Ta 28

Akɔ Kpekpe Kple Lã Wɔadã Eve

Ŋutega 8—Nyaɖeɖefia 13:1-18

Nyati: Lã wɔadã si ta adre li na la, lã dzoevee la, kple lã la ƒe legba

Emevaɣi: Tso Nimrod ŋɔli vaseɖe xaxa gã la dzi

 1, 2. (a) Nukae Yohanes gblɔ ku ɖe ʋɔ driba la ŋu? (b) Aleke Yohanes ɖɔ habɔbɔ si wokpɔna si ŋudɔ ʋɔ driba la wɔna lae le kpɔɖeŋunyagbɔgblɔ me?

WOTSƆ ʋɔ driba gã la ƒu gbe ɖe anyigba dzi! Míaƒe Nyaɖeɖefia ƒe nusɔsrɔ̃a na eme kɔ ƒã be womagaɖe mɔ Da xoxo la alo eyomedzela gbɔgbɔ vɔ̃wo nayi dziƒo o. Gake míewu nu sɔsrɔ̃ tso amesi “woyɔna be: Abosam kple Satana, amesi nye xexeame katã blela” la ŋu nu haɖe o. Nuŋlɔɖia yi edzi ɖe mɔ si dzi Satana tona wɔa aʋa kple ‘nyɔnua kpakple eƒe dzidzimevia’ la fia tsitotsito wu. (Nyaɖeɖefia 12:9, 17) Yohanes gblɔ tso ʋɔ driba ma si nye da la ŋu be: “Eye wòtsi tre ɖe ƒutake la dzi.” (Nyaɖeɖefia 13:1a, New World Translation) Eyata mina míatɔ vie ne míalé ŋku ɖe nusi dzi ʋɔ driba la tona wɔa dɔ la ŋu.

² Satana kple eƒe gbɔgbɔ vɔ̃wo megale dziƒo si le kɔkɔe la be woaɖe fu na ame le afima o. Wonyã gbɔgbɔ vɔ̃ mawo le dziƒo eye wosika wo ɖe anyigba ƒe nutowo me. Ðikeke mele eme o be esia tae gbɔgbɔyɔyɔ ƒe nuwɔnawo dzi ɖe edzi ŋutɔ le ƒe alafa 20 lia sia me. Gbɔgbɔ me habɔbɔ gbegblẽ aɖe gakpɔtɔ le Da ayetɔa si. Gake ɖe wòwɔa habɔbɔ si wokpɔna hã ŋudɔ be yeable ameƒomea? Yohanes gblɔ na mí be: “Eye mekpɔ lã aɖe le dodom tso atsiaƒu me, eye dzo ewo kple ta adre li nɛ, eye fiakuku ewo le eƒe dzoawo dzi, eye busuŋkɔwo le eƒe tawo ŋu. Eye lã si mekpɔ la, le abe lãkle ene, eye eƒe afɔwo le abe sisiblisi ƒe afɔwo ene, eye eƒe nu le abe dzata ƒe nu ene; eye ʋɔ driba la tsɔ eƒe ŋutete kple eƒe fiazikpui kpakple eƒe ŋusẽ gã nɛ.”—Nyaɖeɖefia 13:1b, 2.

 3. (a) Lã wɔadã kawoe nyagblɔɖila Daniel kpɔ le ŋutegawo me? (b) Nukae Daniel 7 ƒe lã gãwo tsi tre ɖi na?

³ Nukae nye lã wɔnuku sia? Biblia ŋutɔ ɖo eŋu. Le Babilon ƒe anyidzedze le ƒe 539 D.M.Ŋ. megbe kpuie la, Yudatɔ nyagblɔɖila Daniel kpɔ ŋutega siwo me lã wɔadãwo le. Le Daniel 7:2-8 me la, eƒo nu tso lã ene ŋu be wodo tso atsiaƒu me; gbãtɔa ɖi dzata, evelia ɖi sisiblisi, etɔ̃lia ɖi lãkle, eye “mekpɔ lã enelia . . . ŋɔdzi kple vɔvɔ̃ le eŋu, eye wòsesẽ ŋutɔ . . . eye wòto dzo ewo.” Esia ɖi lã wɔadã si Yohanes kpɔ le ƒe 96 M.Ŋ. me lɔƒo la ŋutɔ. Lã ma hã ɖi dzata, sisiblisi kple lãkle, eye wòto dzo ewo. Nukae lã gã siwo Daniel kpɔ la nye? Egblɔ na mí be: “Lã gã eneawo nye fia ene, siwo le anyigba dzi va ge.” (Daniel 7:17) Ẽ, lã mawo tsi tre ɖi na ‘fiawo,’ alo anyigba dzi dunyaheŋusẽwo.

 4. (a) Le Daniel 8 me la, nukae agboa kple gbɔ̃tsua tsi tre ɖi na? (b) Nukae gbɔ̃tsua ƒe dzo gã la ƒe ŋeŋe kple dzo ene ƒe toto ɖe eteƒe la fia?

⁴ Le ŋutega bubu me la, Daniel kpɔ agbo dzoevee aɖe si gbɔ̃ aɖe si to dzo gã aɖe tu dzoe ƒu anyi. Mawudɔla Gabriel ɖe nusi esia fia la gɔme nɛ be: “Agbo . . . la, enye Media- kple Persia-fiawo. Gbɔ̃tsu la nye Hela-nyigba ƒe fia.” Gabriel yi edzi gblɔe ɖi be woaŋe gbɔ̃tsu la ƒe dzo gã la eye dzo ene ato ɖe eteƒe. Esia va eme ŋutɔŋutɔ le ƒe 200 kple vɔ megbe esime Aleksanda Gãtɔ ku eye womã eƒe fiaɖuƒea ɖe fiaɖuƒe ene siwo dzi eƒe aʋakplɔlawo dometɔ ene ɖu la me.—Daniel 8:3-8, 20-25.a

 5. (a) Nukawoe Helagbe me nya si wozãna na lã la fia? (b) Nukae Nyaɖeɖefia 13:1, 2 ƒe lã wɔadã la kple eƒe ta adreawo tsi tre ɖi na?

⁵ Eyata eme kɔ ƒã be Amesi na woŋlɔ Biblia si tso gbɔgbɔ me la bua anyigba dzi dunyaheŋusẽwo be wonye lãwo. Lã ka ƒomeviwoe? Nyameɖela aɖe yɔ Nyaɖeɖefia 13:1, 2 ƒe lã wɔadã la be “lã” eye wògblɔ kpee be: “Míelɔ̃ ɖe nusiwo katã θηρίον [the·riʹon, Helagbe me nya si wozãna na “lã”] fia la dzi, abe lã seŋuta, gblẽnu, dziŋɔ, si vuvua nu kple bubuawo ene.”b Aleke ema heɖɔ dunyahenuɖoanyi si kɔ ʋu ɖi si dzi Satana to ɖu ameƒomea dzie la nyuie enye si! Lã wɔadã sia ƒe ta adreawo tsi tre ɖi na xexemeŋusẽ gã ade siwo kpɔ gome le Biblia ƒe ŋutinya me vaseɖe Yohanes ƒe ŋkekea me—esiwo nye Egipte, Asur, Babilon, Medo-Persia, Hela, kple Roma—kple xexemeŋusẽ adrelia aɖe si ŋu nya wogblɔ ɖi be ava emegbe la.—Tsɔe sɔ kple Nyaɖeɖefia 17:9, 10.

 6. (a) Nuka mee lã wɔadã la ƒe ta adreawo xɔ ŋgɔ le? (b) Aleke Yehowa wɔ Roma ŋudɔ tsɔ he eya ŋutɔ ƒe ʋɔnudɔdrɔ̃ va Yudatɔwo ƒe nuɖoanyia dzie, eye nukae dzɔ ɖe Kristotɔ siwo nɔ Yerusalem la dzi?

⁶ Nyateƒee, xexemeŋusẽ bubuwo hã nɔ anyi le ŋutinya me kpe ɖe adreawo ŋu—abe alesi Yohanes kpɔ be ŋutilã le lã wɔadã la si kpe ɖe ta adre kple dzo ewoawo ŋu ene. Gake ta adreawo tsi tre ɖi na ŋusẽ gã adre siwo dometɔ ɖesiaɖe xɔ ŋgɔ le Mawu ƒe amewo tete ɖe to me le eƒe ɣeyiɣi me. Le ƒe 33 M.Ŋ. me esime Romae nye ŋusẽtɔ la, Satana wɔ lã wɔadã la ƒe ta ma ŋudɔ tsɔ wu Mawu ƒe Vi lae. Ɣemaɣi la, Mawu ɖe asi le Yudatɔwo ƒe nuɖoanyi si si xɔse mele o la ŋu, eye emegbe le ƒe 70 M.Ŋ. me la, eɖe mɔ Romatɔwo he eƒe ʋɔnudɔdrɔ̃ va dukɔ ma dzie. Dzidzɔtɔe la, woxlɔ̃ nu Mawu ƒe Israel vavãtɔ si nye Kristotɔ amesiaminawo ƒe hamea do ŋgɔ, eye wo dometɔ siwo nɔ Yerusalem kple Yudea la si yi dedienɔƒe le Yordan-tɔsisia godo.—Mateo 24:15, 16; Galatiatɔwo 6:16.

 7. (a) Nukae adzɔ ne nuɖoanyia ƒe nuwuɣi la ɖo eye Aƒetɔ ƒe ŋkekea dze egɔme? (b) Nukae va nye lã wɔadã si ŋuti nya wogblɔ le Nyaɖeɖefia 13:1, 2 me la ƒe ta adrelia?

⁷ Gake le ƒe alafa gbãtɔ M.Ŋ. ƒe nuwuwu la, hame gbãtɔ sia me tɔ geɖe de megbe tso nyateƒea gbɔ, eye gbe wuwlui siwo nye “vɔ̃ɖitɔ la ƒe viwo” vu tsyɔ Kristotɔwo ƒe lu vavãtɔ si nye “fiaɖuƒe la ƒe viwo” la ƒe akpa gãtɔ dzi. Ke esi nuɖoanyiawo ƒe nuwuɣia ɖo la, Kristotɔ amesiaminawo gado ake abe habɔbɔ si le ɖoɖo nu ene. Le Aƒetɔ la ƒe ŋkekea me la, ɣeyiɣia de be ame dzɔdzɔewo “[naklẽ] abe ɣe ene.” Eyata wowɔ dɔwɔwɔ ƒe ɖoɖo na Kristo-hamea. (Mateo 13:24-30, 36-43) Ɣemaɣi la, Roma-fiaɖuƒea meganɔ anyi o. Britania-fiaɖuƒe gã la kpakple United States, Amerika, si sẽ ŋu lae xɔ nɔƒe vevi le xexeame. Xexemeŋusẽ eve ƒokpli siae va nye lã wɔadã la ƒe ta adrelia.

 8. Nukatae mele be wòawɔ mo yaa na mí be wotsɔ Anglo-Amerika xexemeŋusẽ eve ƒokpli la sɔ kple lã o?

⁸ Ðe menye dzidziƒoamenya be woagblɔ be dunyaheŋusẽ siwo le dzi ɖum la nye gbemelãwo oa? Nenemae tsitretsiɖeŋula aɖewo gblɔ le Xexemeʋa II me esime wonɔ gbe tɔm Yehowa Ðasefowo ƒe ɖoƒe abe habɔbɔ kple ame ɖekaɖekawo ene le ʋɔnudrɔ̃ƒewo le anyigba katã dzi. Gake tɔ nabu eŋu kpɔ! Ðe dukɔwo ŋutɔwo metsɔa lãwo alo gbemelãwo wɔa woƒe dukɔwo ƒe dzesi oa? Le kpɔɖeŋu me, Britaniatɔwo tia dzata, Amerikatɔwo tia hɔ̃, Chinatɔwo tia ʋɔ driba, eye Russiatɔwo tia sisiblisi. Eyata nukatae wòle be ame aɖe natsi tre ɖe eŋu ne Mawu si nye Biblia Kɔkɔea Ŋlɔla la hã tsɔ lãwo wɔ xexemeŋusẽwo ƒe kpɔɖeŋue?

 9. (a) Nukatae mele be woaƒo nu atsi tre ɖe nya si Biblia gblɔ be Satanae tsɔ ŋusẽ gã la na lã wɔadã la ŋu o? (b) Aleke woɖɔ Satana le Biblia mee, eye aleke wòkpɔa ŋusẽ ɖe dziɖuɖuwo dzie?

⁹ Gawu la, nukatae wòle be woatsi tre ɖe nya si Biblia gblɔ be Satanae tsɔ lã la ƒe ŋusẽ gã la nɛ la ŋu? Mawu gbɔe nya ma tso, eye ‘dukɔwo le abe tsi toŋtoŋ le ze ŋu kple ʋuʋudedi ene’ le eŋkume. Anyo na dukɔ mawo wu ne wodze agbagba be yewoadze Mawu ŋu tsɔ wu be woado dziku ɖe alesi eƒe Nyagblɔɖinya la ɖɔ woe ŋu. (Yesaya 40:15, 17; Psalmo 2:10-12) Satana menye glimeme aɖe si wode dɔ asi na be wòawɔ fu luʋɔ kukuwo le hell si nye dzo me o. Teƒe aɖeke meli nenema o. Ke boŋ woƒo nu tso Satana ŋu le Ŋɔŋlɔa me be enye “kekeli ƒe dɔla”—amesi bi ɖe amebeble me eye wòkpɔa ŋusẽ gã aɖe ɖe dunyahenyawo dzi.—Korintotɔwo II, 11:3, 14, 15; Efesotɔwo 6:11-18.

10. (a) Nukae nyateƒe si wònye be fiakuku le dzo ewoawo dometɔ ɖesiaɖe dzi la fia? (b) Nukae dzo ewoawo kple fiakuku ewoawo tsi tre ɖi na?

¹⁰ Lã wɔadã la to dzo ewo ɖe eƒe ta adreawo dzi. Ðewohĩ dzo ɖekaɖeka nɔ ta ene dzi eye dzo eveve nɔ ta etɔ̃ dzi. Gawu la, fiakuku ewo nɔ eƒe dzoawo dzi. Le Daniel ƒe agbalẽa me la, woƒo nu tso lã dziŋɔwo ŋu, eye ele be míase woƒe dzoawo ƒe agbɔsɔsɔme gɔme ɖe xexlẽmea nu ŋutɔŋutɔ. Le kpɔɖeŋu me, agbo ƒe dzo eveawo tsi tre ɖi na xexemefiaɖuƒe si me dukɔ eve siwo nye Media kple Persia le, eye gbɔ̃ ƒe dzo eneawo tsi tre ɖi na fiaɖuƒe ene siwo do tso Aleksanda Gãtɔ ƒe Hela-fiaɖuƒea me eye wonɔ anyi le ɣeyiɣi ɖeka me la. (Daniel 8:3, 8, 20-22) Gake le lã si Yohanes kpɔ la gome la, edze abe ɖe dzo ewoawo ƒe xexlẽme nye kpɔɖeŋu ene. (Tsɔe sɔ kple Daniel 7:24; Nyaɖeɖefia 17:12.) Wotsi tre ɖi na dukɔ siwo le wo ɖokui si siwo ƒo ƒu nye Satana ƒe dunyahehabɔbɔ bliboa katã. Dzo siawo katã wɔa adã hewɔa anyrã, gake abe alesi wòdze le ta adreawo ŋue ene la, xexemeŋusẽ ɖeka me koe tanyenyea nɔna le ɣeyiɣi ɖeka me. Nenema kee fiakuku ewoawo ɖee fia be dukɔ siwo katã le wo ɖokui si anɔ dziɖuŋusẽ ŋudɔ wɔm le ɣeyiɣi ma ke si me dukɔ si le ŋgɔ alo xexemeŋusẽ si li ɣemaɣi la le dzi ɖum.

11. Nukae nyateƒe si wònye be “busuŋkɔwo le [lã wɔadã la ƒe] tawo ŋu” la fia?

¹¹ “Busuŋkɔwo le [lã wɔadã la ƒe] tawo ŋu,” esi nye be egblɔa asiƒuakɔnya siwo nyea amemabumabu gã aɖe ɖeɖe fia ɖe Yehowa Mawu kple Kristo Yesu ŋu. Ezã Mawu kple Kristo ƒe ŋkɔ alakpatɔe tsɔ ɖo eƒe dunyahehe ƒe taɖodzinuwo gbɔ; eye wòwɔ ɖeka kple alakpasubɔsubɔhawo heɖe mɔ be osɔfowo kpɔ gome le dunyahehe ƒe nuwɔnawo me gɔ̃ hã. Le kpɔɖeŋu me, bisiɔpwo le Aƒetɔwo ƒe Sewɔtakpekpea me le England. Katoliko-papatenɔlawo xɔ dunyahehe ƒe nɔƒe vevi aɖewo le Franse kple Italia, eye nyitsɔ laa la, nunɔlawo xɔ dunyahehe ƒe nɔƒe le Latin Amerika. Dziɖuɖuwo taa mawusubɔsubɔ ƒe gbeƒãɖenyawo, abe “MAWU ŊUE MÍEÐOA ŊU ÐO” ene, ɖe woƒe ga siwo nye gagbalẽwo dzi, eye woŋlɔna ɖe woƒe gakuwo dzi be Mawu da asi ɖe yewoƒe dziɖulawo dzi eye le kpɔɖeŋu me wogblɔna be “to Mawu ƒe amenuveve dzi” ye woɖo amesiawo ɖi. Le nyateƒe me la nya siawo katã nye busunyawo elabena enye agbagbadzedze be woatsɔ Mawu ade dukɔwo ƒe dunyahehe ƒoɖi la me.

12. (a) Nukae lã wɔadã la ƒe dodo tso “atsiaƒu” me la fia, eye ɣekaɣie wòdze dodo gɔme? (b) Nukae nyateƒe si wònye be ʋɔ driba lae tsɔ kpɔɖeŋulã la ƒe ŋusẽ gã nɛ la fia?

¹² Lã wɔadã la do tso “atsiaƒu” si nye amegbetɔ madzeakɔanyi siwo dome amegbetɔ ƒe dziɖuɖuwo dona tso la ƒe kpɔɖeŋu si sɔ la me. (Yesaya 17:12, 13) Lã wɔadã sia dze dodo tso amegbetɔ madzeakɔanyiwo ƒe atsiaƒua me la gɔme le keke Nimrod ŋɔli ke (anɔ abe le ƒe alafa 21 lia D.M.Ŋ. me ene) esime nuɖoanyi si tsi tre ɖe Yehowa ŋu le Tsiɖɔɖɔa megbe la ɖe eɖokui fia zi gbãtɔ. (Mose I, 10:8-12; 11:1-9) Gake Aƒetɔ ƒe ŋkekea me koe eƒe ta adreawo ƒe mamletɔa ɖe eɖokui fia le bliboe. De dzesii hã be ʋɔ driba lae “tsɔ [lã la ƒe] ŋutete kple eƒe fiazikpui kple eƒe ŋusẽ gã nɛ.” (Tsɔe sɔ kple Luka 4:6.) Lã la nye dunyahehe ƒe nu si Satana wɔ da ɖe ameƒomea dome. Satanae nye “xexe sia me fia la” nyateƒe.—Yohanes 12:31.

Kubi La

13. (a) Dzɔgbevɔ̃e kae dzɔ ɖe lã wɔadã la dzi le Aƒetɔ la ƒe ŋkekea ƒe gɔmedzedze? (b) Aleke wòdzɔe be lã wɔadã bliboa kpe fu esime wode kubi eƒe tawo dometɔ ɖeka ŋu?

¹³ Le Aƒetɔ ƒe ŋkekea ƒe gɔmedzedze me la, afɔku aɖe dzɔ ɖe lã wɔadã la dzi. Yohanes ka nya ta be: “Eye eƒe tawo dometɔ ɖeka le abe kubi wode eŋu ene, eye wowɔ eƒe kubi la nɛ wòku; eye xexeame katã ƒe mo wɔ yaa le lã la yome.” (Nyaɖeɖefia 13:3) Kpukpui sia gblɔ be wode kubi lã wɔadã la ƒe tawo dometɔ ɖeka ŋu, gake kpukpui 12 gblɔe abe lã bliboa dzie wòdzɔ ɖo ene. Nukatae? Nɔƒe kɔkɔtɔ mesu lã la ƒe tawo katã si le ɣeyiɣi ɖeka me o. Wo dometɔ ɖesiaɖe ƒe ɣeyiɣi va wòtsɔ ɖu ameƒomea, vevietɔ Mawu ƒe amewo, dzi. (Nyaɖeɖefia 17:10) Eyata esi Aƒetɔ ƒe ŋkekea dze egɔme la, ta ɖeka si nye adrelia koe nɔ dɔ wɔm abe xexemeŋusẽ si le dzi ɖum la ene. Kubi si wode ta ma ŋu he xaxa gã aɖe va lã wɔadã bliboa dzi.

14. Ɣekaɣie wode kubia eŋu, eye aleke asrafomegã aɖe ƒo nu tso dɔ si wòwɔ ɖe Satana ƒe lã wɔadã la dzi ŋue?

¹⁴ Nukae nye kubia? Emegbe la wogblɔ be yi ƒe abie wònye, eye yi nye aʋawɔwɔ ƒe kpɔɖeŋu. Ele be yibi sia si wode eŋu le Aƒetɔ ƒe ŋkekea ƒe gɔmedzedze la naku ɖe xexemeʋa gbãtɔ si gblẽ nu le Satana ƒe dunyahehe ƒe lã wɔadã la ŋu vevie hexɔ nu veviwo le esi la ŋu. (Nyaɖeɖefia 6:4, 8; 13:14) Agbalẽŋlɔla Maurice Genevoix si nye asrafomegã le aʋawɔwɔ ma me la gblɔ tso eŋu be: “Amesiame lɔ̃ ɖe edzi be le ameƒomea ƒe ŋutinya katã me la, ŋkeke ʋee aɖewo koe nɔ vevie abe August 2, 1914 ene. Gbã la, Europa va kpɔ eɖokui be yege ɖe nudzɔdzɔ dziŋɔ aɖe me, eye eteƒe medidi hafi ameƒomea katã kloe nɔ eme o. Nubablawo, ɖoɖowo, agbenyuinɔnɔ ƒe sewo, [kple] gɔmeɖoanyiwo katã ʋuʋu; esi ŋkekeawo va nɔ yiyim la, wotɔ gbe nusianu. Nudzɔdzɔa va yi ŋgɔ wu dzɔgbevɔ̃e si wòanye ƒe seselelãmewo kple nusiwo wokpɔ mɔ na nunyatɔe la siaa. Le alesi wòloloe, tɔtɔ si wòhe vɛ kple nu klitsu si wònye ta la, nusiwo wògblẽ ɖe megbe la kpɔtɔ le mía hem le yiyimee.”—Maurice Genevoix, si nye Académie Française la me tɔ ƒe nya si woyɔ ɖe agbalẽ si nye Promise of Greatness (ƒe 1968) me.

15. Aleke wode kubi lã wɔadã la ƒe ta adrelia ŋue?

¹⁵ Aʋawɔwɔ ma nye dzɔgbevɔ̃e gã aɖe na lã wɔadã la ƒe ta adrelia si nɔ dzi ɖum la. Britania kple Europa-dukɔ bubuwo ƒe ɖekakpuiwo ku le agbɔsɔsɔ si he tɔtɔ vɛ me. Le aʋakpekpe ɖeka pɛ si nye Somme-tɔsisia ƒe Aʋakpekpea me le ƒe 1916 me la, Britaniatɔ 420,000 dze afɔku hekpe ɖe Fransetɔ siwo anɔ ame 194,000 kple Germaniatɔ 440,000—si nye amesiwo wu 1,000,000 ƒe abixɔxɔ alo ku—la ŋu! Le ganyawo gome hã la, nu gblẽ le Britania—kple Europa ƒe akpa mamlea—ŋu ale gbegbe. Eƒe ŋusẽkpɔɖeamedzia ʋuʋu Britania-fiaɖuƒe si keke ta la eye megate ŋu ɖo eƒe nɔƒe keŋkeŋ gbeɖegbeɖe o. Le nyateƒe me la, aʋawɔwɔ ma si me dukɔ vevi 28 kpɔ gome le la na xexeme bliboa katã dze anyi abe kubie wode eŋu ene. Le August 4, 1979, si nye ƒe 65 ko le Xexemeʋa I ƒe gɔmedzedze megbe la, London, England, ƒe The Economist gblɔ be: “Le ƒe 1914 me la ɖekawɔwɔ aɖe bu le xexeame, eye womegate ŋu kpɔe ɖo eteƒe o tso ɣemaɣi.”

16. Le xexemeʋa gbãtɔ me la, aleke United States ɖee fia be yenye xexemeŋusẽ eve ƒokpli ƒe akpa aɖe?

¹⁶ Le ɣeyiɣi ma ke me la, Aʋawɔwɔ Gã la, abe alesi woyɔe ɣemaɣi ene la, ʋu mɔ na United States be wòado nyuie abe Anglo-Amerika Xexemeŋusẽ la ƒe akpa aɖe ene. Le aʋawɔwɔa ƒe ƒe gbãtɔwo me la, amewo ƒe nukpɔsusu na United States mege ɖe avuwɔwɔa me o. Gake abe alesi ŋutinyaŋlɔla Esmé Wingfield-Stratford ŋlɔe ene la, “le dzɔgbevɔ̃e gãtɔ ƒe ɣeyiɣi sia me la, nenye be Britania kple United States aɖe asi le woƒe masɔmasɔwo ŋu ale be woate ŋu aɖo dukɔ bubuwo dzi ɖuɖu ƒe ɖekawɔwɔ kple anyigba bubuwo dzi kpɔkpɔ ɖekae gbɔ la ƒe nyae wòva zu.” Abe alesi nudzɔdzɔwo va yie ene la, wowɔ esia. Le ƒe 1917 me la, United States tsɔ eƒe nunɔamesiwo kple amewo na be woado alɔ Britania kple dukɔ siwo wɔ ɖeka kplii la ƒe aʋawɔŋusẽ si dzi nɔ ɖeɖem kpɔtɔ la. Eyata ta adrelia si nye Britania kple United States ƒe ƒuƒoƒo la ɖu aʋa la dzi.

17. Nukae dzɔ ɖe Satana ƒe anyigba dzi nuɖoanyia dzi le aʋawɔwɔa megbe?

¹⁷ Xexeame to vovo kura le aʋawɔwɔa megbe. Togbɔ be kubi la gblẽ nu le Satana ƒe anyigba dzi nuɖoanyia ŋu hã la, ŋusẽ gaɖo eŋu eye ŋusẽ va nɔ esi kura wu tsã ale be amegbetɔwo kafui le alesi eƒe lãme gasẽ ake la ta.

18. Aleke woate ŋu agblɔ be ameƒomea “ƒe mo wɔ yaa le lã la yome”?

¹⁸ Ŋutinyaŋlɔla Charles L. Mee, Jr. ŋlɔ bena: “Nuɖoanyi xoxoa ƒe toyiyi [si xexemeʋa gbãtɔ he vɛ] la nye ŋgɔdonu si hiã ale be dukɔwo ŋutɔ ɖokui dzi ɖuɖu, ablɔɖenana dukɔ yeyewo kple hatsotso yeyewo, mɔ ɖeɖe le ablɔɖe yeye ŋu kple ɖokuisinɔnɔ nakeke ta.” Nusi xɔ ŋgɔ le aʋamegbeɣeyiɣi sia ƒe nyawo mee nye lã wɔadã la ƒe ta adrelia si haya azɔ eye United States, Amerika va nɔ akpa vevitɔ wɔm le eme la. Xexemeŋusẽ eve ƒokplia xɔ ŋgɔ le Dukɔwo ƒe Nubabla kple Dukɔ Ƒoƒuawo siaa ɖoɖo anyi la dodo ɖa me. Kaka ƒe 1980 ƒe ƒeawo naɖo la, United States ƒe dunyaheŋusẽ la nɔ ŋgɔ na dukɔ siwo si mɔnukpɔkpɔ geɖe wu su la be woɖo agbenɔnɔ si de ŋgɔ wu anyi, woho aʋa ɖe dɔléle ŋu, eye wona mɔ̃ɖaŋuwɔwɔ yi ŋgɔ. Ena ame 12 yi ɣleti dzi gɔ̃ hã. Eyata mewɔ nuku be ameƒomea “ƒe mo wɔ yaa le lã la yome” o.

19. (a) Aleke ameƒomea wɔ nusi gbɔ lã wɔadã la kafukafu ŋue? (b) Ameka sie ŋusẽ le ɖikekemanɔmee, ɖe anyigba dzi fiaɖuƒewo katã dzi, eye aleke míewɔ nya? (d) Aleke Satana tsɔa ŋusẽ na lã wɔadã lae, eye dɔ kae ema wɔna ɖe ame akpa gãtɔ dzi?

¹⁹ Ameƒomea wɔ nusi gbɔ lã la ƒe nu si wɔ mo yaa na wo ko la ŋu, abe alesi Yohanes yi edzi gblɔe ene be: “Eye wode ta agu na ʋɔ driba la; elabena etsɔ eƒe ŋusẽ na lã la, eye wode ta agu na lã la le gbɔgblɔm bena: Amekae le abe lã la ene, eye amekae ate ŋu awɔ aʋa kplii mahã?” (Nyaɖeɖefia 13:4) Esime Yesu nɔ anyigba dzi afisia la, Satana gblɔ be yekpɔ ŋusẽ ɖe anyigba dzi fiaɖuƒewo katã dzi. Yesu meke ɖi esia o; le nyateƒe me la, eya ŋutɔ yɔ Satana be xexeame ƒe dziɖula eye wògbe gome kpɔkpɔ le ɣemaɣi ƒe dunyahehe me. Emegbe la Yohanes ŋlɔ tso Kristotɔ vavãwo ŋu be: “Míenyae bena, Mawu me míetso, eye xexeme blibo la katã le vɔ̃ɖitɔ la [si] me.” (Yohanes I, 5:19; Luka 4:5-8; Yohanes 6:15; 14:30) Satana tsɔa ŋusẽ na lã wɔadã la, eye ewɔa esia le dulɔlɔ̃ gome. Eyata le esi teƒe be ameƒomea nana mawumelɔlɔ̃ nabla wo ɖekae la, gbegbɔgblɔ, ŋutigbalẽ, kple dukɔ ƒe dada mã wo me. Eva wɔe be ame akpa gãtɔ dea ta agu na lã wɔadã la ƒe akpa si kpɔ ŋusẽ ɖe anyigba si dzi wole dzi la. Eyata wotsɔa kafukafu kple tadedeagu na lã bliboa katã.

20. (a) Gɔmesese ka nue amewo dea ta agu na lã wɔadã la le? (b) Nukatae Kristotɔ siwo dea ta agu na Yehowa Mawu mekpɔa gome le lã wɔadã la subɔsubɔ ma me o, eye ameka ƒe kpɔɖeŋue wosrɔ̃na?

²⁰ Tadedeagu le susu ka nu? Le dulɔlɔ̃ tsɔtsɔ do ŋgɔ na Mawulɔlɔ̃ ƒe susua nu. Ame akpa gãtɔ lɔ̃ wo denyigba. Abe dumevi nyuiwo ene la, Kristotɔ vavãwo hã dea bubu dukɔ si me wole la ƒe dziɖulawo kple dukɔteƒenɔnuwo ŋu, wowɔna ɖe sewo dzi, eye wokpea asi ɖe nuto si me wole kple wo haviwo ƒe nyonyo ŋu. (Romatɔwo 13:1-7; Petro I, 2:13-17) Gake womate ŋu anɔ dukɔ ɖeka aɖe yome tamemabumabutɔe ahatsi tre ɖe bubuwo katã ŋu o. “Etɔ dzɔ alo etɔ medzɔ o, mía denyigbae” ƒe nufiafia la menye Kristotɔwo tɔ o. Eyata Kristotɔ siwo dea ta agu na Yehowa Mawu mate ŋu akpɔ gome le dulɔlɔ̃ ƒe tadedeagu si nye dada la tsɔtsɔ na lã wɔadã la ƒe akpa aɖeke me o, elabena esia anye ʋɔ driba—si gbɔ lã la ƒe ŋusẽ tso—la subɔsubɔ. Womate ŋu abia kafukafutɔe be: “Amekae le abe lã la ene?” o. Ke boŋ wosrɔ̃a Mixael—amesi ƒe ŋkɔ gɔmee nye “Amekae Le Abe Mawu Ene?” la—ƒe kpɔɖeŋua esime wole Yehowa ƒe xexeame katã ƒe fianyenye la ta ʋlim. Le Mawu ƒe ɣeyiɣi ɖoɖi dzi la, Mixael sia si nye Yesu Kristo awɔ aʋa kple lã wɔadã la eye wòaɖu edzi, abe alesi wòɖu dzi le Satana nyanyã tso dziƒo me ene.—Nyaɖeɖefia 12:7-9; 19:11, 19-21.

Aʋa Wɔwɔ Kple Ame Kɔkɔeawo

21. Aleke Yohanes ɖɔ alesi Satana wɔ lã wɔadã la ŋudɔe la?

²¹ Satana ayetɔ la wɔ ɖoɖo be yeana lã wɔadã la nawɔ nusiwo ye ŋutɔ yedi. Yohanes ɖe esia me be: “Eye wotsɔ nu, si gblɔa nya gãwo kple busunyawo la nɛ [lã si si ta adre le la], eye wotsɔ ŋusẽ nɛ, be wòanɔ dɔ dzi ɣleti blane vɔ eve. Eye wòke nu de asi busunyagbɔgblɔ me ɖe Mawu ŋuti, be yeado busu eƒe ŋkɔ kple eƒe agbadɔ kpakple amesiwo nɔa dziƒo. Eye wona ŋusẽe, be wòawɔ aʋa kple ame kɔkɔewo, eye ne wòaɖu wo dzi, eye wona ŋusẽe ɖe to sia to kple dukɔ sia dukɔ kple gbegbɔgblɔ sia gbegbɔgblɔ kpakple trɔ̃subɔlawo katã dzi. Eye anyigbadzinɔla siwo katã ƒe ŋkɔwo womeŋlɔ ɖe alẽvi, si wowu la, ƒe agbegbalẽa me tso xexeame ƒe gɔmeɖoɖoanyi me o la, woasubɔe.”—Nyaɖeɖefia 13:5-8.

22. (a) Ɣeyiɣi ka ŋue ɣleti 42 la ku ɖo? (b) Le ɣleti 42 la me la, aleke ‘woɖu’ Kristotɔ amesiaminawo ‘dzie’?

²² Edze abe ɣleti 42 siwo woyɔ ɖe afisia la kee nye ƒe etɔ̃ kple afã si me dzo aɖe si Daniel ƒe nyagblɔɖia me lãwo dometɔ ɖeka to la ɖe fu na ame kɔkɔeawo la ene. (Daniel 7:23-25; kpɔ Nyaɖeɖefia 11:1-4 hã.) Eyata tso ƒe 1914 ƒe nuwuwu lɔƒo vaseɖe ƒe 1918 me esime dukɔ siwo nɔ aʋa wɔm la nɔ wo nɔewo vuvum abe gbemelãwo ene la, woƒoe ɖe dukɔ mawo me tɔwo nu be woade ta agu na lã wɔadã la, woaƒo wo ɖokui ɖe dukɔmevinyahehe ƒe subɔsubɔ me, eye woanɔ klalo be yewoaku ɖe yewoƒe dukɔa ta kura gɔ̃ hã. Nyaƒoɖeamenu ma na amesiamina siwo see le wo ɖokui me be yewoƒe toɖoɖo si de ŋgɔ wu la nye Yehowa Mawu kple Via Kristo Yesu tɔ la dometɔ geɖe kpe fu vevie. (Dɔwɔwɔwo 5:29) Woƒe fukpekpeawo va ɖo sesẽaƒe le ƒe 1918 ƒe May me esime ‘woɖu wo dzi.’ Le United States la, wode Gbetakpɔxɔ Habɔbɔa ƒe dɔnunɔla veviwo kple Habɔbɔa teƒenɔla bubuwo gaxɔ me madzemadzee, eye woxe mɔ na wo nɔvi Kristotɔwo ƒe gbeƒãɖeɖe ɖe ɖoɖo nu la fũ ŋutɔ. Esi lã wɔadã la kpɔ ŋusẽ ɖe “to sia to kple dukɔ sia dukɔ kple gbegbɔgblɔ sia gbegbɔgblɔ kpakple trɔ̃subɔlawo katã dzi” ta la, eva xe mɔ ɖe Mawu ƒe dɔa wɔwɔ nu le xexeame katã.

23. (a) Nukae nye “alẽvi . . . la, ƒe agbegbalẽa,” eye nukae ɖo ta nuwuwu tso ƒe 1918 me? (b) Nukatae ‘ame kɔkɔeawo’ dzi si wòdze abe Satana ƒe habɔbɔ si wokpɔna la ɖu ene la nye nu gbɔlo ko?

²³ Esia dze abe aʋadziɖuɖu ene na Satana kple eƒe habɔbɔa. Gake mate ŋu ahe viɖe aɖeke si anɔ anyi ɣeyiɣi didi la vɛ na wo o, elabena womeŋlɔ Satana ƒe habɔbɔ si wokpɔna la me tɔ aɖeke ƒe ŋkɔ ɖe “alẽvi . . . la, ƒe agbegbalẽa” me o. Le kpɔɖeŋunyagbɔgblɔ nu la, amesiwo aɖu fia kple Yesu le eƒe Dziƒofiaɖuƒea me la ƒe ŋkɔwoe le agbalẽ ŋɔ́ŋlɔ sia me. Woŋlɔ ŋkɔ gbãtɔwo ɖe eme le ƒe 33 M.Ŋ. ƒe Pentekoste dzi. Eye le ƒe siwo kplɔ ema ɖo me la, wogaŋlɔ ŋkɔ bubu geɖe kpee. Tso ƒe 1918 me la, Fiaɖuƒe domenyila 144,000 la ƒe ame susɔeawo nu tetre ɖo ta nuwuwu. Eteƒe madidi o, woaŋlɔ wo katã ƒe ŋkɔwo ɖe Alẽvi la ƒe agbegbalẽa me, eye womate ŋu atutui ɖa o. Ke tsitretsiɖeŋula siwo dea ta agu na lã wɔadã la ya la, womaŋlɔ wo dometɔ aɖeke ƒe ŋkɔ ɖe agbalẽ ŋɔ́ŋlɔ ma me o. Eyata ‘ame kɔkɔeawo’ dzi si wòawɔ abe amesiawo ɖu ene la anye aʋadziɖuɖu gbɔlo, si nye ɣeyiɣi aɖe tɔ dzro ko.

24. Nya kae Yohanes gblɔ be amesiwo si nugɔmesese le la naɖo to ase, eye nukae nya siwo wose la fia na Mawu ƒe amewo?

²⁴ Azɔ Yohanes bia tso amesiwo si nugɔmesese le la si be woaɖo to nyuie: “Amesi to li na la, nesee!” Azɔ eyi edzi gblɔ be: “Ne ame aɖe de ame gaxɔ me la, woade eya hã gaxɔ me; ne ame aɖe wu ame kple yi la, ele be woawu eya hã kple yi. Afii ame kɔkɔewo ƒe dzidodo kple woƒe xɔse le.” (Nyaɖeɖefia 13:9, 10) Yeremya ŋlɔ nya siawo tɔgbe le ƒe siwo do ŋgɔ na ƒe 607 D.M.Ŋ. me la tsɔ fia be Yehowa ƒe ʋɔnudɔdrɔ̃ si ava Yerusalem-du maɖianukwarea dzi la ava godoo. (Yeremya 15:2; kpɔ Yeremya 43:11; Zaxarya 11:9 hã.) Le dodokpɔ gã si me Yesu to ƒe ɣeyiɣia me la, ena eme kɔ ƒã be mele be ye yomedzelawo nana ta o esime wògblɔ be: “Amesiwo katã dia yi la, yi kee woatsɔ awu woe.” (Mateo 26:52) Nenema kee le Aƒetɔ ƒe ŋkekea me fifia la, ele be Mawu ƒe amewo nalé Biblia ƒe gɔmeɖosewo me ɖe asi sesĩe. Sisiƒe aɖeke manɔ anyi le nuwuwua na ame matrɔdzime siwo dea ta agu na lã wɔadã la o. Mí katã míahiã na dzidodo kpakple xɔse maʋãmaʋã ale be míate ŋu anɔ te ɖe yometiti kple dodokpɔ siwo le ŋgɔ gbɔna la nu.—Hebritɔwo 10:36-39; 11:6.

Lã Wɔadã si To Dzo Eve La

25. (a) Aleke Yohanes ɖɔ kpɔɖeŋulã wɔadã bubu si va xexeamee? (b) Nukae lã wɔadã yeyea ƒe dzo eveawo kple eƒe dodo tso anyigba me la fia?

²⁵ Gake azɔ lã wɔadã bubu va xexeame. Yohanes ka nya ta be: “Eye mekpɔ lã bubu aɖe le dodom tso anyigba me, eye dzo eve li nɛ abe alẽvi tɔ ene, eye wòƒo nu abe ʋɔ driba la ene. Eye wòwɔ lã gbãtɔ ƒe ŋusẽdɔwo katã le eƒe ŋku me. Eye wòwɔ anyigba la kple amesiwo nɔ edzi la bena, woadze klo asubɔ lã gbãtɔ, si ƒe kubi wowɔ wòku la. Eye wòwɔ dzesi gãwo bena, wòna dzo gɔ̃ hã ge tso dziƒo dze anyigba le amewo ƒe ŋku me.” (Nyaɖeɖefia 13:11-13) Lã wɔadã sia to dzo eve si ɖee fia be enye dunyaheŋusẽ eve ƒe ɖekawɔwɔ. Eye wogblɔ be edo tso anyigba la me, ke menye tso atsiaƒu me o. Eyata edo tso Satana ƒe anyigba dzi nuɖoanyi si wòɖo ɖi xoxo la me. Ele be wòanye xexemeŋusẽ si li xoxo si va wɔ akpa ɖedzesi aɖe le Aƒetɔ ƒe ŋkeke la me.

26. (a) Nukae nye lã wɔadã si to dzo eve la, eye aleke wòdo ƒome kple lã wɔadã gbãtɔ lae? (b) Gɔmesese ka nue lã si to dzo eve la ƒe dzoawo ɖi alẽvi tɔ, eye aleke wòƒoa nu “abe ʋɔ driba . . . ene”? (d) Nuka ŋutɔŋutɔe dukɔmevinyahelawo le ta dem agu na, eye wotsɔ dulɔlɔ̃ sɔ kple nuka? (Kpɔ etenuŋɔŋlɔ.)

²⁶ Nukae wòanye? Anglo-Amerika Xexemeŋusẽ lae—eya kee nye lã wɔadã gbãtɔa ƒe ta adrelia, gake le ɖoƒe tɔxɛ aɖe! Eɖeɖe ɖe vovo le ŋutega me abe lã wɔadã si le eɖokui si ene la kpena ɖe mía ŋu be míakpɔ alesi wòwɔa nu le xexeame le eɖokui sie la kɔte wu. Dunyaheŋusẽ eve siwo li le ɣeyiɣi ɖeka me eye wo dometɔ ɖesiaɖe le eɖokui si gake wowɔa nu aduadu lae le kpɔɖeŋu ƒe lã wɔadã dzoevee sia me. Eƒe dzo eve siwo le “abe alẽvi tɔ ene” la ɖee fia be ewɔa eɖokui abe nusi fa si ŋu vɔvɔ̃ mele o, eye dziɖuɖu kɔŋkume si ŋu wòle be xexeame katã natrɔ ɖo la le esi ene. Gake eƒoa nu “abe ʋɔ driba . . . ene” le esi wòwɔa nyaƒoɖeamenu kple ŋɔdzidonamewo kple adãwɔwɔ gɔ̃ hã ŋudɔ le afisiafi si womexɔ eƒe dziɖuɖu ƒomevia le o ta. Mede dzi ƒo na amewo be woabɔbɔ ɖe Mawu ƒe Fiaɖuƒe si le Mawu ƒe Alẽvi la ƒe dziɖuɖu te la te o, ke boŋ be woabɔbɔ ɖe Satana, ʋɔ driba gã la, ƒe didiwo te. Edo dulɔlɔ̃ ƒe mamãwo kple fuléle siwo nye tadedeagu na lã wɔadã gbãtɔ la ɖe ŋgɔ.c

27. (a) Lã wɔadã dzoevee la ƒe nɔnɔme kae nyateƒe si nye be ena dzo ge tso dziƒo la ɖe fia? (b) Aleke ame geɖe bua lã wɔadã si to dzo eve la ƒe egbegbekpɔɖeŋu lae?

²⁷ Lã wɔadã dzoevee sia wɔa dzesi gãwo, eye wòna dzo ge tso dziƒo gɔ̃ hã. (Tsɔe sɔ kple Mateo 7:21-23.) Dzesi mamle sia ɖoa ŋku Eliya si nye Mawu ƒe blemanyagblɔɖila si ʋli nya kple Baal ƒe nyagblɔɖilawo la dzi na mí. Esi wòte ŋu na dzo ge tso dziƒo le Yehowa ƒe ŋkɔ me la, eɖo kpe edzi ɖikekemanɔmee be enye nyagblɔɖila vavã, eye be Baal ƒe nyagblɔɖilawo nye alakpatɔwo. (Fiawo I, 18:21-40) Abe Baal ƒe nyagblɔɖila mawo ene la, lã wɔadã dzoevee la see le eɖokui me be yedze be yeawɔ dɔ abe nyagblɔɖila ene. (Tsɔe sɔ kple Nyaɖeɖefia 13:14, 15; 19:20.) Egblɔna be yeɖu vɔ̃ɖinyenye ƒe ŋusẽwo dzi le xexemeʋa eve me, eye fifia etsi tre ɖe dziɖuɖu siwo me nusianu nye dziɖuɖua tɔ, siwo wogblɔ be womenya Mawu o, la ŋu vevie! Le nyateƒe me la, ame geɖe buna lã wɔadã si to dzo eve la ƒe egbegbekpɔɖeŋua be enye ablɔɖetakpɔla kple ŋutilãmenu nyuiwo tsoƒe.

Lã Wɔadã la ƒe Legba La

28. Aleke Yohanes ɖee fia be lã wɔadã si si dzo eve le la menye esi ŋu nya aɖeke mele abe alesi eƒe dzo siwo le abe alẽvi tɔ ene la ɖee fia ene o?

²⁸ Ðe lã wɔadã sia si to dzo eve la meɖi fɔ o abe alesi eƒe dzo siwo ɖi alẽvi tɔ la fia enea? Yohanes yi edzi gblɔ be: “Eye wòble anyigbadzinɔlawo le dzesi, si wotsɔ nɛ, be wòawɔ le lã la ƒe ŋku me la ŋuti hele gbɔgblɔm na anyigbadzinɔlawo bena, woawɔ legba ɖe lã, si ŋu wode abii kple yi, eye wòle agbe la ƒe nɔnɔme me nɛ. Eye wona ŋusẽe, be wòatsɔ gbɔgbɔ na lã la ƒe legba, bena lã la ƒe legba naƒo nu hã, eye wòawɔ bena, woawu ame geɖe, alesi nu medze klo subɔ lã la ƒe legba o.”—Nyaɖeɖefia 13:14, 15.

29. (a) Tameɖoɖo kae le lã wɔadã la ƒe legba la ŋu, eye ɣekaɣie wowɔ legba sia? (b) Nukatae lã wɔadã la ƒe legba la menye legba si me agbe mele o?

²⁹ Nukae nye “lã la ƒe legba” sia, eye tameɖoɖo kae le eŋu? Tameɖoɖo lae nye be wòado lã wɔadã si si ta adre le si ƒe legba wònye la ƒe tadedeagu ɖe ŋgɔ, eye wòato ema dzi ana lã wɔadã la ƒe anyinɔnɔ nayi edzi. Esia nye legba si wowɔ le lã wɔadã si ta adre li na la ƒe hayahaya tso abi si wotsɔ yi de eŋu me la megbe, esi nye le xexemeʋa gbãtɔ ƒe nuwuwu megbe. Menye legba si me agbe mele o ye wònye abe Nebukadnezar tɔ si wòli ɖe Dura-bali me la ene o. (Daniel 3:1) Lã wɔadã si si dzo eve le la gbɔ agbegbɔgbɔ ɖe legba sia me ale be legba la nate ŋu anɔ agbe eye wòate ŋu awɔ akpa aɖe le xexeame ƒe ŋutinya me.

30, 31. (a) Nukae ŋutinya ƒe nyateƒenyawo ɖee fia be legba sia nye? (b) Ðe wowu ame aɖewo le gbegbe be yewomade ta agu na legba sia o ta? Ðe eme.

³⁰ Alesi ŋutinya me nyawo va yie la ɖee fia be legba sia nye habɔbɔ si Britania kple United States gblɔ be woaɖo anyi, wodonɛ ɖe ŋgɔ eye wokpea asi ɖe eŋu, esi woyɔ le gɔmedzedzea me be Dukɔwo ƒe Nubabla la. Emegbe, le Nyaɖeɖefia ta 17 me la, woatsɔ nu bubu awɔ eƒe kpɔɖeŋue, esi nye lã wɔadã dzĩ gbagbe si le gbɔgbɔm eye wòle agbe le eɖokui si. Dukɔwo dome habɔbɔ sia ‘ƒoa nu’ elabena eƒoa adegbe be ye koe ate ŋu ahe ŋutifafa kple dedienɔnɔ vɛ na ameƒomea. Gake le nyateƒe me la, eva zu afisi dukɔ siwo le eme la kpea ta le daa gbe ɖe wo nɔewo gbɔ hedzua wo nɔewo. Etsɔ mɔnukpɔkpɔ xɔxɔ le ame si alo agbenɔnɔ si me dzidzɔkpɔkpɔ aɖeke mele o doa ŋɔdzi na dukɔ alo ameha ɖesiaɖe si mebɔbɔna ɖe eƒe ŋusẽ te o. Eɖe dukɔ siwo menɔ agbe ɖe eƒe nufiafiawo nu o la le ha me ŋutɔŋutɔ. Le xaxa gã la ƒe gɔmedzedze la, lã wɔadã la ƒe legba sia ƒe “dzo” siwo hea asrafonya la awɔ nutsɔtsrɔ̃ ƒe dɔ aɖe.—Nyaɖeɖefia 7:14; 17:8, 16.

³¹ Tso Xexemeʋa II dzi la, lã wɔadã la ƒe legba la—si nye Dukɔ Ƒoƒuwo habɔbɔa fifia—wu amewo ŋutɔŋutɔ xoxo. Le kpɔɖeŋu me le ƒe 1950 me la, Dukɔ Ƒoƒuawo ƒe asrafowo wɔ aʋa le aʋa si dzɔ ɖe Anyiehe Korea kple Dziehe Korea dome la me. Dukɔ Ƒoƒuawo ƒe asrafoawo kple Dziehe Koreatɔwo wu Anyiehe Koreatɔ kple Chinatɔ siwo wobu akɔnta be woade ame 1,420,000. Nenema kee tso ƒe 1960 vaseɖe ƒe 1964 la, Dukɔ Ƒoƒuawo ƒe asrafowo wɔ aʋa le Kongo (si woyɔna fifia be Zaire). Gawu la, xexeame ƒe ŋgɔnɔlawo, amesiwo dome papa Paulo VI kple John Paul II le la, yi edzi le kpe ɖom edzi be legba siae nye amegbetɔ ƒe mɔkpɔkpɔ mamletɔ kple nyuitɔ kekeake hena ŋutifafakpɔkpɔ. Wogblɔna be ne ameƒomea mesubɔe o la, amegbetɔƒomea atsrɔ̃ eɖokui. Eyata le kpɔɖeŋunyagbɔgblɔ me la, wonana wowua amesiwo katã melɔ̃na be yeawoawɔ ɖeka kple legba la ahade ta agu nɛ o la.—Tsɔe sɔ kple Mose V, 5:8, 9.

Lã Wɔadã la ƒe Dzesi

32. Aleke Yohanes ƒo nu tso Satana ƒe mɔ fiafia eƒe habɔbɔ si wokpɔna la ƒe akpa siwo lɔ dunyahehe ɖe eme la be woahe fukpekpe ava Mawu ƒe nyɔnu la ƒe dzidzimevi la ƒe ame susɔeawo dzie la ŋue?

³² Azɔ Yohanes kpɔ alesi Satana nana eƒe habɔbɔ si wokpɔna la ƒe akpa siwo lɔ dunyahehe ɖe eme la hea fukpekpe gbogbotɔ kekeake vaa Mawu ƒe nyɔnua ƒe dzidzimevi la ƒe ame susɔeawo dzie. (Mose I, 3:15) Egatrɔ ɖe nuƒoƒo tso “lã la” ŋutɔ ŋu la ŋuti be: “Eye wòwɔ bena, woade dzesi amewo katã, ɖeviwo kple ame tsitsiwo kple kesinɔtɔwo kple ame dahewo kple ablɔɖeviwo kple kluviwo ƒe nuɖusi alo woƒe ŋgonu, bena ame aɖeke magate ŋu aƒle nu alo adzra nu o, negbe amesi ŋu lã la ƒe ŋkɔ alo eƒe ŋkɔ ƒe xexlẽme ƒe dzesi le la ko. Afii nunya le! Amesi ke si gɔmesese le la, nebu lã la ƒe xexlẽme kpɔ; elabena ame ƒe xexlẽme wònye, eye eƒe xexlẽme enye alafa ade kple blaade vɔ ade.”—Nyaɖeɖefia 13:16-18.

33. (a) Nukae nye lã wɔadã la ƒe ŋkɔ? (b) Nuka ŋue wotsɔa xexlẽme ade kuna ɖo? Ðe eme.

³³ Ŋkɔ le lã wɔadã la si, eye ŋkɔ sia nye xexlẽme: 666. Wotsɔa xexlẽme si nye ade kuna ɖe Yehowa ƒe futɔwo ŋu. Filistitɔ aɖe si nɔ Refayimtɔwo dome la nye ‘ame dzɔtsu’ eye wòto ‘asibide kple afɔbide adeade.’ (Kronika I, 20:6) Fia Nebukadnezar li sikalegba si keke abɔklugui 6 eye wòkɔkɔ abɔklugui 60 la be wòana eƒe dunyahemegãwo nawɔ ɖeka le tadedeagu ɖeka me. Esi Mawu ƒe subɔlawo gbe ta dede agu na sikalegba sia la, fia la na wotsɔ wo ƒu gbe ɖe kpodzo bibi aɖe me. (Daniel 3:1-23) Xexlẽme ade la mede adre si tsi tre ɖi na blibonyenye le Mawu ŋkume la o. Eyata ade zi gbɔ zi etɔ̃ la tsi tre ɖi na blibomademade si gbɔ eme.

34. (a) Nukae nyateƒe si wònye be lã wɔadã la ƒe xexlẽme nye “ame ƒe xexlẽme” la fia? (b) Nukatae 666 nye ŋkɔ si sɔ na Satana ƒe xexeame katã ƒe dunyahenuɖoanyia?

³⁴ Wotsɔa ŋkɔ dzea si amee. Eyata aleke xexlẽdzesi sia na míedze si lã lae? Yohanes gblɔ be “ame ƒe xexlẽme wònye,” ke menye gbɔgbɔmeme tɔ o, eyata ŋkɔ la ɖoa kpe edzi be lã wɔadã la nye anyigbadzinu si tsi tre ɖi na amegbetɔ ƒe dziɖuɖu. Alesi ko ade mede adre nu o la, nenema kee 666—ade zi gbɔ zi etɔ̃—la nye xexeame ƒe dunyahenuɖoanyi nyadri si mete ŋu ɖo Mawu ƒe blibodede ƒe dzidzenua gbɔ kura o la ƒe ŋkɔ si sɔ. Xexeame ƒe dunyahehe ƒe lã wɔadã la le dzi ɖum eye ŋkɔ si nye xexlẽme 666 le eŋu, esime dunyahehe gã, mawusubɔsubɔha gãwo kple asitsatsa gã nana lã ma yia edzi nɔa dɔ wɔm abe nusi tea ameƒomea ɖe anyi kple Mawu ƒe dukɔ la yometila ene.

35. Nukae lã wɔadã la ƒe ŋkɔ si woatsɔ ade dzesi ŋgonu alo nuɖusi ŋu na ame la fia?

³⁵ Nukae lã wɔadã la ƒe ŋkɔ si woatsɔ ade dzesi ŋgonu alo nuɖusi ŋu na ame la fia? Esime Yehowa tsɔ Se la na Israel la, egblɔ na wo be: “Mina nye nya siawo nage ɖe miaƒe dzi kple miaƒe luʋɔ me, mibla wo ɖe asi ŋu abe dzesi ene, eye mibla wo ɖe ŋgonu le ŋudome.” (Mose V, 11:18) Esia fia be ele be Israel-viwo nana Se ma nanɔ susu me na wo ɣesiaɣi ale be wòakpɔ ŋusẽ ɖe woƒe nuwɔnawo kple tamesusuwo katã dzi. Wogblɔ be woŋlɔ Fofo la kple Yesu ƒe ŋkɔwo ɖe amesiamina 144,000 la ƒe ŋgonu. Esia ɖee fia be wonye Yehowa Mawu kple Yesu Kristo tɔ. (Nyaɖeɖefia 14:1) Le wo sɔsrɔ̃ me la, Satana zã lã wɔadã la ƒe gbɔgbɔ vɔ̃wo ƒe dzesi la. Woƒonɛ ɖe amesiame si wɔa gbesiagbenuwɔnawo abe nuƒeƒle kple nudzadzra ene la nu be wòawɔ nu abe alesi lã wɔadã la wɔnɛ ene, le kpɔɖeŋu me, to ŋkekenyuiwo ɖuɖu dzi. Wokpɔa mɔ be woade ta agu na lã wɔadã la ahana wòaɖu woƒe agbenɔnɔ dzi ale be woaxɔ eƒe dzesi la.

36. Kuxi kawoe va amesiwo gbe lã wɔadã la ƒe dzesia xɔxɔ dzi?

³⁶ Amesiwo gbe lã la ƒe dzesi xɔxɔ la ɖo kuxiwo me edziedzi. Le kpɔɖeŋu me, tso ƒe 1930 ƒe ƒeawo me la, eva hiã be woaʋli wo ɖokui ta le ʋɔnudrɔ̃ƒe zi geɖe eye woado dzi le nuvlowɔlawo ƒe hawo ƒe anyrãnuwɔwɔ kple yometiti bubuwo me. Le dukɔ siwo me ŋutasẽdziɖuɖuwo le me la, wolé wo de fuwɔamegaxɔwo me, afisi wo dometɔ geɖe ku le. Tso xexemeʋa evelia dzi la, wolé ɖekakpui gbogbo manyaxlẽ aɖewo de gaxɔ me ɣeyiɣi didiwo, eye wole fu wɔm wo dometɔ aɖewo hele wo wum gɔ̃ hã, le esi wogbe be yewomana ta le yewoƒe Kristotɔwo ƒe akpaɖekedzimademade me o ta. Le dukɔ bubuwo me la, Kristotɔwo mete ŋu ƒlea nu alo dzraa nu o; womeɖea mɔ be anyigba nanɔ wo dometɔ aɖewo si o; wodɔa bubuwo gbɔ sesẽe, wowua wo alo nyãa wo tso wo denyigba dzi. Nukatae? Esi wotsɔ dzitsinya nyui gbe dunyahehabɔbɔ me tɔ nyenye ƒe agbalẽvi ƒeƒle tae.d—Yohanes 17:16.

37, 38. (a) Nukatae xexeame sesẽ na amesiwo gbe lã wɔadã la ƒe dzesi la xɔxɔ? (b) Amekawoe le nuteƒe wɔm, eye nukae woɖoe kplikpaa be yewoawɔ?

³⁷ Le anyigba la ƒe teƒe aɖewo la, mawusubɔsubɔ xɔ aƒe ɖe hadomegbenɔnɔ me ale gbegbe be ƒometɔwo kple amesiwo nye xɔlɔ̃wo tsã la nyãa amesiame si va nɔa Biblia me nyateƒea ƒe akpa dzi la ɖa le wo ɖokui ŋu. Ebia xɔse geɖe ŋutɔ be woado dzi. (Mateo 10:36-38; 17:22) Le xexe si me ame akpa gãtɔ dea ta agu na ŋutilãmekesinɔnuwo eye anukwaremaɖimaɖi bɔ le me la, eva hiãna zi geɖe be Kristotɔ vavã la naɖo ŋu ɖe Yehowa ŋu bliboe be alé ye ɖe te le mɔ dzɔdzɔe dzi toto me. (Psalmo 11:7; Hebritɔwo 13:18) Le xexe si me agbegbegblẽnɔnɔ bɔ ɖo la me la, ebiana be woaɖo tame kplikpaa ŋutɔ hafi woate ŋu anɔ dzadzɛ ahanɔ kɔkɔe. Zi geɖe la, atikewɔlawo kple dɔnɔdzikpɔlawo ƒonɛ ɖe Kristotɔ siwo dze dɔ nu be woada le Mawu ƒe se si ku ɖe ʋu ƒe kɔkɔenyenye ŋu la dzi; eva hiãna kura gɔ̃ hã be woatsi tre ɖe ʋɔnudrɔ̃ƒe ƒe gbeɖeɖe siwo tsi tre ɖe woƒe xɔse ŋu la ŋuti. (Dɔwɔwɔwo 15:28, 29; Petro I, 4:3, 4) Eye le dɔwɔɖuimanɔanyi si le dzidzim ɖe edzi ƒe ŋkeke siawo me la, eva le sesẽm ɖe edzi be Kristotɔ vavã naƒo asa na dɔ si afia be ena ta le eƒe nuteƒewɔwɔ na Mawu me la wɔwɔ.—Mixa 4:3, 5.

³⁸ Ẽ, xexeame nye teƒe si sesẽ na amesiwo ŋu lã wɔadã la ƒe dzesi mele o. Enye Yehowa ƒe ŋusẽ kple yayra ƒe ɖeɖefia ɖedzesi aɖe be nyɔnu la ƒe dzidzimevi ƒe ame susɔeawo kpakple ameha gã la me tɔ siwo wu miliɔn ene la le nuteƒe wɔm togbɔ be wole eƒom ɖe wo nu be woada le Mawu ƒe sewo dzi gake. (Nyaɖeɖefia 7:9) Mina mí katã míayi edzi ɖekawɔwɔtɔe akafu Yehowa kple eƒe mɔ dzɔdzɔeawo le anyigba katã dzi esime míele lã wɔadã la ƒe dzesi la xɔxɔ gbem.—Psalmo 34:2-4.

[Etenuŋɔŋlɔwo]

[Nɔnɔmetata si le axa 195]

Wona ŋusẽe be wòatsɔ gbɔgbɔ na lã la ƒe legba la