã gbedasi si ku ɖe Mawu ƒe Fiaɖuƒea ŋuti me. Le ƒe siwo va yi me la, “dɔla nuteƒewɔla kple aɖaŋudzela la” na dɔwɔnu nyuiwo mí, si nye agbalẽ siwo ŋu wotrɔ asi le etɔxɛe be míazã le aƒeme Biblia nusɔsrɔ̃wo wɔwɔ me. (Mateo 24:45) Woto mɔ sia dzi dzra mí ɖo be míakpe ɖe ame siwo tso “dukɔ sia dukɔ kple to sia to kple . . . gbegbɔgblɔ sia gbegbɔgblɔ” me ŋu woasrɔ̃ Mawu ƒe nudidiwo. (Nyaɖeɖefia 7:9) Ɣeaɖewoɣi la, wonaa dɔwɔnu bubuwo mí be míatsɔ akpɔ nuhiahiã siwo le tɔtrɔm le xexeame katã la gbɔ. Mina míade ŋugble le eƒe kpɔɖeŋu ʋee aɖewo ŋu kpɔ.
8. (a) Akpa kae agbalẽ si nye “Let God Be True” wɔ le Biblia ƒe hehenana dodo ɖe ŋgɔ me? (b) Biblia-srɔ̃gbalẽ kae wona mí le ƒe 1968 me, eye aleke wotrɔ asi le eŋu etɔxɛe? (d) Aleke Nyateƒe-gbalẽa kpe ɖe mía ŋui le nusrɔ̃lawɔwɔdɔa me?
8 Tso ƒe 1946 vaseɖe ƒe 1968 me la, wozã agbalẽ si nye “Let God Be True” wònye dɔwɔnu sẽŋu aɖe le Biblia me hehenana me, eye wota ɖekaɖeka 19,250,000 ɖe gbegbɔgblɔ 54 me. Wozã agbalẽ si nye Nyateƒe, Si Kplɔa Ame Yia Agbe Mavɔ Mee si woɖe ɖe go le ƒe 1968 me la nyuie le Biblia sɔsrɔ̃ kple ɖetsɔlemetɔwo me. Tsã la, ebɔ be ame aɖewo nanɔ nu srɔ̃m kple Yehowa Ðasefowo ƒe geɖe gake womaxɔ nyɔnyrɔ o. Gake wotrɔ asi le dɔwɔnu sia ŋu be wòaku ɖe nusrɔ̃via ŋu, eye wòade dzi ƒo nɛ be wòatsɔ nusi srɔ̃m wòle la awɔ dɔe. Nukae do tso eme? Agbalẽ si nye Jehovah’s Witnesses—Proclaimers of God’s Kingdom gblɔ be: “Le subɔsubɔƒe etɔ̃ siwo dze egɔme tso September 1, 1968, eye wòwu enu le August 31, 1971 dzi me la, ame 434,906 ye xɔ nyɔnyrɔ—si wu amesiwo xɔ nyɔnyrɔ le subɔsubɔƒe etɔ̃ siwo do ŋgɔ me la teƒe eve!” Tso esime woɖe Nyateƒe ƒe agbalẽa ɖe go la, wota ɖekaɖeka 107,000,000 ɖe gbegbɔgblɔ 117 me si wɔ nuku.
9. Nu tɔxɛ kae le Agbe Tegbee ƒe agbalẽa ŋu, eye ŋusẽ kae wòkpɔ ɖe Fiaɖuƒegbeƒãɖelawo ƒe agbɔsɔsɔ dzi?
9 Le ƒe 1982 me la, agbalẽ si nye Ate Ŋu Anɔ Agbe Tegbee le Paradiso me le Anyigba Dzi va zu agbalẽ si koŋ míezã le Biblia-nusɔsrɔ̃wo wɔwɔ me. Nɔnɔmetata siwo wu 150 ye le dɔwɔnu sia me, eye woŋlɔ nɔnɔmetataŋunya nyui siwo te gbe ɖe nusi fiam nɔnɔmetataawo le dzi tẽ la ɖe ɖesiaɖe gbɔ. October 1982 Míaƒe Fiaɖuƒe Subɔsubɔdɔ gblɔ be: “Le ƒe siwo ade 20 siwo me míezã ‘Let God Be True’ wònye míaƒe nusrɔ̃gbalẽ vevitɔ (tso 1946 vaseɖe ƒe 1960 ƒeawo ƒe domedome) la, Fiaɖuƒegbeƒãɖela siwo wu 1,000,000 ye va kpe ɖe mía ŋu. Emegbe gbeƒãɖela 1,000,000 bubu gava kpe ɖe eŋu esime míezã Nyateƒe, Si Kplɔa Ame Yia Agbe Mavɔ Mee wònye míaƒe nusrɔ̃gbalẽ vevi tso esime woɖee ɖe go le ƒe 1968 me. Esi míeva nɔ nusrɔ̃gbalẽ yeye si nye Ate Ŋu Anɔ Agbe Tegbee le Paradiso me le Anyigba Dzi zãm la, ɖe míakpɔe be Fiaɖuƒegbeƒãɖelawo agadzi ɖe edzi nenemaa? Ẽ, ne Yehowa ƒe lɔlɔ̃nue wònye!” Edze ƒã be enye Yehowa ƒe lɔlɔ̃nu hã, elabena tso ƒe 1982 vaseɖe ƒe 1995 me la, ame 2,700,000 kple edzivɔ va kpe ɖe Fiaɖuƒegbeƒãɖelawo ŋu!
10. Dɔwɔnu yeye kae wona mí le ƒe 1995 me, eye nukata wòana Biblia-nusrɔ̃viwo nawɔ gbɔgbɔmeŋgɔyiyi kabakaba wu?
10 Yesu gblɔ be: “Nuŋeŋe la sɔ gbɔ; ke nuŋelawo mede ha o.” (Mateo 9:37) Nuŋeŋea sɔ gbɔ nyateƒe. Dɔ geɖe gali kokoko míawɔ. Le dukɔ aɖewo me la, ele be amewo nalala ɣeyiɣi aɖe hafi woawɔ Biblia-nusɔsrɔ̃ kple wo. Eyata esi woɖoe be woakaka Mawu ŋuti sidzedze ɖe edzi kabakaba wu ta la, “dɔla nuteƒewɔla kple aɖaŋudzela la” na dɔwɔnu yeye aɖe mí le ƒe 1995 me, si nye axa 192-gbalẽ si ƒe tanyae nye Sidzedze si Kplɔa Ame Yia Agbe Mavɔ Me. Dɔwɔnu vevi sia meƒo nu tso alakpanufiafiawo ŋu o. Egblɔ Biblia me nyateƒewo le mɔ nyui aɖe nu. Míekpɔ mɔ be ana Biblia-nusrɔ̃viwo nawɔ gbɔgbɔmeŋgɔyiyi kabakaba wu. Sidzedze ƒe agbalẽa le dɔ wɔm xoxo le xexeame ƒe agblea dzi eye wota ɖekaɖeka 45,500,000 ɖe gbegbɔgblɔ 125 me eye wogale egɔme ɖem ɖe gbegbɔgblɔ 21 bubuwo me.
11. Dɔwɔnu nyui kae wona mí be míatsɔ akpe ɖe amesiwo menya agbalẽ o alo amesiwo mete ŋu xlẽa nu nyuie o ŋu, eye dɔ ɖedzesi kae wòwɔ le míaƒe xexeame katã ƒe nufiafiadɔa me?
11 Le ɣeyiɣi aɖewo me la, “dɔla nuteƒewɔla” la na dɔwɔnu siwo ŋu wotrɔ asi le na ame aɖewo koŋ alo na ame ʋee aɖewo ko la mí. Le kpɔɖeŋu me, nukae woawɔ na amesiwo ahiã kpekpeɖeŋu tɔxɛ le afisi wotso alo le subɔsubɔha si me wodzi wo ɖo ta? Aleke míawɔ akpe ɖe wo ŋu woasrɔ̃ Mawu ƒe nudidiwo? Le ƒe 1982 me la, nusi tututu dim míenɔ la ka mía si—eyae nye axa 32 ƒe agbalẽ gbadza si nye Se Agbe ƒe Vivi le Anyigba Dzi Tegbee! Agbalẽ sia si me nɔnɔmetata nyuiwo le la nye dɔwɔnu nyui aɖe le nufiafia amesiwo menya agbalẽ o alo womete ŋu xlẽa nu nyuie o me. Ŋɔŋlɔawo me nufiafia vevi siwo me kɔ nyuie ŋutɔ eye wo gɔmesese le bɔbɔe ye le eme. Tso esime woɖe Se Agbe ƒe Vivi ƒe agbalẽ gbadzaa ɖe go la, ewɔ dɔ gã aɖe le míaƒe xexeame katã ƒe nufiafiadɔa me. Wota ɖekaɖeka 105,100,000 kple edzivɔ ɖe gbegbɔgblɔ 239 me, si na wòzu agbalẽ si gɔme Gbetakpɔxɔ Habɔbɔa ɖe ɖe gbegbɔgblɔ geɖe me wu ɖesiaɖe vaseɖe fifia!
12, 13. (a) Tso ƒe 1990 me la, mɔ yeye si dzi míato aɖo ame geɖe gbɔ kae “dɔla nuteƒewɔla” la to vɛ? (b) Aleke míazã Habɔbɔa ƒe videowo le míaƒe gbeadzisubɔsubɔdɔa mee? (d) Dɔwɔnu yeye kae wona mí nyitsɔ laa be wòakpe ɖe mía ŋu le nusrɔ̃lawɔwɔdɔa me?
12 Tso ƒe 1990 me la, “dɔla nuteƒewɔla” la gana nufiamɔnu aɖe mí kpe ɖe agbalẽ tatawo ŋu wònye mɔ yeye aɖe si dzi míato aɖo nyasela gbogbo aɖewo gbɔ—eyae nye videokasɛtwo. Le ƒe ma ƒe October me la, woɖe aɖabaƒoƒo 55 ƒe video si nye Jehovah’s Witnesses—The Organization Behind the Name ɖe go—si nye video gbãtɔ si Gbetakpɔxɔ Habɔbɔa wɔ. Ðeɖefia dzeani si fiaa nu ame, si le gbegbɔgblɔ 35 me, la ɖe alesi Yehowa ƒe ame siwo tsɔ wo ɖokui na ƒe xexeme katã ƒe habɔbɔa le wɔwɔm ɖe Yesu ƒe sedede dzi be woaɖe gbeƒã nyanyuia le anyigba dzi katã la fia. Wotrɔ asi le video la ŋu etɔxɛe be wòakpe ɖe mía ŋu le nusrɔ̃lawɔwɔdɔa me. Fiaɖuƒegbeƒãɖelawo zã dɔwɔnu yeye sia le gbeadzisubɔsubɔdɔa me enumake. Ame aɖewo tsɔnɛ dea woƒe agbalẽkplowo me, eye wonɔa klalo be yewoaɖee afia ɖetsɔlemetɔwo alo aɣee na wo. Esi woɖee ɖe go megbe kpuie la, dzikpɔla mɔzɔla aɖe ŋlɔ bena: “Videowo va zu mɔnu si zãm wole le ƒe alafa 21 lia me tsɔ le ame miliɔn geɖe ƒe susu kple dziwo gbɔ ɖomee, eyata míele mɔ kpɔm be video sia anye gbãtɔ le video geɖe siwo Habɔbɔa azã atsɔ ado Fiaɖuƒedɔa ɖe ŋgɔ la dome.” Le nyateƒe me la, wowɔ video bubuwo, siwo ƒe ɖee nye esi mã ɖe akpa etɔ̃ me si nye The Bible—A Book of Fact and Prophecy kple Jehovah’s Witnesses Stand Firm Against Nazi Assault. Ne Habɔbɔa ƒe video le mia degbe me la, ɖe nèzãa wo le wò gbeadzisubɔsubɔdɔa mea?a
13 Wona dɔwɔnu yeye aɖe mí nyitsɔ laa wònye agbalẽ gbadza si nye Nukae Mawu Di tso Mía Si? be wòakpe ɖe mía ŋu le nusrɔ̃lawɔwɔdɔa me. Nukata wotae? Aleke míazãe?
Ŋkuléle Ðe Dɔwɔnu Yeye aɖe Ŋu
14, 15. Amekawoe wotrɔ asi le Nusi Mawu Di ƒe agbalẽ gbadza la ŋu na, eye nya kawoe le eme?
14 Wotrɔ asi le agbalẽ yeye si nye Nukae Mawu Di tso Mía Si? ŋu na amesiwo xɔ Mawu dzi se xoxo eye wodea bubu Biblia ŋu. Dzikpɔla mɔzɔlawo kple dutanyanyuigblɔla siwo xɔ hehe le Gilead siwo si ƒe geɖe ƒe nuteƒekpɔkpɔwo su le dɔa gɔmedzedze le dukɔwo me la na kpekpeɖeŋu le asitɔtrɔ le agbalẽ gbadza sia ŋu me. Nusɔsrɔ̃ si kpe nya veviwo ɖo nyuie eye wòƒo nu tso Biblia me nufiafia veviwo ŋu lae le eme. Alesi wogblɔ nyawoe la vivi, ebɔbɔ, eye wòle tẽ. Gake nyawo mebɔbɔ akpa o. Menye “notsi” koe le eme o ke “nuɖuɖu sesẽ” si tso Mawu ƒe Nya la me hã le eme eye wogblɔe ale be ame akpa gãtɔ nate ŋu ase egɔme.—Hebritɔwo 5:12-14.
15 Le ƒe siawo me la, Fiaɖuƒegbeƒãɖela siwo le dukɔ vovovowo me bia agbalẽ sia tɔgbe tututu. Le kpɔɖeŋu me, Gbetakpɔxɔ Habɔbɔ ƒe alɔdzedɔwɔƒe si le Papua New Guinea ŋlɔ bena: “Subɔsubɔhawo ƒe nufiafia siwo tsi tre ɖe wo nɔewo ŋu tɔtɔ amewo. Wohiã nyateƒenya siwo le tẽ, siwo dzi mawunyakpukpui siwo woate ŋu axlẽ le woa ŋutɔwo ƒe Bibliawo me la ɖo kpee. Wohiã nya si le tẽ si ɖe nusi Mawu di tso nyateƒe Kristotɔwo si kple kɔnu kpakple nuwɔna siwo medzea eŋu o fia.” Nusi Mawu Di ƒe agbalẽ gbadza la nye nusi tututu míehiã be míakpe ɖe amesiawo ŋu woasrɔ̃ Mawu ƒe nudidiwo.
16. (a) Amekawoe numeɖeɖe bɔbɔe siwo le agbalẽ gbadza yeyea me ate ŋu aɖe vi na koŋ? (b) Aleke Nusi Mawu Di ƒe agbalẽ gbadza yeyea ate ŋu aɖe vi na amesiwo le wò anyigbamamã me?
16 Aleke nàzã dɔwɔnu yeye siae? Gbã la, woate ŋu azãe atsɔ asrɔ̃ nu kple amesiwo mete ŋu xlẽa nu nyuie o alo amesiwo madi be yewoaxlẽ nu o.b Numeɖeɖe bɔbɔe siwo le agbalẽ gbadza la me aɖe vi na amesiawo. Esi Gbetakpɔxɔ Habɔbɔa ƒe alɔdzedɔwɔƒewo to agbalẽ sia si woɖo ɖe wo do ŋgɔ me la, woŋlɔ nya siawo siwo gbɔna: “Agbalẽ gbadza la aɖe vi ŋutɔ le dukɔa ƒe akpa geɖe afisi amewo melɔ̃na xlẽa nu fũ o.” (Brazil) “Amesiwo ʋu va afisia la dometɔ geɖe mete ŋu xlẽa wo degbe o eye Fransegbe xexlẽ gasesẽna na wo kokoko. Míate ŋu azã agbalẽ gbadza sia le nusɔsrɔ̃ kple amesiawo me.” (France) Wò ŋku ate ŋu adze amesiwo le wò anyigbamamã me siwo Nusi Mawu Di ƒe agbalẽ gbadza la aɖe vi na dzia?
17. Mɔ ka nu woate ŋu azã agbalẽ gbadza yeyea le le dukɔ geɖe me, eye nukatae?
17 Evelia, agbalẽa anyo woatsɔ adze Biblia-nusɔsrɔ̃ gɔme kple mawuvɔ̃la siwo le dukɔ geɖe me eɖanye afikae woƒe agbalẽnyanya se ɖo o. Gake ele be míadze agbagba adze nusɔsrɔ̃ gɔme le agbalẽ si nye Sidzedze si Kplɔa Ame Yia Agbe Mavɔ Me la me. Gake le ame aɖewo gome la, anɔ bɔbɔe wu be woadze nusɔsrɔ̃ gɔme kpli wo le agbalẽ gbadza la me. Emegbe le ɣeyiɣi si sɔ me la, woate ŋu atrɔ nusɔsrɔ̃a ayi ɖe Sidzedze-gbalẽ si nye nusrɔ̃gbalẽ vevi si míelɔ̃a zazã wu me. Gbetakpɔxɔ Habɔbɔa ƒe alɔdzedɔwɔƒewo ŋlɔ nu tso Nusi Mawu Di ƒe agbalẽ gbadza sia ŋu be: “Biblia-nusɔsrɔ̃wo gɔmedzedze sesẽ, eye nusɔsrɔ̃ gɔmedzedze nɔa bɔbɔe wu ne gbeƒãɖelawo dze egɔme kple agbalẽ gbadza.” (Germany) Agbalẽ gbadza sia tɔgbe asɔ le Biblia-nusɔsrɔ̃ yeye gɔmedzedze me, eye emegbe woayi edzi le Sidzedze ƒe agbalẽa me.” (Italy) “Togbɔ be Japantɔ geɖe nya agbalẽ nyuie hã la, woƒe akpa gãtɔ menya nu boo aɖeke tso Biblia kple eƒe nufiafia veviwo ŋu o. Agbalẽ gbadza la anye mɔ nyui si dzi woato ava srɔ̃ Sidzedze ƒe agbalẽa.”—Japan.
18. Nuka dzie wòle be míaɖo ŋkui le Mawu ƒe nudidiwo gbɔ ɖoɖo me?
18 Habɔbɔa ƒe alɔdzedɔwɔƒe siwo le xexeame godoo bia agbalẽ gbadza sia, eye woɖe mɔ be woaɖe egɔme ɖe gbegbɔgblɔ 221 me. Neva eme be agbalẽ yeye sia nanye nu vevi si akpe ɖe mía ŋu be míana kpekpeɖeŋu ame bubuwo be woasrɔ̃ nusi Yehowa Mawu di tso wo si. Le míawo gome la, mina míaɖo ŋku edzi be agbenɔnɔ ɖe Mawu ƒe nudidiwo nu, siwo me sedede be míaɖe gbeƒã ahawɔ nusrɔ̃lawo hã le la, naa mɔnukpɔkpɔ vevi aɖe mí be míaɖe alesi gbegbe míelɔ̃ Yehowa afia eyama. Ẽ, nusi Mawu di tso mía si menye agba o. Mɔ nyuitɔ kekeake si nu woanɔ agbe ɖoe wònye!—Psalmo 19:8-12.
[Etenuŋɔŋlɔwo]
a Agbalẽ si nye Jehovah’s Witnesses—Proclaimers of God’s Kingdom gblɔ be: “Videokasɛtwo meva le xɔxɔm ɖe agbalẽ tata alo ame ŋutɔ ƒe ɖaseɖiɖi teƒe o. Habɔbɔa ƒe agbalẽwo yi edzi le akpa vevi aɖe wɔm le nyanyuia kaka me. Yehowa Ðasefowo ƒe aƒeme yi aƒeme dɔa kpɔtɔ nye woƒe subɔsubɔdɔa ƒe akpa aɖe si wotu ɖe Ŋɔŋlɔawo dzi sesĩe. Gake fifia videokasɛtwo va le alɔ dom nusiawo eye enye dɔwɔnu vevi siwo woatsɔ ana amewo naxɔ Yehowa ƒe ŋugbedodo xɔasiwo dzi ase eye wòaʋã wo woakpɔ ŋudzedze ɖe nusi wòna wole wɔwɔm le anyigba dzi le míaƒe ŋkekea me ŋu.”
b Kpɔ nyati si nye “Dɔwɔnu Yeye si Akpe Ðe Amewo Ŋu Woasrɔ̃ Mawu ƒe Nudidiwo,” si le axa 16-17 hena numeɖeɖe le alesi woatsɔ Nusi Mawu Di ƒe agbalẽ gbadza la awɔ nusɔsrɔ̃e ŋu.
Àte Ŋu Aɖe Wo Mea?
◻ Dɔ eve ƒokpli kawo mee Yehowa di be yesubɔlawo nakpɔ gome le?
◻ Nukata dɔ si le mía dzi be míaɖe gbeƒã ahawɔ nusrɔ̃lawo la menye agba na mí o?
◻ Dɔwɔnu kawoe “dɔla nuteƒewɔla kple aɖaŋudzela” la na mí be míazã le míaƒe gbeƒãɖeɖe kple nusrɔ̃lawɔwɔ dɔa me?
◻ Amekawoe wotrɔ asi le Nusi Mawu Di ƒe agbalẽ gbadza la ŋu na, eye aleke míate ŋu azãe le míaƒe subɔsubɔdɔa me?
[Nɔnɔmetata si le axa 24]
Míaƒe gbeƒãɖeɖe kple nusrɔ̃la wɔwɔ dɔa menye agba o
[Nɔnɔmetata siwo le axa 26]
“Let God Be True” (1946, wogbugbɔ tae le ƒe 1952 me): 19,250,000 le gbegbɔgblɔ 54 me
“Nyateƒe, Si Kplɔa Ame Yia Agbe Mavɔ Mee” (1968): 107,000,000 le gbegbɔgblɔ 117 me (Fransegbe me tɔ me)
“Ate Ŋu Anɔ Agbe Tegbee le Paradiso me le Anyigba Dzi” (1982): 80,900,000 le gbegbɔgblɔ 130 me (Russiagbe me tɔ me)
“Sidzedze si Kplɔa Ame Yia Agbe Mavɔ Me” (1995): 45,500,000 le gbegbɔgblɔ 125 me (Germangbe me tɔ me)