Ta Wuiɖekɛlia
Woɖe Mesia Ƒe Vavaɣi Fia
1. Esi Yehowa nye Gamedzinɔla Gãtɔ ta la, nuka dzie míate ŋu aka ɖo?
YEHOWAE nye Gamedzinɔla Gãtɔ. Eƒe asi mee ɣeyiɣi kple azãgbe siwo katã ku ɖe eƒe dɔwɔwɔ ŋu le. (Dɔwɔwɔwo 1:7) Nusiwo katã wòɖo be woadzɔ le ɣeyiɣi kple azãgbe siawo dzi ava eme godoo. Womado kpo emevava o.
2, 3. Nyagblɔɖi ka ŋue Daniel lé ŋku ɖo, eye fiaɖuƒe kae nɔ Babilon dzi ɖum ɣemaɣi?
2 Nyagblɔɖila Daniel, amesi srɔ̃a Ŋɔŋlɔawo vevie la, xɔe se be Yehowa ate ŋu aɖo nusiwo adzɔ eye wòana woava eme hã. Nyagblɔɖi siwo ku ɖe Yerusalem ƒe tsɔtsrɔ̃ ŋu koŋue nɔ vevie na Daniel. Yeremya ŋlɔ Mawu ƒe ɖeɖefia si ku ɖe ɣeyiɣi si du kɔkɔe la anye aƒedo ase ɖo ŋu la ɖi, eye Daniel dzro nyagblɔɖi sia me nyuie. Eŋlɔ bena: “Le [Axasweros] vi Dario, amesi tso Media-ƒome la me, eye wotsɔe ɖo fiae ɖe Kaldea-fiaɖuƒe la nu ƒe ƒe gbãtɔ me, le eƒe fiaɖuɖu ƒe ƒe gbãtɔ me la nye Daniel melé ŋku ɖe agbalẽwo me ɖe ƒe, siwo ŋu Yehowa ƒe gbe va na nyagblɔɖila Yeremya ɖo be, woanye ƒe blaadre ayi ɖe Yerusalem ƒe aƒedo ŋu la ƒe xexlẽme ŋu.”—Daniel 9:1, 2; Yeremya 25:11.
3 Mediatɔ Dario ye nɔ “Kaldea-fiaɖuƒe” la dzi ɖum ɣemaɣi. Nya si Daniel gblɔ ɖi esime wònɔ asinuŋɔŋlɔ si nɔ gli ŋu gɔme ɖem la va eme kaba le ɣeyiɣi kpui aɖe me. Babilonia Fiaɖuƒea meganɔ anyi o. “[Wotsɔe] na Mediatɔwo kple Persiatɔwo” le ƒe 539 D.M.Ŋ. me.—Daniel 5:24-28, 30; 6:1.
DANIEL ÐE KUKU NA YEHOWA ÐOKUIBƆBƆTƆE
4. (a) Nukae hiã ale be woakpɔ ɖeɖe tso Mawu gbɔ? (b) Aleke Daniel do ɖe Yehowa ŋkumee?
4 Daniel de dzesii be Yerusalem ƒe aƒedozuzu ƒe 70 la nɔ enu wum. Nukae wòagawɔ? Eya ŋutɔ gblɔ na mí be: “Tete metrɔ mo ɖe [Mawu vavã Yehowa, NW ] ŋu, ne matsɔ nutsitsidɔ, akpanyatata kple dzowɔ ado gbe ɖa, eye maƒo koko. Eye medo gbe ɖa na Yehowa, nye Mawu, heʋu nuvɔ̃ me.” (Daniel 9:3, 4) Dzi ƒe nɔnɔme nyuitɔ hiã hafi Mawu nakpɔ nublanui na wo aɖe wo. (Mose III, 26:31-46; Fiawo I, 8:46-53) Ehiã be woaɖe xɔse afia, woabɔbɔ wo ɖokui, eye woatrɔ dzime keŋkeŋ tso nuvɔ̃ siwo na woyi aboyo kple kluvinyenye me la me. Eyata Daniel do ɖe Mawu ŋkume ɖe wo detɔ wɔnuvɔ̃ la nu. Aleke wòwɔe? Etsi nu dɔ, exa nu, eye wòta akpanya tsɔ ɖe dzimetɔtrɔ kple dzimekɔkɔ fia.
5. Nukata Daniel te ŋu ka ɖe edzi be woana Yudatɔwo natrɔ yi wo denyigba dzi?
5 Yeremya ƒe nyagblɔɖia na mɔkpɔkpɔ Daniel, elabena eɖee fia be eteƒe madidi o Yudatɔwo agatrɔ yi wo denyigba dzi le Yuda. (Yeremya 25:12; 29:10) Ðikeke mele eme o be Daniel ka ɖe edzi be Yudatɔ siwo wote ɖe anyi la ava kpɔ gbɔdzɔe elabena ŋutsu aɖe si woyɔ be Kores nɔ fia ɖum xoxo le Persia. Ðe Yesaya megblɔe ɖi be Kores dzie woato ana ablɔɖe Yudatɔwo be woayi aɖagbugbɔ Yerusalem atso ahatu gbedoxɔa oa? (Yesaya 44:28–45:3) Gake Daniel menya alesi tututu nya ma adzɔe o. Eyata eyi edzi ƒo koko na Yehowa.
6. Nya ka dzie Daniel lɔ̃ ɖo le gbedodoɖa me?
6 Daniel he susu yi Mawu ƒe nublanuikpɔkpɔ kple amenuveve dzi. Elɔ̃ ɖe edzi ɖokuibɔbɔtɔe be Yudatɔwo wɔ nuvɔ̃ esi wodze aglã, trɔ ɖa le Yehowa ƒe sededewo ŋu, eye wogbe toɖoɖo eƒe nyagblɔɖilawo. Mawu tɔ dzɔ be ‘wònyã wo le esi wotrɔ ʋu le eyome ta.’ Daniel do gbe ɖa be: “[ Yehowa, NW ] mía kple míaƒe fiawo, míaƒe amegãwo kple mía fofowo, mí amesiwo wɔ nuvɔ̃ ɖe ŋuwò la, mía tɔe nye ŋukpe. Ke nublanuikpɔkpɔ kple tsɔtsɔke le [ Yehowa, NW ] mía Mawu la si; elabena míesẽ to ɖe eŋu, míese Yehowa, mía Mawu la ƒe gbe, ne míazɔ ɖe eƒe nufiame, siwo wòde asi na mí to eƒe dɔla nyagblɔɖilawo dzi la nu o. Israel blibo la da wò nufiamewo dzi, eye wòte ɖe aga hegbe wò gbesese, eyata fiƒode kple atam, siwo woŋlɔ ɖe Mawu ƒe dɔla Mose ƒe sea me la, va mía dzi, elabena míewɔ nuvɔ̃ ɖe eŋu.”—Daniel 9:5-11; Mose II, 19:5-8; 24:3, 7, 8.
7. Nukata míate ŋu agblɔ be esɔ be Yehowa ɖe mɔ Yudatɔwo yi aboyo me?
7 Mawu xlɔ̃ nu Israel-viwo le nusiwo ado tso tomaɖomaɖo eyama kple nubabla si wòwɔ kpli wo dzi dada me ŋu. (Mose III, 26:31-33; Mose V, 28:15; 31:17) Daniel lɔ̃ ɖe afɔ siwo Mawu ɖe dzi hegblɔ be: “[Ewɔ] eƒe nya, si wògblɔ ɖe mía kple míaƒe ʋɔnudrɔ̃la, siwo drɔ̃ ʋɔnu mí ŋu la dzi, be yeahe dzɔgbevɔ̃e, si meva me le dziƒo blibo la te kpɔ o la, ava mía dzii, abe alesi wòdzɔ ɖe Yerusalem dzii ene. Dzɔgbevɔ̃e siawo katã va mía dzi, abe alesi woŋlɔe ɖe Mose ƒe sea me ene; ke míeƒo koko na Yehowa, mía Mawu la, ne míaɖe asi le míaƒe vodadawo ŋu, eye míalé ŋku ɖe eƒe nyateƒe ŋu o. [Yehowa, NW ] ƒe ŋku nɔ te ɖe dzɔgbevɔ̃e la ŋu, eye wòhee va mía dzi, elabena Yehowa, mía Mawu tɔ dzɔ le nusiwo katã wòwɔ la me; ke míawo míegbe toɖoɖo eƒe gbe.”—Daniel 9:12-14.
8. Nuka dzie Daniel tu eƒe kukuɖeɖe na Yehowa ɖo?
8 Daniel medi nya aɖewo tsɔ do taflatse ɖe nusiwo eƒe amewo wɔ ta o. Wodze na woƒe aboyomenɔnɔa vavã, abe alesi wòʋu eme gblɔe ene be: “Míewɔ nuvɔ̃, eye míewɔ nu tovo.” (Daniel 9:15) Eye menye gbɔdzɔekpɔkpɔ tso fu si kpem wonɔ me ŋu koe wòtsi dzi ɖo o. Ao, Yehowa ŋutɔ ƒe ŋutikɔkɔe kple bubu tae wòɖe kuku ɖo. Ne Mawu tsɔ ke Yudatɔwo eye wòna wotrɔ yi wo denyigba dzi la, afia be ewɔ ɖe ŋugbe si wòdo to Yeremya dzi la dzi eye esia akɔ Eƒe ŋkɔ kɔkɔe la ŋu. Daniel ɖe kuku be: “[Yehowa, NW ] wò dɔmedzoe kple wò dziku nedzo ɖa le wò du Yerusalem, wò to kɔkɔe la ŋu le wò dzɔdzɔenyenye blibo la ta; elabena míaƒe nuvɔ̃wo kple mía fofowo ƒe vodadawo ta Yerusalem kple wò dukɔ la zu alɔmeɖenu na amesiwo katã ƒo xlã mí la ɖo.”—Daniel 9:16.
9. (a) Kukuɖenya kawoe Daniel tsɔ ƒo eƒe gbedodoɖaa tae? (b) Nukae ɖe fu na Daniel, gake aleke wòde bubu Mawu ƒe ŋkɔa ŋui?
9 Daniel yi edzi do gbe ɖa vevie be: “Eyata, mía Mawu, se wò dɔla ƒe gbedodoɖa kple eƒe kokoƒoƒo la, eye nana wò ŋku me naklẽ ɖe wò kɔkɔeƒe, si zu aƒedo la dzi; elabena wòe nye [Yehowa, NW ]. Mía Mawu, ƒu to anyi nase nu, eye nake ŋku akpɔ alesi míetsi gbegbee, kple du, si ŋu woyɔ wò ŋkɔ ɖo la ɖa; elabena menye míaƒe dzɔdzɔenyenye ta míebɔbɔ mía ɖokui ɖe anyi le koko ƒom na wò ɖo o, ke boŋ le wò nublanuikpɔkpɔ geɖe la tae. [Yehowa, see! Yehowa, tsɔe ke! Yehowa, NW ] ɖo ŋku anyi nawɔ nu, eye megahe ɖe megbe o, le wò ŋutɔ ɖokuiwò ta, nye Mawu! Elabena wò ŋkɔe woyɔ ɖe wò du la kple wò dukɔ la ŋu.” (Daniel 9:17-19) Ne Mawu metsɔ ke o eye wògblẽ eƒe dukɔ ɖe aboyo me, heɖe mɔ eƒe du kɔkɔe si nye Yerusalem ƒe aƒedozuzu nɔ anyi tegbee la, ɖe dukɔwo abui be enye Xexeame Katã ƒe Fiagã? Ðe womagblɔ be Yehowa mete ŋu nɔ te ɖe Babilontɔwo ƒe mawuwo nu oa? Ẽ, ado vlo Yehowa ƒe ŋkɔ, eye esia ɖe fu na Daniel. Gbedodoɖa sia mee Mawu ƒe ŋkɔ Yehowa si woyɔ zi gbɔ zi 19 le Daniel ƒe agbalẽa me la ƒe 18 dze le (le New World Translation me)!
GABRIEL VA DO ZI ÐEKA
10. (a) Amekae wodɔ ɖe Daniel gbɔ, eye nukatae? (b) Nukata Daniel yɔ Gabriel be “ŋutsu”?
10 Esi Daniel ganɔ gbedodoɖa dzi la, mawudɔla Gabriel do ɖe edzi. Egblɔ be: “Daniel, ɖe meva be, mafia nu wò. Esi nèdze kokoƒoƒo gɔme la, nya aɖe tso Mawu gbɔ, eye meva, be magblɔe na wò elabena wolɔ̃ wò; eyata lé to ɖe nya la ŋu, eye nalé to ɖe ŋutega la hã ŋu.” Gake nukatae Daniel yɔe be “ŋutsu Gabriel” ɖo? (Daniel 9:20-23) Eyae nye be esime Daniel di be yease ŋutega si wòkpɔ va yi si ku ɖe gbɔ̃tsu kple agboa ŋu gɔme la, ‘ame aɖe si le abe ŋutsu ene’ do ɖe eŋkume. Mawudɔla Gabriel ye, amesi wodɔ be wòava ɖe egɔme na Daniel. (Daniel 8:15-17) Nenema ke le Daniel ƒe gbedodoɖa vɔ megbe la, mawudɔla sia te ɖe eŋu le amegbetɔ ƒe nɔnɔme me eye wòƒo nu nɛ abe alesi ame ƒoa nu na nɔvia ene.
11, 12. (a) Togbɔ be Yehowa ƒe gbedoxɔ loo alo vɔsamlekpui menɔ Babilon o hã la, aleke Yudatɔ mawuvɔ̃lawo de bubu vɔsa siwo Sea bia ŋui? (b) Nukata wogblɔ be ‘wolɔ̃’ Daniel ‘vevie’?
11 Gabriel va ɖo “le fiẽvɔsaɣi.” Wogbã Yehowa ƒe vɔsamlekpuia kpe ɖe gbedoxɔa ŋu le Yerusalem, eye Babilontɔ trɔ̃subɔlawo ɖe aboyo Yudatɔwo. Eyata Yudatɔwo megasaa vɔ na Mawu le Babilon o. Gake esɔ be Yudatɔ mawuvɔ̃la siwo le Babilon nakafu Yehowa ahaƒo koko nɛ le ɣeyiɣi si woɖo le Mose ƒe Sea te be woatsɔ asa vɔe dzi. Esi Daniel nye ŋutsu si tsɔ eɖokui katã na Mawu ta la, wogblɔ be enye ‘amesi wolɔ̃ vevie.’ Eƒe nu dzɔ dzi na Yehowa si nye ‘Gbedodoɖasela’ la, eye wòdɔ Gabriel ɖa kaba be wòava ɖo Daniel ƒe xɔse ƒe gbedodoɖaa ŋu.—Psalmo 65:3.
12 Esime gbedodoɖa na Yehowa de Daniel ƒe agbe afɔku me hã la, eyi edzi do gbe ɖa na Mawu gbeɖeka zi etɔ̃. (Daniel 6:10, 11) Mewɔ nuku o be eƒe nu nyo Yehowa ŋu ale gbegbe! Tsɔ kpe ɖe gbedodoɖa ŋu la, alesi Daniel dea ŋugble le Mawu ƒe Nya la ŋui kpe ɖe eŋu wònya nusi nye Yehowa ƒe lɔlɔ̃nu. Daniel nɔ gbedodoɖa dzi ɣesiaɣi eye wònya alesi wòado ɖe Yehowa ŋkume le mɔ nyuitɔ nu ale be wòaɖo eƒe gbedodoɖawo ŋu. Ete gbe ɖe Mawu ƒe dzɔdzɔenyenye dzi. (Daniel 9:7, 14, 16) Eye togbɔ be Daniel ƒe futɔwo mete ŋu kpɔ vodada aɖeke le eŋu o hã la, enya be nuvɔ̃wɔlae yenye le Mawu ŋkume eye wòlɔ̃ faa ʋu eƒe nuvɔ̃ me.—Daniel 6:4; Romatɔwo 3:23.
“KWASIÐA BLAADRE” SIWO ME WOATSI NUVƆ̃ NU
13, 14. (a) Nya vevi kae Gabriel gblɔ na Daniel? (b) Alekee nye “kwasiɖa blaadre” la ƒe didime, eye aleke míewɔ nya?
13 Aleke gbegbe wòɖo eŋu na Daniel si lɔ̃a gbedodoɖa lae nye si! Menye ɖeko Yehowa ka ɖe edzi nɛ be woagbugbɔ Yudatɔwo aɖo te le wo denyigba dzi o ke egana wònya nane si le vevie wu sã—eyae nye Mesia si ƒe nya wogblɔ ɖi la ƒe vava. (Mose I, 22:17, 18; Yesaya 9:5, 6) Gabriel gblɔ na Daniel be: “Kwasiɖa blaadre woɖo ɖe wò dukɔ kple wò du kɔkɔe la ŋu, ne woaxe mɔ na dzidada, eye woatsi [nuvɔ̃] nu, woalé avu ɖe vodada nu, eye woahe dzɔdzɔenyenye mavɔ vɛ, woaɖo kpe ŋutega kple nyagblɔɖiwo dzi, eye woakɔ nu kɔkɔetɔ ŋu. Azɔ nyae, eye naƒu to anyi: Tso ɣeyiɣi, si wode se be, woagatso Yerusalem vaseɖe amegã, si wosi ami na dzi la, le kwasiɖa adre; eye woatsɔ kwasiɖa blaade vɔ eve atso ablɔwo kple kpɔdomeewo le xaxaɣi.”—Daniel 9:24, 25.
14 Esia nye nyanyui vavã! Menye ɖe woagbugbɔ Yerusalem atso agbugbɔ tadedeagu dzadzɛ aɖo anyi le gbedoxɔ yeye me ko o ke “amegã, si wosi ami na” la hã ado le ɣeyiɣi ɖoɖi aɖe dzi. Esia adzɔ le “kwasiɖa blaadre” me. Esi Gabriel meyɔ ŋkekewo o ta la, womenye kwasiɖa siwo dometɔ ɖesiaɖe nye ŋkeke adre, siwo katã anye ŋkeke 490—si nye ƒe ɖeka kple ɣleti ene pɛ ko o. Yerusalem kple eƒe “ablɔwo kple kpɔdomeewo” gbugbɔgatso si wogblɔ ɖi la xɔ ɣeyiɣi si didi wu ema. Kwasiɖaawo nye ƒewo ƒe kwasiɖawo. Nyateƒe si wònye be kwasiɖaawo dometɔ ɖesiaɖe nye ƒe adre la dze le egbegbe Biblia gɔmeɖeɖe geɖe me. Le kpɔɖeŋu me, Daniel 9:24 ƒe etenuŋɔŋlɔ si le Tanakh—The Holy Scriptures, si Yudatɔwo ƒe Agbalẽtaha ta me yɔe be “ƒewo ƒe kwasiɖa blaadre.” An American Translation xlẽ be: “Ƒewo ƒe kwasiɖa blaadre ye woɖo ɖi na wò dukɔ kple wò du kɔkɔe la.” Moffatt kple Rotherham ƒe gɔmeɖeɖeawo hã gblɔe nenema tɔgbe.
15. Ɣeyiɣi etɔ̃ kawo mee womã “kwasiɖa blaadre” la ɖo, eye ɣekaɣie woadze egɔme?
15 Mawudɔla la ƒe nyawo fia be woamã “kwasiɖa blaadre” la me ɖe akpa etɔ̃: (1) “kwasiɖa adre,” (2) “kwasiɖa blaade vɔ eve,” kple (3) kwasiɖa ɖeka. Esia anye ƒe 49, ƒe 434, kple ƒe 7—si katã nye ƒe 490. Enyo be míade dzesii be The Revised English Bible xlẽ be: “Woɖo ƒe blaadre teƒe adre na wò dukɔ kple wò du kɔkɔe la.” Le Yudatɔwo ƒe aboyomenɔnɔ kple fukpekpe le Babilon ƒe 70 megbe la, Mawu ƒe amenuveve tɔxɛ anɔ wo dzi ƒe 490, alo ƒe 70 teƒe 7. Adze egɔme “tso ɣeyiɣi, si wode se be, woagatso Yerusalem” dzi. Ɣekaɣie wòanye?
“KWASIÐA BLAADRE” LA DZE EGƆME
16. Tameɖoɖo ka tae Kores na Yudatɔwo trɔ yi wo denyigba dzi, abe alesi se si wòde ɖee fia ene?
16 Ele be míalé ŋku ɖe nudzɔdzɔ ɖedzesi etɔ̃ aɖewo siwo ku ɖe “kwasiɖa blaadre” la ƒe gɔmedzedze ŋu la ŋuti. Gbãtɔ dzɔ le ƒe 537 D.M.Ŋ. me esime Kores de se si ɖe mɔ na Yudatɔwo be woatrɔ yi wo denyigba dzi. Exlẽ be: “Persia-fia Kores ƒe gbe enye si: Yehowa, dziƒo Mawu la, tsɔ anyigba dzi fiaɖuƒewo katã nam, eye wòde se nam be, matu xɔ na ye ɖe Yerusalem le Yuda. Eyata mi eƒe dukɔ la dome amesiame neyi Yerusalem le Yuda, eye eƒe Mawu anɔ kplii, ne wòatu xɔ na Yehowa, Israel ƒe Mawu, si nye Mawu le Yerusalem. Eye amesiwo tsi teƒe, siwo katã wole la, teƒe la nɔlawo natsɔ klosalo kple sika, kesinɔnu kple lãwo na wo akpe ɖe nunana, siwo woana faa, ɖe Mawu ƒe aƒe, si le Yerusalem ŋu la ŋuti.” (Ezra 1:2-4) Edze ƒã be sedede sia ƒe taɖodzinu koŋue nye be woagbugbɔ gbedoxɔ—‘Yehowa ƒe aƒe’—atu ɖe afisi wònɔ tsã.
17. Nukae dze le lɛta si wotsɔ na Ezra me si ta wòzɔ mɔ yi Yerusalem?
17 Nu evelia dzɔ le Persia Fia Artaxsasta (Xerxes I ƒe viŋutsu Artaxsasta Longimanus) ƒe fiaɖuɖu ƒe ƒe adrelia me. Ɣemaɣi la, agbalẽŋlɔla Ezra tsɔ ɣleti ene zɔ mɔ tso Babilon yi Yerusalem. Exɔ lɛta vevi aɖe tso fia gbɔ vɛ, gake lɛtaa megblɔ be woɖe mɔ be woagbugbɔ Yerusalem atso o. Ke boŋ dɔ si wode asi na Ezra enye be ‘wòaɖo atsyɔ̃ na Yehowa ƒe aƒe la.’ Ema tae woyɔ sika kple klosalo, nuzazã kɔkɔewo, kple nudzɔdzɔ siwo nye lu, wein, ami, kple dze siwo woazã le tadedeagu me le gbedoxɔa me ɖe lɛta la me, tsɔ kpe ɖe adzɔ si amesiwo asubɔ le afima magaxe o ŋu.—Ezra 7:6-27.
18. Nya kae ɖe fu na Nexemya, eye aleke Fia Artaxsasta wɔ va nya?
18 Nu etɔ̃lia dzɔ le ƒe 13 megbe, le Persia Fia Artaxsasta ƒe ƒe 20 lia me. Nexemya ye nye eƒe ahakula le “Susa-mɔ̃” la me ɣemaɣi. Ame susɔe siwo trɔ gbɔ tso Babilon gbugbɔ Yerusalem tso vaseɖe afi aɖe. Gake nuwo menɔ yiyim nyuie o. Nexemya se be ‘wogbã Yerusalem ƒe gliwo eye wotɔ dzo eƒe agbowo.’ Esia ɖe fu nɛ ŋutɔ, eye eƒe dzi xa nu. Esi wobia gbe Nexemya le eƒe blanuilélea ŋu la, eɖo eŋu be: “Fia nenɔ agbe tegbee! Nukaŋuti nyemaɖo adã o, esi du, si nye fofonyewo ɖiƒe la, zu aƒedo, eye dzo fiã eƒe agbowo la?”—Nexemya 1:1-3; 2:1-3.
19. (a) Esime Fia Artaxsasta bia gbe Nexemya la, nukae wòwɔ gbã? (b) Nukae Nexemya bia, eye aleke wòɖee gblɔe be Mawu ƒe asi nɔ nya la me?
19 Nuŋlɔɖi si ku ɖe Nexemya ŋu la yi edzi be: “Fia la gblɔ nam be: Nuka biam nèle? Tete medo gbe ɖa na dziƒo Mawu la, eye meɖo ŋu na fia la bena: Ne edze fia ŋu, eye wò dɔla ƒe nu nyo ŋuwò la, ekema ɖom ɖe fofonyewo ƒe ɖiƒedu la me le Yuda, ne magatsoe.” Nya sia dze Artaxsasta ŋu, eye wòtso ɖe nu bubu siwo Nexemya gabia ŋu, si nye be: “Ne edze fia ŋu la, ekema woana agbalẽm matsɔ ana anyigba dzikpɔlawo le [Frat] tɔsisi la ƒe go kemɛ, be woana matso me ayi, vaseɖe esime made Yuda, kple agbalẽ matsɔ na fia ƒe ave dzikpɔla Asaf, be wòatsɔ atiwo nam, ne matsɔ akpa [mɔ] la ƒe agbowo, siwo le gbedoxɔ kple du la ƒe gliwo kpakple aƒe, si me yi ge mala la ŋu.” Nexemya lɔ̃ ɖe edzi be Yehowa ƒe asi nɔ nya siawo katã me, eye wògblɔ be: “Tete fia la lɔ̃ [ɖe] edzi nam, elabena nye Mawu ƒe asi nyui le dzinye.”—Nexemya 2:4-8.
20. (a) Ɣekaɣie wowɔ ɖe se si wode “be, woagatso Yerusalem” la dzi? (b) Ɣekaɣie “kwasiɖa blaadre” la dze egɔme, eye ɣekaɣie wòwu enu? (d) Nukae ɖo kpe edzi be ɣeyiɣi si woɖo na “kwasiɖa blaadre” la ƒe gɔmedzedze kple nuwuwu la sɔ pɛpɛpɛ?
20 Togbɔ be woɖe mɔ le ɣleti si nye Nisan me, le Artaxsasta ƒe fiaɖuɖu ƒe ƒe 20 lia ƒe gɔmedzedze hã la, ɣleti aɖewo megbe hafi “wode se” ŋutɔŋutɔ “be, woagatso Yerusalem.” Esia va eme esime Nexemya va ɖo Yerusalem eye wòdze eƒe gbugbɔdzraɖodɔa gɔme. Ɣleti ene ye Ezra ƒe mɔzɔzɔa xɔ, gake Susa gbɔ didi kilometa 322 kple edzivɔ le Babilon ƒe ɣedzeƒe gome, si fia be egadidi le Yerusalem gbɔ wu. Eyata anɔ eme godoo be Nexemya va ɖo Yerusalem le Artaxsasta ƒe fiaɖuɖu ƒe ƒe 20 lia ƒe nuwuwu lɔƒo, alo le ƒe 455 D.M.Ŋ. me. Ɣemaɣie “kwasiɖa blaadre,” alo ƒe 490, si wogblɔ ɖi la dze egɔme. Awu enu le ƒe 36 M.Ŋ. ƒe akpa mamlɛa me.—Kpɔ “Ɣekaɣie Artaxsasta Dze Fiaɖuɖu Gɔme?” le axa 197.
“AMEGÃ, SI WOSI AMI NA” LA DO
21. (a) Nukae wogblɔ be woawɔ le “kwasiɖa adre” me, togbɔ be nɔnɔme kawoe anɔ anyi hã? (b) Ƒe ka mee woɖoe be Mesia la nado, eye nukae Luka ƒe Nyanyuigbalẽa gblɔ be edzɔ ɣemaɣi?
21 Ƒe nenie va yi hafi wogbugbɔ Yerusalem tso ŋutɔŋutɔ? Wogblɔ be woagbugbɔ dua atso “le xaxaɣi” le masɔmasɔ siwo nɔ Yudatɔwo ŋutɔ dome kpakple Samariatɔwo kple ame bubuwo ƒe tsitretsiɖeŋu ta. Kpeɖodziwo li si fia be wowu dɔa nu alesi dze le ƒe 406 D.M.Ŋ. me lɔƒo—le “kwasiɖa adre” alo ƒe 49 me. (Daniel 9:25) Kwasiɖa 62, alo ƒe 434, akplɔe ɖo. Le ɣeyiɣi ƒe didime ma megbe la, Mesia si ƒe ŋugbe wodo ɣeyiɣi didi aɖe la ado. Ne míexlẽ ƒe 483 (ƒe 49 kple 434) tso ƒe 455 D.M.Ŋ. me la, akplɔ mí va ɖo ƒe 29 M.Ŋ. me. Nukae dzɔ ɣemaɣi? Nyanyuigbalẽŋlɔla Luka gblɔ na mí be: “Le kaisaro Tiberio ƒe fiaɖuɖu ƒe ƒe wuiatɔ̃lia me, esi Pontio Pilato le mɔ̃mefia ɖum le Yudea, eye Herodes enye dziɖula le Galilea . . . la, Mawu ƒe nya va Yohanes, Zaxarya vi la gbɔ le gbedzi. Eye wòva Yordan-nutowo katã me godoo hele gbeƒã ɖem dzimetɔtrɔ ƒe [nyɔnyrɔxɔxɔ, NW ] hena nuvɔ̃wo ƒe keke.” Ɣemaɣi la, “dukɔ la [nɔ] mɔkpɔkpɔ me” na Mesia la.—Luka 3:1-3, 15.
22. Ɣekaɣie Yesu va zu Mesia si wogblɔ ɖi la, eye to mɔ ka nu?
22 Menye Yohanes ye nye Mesia si ƒe ŋugbe wodo la o. Gake Yohanes gblɔ le nusi teƒe wòkpɔ le Yesu si tso Nazaret la ƒe nyɔnyrɔxɔɣi, le ƒe 29 M.Ŋ. ƒe kele me ŋu be: “Mekpɔ gbɔgbɔ la le ɖiɖim tso dziƒo abe akpakpa ene, eye wònɔ edzi. Eye nyemenyae o; ke amesi dɔm be, mana nyɔnyrɔ amewo kple tsi la, eya ke gblɔ nam bena: Amesi ke dzi nakpɔ be gbɔgbɔ la le ɖiɖim ɖo, eye wònɔ edzi la, eyae nye amesi le nyɔnyrɔ nam amewo kple gbɔgbɔ kɔkɔe la. Eye nye la mekpɔe, eye meɖi ɖase bena, amesia enye Mawu ƒe Vi.” (Yohanes 1:32-34, NW ) Esi Yesu xɔ nyɔnyrɔ la, eva zu Amesiamina—Mesia, alo Kristo. Emegbe kpuie la, Yohanes ƒe nusrɔ̃la Andrea do go Yesu si wosi ami na la eye wògblɔ na Simon Petro be: “Míekpɔ Mesia la.” (Yohanes 1:41) Alea wòdzɔe be “amegã, si wosi ami na” la do le ɣeyiɣia dzi tututu—le kwasiɖa 69 ƒe nuwuwu!
KWASIÐA MAMLƐTƆ ME NUDZƆDZƆWO
23. Nukata wòle be “amegã, si wosi ami na” la naku, eye ɣekaɣie wogblɔ be esia adzɔ?
23 Nukae wogblɔ be woawɔ le kwasiɖa 70 lia me? Gabriel gblɔ be “kwasiɖa blaadre” woɖo “ne woaxe mɔ na dzidada, eye woatsi [nuvɔ̃] nu, woalé avu ɖe vodada nu, eye woahe dzɔdzɔenyenye mavɔ vɛ, woaɖo kpe ŋutega kple nyagblɔɖiwo dzi, eye woakɔ nu kɔkɔetɔ ŋu.” Hafi esia nava eme la, ele be “amegã, si wosi ami na” la naku. Ɣekaɣi? Gabriel gblɔ be: “Le kwasiɖa blaade vɔ eve megbe la woatsrɔ̃ amesiamina la fɔmaɖimaɖii. . . . Abla nu sesẽ kple ame geɖewo kwasiɖa ɖeka, eye le kwasiɖa afã me la atsi akpedavɔsa kple nuɖuvɔsa nu.” (Daniel 9:26a, 27a) Ɣeyiɣi vevi sia ava “le kwasiɖa afã me,” si nye ƒewo ƒe kwasiɖa mamlɛtɔa ƒe domedome.
24, 25. (a) Abe alesi wogblɔe ɖi ene la, ɣekaɣie Kristo ku, eye nukae eƒe ku kple tsitretsitsi he va nuwuwui? (b) Nuka ƒe mɔnue Yesu ƒe kua ʋu ɖi?
24 Yesu Kristo dze eƒe dutoƒosubɔsubɔdɔa gɔme le ƒe 29 M.Ŋ. ƒe nuwuwu lɔƒo eye wòwɔ dɔa ƒe etɔ̃ kple afã. Abe alesi wogblɔe ɖi ene la, ‘wotsrɔ̃’ Kristo le ƒe 33 M.Ŋ. ƒe gɔmedzedze esime wòku le fuwɔameti ŋu, hetsɔ eƒe amegbetɔ ƒe agbe na tafee ɖe ameƒomea ta. (Yesaya 53:8; Mateo 20:28) Wodzudzɔ lãwo ƒe vɔsawo kple akpedavɔsa siwo Sea bia la esime Yesu si wofɔ ɖe tsitre tsɔ eƒe amegbetɔ ƒe agbe si wòtsɔ sa vɔe ƒe asixɔxɔ yi na Mawu le dziƒo. Togbɔ be Yuda-nunɔlawo yi edzi saa vɔ vaseɖe esime wotsrɔ̃ Yerusalem ƒe gbedoxɔa le ƒe 70 M.Ŋ. me hã la, vɔsa mawo megadze Mawu ŋu o. Vɔsa si nyo wu si anɔ anyi ɖaa va xɔ ɖe wo teƒe. Apostolo Paulo ŋlɔ bena: “[Kristo tsɔ] vɔsa ɖeka na ɖe nuvɔ̃wo ta . . . Elabena vɔsa ɖeka wòtsɔ wɔ amesiwo ŋuti wokɔ la blibo halase [tegbee].”—Hebritɔwo 10:12, 14.
25 Togbɔ be nuvɔ̃ kple ku yi edzi le fu wɔm ameƒomea hã, Yesu tsɔtsrɔ̃ le ku me kple eƒe tsitretsitsi yi dziƒogbenɔnɔ me na nyagblɔɖia va eme. ‘Exe mɔ na dzidada, etsi nuvɔ̃ nu, elé avu ɖe vodada nu, eye wòhe dzɔdzɔenyenye vɛ.’ Mawu ɖe Se ƒe nubabla si klo nu le Yudatɔwo ŋu hebu fɔ wo be wonye nuvɔ̃wɔlawo la ɖa. (Romatɔwo 5:12, 19, 20; Galatiatɔwo 3:13, 19; Efesotɔwo 2:15; Kolosetɔwo 2:13, 14) Fifia woate ŋu ate fli ɖe nuvɔ̃wɔla siwo trɔ dzime ƒe nuvɔ̃wo me ahaɖe eƒe tohehewo hã ɖa. Mesia ƒe avulévɔsa la wɔe be ƒomedodo nyui te ŋu va nɔ amesiwo ɖe xɔse fia kple Mawu dome. Woate ŋu akpɔ mɔ be yewoaxɔ Mawu ƒe nunana si nye “agbe mavɔ le Kristo Yesu . . . me.”—Romatɔwo 3:21-26; 6:22, 23; Yohanes I, 2:1, 2.
26. (a) Togbɔ be woɖe Se ƒe nubablaa ɖa hã la, nubabla kae ‘nɔ dɔ wɔm le kwasiɖa ɖeka me’? (b) Nukae dzɔ le kwasiɖa 70 lia ƒe nuwuwu?
26 Alea wòdzɔe be Yehowa to Kristo ƒe kua dzi ɖe Se ƒe nubabla la ɖa le ƒe 33 M.Ŋ. me. Ekema aleke míate ŋu agblɔ be Mesia la “abla nu sesẽ kple ame geɖewo kwasiɖa ɖeka”? Elabena ena Abraham ƒe nubabla la ganɔ dɔ wɔm. Mawu ʋu nubabla ma me yayrawo ƒe mɔ ɖi na Abraham ƒe dzidzimevi Hebritɔwo vaseɖe esime kwasiɖa 70 lia wu enu. Gake le ƒewo ƒe ‘kwasiɖa blaadreawo’ ƒe nuwuwu le ƒe 36 M.Ŋ. me la, apostolo Petro ɖe gbeƒã na Italiatɔ Kornelio si nye mawuvɔ̃la, eƒe aƒemetɔwo, kple Dukɔwo me tɔ bubuwo. Eye tso gbemagbe dzi la, wote gbeƒãɖeɖe nyanyuia na dukɔwo me tɔwo.—Dɔwɔwɔwo 3:25, 26; 10:1-48; Galatiatɔwo 3:8, 9, 14.
27. “Nu kɔkɔetɔ” kae wosi ami na, eye le mɔ ka nu?
27 Woƒo nu tso amisisi na “nu kɔkɔetɔ” hã ŋu le nyagblɔɖia me. Menye amisisi na Yerusalem-gbedoxɔa ƒe Kɔkɔeƒewo ƒe Kɔkɔeƒe, alo xɔ ememetɔ lae esia nye o. “Nu kɔkɔetɔ” si wowɔnɛ le afisia lae nye Mawu ƒe kɔkɔeƒe si le dziƒo. Afimae Yesu tsɔ eƒe amegbetɔvɔsa ƒe asixɔxɔ yi na Fofoa le. Vɔsa ma si ami na gbɔgbɔmenɔƒe ma si le dziƒo si avɔgbadɔ kple gbedoxɔ si wova tu emegbe le anyigba dzi la ƒe Kɔkɔeƒewo ƒe Kɔkɔeƒea tsi tre ɖi na la, alo ɖee ɖe vovo.—Hebritɔwo 9:11, 12.
MAWU ÐO KPE NYAGBLƆÐIA DZI
28. Nukae wòfia be “woaɖo kpe ŋutega kple nyagblɔɖiwo dzi”?
28 Mesia ŋuti nyagblɔɖi si mawudɔla Gabriel gblɔ la hã ƒo nu tso ‘kpeɖoɖo ŋutega kple nyagblɔɖi dzi’ ŋu. Esia fia be Mawu ada asi ɖe nya sia nya si wogblɔ ɖi le Mesia la ŋu—nusianu si wòwɔ to eƒe vɔsasa, tsitretsitsi, kple dziƒoyiyi dzi, kpakple nu bubu siwo dzɔ le kwasiɖa 70 lia me la katã—dzi, woava eme, eye woate ŋu aɖo ŋu ɖe wo ŋu. Woatre ŋutega la nu wòava eme ɖe Mesia la ɖeɖeko dzi. Eya kple dɔ siwo Mawu awɔ to edzie ana emenyawo nava eme. Mesia si ƒe nya wogblɔ ɖi la ŋu koe woate ŋu atsɔ ŋutega la ƒe gɔmeɖeɖe nyuitɔ aku ɖo wòasɔ. Egɔmeɖeɖe ƒe mɔnu bubu aɖeke megali o.
29. Nukae adzɔ hafi woagbugbɔ Yerusalem atso, eye susu ka tae?
29 Gabriel gblɔe ɖi do ŋgɔ be woagbugbɔ Yerusalem atso. Fifia ya egblɔe ɖi be woatsrɔ̃ du ma si wogbugbɔ tso la kple eƒe gbedoxɔa, esi wògblɔ be: “Amegã, si le vava ge la ƒe dukɔ agbã du la kple kɔkɔeƒe la, eye enu ayi abe tɔsisie kplɔe dzoe ene; aʋawɔwɔ kple aƒedo anɔ anyi vaseɖe nuwuwu. . . . Ŋunyɔ, si mele gbɔgblɔ me o la, axɔ ɖe wo teƒe vaseɖe nuwuwu, si woɖo; emegbe woatrɔ gbegblẽ aƒo ɖe nugblẽla dzi.” (Daniel 9:26b, 27b) Togbɔ be aƒedozuɣi sia ava le ‘kwasiɖa blaadreawo’ megbe hã la, anye “kwasiɖa” mamlɛtɔa si me Yudatɔwo gbe Kristo eye wona wowui la me nudzɔdzɔwo me tsonu tẽ.—Mateo 23:37, 38.
30. Abe alesi ŋutinyamenuŋlɔɖi ɖee fia ene la, aleke nusi Gamedzinɔla Gãtɔ ɖo la va emee?
30 Ŋutinyamenuŋlɔɖi ɖee fia be le ƒe 66 M.Ŋ. me la, Roma-srafo siwo nɔ Siria Mɔmefia Cestius Gallus te ɖe to ɖe Yerusalem. Togbɔ be Yudatɔwo xe mɔ na Roma-srafo siwo tsɔ woƒe trɔ̃subɔsubɔ ƒe dzesiwo, alo aflagawo, ɖe asi hã la, woge ɖe dua me eye wodze gbedoxɔa ƒe gli si le dzigbe gome la te kuku gɔme. Woƒe afima nɔnɔ na wozu “ŋunyɔnu” si ate ŋu ahe aƒedozuzu keŋkeŋ vɛ. (Mateo 24:15, 16) Le ƒe 70 M.Ŋ. me la, Romatɔ siwo nɔ Aʋafia Titus te va kɔ ɖi abe “tɔsisie” ene eye wowɔ dua kple eƒe gbedoxɔ aƒedoe. Naneke mexe mɔ na wo o, elabena Mawu de se—‘eɖoe’—be wòadzɔ alea. Gamedzinɔla Gãtɔ Yehowa gana eƒe nya va eme ake!
NUKAWO GƆMEE NÈVA SE?
• Esime Yerusalem ƒe aƒedozuzu ƒe 70 nɔ enu wum la, nya kawo Daniel gblɔ tsɔ ɖe kuku na Yehowa?
• Alekee nye “kwasiɖa blaadre” la ƒe didime, ɣekaɣie wòdze egɔme, eye ɣekaɣie wòwu enu?
• Ɣekaɣie “amegã, si wosi ami na” la do, eye ɣeyiɣi tɔxɛ ka mee ‘wotsrɔ̃e’ le?
• Nubabla kae ‘wowɔ kple ame geɖe le kwasiɖa ɖeka me’?
• Nukae dzɔ le “kwasiɖa blaadre” la megbe?
[Aɖaka/Nɔnɔmetata si le axa 197]
Ɣekaɣie Artaxsasta Dze Fiaɖuɖu Gɔme?
ŊUTINYAŊLƆLAWO ƒe nu mesɔ le ƒe si me Persia Fia Artaxsasta dze fiaɖuɖu gɔme ŋu o. Wo dometɔ aɖewo gblɔ be ƒe 465 D.M.Ŋ. mee woɖoe zi dzi elabena fofoa, Xerxes, dze fiaɖuɖu gɔme le ƒe 486 D.M.Ŋ. me eye wòku le eƒe fiaɖuɖu ƒe ƒe 21 lia me. Gake kpeɖodzi li be ƒe 475 D.M.Ŋ. mee Artaxsasta va nɔ fiazikpuia dzi hedze eƒe fiaɖuɖu ƒe ƒe gbãtɔ gɔme le ƒe 474 D.M.Ŋ. me.
Nuŋɔŋlɔ kple kpetata siwo woku le blema Persia-fiadu si nye Persepolis me ɖee fia be Xerxes ɖu fia ɖe fofoa Dario I ti. Ne ƒe 10 ye wotsɔ ɖu fia eye Xerxes ɖeɖe va ɖu fia ƒe 11 le Dario ƒe ku le ƒe 486 D.M.Ŋ. me megbe la, ke Artaxsasta ƒe fiaɖuɖu ƒe ƒe gbãtɔ anye ƒe 474 D.M.Ŋ.
Kpeɖodzi evelia ku ɖe Atenetɔ Aʋafia Themistocles ŋu, amesi ɖu Xerxes ƒe asrafowo dzi le ƒe 480 D.M.Ŋ. me. Emegbe Helatɔwo megava lɔ̃ eƒe nya o eye wotso enu be etsi tre ɖe dziɖuɖua ŋu. Themistocles si yi ɖadi takpɔkpɔ le Persia-fiaƒeme, afisi woxɔe nyuie le. Helatɔ ŋutinyaŋlɔla Thucydides gblɔ be esi Artaxsasta “va nɔ zi dzi megbe kpuie” ye nusia dzɔ. Helatɔ ŋutinyaŋlɔla Diodorus Siculus gblɔ be ƒe 471 D.M.Ŋ. mee Themistocles ku. Esi Themistocles bia be woana yeatsɔ ƒe ɖeka asrɔ̃ Persiagbe hafi Fia Artaxsasta nabia gbe ye ta la, anye be eƒe Asia Sue ɖoɖo mado megbe na ƒe 473 D.M.Ŋ. me o. Jerome ƒe agbalẽ si nye Chronicle of Eusebius ɖo kpe ɣeyiɣi ma dzi. Esi wònye Artaxsasta “va nɔ zi dzi megbe kpuie” ye Themistocles va ɖo Asia le ƒe 473 D.M.Ŋ. me ta la, Germanytɔ agbalẽnyala Ernst Hengstenberg gblɔ le eƒe agbalẽ si nye Christology of the Old Testament me be Artaxsasta ƒe fiaɖuɖu dze egɔme le ƒe 474 D.M.Ŋ. me, abe alesi agbalẽ bubuwo hã gblɔe ene. Egagblɔ be: “Artaxsasta ƒe fiaɖuɖu ƒe ƒe 20 lia ye nye ƒe 455 do ŋgɔ na Kristo.”
[Nɔnɔmetata si le axa 197]
Themistocles ƒe nɔnɔme si wokpa
[Nuwo ƒe nɔnɔme/Nɔnɔmetata si le axa 188, 189]
(Edze nyuie le agbalẽa ŋutɔ me)
“KWASIÐA BLAADRE”
“Wode se be, woagatso Yerusalem”
Wogbugbɔ Yerusalem tso
455
406
kwasiɖa 7
ƒe 49
kwasiɖa ƒe 62
434
D.M.Ŋ. M.Ŋ.
Mesia la do
Wotsrɔ̃ Mesia la
“Kwasiɖa blaadre” la ƒe nuwuwu
29 33 36
kwasiɖa 1
ƒe 7
[Nɔnɔmetata si xɔ axa 180]
[Nɔnɔmetata si xɔ axa 193]