Ehiã Kpata Be Míanɔ Ŋudzɔ!

“GAƑOƑO la de vɔ bena, miafɔ tso alɔ̃ me.” (Romatɔwo 13:11) Apostolo Paulo ŋlɔ nya siawo ɖo ɖe Kristotɔ siwo nɔ Roma ƒe 14 do ŋgɔ hafi Yudatɔwo ƒe nuɖoanyia va nuwuwu kpata le ƒe 70 M.Ŋ. me. Esi Yudatɔ Kristotɔwo nɔ ŋudzɔ le gbɔgbɔ me ta la, womenɔ Yerusalem le ɣeyiɣi sesẽ ma me o si wɔe be wosi le ku alo kluvinyenye nu. Gake aleke wowɔ nya be ehiã be yewoado le dua me?

Yesu Kristo xlɔ̃ nu wo be futɔwo aƒo xlã Yerusalem eye woaxlã emenɔlawo ɖe anyi. (Luka 19:43, 44) Emegbe Yesu gblɔ nu vovovo siwo anye dzesi si eyomedzela nuteƒewɔlawo akpɔ adze sii bɔbɔe la na wo. (Luka 21:7-24) Le Kristotɔ siwo nɔ Yerusalem gome la, dodo le dua me fia be woagblẽ woƒe aƒewo kple dɔwɔɖuiwo ɖi. Ke hã woƒe ŋudzɔnɔnɔ kple sisi kpɔ woƒe agbe ta.

Esi Yesu gblɔ Yerusalem ƒe tsɔtsrɔ̃ ŋuti nya la, eƒe nusrɔ̃lawo bia be: “Ɣekaɣie nusiawo ava? Eye ka enye wò anyinɔnɔ kple nuɖoanyiawo ƒe nuwuwu la ƒe dzesi?” (Mateo 24:3, NW) Le Yesu ƒe nyaŋuɖoɖo me la, etsɔ eƒe anyi si wòava nɔ la sɔ kple ɣeyiɣi siwo do ŋgɔ na Noa ƒe ŋkekea me Tɔɖɔɖɔ la. Yesu ɖe eme be Tɔɖɔɖɔ la kplɔ ame vɔ̃ɖiwo katã yii. (Mateo 24:21, 37-39) Eyata eɖee fia be Mawu agade nu amegbetɔwo ƒe nya me. Vaseɖe afika? Vaseɖe esime woaɖe xexeme, alo nuɖoanyi vɔ̃ɖi sia katã ɖa! (Tsɔe sɔ kple Petro II, 3:5, 6.) Ðe esia adzɔ le míaƒe ɣeyiɣi mea?

Ðe Nusianu Gale abe Alesi Wònɔ Enea?

Ƒe alafa gbãtɔ me Yudatɔ ʋee aɖewo koe susui be woatsrɔ̃ Yerusalem, yewoƒe du kɔkɔe la. Zi geɖe la, dzimaxɔse sia ƒomevie nɔa amesiwo le dzoto gbɔ gake womekpɔ ɖeke ƒe wowó teƒe kpɔ o la si. Ne woxlɔ̃ nu wo la, ŋuɖoɖo si ko wonanae nye be “Menye nye agbemeŋkekewo mee woadzɔ o.” Dzotoŋutinunyala Lionel Wilson gblɔ be, “Zi geɖe la, dzotowo wóna le ƒe alafa eve alo etɔ̃ ɖesiaɖe me. Ðewohĩ àbia ɖokuiwò se be, ɖe dzoto wó le ye dzilawo ŋɔli wòhiã be woaʋu hã. Gake ne tɔgbuiwòwo dzie wòdzɔ ɖo la, ke xotutu ko wònye.”

Gake nyatakaka si sɔ ate ŋu awɔe be míakpɔ afɔku ƒe dzesiwo adze sii ahabu wo nya vevii. Amesiwo si le Pelée Toa ƒe wowó nu dometɔ ɖeka nya nu tso dzotowo ŋu eye enya dzesi siwo fia be afɔku adzɔ. Wokɔ dzesi siawo hã me nyuie na amewo ɣeyiɣi kpui aɖe do ŋgɔ na Pinatubo Toa ƒe wowó. Dzotoŋutinunyala siwo nɔ ŋku lém ɖe ŋusẽ makpɔmakpɔ siwo nɔ tutum ɖo le toa me ŋuti la na afimatɔwo se egɔme be ele be woadzo le teƒea.

Ke hã ame aɖewo aŋe aɖaba aƒu afɔkuwo ŋuti dzesiwo dzi kokoko ahate tɔ ɖe edzi be naneke mele dzɔdzɔ ge o. Ðewohĩ woaɖu fewu le amesiwo wɔ afɔɖeɖe si hiã ŋuti gɔ̃ hã. Apostolo Petro gblɔ ɖi be nukpɔsusu sia abɔ le míaƒe ŋkekea me. Egblɔ be: “Minya esia gbã bena, le ŋkeke mamleawo dzi la fewuɖulawo lava kple fewuɖuɖu, amesiwo zɔna le woawo ŋutɔwo ƒe nudzodzrowo nu, eye woagblɔ bena: Afika eƒe vava la ƒe ŋugbedodo la le? Elabena tso esime fofoawo dɔ alɔ̃ la, nuwo katã nɔ anyi nenema tso nuwɔwɔ ƒe gɔmedzedze la me.”—Petro II, 3:3, 4.

Èxɔe se be míele ‘ŋkeke mamlɛawo mea’? John A. Garraty kple Peter Gay bia le The Columbia History of the World me be: “Ðe míele míaƒe ŋkuʋuʋu ƒe toyiyi kpɔma?” Emegbe ŋutinyaŋlɔla siawo dzro dziɖuɖuwo ƒe kuxiwo, alesi hlɔ̃dodo kple tomaɖomaɖo dziɖuɖu le dzidzim ɖe edzi le xexeame godoo, ƒomegbenɔnɔ ƒe gbegblẽ, alesi dzɔdzɔmeŋutinunya kple mɔ̃ɖaŋuŋutinunya do kpo ameƒomea ƒe kuxiwo gbɔ kpɔkpɔ, tanyenye ŋuti kuxiwo, kple xexeame katã ƒe agbenɔnɔ kple subɔsubɔhawo ƒe gbegblẽ me. Woƒo nya ta be: “Ne menye esiawoe nye nuwuwu ŋutɔŋutɔ ƒe dzesiwo o la, ekema woɖi wo tututu.”

Susu si me kɔ la le mía si si ta míexɔe se be “nuwuwu” aɖe gogo ŋutɔ. Mele be míavɔ̃ be anyigba ŋutɔŋutɔ atsrɔ̃ o, elabena Biblia gblɔ be Mawu “[ɖo] anyigba gɔme anyi ɖe eƒe anyinɔwo dzi, ne magaʋã gbeɖe akpɔ o.” (Psalmo 104:5) Ke hã, ele be míakpɔ mɔ be woahe nuɖoanyi vɔ̃ɖi sia si kplɔ ameƒomea de nɔnɔme wɔnublanui sia me la ava nuwuwui kaba. Nukatae? Elabena míele kpeɖodzi geɖe siwo de dzesi nuɖoanyi sia ƒe nuwuwu abe alesi Yesu Kristo gblɔe ene la kpɔm. (Kpɔ aɖaka si nye “Ŋkeke Mamlɛawo ƒe Dzesi Aɖewo.”) Nukata màtsɔ Yesu ƒe nyawo asɔ kple xexeame nudzɔdzɔwo o? Esia wɔwɔ akpe ɖe ŋuwò nàwɔ nyametsotso nyuiwo na ɖokuiwò kple wò ƒomea. Gake nukata wòle be nàwɔ afɔɖeɖe fifia?

Ehiã Vevie Be Woanɔ Ŋudzɔ

Togbɔ be dzɔdzɔmeŋutinunyalawo ate ŋu anya ɣeyiɣi si me dzoto aɖe awó hã la, womate ŋu agblɔ gaƒoƒo si me tututu wòadzɔ o. Nenema ke Yesu gblɔ le nuɖoanyi sia ƒe nuwuwu ŋuti be: “Ke le ŋkeke ma kple gaƒoƒo ma ŋuti la, ame aɖeke menyae o; mawudɔla, siwo le dziƒowo, kple Vi la hã menyae o, negbe Fofonye ɖeka ko.” (Mateo 24:36) Esi míenya ɣeyiɣi si me tututu fifi nuɖoanyia awu enu o ta la, Yesu na nuxlɔ̃ame sia mí be: “Minya esia bena, ɖe wònye aƒeatɔ anya zã ƒe ŋudzɔɣi, si me fiafitɔ ava la, anye ne anɔ ŋudzɔ, eye mana mɔe bena, wòadze kpɔ age ɖe eƒe aƒe me o. Eyaŋuti miawo hã misu te; elabena Amegbetɔvi la [Yesu] ava le gaƒoƒo si ŋuti miebu o la me.”—Mateo 24:43, 44.

Yesu ƒe nyawo fia be nuɖoanyi sia ƒe nuwuwu dziŋɔ la ava xexe sia dzi le vo me. Ne míenye eyomedzelawo kura gɔ̃ hã la, ehiã be ‘míaɖee afia be míele klalo.’ Míaƒe nɔnɔmea ɖi aƒetɔ si dzi woado ɖo le vo me le esi menya ɣeyiɣi si me fiafitɔ adze kpɔ age ɖe eƒe aƒeme o ta.

Nenema ke apostolo Paulo gblɔ na Kristotɔ siwo nɔ Tesalonika be: “Mia ŋutɔwo mienyae kɔte bena, Aƒetɔ ƒe ŋkeke la gbɔna, abe alesi fiafitɔ vana le zã me ene. . . . Nɔviwo, miele viviti me, bena ŋkeke la naɖi ɖe mi abe fiafitɔ ene o.” Paulo de dzi ƒo hã be: “Migana míanɔ alɔ̃ dɔm abe ame bubuwo ene o, ke boŋ mina míanɔ ŋudzɔ, eye míanɔ mo xexi.” (Tesalonikatɔwo I, 5:2, 4, 6) Be “míanɔ ŋudzɔ, eye míanɔ mo xexi” gɔme ɖe?

Míaƒe sisi yi ɖe dedienɔƒe menye sisi tso du aɖe me abe alesi ƒe alafa gbãtɔ me Kristotɔwo si tso Yerusalem ene o. Esi Paulo xlɔ̃ nu haxɔsetɔ siwo nɔ Roma be woanyɔ tso alɔ̃ me megbe la, ede dzi ƒo na wo be ‘woaɖe viviti me dɔwɔwɔwo ɖa’ eye ‘woado Aƒetɔ Yesu Kristo.’ (Romatɔwo 13:12, 14) Ne míeto Yesu ƒe afɔtoƒewo tututu la, míaɖee afia be míele ŋudzɔ ɖe ɣeyiɣiawo ŋuti, eye ŋudzɔnɔnɔ le gbɔgbɔ me alea ana Mawu nakpɔ mía ta ne nuɖoanyi vɔ̃ɖi sia wu enu.—Petro I, 2:21.

Tameɖoɖo nɔa agbe ŋu na amesiwo dzea Yesu Kristo yome eye wokpɔa dzidzeme le agbe me. Yehowa Ðasefo miliɔn geɖe kpɔe dze sii be Kristo ƒe nusrɔ̃lanyenye ƒe kɔkutia bɔbɔ eye enaa dzidzeme ame. (Mateo 11:29, 30) Afɔɖeɖe gbãtɔ si woawɔ ava zu nusrɔ̃la enye be ‘woanya Mawu kple Yesu Kristo, si wòdɔ ɖa la.’ (John 17:3) Ðasefowo dea aƒe miliɔn geɖe me kwasiɖa sia kwasiɖa be yewoakpe ɖe amewo ŋu be “nyateƒe ƒe sidzedze la” nasu wo si. (Timoteo I, 2:4) Adzɔ dzi na wo be yewoawɔ Biblia-nusɔsrɔ̃ kpli wò le aƒewò me femaxee. Eye ne èle tsitsim le Mawu ƒe Nya ŋuti sidzedze me la, ɖikeke mele eme o be, àlɔ̃ ɖe edzi be míaƒe ŋkekeawo to vovo. Nyateƒee, ehiã kpata be míanyɔ tso alɔ me!

[Aɖaka/Nɔnɔmetatawo si le axa 7]

ŊKEKE MAMLƐAWO ƑE DZESI AÐEWO

“Dukɔ latsi tre ɖe dukɔ ŋuti”; ‘woaɖe ŋutifafa ɖa le anyigba dzi.’ (Mateo 24:7; Nyaɖeɖefia 6:4)

Ƒe alafa sia me xexemeʋa eveawo kple aʋawɔwɔ bubu geɖe ɖe ŋutifafa ɖa le anyigba dzi. Ŋutinyaŋlɔla John Keegan ŋlɔe be: “Xexemeʋa Gbãtɔ—kple Evelia si kplɔe ɖo hã—ƒe lolome, sesẽme, teƒe siwo wowɔe se ɖo, kpakple nunɔamesiwo kple amesiwo tsrɔ̃ le eme la ƒo aʋa siwo katã dzɔ kpɔ la ta sasasã. . . . Xexemeʋaawo wu ame wu, wogblẽ kesinɔnuwo dome wu eye wona amewo kpe fu le teƒe geɖe wu aʋa siwo wowɔ va yi.” Fifia nyɔnuwo kple ɖeviwo kpea fu le aʋawo me wu asrafowo. Dukɔ Ƒoƒuawo ƒe Ðeviwo ƒe Nyagbɔkpɔha bu akɔnta be le ƒe ewo siwo va yi me la, ɖevi miliɔn evee wowu le aʋawo me.

“Dɔwuame” (Mateo 24:7; Nyaɖeɖefia 6:5, 6, 8)

Le ƒe 1996 me la, lu kple bli xɔ asi ale gbegbe. Nukatae? Ŋkeke 50 koe woaɖu nuku siawo siwo kpɔtɔ ɖe avawo me le xexeame katã wòavɔ, eye eyae nye agbɔsɔsɔ suetɔ kekeake si kpɔtɔ kpɔ. Nuɖuɖu veviwo ƒe asixɔxɔ wɔe be hiãtɔ miliɔn alafa geɖe siwo le xexeame—siwo dometɔ geɖe nye ɖeviwo la—tsia dɔ.

“Anyigbaʋuʋu ava teƒeteƒewo” (Mateo 24:7)

Le ƒe 2,500 siwo va yi me la, anyigbaʋuʋu asieke ko dometɔ ɖesiaɖee wu ame 100,000 kple edzivɔ. Esiawo dometɔ ene dzɔ tso ƒe 1914 me.

“Nu madzɔmadzɔ wɔwɔ ƒe agbɔsɔsɔ” (Mateo 24:12)

Esi ƒe alafa 20 lia yina ɖe eƒe nuwuwu la, nu madzɔmadzɔ wɔwɔ, alo sedzidada keke ta. Ŋɔdzidonamelawo ƒe dumevi dzrowo dzi dzedze, amewula makpɔnublanuiwo, kple amehawo tsɔtsrɔ̃ nye ŋkeke mamlɛ siawo me ŋutasesẽnuwɔna dziŋɔwo dometɔ aɖewo.

“Dɔvɔ̃wo lava teƒeteƒewo” (Luka 21:11)

Le ƒe 1990 ƒeawo me la, ɖewohĩ ame miliɔn 30 ye yɔmekpe awu. Dɔlékuiwo ƒe atike masemase le dzidzim ɖe edzi. Ŋudza, si nye amewudɔ vɔ̃ɖi aɖea, dzea ame miliɔn 300 va ɖo 500 dzi ƒe sia ƒe eye wobu akɔnta be ewua ame miliɔn 2. Kaka ƒe ewo siawo nawu enu la, wole mɔ kpɔm be amesiwo AIDS awu la ƒe xexlẽme aɖo miliɔn 1.8 ƒe sia ƒe. State of the World 1996 gblɔ be: “Egbea ameƒomea le dɔvɔ̃wo ƒe dɔvɔ̃ teƒe kpɔm.”

“Woaɖe gbeƒã fiaɖuƒeŋutinya nyui sia na amewo le anyigba blibo la katã dzi.” (Mateo 24:14, NW)

Le ƒe 1997 me la, Yehowa Ðasefowo zã gaƒoƒo si wu biliɔn ɖeka tsɔ ɖe gbeƒã Fiaɖuƒe ŋuti nyanyuia. Ðasefo siwo wu miliɔn atɔ̃ tsɔa gbedasi sia yina na amewo le anyigba 232 dzi.

[Afi Si Míexɔ Mɔɖeɖe Tso]

FAO photo/B. Imevbore

U.S. Coast Guard photo

[Nɔnɔmetata si le axa 4, 5]

Kristotɔwo si tso Yerusalem le esi wonɔ ŋudzɔ le gbɔgbɔ me ta