“Gbɔgbɔ La Kple Ŋugbetɔ La Yi Edzi Le Gbɔgblɔm Be: ‘Va!’”
“Gbɔgbɔ la kple ŋugbetɔ la yi edzi le gbɔgblɔm be: ‘Va!’ . . . Ame sia ame si tsikɔ le wuwum la neva; ame sia ame si lɔ̃ la, nexɔ agbetsi la femaxee.”—NYAÐ. 22:17.
1, 2. Nɔƒe kae wòle be Fiaɖuƒea ƒe nuwo naxɔ le míaƒe agbe me, eye nu ka tae?
NƆƑE kae wòle be Fiaɖuƒea ƒe nuwo naxɔ le míaƒe agbe me? Yesu xlɔ̃ nu eyomedzelawo be ‘woayi edzi anɔ fiaɖuƒe la dim gbã,’ eye wòka ɖe edzi na wo be ne wowɔe alea la, Mawu atsɔ nu siwo wohiã la ana wo. (Mat. 6:25-33) Etsɔ Mawu Fiaɖuƒe la sɔ kple dzonu aɖe si xɔ asi ale gbegbe be esi asitsala mɔzɔla aɖe ke ɖe eŋu la, eyi “ɖadzra nu siwo katã le esi la enumake, eye wòƒlee.” (Mat. 13:45, 46) Ðe mele be Fiaɖuƒegbeƒãɖeɖe kple nusrɔ̃lawɔwɔ dɔa nanye nu vevitɔ kekeake na míawo hã oa?
2 Abe ale si míekpɔe le nyati eve siwo do ŋgɔ mee ene la, míaƒe nuƒoƒo kple dzideƒo kpakple Mawu ƒe Nya la zazã aɖaŋutɔe le subɔsubɔdɔa me ɖenɛ fiana be Mawu ƒe gbɔgbɔ lae le mɔ fiam mí. Gbɔgbɔ sia gawɔa akpa vevi aɖe le míaƒe gomekpɔkpɔ le Fiaɖuƒegbeƒãɖeɖedɔa me edziedzi me. Na míakpɔ ale si esia dzɔnae ɖa.
Wole Ame Sia Ame Kpem!
3. Tsi ka ƒomevie wole amewo katã kpem be ‘woava’ xɔ ano?
3 Woto gbɔgbɔ kɔkɔea dzi le amekpekpe aɖe dom ɖe ameƒomea me tɔ ɖe sia ɖe gbɔ. (Mixlẽ Nyaɖeɖefia 22:17.) Wole amewo kpem be ‘woava’ xɔ tsi tɔxɛ aɖe atsɔ aɖi kɔ na wo ɖokuiwo. Menye tsi ŋutɔŋutɔ si ŋu dɔ mí katã míewɔna lae wowɔnɛ o. Togbɔ be tsi si ŋu dɔ mí katã míewɔna la le vevie hena agbeléle ɖe te le anyigba dzi hã la, tsi bubu ƒomevi aɖe kurae nɔ susu me na Yesu esime wògblɔ na Samaria nyɔnu aɖe le vudo aɖe to be: “Ame sia ame si ano tsi si manae ƒe ɖe la, tsikɔ magawui akpɔ o, ke boŋ tsi si manae la azu tsidzɔƒe le eyama me, si ayɔ agbagba, be wòana agbe mavɔ.” (Yoh. 4:14) Tsi tɔxɛ si wole amewo kpem be woava xɔ ano la naa agbe mavɔ.
4. Alekee wòdzɔe be agbetsi la va hiã, eye nu kae agbetsi ma le tsitre ɖi na?
4 Agbetsi sia va hiã esime ame gbãtɔ, Adam, wɔ ɖeka kple srɔ̃a, Xawa, wogbe toɖoɖo wo Wɔla, si nye Yehowa Mawu. (1 Mose 2:16, 17; 3:1-6) Wonya atsu kple asi gbãtɔ la ɖa le abɔ nyui si nye woƒe aƒe la me “be [Adam nagado] asi ɖa agbe agbetia hã ƒe ɖe aɖu, eye wòanɔ agbe ɖoɖoɖo o.” (1 Mose 3:22) Esi wònye be Adam mee ameƒomea dzɔ tso ta la, eto eƒe nu vɔ̃a me he ku vae na ameƒome bliboa. (Rom. 5:12) Agbetsi la le tsitre ɖi na ɖoɖo siwo katã Mawu wɔ be yeatsɔ aɖe amegbetɔ toɖolawo tso nu vɔ̃ kple ku si me ahana woanɔ agbe deblibo le Paradiso me le anyigba dzi tegbee. Yesu Kristo ƒe tafevɔsa la dzie wotu ɖoɖo siawo katã ɖo.—Mat. 20:28; Yoh. 3:16; 1 Yoh. 4:9, 10.
5. Ame ka gbɔe amekpekpe be ‘woava xɔ agbetsi la ano femaxee’ la tso? Ðe eme.
5 Ame ka gbɔe amekpekpe be ‘woava xɔ agbetsi la ano femaxee’ la tso? Wotsɔ ɖoɖo siwo katã Mawu wɔ to Yesu dzi hena agbekpɔkpɔ, siwo aɖe vi na ameƒomea bliboe le Kristo ƒe Ƒe Akpe Dziɖuɖua me, la sɔ kple ‘agbetsitɔsisi aɖe si me kɔ abe kristalokpe ene.’ Wokpɔ tɔsisi ma ‘wònɔ sisim tso Mawu kple Alẽvi la ƒe fiazikpui la gbɔ.’ (Nyaɖ. 22:1) Eya ta Yehowa, Agbenala la, gbɔe tsi sia si naa agbe la dzɔ tso. (Ps. 36:10) Eyae naa tsi sia to “Alẽvi” la, si nye Yesu Kristo dzi. (Yoh. 1:29) Kpɔɖeŋutɔsisi sia ye nye mɔ si dzi Yehowa ato aɖɔ nu siwo katã Adam ƒe tomaɖomaɖoa gblẽ le ameƒomea ŋu la ɖo. Ɛ̃, Yehowa Mawue nye Ame si gbɔ amekpekpe si nye “va” la tso.
6. Ɣekaɣie “agbetsitɔsisi” la te sisi?
6 Togbɔ be Kristo ƒe Ƒe Akpe Ðeka Dziɖuɖua mee “agbetsitɔsisi” la asi bliboe le hã la, edze sisi gɔme le “Aƒetɔ ƒe ŋkeke la” me, si dze egɔme esime woɖo “Alẽvi” la zi dzi le dziƒo le ƒe 1914 me. (Nyaɖ. 1:10) Eya ta ɖoɖo siwo Mawu wɔ hena agbekpɔkpɔ la dometɔ aɖewo te viɖeɖe na ameƒomea le ɣeyiɣi ma megbe. Esiawo ƒe ɖee nye gbedeasi si le Mawu ƒe Nya, Biblia la, me, elabena wotsɔe sɔ kple ‘tsi.’ (Ef. 5:26) Amekpekpe si nye be ‘woava xɔ agbetsi’ la ano, si fia be woaɖo to Fiaɖuƒe ŋuti nya nyuia ahanɔ agbe ɖe enu, la le yiyim na ame sia ame. Gake ame kawoe tsɔ amekpekpea le yiyim na amewo le Aƒetɔ la ƒe ŋkekea me?
“Ŋugbetɔ La” Le Gbɔgblɔm Be “Va!”
7. Ame kawoe nye ame gbãtɔ siwo tsɔ amekpekpea le yiyim na amewo le “Aƒetɔ ƒe ŋkeke la” me be ‘woava,’ eye ame kawoe amekpekpea le yiyim na?
7 Ŋugbetɔ ƒe ha la me tɔwo, siwo nye Kristotɔ amesiaminawo, ye nye ame gbãtɔ siwo tsɔ amekpekpe si nye “va” la le yiyim na amewo. Ame kawoe ŋugbetɔ la tsɔ amekpekpea le yiyim na? Menye na eɖokui o, ke boŋ ame siwo ƒe mɔkpɔkpɔe nye be yewoava nɔ agbe tegbee le anyigba dzi ne “Mawu Ŋusẽkatãtɔ la ƒe ŋkeke gã la ƒe aʋawɔwɔ” la wu enu ye wòtsɔ amekpekpea le yiyim na.—Mixlẽ Nyaɖeɖefia 16:14, 16.
8. Nu kae ɖee fia be Kristotɔ amesiaminawo le Yehowa ƒe amekpekpea tsɔm le yiyim na amewo tso keke ƒe 1918 me ke?
8 Kristo yomedzela amesiaminawo le amekpekpe sia tsɔm le yiyim na amewo tso keke ƒe 1918 me ke. Le ƒe ma me la, woto dutoƒonuƒo si ƒe tanyae nye “Ame Miliɔn Geɖe Siwo Le Agbe Fifia Maku Akpɔ O” dzi na mɔkpɔkpɔ amewo be ame geɖe akpɔ agbe le paradiso me le anyigba dzi ne Harmagedon ʋa la wu enu. Le Biblia Nusrɔ̃viwo ƒe takpekpe aɖe si wowɔ le Cedar Point, Ohio, U.S.A., le ƒe 1922 me la, woƒo dutoƒonuƒo aɖe si de dzi ƒo na nyaselawo be ‘woaɖe gbeƒã Fia la kple eƒe fiaɖuƒe la.’ Dzideƒonamenya sia kpe ɖe ŋugbetɔ ƒe ha la me tɔ susɔeawo ŋu be woatsɔ amekpekpea ayi na ame geɖe wu. Le ƒe 1929 me la, nyati si ƒe tanyae nye “Amekpekpe Si Nye Amenuveve” la dze le March 15 ƒe Eŋlisigbe me Gbetakpɔxɔ me, eye mawunyakpukpui si dzi wotui ɖoe nye Nyaɖeɖefia 22:17. Nyati ma ƒe akpa aɖe gblɔ be: “Ame susɔeawo ƒe ha wɔnuteƒe la wɔ ɖeka kple [Dziƒoʋĩtɔ] la le amenuveve ƒe amekpekpea tsɔm le yiyim na amewo hele gbɔgblɔm be, ‘Va.’ Ele be woaɖe gbeƒã gbedeasi sia na ame siwo dia dzɔdzɔenyenye kple nyateƒe la. Eye ele be woawɔe fifia.” Ŋugbetɔ ƒe ha la yi edzi le amewo kpem va se ɖe egbe.
“Ame Sia Ame Si Le Esem La Negblɔ Be: ‘Va!’”
9, 10. Alekee wode dzi ƒo na ame siwo le amekpekpea sem la be woawo hã nagblɔ be “Va!”?
9 Ke ame siwo le amekpekpe be “va” la sem ya ɖe? Wobia tso wo si be woawo hã nagblɔ be, “Va!” Le kpɔɖeŋu me, August 1, 1932 ƒe Eŋlisigbe me Gbetakpɔxɔ gblɔ le eƒe axa 232 be: “Amesiaminawo nede dzi ƒo na ame siwo katã lɔ̃ la be woakpɔ gome le fiaɖuƒe ŋuti nya nyuia gbɔgblɔ na amewo me. Mele be woanye Aƒetɔ la ƒe amesiaminawo hafi aɖe gbeƒã Aƒetɔ la ƒe gbedeasia o. Enye akɔfafa gã aɖe na Yehowa ƒe ɖasefowo be woanyae azɔ be woɖe mɔ na yewo be yewoatsɔ agbetsia ayi na amewo ƒe hatsotso si ta woate ŋu akpɔ le Harmagedon me, siwo akpɔ agbe mavɔ le anyigba dzi la.”
10 Esi August 15, 1934 ƒe Eŋlisigbe me Gbetakpɔxɔ nɔ nu ƒom tso ame siwo se amekpekpea ƒe agbanɔamedzi be woawo hã nagblɔ be, “Va!” ŋu la, egblɔ le axa 249 be: “Ele be ame siwo nye Yonadab ha la me tɔwo nakplɔ egbegbe Yehu ha la, si nye amesiaminawo, ɖo eye woaɖe gbeƒã fiaɖuƒegbedeasia, togbɔ be womenye Yehowa ƒe ɖasefo amesiaminawo o hã.” Le ƒe 1935 me la, ame siwo “ameha gã” la, si ŋu woƒo nu tsoe le Nyaɖeɖefia 7:9-17 nye la me va kɔ nyuie. Esia gade dzo yeye Mawu ƒe amekpekpea tsɔtsɔ yi na amewo ƒe dɔa me ale gbegbe. Tso ɣemaɣi la, Mawu subɔla vavãwo ƒe ameha gã aɖe me tɔ siwo le dzidzim ɖe edzi—siwo wu ame miliɔn adre fifia—la wɔ ɖe amekpekpea dzi. Esi wokpɔ ŋudzedze ɖe gbedeasia ŋu ta la, woɖe adzɔgbe na Mawu, xɔ nyɔnyrɔ ɖe tsi me, eye wowɔ ɖeka kple ŋugbetɔ ƒe ha la hetsɔ moveviɖoɖo le ame bubuwo kpem be woava ‘xɔ agbetsi la ano femaxee.’
“Gbɔgbɔ La” Le Gbɔgblɔm Be, “Va!”
11. Akpa kae gbɔgbɔ kɔkɔea wɔ le gbeƒãɖeɖedɔa me le ƒe alafa gbãtɔ M.Ŋ. me?
11 Esi Yesu nɔ gbeƒã ɖem le ƒuƒoƒe aɖe le Nazaret la, eʋu nyagblɔɖila Yesaya ƒe agbalẽ xatsaxatsa la hexlẽ afi si gblɔ be: “Yehowa ƒe gbɔgbɔ le dzinye, elabena esi ami nam be magblɔ nya nyui na ame dahewo, edɔm ɖa be maɖe gbeƒã ablɔɖe na aboyomewo kple nukpɔkpɔ ake na ŋkuagbãtɔwo, be mana ablɔɖe ame siwo wote ɖe anyi ne woadzo, be maɖe gbeƒã Yehowa ƒe amenuveƒe la.” Eyome Yesu ɖee fia be ye ŋue nya mawo ku ɖo esi wògblɔ be: “Ŋɔŋlɔ sia si miese fifi laa la va eme egbea.” (Luka 4:17-21) Hafi Yesu nalia ayi dziƒo la, egblɔ na eƒe nusrɔ̃lawo be: “Miaxɔ ŋusẽ ne gbɔgbɔ kɔkɔe la va mia dzi, eye mianye nye ɖasefowo . . . va se ɖe anyigba ƒe seƒe ke.” (Dɔw. 1:8) Le ƒe alafa gbãtɔ me la, gbɔgbɔ kɔkɔea wɔ akpa vevi aɖe le gbeƒãɖeɖedɔa me.
12. Akpa kae Mawu ƒe gbɔgbɔ kɔkɔea wɔna le amekpekpea tsɔtsɔ yi na amewo me egbea?
12 Le míaƒe ŋkeke siawo me la, akpa kae Mawu ƒe gbɔgbɔ kɔkɔea wɔna le amekpekpea tsɔtsɔ yi na amewo me? Yehowa gbɔe gbɔgbɔ kɔkɔea tsona. Etoa gbɔgbɔa dzi ʋua ŋugbetɔ ƒe ha la me tɔwo ƒe dzi kple susu be woase eƒe Nya, Biblia la gɔme. Gbɔgbɔa ʋãa wo be woatsɔ amekpekpea ayi na ame bubuwo eye woaɖe Ŋɔŋlɔawo me nyateƒeawo me na ame siwo si agbenɔnɔ tegbee le Paradiso me le anyigba dzi ƒe mɔkpɔkpɔ le la. Ke ame siwo wɔ ɖe amekpekpea dzi va zu Yesu Kristo ƒe nusrɔ̃lawo hele amekpekpea kekem ɖe enu be wòaɖo ame bubuwo gbɔ ya ɖe? Gbɔgbɔ la kpena ɖe woawo hã ŋu. Esi wonyrɔ wo ɖe “gbɔgbɔ kɔkɔe la ƒe ŋkɔ me” ta la, wowɔa nu le ɖekawɔwɔ me kple gbɔgbɔa ƒe mɔfiafia heɖoa ŋu ɖe eŋu be wòakpe ɖe yewo ŋu. (Mat. 28:19) Bu gbedeasi si amesiaminawo kpakple ameha gã si me tɔwo le dzidzim ɖe edzi la ɖea gbeƒãe la hã ŋu kpɔ. Enye gbedeasi si tso Biblia, si nye agbalẽ si woŋlɔ le Mawu ƒe gbɔgbɔa ƒe mɔfiafia te tẽe, la me. Eya ta gbɔgbɔ kɔkɔea dzie woto le amekpekpe sia tsɔm le yiyim na amewo. Le nyateƒe me la, gbɔgbɔ siae le mɔ fiam mí. Ŋusẽ kae wòle be esia nakpɔ ɖe ale si gbegbe míekpɔa gome le amekpekpedɔ sia mee la dzi?
‘Woyi Edzi Le Gbɔgblɔm Be: “Va!”’
13. Nu kae nyagbɔgblɔ “gbɔgbɔ la kple ŋugbetɔ la yi edzi le gbɔgblɔm be: ‘Va!’” la fia?
13 “Gbɔgbɔ la kple ŋugbetɔ la” megblɔ be “Va!” ko evɔ o. Dɔwɔnya si wozã le afi sia le gbe si me woŋlɔ nya sia ɖo gbã me la hea susu yia nu si woayi edzi anɔ wɔwɔm ɖaa la dzi. Le esia ta la, Xexe Yeye Gɔmeɖeɖe Biblia la xlẽ be: “Gbɔgbɔ la kple ŋugbetɔ la yi edzi le gbɔgblɔm be: ‘Va!’” Esia fia be Mawu ƒe amekpekpea tsɔtsɔ yi na amewo nye nu si wòle be woanɔ wɔwɔm edziedzi. Ke ame siwo se amekpekpea hewɔ ɖe edzi ya ɖe? Woawo hã gblɔna be “Va!” Wogblɔ tso mawusubɔla vavãwo ƒe ameha gã la ŋu be ‘wole subɔsubɔdɔ kɔkɔe wɔm na Yehowa zã kple keli le eƒe gbedoxɔ la me.’ (Nyaɖ. 7:9, 15) Gɔmesese ka nue ‘wole subɔsubɔdɔ wɔm zã kple keli’ le? (Mixlẽ Luka 2:36, 37; Dɔwɔwɔwo 20:31; 2 Tesalonikatɔwo 3:8.) Nyɔnu nyagblɔɖila tsitsi Hana kple apostolo Paulo ƒe kpɔɖeŋuawo ɖee fia be ‘subɔsubɔdɔwɔwɔ zã kple keli’ fia gbeƒãɖeɖedɔa wɔwɔ edziedzi kutrikukutɔe.
14, 15. Alekee Daniel ɖe tadedeagu na Mawu le ɖoɖo nu edziedzi ƒe vevienyenye fia?
14 Nyagblɔɖila Daniel hã ɖe tadedeagu na Mawu le ɖoɖo nu edziedzi ƒe vevienyenye fia. (Mixlẽ Daniel 6:5-11, 17.) Meɖe asi le ɖoɖo si nu wòdea ta agu na Mawu le, si nye ale si wòdoa gbe ɖa na Mawu ‘gbe ɖeka zi etɔ̃, abe ale si wòwɔna tsã ene,’ la ŋu ɣleti ɖeka teti hã o, togbɔ be esia ana woatsɔe aƒu gbe ɖe dzatawo ƒe do me hã. Aleke gbegbee eƒe nuwɔna sia na wòdze ƒãa na eteƒekpɔlawo be naneke mele vevie nɛ wu tadedeagu na Yehowa edziedzi o ye nye esi!—Mat. 5:16.
15 Esi Daniel nɔ dzatawo ƒe do la me zã bliboa megbe la, fia la ŋutɔ yi ɖe doa to hedo ɣli be: “Daniel, wò Mawu gbagbe la subɔla, ɖe wò Mawu, si nèsubɔna atraɖi la, te ŋu ɖe wò tso dzatawo si mea?” Daniel ɖo eŋu enumake be: “Fia nenɔ agbe tegbee! Nye Mawu dɔ eƒe dɔla ɖa wòde ga nu na dzatawo, be womewɔ nanekem o, elabena nyemeɖi fɔ le eŋku me o, eye nyemeɖi fɔ le wò fia ŋku me hã o.” Yehowa yra Daniel le ale si wòsubɔnɛ ‘atraɖii’ la ta.—Dan. 6:20-23.
16. Biabia kawoe wòle be Daniel ƒe kpɔɖeŋua nana míabia mía ɖokui ku ɖe ale si míekpɔa gome le gbeƒãɖeɖedɔa me ŋu?
16 Daniel lɔ̃ faa be yeaku tsɔ wu be yeaɖe asi le ɖoɖo si nu yedea ta agu na Mawu le la ŋu. Ke míawo ya ɖe? Nu kawoe míetsɔ le vɔ sam, alo nu kawoe míele klalo be míatsɔ asa vɔe bene míate ŋu ayi edzi anɔ gbeƒã ɖem Mawu Fiaɖuƒe ŋuti nya nyuia edziedzi? Negadzɔ gbeɖe be ɣleti blibo ɖeka nava yi si míaƒo nu tso Yehowa ŋu na ame bubuwo o! Ne anya wɔ ko la, ɖe manyo be míadze agbagba anɔ gome kpɔm le gbeƒãɖeɖedɔa me kwasiɖa sia kwasiɖa oa? Ne lãmesẽkuxi sesẽwo wɔe be míetsi teƒe ɖeka eye miniti 15 pɛ koe míete ŋu tsɔ ɖi ɖase le ɣletia me hã la, ele be míatsɔe ana wòanye míaƒe gbeadzikɔntabubu. Nu ka tae? Elabena enye míaƒe didi be míawɔ ɖeka kple gbɔgbɔ la kple ŋugbetɔ la ayi edzi anɔ gbɔgblɔm be “Va!” Ɛ̃, míedi be míawɔ nu sia nu si míate ŋui anye Fiaɖuƒegbeƒãɖela siwo wɔa subɔsubɔdɔa edziedzi.
17. Yehowa ƒe amekpekpea ŋu nya gbɔgblɔ na amewo ƒe mɔnukpɔkpɔ kawoe mele be míana woato mía ŋu o?
17 Ele be míadze agbagba agblɔ Yehowa ƒe amekpekpea ŋu nya na amewo le mɔnukpɔkpɔ ɖe sia ɖe me, ke menye le ɣeyiɣi siwo míeɖo ɖi na gbeadziyiyi la ɖeɖe ko me o. Mɔnukpɔkpɔ gã kae nye esi wònye na mí be míakpe ame siwo tsikɔ le wuwum la be woava ‘xɔ agbetsi la ano femaxee’ le ɣebubuɣiwo hã, abe ne míeyi nu ƒle ge, míele mɔ zɔm, míeyi mɔkeke, míele dɔwɔƒe, alo ne míele mɔ dzi yina suku ene! Ne dziɖuɖuwo de se ɖe míaƒe gbeƒãɖeɖedɔa nu gɔ̃ hã la, míeyia edzi nɔa gbeƒã ɖem ŋuɖɔɖotɔe—ɖewohĩ ne míele tso aƒe me yi aƒe me dɔa wɔm la, míate ŋu ayi aƒe ʋɛ aɖewo ko me le nuto aɖe me ahayi edzi le nuto bubu me, alo míadzi míaƒe vomeɖaseɖiɖidɔa ɖe edzi.
Yi Edzi Nànɔ Gbɔgblɔm Be, “Va!”
18, 19. Alekee nèɖenɛ fiana be yedea asixɔxɔ mɔnukpɔkpɔ si su asiwò be nènye Mawu ƒe hadɔwɔla la ŋu?
18 Ƒe blaasieke kple edzivɔwoe nye esia si gbɔgbɔ la kple ŋugbetɔ la yi edzi le gbɔgblɔm na ame sia ame si agbetsi la ƒe tsikɔ le wuwum la be “Va!” Èse woƒe amekpekpe dodzidzɔname la? Ekema míele dzi dem ƒo na wò be wò hã nàkpe ame bubuwo.
19 Míenya ɣeyiɣi didi kae Yehowa ƒe amekpekpe lɔlɔ̃tɔe sia ayi edzi ya o, gake ne míese amekpekpe sia eye míeyi edzi le gbɔgblɔm na ame bubuwo hã be “Va!” la, ekema míezua Mawu ƒe hadɔwɔlawo. (1 Kor. 3:6, 9) Mɔnukpɔkpɔ gã ka gbegbee nye esi! Mina míaɖee afia be míedea asixɔxɔ mɔnukpɔkpɔ sia ŋu, eye ‘míatsɔ kafukafuvɔsa anɔ Mawu nam ɣesiaɣi’ to gbeƒãɖeɖedɔa wɔwɔ edziedzi me. (Heb. 13:15) Mina mí ame siwo si anyigbadzinɔnɔ ƒe mɔkpɔkpɔa le la míayi edzi awɔ ɖeka kple ŋugbetɔ ƒe ha la anɔ gbɔgblɔm be “Va!” Eye neva eme be ame geɖe wu ‘nava xɔ agbetsi la ano femaxee’!
Nu Kae Nèsrɔ̃?
• Ame kawoe amekpekpe be “va” la le yiyim na?
• Nu ka tae míate ŋu agblɔ be Yehowa gbɔe amekpekpe be “va” la tso?
• Akpa kae gbɔgbɔ kɔkɔea wɔna le amewo kpekpe be ‘woava’ la me?
• Nu ka tae wòle be míadze agbagba anɔ subɔsubɔdɔa wɔm edziedzi?
[Nyaɖoɖo/Nɔnɔmetata siwo le axa 16]
(Edze nyuie le agbalẽa ŋutɔ me)
Yi Edzi Nànɔ Gbɔgblɔm Be, “Va!”
1914
Gbeƒãɖela 5,100
1918
Ame geɖe akpɔ agbe le Paradiso me le anyigba dzi
1922
“Miɖe gbeƒã, miɖe gbeƒã, miɖe gbeƒã Fia la kple eƒe fiaɖuƒe la”
1929
Wokpe ame siwo menye amesiaminawo o hã be woagblɔ be, “Va!”
1932
Amesiamina susɔe wɔnuteƒeawo le gbɔgblɔm be “Va!”
1934
Wokpe Yonadab ha la me tɔwo be woaɖe gbeƒã
1935
Wode dzesi ame siwo “ameha gã” la nye
2009
Gbeƒãɖela 7,313,173