‘Kpɔ Ŋunyɔnu Vɔ̃ɖi Siwo Wɔm Wole’

1-3. Nu kae Yehowa di be Ezekiel nakpɔ le gbedoxɔ si le Yerusalem la me, eye nu ka tae? (Kpɔ nɔnɔmetata siwo le Akpa 2.)

ESI nyagblɔɖila Ezekiel nye nunɔla ƒe vi ta la, enya Mose ƒe Sea nyuie. Eya ta enya nu tso gbedoxɔ si le Yerusalem kple tadedeagu dzadzɛ si wòle be woatsɔ na Yehowa le afi ma la ŋu. (Eze. 1:3; Mal. 2:7) Gake fifia, le ƒe 612 D.Y. me la, nu siwo nɔ edzi yim le Yehowa ƒe gbedoxɔa me la awɔ nuku na Yudatɔ wɔnuteƒe ɖe sia ɖe eye awɔ nuku na Ezekiel hã.

² Yehowa di be Ezekiel nakpɔ ale si nɔnɔmeawo gblẽ le gbedoxɔa me eye wòagblɔ nu si wòkpɔ la na “Yuda-metsitsiwo,” siwo nye etɔ Yudatɔ aboyome siwo va ƒo ƒu ɖe eƒe me la. (Xlẽ Ezekiel 8:1-4; Eze. 11:24, 25; 20:1-3) Yehowa to gbɔgbɔ kɔkɔea dzi kɔ Ezekiel (le ŋutega me) tso eƒe aƒe me le Tel-Abib si te ɖe Kebar-tɔsisia ŋu le Babilon kilometa gbogbo aɖewo yi Yerusalem ƒe ɣetoɖoƒe. Yehowa kplɔ nyagblɔɖilaa va gbedoxɔa me va dziehegbo si le xɔxɔnu emetɔ la gbɔ. Yehowa kplɔe ɖi tsa le gbedoxɔa me le ŋutega me tso teƒe sia.

³ Ezekiel kpɔ nu dovoɖiname ene si na wòkpɔ ale si gbegbe dukɔa ƒe mawusubɔsubɔ dome gblẽ kurae la. Nu kae dzɔ ɖe Yehowa ƒe tadedeagu dzadzɛa dzi? Eye nufiame kawoe le ŋutega sia me na mí egbea? Na míakplɔ Ezekiel ɖo esi wòle tsaa ɖim. Gake gbã la, na míade ŋugble tso nu si Yehowa di tso esubɔlawo si la ŋu.

4. Nu kae Yehowa di tso esubɔlawo si?

⁴ Ƒe alafa asieke aɖewo do ŋgɔ na Ezekiel ƒe ŋkekeawo la, Yehowa gblɔ nu si wòdi tso esubɔlawo si eme kɔ. Le se evelia si le Se Ewoawo me la, egblɔ na Israel-viwo be:a “Nye Yehowa wò Mawu la, Mawu si biaa ɖokuitsɔtsɔna blibo ye menye.” (2 Mose 20:5) Yehowa to nyagbɔgblɔ si nye “ɖokuitsɔtsɔna blibo” dzi ɖee fia be yemeda asi ɖe edzi be woasubɔ mawu bubu aɖeke o. Abe ale si míekpɔe le agbalẽ sia ƒe Ta 2 lia me ene la, ame si ko wòle be tadedeagu dzadzɛa nayi na ye nye Yehowa. Esiae nye tadedeagu dzadzɛa ƒe nudidi gbãtɔ. Ele be mawusubɔlawo natsɔ Mawu aɖo nɔƒe gbãtɔ le woƒe agbe me. (2 Mose 20:3) Kpuie ko la, Yehowa medi be ye subɔlawo natsɔ alakpasubɔsubɔ atsaka tadedeagu dzadzɛa o. Le ƒe 1513 D.Y. me la, Israel-viwo lɔ̃ eye wova nɔ Se ƒe nubabla la te. To esia me la, wolɔ̃ ɖe edzi be Yehowa ɖeɖe koe yewoasubɔ tso dzi blibo me. (2 Mose 24:3-8) Yehowa wɔ ɖe nubabla sia dzi nuteƒewɔwɔtɔe eye wòdi nuteƒewɔwɔ sia ke tso ame siwo wòbla nu kplii la si.—5 Mose 7:9, 10; 2 Sam. 22:26.

5, 6. Nu ka tae wòsɔ be Israel-viwo nasubɔ Yehowa ɖeɖe ko tso dzi blibo me?

⁵ Ðe wòsɔ be Yehowa nabia tso Israel-viwo si be woatsɔ subɔsubɔ blibo ana yea? Ɛ̃, esɔ! Eyae nye Mawu Ŋusẽkatãtɔ, Xexea Me Katã Ƒe Dziɖulagã kple Ame si gbɔ agbe dzɔ tso eye Wòlénɛ ɖe te. (Ps. 36:9; Dɔw. 17:28) Yehowa kee nye Israel-viwo Ðela. Esi wònɔ Se Ewoawo tsɔm na wo la, eɖo ŋku edzi na dukɔa be: “Nyee nye Yehowa wò Mawu, ame si kplɔ wò tso Egipte-nyigba dzi, afi si nye kluviƒe me.” (2 Mose 20:2) Esɔ be Israel-viwo nasubɔ Yehowa ɖeɖe ko tso dzi blibo me.

⁶ Yehowa metrɔna o. (Mal. 3:6) Ebiaa ɖokuitsɔtsɔna blibo ɣesiaɣi. Ekema bu ale si wòase le eɖokui me tso nu gbãdziname ene siwo wòɖe fia Ezekiel le ŋutega me ŋu kpɔ.

7. (a) Nu kae Yudatɔ siwo zu xɔsegbelawo la nɔ wɔwɔm le gbedoxɔa ƒe dziehegbo la nu, eye nu kae wona Yehowa wɔ? (Kpɔ nɔnɔmetata si le nyati sia ƒe gɔmedzedze.) (b) Mɔ ka nue wona Yehowa ʋã ŋu le? (Kpɔ etenuŋɔŋlɔ 2 lia.)

⁷ Xlẽ Ezekiel 8:5, 6. Ezekiel ƒe nu anya ku ŋutɔ! Yudatɔ siwo zu xɔsegbelawo la nɔ ta dem agu na ŋuʋaʋã ƒe legba le gbedoxɔa ƒe dziehegbo la nu. Ðewohĩ enye ati aɖe si le tsitre ɖi na Asera si nye Kanaantɔwo ƒe alakpamawunɔ si wobuna be enye Baal srɔ̃. Nu ka kee wòɖanye o Israel-vi siwo nɔ trɔ̃ subɔm la mewɔ ɖe nubabla si le wo kple Yehowa dome la dzi o. Esi wotsɔ subɔsubɔ si wòle be woatsɔ na Yehowa ɖeka kolia, si wòdzena la na legbawo ta la, wona Mawu ʋã ŋu; eye esia na etɔ dzɔ be wòado dziku.b (5 Mose 32:16; Eze. 5:13) Bu eŋu kpɔ ko: Anɔ ƒe 400 kple edzivɔ la, wobua gbedoxɔa be enye Yehowa nɔƒe. (1 Fia. 8:10-13) Gake fifia esi amewo va le trɔ̃ subɔm le gbedoxɔa me ta la, trɔ̃subɔla mawo na Yehowa ‘ɖe eɖokui ɖe aga ʋĩi tso eƒe kɔkɔeƒea gbɔ.’

8. Nufiame kae le ŋuʋaʋã ƒe legba si Ezekiel kpɔ le ŋutegaa me la me na mí egbea?

⁸ Nufiame kae le ŋuʋaʋã ƒe legba si Ezekiel kpɔ le ŋutegaa me na mí egbea? Yudatɔ siwo zu xɔsegbelawo nana míeɖoa ŋku Kristodukɔa dzi. Trɔ̃subɔsubɔ bɔ ɖe Kristodukɔa ƒe sɔlemeha geɖewo me si wɔe be woƒe subɔsubɔ ɖe sia ɖe nye dzodzro. Esi Yehowa metrɔna o ta la, míate ŋu aka ɖe edzi be Kristodukɔa hã ƒe nuwɔna na etɔ dzɔ be wòado dziku ɖe wo ŋu abe ale si ko wòdo dziku ɖe Yudatɔ siwo gbe xɔse la ŋu ene. (Yak. 1:17) Edze ƒãa be Yehowa ɖe eɖokui ɖa ʋĩi tso alakpasubɔsubɔ sia ƒomevi hã gbɔ!

9, 10. Nuxlɔ̃ame kae le trɔ̃subɔla siwo nɔ gbedoxɔa me ƒe nuwɔnawo me na mí?

⁹ Nuxlɔ̃ame kae le trɔ̃subɔla siwo nɔ gbedoxɔa me ƒe nuwɔnawo me na mí? Hafi míate ŋu asubɔ Yehowa bliboe la, ele be “[míasi] le trɔ̃subɔsubɔ nu.” (1 Kor. 10:14) Ðewohĩ àgblɔ be, ‘Nyemazã legbawo le Yehowa subɔsubɔ me gbeɖe o!’ Gake trɔ̃subɔsubɔ le mɔ vovovowo nu, ɖewo menya kpɔna dzea sii bɔbɔe o. Biblia ŋuti numekugbalẽ aɖe gblɔ be: “Nu sia nu si xɔ asi na ame, si ŋu ame ƒe susu katã nɔna wu ale si wòatsɔ subɔsubɔ blibo ana Mawu la, sɔ kple trɔ̃subɔsubɔ.” Ekema nu siwo ate ŋu anye trɔ̃subɔsubɔ ƒe ɖewoe nye nunɔamesiwo, ga, gbɔdɔdɔ, modzakaɖeɖe kple le nyateƒe me la, nu bubu ɖe sia ɖe si xɔa nɔƒe gbãtɔ le ame ƒe agbe me, eye wòva xɔna ɖe subɔsubɔ blibo si wòle be woatsɔ na Yehowa teƒe. (Mat. 6:19-21, 24; Ef. 5:5; Kol. 3:5) Ele be míakpɔ nyuie le trɔ̃subɔsubɔ ƒomevi ɖe sia ɖe ŋu elabena Yehowa ɖeɖe koe wòle be míasubɔ tso dzi blibo me!—1 Yoh. 5:21.

¹⁰ Le nu gbãtɔ si Yehowa ɖe fia Ezekiel me la, ekpɔ ‘ŋunyɔnu dziŋɔwo.’ Ke hã Yehowa gblɔ na eƒe nyagblɔɖila wɔnuteƒe la be: “Ègale nu siwo nyɔ ŋu sãa wu la kpɔ ge.” Nu bubu kae ate ŋu adzi ŋɔ wu ŋuʋaʋã ƒe legba ma si subɔm wonɔ le gbedoxɔa me?

11. Nu gbãdziname kawoe Ezekiel kpɔ esi wòge ɖe gbedoxɔa ƒe xɔxɔnu emetɔ si te ɖe vɔsamlekpuia ŋu la me?

¹¹ Xlẽ Ezekiel 8:7-12. Esi Ezekiel ŋɔ glia eye wòge ɖe gbedoxɔa ƒe xɔxɔnu la, ekpɔ “nu gbagbe siwo tana kple lã nyɔŋuwo katã kpakple . . . legba nyɔŋuwo” le gliawo ŋu.c Nu siwo wota ɖe gliawo ŋu la le tsitre ɖi na alakpamawuwo. Nu si gaɖe fu na Ezekiel vevie ye nye nu si wògakpɔ emegbe: “Israel ƒe aƒe la ƒe ametsitsiwo dometɔ blaadre” le tsitre ɖe “viviti me” eye wole dzudzɔ ʋeʋĩ dom na alakpamawuwo. Le Mose ƒe Sea me la, dzudzɔ ʋeʋĩ dodo le tsitre ɖi na gbe si mawusubɔla wɔnuteƒewo dona ɖa si dzea Mawu ŋu. (Ps. 141:2) Ke hã dzudzɔ ʋeʋĩ si ametsitsi 70 mawo do na alakpamawuwo la nye ʋeʋẽ kũu na Yehowa. Woƒe gbedodoɖawo va le abe ʋeʋẽ kũu ene. (Lod. 15:8) Ametsitsi mawo nɔ wo ɖokuiwo blem be: “Yehowa mele mía kpɔm o.” Gake Yehowa kpɔ wo, eye wòɖe nu si wɔm wonɔ le eƒe gbedoxɔa me la fia Ezekiel!

12. Nu ka tae wòle be míayi edzi awɔ nuteƒe le “viviti me” gɔ̃ hã, eye ame kawo koŋue wòle be woaɖo kpɔɖeŋu nyui le go sia me?

¹² Nu kae míate ŋu asrɔ̃ tso Israel-metsitsi 70 siwo nɔ dzudzɔ ʋeʋĩ dom na alakpamawuwo, si Ezekiel kpɔ la ƒe nuwɔna me? Ne míedi be Mawu nase míaƒe gbedodoɖawo eye míaƒe subɔsubɔ nadza le eŋkume la, ele be míayi edzi awɔ nuteƒe le “viviti me” gɔ̃ hã. (Lod. 15:29) Ele be míaɖo ŋku edzi be Yehowa ƒe ŋku siwo kpɔa nu le afi sia afi la le mía ŋu ɣesiaɣi. Ne Yehowa nye ame ŋutɔŋutɔ na mí la, míawɔ naneke le bebeme si míenya be madze eŋu o. (Heb. 4:13) Ele vevie be hamemetsitsiwo koŋ naɖo kpɔɖeŋu nyui anɔ agbe ɖe Biblia ƒe mɔfiamewo nu. (1 Pet. 5:2, 3) Hamea me tɔwo kpɔa mɔ be hamemetsitsi siwo xɔa ŋgɔ na yewo le mawusubɔsubɔ me le kpekpeawo me la nanɔ agbe ɖe Biblia ƒe mɔfiamewo nu le “viviti me,” si fia be ne ame bubuwo mele wo kpɔm o gɔ̃ hã.—Ps. 101:2, 3.

13. Nu kae Ezekiel kpɔ nyɔnu xɔsegbelawo wonɔ wɔwɔm le gbedoxɔa ƒe agboawo dometɔ ɖeka nu?

¹³ Xlẽ Ezekiel 8:13, 14. Esi Ezekiel kpɔ ŋunyɔnu eve gbãtɔawo vɔ megbe la, Yehowa gagblɔ nɛ be: “Ègale ŋunyɔnu siwo wɔm wole siwo dzi ŋɔ sãa wu la gɔ̃ hã kpɔ ge.” Nu kae nyagblɔɖilaa gakpɔ? Le “Yehowa ƒe aƒe la ƒe dziehegbo la nu” la, ekpɔ “nyɔnuwo bɔbɔ nɔ afi ma le avi fam na mawu Tamuz.” Tamuz nye Mesopotamiatɔwo ƒe trɔ̃ si woyɔna be Dumuzi le Sumertɔwo ƒe nuŋɔŋlɔwo me, eye wobui be enye vidzidzimawunɔ Ishtar srɔ̃.d Anɔ eme be Israel-nyɔnuawo nɔ avi fam wònye subɔsubɔkɔnu si wowɔna le Tamuz ƒe ku ta. Esi nyɔnuawo nɔ avi fam na Tamuz le Yehowa ƒe gbedoxɔa me ta la, nyɔnu mawo nɔ trɔ̃subɔsubɔkɔnu wɔm le afi si wotsɔa tadedeagu dzadzɛ naa Mawu le. Gake ne wowɔ trɔ̃subɔsubɔkɔnu le Mawu ƒe gbedoxɔ me gɔ̃ hã la, ema mefia be eŋu kɔ o. Le Yehowa ŋkume la, nyɔnu xɔsegbela mawo nɔ nu si nye “ŋunyɔnu” wɔm!

14. Nu kae míate ŋu asrɔ̃ tso ale si Yehowa bu nu si nyɔnu xɔsegbela mawo nɔ wɔwɔm la me?

¹⁴ Nu kae míate ŋu asrɔ̃ tso ale si Yehowa bu nu si nyɔnu mawo nɔ wɔwɔm la me? Be míaƒe subɔsubɔ nadza la, mele be míatsɔ trɔ̃subɔsubɔnuwɔna aɖeke atsakae o. Eya ta ele be míaɖe mía ɖokuiwo ɖa tso azã siwo dzɔ tso trɔ̃subɔsubɔ me la gbɔ. Ðe afi si wodzɔ tso la le veviea? Ɛ̃! Egbea, adze abe afɔku mele nu siwo wowɔna le azã aɖewo abe Kristmas kple Easter ene me o ene. Gake mele be míaŋlɔ be o be Yehowa nya afi si kɔnu siwo nye trɔ̃subɔlawo ƒe azã siwo woɖuna egbea la dzɔ tso. Le Yehowa ŋkume la, ne amewo ɖu trɔ̃subɔlawo ƒe azã mawo ƒe geɖe, alo wodze agbagba be yewoatsɔ azã mawo atsaka subɔsubɔ vavãtɔ gɔ̃ hã la, ŋunyɔnu ko wogakpɔtɔ nye.—2 Kor. 6:17; Nyaɖ. 18:2, 4.

15, 16. Nu ka wɔm ŋutsu 25 aɖewo nɔ le gbedoxɔa ƒe xɔxɔnu emetɔ la me, eye nu ka tae woƒe nuwɔnaa nye vlododo Yehowa?

¹⁵ Xlẽ Ezekiel 8:15-18. Hafi Yehowa naɖe nu enelia si nye mamlɛtɔ afia Ezekiel la, egagblɔ nya nyanyɛ siawo be: “Ègale ŋunyɔnu dziŋɔ siwo vɔ̃ɖi sãa wu esiawo la kpɔ ge.” Ðewohĩ nyagblɔɖilaa anɔ eɖokui biam be, ‘Nu bubu kae agate ŋu adzi ŋɔ wu esiwo mekpɔ va yi?’ Fifia Ezekiel le gbedoxɔa ƒe xɔxɔnu emetɔ la me. Le afi ma la, ekpɔ ŋutsu 25 wole ta dem agu na “ɣe ɖo ɖe ɣedzeƒe gome” le gbedoxɔa ƒe mɔnu. Nu si ŋutsu mawo wɔ la nye vlododo Yehowa ale gbegbe. Le mɔ ka nu?

¹⁶ Bu eŋu kpɔ: Mawu ƒe gbedoxɔa ƒe mɔnu dze ŋgɔ ɣedzeƒe. Ne ame siwo vaa gbedoxɔa me be yewoade ta agu le gegem ɖe gbedoxɔa me la, wodzea ŋgɔ ɣetoɖoƒe eye wotrɔa megbe dea ɣedzeƒe. Gake ŋutsu 25 siwo le ŋutegaa me la trɔ “megbe de . . . gbedoxɔ la” eye wodze ŋgɔ ɣedzeƒe be yewoade ta agu na ɣe. Woto esia me trɔ megbe de Yehowa elabena gbedoxɔ ma nye “Yehowa ƒe xɔ.” (1 Fia. 8:10-13) Xɔsegbelawoe ŋutsu 25 mawo nye. Wogbe Yehowa, eye woda se si le 5 Mose 4:15-19 la dzi. Kpɔ ale si gbegbe woƒe nuwɔna sia do dziku na Mawu, ame si ɖeɖe ko wòle be woasubɔ tso dzi blibo mee ɖa!

17, 18. (a) Nu kae míate ŋu asrɔ̃ tso ame siwo nɔ ɣe subɔm le gbedoxɔa me la ƒe nuwɔnaa me? (b) Ƒomedodo kawo mee Israel-vi xɔsegbelawo ƒe nuwɔnawo gblẽ, eye le mɔ ka nu?

¹⁷ Nu kae míate ŋu asrɔ̃ tso ame siwo nɔ ɣe subɔm la ƒe nuwɔnaa me? Be míaƒe subɔsubɔ nadza la, ele be míatrɔ ɖe Yehowa ŋu be wòana míadze nunya eye míase nu gɔme. Ðo ŋku edzi be, “Yehowa Mawu nye míaƒe ɣe,” eye eƒe Nya la nye “kekeli” na míaƒe toƒe. (Ps. 84:11; 119:105) Etoa eƒe Nya kple Biblia-srɔ̃gbalẽ siwo eƒe habɔbɔa tana dzi nana míaƒe dziwo kple susuwo me kɔna, eye wòkpena ɖe mía ŋu be míanɔ agbe si me dzidzeme le fifia eye míava kpɔ agbe mavɔ le etsɔme. Ne míetrɔna ɖe xexe sia ŋu be wòana míadze nunya la, ke efia be míetrɔ megbe de Yehowa. Esia ado dziku nɛ vevie eye wòado dzivee nɛ. Míadi gbeɖe be míawɔ nu sia ɖe mía Mawu la ŋu o! Ezekiel ƒe ŋutegaa hã nye nuxlɔ̃ame na mí be míatsri ame siwo trɔ megbe de nyateƒea, siwo nye xɔsegbelawo.—Lod. 11:9.

¹⁸ Abe ale si míekpɔe va yi ene la, Ezekiel kpɔ trɔ̃subɔsubɔnuwɔna nyɔŋu ene aɖewo siwo ɖe ale si gbegbe Yudatɔ xɔsegbelawo ƒe subɔsubɔ va nyɔ ŋui fia. Esi Israel-vi mawo ƒe subɔsubɔ va ƒo ɖi ta la, esia gblẽ ƒomedodo si le dukɔa kple Mawu dome la me. Eya ta ne ame ƒe subɔsubɔ medza o la, ke nya ku ɖe eƒe agbe nyui nɔnɔ hã ŋu. Eya ta mewɔ nuku o be Israel-vi xɔsegbela siawo wɔ nu baɖa geɖe, eye menye ɖeko esia gblẽ ƒomedodo si le wo kple Mawu dome la me ko evɔ o, ke egblẽ wo kple wo havi amegbetɔwo ƒe ƒomedodo hã me. Azɔ na míakpɔ ale si gbɔgbɔ ʋã nyagblɔɖila Ezekiel wòɖɔ ale si gbegbe Yudatɔ xɔsegbelawo ƒe nɔnɔmea vloe ɖa.

19. Nya kae Ezekiel gblɔ tso agbe manyomanyo si nɔm ame siwo Yehowa bla nu kplii le la ŋu?

¹⁹ Xlẽ Ezekiel 22:3-12. Dukɔa me tɔwo katã nɔ agbe manyomanyo nɔm, tso fiawo dzi va se ɖe dukɔmeviwo dzi. “Amegãwo” alo ŋgɔnɔlawo zãa woƒe ŋusẽ tsɔ kɔa ame maɖifɔwo ƒe ʋu ɖi. Dukɔa me tɔ akpa gãtɔ dze woƒe ŋgɔnɔlawo yome eye woŋe aɖaba ƒu Mawu ƒe Sewo dzi. Le ƒomewo me la, ɖeviwo “doa vlo” wo dzilawo, eye ƒometɔ kplikplikpliwo gbɔ dɔdɔ va bɔ. Israel-vi dzeaglãwo tafaa amedzroviwo eye wowɔa fu tsyɔ̃eviwo kple ahosiwo. Israel ŋutsuwo dɔa wo haviwo srɔ̃ gbɔ. Ameawo va zu ŋuklẽlawo ale gbegbe be woxɔa zãnu, tafaa amewo eye wodoa ga na amewo xɔa deme gbogbowo ɖe edzi. Kpɔ ale si gbegbe wòanya ve Yehowae be eƒe ame siwo wòbla nu kplii la ɖoe koŋ gbe wɔwɔ ɖe eƒe Sewo dzi eye woŋe aɖaba ƒu ale si wòlɔ̃ wo la dzii ɖa! Agbe manyomanyo si wonɔ la te ɖe Yehowa dzi ŋutɔ. Edɔ Ezekiel be wòagblɔ na ame gblẽku mawo be: ‘Mieŋlɔm be keŋkeŋ.’

20. Nu kae míesrɔ̃ tso agbe manyomanyo si Yudatɔwo nɔ si ŋu Ezekiel ƒo nu tsoe la me egbea?

²⁰ Nu kae míasrɔ̃ tso agbe manyomanyo si Yudatɔwo nɔ si ŋu Ezekiel ƒo nu tsoe la me? Nu baɖa wɔwɔ si va xɔ aƒe ɖe Yudatɔ siwo dze aglã dome la ɖoa ŋku ale si nu baɖa wɔwɔ bɔ ɖe xexe si me míele egbea me la dzi na mí. Dziɖula dunyahelawo zãa woƒe ŋusẽ le mɔ gbegblẽ nu eye wotea ame tsɛwo ɖe to. Subɔsubɔhakplɔlawo, vevietɔ Kristodukɔa ƒe hakplɔlawo yrana ɖe dukɔwo dome aʋawɔwɔ siwo na ame miliɔn geɖe bu woƒe agbe la dzi. Sɔlemehakplɔlawo tɔ tsi Biblia ƒe mɔfiame dzadzɛ siwo me kɔ siwo ku ɖe gbɔdɔdɔ ŋu. Esia wɔe be agbe nyui nɔnɔ va le to yim le xexea me. Ðikeke mele eme o be Yehowa agblɔ nya siwo wògblɔ na Yudatɔ xɔsegbelawo la ke na Kristodukɔa be: ‘Mieŋlɔm be keŋkeŋ.’

21. Nu kae míate ŋu asrɔ̃ tso agbe manyomanyo si blema Yudatɔwo nɔ la me?

²¹ Nu kae mí Yehowa ƒe amewo míate ŋu asrɔ̃ tso agbe manyomanyo si blema Yudatɔwo nɔ la me? Be Yehowa nakpɔ ŋudzedze ɖe míaƒe subɔsubɔ ŋu la, ele be míanɔ agbe dzadzɛ le nuwɔna ɖe sia ɖe me. Esia wɔwɔ mele bɔbɔe le xexe sia si me agbe baɖa nɔnɔ bɔ ɖo la me o. (2 Tim. 3:1-5) Ke hã, míenya ale si Yehowa sena le eɖokui me le agbe baɖa ɖe sia ɖe ŋu. (1 Kor. 6:9, 10) Míewɔna ɖe mɔfiame siwo Yehowa na ku ɖe agbe dzadzɛ nɔnɔ ŋu la dzi elabe míelɔ̃ Yehowa kple se siwo wòde la. (Ps. 119:97; 1 Yoh. 5:3) Ne míenɔa agbe manyomanyo la, ke efia be míelɔ̃ Mawu kɔkɔe si le dzadzɛ la o. Míadi be míawɔ nane si ana Yehowa nagblɔ na mí be: ‘Mieŋlɔm be keŋkeŋ’ gbeɖe o.

22. (a) Esi míedzro nu siwo Yehowa ɖe ɖe go ku ɖe blema Yudatɔwo ŋu me vɔ la, nu kae nèɖo kplikpaa be yeawɔ?(b) Nu ka mee míadzro le ta si kplɔe ɖo me?

²² Míesrɔ̃ nu vevi aɖewo tso nu siwo Yehowa ɖe ɖe go ku ɖe blema Yudatɔwo ƒe mawusubɔsubɔ kple agbe manyomanyo si wonɔ siwo me míedzro la me. Nyateƒee, esia do ŋusẽ mí be míaɖoe kplikpaa asubɔ Yehowa bliboe elabe esiae wòdze na. Eya ta ele be míatsri trɔ̃subɔsubɔ ƒomevi ɖe sia ɖe eye míayi edzi anɔ agbe dzadzɛ. Nu kae Yehowa wɔ le eƒe amewo ƒe nuteƒemawɔmawɔa ŋu? Esi Ezekiel wu tsaɖiɖi le gbedoxɔa me nu la, Yehowa gblɔ na eƒe nyagblɔɖila sia be: “Mawɔ nu le dziku me.” (Eze. 8:17, 18) Míadi be míanya to si Yehowa he na Yudatɔ mawɔnuteƒeawo elabena woadrɔ̃ ʋɔ̃nu sia tɔgbi xexe vɔ̃ɖi sia hã. Ta si kplɔe ɖo la adzro ale si Yehowa ƒe ʋɔnudɔdrɔ̃ va Yudatɔwo dzi la me.