Mɔkpɔkpɔ si Ŋu Kakaɖedzi Le

“Ne wonya dzi amegbetɔ ko la, ate ŋu adzɔ ɣesiaɣi be wòaku le ɣeyiɣi ɖesiaɖe me; eye godoo la, nusia si ate ŋu adzɔ la ava eme.”—ARNOLD TOYNBEE, BRITAINTƆ ŊUTINYAŊLƆLA.

 1. Nuka ƒe dzɔdzɔe wòhiã be ameƒomea naxɔ nenema ko, eye biabia kawoe esia fɔ ɖe te?

AMEKAE ate ŋu ake ɖi ŋutinya me nyateƒe matrɔmatrɔ sia si wogblɔ ɖe etame la? Ehiãna ɣesiaɣi be ameƒomea naxɔ nu dziŋɔ si ku nye la nenema ko. Eye aleke gbegbe míesenɛ le mía ɖokui me be wɔna aɖeke mele mía ŋu o ne míaƒe ame vevi aɖe ku! Ne edzɔ nenema la, ewɔna na mí be míagate ŋu akpɔ amesi bu ɖe mí la akpɔ gbeɖe o. Ðe wòanya wɔ be míagawɔ ɖeka kple míaƒe ame vevi siwo kua? Mɔkpɔkpɔ kae le Biblia me na ame kukuwo? Bu nudzɔdzɔ si gbɔna ŋu kpɔ.

‘Mía Xɔlɔ̃ la Ku’

2-5. (a) Esi Yesu xɔlɔ̃ Lazaro ku la, aleke wòɖe eƒe lɔlɔ̃ faa kple ŋutete be yeafɔe ɖe tsitre fiae? (b) Tsɔ kpe ɖe agbe si wogbɔ Lazaro ŋu la, nuka hãe tsitretsitsi ƒe nukunua wɔ?

² Ƒe 32 M.Ŋ. mee. Lazaro kple nɔvianyɔnu Marta kpakple Maria wonɔ duvi si nye Betania si didi tso Yerusalem gbɔ kilometa 3 la me. Wonye Yesu xɔlɔ̃ veviwo. Gbeɖeka Lazaro dze dɔ vevie. Enumake nɔvianyɔnu siwo tsi dzi ɖe eŋu la ɖo du ɖe Yesu, amesi nɔ Yordan Tɔsisia godo. Yesu lɔ̃ Lazaro kple nɔvianyɔnuwo, eyata le ɣeyiɣi aɖe megbe la, edze mɔ yina Betania. Esi wonɔ mɔ dzi la, Yesu gblɔ na eƒe nusrɔ̃lawo be: “Mía xɔlɔ̃ Lazaro le alɔ̃ dɔm; gake la meyina, bena maɖanyɔe atso alɔ̃ me.” Esi Yesu ƒe nusrɔ̃lawo mese nya sia gɔme enumake o ta la, eʋu eme na wo be: “Lazaro ku.”—Yohanes 11:1-15.

³ Esi Marta se be Yesu gbɔna Betania la, eƒu du yi ɖakpee. Eƒe konyifafa wɔ nublanui na Yesu wòna kakaɖedzii be: “Nɔviwò la atsi tre.” Marta ɖo eŋu be: “Menyae bena, atsi tre le tsitretsitsi la me le nuwuwuŋkeke la dzi.” Yesu gblɔ nɛ azɔ be: “Nyee nye tsitretsitsi la kple agbe la; amesi xɔa dzinye sena la, ne eku hã la, anɔ agbe.”—Yohanes 11:20-25.

⁴ Emegbe Yesu yi yɔdoa gbɔ eye wògblɔ be woakɔ kpe si wotsɔ ɖo doa nu ɖa. Esi wòdo gbe ɖa sesĩe vɔ megbe la, egblɔ kple ŋusẽ be: “Lazaro lee, do go!” Eye Lazaro do go nyateƒe, esi amesiame fɔ ŋku ɖe yɔdoa dzi. Yesu fɔ Lazaro ɖe tsitre—egbɔ agbe ŋutsu si ku ŋkeke ene la!—Yohanes 11:38-44.

⁵ Marta xɔ tsitretsitsi ƒe ŋugbedodoa dzi se xoxo. (Yohanes 5:28, 29; 11:23, 24) Agbe si wogbɔ Lazaro nukutɔe la gado ŋusẽ eƒe xɔse eye wòna ame bubuwo hã xɔe se. (Yohanes 11:45) Gake nuka tututue nya “tsitretsitsi” fia?

“Atsi Tre”

 6. Nya “tsitretsitsi” gɔme ɖe?

⁶ Helagbe me nya a·naʹsta·sis, si gɔme ŋutɔŋutɔe nye “tsotso ake” la mee woɖe nya “tsitretsitsi” gɔme tsoe. Hebritɔ siwo nye Helagbegɔmeɖelawo zãa Hebrigbe me nya siwo nye techi·yathʹ ham·me·thimʹ si gɔmee nye “ame kuku fɔfɔ ɖe tsitre” tsɔ ɖea nya a·naʹsta·sis gɔmee.a Eyata tsitretsitsi fia be woafɔ ame tso ku si nye agbemanɔmanɔ la me—be woagana ame nanɔ agbe abe alesi wònɔe va yi ene.

 7. Nukata amewo fɔfɔ ɖe tsitre menye kuxi aɖeke na Yehowa Mawu kple Yesu Kristo o?

⁷ Esi seɖoƒe meli na Yehowa Mawu ƒe nunya o eye eƒe ŋkuɖoɖonudzi de blibo ta la, ate ŋu afɔ ame ɖe tsitre bɔbɔe. Ŋkuɖoɖo alesi amesiwo ku nɔ agbee—woƒe amenyenye, woƒe agbemenyawo, kple nusiwo katã ku ɖe amesi ƒomevi wonye ŋuti—dzi menye kuxi aɖeke nɛ o. (Hiob 12:13; tsɔe sɔ kple Yesaya 40:26.) Agbedzɔƒe hãe Yehowa nye. Eyata ate ŋu agbɔ agbe ame ma ke bɔbɔe ahatsɔ amenyenye ma ke nɛ le ŋutilã yeye me. Tsɔ kpe ɖe eŋu la, Yesu Kristo lɔ̃ faa be yeafɔ ame kukuwo ɖe tsitre eye ate ŋui hã, abe alesi Lazaro ƒe nya la ɖee fiae ene.—Tsɔe sɔ kple Luka 7:11-17; 8:40-56.

8, 9. (a) Nukata tsitretsitsia mesɔ ɖe luʋɔ makumaku dzixɔsea nu o? (b) Nukae woatsɔ akpɔ ku ƒe kuxia gbɔe?

⁸ Gake tsitretsitsi si nye Ŋɔŋlɔawo me nufiafia la mesɔ ɖe luʋɔ makumaku nufiafia la nu o. Ne luʋɔ si mekuna o yia edzi nɔa agbe le ku megbe la, ke mahiã be woafɔ ame aɖeke ɖe tsitre, alo agbɔ agbee o. Le nyateƒe me la, Marta megblɔ nya aɖeke le luʋɔ makumaku si nɔ agbe le teƒe bubu aɖe le ku megbe ŋu o. Mexɔe se be Lazaro dzo yi gbɔgbɔxexe aɖe me xoxo be wòayi edzi anɔ agbe le afima o. Ke boŋ eɖee fia be yexɔ ŋugbe si Mawu do be yeaɖe nu gbegblẽ siwo ku hena vɛ ɖa la dzi se. Egblɔ be: “Menyae bena, atsi tre le tsitretsitsi la me le nuwuwuŋkeke la dzi.” (Yohanes 11:23, 24) Nenema ke Lazaro ŋutɔ hã megblɔ agbenɔnɔ le ku megbe ƒe nuteƒekpɔkpɔ aɖeke o. Mekpɔ naneke aƒo nu tso eŋu o.

⁹ Abe alesi Biblia gblɔe ene la, edze ƒã be luʋɔ kuna eye tsitretsitsi dzie woato aɖe ame tso ku me. Gake ame biliɔn geɖe ku tso esime ame gbãtɔ Adam nɔ anyigba dzi. Eyata amekawoe woafɔ ɖe tsitre, eye afikae woafɔ ayi?

“Amesiwo Katã Le Ŋkuɖodziyɔdowo Me”

10. Ŋugbe kae Yesu do le amesiwo le ŋkuɖodziyɔdowo me ŋu?

¹⁰ Yesu Kristo gblɔ be: “Gaƒoƒo la gbɔna, le esi me amesiwo katã le ŋkuɖodziyɔdowo me la, woase [Yesu ƒe] gbe, eye woado go.” (Yohanes 5:28, 29, NW) Ẽ, Yesu Kristo do ŋugbe be woafɔ amesiwo katã le Yehowa ƒe susu me ɖe tsitre. Ame biliɔn geɖe nɔ agbe heku. Wo dometɔ kawoe le Mawu ƒe susu me, siwo woafɔ ɖe tsitre?

11. Amekawoe woafɔ ɖe tsitre?

¹¹ Woafɔ Yehowa subɔla siwo wɔ nu dzɔdzɔe la ɖe tsitre. Gake ame miliɔn bubu geɖe ku siwo meɖee fia nenye be woanɔ agbe ɖe Mawu ƒe dzidzenu dzɔdzɔewo nu o. Womenya Yehowa ƒe nudidiwo o loo alo womete ŋu kpɔ ɣeyiɣi tsɔ wɔ tɔtrɔ siwo hiã o. Amesiawo hã le Mawu ƒe susu me eye le ema ta woafɔ wo ɖe tsitre, elabena Biblia do ŋugbe be: “Tsitretsitsi li na ame dzɔdzɔewo kple ame madzɔmadzɔwo siaa.”—Dɔwɔwɔwo 24:15.

12. (a) Ŋutega kae wona apostolo Yohanes kpɔ le tsitretsitsia ŋu? (b) Nukawoe wotsɔ “ƒu gbe ɖe dzota la me,” eye nukae nyagbɔgblɔ ma fia?

¹² Apostolo Yohanes kpɔ ŋutega dodzidzɔname aɖe le amesiwo wofɔ ɖe tsitre siwo nɔ Mawu ƒe fiazikpui la ŋgɔ ŋu. Esi wònɔ nu ƒom tso wo ŋu la, eŋlɔ bena: “Atsiaƒu ɖe ame kuku, siwo le eme la, hena, eye ku kple tsiẽƒe woɖe ame kuku, siwo le wo si la, hena, eye wodrɔ̃ ʋɔnu amesiame ɖe eƒe dɔwɔwɔwo nu. Eye wotsɔ ku kple tsiẽƒe ƒu gbe ɖe dzota la me. Dzota sia enye ku evelia.” (Nyaɖeɖefia 20:12-14) Bu nusi wòfia ŋu kpɔ! Woaɖe ame kuku siwo katã le Mawu ƒe susu me tso Hades, alo Sheol, si nye ameƒomea ƒe yɔdo la me. (Psalmo 16:10; Dɔwɔwɔwo 2:31) Azɔ woatsɔ “ku kple tsiẽƒe” aƒu gbe ɖe nusi woyɔna be “dzota,” si nye tsɔtsrɔ̃ mavɔ ƒe kpɔɖeŋu la me. Ameƒomea ƒe yɔdo maganɔ anyi azɔ o.

Woafɔ Wo Ayi Afika?

13. Nukata Mawu wɔ ɖoɖo na ame aɖewo be woafɔ wo ayi dziƒo, eye ŋutilã ka ƒomevie Yehowa ana wo?

¹³ Woafɔ ŋutsu kple nyɔnu ʋee aɖewo woava nɔ agbe le dziƒo. Amesiawo aɖu dzi kple Kristo anye fiawo kple nunɔlawo eye woakpɔ gome le nu gbegblẽ siwo ku si ƒe dome ameƒomea nyi tso ame gbãtɔ Adam gbɔ he vɛ la ɖeɖeɖa me. (Romatɔwo 5:12; Nyaɖeɖefia 5:9, 10) Biblia gblɔ be ame 144,000 ko wonye eye wotia wo tso Kristo yomedzelawo dome, eye apostolo nuteƒewɔlaawo dzie wòdze egɔme tsoe. (Luka 22:28-30; Yohanes 14:2, 3; Nyaɖeɖefia 7:4; 14:1, 3) Yehowa ana gbɔgbɔŋutilã amesiawo siwo woafɔ ɖe tsitre la dometɔ ɖesiaɖe ale be woate ŋu anɔ dziƒo.—Korintotɔwo I, 15:35, 38, 42-45; Petro I, 3:18.

14, 15. (a) Agbe ka tɔgbe woafɔ amesiwo ku ƒe akpa gãtɔ be woava nɔ? (b) Yayra kawoe ameƒomea me tɔ toɖolawo akpɔ?

¹⁴ Gake woafɔ amesiwo ku ƒe akpa gãtɔ woava nɔ agbe le anyigba dzi. (Psalmo 37:29; Mateo 6:10) Anyigba ka tɔgbe dzi? Egbea mamã, ʋukɔkɔɖi, ɖiƒoƒo nuwo, kple adãnuwɔwɔ ye xɔ anyigba dzi. Ne woagbɔ agbe ame kukuwo va anyigba sia tɔgbe dzi la, ke godoo la, ɣeyiɣi kpui aɖe koe dzidzɔ ɖesiaɖe si woakpɔ anɔ anyi ase ɖo. Gake Wɔla la do ŋugbe be yeahe fifi xexemenuɖoanyi si le Satana ƒe ŋusẽ te la ava nuwuwui kpuie. (Lododowo 2:21, 22; Daniel 2:44) Amegbetɔƒome yeye si le dzɔdzɔe—si nye “anyigba yeye”—anɔ anyi ɣemaɣi. (Petro II, 3:13) Ɣemaɣi la, “duametɔ aɖeke magblɔ be, yele dɔ lém o.” (Yesaya 33:24) Woaɖe nuxaxa si ku dona na ame hã ɖa, elabena Mawu “latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.”—Nyaɖeɖefia 21:4.

¹⁵ Le Mawu ƒe xexe yeye si ŋugbe wodo me la, “dzi adzɔ” ame fafawo “ɖe ŋutifafa gbogbo la ŋuti.” (Psalmo 37:11) Kristo Yesu kple ehati ame 144,000 ƒe dziƒodziɖuɖu la akplɔ ameƒome toɖolawo aɖo blibodede si mía dzila gbãtɔ siwo nye Adam kple Xawa bu la gbɔ vivivi. Amesiwo woafɔ ɖe tsitre hã anɔ anyigbadzinɔlaawo dome.—Luka 23:42, 43.

16-18. Dzidzɔ kae tsitretsitsia ahe vɛ na ƒomewo?

¹⁶ Biblia ƒo nu tso dzidzɔ si tsitretsitsia ahe vɛ na ƒomewo la ŋu. Kpɔ dzidzɔ si ahosi si nɔ Nain la kpɔ esime Yesu tɔ te amesiwo tsɔ ame kuku aɖe yina ɖiɖi ge eye wòfɔ viaŋutsu ɖekɛ la ɖe tsitre la ɖa le susu me! (Luka 7:11-17) Emegbe esime Yesu fɔ nyɔnuvi aɖe si xɔ 12 ɖe tsitre le afisi te ɖe Galilea Ƒua ŋu la, edzilawo ‘lulu.’—Marko 5:21-24, 35-42; kpɔ Fiawo I, 17:17-24 hã; Fiawo II, 4:32-37.

¹⁷ Le ame miliɔn geɖe siwo dɔ alɔ̃ le ku me fifia gome la, woafɔ wo ɖe tsitre woava nɔ agbe le ŋutifafa ƒe xexeme yeye aɖe me. Wò ya bu mɔkpɔkpɔ dodzidzɔname si esia anye na Tommy kple asitsala siwo ŋu nya míegblɔ le agbalẽ gbadza sia ƒe gɔmedzedze la ŋu kpɔ! Ne wofɔ Tommy be wòava nɔ agbe le Paradiso me le anyigba dzi la, Tommy ma ke si dadaa nya lae wòanye—gake dɔlélewo maganɔ eŋu o. Dadaa ate ŋu aka asi eŋu, awɔ atuu nɛ, ahalɔ̃e. Nenema ke le esi teƒe be asitsala si tso India la natsi gbugbɔgadzɔ kple ku si kplɔ wo nɔewo ɖo matɔmatɔe me la, mɔkpɔkpɔ li be afɔ le Mawu ƒe xexe yeyea me eye wòagakpɔ viaŋutsuawo.

¹⁸ Nyateƒea nyanya le luʋɔ ŋu, le nusi dzɔna ɖe mía dzi ne míeku ŋu, kple le tsitretsitsi ƒe mɔkpɔkpɔa ŋu ate ŋu akpɔ ŋusẽ ɖe amesiwo le agbe fifia hã dzi vevie. Mina míakpɔ alesi wòdzɔnae ɖa.

[Etenuŋɔŋlɔwo]

[Nɔnɔmetata si le axa 26]

Tsitretsitsia ahe dzidzɔ si anɔ anyi ɖaa vɛ