Ta 7

Migatu Lɔlɔ̃ Gbãtɔ Ma Ðo!

EFESO

 1. Hame kae Yesu ƒe gbedasi gbãtɔ yi na, eye nuka dzie wòɖo ŋkui na dzikpɔlawo?

YESU ƒe gbedasi gbãtɔa yi na hame si nɔ Efeso, si nye Asia Sue ƒe ƒutadu si me nuwo nɔ edzi dzem le eye wòtsɔ ɖe Patmo-ƒukpoa gbɔ kpuie la. Eɖe gbe na Yohanes be: “Ŋlɔ ɖo ɖe hame, si le Efeso la, ƒe dɔla bena: Amesi lé ɣletivi adre ɖe eƒe nuɖusi, amesi le sikakaɖiti adreawo titina zɔm la, eyae gblɔ esiawo.” (Nyaɖeɖefia 2:1) Abe alesi wònɔ le gbedasi ade bubuawo me ene la, Yesu he susu yi nane si fia ŋusẽ ƒe nɔƒe si le esi la dzi le afisia. Eɖo ŋku edzi na dzikpɔla siwo le Efeso la be hamemegãwo katã le yeƒe ametakpɔkpɔ ƒe dzikpɔkpɔ te eye yele ŋku lém ɖe hameawo katã ŋu. Vaseɖe míaƒe ƒe alafa 20 lia sia me la, eyi edzi le lɔlɔ̃ ƒe tanyenye sia ŋudɔ wɔm eye wòle hamemegãwo ta kpɔm hele amesiwo katã bɔa ha kple hamea kplɔm dɔmenyotɔe. Ɣeaɖewoɣi la, etrɔa hame ƒe ɖoɖowo be kekelia nagaklẽ ɖe edzi. Ẽ, Yesue nye Mawu ƒe alẽha la ƒe Alẽkplɔla Gã la.—Mateo 11:28-30; Petro I, 5:2-4.

 2. (a) Nu nyui kawo wɔwɔ tae Yesu kafu Efeso-hamea? (b) Apostolo Paulo ƒe aɖaŋuɖoɖo ka dzie wòdze ƒã be Efeso-hamemegãwo wɔ ɖo?

² Azɔ Yesu ɖo kpɔdzidze aɖe ɖi, esi dzi wòwɔ ɖo le eƒe gbedasi adreawo katã kloe, negbe eve koe to le eme la, me esime wòtsɔ vividoɖeameŋu ƒe kafukafunya dze egɔmee. Gbedasi siae nɔ esi na Efesotɔwo: “Menya wò dɔwɔwɔwo kple wò agbagbadzedze kple wò dzidodo, eye bena mètea ŋu lɔ̃a ame vɔ̃ɖiwo ƒe nya o, eye nèdo amesiwo gblɔna be, yewonye apostolowo, eye womenyee o la kpɔ, eye nèkpɔ be, aʋatsokalawo wonye, eye nèdo dzi, eye nèdze agbagba le nye ŋkɔa ŋuti, eye ɖeɖi metea ŋuwò o.” (Nyaɖeɖefia 2:2, 3) Ƒe aɖewo do ŋgɔ la, apostolo Paulo xlɔ̃ nu Efeso-hamemegãwo le “amegãxi nyanyrawo” ŋu, amesiwo anye xɔsegbela siwo aɖe fu na alẽha la, eye wògblɔ na hamemegã mawo be woasrɔ̃ yeƒe ɖeɖimateameŋu ƒe kpɔɖeŋua ‘ahanɔ ŋudzɔ.’ (Dɔwɔwɔwo 20:29, 31) Esi wònye Yesu kafu wo azɔ le woƒe agbagbadzedze kple dzidodo kpakple ɖeɖi si mete wo ŋu o ta la, anye be wowɔ ɖe aɖaŋuɖoɖo ma dzi.

 3. (a) Aleke “aʋatso-apostolowo” dze agbagba be yewoable anukwareɖilawo le míaƒe ŋkekeawo mee? (b) Nuxlɔ̃me kae Petro na ku ɖe xɔsegbelawo ŋu?

³ Le Aƒetɔa ƒe ŋkekea me hã ‘aʋatso-apostolo’ siwo “gblɔa nya dàdawo . . . be woahe nusrɔ̃lawo ɖe wo ɖokui yome” la do. (Korintotɔwo II, 11:13; Dɔwɔwɔwo 20:30; Nyaɖeɖefia 1:10) Woƒe nukpɔsusue nye be subɔsubɔha siwo me mamã le eye wotsi tre ɖe wo nɔewo ŋu la katã nyo; wogblɔna be habɔbɔ mele Mawu si o, eye be Yesu mexɔ Fiaɖuƒe ŋusẽ le ƒe 1914 me o. Wonana nyagblɔɖi si le Petro II, 3:3, 4 la vaa eme be: “Le ŋkeke mamleawo dzi la fewuɖulawo lava kple fewuɖuɖu, amesiwo zɔna le woawo ŋutɔwo ƒe nudzodzrowo nu, eye woagblɔ bena: Afika eƒe vava la ƒe ŋugbedodo la le? Elabena tso esime fofoawo dɔ alɔ̃ la, nuwo katã nɔ anyi nenema tso nuwɔwɔ ƒe gɔmedzedze la me.”

 4. (a) Aleke fewuɖulawo ƒe dada kple aglãdzedze dzenae? (b) Kristotɔ siwo li egbea ɖenɛ fiana be yewole abe Efesotɔawo ene to nuka wɔwɔ ɖe tsitretsiɖeŋula alakpatɔwo ŋu dzi?

⁴ Fewuɖula siawo dzea aglã ɖe woƒe xɔse me ʋuʋu le gaglãgbe ƒe susu la ŋu. (Romatɔwo 10:10) Wodi kpekpeɖeŋu tso Kristodukɔa ƒe osɔfowo kple nyadzɔdzɔgbalẽwo kple television dɔwɔƒewo gbɔ be woakaka alakpanyawo tso amesiwo nye woƒe zɔhɛwo tsã la ŋu. Eteƒe medidina hafi nuteƒewɔlawo kpɔnɛ be nyateƒe mele ameblela siawo ƒe nuƒo kple agbenɔnɔ me o. Abe Efesotɔawo ene la, Kristotɔ siwo li egbea “metea ŋu lɔ̃a ame vɔ̃ɖiwo ƒe nya o,” eyata woɖea wo le woƒe hamewo me.a

 5. (a) Gbɔdzɔgbɔdzɔ kae Yesu gblɔ be enɔ Efesotɔwo ŋu? (b) Nya kawo dzie wòle be Efesotɔawo naɖo ŋkui hafi?

⁵ Ke azɔ abe alesi wòwɔe le hame adreawo dometɔ atɔ̃ gome ene la, Yesu tɔ asi kuxi gã aɖe dzi. Egblɔ na Efesotɔwo bena: “Gake la mekpɔ nusia le ŋutiwò bena, nègblẽ wò gbã lɔlɔ̃ la ɖi.” (Nyaɖeɖefia 2:4) Mele be woado kpo nu le go sia me hafi o, elabena Paulo ŋlɔ agbalẽ ɖo ɖe wo ƒe 35 do ŋgɔ heƒo nu tso Mawu ƒe “lɔlɔ̃ geɖe, si wòtsɔ lɔ̃ mí” la ŋuti, eye wòde dzi ƒo na wo bena: “Mizu mawusrɔ̃lawo abe lɔlɔ̃viwo ene, eye mizɔ le lɔlɔ̃ me, abe alesi Kristo hã lɔ̃ mi, . . . ene.” (Efesotɔwo 2:4; 5:1, 2) Hekpe ɖe eŋu la, ɖe wòle be woaŋlɔ Yesu ƒe nya siawo ɖe woƒe dzi dzi be womate ŋu atutui ɖa o hafi, be: “Aƒetɔ [Yehowa] míaƒe Mawu la, Aƒetɔ ɖeka wònye. Eye nalɔ̃ Aƒetɔ, wò Mawu la, kple wò dzi blibo kple wò luʋɔ blibo kple wò tamesusu blibo kpakple wò ŋusẽ blibo.” (Marko 12:29-31) Lɔlɔ̃ gbãtɔ ma meganɔ Efesotɔwo si o.

 6. (a) Míeɖanye ame xoxowo alo ame yeyewo le hamea me o, afɔku kple nɔnɔme kawo ŋue wòle be míanɔ ŋudzɔ ɖo? (b) Nukae wòle be lɔlɔ̃ si le mía si na Mawu naʋã mí be míawɔ?

⁶ Míeɖanye ame xoxowo alo zɔhɛ yeyewo le hamea me o, ele be míakpɔ nyuie be lɔlɔ̃ si nɔ mía si na Yehowa le gɔmedzedzea me la nagabu o. Aleke wòava eme be míabui? Míate ŋu aɖe mɔ be alesi míaƒe ŋutilãmedɔ le vevie na míe, didi be míakpɔ ga geɖe, alo vivisesedidi nazu nu vevitɔ le míaƒe agbe me. Eyata míate ŋu ava zu amesiwo bua ŋutilãmenuwo ŋu tsɔ wu gbɔgbɔmenuwo ŋu. (Romatɔwo 8:5-8; Timoteo I, 4:8; 6:9, 10) Ele be lɔlɔ̃ si le mía si na Yehowa naʋã mí be míaɖɔ nɔnɔme mawo tɔgbe ɖo eye ‘míayi edzi adi Mawu ƒe fiaɖuƒea kple eƒe dzɔdzɔenyenye gbãgbiagbã’ ale be ‘míadzra kesinɔnuwo ɖo na mía ɖokui le dziƒo.’—Mateo 6:19-21, 31-33.

 7. (a) Nukae le be wòaʋã mí be míasubɔ Yehowa? (b) Nukae Yohanes gblɔ ku ɖe lɔlɔ̃ ŋu?

⁷ Mina lɔlɔ̃ deto na Yehowa naʋã mí ɣesiaɣi le subɔsubɔ si míetsɔna nɛ me. Mina míakpɔ ŋudzedze vevie ɖe nusiwo katã Yehowa kple Kristo wɔ na mí la ŋu. Abe alesi Yohanes ŋutɔ ŋlɔe emegbe ene la: “Esia me lɔlɔ̃ la le: Menye bena míawo míelɔ̃ Mawu o, ke boŋ bena eya lɔ̃ mí, eye wòdɔ Via ɖo ɖa, bena wòanye avuléle le mía nuvɔ̃wo ta.” Yohanes yi edzi gblɔ na mí bena: “Mawue nye lɔlɔ̃, eye amesi nɔa lɔlɔ̃ la me la, eya nɔa Mawu me, eye Mawu hã nɔa eya me.” Mígana lɔlɔ̃ si le mía si na Yehowa, Aƒetɔ Yesu Kristo, kple Mawu ƒe Nya si le agbe la nayi to gbeɖe o! Menye veviedodo le Mawusubɔsubɔ me la me koe míate ŋu aɖe lɔlɔ̃ sia afia le o ke boŋ to wɔwɔ ɖe “se sia” si míexɔ “tso egbɔ bena, amesi ke lɔ̃a Mawu la, nelɔ̃ nɔvia hã” la hã dzie.—Yohanes I, 4:10, 16, 21; Hebritɔwo 4:12; kpɔ Petro I, 4:8; Kolosetɔwo 3:10-14; Efesotɔwo 4:15 hã.

“Nawɔ Gbã Dɔwɔwɔawo”

 8. Aleke Yesu gblɔ be Efesotɔwo nawɔ nui?

⁸ Ele be Efesotɔ mawo nagatu lɔlɔ̃ si nɔ wo si tsã la ɖo ne womedi be nu natsi yewo ŋu o. Yesu gblɔ na wo be: “Eyata ɖo ŋku afisi nège tso la dzi, ne natrɔ le dzi me, eye nawɔ gbã dɔwɔwɔawo; ne menye nenem o la, mava gbɔwò kaba, eye maɖe wò akaɖiti la ɖa tso enɔƒe, ne mètrɔ le wò dzi me o.” (Nyaɖeɖefia 2:5) Aleke Kristotɔ siwo nɔ Efeso-hamea me la xɔ nya mawoe? Míenya o. Míexɔe se be wotrɔ dzime eye wogatu lɔlɔ̃ si nɔ wo si na Yehowa la ɖo. Ne womewɔe nenema o la, ekema woatsi woƒe akaɖia ahaɖe woƒe akaɖiti la ɖa. Woƒe mɔnukpɔkpɔ be woana nyateƒea nadze la age le wo si.

 9. (a) Dzideƒonya kae nɔ Yesu si na Efesotɔawo? (b) Aleke hame siwo nɔ anyi le Yohanes ƒe ŋkekea megbe do kpo wɔwɔ ɖe aɖaŋu si Yesu ɖo na Efesotɔawo dzie?

⁹ Gake dzideƒonya sia nɔ Yesu si na Efesotɔawo: “Gake esia le asiwò bena, nèléa fu nikolaitɔwo ƒe nuwɔwɔ, siwo nye hã meléa fui la.” (Nyaɖeɖefia 2:6) Wolé fu kɔmamãwo ya teti, abe alesi Aƒetɔ Yesu Kristo hã lé fui ene. Gake esi ƒeawo va nɔ yiyim la, hame geɖewo mewɔ ɖe Yesu ƒe nya mawo dzi o. Lɔlɔ̃ si mele wo si na Yehowa, nyateƒea kple wo nɔewo o na woge ɖe gbɔgbɔmeviviti me. Womã kakɛkakɛ va zu kɔmamã geɖe siwo le dzre wɔm kple wo nɔewo. Egbugbɔgaŋlɔla “Kristotɔ” siwo melɔ̃ Yehowa o ɖe Mawu ƒe ŋkɔ le Biblia ƒe Helagbe me nuŋɔŋlɔ siwo woŋlɔ kple asi la me. Lɔlɔ̃ si menɔ wo si o hã ʋu mɔ na wo be wofia Babilontɔwo kple Helatɔwo ƒe nufiafiawo, abe dzomavɔ, ŋutikɔklɔdzo kple Mawuɖekaetɔ̃ ene, le Kristotɔnyenye ƒe ŋkɔ me. Esi lɔlɔ̃ na Mawu kple nyateƒea mele wo si o ta la, amesiwo be yewonye Kristotɔwo la dometɔ akpa gãtɔ dzudzɔ gbe ƒã ɖeɖe Mawu ƒe Fiaɖuƒe ŋuti nya nyuia. Osɔfo ɖokuitɔdilawo ƒe habɔbɔ si ɖo fiaɖuƒe na eɖokui le anyigba dzi afisia la va ɖu wo dzi.—Tsɔe sɔ kple Korintotɔwo I, 4:8.

10. Nɔnɔme kae nɔ Kristodukɔa me le ƒe 1918 me le mawusubɔsubɔ gome?

¹⁰ Esime ʋɔnudɔdrɔ̃ dze egɔme tso Mawu ƒe aƒea dzi le ƒe 1918 me la, Kristodukɔa ƒe osɔfo siwo le kɔmamãwo me la nɔ asi kpem ɖe Xexemeʋa I ŋu le gaglãgbe henɔ dzi dem ƒo na Katolikotɔwo kple Protestantɔwo le akpa evea siaa be woawu wo nɔewo. (Petro I, 4:17) Le nɔnɔme si to vovo tso Efeso-hamea si lé fu nusi Nikolai ƒe kɔmamã la nɔ wɔwɔm la tɔ gbɔ me la, wonɔ nufiafia siwo tsi tre ɖe Mawu ŋu eye wotsi tre ɖe wo nɔewo ŋu la fiam xoxoxo le Kristodukɔa ƒe subɔsubɔhawo me, eye woƒe osɔfowo wɔ ɖeka kple xexeme si Yesu gblɔ na eƒe nusrɔ̃lawo be womeganye eƒe akpa aɖeke o la. (Yohanes 15:17-19) Esi woƒe hamewo menya Biblia ƒe tanya si nye Mawu ƒe Fiaɖuƒe la o ta la, womenye akaɖiti siwo dzi Ŋɔŋlɔa me nyateƒe nɔ keklẽm le o, eye woƒe hameviwo menye Yehowa ƒe gbɔgbɔ me gbedoxɔa ƒe akpa aɖeke o. Ŋutsu (kple nyɔnu) siwo nɔ ŋgɔ na wo la menye ɣletiviwo o ke boŋ woɖee fia be wonye “nuvɔ̃me” la me tɔwo.—Tesalonikatɔwo II, 2:3; Maleaxi 3:1-3.

11. (a) Kristotɔwo ƒe habɔbɔ ka si nɔ xexeame le ƒe 1918 mee wɔ ɖe nya si Yesu gblɔ na Efesotɔwo la dzi? (b) Nukae Yohanes habɔbɔa wɔ tso ƒe 1919 dzi?

¹¹ Gake Yohanes habɔbɔa ya tsɔ lɔlɔ̃ na Yehowa kple nyateƒea si ʋã wo be woasubɔ eyama kple dzonɔameme si nu sẽ la do tso xexemeʋa gbãtɔ ƒe ʋunyaʋunyawɔwɔ ƒe ŋkekeawo me. Wotsi tre ɖe amesiwo dze agbagba be yewoahe kɔmamãwo vɛ to Gbetakpɔxɔ Habɔbɔa ƒe zimenɔla gbãtɔ Charles T. Russell wɔwɔ trɔ̃e le eƒe ku le ƒe 1916 me megbe dzi la ŋu. Esi yometitiwo kple fukpekpewo na hehe Kristotɔwo ƒe habɔbɔ sia ta la, edze ƒã be woƒe Aƒetɔ do ‘miawoe wɔ dɔ’ na wo eye wòkpe wo be woayi ɖe yeƒe dzidzɔ la me. (Mateo 25:21, 23) Wokpɔ dzesi si Yesu gblɔ be anye yeƒe anyinɔnɔ le Fiaɖuƒeŋusẽ me si ŋku makpɔ o ƒe dzesi la ƒe emevava le xexemenudzɔdzɔwo kple woa ŋutɔwo ƒe nuteƒekpɔkpɔwo me. Tso ƒe 1919 dzi la, woyi ŋgɔ be woakpɔ gome le Yesu ƒe nyagblɔɖi gã la ƒe emevava me be: “Eye woaɖe gbe ƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.” (Mateo 6:9, 10; 24:3-14) Ne ɖe woƒe Yehowa-lɔlɔ̃ yi to le mɔ aɖe nu hafi la, ke wode dzo eme tso ɣemaɣi.

12. (a) Yɔyɔ kae ɖi le takpekpe aɖe si xɔ ŋkɔ le ŋutinya me la me le ƒe 1922 me? (b) Ŋkɔ kae Kristotɔ vavãwo tsɔ le ƒe 1931 me, eye nuka ŋue wotrɔ dzime le?

¹² Le takpekpe aɖe si xɔ ŋkɔ le ŋutinya me, si Kristotɔ siawo dometɔ 18,000 yi le Cedar Point, Ohio, U.S.A., le ƒe 1922 ƒe September 5-13 dzi me la, yɔyɔa ɖi be: “Mitrɔ yi gbeadzi, mi Mawu dziƒoʋĩtɔ ƒe viwo! . . . Ele be xexeame nanya be Yehowae nye Mawu eye Yesu Kristoe nye fiawo dzi Fia kple aƒetɔwo dzi Aƒetɔ. . . . Eyata miɖe gbe ƒã, miɖe gbe ƒã, miɖe gbe ƒã Fia la kple eƒe fiaɖuƒe la.” Wona Yehowa ƒe ŋkɔ xɔasi la nɔ dzedzem ƒã wu tsã. Le ƒe 1931 me la, Kristotɔ siawo siwo ƒo ƒu le takpekpe me le Kolumbus, Ohio, U.S.A. la kpɔ dzidzɔ be yewoatsɔ ŋkɔ si Mawu fia asii le Yesaya ƒe nyagblɔɖia me—si nye Yehowa Ðasefowo—eye woxɔe. (Yesaya 43:10, 12) Tso March 1, 1939 ƒe tata la dzi la, wotrɔ habɔbɔa ƒe magazine vevitɔ ƒe ŋkɔ wòzu Gbetakpɔxɔ Le Gbe Ƒã Ðem Yehowa ƒe Fiaɖuƒe, eye woto ema dzi tsɔ bubu na mía Wɔla la kple eƒe Fiaɖuƒedziɖuɖua gbã. Le lɔlɔ̃ yeye si va su wo si na Yehowa me la, Yehowa Ðasefowo trɔ dzime le bubu si womanya tsɔ na eƒe ŋkɔ kple eƒe Fiaɖuƒe gã la hekafui o la ŋu.—Psalmo 106:6, 47, 48.

“Amesi Ke Ðu Dzi La”

13. (a) Yayra kae nɔ ŋgɔ na Efesotɔwo ne ‘woɖu dzi’? (b) Aleke Efeso Kristotɔwo awɔ ‘aɖu dzi’?

¹³ Mlɔeba la, abe alesi Yesu wɔe le eƒe gbedasi bubuawo mee ene la, ehe susu yi Mawu ƒe gbɔgbɔ dzi be eto Yesu dzi na wonya nuteƒewɔwɔ ƒe fetuwo. Egblɔ na Efesotɔawo bena: “Amesi ke to li nɛ la, nese nusi gbɔgbɔ la gblɔ na hameawo bena: Amesi ke ɖu dzi la, mana agbeti, si le Mawu ƒe Paradiso me la, ƒe kutsetsee, ne wòaɖu.” (Nyaɖeɖefia 2:7) Amesiwo si to senu le la adi vevie be yewoawɔ ɖe gbedasi vevi ma dzi, elabena wonya be metso Yesu ŋutɔ gbɔ o ke boŋ etso Aƒetɔ Fiagã Yehowa ŋutɔŋutɔ gbɔ to Eƒe gbɔgbɔ kɔkɔe alo dɔwɔŋusẽ dzi. Aleke woawɔ ‘aɖu dzi’? To Yesu, amesi wɔ nuteƒe vaseɖe ku me eyata wòte ŋu gblɔ be: “Miaƒe dzi nedze eme; nye la meɖu xexeame dzi,” la ƒe afɔɖoƒewo yome dzedze tututu dzi.—Yohanes 8:28; 16:33; kpɔ Yohanes I, 5:4 hã.

14. Nukae “Mawu ƒe Paradiso” si ŋu nya Yesu gblɔ la anye?

¹⁴ Esi anyigba dzi paradiso me nɔnɔ ƒe mɔkpɔkpɔ mele Kristotɔ amesiaminawo, abe Efesotɔ mawo ene, si o ta la, aleke wotsɔa “agbeti, si le Mawu ƒe Paradiso me la” ƒe kutsetse ɖuɖu wɔa teƒeɖoɖofetu na woe? Esia manye Paradiso si wogagbugbɔ ɖo anyigba dzi la o, elabena woƒle Kristotɔ amesiamina 144,000 siwo dome Efeso-hamea me tɔ mawo nɔ la tso ameƒomea me be woaɖu fia kple Alẽvi Kristo Yesu le dziƒo Zion-to la dzi abe gbɔgbɔmeviwo ene. (Efesotɔwo 1:5-12; Nyaɖeɖefia 14:1, 4) Eyata dziƒonutome si le abe abɔ ene si ƒe dome dziɖula siawo anyi la ŋutie wole nu ƒom le. “Le Mawu ƒe Paradiso me” afima, ẽ, le Yehowa ŋutɔ ŋkume ŋutɔŋutɔ la, aʋadziɖula siawo siwo wona makumakunyenyee la ayi edzi anɔ agbe tegbee, abe alesi wotsɔ agbetia ɖuɖu wɔ eƒe kpɔɖeŋue le afisia ene.

15. Nukatae Yesu ƒe dzideƒonya be woaɖu dzi la le vevie na ameha gã la egbea?

¹⁵ Ke amesiamina 144,000 la ƒe kpeɖeŋutɔ wɔnuteƒe siwo le anyigba dzi ya ɖe? Hati Ðasefo siawo ƒe ameha gã aɖe hã le aʋa dzi ɖum. Gake woƒe mɔkpɔkpɔe nye be yewoage ɖe anyigba dzi paradiso me, afisi yewoano “agbetsitɔsisi aɖe” me tsi eye yewoakpɔ dɔyɔyɔ tso ati siwo wodo ɖe tɔsisi ma to la “ƒe aŋgbawo” me. (Nyaɖeɖefia 7:4, 9, 17; 22:1, 2) Ne habɔbɔ sia me tɔe nenye la, wò hã ɖe lɔlɔ̃ si me dzo le si le asiwò na Yehowa la fia, eye naɖu dzi le xɔse ƒe aʋadziɖuɖu la me. To ema dzi la agbe mavɔ le Paradisonyigba la dzi ƒe dzidzɔkpɔkpɔ asu asiwò.—Tsɔe sɔ kple Yohanes I, 2:13, 14.

[Etenuŋɔŋlɔ]

[Aɖaka si le axa 36]

Yehowa Kple Via Kafukafu Lɔlɔ̃tɔe

Le hadzigbalẽ si Yehowa ƒe amewo ta le ƒe 1905 me la me la, ha siwo nɔ Yesu kafum la sɔ gbɔ wu esiwo nɔ Yehowa Mawu kafum la zi gbɔ zi eve. Le woƒe ƒe 1928 hadzigbalẽa me la, ha siwo nɔ Yesu kafum la ƒe agbɔsɔsɔme sɔ kple esiwo nɔ Yehowa kafum la tɔ. Gake le yeyetɔ si nye ƒe 1984 hadzigbalẽa me la, hadzidzi siwo kafua Yehowa la sɔ gbɔ wu esiwo kafua Yesu la zi gbɔ zi ene. Esia wɔ ɖeka kple Yesu ŋutɔ ƒe nyawo be: “Fofo [la] lolo wum.” (Yohanes 14:28) Ele be Yehowa-lɔlɔ̃ naƒo ɖesiaɖe ta eye lɔlɔ̃ deto na Yesu kple ŋudzedze kpɔkpɔ ɖe eƒe vɔsa xɔasi kple eƒe nɔƒe abe Mawu ƒe Nunɔlagã kple Fia ene ŋu nakpe ɖe eŋu.

[Nyaɖoɖo si le 34]

Mɔ si dzi Yesu To Ðo Aɖaŋu

(Nyaɖeɖefia ƒe tawo kple kpukpuiwoe míeyɔ)

Ŋusẽ si dzi Egblɔ Ðɔɖɔɖonya Yayra

Efeso 2:1 2:2, 3 2:4 2:5, 6 2:7

Smirna 2:8 2:9 — 2:10 2:11

Pergamo 2:12 2:13 2:14, 15 2:16 2:17

Tiatira 2:18 2:19 2:20, 21 2:24, 25 2:26-28

Sardes 3:1 — 3:1, 2 3:3, 4 3:5

Filadelfia 3:7 3:8 — 3:8-11 3:12

Laodikea 3:14 — 3:15-17 3:18-20 3:21