Ta 13
Ameha Gã aɖe le Yehowa ƒe Fiazikpui la Ŋgɔ
1. (a) Hafi Mawu ƒe subɔla siwo nɔ anyi do ŋgɔ na Kristotɔwo ƒe ɣeyiɣia alo ame 144,000 la ƒe teƒeɖoɖofetu nasu wo si la, nuka mee wòle be woato? (b) Gake nukae ava me na ameha gã aɖe si anɔ agbe esime “xaxa gã” la ava la?
TOGBƆ be Mawu ƒe subɔla nuteƒewɔlawo tso Habel dzi vaseɖe Yohanes Amenyrɔ̃ɖetsimela dzi la tsɔ Mawu ƒe lɔlɔ̃nu wɔwɔ ɖo nɔƒe gbãtɔ le woƒe agbe me hã la, wo katã wova ku eye wole tsitretsitsi lalam. Ele be ame 144,000 siwo anɔ Kristo gbɔ le eƒe Dziƒofiaɖuƒea me la hã naku hafi woƒe asi ate ŋu asu woƒe fetua dzi. Nusi to vovo na esia enye be woɖee fia apostolo Yohanes le ŋutega me be ameha gã aɖe atsi agbe ŋutɔŋutɔ atso “xaxa gã” la eye agbe nɔnɔ tegbee ƒe mɔkpɔkpɔ anɔ wo si esime womeku hafi o.—Nyaɖ. 7:9-17.
Sidzedze “Ameha Gã” La
2. Nukawoe dzɔ hafi wova se amesiwo Nyaɖeɖefia 7:9 ƒe “ameha gã” la nye la gɔme kɔte?
2 Womese amesiwo “ameha gã” sia nye la gɔme o ƒe alafa geɖe. Gake nyagblɔɖi siwo do ƒome kple esia la gɔme sese ŋgɔyiyitɔe la dzra mɔa dzi ɖo. Le ƒe 1923 me la wokpɔe dze sii be ‘alẽ siwo le Yesu ƒe lododo si le Mateo 25:31-46 me la kple ‘alẽ bubu’ siwo ŋuti wòƒo nu le le Yohanes 10:16 me la nye amesiwo le agbe fifia siwo si mɔnukpɔkpɔ asu be woanɔ anyigba dzi afisia tegbee. Le ƒe 1931 me la wokpɔe be amesiwo ŋuti woƒo nu le le Xezekiel 9:1-11 be ŋutsu si si agbalẽŋlɔnu le la de dzesi ŋgonu na wo lae nye Mateo ta 25 ƒe ‘alẽawo.’ Azɔ le ƒe 1935 me la wokpɔe be Nyaɖeɖefia 7:9-17 ƒe “ameha gã” la kee nye ‘alẽawo’ le Yesu ƒe alẽwo kple gbɔ̃wo ŋuti lododoa me. Togbɔ be le keke ƒe 1923 me la wokpɔe dze sii be ame aɖewo siwo ɖi alẽwo nenema la dze egɔme le wo ɖokui ɖem fia hã la, ƒe 1935 mee wova dze egɔme nɔ agbɔ sɔm kabakaba. Egbea la ame miliɔn geɖe li siwo le didim be yewoanɔ “alẽ bubuwo” ƒe “ameha gã” ma si ŋu Mawu kpɔ ŋudzedze ɖo la me.
3. Nukatae ‘tsitre si wole ɖe fiazikpui la ŋgɔ’ la mefia be wonye dziƒohabɔbɔ o?
3 “Ameha gã” la me tɔwo to vovo tso gbɔgbɔ me Israel-vi 144,000 siwo ŋuti woƒo nu le do ŋgɔ le Nyaɖeɖefia ƒe ta ma ke me la gbɔ. Le Yohanes ƒe ŋutegaa me la mekpɔ “ameha gã” sia be wole dziƒo o. Tsitre si wole “ɖe fiazikpui la ŋgɔ” (Helagbe: e·noʹpi·on tou throʹnou, “le fiazikpuia ŋkume”) la mebia be woanɔ dziƒo o. Woƒe nɔƒe lae nye afisi Mawu, amesi gblɔ be yekpɔa amegbetɔviwo tso dziƒo la ‘ate ŋu akpɔ wo le.’ (Nyaɖ. 7:9; Ps. 11:4; tsɔe sɔ kple Psalmo 100:1, 2 kple Luka 1:74, 75 kpakple Dɔwɔwɔwo 10:33.) Nenema kee mehiã be “dukɔwo katã” nanɔ dziƒo hafi woanɔ Kristo ƒe fiazikpui la ŋgɔ (le nyagbeawo nu la, “le eƒe ŋku me”) abe alesi wogblɔe le Mateo 25:31, 32 la ene o. Nyateƒe si wònye be “ameha gã, si ame aɖeke mete ŋu xlẽ o” la menye dziƒohabɔbɔ o la dze ƒã ne wotsɔ Nyaɖeɖefia 7:4-8 sɔ kple 14:1-4, afisi woɖe ame agbɔsɔsɔ tututu si woɖe tso anyigba dzi be woanɔ dziƒo la fia le la.
4. (a) Nukae nye “xaxa gã” si me woatsi agbe le la? (b) Abe alesi wogblɔ le Nyaɖeɖefia 7:11, 12 ene la, amekawoe léa ŋku ɖe “ameha gã” la ŋu hekpɔa gome le tadedeagu me kpli wo?
4 Le amesiwo nye “ameha gã” la ɖeɖe fia me la, Yohanes ŋlɔe bena: “Amesiawo nye amesiwo do go tso xaxa gã la me.” Nusi me woatsi agbe le la anye xaxa gãtɔ kekeake si va anyigba dzi kpɔ la vavã. (Nyaɖ. 7:13, 14; Mat. 24:21) Ðikeke aɖeke manɔ susu me na amesiwo atsi agbe le Yehowa ƒe ŋkeke dziŋɔ ma me la le amesi ɖe wo la ŋu o. Ne wogblɔ akpedadatɔe be Mawu kple Alẽvi la gbɔe yewoƒe ɖeɖe tso la, ekema abe alesi Yohanes kpɔe le ŋutega me ene la, nuwɔwɔ nuteƒewɔla siwo katã le dziƒo la awɔ ɖeka kpli wo akɔ woƒe gbe dzi le Mawu vavã ɖeka kolia la ƒe tadedeagu me ahagblɔ be: “Amen, kafukafu kple ŋutikɔkɔe kple nunya kple akpedada kple bubu kple ŋutete kple ŋusẽ woana mía Mawu la tso mavɔ me yi ɖe mavɔ me! Amen.”—Nyaɖ. 7:11, 12.
Wodo Wo Kpɔ Be Wodze Hena Agbetsitsi Mahã
5. (a) Aleke míawɔ anya nusi hiã be míawɔ be míanɔ “ameha gã” si woaxɔ ɖe agbe la me? (b) To nyabiabia siwo le memamã sia ƒe nuwuwu ŋu ɖoɖo dzi la, ɖe nusi wòhiã be woawɔ be woatsi agbe le “xaxa gã” la me la me.
5 Wokpɔ “ameha gã” la ta le Yehowa ŋutɔ ƒe dzidzenu dzɔdzɔeawo nu. Nɔnɔme siwo woakpɔ adze si kɔte le amesiwo woaxɔ na ŋu la le Biblia ƒe nyagblɔɖinya siwo ku ɖe wo ŋu la me. Eyata amesiwo lɔ̃ dzɔdzɔenyenye ate ŋu awɔ nu fifia be woatsi agbe. Míeƒo nu tso ŋɔŋlɔ siwo gbɔna la ŋu xoxo. Gake fifia dzro wo me nyuie to mawunyakpukpui bubu siwo me nyawo womeŋlɔ ɖi o la ƒe kpekpeɖeŋu dzi eye nade ŋugble le nusi wòle be nawɔ be nyagblɔɖi ƒe nɔnɔme siawo nasɔ kpli wò la ŋu.
‘Alẽ bubu’ siwo ŋuti woƒo nu le le Yohanes 10:16
Nukae Yesu ƒe gbe si ame ase ŋutɔŋutɔ la fia? (Yoh. 10:27; Mat. 9:9; Ef. 4:17-24)
Aleke míate ŋu aɖee afia be míelɔ̃ ɖe edzi be Kristoe nye míaƒe “alẽkplɔla ɖeka” la? (Mat. 23:10, 11)
‘Alẽawo’ le Yesu ƒe alẽwo kple gbɔ̃wo ŋuti lododoa me (Mat. 25:31-46)
Amekawoe nye Kristo ‘nɔvi’ siwo amesiawo wɔa nyui na? (Heb. 2:10, 11; 3:1)
Nɔnɔme sesẽ kawo mee wobiana tso wo si le be woaɖee afia be yewowɔ ɖeka kple Kristo nɔvi siwo le anyigba dzi la? Eye dɔ ka mee wonana kpekpeɖeŋu le nuteƒewɔwɔtɔe? (Nyaɖ. 12:12, 17; Mat. 24:14; 28:19, 20)
Amesiwo ŋutsu si si agbalẽŋlɔnu le la de dzesii hena agbetsitsi (Xez. 9:1-11)
Aleke woɖenɛ fiana be yewomewɔ ɖeka kple ŋunyɔnu siwo wɔm wole le kpɔɖeŋu Yerusalem alo Kristodukɔa me la o? (Nyaɖ. 18:4, 5)
Nukae nye “dzesi” si nana wotoa vovo tso yeaɖi Kristotɔwo gbɔ eye wònana mɔkpɔkpɔ be woatsi agbe? (Pet. I, 3:21; Mat. 7:21-27; Yoh. 13:35)
6. Aleke Yohanes ƒe numeɖeɖe ku ɖe “ameha gã” la ŋu la kpe ɖe mía ŋu be míase nusita woxɔ wo ɖe agbe le gɔmee?
6 Alesi woƒo nu tso “ameha gã” la ŋu le Nyaɖeɖefia 7:9-15 la gakpe nya veviwo ɖe eŋu. Le alesi “ameha gã” la me tɔwo dzé le “xaxa gã” la megbe gbɔgblɔ na mí me la, Ŋɔŋlɔawo he susu yi nusiwo na woxɔ wo ɖe agbe la hã dzi.
7. Nukae wowɔ do ŋgɔ na “xaxa gã” la, eye aleke esia dze le nyagbɔgblɔwo mee?
7 Togbɔ be wotso dukɔwo katã, towo katã, ameƒomeviwo katã kple gbegbɔgblɔwo katã me hã la, woɖee fia be wowɔ ɖeka “le tsitre ɖe fiazikpui la ŋgɔ” hele bubu tsɔm na Yehowa, Amesi bɔbɔ nɔ fiazikpuia dzi la abe Xexeame Katã ƒe Fiagã ene. Woto woƒe agbenɔnɔ dzi ɖo kpe edzi be yewonye eƒe dziɖuɖua yomenɔla nuteƒewɔlawo. Nyateƒe si wònye be “wonyã woƒe awuwo, eye wowɔ wo ɣie le alẽvi la ƒe ʋu la me” la ɖee fia be wokpɔe dze sii be yewohiã na Yesu ƒe vɔsa abe Mawu ƒe Alẽvi ene la ƒe avuléle ɖe nuvɔ̃ ta ƒe asixɔxɔa. (Yoh. 1:29; Yoh. I, 2:2) Wonɔ te ɖe vɔsa ma dzi tsɔ wo ɖokui ɖe adzɔgbe na Mawu le xɔse me, wotsɔ nyɔnyrɔ̃ɖetsime wɔ esia ƒe dzesii eye azɔ la tenɔnɔ dzadzɛ si ƒe kpɔɖeŋu woƒe awu ʋlaya ɣiawo nye la le wo si le Mawu ŋku me. Womehe ɖe megbe le Mawu ƒe Vi la dzi si woxɔ se la gbɔgblɔ le gaglãgbe la ŋu o. (Mat. 10:32, 33) Nusi wɔ ɖeka kple esia katã enye be woɖee fia be wole Mawu ƒe gbedoxɔ alo xexeame katã ƒe tadeaguƒe la me abe tadeagula siwo ‘subɔna Mawu zã kple keli’ ene. Le mɔ sia nu la woɖee fia be yewonye tadedeagu vavãtɔ la yomenɔla nuteƒewɔlawo kple eƒe Fiaɖuƒea ŋuti gbeƒãɖelawo.—Yes. 2:2, 3.
8. Be nya sia naɖe vi na mí la, nukae wòle be míawɔ?
8 Ðe nyagblɔɖi ƒe kpɔɖeŋu siawo me nyawo sɔ kpli wòa? Ðe mɔ aɖewo li siwo nu wòhiã le be nana wò agbenɔnɔ nasɔ kple nusi wogblɔ le afisia la nyuie wua? Ne nenemae la, ekema ewɔɣie nye fifia!
Gbɔgbɔ Me Paradiso Me Nɔnɔ
9. Aleke Yohanes ƒo nu tso gbɔgbɔ me yayra siwo me “ameha gã” la sea vivi le fifia gɔ̃ hã la ŋue?
9 Ðe nele mɔ kpɔm be yeatsi agbe abe “ameha gã” la me tɔ enea? Ne èle zɔzɔm ɖe Yehowa ƒe mɔ dzɔdzɔeawo nu la, ekema ɖikeke mele eme o be èdze egɔme le vivi sem le nɔnɔme siwo ŋu wodo ŋugbe le eye woyɔ wo be gbɔgbɔ me paradiso wòsɔ la me xoxo. Wogblɔ na apostolo Yohanes bena: “Dɔ megale wo wu ge akpɔ o, eye tsikɔ hã megale wo wu ge akpɔ o, eye ɣe kple ŋdɔkutsu megale wo ɖu ge azɔ o; elabena alẽvi, si le fiazikpui la titina la, anyi wo, eye wòakplɔ wo ayi agbetsi dzidziwo gbɔ, eye Mawu atutu aɖatsiwo katã ɖa le woƒe ŋkuwo me.” (Nyaɖ. 7:16, 17) Aleke esia va eme le gowo mee?
10. (a) Le gbɔgbɔ me gɔmesese nu la aleke wònye nyateƒe be ‘dɔ megawua ameha gã la o, eye tsikɔ hã megawua wo o’? (b) Ðe esia va eme na wòa?
10 Hafi neva le Alẽkplɔla Nyui Yesu Kristo ƒe beléle te la, ɖe dzɔdzɔenyenye ƒe dɔ kple tsikɔ nɔ wuwòma? (Tsɔe sɔ kple Mateo 5:6.) Nenye nenemae la, nusi nɔ dzrowòm la nye nusi Yehowa ɖeka ko ate ŋu ana wò to Via dzi. Esime nesrɔ̃ nu tso Yehowa ƒe mɔ dzɔdzɔeawo—eƒe tameɖoɖo be yeatsrɔ̃ ame vɔ̃ɖiwo gake wòɖe amenuveve fia to mɔ ʋuʋu be Adam ƒe dzidzimeviwo nakpɔ ɖeɖe dzi—ŋu la, ɖikeke mele eme o be wò dzi dze eme ŋutɔŋutɔ zi gbãtɔ le wò agbe me. Gbɔgbɔ me nuɖuɖu kple nunono si tso Mawu ƒe Nya la me si wonana to eƒe habɔbɔa dzi la yi edzi na neɖi ƒo. (Yes. 65:13, 14) Eye ne etsɔ ɖokuiwò ɖe adzɔgbe na Mawu to Kristo dzi la, tameɖoɖo ŋutɔŋutɔ le asiwò le agbe me azɔ. (Tsɔe sɔ kple Yohanes 4:32-34.) Agbe mavɔ le Paradiso-nyigba dzi ƒe mɔkpɔkpɔ dodzidzɔnamea le ŋgɔwò elabena Alẽvi la ‘akplɔ [“ameha gã” la] ayi agbetsi dzidziwo gbɔ.’
11. (a) Aleke wònye nyateƒe be ‘ɣe kple ŋdɔkutsu megaɖua wo o’? (b) Aleke ema le vevie na wòe?
11 Alẽkplɔla Nyui la kpɔa “ameha gã” la me tɔwo ta eye wòkplɔa wo dedie hã abe ‘alẽ’ siwo ka ɖe ame dzi ene. Ema tae le kpɔɖeŋumɔ nu la, ‘ɣe kple ŋdɔkutsu megaɖua wo o.’ Esia mefia be abe “ameha gã” la me tɔ ene la yometiti aɖeke mava dziwò tso xexeame gbɔ o. Ke boŋ efia be wokpɔ tawò tso Mawu ŋutɔ ƒe dziku heliheli gbɔ. Eye ne ehe tsɔtsrɔ̃ va ame vɔ̃ɖiwo dzi tso dziƒo la, matsrɔ̃ wò o. Amenuveve ƒe ƒomedodo sia ate ŋu anɔ anyi tegbee.—Xez. 38:22, 23; tsɔe sɔ kple Psalmowo 11:6; 85:4, 5.
12. Aleke wotutu aɖatsiwo ɖa le wò ŋku mee fifia gɔ̃ hã?
12 Gɔmesese wɔnuku siwo ta nakpɔ dzidzɔ kawoe nye esi le asiwò ne enye “ameha gã” ma me tɔ vavã! Mɔkpɔkpɔ wɔnuku le asiwò be akpɔe woaɖe ame vɔ̃ɖiwo ɖa keŋkeŋ eye azɔ woaɖe nuvɔ̃ ƒe ŋusẽkpɔɖeamedziwo katã ɖa ŋutɔŋutɔ le wò ŋutɔ wò susu kple ŋutilã me. Gake fifia kura gɔ̃ hã la, nuxaxa si vana amesiwo menya Mawu o dzi la mevaa dziwò o. Èva le dzidzɔ si nye amesiwo ƒe Mawu enye Yehowa la ɖeɖeko tɔ la kpɔm. (Ps. 144:15b) Le mɔ sia nu la èdze egɔme le ŋugbedodo sia ƒe emevava kpɔm xoxo: “Mawu atutu aɖatsiwo katã ɖa le woƒe ŋkuwo me.”
13. Nukawoe adzi gbɔgbɔ me paradisoa ƒe dzidzɔkpɔkpɔwo ɖe edzi esime Kristo ƒe ƒe akpe ɖeka dziɖuɖua le edzi yim?
13 Alesi ko “ameha gã” la atsi agbe le nuɖoanyi sia ƒe nuwuwu la, nenema kee gbɔgbɔ me paradiso la hã anɔ anyie. Ne èle wo dome la, ekema ayi edzi ase vivi le gbɔgbɔ me nu damiwo ƒe kplɔ̃ɖoɖo me esime Kristo ƒe ƒe akpe ɖeka dziɖuɖua le edzi yim. Mawu ŋutɔ ŋuti sidzedze si le asiwò la ade to wu esime nakpɔe be eƒe tameɖoɖo madokponu la va eme ŋutikɔkɔetɔe. Wò dzidzɔkpɔkpɔ adzi ɖe edzi esime nele gome kpɔm le dzadodo na ameha si anɔ dzidzim ɖe edzi la tso ku me be woawɔ ɖeka kpli wò le tadedeagu vavãtɔ me la me. Eye yayra siwo ŋku kpɔna siwo ava ɣemaɣi la anye nu xɔasi ŋutɔ na Mawu ƒe subɔla nuteƒewɔlawo katã elabena woakpɔe be wonye Yehowa ŋutɔ ƒe lɔlɔ̃ ƒe ɖeɖefiawo.—Yes. 25:6-9; Yak. 1:17.
Numetoto
● Nudzɔdzɔ tɔxɛ ka ŋue Biblia yɔ “ameha gã” la ƒe ŋkɔ ɖo, eye alekee?
● Ne míedi be woakpe mí ɖe “ameha gã” ma si ŋu Mawu kpɔ ŋudzedze ɖo la ŋu la, nukae wòle be míawɔ fifia?
● Aleke gbɔgbɔ me paradisoa ƒe yayrawo le vevie na wòe?