Ta 42
Dziƒo Yeye Kple Anyigba Yeye
1. Nuka ŋue Yohanes ƒo nu le esime mawudɔla la kplɔe yi Ƒe Akpe Ðeka Dziɖuɖua ƒe gɔmedzedze me?
ŊUTIKƆKƆEŊUTEGA sia me le kɔkɔm ɖe edzi esi mawudɔla la kplɔ Yohanes yi Ƒe Akpe Ðeka Dziɖuɖua ƒe gɔmedzedze mee. Nuka ŋue wòƒo nu le? “Eye mekpɔ dziƒo yeye kple anyigba yeye; elabena gbã dziƒo kple gbã nyigba la nu va yi, eye atsiaƒu megali o.” (Nyaɖeɖefia 21:1) Nukpɔkpɔ lédziname aɖe dze!
2. (a) Aleke Yesaya ƒe nyagblɔɖi si ku ɖe dziƒo yeye kple anyigba yeye ŋu la va eme ɖe Yudatɔ siwo wogbugbɔ ɖo anyi le ƒe 537 D.M.Ŋ. me la dzie? (b) Aleke míewɔ nya be Yesaya ƒe nyagblɔɖia me vava bubu aganɔ anyi, eye aleke ŋugbedodo sia ava emee?
2 Ƒe alafa geɖe do ŋgɔ na Yohanes ŋɔli la, Yehowa gblɔ na Yesaya be: “Elabena kpɔ ɖa, mawɔ dziƒo yeye kple anyigba yeye, eye womagaɖo ŋku tsãtɔwo dzi, alo woava ame ƒe ta me o.” (Yesaya 65:17; 66:22) Nyagblɔɖi sia va eme esime Yudatɔ anukwareɖilawo trɔ gbɔ va Yerusalem le ƒe 537 D.M.Ŋ. me, le ƒe 70 ƒe aboyomenɔnɔ le Babilon megbe. Le gbugbɔɖoanyi ma me la, wonye amewo ƒe habɔbɔ si ŋuti wokɔ, si nye “anyigba yeye,” si le dziɖuɖu ƒe nuɖoanyi yeye alo “dziƒo yeye,” te. Gake apostolo Petro fia asi nyagblɔɖi ma me vava bubu esi wògblɔ be: “Ke míele dziƒo yeye kple anyigba yeye, siwo me dzɔdzɔenyenye anɔ la, lalam le eƒe ŋugbedodo la nu.” (Petro II, 3:13) Azɔ Yohanes ɖee fia be ŋugbedodo sia va eme le Aƒetɔ la ƒe ŋkekea me. “Gbã dziƒo la kple gbã nyigba la,” Satana ƒe nuɖoanyia kple eƒe dziɖuɖuɖoɖo si dzi Satana kple eƒe gbɔgbɔ vɔ̃wo kpɔ ŋusẽ ɖo, nu ayi. Ameƒome vɔ̃ɖi dzeaglã la ƒe “atsiaƒu” dzeagbo la maganɔ anyi o. Ke boŋ “dziƒo yeye kple anyigba yeye”—amewo ƒe habɔbɔ yeye si le dziɖuɖu yeye si nye Mawu ƒe Fiaɖuƒea te—axɔ ɖe eteƒe.—Tsɔe sɔ kple Nyaɖeɖefia 20:11.
3. (a) Nuka ŋue Yohanes ƒo nu le, eye nukae nye Yerusalem Yeye la? (b) Aleke Yerusalem Yeyea ‘ɖi tso dziƒoe’?
3 Yohanes yi edzi be: “Eye mekpɔ du kɔkɔe, si nye Yerusalem yeye la, le ɖiɖim tso dziƒo tso Mawu gbɔ, eye wodzrae ɖo abe ŋugbetɔ, si wowɔ leke na hena srɔ̃a ene.” (Nyaɖeɖefia 21:2) Yerusalem Yeyea ye nye Kristo ƒe ŋugbetɔ, si me tɔwoe nye Kristotɔ amesiamina siwo yi anukwareɖiɖi dzi yiɖase ɖe ku me eye wofɔ wo ɖe tsitre be woanye fiawo kple nunɔlawo kple Yesu si ŋuti wokɔ la. (Nyaɖeɖefia 3:12; 20:6) Abe alesi anyigba dzi Yerusalem zu dziɖuɖu ƒe nɔƒe le blema Israel ene la, nenema ke Yerusalem Yeye dzeani la kple eƒe Ŋugbetɔsrɔ̃ la nye nuɖoanyi yeyea ƒe dziɖuɖue. Esiae nye dziƒo yeye la. ‘Ŋugbetɔ la ɖi tso dziƒo,’ menye le nya la ƒe gɔmesese nu ŋutɔŋutɔ o, ke boŋ le gɔmesese sia nu be etrɔ eƒe susu ɖe anyigba la ŋu. Alẽvi la ƒe ŋugbetɔa anye eƒe kpeɖeŋutɔ wɔnuteƒe le dziɖuɖu dzɔdzɔe si aɖu ameƒomea katã dzi la nyenye me. Esia anye yayra na anyigba yeye la vavã!
4. Ŋugbe kae Mawu do si ɖi esi wòdo na Israel-dukɔ si woɖo anyi yeyee la?
4 Yohanes gayi edzi gblɔ na mí be: “Eye mese gbe gã aɖe tso fiazikpui la gbɔ le gbɔgblɔm bena: Kpɔ ɖa, Mawu ƒe agbadɔ la le amewo gbɔ, eye wòanɔ anyi kpli wo, eye woawo hã woanye eƒe dukɔ, eye Mawu ŋutɔ anɔ anyi kpli wo.” (Nyaɖeɖefia 21:3) Esi Mawu wɔ Se ƒe nubabla la kple Israel si nye dukɔ yeye ɣemaɣi la, edo ŋugbe be: “Maɖo nye nɔƒe ɖe mia dome, eye nyemanyɔ ŋu mi o. Mazɔ mia dome, eye manye miaƒe Mawu, eye miawo mianye nye dukɔ.” (Mose III, 26:11, 12) Azɔ Yehowa le ŋugbe ma tɔgbe ke dom na anukwareɖilawo. Le ƒe akpe ɖeka Ʋɔnudrɔ̃ŋkekea me la, woava zu dukɔ tɔxɛ vevi aɖe nɛ.
5. (a) Aleke Mawu anɔ anyi kple ameƒomea le Ƒe Akpe Ðeka Dziɖuɖua mee? (b) Aleke Mawu anɔ ameƒomea domee le Ƒe Akpe Ðeka Dziɖuɖua megbe?
5 Le Ƒe Akpe Ðeka Dziɖuɖua me la, Yehowa “anɔ” ameƒomea dome le ɖoɖo si wowɔ si anɔ anyi va de asi na ɣeyiɣi aɖe, si me Via, Fia Yesu Kristo le eteƒe la me. Gake le Ƒe Akpe Ðeka Dziɖuɖua ƒe nuwuwu la, ne Yesu tsɔ Fiaɖuƒea de asi na Fofoa la, fia si anye eteƒenɔla, alo domenɔla magahiã o. Yehowa anɔ anyi kple eƒe “dukɔ” la tẽ yi mavɔmavɔ me. (Tsɔe sɔ kple Yohanes 4:23, 24.) Mɔnukpɔkpɔ deŋgɔ kae nye si na ameƒomea si wogbugbɔ ɖo anyi la!
6, 7. (a) Ŋugbedodo kae Yohanes ɖe fia, eye amekawoe eƒe yayrawo aɖe vi na? (b) Aleke Yesaya ƒo nu le gbɔgbɔ me paradiso kple ŋutilã me tɔ siaa ŋue?
6 Yohanes yi edzi be: “Eye Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.” (Nyaɖeɖefia 21:4) Wona míegaɖo ŋku ŋugbedodo siwo tso gbɔgbɔ me siwo do ŋgɔ la dzi ake. Yesaya hã kpɔ mɔ na ɣeyiɣi si me ku kple konyifafa maganɔ anyi o eye aseyetsotso axɔ ɖe nuxaxa teƒe la. (Yesaya 25:8; 35:10; 51:11; 65:19) Yohanes ɖo kpe edzi azɔ be ŋugbedodo siawo ava eme le mɔ wɔnuku aɖe nu le ƒe akpe ɖeka Ʋɔnudrɔ̃ŋkekea me. Gbã, ameha gã la ase vivi le yayra siawo me. “Alẽvi, si le fiazikpui la titina” ayi edzi anɔ be lém na wo eye “wòakplɔ wo ayi agbetsi dzidziwo gbɔ, eye Mawu atutu aɖatsiwo katã ɖa le woƒe ŋkuwo me.” (Nyaɖeɖefia 7:9, 17) Gake mlɔeba la, amesiwo katã wofɔ ɖe tsitre eye woɖe xɔse fia ɖe Yehowa ƒe mɔnuɖoɖowo me hã anɔ anyi kpli wo eye woase vivi le paradiso si nye gbɔgbɔmetɔ kple ŋutilãmetɔa siaa me.
7 Yesaya gblɔ be: “Ekema ŋkuagbãtɔwo ƒe ŋku aʋu, eye tokunɔwo ƒe to aʋu.” Ẽ, “ekema xɔdrɔ̃wo ati kpo abe zi ene, eye aɖetututɔwo ƒe aɖe atso aseye.” (Yesaya 35:5, 6) Le ɣemaɣi hã “woatu xɔ anɔ eme, eye woade weingble aɖu eme kutsetse. Womatu xɔ ame bubu nanɔ eme o, eye womaƒã nu ame bubu naɖu o; elabena nye dukɔ atsi, abe alesi ati tsinae ene, eye nye ame tiatiawo aɖu woawo ŋutɔ ƒe asinudɔwɔwɔwo.” (Yesaya 65:21, 22) Eyata womaho wo ɖa le anyigba la dzi o.
8. Nukae Yehowa ŋutɔ gblɔ tso alesi míate ŋu aɖo ŋu ɖe ŋugbedodo nyui siawo ŋue la ŋu?
8 Gbaɖegbe ƒe nukpɔkpɔ dzeani kawoe nye si yɔ míaƒe susu me esi míele ŋugble dem le ŋugbedodo siawo ŋu! Mɔnuɖoɖo wɔnukuwo li na ameƒome ɖianukware la le dziƒodziɖuɖua si lɔ̃a ame la te. Ðe ŋugbedodo siawo wɔ nuku akpa be woanye nyateƒea? Ðe wonye amegã ɖeɖi aɖe si le aboyo me le Patmos-ƒukpo dzi la ƒe drɔ̃e aɖe koa? Yehowa ŋutɔ ɖo eŋu be: “Eye amesi bɔbɔ nɔ fiazikpui dzi la, gblɔ bena: Kpɔ ɖa, mewɔ nuwo katã yeye! Eye wògblɔ be: Ŋlɔe, elabena nya siawo nye nya vavãwo kple nyateƒenyawo. Eye wògblɔ nam bena: Eva ve me! Nyee nye Alfa kple Omega, gɔmedzedze kple nuwuwu.”—Nyaɖeɖefia 21:5, 6a.
9. Nukatae míate ŋu abu yayra siawo siwo gbɔna la be woava eme godoo?
9 Ðeko wòle abe ɖe Yehowa ŋutɔ le asi dem kakaɖedzinagbalẽ, alo kpeɖodzigbalẽ aɖe te ku ɖe yayra siawo siwo gbɔna la ŋu ene. Amekae aka tse ake ɖi Kakaɖedzinala sia? Ẽ, kakaɖedzi le Yehowa ƒe ŋugbedodo siawo ŋu ale gbegbe be wòƒo nu tso wo ŋu abe ɖe wova eme xoxo ene be: “Eva ve me!” Ðe menye Yehowa ye nye “Alfa kple Omega, . . . amesi li, eye wònɔ anyi, eye wòle vava ge, amesi nye ŋusẽkatãtɔ la” oa? (Nyaɖeɖefia 1:8) Eya tututue! Eya ŋutɔ gblɔ be: “Nyee nye gbãtɔ, eye nyee nye mlɔetɔ; mawu aɖeke mekpe ɖe ŋunye o.” (Yesaya 44:6) Esia ta ate ŋu ana woagblɔ nya ɖi eye wòana woƒe akpa sia akpa nava eme bliboe. Aleke gbegbee nye si wòdo ŋusẽ xɔsee! Eyata edo ŋugbe be: ‘Kpɔ ɖa, mele nuwo katã wɔm yeyee’! Le esi teƒe be míanɔ ɖi kem le nukunu siawo ŋu la, ele be míanɔ mía ɖokui biam boŋ be: ‘Nukae wòle be mawɔ anyi yayra mawo ƒe dome?’
“Tsi” na Tsikɔwuitɔwo
10. “Tsi” kawoe Yehowa le amewo nam, eye nuka ƒe kpɔɖeŋue wònye?
10 Yehowa ŋutɔe gblɔ be: “Amesi ke tsikɔ le ewum la, mana agbetsidzidzi la ƒe ɖee faa.” (Nyaɖeɖefia 21:6b) Bene woatsi tsikɔ ma nu la, ele be woatsɔ ɖe le gbɔgbɔmenuhiahiãwo me ahalɔ̃ faa axɔ “tsi” si Yehowa nana la. (Yesaya 55:1; Mateo 5:3) “Tsi” kae? Yesu ŋutɔ ɖo nya ma ŋu esime wònɔ ɖase ɖim na Samaria-nyɔnu aɖe le vudo to. Egblɔ nɛ be: “Amesi ke lano tsi, si nye manae ƒe ɖe la, tsikɔ megale eya wu ge akpɔ o vaseɖe mavɔmavɔ me; elabena tsi, si nye manae la, latrɔ azu tsivudo le eme, esi anɔ dzidzim ayi ɖe agbe mavɔ me.” “Agbetsidzidzi” ma dzi tso Mawu gbɔ to Kristo dzi abe eƒe mɔnuɖoɖo hena ameƒomea gbugbɔgaɖoanyi hena agbe deblibo nɔnɔ ene. Abe Samaria-nyɔnua ene la, aleke gbegbe nye si wòle be míadi vevie be míano tsidzidzi ma ƒe tsi wòaɖi kɔ na mí nyuie! Eye abe nyɔnu ma ene la, aleke gbegbe wòle be míalɔ̃ faa agblẽ xexemenudidiwo ɖi enye si eye míatsɔ nyanyuia gbɔgblɔ na amewo aɖo eteƒe!—Yohanes 4:14, 15, 28, 29.
Amesiwo Ðu Aʋa Dzi
11. Ŋugbe kae Yehowa do, eye amekawo ŋue nya siawo ku ɖo gbã?
11 Ele be amesiwo noa “tsi” fakɔname ma naɖu aʋa dzi hã, elabena Yehowa yi edzi gblɔ be: “Amesi ke ɖu dzi la, anyi nusiawo ƒe dome, eye manye eƒe Mawu, eye eya hã anye vinye.” (Nyaɖeɖefia 21:7) Ŋugbedodo sia ɖi esiwo dze le gbedasi siwo woɖo ɖe hame adreawo me la; eyata ele be nya siawo naku ɖe nusrɔ̃la siwo nye amesiaminawo ŋu gbã. (Nyaɖeɖefia 2:7, 11, 17, 26-28; 3:5, 12, 21) Le dzidzimeawo katã me la, Kristo ƒe gbɔgbɔmenɔviwo tsɔ didi vevie kpɔ mɔ na mɔnukpɔkpɔ si nye Yerusalem Yeyea me tɔ nyenye la. Ne woɖu aʋa dzi abe alesi Yesu ɖui ene la, woƒe mɔkpɔkpɔa asu wo si.—Yohanes 16:33.
12. Aleke Yehowa ana eƒe ŋugbedodo si le Nyaɖeɖefia 21:7 me la ava eme ɖe ameha gã la ŋue?
12 Ameha gã si tso dukɔwo katã me hã kpɔa mɔ na ŋugbedodo sia me vava. Ele be woawo hã naɖu aʋa dzi eye woasubɔ le nuteƒewɔwɔ me halase esime woado go tso xaxa gã la me. Ekema woayi ɖe woƒe domenyinyi, si nye anyigba, la me, esi nye ‘fiaɖuƒe si wodzra ɖo ɖi na wo tso xexeame ƒe gɔmeɖoɖoanyi me.’ (Mateo 25:34) Woyɔ amesiawo kple Aƒetɔ la ƒe alẽ bubu siwo le anyigba dzi siwo to dodokpɔ me do le ƒe akpe ɖeka la ƒe nuwuwu la be “ame kɔkɔewo.” (Nyaɖeɖefia 20:9) Woanɔ xɔlɔ̃wɔwɔ ƒe ƒomedodo kɔkɔe me kple wo Wɔla Yehowa Mawu, abe eƒe xexeame katã ƒe habɔbɔ me tɔwo ene.—Yesaya 66:22; Yohanes 20:31; Romatɔwo 8:21.
13, 14. Be míanyi Mawu ƒe ŋugbedodo wɔnukuawo ƒe dome la, nuwɔna kae wòle be míaɖoe kplikpaa be míatsri, eye nukatae?
13 Esi Yehowa Ðasefowo le mɔkpɔkpɔ wɔnuku sia lalam ta la, aleke gbegbe nye si wòle vevie fifiae be woanɔ kɔkɔe tso Satana ƒe xexeame ƒe ɖiƒoamenuwo si me! Ehiã be míali ke ahaɖo tame kplikpaa aka ɖe mía ɖokui dzi be Abosam mahe mí gbeɖe ade amesiwo ƒe nya Yehowa gblɔ le afisia la dome o, esi wògblɔ be: “Ke vɔvɔ̃nɔtɔwo kple dzimaxɔsetɔwo kple fewɔlawo kple hlɔ̃dolawo kple matrewɔlawo kple afakalawo kple trɔ̃subɔlawo kple aʋatsokalawo katã la woakpɔ wo tɔ gome le ta, si le bibim kple dzo kpakple dzokpe la me. Esia enye ku evelia.” (Nyaɖeɖefia 21:8) Ẽ, ele be amesi ava nye domenyila la natsri ŋunyɔnu siwo le nuɖoanyi xoxo sia me. Ele be wòaɖu dzi to alesi wòayi edzi alé anukwareɖiɖi me ɖe asi le amemiamia kple tetekpɔwo katã me la dzi.—Romatɔwo 8:35-39.
14 Togbɔ be Kristodukɔa gblɔna be yenye Kristo ƒe ŋugbetɔ hã la, ŋunyɔnu siwo Yohanes yɔ le afisia sɔŋ ye yɔ eme fũ. Eyata ayi ɖe tsɔtsrɔ̃ me vĩ kple Babilon Gã la ƒe akpa susɔeawo. (Nyaɖeɖefia 18:8, 21) Nenema ke amesiaminawo alo ameha gã la me tɔ siwo awɔ nu gbegblẽ siawo, alo adze eƒe dzi dede ƒo la hã adze ŋgɔ tsɔtsrɔ̃ mavɔ. Ne woyi nusiawo wɔwɔ dzi la, womanyi ŋugbedodoawo ƒe dome o. Eye le anyigba yeyea dzi la, woatsrɔ̃ amesiwo adze agbagba ato nuwɔna siawo vɛ la ɖa kaba ŋutɔ, woaku ku evelia si ŋu tsitretsitsimɔkpɔkpɔ mele o.—Yesaya 65:20.
15. Amekawoe ɖe dzesi be wonye aʋadziɖulawo, eye ŋutega kae he Nyaɖeɖefia yi eƒe taƒoƒo kɔkɔtɔ mee?
15 Amesiwo ɖe dzesi abe aʋadziɖulawo ene lae nye Alẽvi Yesu Kristo kple eƒe ŋugbetɔ 144,000 si nye Yerusalem Yeye la. Eyata aleke gbegbe wòsɔe nye si be woana Nyaɖeɖefia naɖo eƒe taƒoƒo kɔkɔtɔ kekeake gbɔ to nu ƒoƒo tso Yerusalem Yeye la ƒe nukpɔkpɔ dzeani si ƒo ɖesiaɖe ta ŋuti dzi zi mamlɛa! Yohanes ƒo nu tso ŋutega ɖeka si nye susɔea ŋu azɔ.
[Nɔnɔmetata siwo le axa 302]
Le anyigba yeye habɔbɔa me la, dzidzɔ ƒe dɔwɔna kple hadede anɔ anyi na amesiame