Ta 13
Ƒle Sika si Wolólo le Dzo Me
LAODIKEA
1, 2. Afikae hame mamletɔ si xɔ gbedasi tso Yesu si le ŋutikɔkɔe me gbɔ la nɔ, eye aleke dua nɔ?
LAODIKEA ye nye hame adreawo dometɔ mamletɔ si xɔ gbedasi tso Yesu si wofɔ ɖe tsitre la gbɔ. Eye ŋkuʋuname ƒe nya ʋãme kae nye si le eme!
2 Egbea àte ŋu akpɔ Laodikea ƒe gli gbagbãwo le Denizli si didi kilometa 90 tso Alasehir gbɔ le dzieheɣedzeƒe gome la gbɔ. Le ƒe alafa gbãtɔ me la, Laodikea nye du si me kesinɔnuwo le. Esi wònɔ mɔ dzevee nu ta la, enye teƒe vevi aɖe le gadzadzraɖo kple asitsatsa me. Ŋkutike aɖe si ame geɖe nya la dzadzra dzi eƒe kesinɔnuwo ɖe edzi, eye exɔ ŋkɔ hã le awu siwo nyo ŋutɔ siwo wotsɔa alẽfu yibɔ nyui aɖe lɔ̃na le afima ta. Woɖu tsimanɔanyi si nye kuxi gã aɖe na du la dzi esi woɖe tsimɔ na tsi si dzina tso tsi dzodzoe dziƒe siwo le adzɔge la me va dua mee la. Eyata kaka tsia naɖo dua me la enɔa yɔyrɔe ko.
3. Aleke Yesu dze gbedasi si wòɖo ɖe hame si le Laodikea la gɔmee?
3 Laodikea kple Kolose dome medidi o. Esime apostolo Paulo nɔ lɛta ŋlɔm na Kolosetɔwo la, eƒo nu tso agbalẽ aɖe si wòɖo ɖe Laodikeatɔwo la ŋuti. (Kolosetɔwo 4:15, 16) Míenya nya si Paulo ŋlɔ ɖe lɛta ma me o, gake gbedasi si Yesu ɖo ɖe Laodikeatɔwo fifia la ɖee fia be wova le gbɔgbɔ me nɔnɔme wɔnublanui aɖe me. Gake abe alesi Yesu wɔnɛ ene la, eƒo nu tso amesi eya ŋutɔ nye la ŋu gbã be: “Eye ŋlɔ ɖo ɖe hame, si le Laodikea la, ƒe dɔla bena: Amesi nye Amen, ɖaseɖila nuteƒewɔla kple nyateƒetɔ, amesi nye Mawu ƒe nuwɔwɔwo ƒe gɔmedzedze la, gblɔ esiawo.”—Nyaɖeɖefia 3:14.
4. Aleke Yesu nye “Amen” lae?
4 Nukatae Yesu yɔ eɖokui be “Amen”? Dzesideŋkɔ sia na ʋɔnudɔdrɔ̃ ƒe kpekpeme va le gbedasia ŋu. “Amen” nye Hebri-nya si gɔmee nye “godoo,” “neva eme” la ŋɔŋlɔ bubui, eye wozãnɛ le gbedodoɖawo ƒe nuwuwu tsɔna daa asi ɖe nya siwo wogblɔ le eme la dzi. (Korintotɔwo I, 14:16) Yesue nye “Amen” la elabena eƒe nuteƒewɔwɔ bliboe kple eƒe vɔsakua ɖo kpe Yehowa ƒe ŋugbedodo xɔasiawo katã me vava dzi hena kakaɖedzi le wo ŋu. (Korintotɔwo II, 1:20) Tso ɣemaɣi la, wodoa gbewo katã ɖa na Yehowa to Yesu dzi wòsɔ.—Yohanes 15:16; 16:23, 24.
5. Mɔ ka nue Yesu nye “ɖaseɖila nuteƒewɔla kple nyateƒetɔ” la?
5 Yesu nye “ɖaseɖila nuteƒewɔla kple nyateƒetɔ” hã. Zi geɖe le nyagblɔɖi me la, woyɔa anukwareɖiɖi, nyateƒetoto kple dzɔdzɔenyenye ɖe eŋu elabena woate ŋu aka ɖe edzi bliboe abe Yehowa Mawu ƒe subɔla ene. (Psalmo 45:5; Yesaya 11:4, 5; Nyaɖeɖefia 1:5; 19:11) Eyae nye Ðasefo vevitɔ kekeake na Yehowa. Le nyateƒe me la, abe “amesi nye Mawu ƒe nuwɔwɔwo ƒe gɔmedzedze” ene la, Yesu ɖe gbe ƒã Mawu ƒe ŋutikɔkɔe tso gɔmedzedzea me ke. (Lododowo 8:22-30) Esime wònye amegbetɔ le anyigba dzi la, eɖi ɖase le nyateƒea ŋu. (Yohanes 18:36, 37; Timoteo I, 6:13) Le eƒe tsitretsitsia megbe la, edo gbɔgbɔ kɔkɔe ŋugbe na eƒe nusrɔ̃lawo hegblɔ na wo be: “Mianye nye ɖaseɖilawo le Yerusalem kple Yudea katã kple Samaria, eye vaseɖe anyigba ƒe seƒe ke.” Tso ƒe 33 M.Ŋ. ƒe Pentekoste dzi la, Yesu fia mɔ Kristotɔ amesiamina siawo le gbe ƒã ɖeɖe nya nyui la “na nuwɔwɔwo katã le dziƒo te” la me. (Dɔwɔwɔwo 1:6-8; Kolosetɔwo 1:23) Le nyateƒe me la, Yesu dze be woayɔe be ɖaseɖila nuteƒewɔla kple nyateƒetɔ. Ne Kristotɔ amesiamina siwo le Laodikea ɖo to eƒe nyawo la, aɖe vi na wo.
6. (a) Aleke Yesu ɖɔ hame si le Laodikea la ƒe gbɔgbɔ me nɔnɔmee? (b) Yesu ƒe kpɔɖeŋu nyui kae Kristotɔ siwo le Laodikea la do kpo sɔsrɔ̃?
6 Nya kae le Yesu si na Laodikeatɔwo? Kafukafunya aɖeke mele esi na wo o. Egblɔ na wo kã be: “Menya wò dɔwɔwɔwo bena, mèfa hã o, medze dzo hã o. Ðe medi be, ɖewo nafa alo nadze dzo. Ke le esi nele yɔyrɔe, medze dzo o, eye mefa hã o ŋuti la, matu wò aƒu gbe atso nye nu me.” (Nyaɖeɖefia 3:15, 16) Aleke nawɔ nu ɖe gbedasi ma ƒomevi si tso Aƒetɔ Yesu Kristo gbɔ la ŋue? Ðe mànyɔ ahadzro ɖokuiwò me akpɔ oa? Ehiã godoo be Laodikeatɔ mawo naʋã wo ɖokui elabena wozu gbɔgbɔ me kuviatɔwo le esi wòdze ƒã be wobu nu geɖe akpa nu tsɛe ta. (Tsɔe sɔ kple Korintotɔwo II, 6:1.) Yesu, amesi wòle be woasrɔ̃ abe Kristotɔwo ene hafi la, ɖea veviedonu si me dzo le la fiana ɣesiaɣi ɖe Yehowa kple eƒe subɔsubɔ ŋu. (Yohanes 2:17) Hekpe ɖe eŋu la, ame fatuwo kpɔe be eƒe dɔme fa, ebɔbɔa eɖokui ɖe anyi ɣesiaɣi, eye wònaa dzidzeme ame abe alesi tsi fafɛ wɔnɛ ne xexeame xɔ dzo ene. (Mateo 11:28, 29) Gake Kristotɔ siwo le Laodikea medze dzo o eye womefa hã o. Abe tsi si sina vana woƒe dua me ene la, wozu yɔyrɔe. Yesu agbe wo keŋkeŋ, ‘atu wo aƒu gbe tso eƒe nu me’! Mina míawo ya míadze agbagba veviedodotɔe abe Yesu ene be míana gbɔgbɔ me dzidzeme ame bubuwo.—Mateo 9:35-38.
“Ègblɔna be, Yenye Kesinɔtɔ”
7. (a) Aleke Yesu ɖe Kristotɔ siwo le Laodikea la ƒe kuxia tsoƒe fiae? (b) Nukatae Yesu gblɔ be Laodikea Kristotɔwo nye “ŋkuagbãtɔ kpakple amamanɔla”?
7 Nuka koŋ gbɔe Laodikeatɔwo ƒe kuxia tso? Nya siwo Yesu yi edzi gblɔ la na míenya: “Elabena, ègblɔna be, yenye kesinɔtɔ, eye kesinɔnuwo le ye si, eye naneke mehiãa ye o, eye mènyae be, hiãtɔ kple nublanuitɔ kple kotɔ kple ŋkuagbãtɔ kpakple amamanɔla nènye o.” (Nyaɖeɖefia 3:17; tsɔe sɔ kple Luka 12:16-21.) Esi wole du si me kesinɔnuwo le me ta la, woƒe kesinɔnuwo na kakaɖedzi wo. Anye be duƒuƒea, fefewɔƒeawo kple kamedefefewɔƒeawo wɔ dɔ ɖe wo dzi be wozu “amesiwo lɔ̃a hadzedze wu esi woalɔ̃ Mawu.”a (Timoteo II, 3:4) Gake Laodikeatɔ kesinɔtɔawo nye hiãtɔwo le gbɔgbɔ me. Ne ‘wodzra nu nyuiwo ɖo ɖe dziƒo’ la, ke nu ʋee aɖewo ko wòanye. (Mateo 6:19-21) Womena woƒe ŋku nɔ nu ɖeka ŋu hetsɔ Mawu ƒe Fiaɖuƒea ɖo nɔƒe gbãtɔ le woƒe agbe me o. Le nyateƒe me la, wole viviti me, woƒe ŋku gbã, eye womele nu kpɔm le gbɔgbɔ me o. (Mateo 6:22, 23, 33) Gawu la, togbɔ be wotsɔ ga si le wo si la ƒle awu nyuiwo hã la, wole amama le Yesu ŋkume. Gbɔgbɔmewu mele wo si si aɖee afia be wonye Kristotɔwo o.—Tsɔe sɔ kple Nyaɖeɖefia 16:15.
8. (a) Aleke nɔnɔme si nɔ Laodikea la tɔgbe li egbea hãe? (b) Aleke Kristotɔ aɖewo ble wo ɖokui le ŋukeklẽ ƒe xexe sia mee?
8 Nɔnɔme si nana woɖia vo kae nye si! Gake ɖe míekpɔa nɔnɔme ma tɔgbe zi geɖe egbea oa? Nuka gbɔe wòtso? Kaka ɖe ame ɖokui dzi ƒe nɔnɔme si tso ŋu ɖoɖo ɖe ŋutilãmenuwo kple amegbetɔ ƒe nunɔamesiwo ŋu gbɔe wòtso. Abe Kristodukɔa ƒe sɔlemedelawo ene la, Yehowa ƒe amewo dometɔ aɖewo flu wo ɖokui hesusu be yewoate ŋu adze Mawu ŋu to kpekpewo yiyi ɣeaɖewoɣi dzro ko dzi. Wodzea agbagba be yewoanɔ amewo dome ko abe ‘amesiwo wɔa nya dzi’ vie ko ene. (Yakobo 1:22) Togbɔ be Yohanes habɔbɔa xlɔ̃ nu wo enuenu hã la, woƒe dziwo le awu, ʋu kple aƒe siwo le tsia dzi, kple agbenɔnɔ si nɔ te ɖe modzakaɖeɖe kple vivisese dzi la ŋu. (Timoteo I, 6:9, 10; Yohanes I, 2:15-17) Esiawo katã nana nukpɔkpɔ le gbɔgbɔ me yia to. (Hebritɔwo 5:11, 12) Le esi teƒe be woanɔ yɔyrɔe ɖekematsɔlemetɔe la, ehiã be woatu ‘gbɔgbɔ ƒe dzo’ la ɖo eye woaɖe didi vevie tuameɖo be ‘yewoaɖe gbe ƒã nya la’ afia.—Tesalonikatɔwo I, 5:19; Timoteo II, 4:2, 5.
9. (a) Ele be Yesu ƒe nya kawo nana Kristotɔ siwo le yɔyrɔe naɖi vo, eye nukatae? (b) Aleke hamea ate ŋu akpe ɖe “alẽ” siwo le mɔ tram la ŋue?
9 Aleke Yesu bua Kristotɔ siwo le yɔyrɔe lae? Ele be nya si wògblɔ nyateƒetɔe la naʋuʋu wo: “Mènyae be, hiãtɔ kple nublanuitɔ kple kotɔ kple ŋkuagbãtɔ kpakple amamanɔla nènye o.” Woƒe dzitsinya ku kpaɖii ale gbegbe be womekpɔ nɔnɔme nyɔŋu si me wole la dze sii gɔ̃ hã o. (Tsɔe sɔ kple Lododowo 16:2; 21:2.) Womate ŋu abu nɔnɔme sia si menye fefenya o si le hamea me la nu tsɛ o. To veviedodo ƒe kpɔɖeŋu nyui kple alẽwo kpɔkplɔ le lɔlɔ̃ me dzi la, hamemegãwo kple ame bubu siwo wode dɔ asi na la ate ŋu anyɔ “alẽ” siawo siwo le búbum la be woagakpɔ dzi blibo ƒe subɔsubɔ ƒe dzidzɔ si wokpɔna tsã la ake.—Luka 15:3-7.
‘Kesinɔtɔ Zuzu’ Ŋuti Aɖaŋuɖoɖo
10. Nukae nye “sika” si Yesu gblɔ na Kristotɔ siwo le Laodikea be woaƒle le ye si?
10 Ðe nɔnɔme wɔnublanui si le Laodikea la gbɔkpɔnu lia? Ẽ eli, ne Kristotɔ mawo awɔ ɖe Yesu ƒe aɖaŋuɖoɖoa dzi, be: “Mele aɖaŋu ɖom na wò be, naƒle sika, si wolòlo le dzo me la, le asinye, be nazu kesinɔtɔ.” (Nyaɖeɖefia 3:18a) Kristotɔwo ƒe “sika” ŋutɔŋutɔ si wotsɔ dzo lóloe heɖe ɖia katã le eme la ana woazu ‘kesinɔtɔwo le Mawu gome.’ (Luka 12:21) Afikae woate ŋu aƒle sika ma le? Menye le dua me gadzraɖolawo gbɔ o, ke boŋ tso Yesu gbɔ! Apostolo Paulo ɖe nusi sika ma nye la me esime wògblɔ na Timoteo be wòade se na Kristotɔ kesinɔtɔwo be “woawɔ dɔmenyo, eye woanye kesinɔtɔwo le nu nyui wɔwɔ me, woalɔ̃ nunana ame, woalɔ̃ hadede, eye woaƒo kesinɔnuwo nu ƒu na wo ɖokui, si anye gɔmeɖoɖoanyi nyui hena ɣeyiɣi si gbɔna.” Agbagbadzedze le mɔ sia nu dzi koe woate ŋu ato be “woƒe asi nasu agbe vavã la dzi.” (Timoteo I, 6:17-19) Ðe wòle be Laodikeatɔ siwo nye ŋutilãmekesinɔtɔwo nawɔ ɖe Paulo ƒe aɖaŋuɖoɖoa dzi ahazu kesinɔtɔwo le gbɔgbɔ me hafi.—Kpɔ Lododowo 3:13-18 hã.
11. Egbegbekpɔɖeŋu kawoe li ku ɖe amesiwo ƒle “sika, si wolólo le dzo me” la ŋuti?
11 Ðe amesiwo le “sika, si wolólo le dzo me” ƒlem ƒe egbegbekpɔɖeŋuwo lia? Ẽ, woli! Esi Aƒetɔ ƒe ŋkekea nɔ aƒe tum gɔ̃ hã la, Biblia nusrɔ̃viwo ƒe ƒuƒoƒo sue aɖe nɔ nyɔnyɔm henɔ alakpa si Kristodukɔa ƒe Babilontɔwo ƒe nufiafia geɖeawo nye la kpɔm, abe Mawuɖekaetɔ̃, luʋɔ makumaku, funyafunyawɔwɔ le dzomavɔ me, mawutsi dede ta na vidzĩwo, kple ta dede agu na legbawo (atitsoga kple Maria tɔwo hã le eme) ene. Le Biblia me nyateƒea ta ʋiʋli me la, Kristotɔ siawo ɖe gbe ƒã Yehowa ƒe Fiaɖuƒea be eyae nye ameƒomea ƒe mɔkpɔkpɔ ɖeka kolia eye Yesu ƒe tafevɔsa lae nye nusi dzi woanɔ te ɖo axɔ na mí. Ƒe 40 kloe do ŋgɔ la, wofia asi ƒe 1914 be enye ƒe si Biblia ƒe nyagblɔɖi de dzesii be anye Trɔ̃subɔlawo ƒe ɣeyiɣia ƒe nuwuwu si me woaʋuʋu dziɖuɖu kple mawusubɔsubɔ ƒe ŋusẽwo.—Nyaɖeɖefia 1:10; Luka 21:24-26.
12. Amesiwo nɔ ŋgɔ xɔm le Kristotɔ siwo nɔ nyɔnyɔm dome la dometɔ ɖekae nye ameka, eye aleke wòɖo kpɔɖeŋu ɖedzesi ɖi le kesinɔnuwo dzadzraɖo ɖe dziƒo mee?
12 Amesi nɔ ŋgɔ le Kristotɔ mawo siwo nɔ nyɔnyɔm domee nye Charles Taze Russell, amesi ɖo Biblia nusɔsrɔ̃ ƒe ƒuƒoƒo aɖe ɖe Allegheny (si nye Pittsburgh ƒe akpa aɖe fifia) le Pennsylvania, U.S.A., le ƒe 1870 ƒe ƒeawo ƒe gɔmedzedze lɔƒo. Esime Russell dze nyateƒea didi gɔme la, wo kple fofoa woɖo dɔ aɖe nɔ wɔwɔm eye esusɔ vie wòazu kesinɔtɔ gã aɖe. Gake edzra akpa si nye etɔ le fiase geɖe mawo me la, eye wòzã eƒe kesinɔnuwo ɖe kpekpeɖeŋu nana le ga kpɔkpɔ hena gbe ƒã ɖeɖe Mawu ƒe Fiaɖuƒea le anyigba katã dzi me la ŋu. Le ƒe 1884 me la, Russell zu habɔbɔ si woyɔna fifia be Watch Tower Bible and Tract Society of Pennsylvania la ƒe zimenɔla gbãtɔ. Le ƒe 1916 me la, eku le keteke me le Pampa, Texas, gbɔ esime eƒe gbeƒãɖeɖe ƒe mɔzɔzɔ mamlea le ɣetoɖoƒe United States te ɖeɖi eŋu eye wònɔ mɔ dzi yina New York. Eɖo gbɔgbɔ me kesinɔnuwo dzadzraɖo ɖe dziƒo ƒe kpɔɖeŋu ɖedzesi aɖe ɖi, esi nye kpɔɖeŋu si srɔ̃m subɔla mɔɖela akpe alafa geɖe siwo tsɔ wo ɖokui le vɔ sam la le le ƒe 1900 ƒe ƒeawo ƒe nuwuwu sia.—Hebritɔwo 13:7; Luka 12:33, 34; tsɔe sɔ kple Korintotɔwo I, 9:16; 11:1.
Gbɔgbɔ me Ŋkutike Sisi ɖe Ŋku
13. (a) Aleke gbɔgbɔmeŋkutike ana Laodikeatɔwo ƒe nɔnɔme naka ɖe emee? (b) Awu ka ƒomevie Yesu kafu na wo, eye nukatae?
13 Yesu xlɔ̃ nu Laodikeatɔ mawo vevie hã be: “Naƒle . . . avɔ ɣi, be natsyɔ, ne wò ŋukpeƒe nagadze o, kpakple ŋkutike, be nasi ɖe wò ŋkuwo, be nakpɔ nu.” (Nyaɖeɖefia 3:18b) Ele be woadi woƒe gbɔgbɔmeŋkuagbã ƒe atike to ŋkutike, si menye dɔyɔla siwo le nutoa me la tɔ o, ke boŋ esi Yesu ɖeka ko ate ŋu ana la, ƒeƒle dzi. Esia akpe ɖe wo ŋu be gbɔgbɔ me sidzedze nasu wo si, eye wòakpe ɖe wo ŋu be woazɔ “ame dzɔdzɔe ƒe toƒe” eye woƒe ŋku si woklẽ la nanɔ Mawu ƒe lɔlɔ̃nu wɔwɔ dzi. (Lododowo 4:18, 25-27) Eyata womado alẽfu yibɔ ƒe awu xɔasi siwo wowɔ le Laodikea afima la o, ke boŋ woado ‘awu ɣi’ siwo ɖea gbe ƒã mɔnukpɔkpɔ tɔxɛ si su wo si abe Yesu Kristo yomedzelawo ene la.—Tsɔe sɔ kple Timoteo I, 2:9, 10; Petro I, 3:3-5.
14. (a) Gbɔgbɔmeŋkutike kae li tso ƒe 1879 me? (b) Afika koŋ ye Yehowa Ðasefowo kpɔa gakpekpeɖeŋu tsona? (d) Le nudzɔdzɔwo zazã me la, aleke Yehowa Ðasefowo to vovo tso ame bubuwo gbɔe?
14 Ðe gbɔgbɔmeŋkutike li le egbeŋkekewo mea? Kakaɖedzi li be eli! Le ƒe 1879 me la, amesi woyɔ vividoɖeameŋutɔe be Pastor Russell dze magazine si woyɔna le xexeame katã egbea be Gbetakpɔxɔ Le Gbe Ƒã Ðem Yehowa ƒe Fiaɖuƒe la tata gɔme be wòatsɔ aʋli nyateƒea tae. Egblɔ le eƒe tata evelia me be: “Míexɔe se be YEHOWA le megbe na [magazine sia], eye esime wòle alea la, míaɖe kuku alo aƒo koko na amewo be woakpe ɖe mía ŋu o. Ne Amesi gblɔ be: ‘Tɔnyee sika kple klosalo siwo katã le towo me nye,’ la do kpo ga si hiã la nana mí la, míase egɔme be ɣeyiɣia de be míadzudzɔ etata.” Ƒe alafa 20 lia me television dzi mawunyagblɔla aɖewo kpɔ kesinɔnu gbogbowo eye wonɔ hadzegbe (kple agbe gbegblẽ ɣeaɖewoɣi). (Tsɔe sɔ kple Nyaɖeɖefia 18:3.) Nusi to vovoe nye be, Biblia Nusrɔ̃viwo, amesiwo woyɔna egbea be Yehowa Ðasefowo, wɔ ga siwo katã amewo dzɔ faa la ŋudɔ tsɔ wɔ ɖoɖo ɖe Yehowa ƒe Fiaɖuƒe si gbɔna ƒe gbeƒãɖeɖe le xexeame katã la ŋu hedoe ɖe ŋgɔ. Vaseɖe egbea la, Yohanes habɔbɔa fiaa mɔ le Gbetakpɔxɔ kple Awake! magazineawo tata me; le ƒe 1990 me la, tata ɖesiaɖe wu miliɔn 27. Gbetakpɔxɔ la le gbegbɔgblɔ siwo wu alafa ɖeka me. Eyae nye Kristotɔ siwo wu miliɔn ene siwo zã gbɔgbɔ me ŋkutike ma wòʋu ŋku na wo be wokpɔ alakpasubɔsubɔ kple alesi wòhiã kpata be woaɖe gbe ƒã nya nyui la le dukɔwo katã me la dze sie la ƒe hamea ƒe magazine vevitɔ.—Marko 13:10.
Viɖe Kpɔkpɔ tso Mokaka Kple Tohehe Me
15. Nukatae Yesu ɖo aɖaŋu si me sẽ na Kristotɔ siwo le Laodikea, eye aleke wòle be hamea nawɔ nu ɖe enue?
15 Mina míatrɔ va Laodikeatɔwo gbɔ. Aleke woawɔ nu ɖe aɖaŋuɖoɖo sesẽ si tso Yesu gbɔ la ŋue? Ðe wòle be dzi naɖe le wo ƒo eye woasee le wo ɖokui me be Yesu megadi be yewoanye ye yomedzelawo oa? Ao, menye nenemae kura o. Gbedasia yi edzi be: “Nye la, ame geɖe alesi nu melɔ̃na la, mekaa ŋku me na, eye mehea to na; eyata do vevie, be natrɔ le wò dzi me.” (Nyaɖeɖefia 3:19) Abe alesi wòle le tohehe si tso Yehowa gbɔ me ene la, Yesu ƒe tohehe nye eƒe lɔlɔ̃ ƒe dzesi. (Hebritɔwo 12:4-7) Ele be Laodikea-hamea nana eƒe lɔlɔ̃ ƒe ɖetsɔlemea naɖe vi na wo eye woawɔ eƒe aɖaŋuɖoɖoa ŋudɔ. Ele be woatrɔ dzime ahakpɔe adze sii be yewoƒe yɔyrɔenɔnɔ la nye nuvɔ̃wɔwɔ. (Hebritɔwo 3:12, 13; Yakobo 4:17) Ele be woƒe hamemegãwo naɖe asi le ŋutilãmezɔzɔmewo ŋu eye ‘woade dzo’ nunana si woxɔ tso Mawu gbɔ la me. Esi gbɔgbɔ me ŋkutikea le dɔ wɔm la, mina hamea me tɔwo katã nakpɔ dzidzeme abe tometsi fafae wono ene.—Timoteo II, 1:6; Lododowo 3:5-8; Luka 21:34.
16. (a) Aleke Yesu ɖea eƒe lɔlɔ̃ kple vividoɖeameŋu fianae egbea? (b) Ne woɖo aɖaŋu si me sẽ na mí la, aleke wòle be míawɔ nue?
16 Ke egbea míawo ya ɖe? Yesu kpɔtɔ ‘lɔ̃ etɔ siwo le xexeame.’ Ayi edzi awɔ esia “ŋkekeawo katã vaseɖe xexeame ƒe nuwuwu.” (Yohanes 13:1; Mateo 28:20) Eɖea eƒe lɔlɔ̃ kple vividoɖeameŋu fiana to egbegbe Yohanes habɔbɔa kple ɣletivi alo hamemegã siwo le Kristo-hamea me dzi. (Nyaɖeɖefia 1:20) Le ɣeyiɣi sesẽ siawo me la, hamemegãwo tsɔ ɖe vevie le kpekpeɖeŋu nana mí katã, tsitsiawo kple ɖeviwo siaa, me be míayi edzi anɔ teokrasi habɔbɔa me ahatsi tre ɖe xexeame ƒe ɖokuiŋudzedze, ŋukeklẽ ɖe ŋutilãmenuwo ŋu, kple agbe blibaa nɔnɔ ŋu. Ne wona aɖaŋuɖoɖo alo tohehe sesẽ mí ɣeaɖewoɣi la, mina míaɖo ŋku edzi be “agbemɔ enye mokaname, siwo fiaa mɔnu ame.” (Lododowo 6:23) Mí katã míede blibo o eye ele be míatsɔ dzo atrɔ dzime alesi hiã ale be míaɖɔ ɖo eye míakpɔtɔ anɔ Mawu ƒe lɔlɔ̃ me.—Korintotɔwo II, 13:11.
17. Aleke kesinɔnuwo ate ŋu azu afɔku na mí le gbɔgbɔ mee?
17 Mele be míaɖe mɔ ŋutilãmenudidi, kesinɔnuwo alo kesinɔnumanɔamesi nana míazu yɔyrɔe o. Kesinɔnuwo ate ŋu akpe ɖe mía ŋu aʋu subɔsubɔ ƒe mɔnukpɔkpɔ yeyewo na mí, gake afɔku ate ŋu anɔ eme hã. (Mateo 19:24) Amesi si alɔme le asee le eɖokui me be mehiã be yeado vevie nu le gbeƒãɖeɖedɔa me abe ame bubuwo ene o, ne yenaa nudzɔdzɔ gãwo ɣeaɖewoɣi ko evɔ. Alo asee le eɖokui me be kesinɔtɔnyenye na yedze be woave ye nu. Hekpe ɖe eŋu la, kesinɔtɔ te ŋu kpɔa gome le vivisese kple modzakaɖeɖe geɖe siwo ame bubuwo mekpɔa ga na o la me. Gake nu bubu mawo xɔa ɣeyiɣi eye woate ŋu ahe amesi mele ŋudzɔ o ɖa le Kristotɔwo ƒe subɔsubɔdɔa ŋu ahana ame madzeaɖaŋu nazu yɔyrɔe. Mina míaƒo asa na mɔ̃ mawo katã eye míayi edzi atsɔ dzi blibo ‘adze agbagba ahaʋli mía ɖokui’ be míakpɔ agbe mavɔ.—Timoteo I, 4:8-10; 6:9-12.
‘Fiẽnuɖuɖua Ðuɖu’
18. Mɔnukpɔkpɔ kae Yesu na Kristotɔ siwo le Laodikea?
18 Yesu yi edzi gblɔ be: “Kpɔ ɖa, mele tsitre le ʋɔa nu le eƒom; ne ame aɖe se nye gbe, eye wòʋu ʋɔa la, mage ɖe eme le egbɔ, eye maɖu nu kplii, eye eya hã aɖu nu kplim.” (Nyaɖeɖefia 3:20) Ne Laodikea Kristotɔawo axɔ Yesu le woƒe hameawo me ko la, akpe ɖe wo ŋu be woaɖu woƒe yɔyrɔenɔnɔa dzi!—Mateo 18:20.
19. Nuka gblɔm Yesu le esime wòdo ŋugbe be yeaɖu fiẽnuɖuɖu kple hame si le Laodikea la?
19 Ðikeke mele eme o be fiẽnuɖuɖu ŋuti nya si Yesu gblɔ la aɖo ŋku ɣeyiɣi siwo me wòɖu nu kple eƒe nusrɔ̃lawo la dzi na Laodikeatɔwo. (Yohanes 12:1-8) Ɣesiaɣi la, ɣeyiɣi mawo he gbɔgbɔ me yayrawo vɛ na amesiwo nɔ afima. Nenema kee ɣeyiɣi ɖedzesi aɖewo nɔ anyi le Yesu ƒe tsitretsitsia megbe siwo me wònɔ anyi ɖu nu kple eƒe nusrɔ̃lawo, eye esia do ŋusẽ wo ŋutɔ. (Luka 24:28-32; Yohanes 21:9-19) Eyata ŋugbe si wòdo be yeava Laodikea-hamea me ahaɖu fiẽnuɖuɖu kpli wo la nye ŋugbe si dom wòle be yeahe gbɔgbɔ me viɖe geɖe vɛ na wo, ne woaxɔ ye ko.
20. (a) Le Aƒetɔ ƒe ŋkekea ƒe gɔmedzedze la, nukae Kristodukɔa ƒe yɔyrɔenɔnɔ he vɛ? (b) Aleke Yesu ƒe ʋɔnudɔdrɔ̃ lɔ Kristodukɔa ɖe emee?
20 Gɔmesese gã aɖe le nuxlɔ̃me si Yesu na Laodikeatɔwo lɔlɔ̃tɔe la ŋu na Kristotɔ amesiamina susɔe siwo li egbea. Amesiawo dometɔ aɖewo ɖoa ŋku edzi be esi Aƒetɔ ƒe ŋkekea dze egɔme la, Kristodukɔa me tɔwo nɔ yɔyrɔe wònyɔ ŋu. Le esi teƒe be woaxɔ mía Aƒetɔ ƒe tɔtrɔgbɔ le ƒe 1914 me la, eƒe osɔfowo ƒo wo ɖokui ɖe Xexemeʋa I si dukɔ 28 siwo nɔ ewɔm la dometɔ 24 gblɔ be Kristotɔwoe yewonye la ƒe amewuwua me. Aleke woƒe ʋufɔɖiɖia heloloe nye si! Le Xexemeʋa II si hã ƒe akpa gãtɔ wowɔ le Kristodukɔa me la me la, alakpasubɔsubɔ ƒe nuvɔ̃wo gakɔ “yi ɖatɔ dziƒo.” (Nyaɖeɖefia 18:5) Hekpe ɖe eŋu la, osɔfowo trɔ megbe de Yehowa ƒe Fiaɖuƒe si gbɔna la to Dukɔwo ƒe Nubabla la, Dukɔ Ƒoƒuwo ƒe habɔbɔa kple dulɔlɔ̃ kpakple tɔtrɔ kpata ƒe habɔbɔwo, siwo dometɔ aɖeke mate ŋu akpɔ ameƒomea ƒe kuxiwo gbɔ o la, dzi dede dzi. Yesu gbe osɔfoawo xoxoxo, eye wòdrɔ̃ ʋɔnu wo hetsɔ wo ƒu gbe abe alesi tɔƒodela tsɔa lã manyomanyo siwo eƒe ɖɔ ɖe ƒua gbee ene. Nɔnɔme wɔnublanui si me Kristodukɔa ƒe sɔlemehawo le egbea ɖi ɖase be wodrɔ̃ ʋɔnui nenema. Mina nusi adzɔ ɖe edzi mlɔeba la nanye nuxlɔ̃me na mí!—Mateo 13:47-50.
21. Tso ƒe 1919 dzi la, aleke Kristotɔ siwo le hame vavãtɔ me la wɔ nu ɖe Yesu ƒe nya siwo wògblɔ na Kristotɔ siwo le Laodikea la ŋue?
21 Le hame vavãtɔ me gɔ̃ hã la, ame yɔyrɔe aɖewo li siwo le abe nunono si medze dzo nyuie be wòade dzo ame me o eye mefa nyuie be wòafa dzi na ame hã o ene. Gake Yesu kpɔtɔ lɔ̃ eƒe hamea vevie. Ekpena ɖe Kristotɔ siwo wɔa nu amedzrowɔwɔtɔe la ŋu, eye wo dometɔ geɖe xɔe, abe ɖe wobe wòava ɖu fiẽnuɖuɖu ene. Emetsonue nye be tso ƒe 1919 dzi la, woʋu woƒe ŋkuwo be wose Biblia me nyagblɔɖiwo gɔme. Wose vivi le numekɔkɔ geɖe ŋutɔ ƒe ɣeyiɣi me.—Psalmo 97:11; Petro II, 1:19.
22. Fiẽnuɖuɖu bubu kae anya nɔ susu me na Yesu, eye amekawoe akpɔ gome le eme?
22 Le nya si Yesu gblɔ na Laodikeatɔwo me la, fiẽnuɖuɖu bubu hã anya nɔ susu me nɛ. Míexlẽe emegbe le Nyaɖeɖefia me be: “Woayra amesiwo wokpe va Alẽvi la ƒe srɔ̃ɖenuɖuɖu la gbɔ.” Esiae nye aʋadziɖuɖu ƒe kplɔ̃ɖoɖo gã si woatsɔ akafu Yehowa le eƒe ʋɔnudɔdrɔ̃ hehe va alakpasubɔsubɔ dzi megbe—esi nye kplɔ̃ɖoɖo si me Kristo kple eƒe ŋugbetɔ la me tɔ 144,000 la katã akpɔ gome le le dziƒo. (Nyaɖeɖefia 19:1-9) Blema Laodikea-hame ma me tɔ siwo wɔ ɖe eƒe nya dzi—ẽ, kple egbeŋkekea me Kristo Yesu nɔvi ɖianukware siwo katã doa dzesidewu dzadzɛwo abe Kristotɔ amesiamina vavãwo ene—aɖu fiẽnuɖuɖu ma kple woƒe Ŋugbetɔsrɔ̃a. (Mateo 22:2-13) Nukae nye si ʋã ame ale, be woado vevie nu ahatrɔ dzime!
Dziɖulawo ƒe Fiazikpui
23, 24. (a) Fetu bubu ka ŋutie Yesu ƒo nu le? (b) Ɣekaɣie Yesu bɔbɔ nɔ eƒe Mesia-fiazikpuia dzi, eye ɣekaɣie wòdze ʋɔnu dɔdrɔ̃ amesiwo be Kristotɔwoe yewonye la gɔme? (d) Ŋugbe wɔnuku kae Yesu do na eƒe nusrɔ̃lawo esime wòɖo eƒe ku ƒe Ŋkuɖodzia anyi?
23 Yesu gaƒo nu tso fetu bubu ŋuti esime wògblɔ be: “Amesi ke ɖu dzi la, mana wòabɔbɔ nɔ anyi kplim ɖe nye fiazikpui la dzi, abe alesi nye hã meɖu dzi, eye mebɔbɔ nɔ anyi kple Fofonye ɖe eƒe fiazikpui dzi la ene.” (Nyaɖeɖefia 3:21) Le Dawid ƒe nya siwo le Psalmo 110:1, 2 ƒe emevava me la, esi nuteƒewɔla Yesu ɖu xexeame dzi la, wofɔe ɖe tsitre le ƒe 33 M.Ŋ. me hedoe ɖe dzi wòbɔbɔ nɔ Fofoa gbɔ le Eƒe dziƒofiazikpuia dzi. (Dɔwɔwɔwo 2:32, 33) Le ƒe vevi bubu si nye ƒe 1914 me la, Yesu va bɔbɔ nɔ eya ŋutɔ ƒe Mesia fiazikpui dzi abe Fia kple Ʋɔnudrɔ̃la ene. Ʋɔnudɔdrɔ̃a dze egɔme ɖe amesiwo be yewonye Kristotɔwo dzi le ƒe 1918 me. Ɣemaɣie woafɔ aʋadziɖula amesiamina siwo ku do ŋgɔ na ɣemaɣi la ɖe tsitre be woaɖanɔ Yesu gbɔ le eƒe Fiaɖuƒea me. (Mateo 25:31; Petro I, 4:17) Edo esia ƒe ŋugbe na wo esime wònɔ eƒe ku ƒe Ŋkuɖodzia ɖom anyi hegblɔ na eƒe nusrɔ̃lawo bena: “Nye la mele fiaɖuƒe ɖom ɖi na mi, abe alesi Fofonye hã ɖoe ɖi nam ene, bena miaɖu nu, eye miano nu le nye kplɔ̃ ŋu le nye fiaɖuƒe la me, eye miabɔbɔ nɔ fiazikpuiwo dzi, be miadrɔ̃ ʋɔnu Israel-ƒome wuieveawo.”—Luka 22:28-30.
24 Dɔdasi wɔnuku kae nye sia—be woanɔ Fia si le dzi ɖum la gbɔ le “nuwo ƒe gbugbɔgadzi” la me eye woanɔ te ɖe eƒe vɔsa deblibo la dzi akpɔ gome kplii le ameƒomea me tɔ toɖolawo hehe be woaɖo Eden me blibodedea gbɔ la me! (Mateo 19:28; 20:28) Abe alesi Yohanes gblɔe na mí ene la, Yesu ana amesiwo aɖu dzi la nazu “fiawo kple nunɔlawo hena eƒe Mawu Fofo la,” eye woanɔ fiazikpuiwo dzi aƒo xlã Yehowa ŋutɔ ƒe dziƒofiazikpui gã la. (Nyaɖeɖefia 1:6; 4:4) Míeɖanye amesiaminawo alo le anyigba yeye habɔbɔ si le mɔ kpɔm be yewoakpɔ gome le Paradiso ɖoɖo anyi ake me o, mina mí katã míaxɔ nya siwo Yesu gblɔ na Laodikeatɔwo la ade dzi me!—Petro II, 3:13; Dɔwɔwɔwo 3:19-21.
25. (a) Abe alesi wònɔ le gbedasi siwo do ŋgɔ la me ene la, aleke Yesu wu eƒe gbedasi na Laodikea-hamea nue? (b) Aleke wòle be Kristotɔ ɖesiaɖe nawɔ nu ɖe nya siwo Yesu gblɔ na hame si nɔ Laodikea la nue?
25 Abe alesi wònɔ le gbedasi siwo do ŋgɔ me ene la, Yesu wu esia nu kple nuxlɔ̃menya be: “Amesi ke to li nɛ la, nese nusi gbɔgbɔ la gblɔ na hameawo.” (Nyaɖeɖefia 3:22) Míele nuwuɣia me ʋĩ ke. Ðaseɖiɖia ƒo xlã mí godoo be Kristodukɔa fa le lɔlɔ̃ gome. Abe amesiwo to vovo ene la, ele be mí Kristotɔ vavãwo míawɔ ɖe gbedasi si Yesu ɖo ɖe hame si le Laodikea la dzi vevie, ẽ, míawɔ ɖe mía Aƒetɔ ƒe gbedasi adre siwo katã wòɖo ɖe hameawo la dzi. Míate ŋu awɔ esia to gome kpɔkpɔ le Yesu ƒe nyagblɔɖi gã si ku ɖe míaƒe ŋkekea ŋu la ƒe emevava me dzi: “Eye woaɖe gbe ƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.”—Mateo 24:12-14.
26. Ɣekaɣie Yesu gaƒo nu kple Yohanes tẽ, gake nuka mee wòkpɔ gome le?
26 Yesu ƒe aɖaŋuɖoɖo na hame adreawo wu enu. Megaƒo nu kple Yohanes le Nyaɖeɖefia me o vaseɖe ta mamlea dzi; gake ekpɔ gome le ŋutegaawo dometɔ geɖe me, le kpɔɖeŋu me, le Yehowa ƒe ʋɔnudɔdrɔ̃ hehe vɛ me. Mina míawɔ ɖeka kple Yohanes habɔbɔa azɔ le ŋutega wɔnuku evelia si Aƒetɔ Yesu Kristo ɖe fia la me dzodzro me.
[Etenuŋɔŋlɔ]
a Blematomenukulawo kpɔ teƒe siawo le afisi Laodikea nɔ la.
[Aɖaka si le axa 73]
Ŋutilãmenudidi Kpakple Nunya
Le keke ƒe 1956 me la, nyadzɔdzɔgbalẽŋlɔla aɖe ŋlɔe bena: “Wobu akɔnta be ƒe alafa ɖeka enye si la, nu 72 ye ame akpa gãtɔ dina, eye wobu 16 le wo dome be wohiã ŋutɔŋutɔ. Egbea wobu akɔnta be nu 474 ye ame akpa gãtɔ dina, eye wobu 94 le wo dome be wohiã ŋutɔŋutɔ. Ƒe alafa ɖekae nye si la, nudzralawo tsɔ nu 200 ɖo amewo ŋkume be woaƒle—gake egbea nusiwo wu 32,000 ye li be woatsi tre ɖe wo ƒeƒle ŋu. Amegbetɔ ƒe nuhiahiãwo mesɔ gbɔ o—nusiwo wòdina mevɔna o.” Egbea wole eƒom ɖe amewo nu be ŋutilãmekesinɔnuwo kple nunɔamesiwoe nye nu vevitɔ le agbe me. Eyata ame geɖe ŋea aɖaba ƒua Nyagblɔla 7:12 ƒe aɖaŋuɖoɖo si me nunya le la dzi; egblɔ be: “Nunya doa vɔvɔli, eye ga hã doa vɔvɔli; eye sidzedze ƒe viɖe enye: Nunya léa amesi si wòle la ƒe agbe ɖe te.”
[Nɔnɔmetata si le axa 67]
Tsi si ɖoa Laodikea la anɔ yɔyrɔe eye mavivi o. Yɔyrɔenɔnɔ ƒe nɔnɔme manyomanyo aɖe nɔ Kristotɔ siwo nɔ Laodikea la si