Ta 19

Mawu ƒe Israel la Nu Tetre

Ŋutega 4—Nyaɖeɖefia 7:1-17

Nyati: Wotre ame 144,000 la nu, eye wokpɔ ameha gã aɖe be wotsi tre ɖe Yehowa ƒe fiazikpuia kple Alẽvi la ŋkume

Emevaɣi: Tso esime woɖo Kristo Yesu fiae le ƒe 1914 me vaseɖe eƒe Ƒe Akpe Ðeka Dziɖuɖu la me

 1. “Ameka ate ŋu anɔ tsitre” le Mawu ƒe dzikudogbe gã la dzi?

“AMEKA ate ŋu anɔ tsitre ɖe enu?” (Nyaɖeɖefia 6:17) Ẽ, amekae? Ne Mawu ƒe dzikuŋkeke gã la gblẽ Satana ƒe nuɖoanyia la, xexeame ƒe dziɖulawo kple dukɔwo abia nya ma. Awɔ na woawo be tsɔtsrɔ̃ si gbɔna la atsrɔ̃ amegbetɔwo katã. Gake nenemaea? Dzidzɔtɔe la, Mawu ƒe nyagblɔɖila ka ɖe edzi na mí be: “Woaɖe amesiame, si ayɔ Yehowa ŋkɔ la.” (Yoel 3:5) Apostolo Petro kple Paulo ɖo kpe nya ma dzi. (Dɔwɔwɔwo 2:19-21; Romatɔwo 10:13) Ẽ, amesiwo yɔa Yehowa ƒe ŋkɔ la atsi agbe. Amekawoe nye amesiawo? Míadze si wo esime wole ŋutega si kplɔe ɖo la ɖem fia.

 2. Nukatae wòwɔ nuku be amewo atsi agbe le Yehowa ƒe ʋɔnudrɔ̃gbea?

² Enye nusi wɔ nuku vavã be ame aɖe nate ŋu atsi agbe le Yehowa ƒe ʋɔnudrɔ̃gbea dzi, elabena Mawu ƒe nyagblɔɖila bubu ƒo nu tso eŋu le nya siawo me be: “Kpɔ ɖa, Yehowa ƒe ahom le tutum le dɔmedzoe me, eye ya ʋuduʋudu le ƒoƒom ɖe ame vɔ̃ɖiwo ƒe ta dzi. Yehowa ƒe dɔmedzoe nu mafa o, vaseɖe esime wòawɔ eƒe dzimesusuwo dzi ade goe hafi.” (Yeremya 30:23, 24) Ehiã kpata be míawɔ afɔɖeɖe be míanɔ te ɖe ahom ma nu!—Lododowo 2:22; Yesaya 55:6, 7; Zefanya 2:2, 3.

Yaƒoƒo Eneawo

 3. (a) Dɔ tɔxɛ kae Yohanes kpɔ mawudɔlawo wole wɔwɔm? (b) Nukae “yaƒoƒo eneawo” tsi tre ɖi na?

³ Hafi Yehowa naɖe dziku sia ɖe go la, dziƒodɔlawo wɔa dɔ tɔxɛ aɖe. Yohanes kpɔ esia le ŋutega me azɔ: “Nusiawo megbe la mekpɔ mawudɔla ene wole tsitre ɖe anyigba ƒe dzogoe eneawo dzi, eye wolé anyigba ƒe yaƒoƒo eneawo me ɖe asi, bena ya nagaƒo ɖe anyigba dzi alo ɖe ƒu dzi alo ɖe ati aɖeke dzi o.” (Nyaɖeɖefia 7:1) Nukae esia fia na mí egbea? ‘Yaƒoƒo ene’ siawo nye tsɔtsrɔ̃ ƒe ʋɔnudɔdrɔ̃ si woahe ava ame vɔ̃ɖi siwo le anyigba dzi, amegbetɔ mawɔsedziwo ƒe “atsiaƒu” dzeagboa kple dziɖula siwo le abe ati dodowo ene eye woxɔa kpekpeɖeŋu kple nunyiame tso anyigba dzi tɔwo gbɔ la dzi kpuie la ɖɔɖɔ si me kɔ.—Yesaya 57:20; Psalmo 37:35, 36.

 4. (a) Nukae mawudɔla eneawo tsi tre ɖi na? (b) Ne woɖe asi le ya eneawo ŋu la, dɔ kae wòawɔ ɖe Satana ƒe habɔbɔ si le anyigba dzi la dzi?

⁴ Ðikeke mele eme o be mawudɔla ene siawo tsi tre ɖi na mawudɔlawo ƒe hatsotso ene, amesiwo ŋudɔ wɔm Yehowa le be woaɖo asi ʋɔnudɔdrɔ̃ hehe vɛ la dzi vaseɖe ɣeyiɣi ɖoɖia dzi. Ne mawudɔlawo ɖe asi le Mawu ƒe dɔmedzoe ƒe ya mawo ŋu zi ɖeka tso anyiehe, dziehe, ɣedzeƒe kple ɣetoɖoƒe la, tsɔtsrɔ̃a alolo ŋutɔ. Aɖi alesi Yehowa wɔ ya eneawo ŋudɔ hena Elamtɔwo ka hlẽ eye wògbã wo hetsrɔ̃ wo la, gake alolo wu ŋutɔ. (Yeremya 49:36-38) Anye ahomya gã si agblẽ nu wu ‘ya ʋuduʋudu’ si Yehowa tsɔ tsrɔ̃ Amon-dukɔa. (Amos 1:13-15) Satana ƒe habɔbɔ si le anyigba dzi la ƒe akpa aɖeke mate ŋu anɔ te le Yehowa ƒe dzikudogbea esime wòakɔ eƒe fianyenye ŋu tegbee la o.—Psalmo 83:16, 19; Yesaya 29:5, 6.

 5. Aleke Yeremya ƒe nyagblɔɖia kpe ɖe mía ŋue be míase egɔme be Mawu ƒe ʋɔnudɔdrɔ̃wo alɔ anyigba bliboa ɖe eme?

⁵ Ðe míate ŋu aka ɖe edzi be Mawu ƒe ʋɔnudɔdrɔ̃wo atsrɔ̃ nu le anyigba bliboa dzia? Gaɖo to eƒe nyagblɔɖila Yeremya ake: “Kpɔ ɖa, dzɔgbevɔ̃e tso dukɔ gbɔ yi dukɔ gbɔ, eye wode zi ahom gã me le anyigba ƒe mlɔenu. Yehowa ƒe amesiwo wòwu le ŋkeke ma me la, woanɔ anyi tso anyigba ƒe mlɔenu ɖaseɖe anyigba ƒe mlɔenu.” (Yeremya 25:32, 33) Ahom ʋuduʋudu sia mee viviti ado ɖe xexe sia me. Woaʋuʋu eƒe dziɖuɖuwo eye wo nu ayi. (Nyaɖeɖefia 6:12-14) Gake ɣeyiɣi si le ŋgɔ la manye blukɔdoɣi na amesiame o. Ekema amekawo tae woaɖo asi ya eneawo dzi?

Mawu ƒe Dɔtsɔlawo Nu Tetre

 6. Amekae gblɔ na mawudɔlawo be woaɖo asi yaƒoƒo eneawo dzi, eye nukae esia ɖe mɔ na?

⁶ Yohanes yi edzi gblɔ alesi woade dzesi ame aɖewo hena agbetsitsi la be: “Eye mekpɔ mawudɔla bubu le dodom tso ɣedzeƒe, eye Mawu gbagbe la ƒe nutrenu le esi, eye wòdo ɣli kple gbe gã ɖo ɖe mawudɔla ene, siwo wona ŋusẽe be, woawɔ vɔ̃ anyigba kple atsiaƒu la, wòle gbɔgblɔm bena: Migawɔ vɔ̃ anyigba alo atsiaƒu alo atiawo o, vaseɖe esime míatre mía Mawu ƒe dɔtsɔlawo ƒe ŋgowo nu.”—Nyaɖeɖefia 7:2, 3.

 7. Ameka tututue nye mawudɔla atɔ̃lia la, eye ɖaseɖiɖi kae kpe ɖe mía ŋu be míanya amesi wònye?

⁷ Togbɔ be womeyɔ mawudɔla atɔ̃lia sia ƒe ŋkɔ o hã la, ɖaseɖiɖia katã fia be eyae nye Aƒetɔ Yesu si wodo ŋutikɔkɔe na la. Le ɖekawɔwɔ me kple Mawudɔla Gãtɔ si Yesu nye la, woɖee fia le afisia be ekpɔ ŋusẽ ɖe mawudɔla bubuawo dzi. (Tesalonikatɔwo I, 4:16; Yuda 9) Edo tso ɣedzeƒe, abe “ɣedzeƒefiawo”—Yehowa kple eƒe Kristo la—amesiwo va ʋɔnu drɔ̃ ge la ene, abe alesi fia Dario kple Kores wɔe ene esime wobɔbɔ blema Babilon ɖe anyi. (Nyaɖeɖefia 16:12; Yesaya 45:1; Yeremya 51:11; Daniel 6:1) Mawudɔla sia gaɖi Yesu elabena wode Kristotɔ amesiaminawo nu tetre asi nɛ. (Efesotɔwo 1:13, 14) Gawu la, esime woɖe asi yaƒoƒoawo ŋu la, Yesu le ŋgɔ na dziƒoʋakɔwo le ʋɔnudɔdrɔ̃ hehe va dukɔwo dzi me. (Nyaɖeɖefia 19:11-16) Ekema gɔmesese le eŋu be Yesue nye amesi aɖe gbe be woaɖo asi Satana ƒe anyigba dzi habɔbɔa ƒe tsɔtsrɔ̃ dzi vaseɖe esime wotre Mawu ƒe dɔtsɔlawo nu vɔ.

 8. Nukae nye nutetre la, eye ɣekaɣie wòdze egɔme?

⁸ Nukae nye nutetre sia, eye amekawoe nye Mawu ƒe dɔtsɔla siawo? Wo nu tetre la dze egɔme le ƒe 33 M.Ŋ. ƒe Pentekoste dzi esime wotsɔ gbɔgbɔ kɔkɔe si ami na Yudatɔ Kristotɔ gbãtɔwo. Emegbe Mawu yɔ “trɔ̃subɔlawo” hesi ami na wo. (Romatɔwo 3:29; Dɔwɔwɔwo 2:1-4, 14, 32, 33; 15:14) Apostolo Paulo ŋlɔ nu tso kpeɖodzi si le Kristotɔ amesiaminawo si be ‘wonye Kristo tɔ’ la ŋu, eye wògblɔ kpe ɖe eŋu be Mawu “tre mía nu hã, eye wòna gbɔgbɔ ƒe awɔbanu mí le míaƒe dziwo me.” (Korintotɔwo II, 1:21, 22; tsɔe sɔ kple Nyaɖeɖefia 14:1.) Eyata ne woxɔ dɔla siawo abe Mawu ƒe gbɔgbɔmeviwo ene la, wonana woƒe dziƒodomenyinyia ƒe dzesi wo do ŋgɔ—esi nye nutetre alo ŋugbedodo. (Korintotɔwo II, 5:1, 5; Efesotɔwo 1:10, 11) Ekema woate ŋu agblɔ be: “Gbɔgbɔ la ŋutɔ ɖia ɖase kpena ɖe míaƒe gbɔgbɔ la ŋu bena, mawuviwo míenye. Ke ne viwo míenye la, ekema domenyilawo hã míenye: Mawu ƒe domenyilawo kple Kristo ƒe hadomenyilawo, ne ele ale bena míekpe fu kplii, bene mía ŋuti nakɔ hã kplii.”—Romatɔwo 8:15-17.

 9. (a) Dzidodo kae hiã le Mawu ƒe vi siwo wòtsɔ gbɔgbɔ dzi la ƒe ame susɔeawo gome? (b) Ɣeyiɣi didi kae amesiaminawo dodo kpɔ ayi edzi?

⁹ “Ne ele ale bena míekpe fu kplii”—nukae ema fia? Be agbefiakukua nasu Kristotɔ amesiaminawo si la, ele be woado dzi awɔ nuteƒe vaseɖe ku me. (Nyaɖeɖefia 2:10) Menye ‘ne woɖe wò ko la, ɖe woɖe wò’ ƒe nyae wònye o. (Mateo 10:22; Luka 13:24) Ke boŋ woxlɔ̃ nu wo be: “Mido vevie wu tsãtɔ, bena miali ke mia yɔyɔ kple tiatia la sesĩe.” Abe apostolo Paulo ene la, ele be woate ŋu agblɔ mlɔeba bena: “Ʋiʋli nyui lae meʋli; mewu nye mɔzɔzɔ la nu, melé xɔse la me ɖe asi.” (Petro II, 1:10, 11; Timoteo II, 4:7, 8) Eyata ele be Mawu ƒe vi siwo wòtsɔ gbɔgbɔ dzi la ƒe ame susɔeawo dodo kpɔ kple wo me tiatia nayi edzi le anyigba dzi afisia vaseɖe esime Yesu kple mawudɔla siwo kpe ɖe eŋu la tre amesiawo katã ƒe “ŋgowo nu” nyuie hetsɔ ɖee fia keŋkeŋ matrɔmatrɔe be wonye ‘mía Mawu ƒe dɔtsɔla’ wɔnuteƒe siwo wodo kpɔ. Ekema nutetre ma va zua dzeside si nɔa anyi ɖaa. Edze ƒã be hafi woaɖe asi xaxa ƒe yaƒoƒo eneawo ŋu la, woatre gbɔgbɔ me Israel-viwo katã nu keŋkeŋ, togbɔ be wo dometɔ ʋee aɖewo akpɔtɔ anɔ agbe le ŋutilã me gake. (Mateo 24:13; Nyaɖeɖefia 19:7) Xexlẽme bliboa ade!—Romatɔwo 11:25, 26.

Ame Neni Nue Woatre?

10. (a) Ŋɔŋlɔ kawoe ɖee fia be woɖo seɖoƒe na amesiwo nu wotre la ƒe agbɔsɔsɔme? (b) Ame xexlẽme ka nue wotre, eye ɖoɖo ka nue woyɔ wo ɖo?

¹⁰ Yesu gblɔ na amesiwo nu woatre la bena: “Ha sue, megavɔ̃ o! Elabena edze mia Fofo la ŋu be, yeatsɔ fiaɖuƒe la na mi.” (Luka 12:32) Ŋɔŋlɔ bubuwo abe Nyaɖeɖefia 6:11 kple Romatɔwo 11:25 ene ɖee fia be ame xlexlẽme aɖe koe le ha sue sia me, eye le nyateƒe me la, woɖoe ɖi xoxo. Nya siwo Yohanes yi edzi gblɔ la ɖo kpe esia dzi: “Eye mese amesiwo nu wotre la ƒe xexlẽme—wotre ame akpe alafa ɖeka blane vɔ ene nu le Israel-viwo ƒe toawo katã me: Le Yuda ƒe toa me la wotre ame akpe wuieve nu; le Ruben ƒe toa me la wotre ame akpe wuieve nu; le Gad ƒe toa me la wotre ame akpe wuieve nu; le Aser ƒe toa me la wotre ame akpe wuieve nu; le Naftali ƒe toa me la wotre ame akpe wuieve nu; le Manase ƒe toa me la wotre ame akpe wuieve nu; le Simeon ƒe toa me la wotre ame akpe wuieve nu; le Lewi ƒe toa me la wotre ame akpe wuieve nu; le Isaxar ƒe toa me la wotre ame akpe wuieve nu; le Zebulon ƒe toa me la wotre ame akpe wuieve nu; le Yosef ƒe toa me la wotre ame akpe wuieve nu; le Benyamin ƒe toa me la wotre ame akpe wuieve nu.”—Nyaɖeɖefia 7:4-8.

11. (a) Nukatae to 12 siwo woyɔ la mate ŋu aku ɖe ŋutilã me Israel ŋutɔŋutɔ ŋu o? (b) Nukatae Nyaɖeɖefia yɔ to 12? (d) Nukatae fianyenye alo nunɔlanyenye menye to ɖeka ko tɔ le Mawu ƒe Israel la me o?

¹¹ Ðe esia maku ɖe ŋutilã me Israel ŋutɔŋutɔ ŋu oa? Ao, elabena Nyaɖeɖefia 7:4-8 meyɔ toawo ɖe ɖoɖo si nu woyɔna wo ɖo la nu o. (Mose IV, 1:17, 47) Edze ƒã be menye taɖodzinu si le ŋkɔ siwo woyɔ ɖe afisia la ŋue nye be wòaɖe ŋutilã me Yudatɔwo afia le towo nu o, ke boŋ be woaɖee afia be ɖoɖo ma tɔgbe le gbɔgbɔ me Israel si. Esia da sɔ nyuie. Ame 144,000 tututue anɔ dukɔ yeye sia me—ame 12,000 tso to 12 la dometɔ ɖesiaɖe me. To aɖeke menye fiawo tɔ koŋ alo nunɔlawo tɔ koŋ le Mawu ƒe Israel sia me o. Dukɔ bliboa anye fiawo, eye dukɔ bliboa asubɔ abe nunɔlawo ene.—Galatiatɔwo 6:16; Nyaɖeɖefia 20:4, 6.

12. Nukatae wòsɔ be amegã xoxo 24 la dzi Nyaɖeɖefia 5:9, 10 me nyawo ƒe ha le Alẽvi la ŋkume?

¹² Togbɔ be wona mɔnukpɔkpɔ gbãtɔ dzɔdzɔme Yudatɔwo kple trɔ̃subɔla zu Yudatɔwo be woatia wo be woanɔ gbɔgbɔ me Israel me hã la, dukɔ ma me tɔ ʋee aɖewo koe wɔ eŋudɔ. Eyata Yehowa mia asi Trɔ̃subɔlawo. (Yohanes 1:10-13; Dɔwɔwɔwo 2:4, 7-11; Romatɔwo 11:7) Abe alesi wònɔ le Efesotɔ siwo nye “ame tutɔwo na Israel ƒe dumetɔnyenye” tsã la gome ene la, fifia woate ŋu atsɔ Mawu ƒe gbɔgbɔ atre amesiwo menye Yudatɔwo o la nu eye woava nɔ Kristotɔ amesiaminawo ƒe hamea me. (Efesotɔwo 2:11-13; 3:5, 6; Dɔwɔwɔwo 15:14) Ekema esɔ be amegã xoxo 24 la nadzi ha le Alẽvi la ŋkume be: “Nètsɔ wò ʋu ƒle [amewo] tso to sia to kple gbegbɔgblɔ sia gbegbɔgblɔ kple du sia du kple dukɔ sia dukɔ me hena Mawu, eye nèwɔ wo fiawo kple nunɔlawo na míaƒe Mawu, eye woaɖu fia [ɖe] anyigba la dzi.”—Nyaɖeɖefia 5:9, 10.

13. Nukatae Yesu dadavi Yakobo te ŋu ɖo eƒe agbalẽa ɖe “ƒome wuieve, siwo ka hlẽ la” wòsɔ?

¹³ Kristo-hamea nye “dzidzime tiatia la, fia nunɔlanyenye, dukɔ kɔkɔe.” (Petro I, 2:9) Le xɔxɔ ɖe dzɔdzɔme Israel teƒe abe Mawu ƒe dukɔ ene la, eva zua Israel yeye si nye ‘Israel ŋutɔŋutɔ.’ (Romatɔwo 9:6-8; Mateo 21:43)a Le esia ta la, enye nusi sɔ be Yesu dadavi Yakobo naŋlɔ eƒe agbalẽ abe kplɔla ene la “na ƒome wuieve, siwo ka hlẽ la,” esi nye Kristotɔ amesiaminawo ƒe hame si le xexeame katã, si ava nye ame 144,000 emegbe la.—Yakobo 1:1.

Mawu ƒe Israel la Egbea

14. Nukae ɖee fia be Yehowa Ðasefowo nɔ egblɔm ɣesiaɣi be ame 144,000 lae nye amesiwo le gbɔgbɔ me Israel me la ƒe xexlẽme ŋutɔŋutɔ?

¹⁴ Enye nusi nya se be Gbetakpɔxɔ Habɔbɔa ƒe zimenɔla gbãtɔ Charles T. Russell kpɔe dze sii be 144,000 la nye amesiwo le gbɔgbɔ me Israel me la ƒe xexlẽme ŋutɔŋutɔ. Eŋlɔ le The New Creation si nye eƒe Studies in the Scriptures la ƒe Babla VI si wota le ƒe 1904 me la me be: “Gɔmesese ɖesiaɖe li si ta míaxɔe ase be woyɔ ame tiatiawo [amesiamina tiatiawo] ƒe xexlẽme tututu si woɖo ɖi la zi geɖe le Nyaɖeɖefia me (7:4; 14:1); esi nye ame 144,000 ‘siwo woɖe tso amewo dome.’” Le Light ƒe Agbalẽ Gbãtɔ si Gbetakpɔxɔ Habɔbɔa ƒe zimenɔla evelia J. F. Rutherford ta le ƒe 1930 me la me la, wogblɔe nenema ke be: “Eyata Kristo ƒe ha la me tɔ 144,000 la le ha si woɖe fia be wotia hesi ami na wo alo tre wo nu la me.” Enye Yehowa Ðasefowo ƒe nukpɔsusu ɣesiaɣi be Kristotɔ amesiamina 144,000 ŋutɔŋutɔe le gbɔgbɔ me Israel la me.

15. Do ŋgɔ teti na Aƒetɔ ƒe ŋkekea la, nuka mee Biblia nusrɔ̃vi dzimekɔkɔetɔwo susu be dzɔdzɔme Yudatɔwo ase vivi le le Trɔ̃subɔlawo ƒe Azã la ƒe nuwuwu megbe?

¹⁵ Gake egbea ɖe dzɔdzɔme Israel medze na amenuveve tɔxɛ aɖe oa? Le ɣeyiɣi si do ŋgɔ teti na Aƒetɔ ƒe ŋkekea, esi me Biblia nusrɔ̃vi dzimekɔkɔetɔwo ganɔ Mawu ƒe Nya la me nyateƒe veviawo dometɔ geɖe kpɔm ake me la, wosusui be ne Trɔ̃subɔlawo ƒe Azã la wu nu la, tenɔnɔ tɔxɛ aganɔ Yudatɔwo si le Mawu ŋkume. Eyata C. T. Russell ƒe agbalẽ si nye The Time Is at Hand (Studies in the Scriptures ƒe Babla II) si wota le 1889 me la tsɔ Yeremya 31:29-34 ku ɖe dzɔdzɔme Yudatɔwo ŋu hegblɔ be: “Xexeame ɖi ɖase le nyateƒe si wònye be to si wohe na Israel le Trɔ̃subɔlawo ƒe dziɖuɖu te la yi edzi tso D.M.Ŋ. [ƒe 607], be ekpɔtɔ le edzi yim, eye susu aɖeke meli si ta woakpɔ mɔ be woagbugbɔ woƒe dukɔa aɖo anyi do ŋgɔ na M.Ŋ. ƒe ƒe 1914, si nye woƒe ‘azã adre’—si nye ƒe 2520—la ƒe seɖoƒe la o.” Edze abe ɖe woagbugbɔ Yudatɔwo aɖo anyi abe dukɔ ene ɣemaɣi, eye edze ƒã be mɔkpɔkpɔ sia me sẽ ɖe edzi le ƒe 1917 me esime Balfour ƒe Nyameʋuʋu la do ŋugbe be Britaniatɔwo ana kpekpeɖeŋu be woawɔ Palestina wòanye Yudatɔwo ƒe dukɔ.

16. Agbagba kawoe Yehowa Ðasefowo dze be Kristotɔwo ƒe gbedasia naɖo dzɔdzɔme Yudatɔwo gbɔ, eye nukae do tso eme?

¹⁶ Le xexemeʋa gbãtɔ megbe la, Palestina va zu anyigbamamã si wotsɔ de Britania te, eye mɔnukpɔkpɔ su Yudatɔ geɖewo si be woatrɔ ayi anyigba ma dzi. Le ƒe 1948 me la, woɖo Israel Dunyahedukɔa anyi. Ðe esia mefia be Mawu ƒe yayra le Yudatɔwo dzi va ge oa? Yehowa Ðasefowo xɔe se ƒe geɖe be aleae wòle. Eyata le ƒe 1925 me la, wota axa 128-gbalẽ si nye Comfort for the Jews. Le ƒe 1929 me la, woɖe Life, si nye axa 360 ƒe agbalẽ dzeani aɖe si ŋu wotrɔ asi le be wòadze Yudatɔwo ŋu eye wòku ɖe Biblia ƒe agbalẽ si nye Hiob hã ŋu la ɖe go. Wodze agbagba geɖe, vevietɔ le New York Dugã me, be Mesia ŋuti gbedasi sia naɖo Yudatɔwo gbɔ. Dzidzɔtɔe la, ame ʋee aɖewo wɔ ɖe edzi, gake, abe wo tɔgbui siwo nɔ anyi le ƒe alafa gbãtɔa me ene la, Yudatɔ akpa gãtɔ gbe Mesia ƒe anyinɔnɔ ŋuti ɖaseɖiɖia.

17, 18. Gɔmesese kae va su Mawu ƒe dɔla siwo le anyigba dzi la si ku ɖe nubabla yeyea kple Biblia me gbugbɔgaɖoanyi ƒe nyagblɔɖiwo ŋuti?

¹⁷ Edze ƒã be menye Yudatɔwo, abe dukɔ ene lae nye Israel si ŋuti woƒo nu le le Nyaɖeɖefia 7:4-8 alo Biblia me nyagblɔɖi bubu siwo ku ɖe Aƒetɔa ƒe ŋkekea ŋu la me o. Esi wonɔ kɔnyinyiwo yome ta la, Yudatɔwo yi edzi ƒo asa na Mawu ƒe ŋkɔ la zazã. (Mateo 15:1-3, 7-9) Le Yeremya 31:31-34 me dzodzro me la, agbalẽ si nye Jehovah si Yehowa Ðasefowo ta le ƒe 1934 me la, gblɔ kakaɖedzitɔe bena: “Nubabla yeyea meku ɖe amesiwo dzɔ tso Israel me le dzɔdzɔme nu kple ameƒomea ƒe akpa gãtɔ ŋu kura o, ke boŋ . . . gbɔgbɔ me Israel ŋu koe wòku ɖo.” Biblia me gbugbɔgaɖoanyi ƒe nyagblɔɖiawo meku ɖe dzɔdzɔme Yudatɔwo alo dunyahehe ƒe Israel si nye Dukɔ Ƒoƒuawo me tɔ kple xexeame si ŋu Yesu ƒo nu le le Yohanes 14:19, 30 kple 18:36 la ƒe akpa aɖe la ŋu o.

¹⁸ Le ƒe 1931 me la, Mawu ƒe dɔla siwo le anyigba dzi la tsɔ dzidzɔ gã aɖe xɔ ŋkɔ Yehowa Ðasefowo. Wote ŋu tsɔ dzi blibo wɔ ɖeka kple Psalmo 97:11 ƒe nyawo be: “Kekeli dona na ame dzɔdzɔewo kple dzidzɔ na amesiwo ƒe dzi toa mɔ ɖeka la.” Wote ŋu kpɔe dze sii kɔte be gbɔgbɔ me Israel ɖeɖekoe woxɔ ɖe nubabla yeyea me. (Hebritɔwo 9:15; 12:22, 24) Dzɔdzɔme Israel si gbe tɔtrɔ kpakple ameƒomea gbadzaa hã mekpɔ gome aɖeke le eme o. Gɔmesese sia ʋu mɔ be dziƒokekeli aɖe si ɖe dzesi le teokrasi ŋutinya me la naklẽ eme nakɔ ƒã. Esia aɖe alesi Yehowa ɖea eƒe nublanuikpɔkpɔ, amenuveve kple nyateƒe geɖe ŋutɔ fiana amesiwo katã ate ɖe eyama ŋu la afia. (Mose II, 34:6; Yakobo 4:8) Ẽ, le Mawu ƒe Israel la megbe la, ame bubuwo hã akpɔ viɖe tso mawudɔlawo ƒe tsɔtsrɔ̃ ƒe ya eneawo léle ɖe asi me. Amekawoe nye amesiawo? Ðe nele wo domea? Mina míakpɔe ɖa azɔ.

[Etenuŋɔŋlɔ]

[Nɔnɔmetata si xɔ axa 114]

[Nɔnɔmetata siwo le axa 116, 117]

Mawu ƒe Israel vavã la tiatia dze egɔme tso ƒe 33 M.Ŋ. ƒe Pentekoste dzi vaseɖe ƒe 1935 me, esime le Yehowa Ðasefowo ƒe takpekpe aɖe si zu ŋutinya ƒe akpa aɖe si wowɔ le Washington, D.C. me la wova te gbe ɖe ameha gã siwo si anyigba dzi nɔnɔ ƒe mɔkpɔkpɔwo le la nu ƒoƒo ƒu boŋ dzi (Nyaɖeɖefia 7:9)