Exlẽlawo Bia Be . . .

Nu Kae Nye Harmagedon?

▪ Le ame geɖe gome la, ne wose nya “Harmagedon” la, woƒe susu yia afɔku aɖe si me ame gbogbo aɖewo atsrɔ̃ le dzi, abe nukliaʋa, xexea me katã ƒe dzɔdzɔmefɔku, alo kura gɔ̃ hã, be xexea me ƒe dzoxɔxɔ ava wɔe be nu nagblẽ le anyigba ŋu vevie. Ale si wozãe le Biblia me la meku ɖe nu mawo dometɔ aɖeke ŋu o. Ekema nu kae Harmagedon, si ŋu Biblia ƒo nu tsoe la, nye?

Nya “Harmagedon” dze le Biblia gbalẽ si nye Nyaɖeɖefia me. Eku ɖe aʋa tɔxɛ aɖe ŋu, enye “Mawu Ŋusẽkatãtɔ la ƒe ŋkeke gã la ƒe aʋawɔwɔ” si me woaƒo “anyigba blibo la dzi fiawo” nu ƒu hena aʋa mamlɛtɔ wɔwɔ kple Mawu. Wohe susu yi aʋa sia dzi zi geɖe le mawunyakpukpui bubuwo hã me.—Nyaɖeɖefia 16:14-16; Xezekiel 38:22, 23; Yoel 4:12-14; Luka 21:34, 35; 2 Petro 3:11, 12.

Nu kawoe ayi edzi le aʋa sia me? Woƒo nu tso eŋu le kpɔɖeŋunyagbɔgblɔ me le Nyaɖeɖefia ƒe agbalẽa me ale: “Anyigba dzi fiawo kple woƒe aʋakɔwo [ƒo] ƒu, be yewoawɔ aʋa kple ame si bɔbɔ nɔ anyi ɖe sɔ la dzi kple eƒe aʋakɔ la.” “Ame si bɔbɔ nɔ anyi ɖe sɔ la dzi” lae nye Mawu Vi, Yesu Kristo, ame si Mawu tia be wòanɔ ŋgɔ na mawudɔlawo ƒe aʋakɔ gã aɖe be woawɔ aʋa aɖu Mawu ƒe futɔwo dzi. (Nyaɖeɖefia 19:11-16, 19-21) Yeremiya 25:33 ƒo nu tso ame mavɔ̃mawu siwo atsrɔ̃ la ƒe agbɔsɔsɔ ŋu. Egblɔ be: “Yehowa ƒe ame siwo wòwu le ŋkeke ma me la, woanɔ anyi tso anyigba ƒe mlɔenu ɖaseɖe anyigba ƒe mlɔenu.”

Nu ka tae wòle be woawɔ Harmagedon ʋaa ɖo? Dukɔwo gbe be yewomabɔbɔ ɖe Mawu ƒe dziɖulanyenye te o, eye wole woawo ŋutɔwo ƒe dziɖuɖuwo dom ɖe ŋgɔ. (Psalmo 24:1) Woƒo nu tso woƒe aglãdzedzea ŋu le Psalmo 2:2 ale: “Anyigba dzi fiawo tso, eye amegãwo ƒo takpli ɖe adaŋu me ɖe Yehowa kple eƒe amesiamina ŋu.”

Eya ta aglãdzela siawo va le abe sesẽnuxɔla siwo tsɔ ame aɖe ƒe nunɔamesi wɔ wo tɔe. Gake mese ɖe afi ma o, wole ezãm madzemadzee hele edome gblẽm hã. Egbea, dukɔwo le anyigba gblẽm hele ɖi ƒomee. Mawu ƒe Nyaa gblɔ nɔnɔme wɔnublanui sia ŋu nya ɖi ale: ‘Dukɔwo do dɔmedzoe, eye [Mawu] ŋutɔ ƒe dɔmedzoe ho.’ Eyome Mawu ahe “gbegblẽ ava ame siwo le anyigba la gblẽm la dzi.” (Nyaɖeɖefia 11:18) Mawu ɖoe be yeato Harmagedon ʋa la dzi akpɔ nya si ku ɖe ame si dze aɖu ameƒomea katã dzi ƒe nya la gbɔ.—Psalmo 83:19.

Ɣekaɣie woawɔ Harmagedon ʋa la? Mawu Vi la gblɔ tẽe be: “Le ŋkeke ma kple gaƒoƒo ma ŋuti la, ame aɖeke menyae o, mawudɔla siwo le dziƒo la menyae o, eye Vi la hã menyae o, negbe Fofo la ko.” (Mateo 24:36) Ke hã, esi Fia Aʋawɔla Yesu Kristo nɔ nu ƒom tso Harmagedon ŋu la, etsɔ nuxlɔ̃amenya sia kpee be: “Kpɔ ɖa! Megbɔna abe fiafitɔ ene. Dzidzɔtɔe nye ame si nɔa ŋudzɔ.” (Nyaɖeɖefia 16:15) Eya ta Kristo ƒe anyinɔɣia mee woawɔ xexea me katã ƒe aʋa sia, eye Biblia me nyagblɔɖiwo ɖo kpe edzi be ɣeyiɣi ma mee míele fifia.

Ame siwo ɖoe be nu vɔ̃ɖi wɔwɔ dzi ko yewoanɔ la koe woatsrɔ̃ le Harmagedon me, eye “ameha gã aɖe” atsi agbe le aʋa sia me. (Nyaɖeɖefia 7:9-14) Woakpɔ nya siawo me vava teƒe: “Ekpɔtɔ vie ko ame vɔ̃ɖi la maganɔ anyi o, eye ne èɖe ŋku ɖe eteƒe la, màgakpɔe o. Ke ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.”—Psalmo 37:10, 11.

[Nya si ɖe dzesi si le axa 10]

“Ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti”