Ta 11

Ðe Wò Ŋkɔ le Agbegbalẽa Mea?

SARDES

 1. Nɔnɔme ka mee hame si le Sardes la le le gbɔgbɔ me, eye aleke Yesu dze eƒe gbedasia gɔmee?

HAME si kplɔe ɖo si xɔ gbedasi tso Yesu si wodo ŋutikɔkɔe na gbɔ la nɔ Sardes si didi anɔ abe kilometa 48 ene tso egbegbe Akhisar (Tiatira) gbɔ le dziehe gome. Le ƒe alafa adelia do ŋgɔ na Mía Ŋɔli me la, du sia nye blema Lidia-fiaɖuƒea ƒe fiadu si dzi wodana ɖo kple kesinɔtɔ gã Fia Kroeso ƒe nɔƒe. Le Yohanes ŋɔli la, nuwo va nɔ sesẽm na dua, eye gãnyenye si nɔ esi tsã le Kroeso te la zu ŋutinya me nudzɔdzɔ dzro ko. Nenema kee Kristo-hame si le afima la hã va da ahe le gbɔgbɔ mee. Esiae nye zi gbãtɔ si Yesu metsɔ kafukafunya dze eƒe gbedasia gɔmee o. Ðe ema teƒe la, egblɔ be: “Eye ŋlɔ ɖo ɖe hame, si le Sardes la, ƒe dɔla bena: Amesi si Mawu ƒe gbɔgbɔ adreawo kple ɣletivi adreawo le la, eyae gblɔ esiawo bena: Menya wò dɔwɔwɔwo bena, ŋkɔ le asiwò be, èle agbe, [gake] nèku.”—Nyaɖeɖefia 3:1.

 2. (a) Nukae Yesu si si “gbɔgbɔ adreawo” le la fia na Kristotɔ siwo le Sardes? (b) Ŋkɔ kae Sardes-hamea xɔ, gake aleke nɔnɔmeawo le ŋutɔŋutɔ?

² Nukatae Yesu yɔ eɖokui be ‘amesi si gbɔgbɔ adreawo le’? Elabena gbɔgbɔ siawo tsi tre ɖi na Yehowa ƒe gbɔgbɔ kɔkɔea si le dɔ wɔm bliboe. Emegbe la Yohanes gaƒo nu tso wo ŋu be wonye “ŋku adre,” esi fia nukpɔkpɔ ƒe ŋutete deŋgɔ si Mawu ƒe gbɔgbɔ kɔkɔea na Yesu. (Nyaɖeɖefia 5:6) Eyata ete ŋu kloa nu le nɔnɔme ɖesiaɖe si li la dzi hekpɔa egbɔ. (Mateo 10:26; Korintotɔwo I, 4:5) Hame si le Sardes la xɔ ŋkɔ be ele agbe eye wòle dɔ wɔm. Gake Yesu te ŋu kpɔe be eku le gbɔgbɔ me. Edze ƒã be ɖekematsɔleme gage ɖe hamea me tɔ geɖewo me, esi ɖi nɔnɔme si me wonɔ hafi va zu Kristotɔwo.—Tsɔe sɔ kple Efesotɔwo 2:1-3; Hebritɔwo 5:11-14.

 3. (a) Nukatae wòle be “hame, si le Sardes la, ƒe dɔla” nade dzesi nyateƒe si wònye be “ɣletivi adreawo” le Yesu si la vevie? (b) Aɖaŋu sesẽ kae Yesu ɖo na hame si le Sardes?

³ Yesu ɖo ŋku edzi hã na “hame, si le Sardes la, ƒe dɔla” bena ye sie “ɣletivi adreawo” le. Hamemegã mawo le eƒe nuɖusi me, eye ŋusẽ le esi be wòafia mɔ wo le woƒe kpɔkplɔdɔa me. Ele be woatsɔ woƒe dzi aɖo ‘alẽawo ƒe nɔnɔme nyanya nyuie’ ŋu. (Lododowo 27:23) Eyata ele be woaɖo to nya siwo Yesu gayi edzi gblɔ la nyuie: “Nɔ ŋudzɔ, eye nado ŋusẽ nusiwo susɔ le kuku ge la; elabena nyemekpɔ wò dɔwɔwɔwo le blibo le nye Mawu ƒe ŋku me o. Eyata ɖo ŋku nusi nèxɔ, eye nèse la dzi, eye nèlé eme ɖe asi, eye natrɔ le wò dzi me. Ne mènɔ ŋudzɔ azɔ o la, ekema mava ado ɖe dziwò abe fiafitɔ ene, eye mànya gaƒoƒo, si dzi mava ado ɖe dziwò o.”—Nyaɖeɖefia 3:2, 3.

 4. Aleke Petro ƒe nyawo akpe ɖe hame si le Sardes la ŋue be ‘wòado ŋusẽ nusiwo susɔ’?

⁴ Ehiã be hamemegã siwo le Sardes naɖo ŋku dzi si dzɔ wo esime wosrɔ̃ nyateƒea kple yayra siwo wokpɔ ɣemaɣi la dzi. Gake fifia woku le gbɔgbɔ me dɔwɔwɔ gome. Woƒe hame ƒe akaɖia le tsitsi ƒe mɔ dzi le xɔsedɔwo mawɔmawɔ ta. Ƒe aɖewo do ŋgɔ la, apostolo Petro ŋlɔ agbalẽ ɖo ɖe hame siwo nɔ Asia (anye be Sardes hã nɔ wo dome) be woakpɔ ŋudzedze ɖe ŋutikɔkɔenya nyui si Kristotɔwo xɔ eye wogblɔe na wo “to gbɔgbɔ kɔkɔe, si woɖo ɖa tso dziƒo”—si Yohanes ƒe ŋutega la me gbɔgbɔ adreawo tsi tre ɖi na—dzi la ŋu. Petro ɖo ŋku edzi hã na Asia Kristotɔ mawo be wonye ‘dzidzime tiatia, fia nunɔlanyenye, dukɔ kɔkɔe, kple dukɔ si woxɔ etɔxɛ me tɔwo, be woaɖe gbe ƒã amesi yɔ wo tso viviti me va ye ŋutɔ ƒe nukukekeli gbɔ la ƒe nutsuwɔwɔwo afia.’ (Petro I, 1:12, 25; 2:9) Ŋugbledede tso gbɔgbɔ me nyateƒe mawo ŋu akpe ɖe hame si le Sardes la ŋu be woatrɔ dzime eye ‘woado ŋusẽ nusiwo susɔ.’—Tsɔe sɔ kple Petro II, 3:9.

 5. (a) Nukae dzɔ ɖe Kristotɔ siwo le Sardes ƒe ŋudzedzekpɔkpɔ dzi? (b) Nukae adzɔ ne Kristotɔ siwo le Sardes mewɔ ɖe Yesu ƒe aɖaŋuɖoɖoa dzi o?

⁵ Fifia woƒe lɔlɔ̃ kple ŋudzedzekpɔkpɔ ɖe nyateƒea ŋu le abe dzo si esusɔ vie wòatsi keŋkeŋ ene. Dzoka ʋee aɖewo koe kpɔtɔ le xɔxɔm. Yesu de dzi ƒo na wo be woagbɔ dzoa, woatui ɖo, woatrɔ dzime tso nuvɔ̃ siwo me woƒe ɖekematsɔleme kplɔ wo dee la me, eye woagazu hame si le agbe le gbɔgbɔ me ake. (Tsɔe sɔ kple Timoteo II, 1:6, 7.) Ne menye nenema o la, ne Yesu va le vo me—“abe fiafitɔ ene”—be yeadrɔ̃ ʋɔnu la, aɖi ɖe hame si le Sardes la.—Mateo 24:43, 44.

Vava “abe Fiafitɔ Ene”

 6. Aleke Yesu va “abe fiafitɔ ene” le ƒe 1918 me, eye nɔnɔme kae wòkpɔ le amesiwo be eyomedzelawoe yewonye la dome?

⁶ Yesu ƒe nuxlɔ̃me be yeava “abe fiafitɔ ene” la ɖo keke egbeŋkekewo me ke. Eku ɖe Kristotɔ siwo tsi agbe ɖo Aƒetɔ ƒe ŋkekea me la ŋu etɔxɛ. Le ƒe 1914 megbe kpuie la, Maleaxi ƒe nyagblɔɖia va eme be: “Aƒetɔ, si ta biam miele la, ava eƒe gbedoxɔ me zi ɖeka kpoyi, kpɔ ɖa, nubabla ƒe dɔla, si dim miele la, le vava ge, Yehowa ye gblɔe.” (Maleaxi 3:1; Nyaɖeɖefia 1:10) Abe “nubabla ƒe dɔla” la ene la, Yesu va amesiwo gblɔ be yewonye eyomedzelawo la kpɔ ge ɖa ahadrɔ̃ ʋɔnu wo. (Petro I, 4:17) Le ƒe 1918 me ɣemaɣi la, Kristodukɔa nɔ ʋu kɔm ɖi vevie le Xexemeʋa I me eye eku keŋkeŋ le gbɔgbɔ me. Kristotɔ vavãtɔ siwo ɖe gbe ƒã dzonɔamemetɔe ale gbegbe do ŋgɔ na aʋawɔwɔa la gɔ̃ hã to gbɔgbɔmekɔlɔ̃edɔdɔ ƒe ɣeyiɣi me. Wode woƒe hamemegã vevi aɖewo gaxɔ me, eye gbeƒãɖeɖedɔa tɔ te keŋkeŋ kloe. Esime Yehowa ƒe gbɔgbɔa nyɔ Kristotɔ siawo le ƒe si kplɔe ɖo me la, menye wo katãe nɔ klalo o. Abe Yesu ƒe lododo me ɖetugbi abunetɔawo ene la, wo dometɔ aɖewo medzra ɖo le gbɔgbɔ me hena Yehowa-subɔsubɔ ƒe mɔnukpɔkpɔ la o. Gake dzidzɔtɔe la, abe ɖetugbi dzeaɖaŋuawo ene la, wo dometɔ geɖe ɖo to Yesu ƒe nuxlɔ̃me be: “Minɔ ŋudzɔ, elabena mienya ŋkeke la alo gaƒoƒo la o.”—Mateo 25:1-13.

 7. Nukatae wòhiã be Kristotɔ siwo li egbea nanɔ ŋudzɔ?

⁷ Alesi wòhiã be Kristotɔ nanɔ ŋudzɔ la mewu nu le Aƒetɔ ƒe ŋkekea ƒe gɔmedzedze o. Le eƒe nyagblɔɖi gã si ku ɖe “dzesi na ɣeyiɣi, si me nusiawo katã lawu nu” ŋu me la, Yesu na nuxlɔ̃me sesẽ aɖe be: “Le ŋkeke ma alo gaƒoƒo ma ŋuti la ame aɖeke menyae o . . . Mikpɔ nyuie, eye minɔ ŋudzɔ; elabena mienya ɣekaɣi azãgbe la le edzi su ge o. Ke nusi gblɔm mele na mi la, mele egblɔm na amewo katã bena: Minɔ ŋudzɔ!” (Marko 13:4, 32, 33, 37) Ẽ, vaseɖe gaƒoƒo sia me la, míeɖanye amesiamina alo le ameha gã la me o, ehiã be mía dometɔ ɖesiaɖe nanɔ ŋudzɔ ahaʋli be yemagadɔ alɔ̃ le gbɔgbɔ me o. Ne Yehowa ƒe ŋkekea va “abe alesi fiafitɔ vana le zã me ene” la, netu mí be míele ŋute ale be woadrɔ̃ ŋudzedzekpɔkpɔ ƒe ʋɔnu na mí.—Tesalonikatɔwo I, 5:2, 3; Luka 21:34-36; Nyaɖeɖefia 7:9.

 8. Aleke Yohanes habɔbɔ si li egbea de dzo Mawu ƒe amewo mee be woanɔ ŋudzɔ le gbɔgbɔ me?

⁸ Yohanes habɔbɔ si li egbea la ŋutɔ le ŋudzɔ ɖe Mawu ƒe amewo tutu ɖo be woanɔ agbe le gbɔgbɔ me ƒe hiahiã la ŋu. Le esia ta la, wowɔa kpekpe tɔxɛwo le anyigba la katã dzi zi geɖe ƒe sia ƒe. Le ƒe aɖe me nyitsɔ laa la, amesiwo yi nutome gã takpekpe 1,297 la nye ame 7,020,459, eye xɔsetɔ yeye 136,103 xɔ nyɔnyrɔ̃. Ƒe alafa ɖeka kple vɔe nye sia si Yohanes habɔbɔa wɔ Gbetakpɔxɔ magazine la ŋudɔ le gbeƒãɖeɖe Yehowa ƒe ŋkɔ kple eƒe tameɖoɖo me. Le nu wɔwɔ ɖe yometiti sesẽwo ŋu le xexemeʋa eveawo me la me la, Gbetakpɔxɔ gade dzo yeye Yehowa Ðasefowo me to nyatiwo abe “Woayra Amesiwo Mevɔ̃na O” (ƒe 1919), “Yɔyɔ Hena Dɔwɔwɔ” (ƒe 1925), kple “Yometiti Dzi Ðuɖu” (ƒe 1942) ene dzi.

 9. (a) Nya kae wòle be Kristotɔwo katã nanɔ wo ɖokui biam? (b) Tutuɖonya kae Gbetakpɔxɔ la gblɔ?

⁹ Abe alesi wònɔ le Sardes ene la, nenema kee wòle le hameawo me egbea be ɖokuimedzodzro edziedzi hiã vevie na Kristotɔwo katã. Ele be mí katã míanɔ mía ɖokui biam be: Ðe míaƒe “dɔwɔwɔwo le blibo” le mía Mawu ŋku mea? Ðe mía ŋutɔwo míetua ɖokuitsɔtsɔsavɔ ƒe gbɔgbɔ ɖo, esime míanɔ ʋɔnu drɔ̃m ame bubuwo o, eye míedzea agbagba be míatsɔ luʋɔ blibo ƒe subɔsubɔ na Mawua? Le esia gome la, Gbetakpɔxɔ magazine la na tutuɖo to nyatiwo abe “Agbeɖuɖu Blibaa—Alo Ðokuitsɔtsɔsavɔ Gbɔe Nelea?” kple “Miʋli Mia Ðokui Sesĩe” ene dzi.a Esi Ŋɔŋlɔa me kpekpeɖeŋu ma le mía si la, mina míadzro mía ɖokui me le ememe esime míele agbagba dzem be míazɔ ɖokuibɔbɔ- kple gbedodoɖatɔe le nuteƒewɔwɔ me le Yehowa ŋkume.—Psalmo 26:1-3; 139:23, 24.

“Ŋkɔ Ʋee Aɖewo”

10. Nu dedziƒoname kae Yesu de dzesii le Sardes-hamea me, eye aleke wòle be esia nawɔ dɔ ɖe mía dzie?

¹⁰ Nya siwo Yesu yi edzi gblɔ na hame si le Sardes la tu ame ɖo ŋutɔ. Egblɔ be: “Gake la èkpɔ ŋkɔ ʋee aɖewo le Sardes, esiwo meƒo ɖi woƒe awuwo o, eye woazɔ kpakplim le awu ɣiwo me; elabena wodze. Amesi ke ɖu dzi la, woado awu ɣiwo na eyama, eye nyemele eƒe ŋkɔ tutu ge ɖa le agbegbalẽa me o, eye maʋu eƒe ŋkɔ la me le Fofonye kple eƒe dɔlawo ŋku me.” (Nyaɖeɖefia 3:4, 5) Ðe nya siawo meʋãa mí hetua míaƒe tameɖoɖo kplikpaa be míawɔ nuteƒe la ɖo oa? Le hamemegãwo ƒe ha aɖe ƒe aɖaba ŋeŋe aƒu nu dzi ta la, hame blibo ate ŋu adɔ alɔ̃ ayi me ʋĩ le gbɔgbɔ me. Gake ame ɖekaɖeka aɖewo siwo le eme adze agbagba kalẽtɔe be yewoƒe Kristotɔnyenye ƒe dzeside la nanɔ dzadzɛ ɖiƒoƒomanɔŋui eye to ema dzi la ŋkɔ nyui nakpɔtɔ anɔ yewo ŋu le Yehowa ŋkume.—Lododowo 22:1.

11, 12. (a) Le xɔsegbegbe gã la me kura gɔ̃ hã la, aleke ame aɖewo anya nɔ abe “ŋkɔ ʋee” anukwareɖila siwo nɔ Sardes la ene? (b) Gbɔdzɔe kae Kristotɔ siwo ɖi lu la kpɔ le Aƒetɔ ƒe ŋkekea me?

¹¹ Ẽ, ‘awu’ mawo nye ame ƒe dzeside dzɔdzɔe abe Kristotɔ ene. (Tsɔe sɔ kple Nyaɖeɖefia 16:15; 19:8.) Anye nusi dzɔ dzi na Yesu be wòkpɔe be togbɔ be ame akpa gãtɔ metsɔ ɖeke le eme o hã la, dzeside sia kpɔtɔ le “ŋkɔ ʋee aɖewo,” si nye Kristotɔ amesiamina ʋee aɖewo le Sardes, la ŋu. Nenema kee esime amesiwo be yewonye Kristotɔwo ge ɖe Babilon Gã si nye alakpasubɔsubɔ ƒe xexemefiaɖuƒea me le ƒe alafa geɖe siwo me xɔsegbegbe gã la nɔ anyi me la, ame ʋee aɖewo anya nɔ anyi ɣesiaɣi siwo dze agbagba le nɔnɔme sesẽwo katã me be yewoawɔ Yehowa ƒe lɔlɔ̃nu. Amesiawo nye ame dzɔdzɔewo, abe lu si le kɔmamã ƒe gbe wuwlui gbogbo aɖe te ene.—Nyaɖeɖefia 17:3-6; Mateo 13:24-29.

¹² Yesu do ŋugbe be yeanɔ anyi kple Kristotɔ siawo siwo le abe lu ene la “ŋkekeawo katã vaseɖe xexeame ƒe nuwuwu.” Enya amesiwo wonye kple ŋkɔ nyui si wowɔ na wo ɖokui. (Mateo 28:20; Nyagblɔla 7:1) Bu dzidzɔ si nuteƒewɔla “ʋee” mawo siwo kpɔtɔ nɔ agbe le Aƒetɔ la ƒe ŋkekea ƒe gɔmedzedze la kpɔ la ŋuti kpɔ! Woɖe wo ɖa le Kristodukɔa si ku le gbɔgbɔ me la ŋu mlɔeba eye woƒo wo nu ƒu ɖe hame dzɔdzɔe si ɖi Smirna-hamea la me.—Mateo 13:40-43.

13. Yayra kawoe le ŋgɔ na Kristotɔ amesiamina siwo “meƒo ɖi woƒe awuwo o”?

¹³ Mɔkpɔkpɔ wɔnuku aɖe ava eme na amesiwo le Sardes, siwo wɔ nu anukwaretɔe vaseɖe nuwuwu eye womeƒo ɖi woƒe Kristotɔnyenye ƒe dzesidea o la. Esi woɖo Yesu ƒe Mesia Fiaɖuƒea anyi le ƒe 1914 me megbe la, wofɔ wo ɖe tsitre yi gbɔgbɔmegbenɔnɔ me eye wodo awu ɣiwo na wo abe amesiwo ɖu aʋa dzi ene wònye woƒe dzɔdzɔenyenye dzadzɛ si ŋu ɖiƒoƒo aɖeke mele o la ƒe dzesi. Esi woto mɔ bii si kplɔa ame yia agbe mee la dzi ta la, woaxɔ fetu mavɔ.—Mateo 7:14; kpɔ Nyaɖeɖefia 6:9-11 hã.

Le Agbegbalẽa me Tegbee!

14. Nukae nye “agbegbalẽa,” eye amekawo ƒe ŋkɔe woŋlɔna ɖe eme?

¹⁴ Nukae nye “agbegbalẽa,” eye amekawo ƒe ŋkɔwoe atsi eme? Agbegbalẽ alo agbegbalẽ ŋɔ́ŋlɔ la fia Yehowa ƒe subɔla siwo dze be woaxɔ agbe mavɔ ƒe nunana la ŋuti nuŋlɔɖi. (Maleaxi 3:16) Le Nyaɖeɖefia me afisia la, Kristotɔ amesiaminawo koŋ ƒe ŋkɔwo ŋue woƒo nu le. Gake woŋlɔ amesiwo akpɔ agbe mavɔ le anyigba dzi hã ƒe ŋkɔwo ɖe eme. Gawu la, woate ŋu ‘atutu’ ame ƒe ŋkɔ ɖa le agbalẽ ma me. (Mose II, 32:32, 33) Gake Yohanes habɔbɔa me tɔ siwo ƒe ŋkɔwo kpɔtɔ le agbegbalẽa me vaseɖe woƒe kuɣi ayi ɖe makumakugbenɔnɔ me le dziƒo. (Nyaɖeɖefia 2:10) Esiawoe nye ŋkɔ siwo me Yesu ʋuna le Fofoa kple Eƒe dɔlawo ŋkume. Aleke teƒeɖoɖo ma heloloe nye si!

15. Aleke ameha gã la me tɔwo awɔ be womatutu woƒe ŋkɔwo ɖa le agbegbalẽa me o?

¹⁵ Ameha gã si ƒe ŋkɔwo hã woŋlɔ ɖe agbegbalẽa me la ato xaxa gã la me ado agbagbee. To xɔse si amesiawo aɖe afia le Yesu ƒe Ƒe Akpe Ðeka Dziɖuɣia katã me kple le dodokpɔ mamlea si akplɔe ɖo me dzi la, woana agbe mavɔ le Paradiso me le anyigba dzi ƒe teƒeɖoɖo wo. (Daniel 12:1; Nyaɖeɖefia 7:9, 14; 20:15; 21:4) Ekema woƒe ŋkɔwo anɔ agbegbalẽa me tegbee. Esi nènya nusi woto gbɔgbɔ kɔkɔea dzi gblɔ le afisia la, ɖe matsɔ dzonɔameme awɔ ɖe aɖaŋu si Yesu gaɖo ake la dzi oa, be: “Amesi ke to li nɛ la, nese nusi gbɔgbɔ la gblɔ na hameawo”?—Nyaɖeɖefia 3:6.

[Etenuŋɔŋlɔ]

[Nɔnɔmetata si le axa 57]

Wò ŋkɔ natsi agbegbalẽa me