Nukae wòfia be Woalɔ̃ Mawu?

ANYE ƒe akpe ade enye sia la, wodzi amegbetɔ vidzĩ gbãtɔ. Le edzidzi vɔ megbe la, dadaa Xawa gblɔ be: “Yehowa ɖi nam be, medzi ŋutsu.” (Mose I, 4:1) Xawa ƒe nyawo ɖee fia be togbɔ be wotso kufia na eya kple srɔ̃a Adam xoxo le woƒe aglãdzedze ta hã la, Yehowa ƒe Mawunyenye kpɔtɔ nɔ woƒe susu me kokoko. Emegbe wodzi wo viŋutsu evelia. Wona ŋkɔ ŋutsuviawo be Kain kple Habel.

Esi wo viŋutsuawo nɔ tsitsim la, ɖikeke mele eme o be wosrɔ̃ nu geɖe tso Yehowa ƒe lɔlɔ̃ ŋu to ŋkuléle ɖe eƒe nuwɔwɔ ɖeɖeko ŋu. Dzɔdzɔme ƒe amadede dzeaniawo kple lã kpakple ati vovovowo nya kpɔ na wo. Menye ɖeko Mawu na agbe wo o ke ena ŋutete si woatsɔ akpɔ dzidzɔ le agbe me hã wo.

Wosrɔ̃e be ɖe wowɔ yewo dzilawo wode blibo hafi eye be Yehowa ƒe gɔmedzetameɖoɖoe nye be amegbetɔwo nanɔ agbe tegbee. Anɔ eme be Adam kple Xawa ƒo nu tso Eden-bɔ dzeania ŋu na wo, eye woanya ɖe nusita wonyã wo tso paradisoƒe sia me la me na wo. Ðewohĩ Kain kple Habel nya nu tso Mawu ƒe nyagblɔɖi si woŋlɔ ɖe Mose I, 3:15 ŋu. Yehowa to nyagblɔɖi ma dzi ɖe tame si wòɖo be yeaɖɔ nuwo ɖo le ɣeyiɣi si sɔ me be wòaɖe vi na amesiwo lɔ̃e hewɔa nuteƒe nɛ la fia.

Nusɔsrɔ̃ tso Yehowa kple eƒe nɔnɔmewo ŋu anya na Kain kple Habel nadi be Mawu nakpɔ ŋudzedze ɖe yewo ŋu. Eyata wodo ɖe Yehowa ŋkume to vɔwo sasa nɛ me. Biblia ƒe nuŋlɔɖia gblɔ be: “Esia megbe la eteƒe medidi o, Kain tsɔ agblemenu aɖewo wɔ vɔsae na Yehowa. Habel hã tsɔ eƒe lãwo ƒe ŋgɔgbevi, siwo dami la ƒe ɖewo vɛ.”—Mose I, 4:3, 4.

Woƒe didi be Mawu nakpɔ ŋudzedze ɖe yewo ŋu na ƒomedodo va nɔ wo kplii dome. Kain va dze aglã ɖe Mawu ŋu, gake lɔlɔ̃ vavãtɔ na Mawu yi edzi ʋã Habel. Ðe Yehowa ƒe amenyenye kple eƒe tameɖoɖowo ŋuti sidzedze mesu Habel si gbã o la, anye ne mate ŋu atu ƒomedodo sia ɖo kple Mawu gbeɖe o.

Wò hã ate ŋu adze si Yehowa. Le kpɔɖeŋu me, àte ŋu asrɔ̃e tso Biblia me be ame ŋutɔŋutɔe Mawu nye, ke menye ŋusẽ si me agbe mele o si naa nuwo dzɔna kpoyi aɖe ko wònye o. (Tsɔe sɔ kple Yohanes 7:28; Hebritɔwo 9:24; Nyaɖeɖefia 4:11.) Biblia gblɔ hã be “Mawu, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ” ye Yehowa nye.—Mose II, 34:6.

“Toɖoɖo Nyo Wu Vɔsa”

Abe alesi Kain kple Habel ƒe nya la ɖee fia ene la, Mawu ŋuti sidzedze ƒe ame si nɔnɔ kple didi be ƒomedodo kplikplikpli nanɔ ye kplii dome ɖeɖe mesɔ gbɔ o. Nyateƒee, nɔvi eveawo tsɔ nunanawo do ɖe Mawu ŋkume. Gake “Habel kple eƒe nunana dze Yehowa ŋu; ke Kain kple eƒe nunana ya medze eŋu o. Eye Kain bi dzi ŋutɔ, eye wòɖo adã.”—Mose I, 4:3-5.

Nukata Yehowa gbe Kain ƒe vɔsa la? Ðe nane gblẽ le eƒe nunana la ƒe nyonyo ŋua? Ðe Yehowa do dziku le esi Kain tsɔ “agblemenu aɖewo” sa vɔe ɖe lã teƒe ta? Manye nenema kokoko o. Emegbe la, Mawu tsɔ dzidzɔ xɔ nukuwo kple atikutsetse bubu siwo tso anyigba dzi nu miemiẽwo me ƒe vɔsawo tso esubɔla geɖe gbɔ. (Mose III, 2:1-16) Ekema edze ƒã be nɔnɔme gbegblẽ aɖe nɔ Kain ƒe dzime. Yehowa te ŋu nya nusi le Kain ƒe dzime eye wòxlɔ̃ nui be: “Nukaŋuti nèle dzi bim, eye nukaŋuti nèle adã ɖom? Alo menye ale wòle oa? Ne èwɔ nyui la, wò ŋku me akɔ, ke ne mèwɔ nyui o la, ekema nuvɔ̃ de xa ɖe ʋɔtru nu, eye woɖo tame aɖe ɖe ŋuwò.”—Mose I, 4:6, 7.

Lɔlɔ̃ vavã na Mawu de ŋgɔ wu vɔsasa dzro ko. Ema tae Yehowa de dzi ƒo na Kain be ‘wòawɔ nu nyui.’ Mawu di be wòaɖo to ye. Toɖoɖo Mawu alea akpe ɖe Kain ŋu be wòaɖo wo kple Wɔla la dome ƒomedodo si me lɔlɔ̃ le anyi hafi. Biblia gblɔ nya siawo tsɔ te gbe ɖe toɖoɖo ƒe vevienyenye dzi be: “Numevɔsawo kple akpedavɔsawoe dzea Yehowa ŋu wu toɖoɖo Yehowa ƒe gbea? Kpɔ ɖa, toɖoɖo nyo wu vɔsa, eye nusese nyo wu agbo ƒe ami.”—Samuel I, 15:22.

Emegbe nya siwo le Yohanes I, 5:3 va te gbe ɖe nya sia dzi nyuie be: “Lɔlɔ̃ na Mawu enye si bena, míalé eƒe seawo me ɖe asi, eye eƒe seawo mesesẽ o.” Mɔ aɖeke meli si dzi míato aɖe míaƒe lɔlɔ̃ na Yehowa afia wòanyo wu mía ɖokui bɔbɔ ɖe eƒe ŋusẽ te o. Esia fia be míawɔ ɖe Biblia ƒe agbenyuinɔnɔsewo dzi. (Korintotɔwo I, 6:9, 10) Efia be míalɔ̃ nu nyui eye míatsri vɔ̃.—Psalmo 97:10; 101:3; Lododowo 8:13.

Míaƒe lɔlɔ̃ na Mawu ɖeɖefia vevi aɖee nye mía havi lɔlɔ̃. Biblia gblɔ na mí be: “Ne ame aɖe gblɔ be, yelɔ̃a Mawu, eye wòléa fu nɔvia la, aʋatsokala wònye; elabena amesi melɔ̃ nɔvia, si kpɔm wòle o la, aleke wòate ŋu alɔ̃ Mawu, si kpɔm mele o mahã?”—Yohanes I, 4:20.

Anya Wɔ be Míate Ðe Mawu Ŋu Kplikplikpli

Ðewohĩ ame aɖewo agblɔ be, ‘Medea ta agu na Yehowa. Mewɔa eƒe sewo dzi. Mewɔa nu ɖe hanyevi ŋu nyuie. Mewɔa nu mawo katã. Gake nyemesena le ɖokuinye me be mete ɖe Mawu ŋu o. Nyemesea lɔlɔ̃ sẽŋu na eyama le ɖokuinye me o, eye ena mesea fɔɖiɖi le ɖokuinye me.’ Ðewohĩ ame aɖewo abu be yewomedze be ƒomedodo kplikplikpli nanɔ yewo kple Yehowa dome alea o.

Esi Kristotɔ aɖe tsɔ ƒe 37 kloe wɔ ɖokuitsɔtsɔna ƒe subɔsubɔdɔ na Yehowa megbe la, eŋlɔ bena: “Mese le ɖokuinye me zi geɖe le nye agbe me be nye subɔsubɔ na Yehowa nye kɔnu ko, eye be ɖewohĩ metso nye dzime gɔ̃ hã o. Gake menya be Yehowa subɔsubɔe nye nu nyuitɔ si wòle be mawɔ, eye nyemalɔ̃ adzudzɔ o. Gake ɣesiaɣi ne menya xlẽ nu tso ame aɖe ŋu wògblɔ be ‘lɔlɔ̃ na Yehowa yɔ yeƒe dzime la,’ mebiaa ɖokuinye be, ‘Nuka koŋue le dzɔdzɔm ɖe dzinye, si na nyemese le ɖokuinye me nenema kpɔ o?’” Aleke míawɔ mía kple Mawu dome nanɔ kplikplikpli?

Ne èlɔ̃ ame aɖe nyateƒe la, èbua ame ma ŋu edziedzi. Didi sẽŋu aɖe nɔa mewò be yeate ɖe eŋu kplikplikpli le esi nètsɔ ɖe le eme nɛ ta. Zi geɖe alesi nèkpɔnɛ, ƒoa nu nɛ, hebua eŋu la, zi geɖe nenemae wò lɔlɔ̃ nɛ dzina ɖe edzi. Aleae wòle le lɔlɔ̃ na Mawu tutuɖo hã me.

Nuŋlɔla si gbɔgbɔ ʋã la gblɔ le Psalmo 77:13 be: “Mabu tame le wò nuwɔwɔwo katã ŋu, eye made ŋugble le wò dɔwɔwɔwo ŋu.” Ŋugbledede le vevie le lɔlɔ̃ na Mawu tutuɖo me. Esia nye nyateƒe vevietɔ le nyateƒe si wònye be míate ŋu akpɔe kple ŋku o ta. Gake zi geɖe alesi nèbua eŋui la, zi geɖe nenemae wòanye ame ŋutɔŋutɔ na wò. Ema me koe nàte ŋu ato atu lɔlɔ̃ ƒe ƒomedodo si tso dzime ɖo kplii—elabena èbunɛ be enye ame ŋutɔŋutɔ na wò.

Didi be yeade ŋugble le Yehowa ƒe mɔwo kple nuwɔnawo ŋu edziedzi anɔ te ɖe alesi nèɖoa toe edziedzi la dzi. Èɖoa toe to eƒe Nya, Biblia, la xexlẽ kple esɔsrɔ̃ ɣesiaɣi me. Hakpala la ƒo nu tso dzidzɔtɔ ŋu be enye amesi “kpɔa dzidzɔ le Yehowa ƒe se la ŋu, eye wòdea ŋugble le eƒe se la ŋu zã kple keli.”—Psalmo 1:1, 2.

Nu vevi bubu hãe nye gbedodoɖa. Ema tae Biblia xlɔ̃ nu mí enuenu be míado gbe ɖa—“ɣeawokatãɣi,” ‘míadi ɣeyiɣi ado gbe ɖa,’ ‘míanɔ gbedodoɖa dzi ɖaasi,’ eye ‘míado gbe ɖa madzudzɔmadzudzɔe.’ (Efesotɔwo 6:18; Korintotɔwo I, 7:5; Romatɔwo 12:12; Tesalonikatɔwo I, 5:17) Míaƒe gbedodoɖa na Yehowa madzudzɔmadzudzɔe ana míava lɔ̃e, eye kakaɖedzi si li be eɖoa to mí la ana míate ɖe eŋu kplikplikpli. Hakpala la ɖo kpe esia dzi esime wògblɔ be: “Melɔ̃ Yehowa, elabena eɖo to nye gbe kple nye kokoƒoƒo. Elabena eƒu to anyi ɖe ŋunye, eyata mayɔe le nye agbe me ŋkekewo me.”—Psalmo 116:1, 2.

Lɔlɔ̃ ƒe Mawu la Sɔsrɔ̃

Yehowa nyoa dɔme na mí. Esi wònye xexeame katã Wɔla ta la, edze ƒã be nu geɖe li si ŋu wòle be wòabu ahakpɔ wo gbɔ. Ke hã la, Biblia gblɔ na mí be togbɔ be ɖoƒe kɔkɔ ye wòle hã la, eyia edzi léa be na eƒe nuwɔwɔ siwo nye amegbetɔwo. Elɔ̃ mí. (Petro I, 5:6, 7) Hakpala la gblɔ nya siawo tsɔ ɖo kpe edzii be: “Yehowa, mía Aƒetɔ, wò amesi na wò ŋutikɔkɔe gbagba gbɔ dziƒo ta, ale gbegbe wò ŋkɔ dzeani le anyigba blibo la dzii! Ne mekpɔ wò dziƒowo, siwo nye wò asinudɔwɔwɔ, ɣleti kple ɣletiviwo, siwo nèwɔ la, nuka nye amegbetɔ, be nèɖoa ŋku edzi, kple amegbetɔvi, be nèléa ŋku ɖe eŋu?”—Psalmo 8:2, 4, 5.

Aleke Yehowa ɖoa ŋku amegbetɔ dzii? Biblia ɖo eŋu be: “Esia me woɖe Mawu ƒe lɔlɔ̃ la ɖe go fia le le mía me bena, Mawu dɔ eƒe Tenuvi ɖo ɖe xexeame, bena míanɔ agbe to eyama me. Esia me lɔlɔ̃ la le: Menye bena míawo míelɔ̃ Mawu o, ke boŋ bena eya lɔ̃ mí, eye wòdɔ Via ɖo ɖa, bena wòanye avuléle le mía nuvɔ̃wo ta.”—Yohanes I, 4:9, 10.

Aleke avulévɔsa sia nye Mawu ƒe lɔlɔ̃ ɖeɖefia gãtɔ kekeake? Mina míade ŋugble le nusi dzɔ le Eden-bɔa me ŋu kpɔ. Adam kple Xawa dze ŋgɔ nyametsotso si nye be woabɔbɔ wo ɖokui ɖe Yehowa ƒe se te be woanɔ agbe si de blibo tegbee loo alo woadze aglã ɖe Yehowa ŋu wòazu ku na wo. Wotiae be yewoadze aglã. (Mose I, 3:1-6) Woto ema wɔwɔ me tsɔ ameƒomea katã de ku me. (Romatɔwo 5:12) Dadatɔe la, wona mɔnukpɔkpɔ si le mía si be míatso nya me na mía ɖokui la bu ɖe mí. Nya aɖeke megale mía dometɔ aɖeke si le nya la me o.

Gake Yehowa ɖoa ŋku amegbetɔ si kuna la dzi lɔlɔ̃tɔe, eye ekpɔ eƒe nɔnɔme wɔnublanuia dze sii. Yehowa to Via Yesu Kristo ƒe vɔsakua dzi wɔ ɖoɖo ɖe nusi dzi mía dometɔ ɖesiaɖe anɔ te ɖo le se nu atia agbe alo ku, toɖoɖo alo aglãdzedze na eɖokui. (Yohanes 3:16) Ele abe ɖe Yehowa ɖe mɔ be woatso afia le tiatia si míewɔ ŋu na mí le ʋɔnu ene—ena mɔnukpɔkpɔ mí be míagbugbɔ ayi Eden le kpɔɖeŋumɔ nu, eye míawɔ mía ŋutɔwo ƒe nyametsotso. Esiae nye lɔlɔ̃ ɖeɖefia gãtɔ kekeake si wowɔ kpɔ.

Bu alesi wòve Yehowae esi wòkpɔe wonɔ eƒe ŋgɔgbevi dzum, wonɔ fu wɔmee, eye woklãe ɖe ati ŋu abe nuvlowɔla ene ŋu kpɔ. Eye Mawu do dzi le ema me le mía ta. Ele be nyanya be Yehowa tre mí lɔlɔ̃ naʋã míawo hã be míalɔ̃e eye wòana míadii. (Yakobo 1:17; Yohanes I, 4:19) Biblia kpe mí be ‘míabia Yehowa kple eƒe ŋusẽ ta se, eye míadi eƒe ŋku me ɖaa! Míaɖo ŋu eƒe nukunu, siwo wòwɔ, eƒe dzesiwo kple eƒe nu me fiatsotsowo!’—Psalmo 105:4, 5.

Ame ŋutɔ ƒe kuku ɖe Mawu ŋu kple lɔlɔ̃ ƒe ƒomedodo kplii, ahanye eƒe xɔlɔ̃ la menye nusi mate ŋu ava eme o. Míate ŋu aɖo egbɔ. Nyateƒe wònye be míate ŋu atsɔ míaƒe lɔlɔ̃ na Mawu asɔ kple amegbetɔ ƒe ƒomedodowo pɛpɛpɛ o. Míaƒe lɔlɔ̃ na mía srɔ̃, dzilawo, nɔviwo, mía viwo, alo xɔlɔ̃wo to vovo na lɔlɔ̃ si le mía si na Mawu. (Mateo 10:37; 19:29) Lɔlɔ̃ na Yehowa bia míaƒe ɖokuitsɔtsɔna, tadedeagu, kple adzɔgbeɖeɖe nɛ keŋkeŋ. (Mose V, 4:24) Womebia nusiawo le ƒomedodo bubu aɖeke me o. Gake míate ŋu atu seselelãme deto sẽŋuwo ɖo na Mawu le bubu mɔ nu ahavɔ̃e.—Psalmo 89:8.

Togbɔ be ame madebliboe nènye hã la, ŋutete le asiwò be nàlɔ̃ Wɔwòla la abe alesi wònɔ Kain kple Abel si ene. Kain wɔ eƒe tiatia ŋudɔ tsɔ de Satana dzi, eye wòva zu amewula gbãtɔ. (Yohanes I, 3:12) Gake Yehowa aɖo ŋku Habel ya dzi be enye amesi ɖe xɔse kple dzɔdzɔenyenye fia eye atsɔ agbenɔnɔ le Paradiso si gbɔna me aɖo eteƒe nɛ.—Hebritɔwo 11:4.

Tiatiawɔwɔ dze ŋgɔ wò hã. Mawu ƒe gbɔgbɔ kple eƒe Nya la ate ŋu akpe ɖe ŋuwò nàtsɔ “wò dzi blibo kple wò luʋɔ blibo kpakple wò ŋusẽ katã” alɔ̃ Mawu nyateƒe. (Mose V, 6:5) Yehowa hã ayi edzi alɔ̃ wò, elabena enye “teƒeɖola na amesiwo dinɛ vevie.”—Hebritɔwo 11:6.

[Nɔnɔmetata si le axa 7]

Mawu kpɔ ŋudzedze ɖe Habel ƒe vɔsa ŋu