Afi Kae Míeyina Ne Míeku?

1-3. Nya kawoe amewo biana le ku ŋu, eye aleke subɔsubɔha aɖewo ɖoa wo ŋui?

BIBLIA do ŋugbe be, gbe ɖeka ku “maganɔ anyi o.” (Nyaɖeɖefia 21:4) Le Ta 5 lia me la, míesrɔ̃e be tafea wɔe be míate ŋu anɔ agbe tegbee. Gake amewo gakpɔtɔ le kukum. (Nyagblɔla 9:5) Eya ta nya vevi aɖe si wòle be míabia ye nye, Nu kae dzɔna ɖe ame kukuwo dzi?

² Nyabiase ma ƒe ŋuɖoɖo le vevie na mí ŋutɔ, vevietɔ ne míaƒe ame vevi aɖe ku. Ðewohĩ míabia be: ‘Afi kae wòyi? Ðe wògale mía kpɔma? Ðe wòate ŋu akpe ɖe mía ŋua? Ðe míagate ŋu akpɔe akea?’

³ Ale si subɔsubɔhawo ɖoa nya siawo ŋu la to vovo tso wo nɔewo tɔ gbɔ. Wo dometɔ aɖewo fiaa nu be ne ènye ame nyui hafi ku la, àyi dziƒo, gake ne ènye ame baɖa la, àyi dzo mavɔ me. Bubuwo hã gblɔna be ne ame ku la, ezua gbɔgbɔ yi ɖawɔa ɖeka kple eƒe ƒometɔ siwo ku xoxo la. Eye subɔsubɔha bubu aɖewo hã gblɔna be ne ame ku la, wodrɔ̃ ʋɔnui, eye wògatrɔna dzɔna ɖe xexea me le ŋutilã bubu me, etea ŋu zua ame bubu loo alo lã.

 4. Susu vevi ɖeka kae dzena le nu siwo subɔsubɔhawo fiana tso ku ŋu me?

⁴ Edze ƒãa be subɔsubɔhawo ƒe nufiafiawo meto mɔ ɖeka o. Gake susu vevi ɖeka aɖe ya dzena le wo katã kloe ƒe nufiafiawo me. Wofiaa nu be ne ame ku la, eƒe akpa aɖe yia edzi nɔa agbe. Nyateƒeea?

5, 6. Nu kae dzɔna ɖe ame kukuwo dzi?

⁵ Yehowa nya nu si dzɔna ɖe ame kukuwo dzi. Egblɔ na mí be ne ame ku la, eƒe agbe nu tsona. Ku nye agbemanɔmanɔ. Eya ta ne ame ku la, megasea naneke le lãme o eye megabua tame hã o.a Ne ame ku la, mate ŋu akpɔ nu o, mate ŋu ase nu o, eye mate ŋu abu tame hã o.

⁶ Fia Salomo ŋlɔ bena, “kukuawo meganya naneke kura o.” Ame kukuwo mate ŋu alɔ̃ ame alo alé fu ame o, eye “dɔwɔwɔ alo ɖoɖowɔwɔ alo sidzedze alo nunya mele Tsiẽƒe” o. (Xlẽ Nyagblɔla 9:5, 6, 10.) Biblia gblɔ le Psalmo 146:4 be ne ame ku la, “eƒe tamesusuwo” katã nu yi.

 7. Nya kae Yesu gblɔ tso ku ŋu?

⁷ Esi Yesu xɔlɔ̃ Lazaro ku la, Yesu gblɔ na eƒe nusrɔ̃lawo be: “Mía xɔlɔ̃ Lazaro le alɔ̃ dɔm.” Gake menye ɖe Yesu nɔ gbɔgblɔm be Lazaro le ɖiɖim ɖe eme o. Yesu gblɔ kpee be: “Lazaro ku.” (Yohanes 11:11-14) Eya ta Yesu tsɔ ku sɔ kple alɔ̃dɔdɔ. Megblɔ be Lazaro yi dziƒo loo alo yi eƒe ƒometɔ siwo ku la gbɔ o. Eye megblɔ hã be Lazaro nɔ fu kpem le dzo mavɔ me alo trɔ dzɔ ame bubu alo lã aɖe o. Ao, ke boŋ ɖeko wòle abe ɖe Lazaro yi alɔ̃ me ʋĩi ene. Mawunyakpukpui bubu aɖewo tsɔ ku sɔ kple alɔ̃dɔdɔ. Biblia gblɔ be esi wowu Stefano la, “edɔ alɔ̃ le ku me.” (Dɔwɔwɔwo 7:60) Apostolo Paulo hã ŋlɔ bena Kristotɔ aɖewo “dɔ alɔ̃ le ku me.”—1 Korintotɔwo 15:6.

 8. Aleke míewɔ nya be Mawu mewɔ amegbetɔwo be woaku o?

⁸ Ðe Mawu wɔ Adam kple Xawa be woava ku gbe ɖeka? Kura o! Yehowa wɔ wo be woanɔ agbe tegbee le lãmesẽ blibo me. Esi Yehowa wɔ amegbetɔwo la, ede agbe mavɔ nɔnɔ ƒe didi wo me. (Nyagblɔla 3:11) Dzilawo medina be yewoakpɔ yewo viwo woatsi aku amegã alo nyagã ahaku o, eye nenema ko Yehowa hã sena le eɖokui me ku ɖe mía ŋui. Gake ne ɖe Mawu wɔ mí be míanɔ agbe tegbee la, ke nu ka tae míekuna?

 9. Nu ka tae se si Yehowa de na Adam kple Xawa la dzi wɔwɔ mesesẽ hafi o?

⁹ Yehowa gblɔ na Adam le Eden-bɔa me be: “Àte ŋu aɖu abɔmetiawo katã faa. Ke sidzedze nyui kple vɔ̃ ƒe atia ya la, mègaɖu eƒe tsetse aɖeke o, elabena gbe si gbe nàɖu eƒe ɖe la, ku kee nàku.” (1 Mose 2:9, 16, 17) Sedede ma dzi wɔwɔ mesesẽ o. Yehowa kpɔ mɔ agblɔ nu si nye nyui kple vɔ̃ la na Adam kple Xawa. Ne woɖo to Yehowa la, woaɖee afia be yewode bubu eƒe ŋusẽ ŋu. Woagaɖee afia hã be yewokpɔ ŋudzedze ɖe nu sia nu si wòna yewo la ŋu.

10, 11. (a) Aleke Satana na Adam kple Xawa gbe toɖoɖo Mawu? (b) Nu ka tae Adam kple Xawa mate ŋu ado taflatsɛ ɖe woƒe nuwɔnaa ta o?

¹⁰ Nublanuitɔe la, Adam kple Xawa tiae be yewomaɖo to Yehowa o. Satana bia Xawa be: “Vavãe Mawu gblɔ be migaɖu abɔmetiawo katã ƒe tsetse aɖeke oa?” Xawa ɖo eŋu nɛ be: “Míeɖua abɔmetiawo ƒe tsetse faa. Ke Mawu gblɔ le ati si le abɔa titina la ƒe tsetse ya ŋu be: ‘Migaɖu eƒe ɖeke o, ao, migaka asi eŋu o; be miagaku o.’”—1 Mose 3:1-3.

¹¹ Gake Satana gblɔ nɛ be: “Miele kuku ge akpɔ o. Elabena Mawu nyae be gbe si gbe miaɖu eƒe ɖe la, miaƒe ŋkuwo aʋu, eye mianɔ abe Mawu ene, anya nyui kple vɔ̃.” (1 Mose 3:4-6) Satana di be Xawa naxɔe ase be eya ŋutɔ ate ŋu atso nya me le nyui kple vɔ̃ ŋu na eɖokui. Eye wògada alakpa nɛ hã ku ɖe nu si adzɔ ɖe edzi ne eda Mawu ƒe se dzi la ŋu. Satana gblɔ be Xawa maku o, eya ta Xawa ɖu ati la ƒe tsetse aɖe eye wòna ɖe srɔ̃a hã wòɖu. Adam kple Xawa nya nyuie be Yehowa de se na yewo be yewomegaɖu atia ƒe tsetse o. Esi woɖu atia ƒe tsetsea la, ɖe woɖoe koŋ gbe wɔwɔ ɖe sedede si me kɔ ƒãa, si dzi wɔwɔ mesesẽ hafi o la dzi. Esi woɖu atia la, woɖee fia be yewomede bubu yewo Fofo lɔ̃ame si le dziƒo la ŋu o. Womate ŋu ado taflatsɛ ɖe woƒe nuwɔnaa ta o!

12. Nu ka tae wòwɔ nublanui ŋutɔ be Adam kple Xawa meɖo to Yehowa o?

¹² Ðe mewɔ nublanui ŋutɔ be mía dzila gbãtɔwo mede bubu wo Wɔla la ŋu oa! Aleke nàse le ɖokuiwò me ne èku kutri he viwò nyuie gake wòva dze aglã ɖe ŋuwò hewɔ nu siwo katã nègbe nɛ be megawɔ o la? Ðe mave wò ŋutɔ oa?

13. Nya si Yehowa gblɔ be “anyie nàgatrɔ azu” gɔme ɖe?

¹³ Esi Adam kple Xawa gbe toɖoɖo la, mɔnukpɔkpɔ si su wo si be woanɔ agbe mavɔ la ge le wo si. Yehowa gblɔ na Adam be: “Anyie nènye, eye anyie nàgatrɔ azu.” (Xlẽ 1 Mose 3:19.) Esia fia be Adam agatrɔ azu anyi, abe ɖe womegaxa wɔe gɔ̃ hã o ene. (1 Mose 2:7) Esi Adam wɔ nu vɔ̃ la, eku eye megali o.

14. Nu ka tae míekuna?

¹⁴ Ne ɖe Adam kple Xawa ɖo to Mawu la, anye ne wogakpɔtɔ le agbe egbea. Gake esi woda Mawu ƒe se dzi la, wowɔ nu vɔ̃, eye wova ku mlɔeba. Nu vɔ̃ le abe dɔléle vɔ̃ɖi aɖe si míexɔ le mía dzila gbãtɔwo ŋu ene. Wodzi mí katã míenye nu vɔ̃ wɔlawo, esia tae míekuna ɖo. (Romatɔwo 5:12) Gake menye tame siae Mawu ɖo ɖe amegbetɔwo ŋu o. Mawu meɖoe kpɔ be amegbetɔwo naku o, eye Biblia yɔ ku be “futɔ.”—1 Korintotɔwo 15:26.

15. Aleke nyateƒe si ku ɖe ku ŋu nyanya naa ablɔɖe mí?

¹⁵ Nyateƒe si ku ɖe ku ŋu nyanya naa ablɔɖe mí tso nufiafia totro geɖewo si me. Biblia fia mí be ame kukuwo mesea veve alo léa blanui o. Mímate ŋu aƒo nu kpli wo o, eye womate ŋu aƒo nu kpli mí o. Mímate ŋu akpe ɖe wo ŋu o, eye womate ŋu akpe ɖe mía ŋu o. Womate ŋu awɔ nu vevi mí o, eya ta mehiã be míavɔ̃ wo o. Gake subɔsubɔha geɖewo fiaa nu be ame kukuwo le agbe le teƒe aɖe, eya ta míate ŋu akpe ɖe wo ŋu ne míena ga fadawo kple pastɔwo alo ame bubu siwo wobua ame kɔkɔewoe. Gake ne míenya nu si Biblia gblɔ tso ku ŋu la, woƒe alakpanya mawo maflu mí o.

16. Alakpanya kae subɔsubɔha geɖewo gblɔna tso ame kukuwo ŋu?

¹⁶ Satana toa alakpasubɔsubɔhawo dzi blea mí míesusunɛ be ame kukuwo gakpɔtɔ le agbe. Le kpɔɖeŋu me, subɔsubɔha aɖewo fiaa nu be ne míeku la, míaƒe akpa aɖe yia edzi nɔa agbe le afi aɖe. Ðe subɔsubɔha si me nèle hã fiaa nu sia tɔgbia? Alo ɖe wòfiaa nu si Biblia gblɔ tso ame kukuwo ŋua? Satana zãa alakpanyawo tsɔ tea amewo ɖa tso Yehowa ŋu.

17. Nu ka tae nu si subsubɔhawo fiana be wowɔa fu amewo le dzo mavɔ me nye vlododo Yehowa?

¹⁷ Nu siwo subɔsubɔha geɖewo fiana la ɖi vɔvɔ̃. Le kpɔɖeŋu me, subɔsubɔha aɖewo fiaa nu be wowɔa fu ame vɔ̃ɖiwo le dzo mavɔ me tegbee. Nufiafia sia nye vlododo Yehowa. Mate ŋu awɔ funyafunya amewo nenema gbegbe o! (Xlẽ 1 Yohanes 4:8.) Aleke nàbu ame aɖe si lé ɖevi aɖe si wɔ nu gbegblẽ la ƒe asi de dzo me wòfiã? Àbu amea be enye tagbɔsẽla. Màdi be yeanya nu tso ame ma ŋu o. Alea tututue Satana di be míase le mía ɖokuiwo me ku ɖe Yehowa ŋui!

18. Nu ka tae mele be míavɔ̃ ame kukuwo o?

¹⁸ Subɔsubɔha aɖewo fiaa nu be ne amewo ku la, wozua gbɔgbɔwo. Subɔsubɔha mawo fiaa nu be ele be míade bubu gbɔgbɔ mawo ŋu alo avɔ̃ wo gɔ̃ hã, elabe woate ŋu azu agbagbeawo ƒe xɔlɔ̃ veviwo loo alo woƒe futɔ vɔ̃ɖiwo. Ame geɖe xɔ alakpanya siawo dzi se. Wovɔ̃na na kukuawo eye wosubɔa wo le esi teƒe be woasubɔ Yehowa. Ðo ŋku edzi be ame kukuwo mate ŋu ase naneke le lãme o, eya ta mele be míavɔ̃ wo o. Yehowae nye mía Wɔla. Eyae nye Mawu vavã la, eya ta eya ɖeka koe wòle be míasubɔ.—Nyaɖeɖefia 4:11.

19. Aleke nyateƒe si ku ɖe ku ŋu nyanya kpena ɖe mía ŋui?

¹⁹ Ne míenya nyateƒe si ku ɖe ku ŋu la, míevona tso subɔsubɔhawo ƒe alakpanufiafiawo si me. Eye nyateƒe sia kpena ɖe mía ŋu míesea ŋugbe nyui siwo Yehowa do ku ɖe míaƒe agbe kple míaƒe etsɔme ŋu la gɔme nyuie wu.

20. Nu kae míasrɔ̃ le ta si kplɔ esia ɖo me?

²⁰ Le blema la, mawusubɔla si ŋkɔe nye Hiob bia be: “Ne ame ku la, ɖe wòagagbɔ agbea?” (Hiob 14:14) Ðe wòanya wɔ be ame kukuwo nagbɔ agbea? Ale si Mawu ɖo nyabiase sia ŋu le Biblia me la wɔ dɔ ɖe ame dzi ŋutɔ. Míakpɔ esia le ta si kplɔ esia ɖo me.