Nu Ka Tae Yesu Mehe Dunya O?

KPƆ nane si dzɔ le ƒe 32 M.Ŋ. me la ɖa le susu me. Fiẽ me lɔƒoe. Yesu, si nye Mesia si ŋugbe wodo la, xɔ ŋkɔ xoxo le ale si wòda gbe le dɔnɔwo ŋu hefɔ ame kukuwo gɔ̃ hã ɖe tsitre ta. Ewɔ nukunu hefia nu ame akpe geɖe tso Mawu ŋu le ŋkekea me, ale be ameawo ƒe nu ku. Fifia dɔ le ameawo wum, eye wòma wo me ɖe ƒuƒoƒo suesuewo me. Edo gbe ɖa na Yehowa henyi wo katã nukutɔe. Emegbe ena woƒo esiwo susɔ la nu ƒu, ale be naneke dome nagagblẽ o. Aleke ameawo wɔ nu ɖe Yesu ŋui?—Yohanes 6:1-13.

Esi ameawo kpɔ nukunu siwo Yesu wɔ kple ale si wòte ŋu na amehawo nɔ ɖoɖo nu, eye wòkpɔ woƒe nu hiahiã gbɔ na wo la, woƒo nya ta be ne eya amea nye fia ɖe yewo nu la, anyo ŋutɔ. (Yohanes 6:14) Esia mewɔ nuku o. Kplɔla nyui hiã wo vevie ɣemaɣi; dukɔ bubue le wo dzi ɖum hete wo ɖe anyi le wo denyigba lɔlɔ̃a dzi. Eya ta woƒoe ɖe Yesu nu be wòahe dunya kpli yewo. Azɔ kpɔe ɖa be aleke Yesu awɔ nui hã.

Yohanes 6:15 gblɔ be: “Esi Yesu nya be wole vava ge, eye woalé ye sesẽe aɖo fiae la, eɖe eɖokui ɖe aga yi to la dzi.” Nu nyuitɔ si Yesu ate ŋu awɔ koe ma. Eɖoe be yemahe dunya gbeɖe o. Esi wògbe ko la, ɖe wògbe. Egblɔ be nenema kee wòle be ye yome dzelawo hã nawɔ nui. (Yohanes 17:16) Nu ka tae wòwɔ nu alea?

Nu Ka Tae Yesu Mede Akpa Aɖeke Dzi O?

Ŋɔŋlɔawo dzie Yesu nɔ te ɖo gbe be yemade dunyaheha aɖeke dzi o. Bu susu eve ŋu kpɔ.

“Amegbetɔ ɖua fia ɖe ame bubuwo dzi hena woƒe dzɔgbevɔ̃e.” (Nyagblɔla 8:9) Nenemae Biblia gblɔ tso amegbetɔwo ƒe dziɖuɖuwo ŋu. Ðo ŋku edzi be Yesu nye gbɔgbɔmeme nɔ dziƒo kpɔ hafi va anyigba dzi. (Yohanes 17:5) Eya ta enyae be aleke kee amegbetɔwo adze agbagbae o, womate ŋu akpɔ ame miliɔn akpe geɖewo ƒe nu hiahiãwo gbɔ o; eye Mawu mewɔ amegbetɔwo be woaɖu wo nɔewo dzi hã o. (Yeremiya 10:23) Yesu nyae be menye amegbetɔwo ƒe dziɖuɖuwoe akpɔ ameƒomea ƒe kuxiwo gbɔ o, ke boŋ dziɖuɖu bubue.

“Xexe blibo la katã le vɔ̃ɖitɔ la ƒe ŋusẽ te.” (1 Yohanes 5:19) Ðe nya ma wɔ nuku na wòa? Ewɔa nuku na ame geɖe. Elabena wonyae be susu nyui ye le ame siwo hea dunya la dometɔ aɖewo si, elabena ɖe wodi be yewoana xexea me nanyo wu. Gake susu nyui ka kee ɖale dziɖula aɖe si o, ame si Yesu yɔ be “xexe sia dzi ɖula” la ƒe ŋusẽ tee wòle. (Yohanes 12:31; 14:30) Esia tae Yesu gblɔ na dunyahela aɖe kpɔ be: “Nye fiaɖuƒe menye xexe sia ƒe akpa aɖeke o.” (Yohanes 18:36) Yesue wotia be wòanye Mawu fiaɖuƒe, si woɖo anyi ɖe dziƒo la, ƒe Fia. Ne ɖe Yesu he dunya la, afia be megale Fofoa ƒe dziɖuɖu dzi o.

Ðe Yesu ƒe nuwɔna fia be mele be ye yome dzelawo nabɔbɔ ɖe dziɖuɖu siwo le anyigba dzi la te oa? Kpao, ke boŋ ɖe wòfia wo be woada asɔ le nu si Mawu di tso wo si kple nu si dziɖuɖuwo bia tso wo si la me.

Yesu De Bubu Dziɖulawo Ŋu

Gbe ɖeka esi Yesu le nu fiam le gbedoxɔa me la, ame siwo tsi tsitre ɖe eŋu la tre mɔ nɛ esi wobiae be ɖe wòle be woaxe adzɔ hã. Ne Yesu ɖo eŋu be ao la, woabu eƒe nyaŋuɖoɖoa be enye tsitretsitsi ɖe dziɖuɖua ŋu, eye wòana ame siwo le didim xoxo be Roma dziɖuɖua nadzudzɔ yewo tete ɖe anyi la nadze aglã. Gake ne Yesu ɖo eŋu be ɛ̃ la, ame geɖe ase le wo ɖokuiwo me be eya hã de nu madzɔmadzɔ siwo wɔm wole ɖe yewo ŋu la dzi. Yesu ɖo nyaa ŋu nyuie, esi mede akpa aɖeke dzi o. Egblɔ be: “Mitsɔ nu siwo nye Kaisaro tɔ la na Kaisaro, gake nu siwo nye Mawu tɔ la, na Mawu.” (Luka 20:21-25) Ema fia be ele be eyomedzelawo nawɔ nu si Mawu di tso wo si la ahabɔbɔ ɖe Kaisaro, si nye kpɔɖeŋu na amegbetɔwo ƒe dziɖuɖuwo, la hã te.

Dziɖuɖuwo kpɔa egbɔ be nuwo le ɖoɖo nu va se ɖe afi aɖe. Eya ta esɔ be woabia tso dukɔmeviwo si be woaɖi anukware, axe adzɔ ahawɔ se dzi. Kpɔɖeŋu kae Yesu ɖo le ‘nu siwo nye Kaisaro tɔ la tsɔtsɔ na Kaisaro’ me? Dzila siwo nyi Yesu la wɔ dukɔa ƒe sewo dzi, togbɔ be ewɔwɔ menɔ bɔbɔe na wo o hã. Le kpɔɖeŋu me, Yosef kple srɔ̃a Maria, si ƒo fu le la, zɔ mɔ kilometa 150 sɔŋ yi Betlexem esime Roma dziɖuɖua de se be ame sia ame nayi aɖaŋlɔ ŋkɔ le wo de. (Luka 2:1-5) Yesu hã wɔ se dzi abe woawo ke ene, eye wòxe adzɔ siwo mele be wòaxe hafi o hã. (Mateo 17:24-27) Ekpɔ egbɔ hã be yemewɔ nu si ŋu se meɖe mɔ ɖo na ye o. (Luka 12:13, 14) Yesu de bubu amegbetɔwo ƒe dziɖuɖuwo ŋu, togbɔ be mehe dunya o hã. Ke nya si Yesu gblɔ be: “Mitsɔ . . . nu siwo nye Mawu tɔ la, na Mawu” ya ɖe?

Ale Si Yesu Tsɔ “Nu Siwo Nye Mawu tɔ La, Na Mawu”

Gbe ɖeka wobia Yesu be se kae nye gãtɔ le se siwo katã Mawu de na amegbetɔwo dome hã. Kristo ɖo eŋu be: “‘Ele be nàlɔ̃ Yehowa wò Mawu kple wò dzi blibo kple wò luʋɔ blibo kple wò tamesusu blibo.’ Esiae nye sedede gãtɔ kple gbãtɔ. Evelia, si ɖii, lae nye esi: ‘Ele be nàlɔ̃ hawòvi abe wò ŋutɔ ɖokuiwò ene.’” (Mateo 22:37-39) Yesu ƒe nyawo fia be nu gbãtɔ si wòle be míatsɔ ana Mawu ye nye ale si wòle be míalɔ̃e, si bia be míatsɔ mía ɖokui anae tso dzi blibo me.

Ðe míate ŋu alɔ̃ Mawu kple dzi blibo agalɔ̃ nu bubu alo ame bubu hã nenema? Ðe míate ŋu aku ɖe Yehowa Mawu kple eƒe Fiaɖuƒe si le dziƒo la ŋu agaku ɖe dziɖuɖu siwo le anyigba dzi la hã ŋu le ɣeyiɣi ma ke mea? Yesu ŋutɔ gblɔ gɔmeɖose sia be: “Ame aɖeke mate ŋu anye kluvi na aƒetɔ eve o; elabena alé fu ɖeka, eye wòalɔ̃ evelia, alo alé ɖe ɖeka ŋu, eye mabu evelia ɖe naneke me o.” (Mateo 6:24) Togbɔ be Yesu ƒe nya mawo ku ɖe ɖokuitsɔtsɔ na Mawu kple kesinɔnuwo yome nɔnɔ ŋu hã la, ekpɔe be gɔmeɖose ma asɔ le dunyahehe hã me—eye nenema kee eyomedzela siwo nɔ anyi le apostoloawo ŋɔli hã kpɔe.

Nuŋlɔɖi siwo li tso blema ke ɖee fia be Yesu yome dzela gbãtɔwo mehe dunya o. Ame ɖeka kolia si Yesu subɔ la kee woawo hã wosubɔ, eya ta wogbe be yewomatsɔ yewo ɖokui ana Roma dziɖuɖua, anye asrafo, alo anye dziɖuɖumegã o. Ema na amewo lé fu wo le mɔ vovovowo nu. Woƒe futɔwo tsoa wo nu ɣeaɖewoɣi be womelɔ̃a ame ƒe nya o. Ðe nutsotso ma sɔa?

Kristotɔ Vavãwo Tsɔa Ðe Le Eme Na Amewo

Ðo ŋkui be nu si Yesu gblɔ be eyae nye Mawu ƒe se vevitɔ eveliae nye be: “Nàlɔ̃ hawòvi abe wò ŋutɔ ɖokuiwò ene.” Eme kɔ ƒãa be Kristo yome dzela vavã aɖeke mekpɔ mɔ alé fu ame o. Yesu lɔ̃ amewo, kpɔ vovo ɖe wo ŋu, eye wòkpe ɖe wo ŋu wokpɔ woƒe kuxi suesuewo kura gɔ̃ hã gbɔ.—Marko 5:25-34; Yohanes 2:1-10.

Gake nu ka koŋ ye amewo nya na Yesu? Menye ale si wòyɔ dɔ amewo, nyi ame akpewo, alo fɔ ame kukuwo ɖe tsitre ye wonya nɛ o, togbɔ be ewɔ nu ɖedzesi mawo katã hã. Ke boŋ woyɔnɛ be Nufiala, eye esɔ nenema hã. (Yohanes 1:38; 13:13) Yesu ɖe eme be susu vevi siwo ta yeva anyigba dzi ɖo la dometɔ ɖekae nye be yeafia nu amewo tso Mawu Fiaɖuƒea ŋu.—Luka 4:43.

Susu ma tae dɔ si ŋu Kristo lé fɔ ɖo esi wònɔ anyigba dzi la kee eyomedzela vavã siwo li egbea hã wɔna, si nye nufiafia amewo tso Mawu Fiaɖuƒe ŋuti. Yesu Kristo de se na Kristotɔ vavãwo katã be woafia nu amewo tso Fiaɖuƒe ma ŋu le xexea me godoo. (Mateo 24:14; 28:19, 20) Dziɖuɖu ma le dziƒo, eye enu mayi gbeɖe o; aɖu Mawu ƒe nuwɔwɔwo katã dzi le lɔlɔ̃ me. Ana Mawu ƒe lɔlɔ̃nu nava eme, eye wòaɖe fukpekpe kple ku gɔ̃ hã ɖa. (Mateo 6:9, 10; Nyaɖeɖefia 21:3, 4) Eya tae mewɔ nuku o be Biblia yɔ nya si Kristo ɖe gbeƒãe la be “nya nyui.”—Luka 8:1.

Ke aleke nàwɔ anya ame siwo nye Yesu Kristo yome dzela vavãwo le anyigba dzi egbea? Ðe woanye ame siwo hea dunya le xexe sia mea? Alo ɖe woƒe dɔdeasi vevitɔ anye dɔ si tututu Yesu hã va wɔ, si nye gbeƒãɖeɖe kple nufiafia amewo tso Mawu Fiaɖuƒea ŋua?

Àdi be yeanya nu geɖe wu tso Mawu Fiaɖuƒea ŋu kple nu si wòate ŋu awɔ na wò fifia? Míele kpewòm be nàte ɖe Yehowa Ðasefo siwo le miaƒe nutoa me ŋu, alo nàxlẽ nu tso woƒe nufiafiawo ŋu le Internet dzi le nyatakakadzraɖoƒe si nye www.watchtower.org.

[Aɖaka/Nɔnɔmetata siwo le axa 24, 25]

Ðe Yehowa Ðasefowo Kpena Ðe Woƒe Nutoa Me Tɔwo Ŋua?

Yehowa Ðasefowo mehea dunya o. Gake wokpena ɖe woƒe nutoa me tɔwo katã ŋu, eɖanye ŋutigbalẽ kae le wo ŋu alo afi kae wotso o. Bu nu siwo gbɔna ŋu kpɔ:

◼ Yehowa Ðasefowo nye lɔlɔ̃nu faa dɔwɔla miliɔn adre kple edzivɔ siwo zãa gaƒoƒo siwo wu miliɔn 1,500 ƒe sia ƒe tsɔna srɔ̃a Biblia kple amewo be wòakpe ɖe wo ŋu woaɖu numame gbegblẽwo dzi, ana be dzidzɔ nanɔ woƒe ƒomewo me, eye woƒe agbe nanyo ɖe edzi.

◼ Wotaa agbalẽwo ɖe gbegbɔgblɔ 500 kple edzivɔ me, eye woƒe agbalẽwo koe le gbegbɔgblɔ siawo dometɔ aɖewo me; womedzraa woƒe agbalẽawo hã o.

◼ Wonaa hehe amewo be woaƒo nu le dutoƒo, eye esia kpe ɖe ame miliɔn geɖewo ŋu wonya ale si woaƒo nu eme nakɔ nyuie.

◼ Wofiaa nuxexlẽ kple nuŋɔŋlɔ amewo, eye ɖoɖo sia kpe ɖe ame akpe geɖewo ŋu le xexea me godoo wova nya nuxexlẽ kple nuŋɔŋlɔ.

◼ Woɖo kɔmiti 400 kple edzivɔ ɖe nuto vovovowo me le xexea me godoo, be woana hehe lɔlɔ̃nu faa dɔwɔlawo be woanya xɔtuɖaŋuwo, ale be woatu xɔ siwo me woanɔ Biblia srɔ̃m le. Le ƒe ewo siwo va yi me la, wotu tadeaguƒe, siwo woyɔna be Fiaɖuƒe Akpata, 20,000 kple edzivɔ.

◼ Wokpena ɖe ame siwo dzi afɔku dzɔ ɖo ŋu le xexea me godoo, Ðasefowo kple ame siwo menye Ðasefowo o siaa le eme. Esi ahom sesẽwo tu le Amerika nyitsɔ laa megbe la, le ƒe eve pɛ ko dome la, Ðasefowo tsɔ wo ɖokui na gbugbɔ Fiaɖuƒe Akpata 90 kple xɔ 5,500 sɔŋ tu.

[Nɔnɔmetata si le axa 23]

Esi amewo ƒoe ɖe Yesu nu be wòahe dunya la, “eɖe eɖokui ɖe aga yi to la dzi”