Ta 8
‘Kame Tete kple Vɔ̃ɖinyenye ƒe Gbɔgbɔwo’
1. Nukatae míetsɔ ɖe le gbɔgbɔ vɔ̃wo ƒe nuwɔna me vevie?
AMESIWO si ŋutilãmesusu le la aɖu fewu ne wose be gbɔgbɔ vɔ̃wo li. Gake menye nukonyae wònye o. Woɖaxɔ dzi se alo womeɖaxɔ dzi se o, gbɔgbɔ vɔ̃wo ƒe nuwɔna hea xaxa vaa amesiame dzi. Womeɖe Yehowa ƒe tadeagulawo le eme o. Le nyateƒe me la, wotɔ ŋku wo koŋ. Apostolo Paulo he míaƒe susu yi hoʋiʋli sia dzi esime wògblɔ be: “Míele kame tem kple ʋu kpakple ŋutilã o, ke boŋ mía kple dziɖulanyenye [siwo menye ŋutilã kple ʋu o] kple ŋusẽ kple xexe sia me fia, siwo le fifi viviti sia me kpakple vɔ̃ɖinyenye ƒe gbɔgbɔ, siwo le dziƒonutowo me lae le kame tem.” (Ef. 6:12) Le míaƒe ŋkekeawo me la xaxa la va sesẽ wu ɣeyiɣi bubu ɖesiaɖe elabena wonyã Satana tso dziƒo eye wòdo dziku le esi wònya be ɣeyiɣi si susɔ na ye la le kpuie ta.—Nyaɖ. 12:12.
2. Aleke wòanya wɔ be míate kame kple gbɔgbɔ vɔ̃ siwo sesẽ wu amegbetɔwo la ahakpɔ dzidzedze?
2 Aleke mía dometɔ aɖe ate ŋu aʋli ho kple gbɔgbɔ siwo sesẽ wu amegbetɔ la ahakpɔ dzidzedze? Ŋuɖoɖo ɖe Yehowa ŋu bliboe dzi koe míato. Ele be míaɖo to eyama ahawɔ ɖe eƒe Nya dzi. To ema wɔwɔ dzi la, míate ŋu asi le nusi gblẽna le amesiwo le Satana ƒe ŋusẽkpɔɖeamedzi te la ŋu le ŋutilã me, agbenɔnɔ gome, seselelãme me kple susu me la nu.—Ef. 6:11; Yak 4:7.
Xexemedziɖula Siwo Le Dziƒonutowo Me
3. Nuka kple amekawo ŋue Satana tsi tre ɖo vevie?
3 Yehowa gblɔ xexeame ƒe nɔnɔme na mí tsitotsito abe alesi wòkpɔnɛ tso eƒe nɔƒe kɔkɔ si le dziƒo ene. Ena ŋutega apostolo Yohanes esi me woɖe Satana fia le be ele abe “ʋɔ driba dzi̇̃ gã aɖe” ene, esi le klalo be ne anya wɔ la ne woɖo Mawu ƒe Mesia Fiaɖuƒea anyi le dziƒo le ƒe 1914 M.Ŋ. me ko la yeamii. Esi Satana do kpo nu le ema me la, ehe ŋutasesẽ ƒe tsitretsiɖeŋu va Fiaɖuƒe ma teƒenɔla siwo wokpɔna, amesiwo nye Mawu ƒe “nyɔnu” la ƒe dzidzimevia ƒe akpa evelia la dzi.—Nyaɖ. 12:3, 4, 13, 17.
4. (a) Nyateƒe si ku ɖe amegbetɔ ƒe dziɖuɖuwo ƒe ŋusẽ ƒe dzɔtsoƒe ŋu ka ŋutie Biblia xlɔ̃ nu mí le? (b) Nukae wole dunyahedziɖulawo katã nu ƒom ƒu na fifia, eye amekawoe le ewɔm?
4 Woklo nu le amegbetɔ ƒe dziɖuɖuwo ƒe ŋusẽ ƒe dzɔtsoƒe la dzi le nya ma si woɖe fia Yohanes la me. Woɖe lã aɖe si lɔ nu geɖe ɖe eme eye ta 7 kple dzo 10 le esi eye wòkpɔ ŋusẽ “ɖe to sia to kple dukɔ sia dukɔ kple gbegbɔgblɔ sia gbegbɔgblɔ kpakple trɔ̃subɔlawo katã dzi” la fiae. Esia metsi tre ɖi na dziɖuɖu ɖeka aɖe ko o, ke boŋ xexeame katã ƒe dunyahehe ƒe nuɖoanyi la. Wogblɔ na Yohanes be “ʋɔ driba [Satana Abosam] tsɔ eƒe ŋutete kple eƒe fiazikpui kpakple eƒe ŋusẽ gã” na lã la. (Nyaɖ. 13:1, 2, 7; tsɔe sɔ kple Luka 4:5, 6.) Eɖanye aleke kee dunyahedziɖulawo gblɔ be yewonye mawusubɔlawoe o, dukɔ siwo le “lã” la me la dometɔ aɖeke mebɔbɔ eɖokui ɖe Yehowa ƒe fianyenye kple eƒe Fia Yesu Kristo si wòtia la te o. Wo katã wole ʋiʋlim be yewoalé yewo ŋutɔwo yewoƒe fianyenye ɖe te. Abe alesi Nyaɖeɖefia ɖee fia ene la, egbea la “gbɔgbɔ vɔ̃wo ƒe gbɔgbɔ” le wo katã nu ƒom ƒu hena “Mawu, ŋusẽkatãtɔ la, ƒe ŋkeke gã la ƒe aʋawɔwɔ” le Harmagedon. (Nyaɖ. 16:13, 14, 16) Nyateƒee, abe alesi apostolo Paulo ŋlɔe ene la, ‘xexeme dzi ɖulawo’ menye amegbetɔwo dzro ko o ke boŋ wonye “vɔ̃ɖinyenye ƒe gbɔgbɔ, siwo le dziƒonutowo me.” (Ef. 6:12) Ehiã be amesiwo katã aɖee afia be yewonye Yehowa ƒe tadeagula vavãwo la nase nusi ema fia la gɔme bliboe.
5. Nukatae wòhiã be míakpɔ nyuie be womagana míade Satana ƒe nuɖoanyia dzi o?
5 Gbesiagbe la hoʋiʋli siwo dea mamã amegbetɔƒomea me la lɔa míaƒe agbe ɖe eme. Enye nusi bɔ be amewo dea dukɔ, to, gbegbɔgblɔ alo ameha si me wole la dzi le nuƒoƒo me alo to mɔ bubu dzi. Ne hoʋiʋli aɖe si le edzi yim fifia la melɔ akpa si wole la ɖe eme tẽ o gɔ̃ hã la, woakpɔ be akpa ɖeka ƒe nu nyo yewo ŋu wu akpa kemea. Gake eɖanye nya ka, ameka alo nuka dzie wode o, nuka tututu ŋue wole asi kpem ɖo? Biblia la gblɔ na mí kɔte be “xexeme blibo la katã le vɔ̃ɖitɔ la [si] me.” (Yoh. I, 5:19) Ekema aleke ame awɔ be woagakplɔe atra akpe ɖe ameƒomea me tɔ mamleawo ŋu o? Mawu ƒe Fiaɖuƒea dzi si wòade bliboe eye made akpa aɖeke dzi kura o le xexeame ƒe akpa vovovoawo ƒe hoʋiʋliwo me la dzi ko wòato.—Yoh. 17:15, 16.
Vɔ̃ɖitɔ La Ƒe Ayemɔwo
6. Nukawoe nye mɔ siwo dzi Satana to ɖe amewo ɖa le tadedeagu vavãtɔ ŋu la dometɔ aɖewo?
6 Le ŋutinya ƒe ɣeyiɣiwo katã me la Satana zã nume ƒe yometiti kple ŋutilã me tɔ tsɔ ɖe ame aɖewo ɖa le tadedeagu vavãtɔ ŋu. Gake eto mɔ siwo medze gaglã nenema o hã dzi—esiwo nye ayenuwɔnawo kple aɖaŋumɔwo.
7. Aleke Satana ƒe ayewɔwɔ la dze le alakpasubɔsubɔ ŋudɔ si wɔm wòle la me?
7 Ewɔ aye hena ameƒomea ƒe akpa gã aɖe le viviti me to alakpasubɔsubɔ dzi, eye ne wolɔ̃ la enana wosusuna be yewole Mawu subɔm. Esi lɔlɔ̃ vavãtɔ mele wo si na nyateƒea o la, ɖewohi̇̃ vivimemawusubɔsubɔ ƒe nuwɔna siwo nyɔa seselelãmewo adze wo ŋu, alo ŋusẽdɔwo awɔ dɔ ɖe wo dzi. (Tes. II, 2:9, 10) Gake woxlɔ̃ nu mí be amesiwo kpɔ gome le tadedeagu vavãtɔ me la dometɔ aɖewo kura gɔ̃ hã “ade megbe . . . eye woaɖo to beblegbɔgbɔwo kple gbɔgbɔ vɔ̃wo ƒe nufiafia.” (Tim. I, 4:1) Aleke ema ate ŋu adzɔe?
8. Aleke Satana ble amesiwo nɔ ta dem agu na Yehowa la dometɔ aɖewo kura gɔ̃ hã de alakpasubɔsubɔ mee?
8 Ayetɔe la Abosam nyɔa ame ƒe gbɔdzɔgbɔdzɔwo. Ðe vɔvɔ̃ na amegbetɔ kpɔtɔ kpɔ ŋusẽ ɖe eyama dzia? Nenye nenemae la, ɖewohi̇̃ ne ƒometɔwo alo aƒelikawo ƒo nya ɖe enu be nekpɔ gome le nuwɔna siwo tso alakpasubɔsubɔ me la mea ana ta. Ðe amea dana? Ekema ne woɖo aɖaŋu nɛ alo ame bubuwo melɔ̃ ɖe susu siwo wòdo ɖa dzi o la, ado dziku. (Lod. 29:25; 15:10; Tim. I, 6:3, 4) Ke ne menye lɔlɔ̃e ʋãnɛ be wòakpɔ gome le gbeadziyiyi me o ɖe? Le esi teƒe be wòaɖɔ eƒe nukpɔsusu ɖo wòasɔ kple Kristo ƒe kpɔɖeŋua la, ɖewohi̇̃ atrɔ ɖe amesiwo ‘alũ to me nɛ’ to gbɔgblɔ be Biblia xexlẽ ko ahanɔ “agbe nyui” la ɖeɖe dzaa sɔ gbɔ dzi la ŋu. (Tim. II, 4:3) Eɖaɖo subɔsubɔha bubu me ŋutɔŋutɔ alo lé eya ŋutɔ ƒe mawusubɔsubɔ ƒomevi aɖe ɖe asi dzro ko o, ema mele vevie na Satana o, zi alesi mele ta dem agu na Yehowa le mɔ si Mawu fia to eƒe Nya kple eƒe habɔbɔa dzi la nu o ko.
9. Aleke Satana wɔa gbɔdɔdɔ ŋudɔ ayetɔe be wòaɖo eƒe taɖodzinuwo gbɔ?
9 Satana blea amewo ayetɔe hã be woato mɔ gbegblẽ dzi atsi nudzodzro siwo sɔ nu. Ewɔ esia le gbɔdɔdɔ ƒe nudzodzro gome. Esi xexeametɔ geɖe gbe Biblia ƒe agbenyuinɔnɔ la, wobuna trewo ƒe gbɔdɔdɔ be enye vivisese si le se nu alo mɔ si dzi woato aɖee afia be wonye ame tsitsiwo. Ke srɔ̃tɔwo ya ɖe? Enye nusi bɔ be xexeametɔ siwo ɖo srɔ̃ɖeɖe me kuxiwo me la gbea wo nɔewo eye woɖea srɔ̃ bubu alo woklãna tsoa wo nɔewo gbɔ ko henɔa anyi kple ame bubu. Ne míekpɔ agbenɔnɔ sia la, ɖe míesena le mía ɖokui me be nane le mía ŋu tsim eye be Kristotɔwo ƒe agbenɔnɔa sesẽ akpaa? Satana ƒe ayemɔe nye be wòana ame nabu be Yehowa le nu nyui aɖe tem ye. Eƒonɛ ɖe mía nu be míabu vivisese si ate ŋu asu mía si fifia la ŋu—ke menye nusi wòawɔ mía kple ame bubuwo le ɣeyiɣi didi aɖe megbe kpakple mía kple Yehowa kple Via dome ƒomedodo la ŋu o.—Gal. 6:7, 8; Kor. I, 6:9, 10.
10. Mɔ ka dzie Satana tona dzea agbagba be yeatrɔ míaƒe nɔnɔme ɖe ŋutasẽnuwɔna ŋu lae?
10 Dzɔdzɔmenudzodzro bubue nye modzakaɖeɖe. Ne enye esi sɔ la, ate ŋu atu ame ɖo ake le ŋutilã me, susu me kple seselelãme gome. Gake aleke míewɔa nue ne Satana dze agbagba be yeato modzakaɖeɣiwo dzi ayetɔe ana míaƒe susu nato vovo tso Mawu tɔ gbɔ? Le kpɔɖeŋu me, míenyae be Yehowa léa fu amesiwo lɔ̃ ŋutasẽnuwɔwɔwo. (Ps. 11:5) Gake ne wole eɖem fia le television dzi alo le sinima me la, ɖe míenɔa anyi ɖekematsɔlemetɔe hekpɔa ye katã? Alo ne wole ewɔm abe kamedefefe ene la, ɖe míelɔ̃na ɖe edzi eye ɖewohi̇̃ míedoa ɣli dea dzi ƒo na amesiwo le gome kpɔm le eme la?—Tsɔe sɔ kple Mose I, 6:13.
11. Mɔ kawo nue mɔ̃ ate ŋu aɖe amesi nya nyateƒea ku ɖe gbɔgbɔyɔyɔ ŋu la kura gɔ̃ hã ne mele ŋudzɔ o?
11 Míenya hã be amesiwo kpɔa gome le gbɔgbɔyɔyɔ ƒomevi ɖesiaɖe me—afakaka, adzewɔwɔ alo agbagba dzedze be yewoaƒo nu kple ame kukuwo—la ‘ŋunyɔnu wonye na Yehowa.’ Míabu gbɔgbɔyɔlawo gbɔ yiyi ŋu o eye míaxɔ wo ɖe míaƒe aƒe me be woawɔ woƒe gbɔgbɔ vɔ̃ nuawo o. Gake ɖe míaɖo to wo ahanɔ wo kpɔm woƒe nu nanɔ nuku wɔm na mí ne woɖe wo fia le míaƒe television dzia? Togbɔ be míalɔ̃ gbeɖegbeɖe be bokɔnɔ nada gbe le mía ŋu o hã la, ɖe míesaa bokɛ ɖe mía vi vidzi̇̃ kokoe ƒe alɔnu kple susu be ɖewohi̇̃ akpɔ ɖevia ta le mɔ aɖe nua? Alo esi míenya be Biblia ƒo nu tsi tre ɖe ‘dzoɖuame’ ŋuti la, ɖe míaɖe mɔ goloɖola nakpɔ ŋusẽ ɖe míaƒe susu dzi ɣeyiɣi kpui aɖe gɔ̃ hã?—Mose V, 18:10-12; Gal. 5:19-21.
12. (a) Aleke wowɔa hadzidzi ŋudɔe be woana míado vivi ɖe nya siwo míenya be womenyo o la ŋu? (b) Aleke ame ƒe awudodo, ɖawɔwɔ alo nuƒoƒo ate ŋu aɖee afia be amesiwo ƒe agbenɔnɔ medzea Yehowa ŋu o la ƒe nu dzɔa dzi nɛ? (d) Nukae wòhiã be míawɔ be Satana ƒe ayemɔ̃wo magaɖe mí o?
12 Míexlẽe le Ŋɔŋlɔawo me be ‘ahasiwɔwɔ kple makɔmakɔnyenye ɖesiaɖe la womagatsɔ susu gbegblẽ ayɔ eŋkɔ gɔ̃ hã le mía dome o.’ (Ef. 5:3-5) Gake ne wole ha vivi, ha dzeto aɖe alo ʋu ʋãme aɖe ƒom aɖaŋutɔe ɖe nya mawo ŋu ɖe? Ðe míadze egɔme anɔ nyagbe siwo kafua gbɔdɔdɔ srɔ̃maɖemaɖee, atikewo zazã ɖe dzidzɔ teƒe kple bubuawo la dzim le ŋuɖeɖi me gɔ̃ hã? Alo esime míenya be mele be míasrɔ̃ amesiwo wɔa nu mawo ƒe agbenɔnɔ o la, ɖe míeɖenɛ fiana be míewɔ ɖeka kpli wo to alesi wodoa awui, alesi wowɔa ɖae alo alesi woƒoa nui la sɔsrɔ̃ dzia? Satana nye ayetɔ ale gbegbe! Aleke mɔ siwo dzi wòtona blea amegbetɔwo be woatrɔ ɖe ye ŋutɔ yeƒe susu gbegblẽ ŋu la nye mɔ̃e nye si! (Kor. II, 4:3, 4) Be eƒe ayemɔ̃wo nagaɖe mí o la, ele be míaƒo asa na zɔzɔ kple xexeame. Ehiã be amesiwo “xexe sia me fia, siwo le fifi viviti sia me” nye la nanɔ susu me na mí eye míanɔ kame tem vevie atsi tre ɖe woƒe ŋusẽkpɔɖeamedzi ŋu.—Ef. 6:12; Pet. I, 5:8.
Wobla Akpa Na Mí Be Míanye Aʋadziɖulawo
13. Esi mí katã míede blibo o la, aleke wòanya wɔ be míate ŋu aɖu xexeme si dzi ɖum Satana le la dzi?
13 Hafi Yesu naku la egblɔ na eƒe apostoloawo be: “Miaƒe dzi nedze eme; nye la meɖu xexeame dzi.” Eyata woawo hã woate ŋu anye aʋadziɖulawo; eye le ƒe 60 kple vɔ megbe la apostolo Yohanes ŋlɔe bena: “Amekae nye amesi ɖua xexeame dzi, ne menye amesi xɔnɛ sena bena, Yesu ye nye Mawu [ƒe Vi] la o mahã?” (Yoh. 16:33; Yoh. I, 5:5) Míeɖea xɔse ma fiana to wɔwɔ ɖe Yesu ƒe sewo dzi kple ŋuɖoɖo ɖe Mawu ƒe Nya la ŋu abe alesi wòwɔe ene la dzi. Nu bubu kae gahiã? Eyae nye be míanɔ hame si ƒe tae wònye la ŋu kplikplikpli. Ne míeda vo la, ele be míatrɔ dzime vavã eye míanɔ te ɖe Yesu ƒe vɔsa dzi adi Mawu ƒe tsɔtsɔke. Le mɔ sia nu la, togbɔ be míede blibo o hã la, míawo hã míate ŋu anye aʋadziɖulawo.
14. (a) Mixlẽ Efesotɔwo 6:13-18. (b) Minɔ te ɖe nyabiabia kple ŋɔŋlɔ siwo le memamãa me la dzi miadzro viɖe siwo le gbɔgbɔmeʋawɔnua ƒe akpa ɖesiaɖe ŋu la me.
14 Be míakpɔ dzidzedze la, ehiã be míado “Mawu ƒe aʋawɔnu blibo la katã,” eye míagagblẽ eƒe akpa aɖeke ɖi o. Taflatse ʋu Efesotɔwo 6:13-18 le wò Biblia me eye naxlẽ alesi wòƒo nu tso aʋawɔnu ma ŋue. Azɔ to nyabiabia siwo le ete la ŋu ɖoɖo dzi la, de ŋugble tso alesi nate ŋu akpɔ viɖe tso ametakpɔkpɔ si aʋawɔnu la ƒe akpa ɖesiaɖe ate ŋu ana wò me la ŋu.
“Mitsɔ nyateƒe bla miaƒe aliwo dzi”
Togbɔ be míanya nyateƒea hã la, aleke nusɔsrɔ̃ edziedzi, ŋugble dede le Biblia ƒe nyateƒea ŋu kple kpekpeyiyi kpɔa mía tae? (Fil. 3:1; 4:8, 9; Kor. I, 10:12, 13; Kor. II, 13:5; Pet. I, 1:13, Kingdom Interlinear)
“Dzɔdzɔenyenye ƒe akɔtakpoxɔnu”
Ameka ƒe dzɔdzɔenyenye ƒe dzidzenue nye esia? (Nyaɖ. 15:3) Gblɔ alesi Yehowa ƒe sewo dzi si womawɔ ɖo o le lɔlɔ̃ si wometu ɖo na eƒe mɔwo o ta la ate ŋu ana nu nagblẽ le ame ŋu vevie le gbɔgbɔ me la ƒe kpɔɖeŋu fia. (Kpɔ Samuel I, 15:22, 23; Mose V, 7:3, 4.)
“Mitsɔ dzadzraɖoɖi na ŋutifafa nyanyuie la bla miaƒe afɔ gɔme”
Aleke vovo si manɔ míaƒe afɔwo ŋu o le esi wole mía kplɔm be míayi aɖaƒo nu na amewo tso Mawu ƒe ɖoɖowo hena ŋutifafa ŋu la kpɔa mía tae? (Rom. 10:15; Ps. 73:2, 3; Tim. I, 5:13)
“Xɔse ƒe akpoxɔnu”
Ne xɔse si li ke sesi̇̃e le mía si la, aleke míawɔ nue ne wodze agbagba be woana míake ɖi alo míavɔ̃? (Tsɔe sɔ kple Timoteo II, 1:12; Fiawo II, 6:15-17.)
“Xɔxɔ ƒe gakuku la”
Aleke xɔxɔ ƒe mɔkpɔkpɔ la kpena ɖe ame ŋue be magana dzimaɖitsitsi ɖe ŋutilãmenunɔamesiwo ŋu fũ akpa nazu mɔ̃ aɖee o? (Tim. I, 6:7-10, 19)
“Gbɔgbɔ ƒe yi”
Nuka ŋue wòle be míaɖo ŋu ɖo ɣesiaɣi ne míele kame tem kple nusiwo ado kplamatse míaƒe gbɔgbɔmemenyenye alo ame bubuwo tɔ? (Ps. 119:98; Lod. 3:5, 6; tsɔe sɔ kple Mateo 4:3, 4.)
Le ɖekawɔwɔ me kple ema la, nu bubu ka hãe woɖe fia le Efesotɔwo 6:18, 19 be ele vevie hafi míakpɔ dzidzedze le gbɔgbɔmeʋawɔwɔa me? Zi nenie míawɔ eŋudɔ? Ðe amekawo ta?
15. (a) Ðokuisigbɔgbɔmeʋa dzro ko wɔm mí katã míelea? (b) Aleke míate ŋu atsó awɔ nu le aʋawɔwɔa mee?
15 Abe asrafo Kristotɔwo ene la, míele aʋakɔ gã aɖe si le gbɔgbɔmeʋa wɔm la me. Ne míeyi edzi le ŋudzɔ eye míewɔ Mawu ƒe aʋawɔnu blibo la ŋudɔ nyuie la, míazu ame tsiaʋawo o. Ke boŋ míanye ŋusẽdoame ƒe kpekpeɖeŋu na mía hati Mawu ƒe subɔlawo. Míanɔ klalo eye míadi vevie be míawɔ nu akaka Mawu ƒe Mesia Fiaɖuƒe si nye dziɖuɖu si ŋu Satana tsi tre ɖo vevie la ŋuti nyanyuiea.
Numetoto
● Nukatae Yehowa ƒe tadeagulawo dzea agbagba be yewomade akpa aɖeke dzi kura o le xexeame ƒe akpawo ƒe hoʋiʋliwo me?
● Nukae nye ayemɔ siwo dzi Satana tona be yeagblẽ nu le Kristotɔwo ŋu le gbɔgbɔ me la dometɔ aɖewo?
● Aleke aʋawɔnu si Mawu na mí la kpɔa mía ta le mɔ siwo le vevie nu le gbɔgbɔmeʋawɔwɔ sia me?